ຮັກສາສາຍພົວພັນແບບເລືອດເນື້ອລະຫວ່າງພັກ - ປະຊາຊົນໄວ້ຢ່າງໝັ້ນຄົງ ເພື່ອຍົກສູງຖານະທີ່ຕັ້ງ ບົດບາດ ແລະ ຄວາມຮັບຜິດຊອບກຳອຳນາດ ຂອງພັກກອມມູນິດຫວຽດນາມ
ວ.ກ - ຮັກສາສາຍພົວພັນແບບເລືອດເນື້ອລະຫວ່າງພັກ - ປະຊາຊົນໄວ້ຢ່າງໝັ້ນຄົງ ເພື່ອຍົກສູງຖານະທີ່ຕັ້ງ ບົດບາດ ແລະ ຄວາມຮັບຜິດຊອບກຳອຳນາດ ຂອງພັກກອມມູນິດຫວຽດນາມ ແມ່ນບັນຫາໃຫຍ່ ສຳຄັນທີ່ສຸດ ແລະ ມີຄວາມໝາຍທາງດ້ານທິດສະດີ ກໍ່ຄືພຶດຕິກຳ ໃນເງື່ອນໄຂພັກການເມືອງໜຶ່ງກຳອຳນາດຢູ່ຫວຽດນາມ. ແກ້ໄຂບັນຫານີ້ໄດ້ ຈະປະກອບສ່ວນເຂົ້າໃນຜົນສຳເລັດ ຂອງພາລະກິດກໍ່ສ້າງສັງຄົມນິຍົມຢູ່ຫວຽດນາມ.
ກອງປະຊຸມໃຫຍ່ຜູ້ແທນທົ່ວປະເທດ ພັກກອມມູນິດຫວຽດນາມ ຄັ້ງທີ II ຊຶ່ງໄດ້ຈັດຕັ້ງຢູ່ຕາແສງວິງກວາງ ເມືອງຈຽມຮ໋ວາ ແຂວງຕວຽນກວາງ ແຕ່ວັນທີ 11 ຫາວັນທີ 19 ກຸມພາ 1951. (ພາບ: ຂໍ້ມູນຂອງ TTXVN)
1- ລັດທິມາກ - ເລນິນ ໄດ້ເຮັດການປະຕິວັດທາງດ້ານໂລກກະທັດ ແລະ ຊີວະທັດໃນຊີວິດສັງຄົມເມື່ອຢືນຢັນບົດບາດອັນໃຫຍ່ຫຼວງຂອງປະຊາຊົນ ດ້ວຍຂໍ້ຄິດທິດສະດີທີ່ວ່າ “ມະຫາຊົນເປັນຜູ້ປະດິດປະຫວັດສາດອອກມາ”.
ຕາມ ກ.ມາກ, ການປະຕິວັດກຳມາຊີບຢາກໄດ້ຮັບໄຊຊະນະ ແມ່ນຕ້ອງໄດ້ຮັບການສະໜັບສະໜູນຂອງປະຊາຊົນ ແລະ ຜູ້ອອກແຮງງານ. ວ.ອີ.ເລນິນໃຫ້ທັດສະນະວ່າ, ຖ້າປະຊາຊົນຜູ້ອອກແຮງງານສ່ວນຫຼາຍບໍ່ໃຫ້ຄວາມເຫັນດີເຫັນພ້ອມ ແລະ ສະໜັບສະໜູນ ແກ່ກອງນຳໜ້າຂອງຕົນ ແມ່ນຊົນຊັ້ນກຳມາຊີບຈະບໍ່ສາມາດດຳເນີນການປະຕິວັດໃຫ້ສຳເລັດຜົນໄດ້. ສັດຈະທຳດັ່ງກ່າວໄດ້ຢືນຢັນໃຫ້ເຫັນແຈ້ງວ່າ ສາຍພົວພັນລະຫວ່າງພັກກອມມູນິດແລະປະຊາຊົນ ເປັນສາຍພົວພັນແບບເລືອດເນື້ອ ທີ່ບໍ່ອາດຈະແຍກອອກຈາກກັນໄດ້ ແລະ ຮຽກຮ້ອງໃຫ້ພັກຕ້ອງມີຄວາມຮັບຜິດຊອບ ນຳພາມະຫາປະຊາຊົນທັງໝົດ ໄປຕາມໂຄງການການເມືອງຂອງພັກ. ບັນຫາພັກກຳອຳນາດການປົກຄອງ ຖືກວ.ອີ.ເລນິນ ວາງອອກມາແຕ່ນາມແລ້ວ, ແຕ່ກ່ອນການປະຕິວັດເດືອນຕຸລາແຫ່ງລັດເຊຍ ທີ່ລະເບີດຂຶ້ນໃນປີ 1917, ຕາມແນວຄິດ: “ບໍ່ວ່າເວລາໃດ ພັກກໍ່ກຽມຄວາມພ້ອມເພື່ອອອກມາກຳອຳນາດການປົກຄອງທັງໝົດ”. ໃນລາຍງານການເມືອງຂອງຄະນະບໍລິຫານງານສູນກາງພັກກອມມູນິດລັດເຊຍ, ວັນທີ 27 ມີນາ 1922, ເປັນຄັ້ງທຳອິດທີ່ ວ.ອີ.ເລນິນ ສະເໜີຄວາມສຳນຶກ “ພັກກອມມູນິດກຳອຳນາດ” ໝາຍຄວາມວ່າ ພັກນຳພາອຳນາດການປົກຄອງ, ເຮັດໃຫ້ການເຄື່ອນໄຫວທຸກຢ່າງຂອງອຳນາດການປົກຄອງ ໄດ້ປະຕິບັດຕາມໂຄງການການເມືອງຂອງພັກ ແລະ ຮັບໃຊ້ຜົນປະໂຫຍດຂອງປະຊາຊົນຜູ້ອອກແຮງງານ.
ວ.ອີ.ເລນິນ ໃຫ້ທັດສະນະວ່າ ຮັກສາສາຍພົວພັນສະໜິດແໜ້ນລະຫວ່າງພັກກອມມູນິດກັບປະຊາຊົນ ແມ່ນການສະແດງອອກຢ່າງເລິກເຊິ່ງທີ່ສຸດ ເຖິງທາດແທ້ຊົນຊັ້ນກຳມະກອນຂອງພັກ ແລະ ຕອບສະໜອງຄວາມຕ້ອງການໃຫ້ພັກນຳພາປວງປະຊາຊົນກ້າວຂຶ້ນ. ນີ້ແມ່ນມູນຫຼັກອັນພື້ນຖານ ແມ່ນຫຼັກການທີ່ບໍ່ປ່ຽນແປງຂອງການກໍ່ສ້າງພັກການເມືອງປະຕິວັດແບບໃໝ່ ຂອງຊົນຊັ້ນກຳມະກອນ ແລະ ປະຊາຊົນຜູ້ອອກແຮງງານ. ຕາມ ວ.ອີ.ເລນິນ, ສາຍພົວພັນລະຫວ່າງພັກກອມມູນິດຜູ້ນຳພາກັບປະຊາຊົນ ແມ່ນບໍ່ອາດຈະແຍກອອກຈາກກັນໄດ້, ແລະ ພັກບໍ່ພຽງແຕ່ບໍ່ອາດຈະແຍກອອກຈາກປະຊາຊົນໄດ້ ຫາກພັກຍັງຕ້ອງພົວພັນສະໜິດແໜ້ນກັບມະຫາຊົນ, ມີຊີວິດຢູ່ໃນໝູ່ປະຊາຊົນ, ຮູ້ແນວຄິດຈິດໃຈຂອງມະຫາຊົນ, ເຂົ້າໃຈມະຫາຊົນ, ໄດ້ຮັບຄວາມໄວ້ວາງໃຈເດັດຖານຈາກມະຫາຊົນ. ດັ່ງນັ້ນ, ໜຶ່ງໃນບັນດາໄພອັນຕະລາຍໃຫຍ່ທີ່ສຸດ ເປັນຕາຢ້ານທີ່ສຸດ ແລະ ຈະເປັນໄພອັນຕະລາຍແທ້ຈິງຂອງພັກກອມມູນິດທີ່ກຳອຳນາດ ນັ້ນແມ່ນຄວາມຫ່າງເຫີນມະຫາຊົນ. ເພາະສະນັ້ນ, ບັນຫາເປັນກຸນແຈແມ່ນຕ້ອງກໍ່ສ້າງພັກກອມມູນິດທີ່ກຳອຳນາດໃຫ້ມີຄວາມປອດໃສຂາວສະອາດ ໝັ້ນຄົງເຂັ້ມແຂງ ແລະ ເພີ່ມທະວີການກໍ່ສ້າງສາຍພົວພັນໃກ້ຊິດສະໜິດແໜ້ນລະຫວ່າງພັກ ແລະ ປະຊາຊົນ.
2- ລັດທິມາກ - ເລນິນ ແມ່ນບໍ່ເກີດທິດສະດີ ແລະ ວິທີວິທະຍາປະຕິວັດຂອງພັກກອມມູນິດຫວຽດນາມ ໃນການແກ້ໄຂສາຍພົວພັນລະຫວ່າງພັກ - ປະຊາຊົນ ຢ່າງຖືກຕ້ອງ.
ທ່ານປະທານໂຮ່ຈີມິນ ມັກເອີ້ນ ພັກກອມມູນິດຫວຽດນາມ, ພັກຂອງຊົນຊັ້ນກຳມະກອນພ້ອມກັນນັ້ນກໍ່ແມ່ນພັກຂອງຊາດ ວ່າ “ພັກເຮົາ”, ເອີ້ນຢ່າງງ່າຍດາຍ ແລະ ສະໜິດສະໜົນ, ສອງຄຳສັບນີ້ບັນຈຸເນື້ອໃນເລິກເຊິ່ງ ແລະ ມີຄວາມໝາຍໃຫຍ່ຫຼວງທີ່ສຸດ. ເຫດການ “ພັກເຮົາ” ກຳເນີດເກີດຂຶ້ນໃນຕົ້ນປີ 1930 ມີຈຸດພິເສດສະເພາະ ທີ່ບໍ່ຄືກັນກັບບັນດາພັກກອມມູນິດທີ່ກຳເນີດຂຶ້ນຢູ່ທາງທິດຕາເວັນຕົກ, ນັ້ນແມ່ນມີປັດໄຈໃໝ່ຕື່ມອີກປັດໃຈໜຶ່ງຄືຊົນຊາດ ໃນສາມພາກສ່ວນປະກອບເປັນພັກກອມມູນິດຫວຽດນາມ. ການກຳເນີດເກີດຂຶ້ນ ແລະ ຂະຫຍາຍຕົວຂອງພັກຍ້ອນສາມພາກສ່ວນປະກອບເປັນຄື ລັດທິມາກ-ເລນິນທີ່ໄດ້ຫັນເປັນຫງວຽນອາຍກວັກ, ຂະບວນການກຳມະກອນ ແລະ ຂະບວນການຮັກຊາດຫວຽດນາມ ຊຶ່ງໃຫ້ເຫັນວ່າ ພັກກອມມູນິດຫວຽດນາມກຳເນີດເກີດຂຶ້ນມາຈາກບໍ່ເກີດຊົນຊາດ ແລະ ໄດ້ຕັ້ງຮາກຖານເລິກເຊິ່ງ ຂະຫຍາຍຕົວໃນໃຈຊົນຊາດ. ຈຸດພິເສດດັ່ງກ່າວໄດ້ຢືນຢັນວ່າ ພັກຄົງຕົວ ແລະ ເຕີບໃຫຍ່ຂະຫຍາຍຕົວ ເພື່ອຜົນປະໂຫຍດຂອງຊາດ, ພັກພົວພັນແບບເລືອດເນື້ອກັບປະຊາຊົນ, ຍອມຮັບການຕິດຕາມກວດກາຂອງປະຊາຊົນ, ສົມທົບຄວາມມານະພະຍາຍາມຂອງພັກ ກັບຄວາມຮັບຜິດຊອບຂອງປະຊາຊົນ ເພື່ອກໍ່ສ້າງພັກ, ເພື່ອໃຫ້ມີກຳລັງແຮງຂອງພັກ ແລະ ຂອງປະຊາຊົນຫວຽດນາມ. ທ່ານປະທານໂຮ່ຈີມິນເວົ້າຄຳວ່າ “ພັກເຮົາ” ແມ່ນໄດ້ເວົ້າເຖິງຈຸດພິເສດແຫ່ງການກຳເນີດເກີດຂຶ້ນຂອງພັກກອມມູນິດຫວຽດນາມ, ພ້ອມກັນນັ້ນກໍ່ເປັນການຢືນຢັນວ່າ ພັກກອມມູນິດຫວຽດນາມບໍ່ແມ່ນເປັນພຽງຂອງຊົນຊັ້ນກຳມະກອນ ຫຼືຂອງຖັນແຖວສະມາຊິກພັກເທົ່ານັ້ນ ຫາກຍັງແມ່ນພັກຂອງທົ່ວທັງຊາດອີກນຳ.
ໃນລາຍງານການເມືອງທີ່ກອງປະຊຸມໃຫຍ່ຄັ້ງທີ II ຂອງພັກ (ເດືອນກຸມພາ 1951), ທ່ານປະທານໂຮ່ຈີມິນ ຊີ້ແຈ້ງວ່າ: “ພັກຄົນງານຫວຽດນາມແມ່ນພັກຂອງຊົນຊັ້ນກຳມະກອນ ແລະ ປະຊາຊົນຜູ້ອອກແຮງງານ, ດັ່ງນັ້ນມັນຈຶ່ງຕ້ອງເປັນພັກຂອງຊາດຫວຽດນາມ”(1), ຢືນຢັນວ່າພັກກອມມູນິດຫວຽດນາມມີພື້ນຖານສັງຄົມທີ່ກວ້າງຂວາງ ແລະ ສາຍພົວພັນແບບເລືອດເນື້ອລະຫວ່າງພັກ - ປະຊາຊົນ ນັບແຕ່ໄລຍະໜຸ່ມນ້ອຍຂອງພັກນັ້ນ, ມັນຮຽກຮ້ອງໃຫ້ພັກກອມມູນິດຫວຽດນາມຕ້ອງມີຄວາມຮັບຜິດຊອບຕໍ່ຊາດ ແລະ ຕ້ອງເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ. ທ່ານປະທານໂຮ່ຈີມິນຊີ້ແຈ້ງວ່າ: “ພັກເຮົາເປັນພັກນຳພາ, ໝາຍຄວາມວ່າພະນັກງານທຸກຄົນ, ແຕ່ສູນກາງລົງຮອດເຂດ ແຂວງ ເມືອງ ຈົນເຖິງຕາແສງ, ບໍ່ວ່າຢູ່ຂັ້ນໃດ ແລະ ຂະແໜງການໃດ - ລ້ວນແຕ່ຕ້ອງເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ”(2) ຍ້ອນວ່າ “ການປະຕິວັດແມ່ນພາລະກິດຂອງມະຫາຊົນ, ມັນບໍ່ແມ່ນພາລະກິດຂອງບຸກຄົນວິລະຊົນໃດໜຶ່ງ. ຜົນສຳເລັດຂອງພັກກອມມູນິດຫວຽດນາມ ແມ່ນຍ້ອນພັກກອມມູນິດຫວຽດນາມໄດ້ຈັດຕັ້ງ ແລະ ເສີມຂະຫຍາຍກຳລັງປະຕິວັດອັນໃຫຍ່ຫຼວງບໍ່ມີຂອບເຂດຂອງປະຊາຊົນ, ໄດ້ນຳພາປະຊາຊົນສູ້ຊົນພາຍໃຕ້ຄັນທຸງຊະນະເລີດຂອງລັດທິມາກ - ເລນິນ”(3). ປະຕິບັດແນວຄິດ ປະຊາຊົນເປັນກົກຮາກຂອງປະເທດ ຂອງການປະຕິວັດ, ເປັນເຈົ້າຂອງຂອງປະເທດ ຂອງສັງຄົມ ແລະ ເປັນເຈົ້າຊາຕາກຳຂອງຕົນເອງ; ປະຊາຊົນມີຄວາມສາມາດບົ່ມຊ້ອນອັນໃຫຍ່ຫຼວງ ຄວາມສາມາດບົ່ມຊ້ອນທີ່ບໍ່ມີຂອບເຂດ, ແຕ່ບໍ່ເປັນທາດດຽວລ້ວນ ຊຶ່ງມີຫຼາຍຊັ້ນຄົນທີ່ຕ່າງກັນ ແລະ ຫຼາຍຊົນເຜົ່າ, ມີລະດັບການພັດທະນາທີ່ແຕກໂຕນກັນ; ການປະຕິວັດຢາກໄດ້ຮັບຜົນສຳເລັດກໍ່ຕ້ອງສາມັກຄີ ຕ້ອງອີງໃສ່ກຳລັງກຳມະກອນ ຊາວນາເປັນພື້ນຖານ ແລະ ຕ້ອງມີພັກຂອງຊົນຊັ້ນກຳມະກອນເປັນຜູ້ນຳພາ, ທ່ານປະທານໂຮ່ຈີມິນ ແລະ ພັກກອມມູນິດຫວຽດນາມ ໄດ້ໃຊ້ສະຕິປັນຍາແລະຄວາມມານະພະຍາຍາມທັງໝົດ ເພື່ອກໍ່ສ້າງພັກປະຕິວັດທີ່ແທ້ຈິງ, ພັກນຳໜ້າຂອງຊາດ ແລະ ພ້ອມກັບທົ່ວທັງຊາດຫວຽດນາມເຮັດການປະຕິວັດ ຍາດເອົາບັນດາໄຊຊະນະອັນສະຫງ່າງານໃນ 85 ປີທີ່ຜ່ານມາ.
ຈາກແນວຄິດຂອງທ່ານປະທານໂຮ່ຈີມິນ, ພວກເຮົາເຂົ້າໃຈຢ່າງເລິດເຊິ່ງວ່າ ການກຳເນີດເກີດຂຶ້ນຂອງພັກກອມມູນິດຫວຽດນາມ ແລະ ຂະບວນວິວັດແຫ່ງການຂະຫຍາຍຕົວຂອງພັກ ດ້ວຍຈຸດປະສົງສູ້ຊົນຕະຫຼອດຊີວິດເພື່ອ ເອກະລາດ ອິດສະຫຼະພາບ ຄວາມສົມບູນພູມສຸກ ຂອງປະຊາຊົນຫວຽດນາມ. ພັກດຳລົງຄົງຕົວເພື່ອສິດເປັນເຈົ້າຂອງທີ່ແທ້ຈິງຂອງປະຊາຊົນ ແລະ ປົວແປງຖະນະທີ່ຕັ້ງຂອງປະຊາຊົນ ຈາກຂ້າທາດ ຂຶ້ນຢູ່ໃນຖານະຂອງຜູ້ເປັນເຈົ້າ. ທ່ານປະທານໂຮ່ຈີມິນເວົ້າວ່າ “ພັກເຮົາແມ່ນພັກກຳອຳນາດ” ໝາຍຄວາມວ່າ, ເພິ່ນຢືນຢັນບາດລ້ຽວອັນຍິ່ງໃຫຍ່ຂີດໝາຍຄວາມຫັນປ່ຽນທາງດ້ານທາດໃນຖານະທີ່ຕັ້ງ ຂອງພັກ ແລະ ປະຊາຊົນ, ຈາກທີ່ບໍ່ມີອຳນາດການປົກຄອງ ກາຍເປັນຜູ້ມີອຳນາດການປົກຄອງ ຊຶ່ງເປັນຂອງປະຊາຊົນ ໂດຍປະຊາຊົນ ເພື່ອປະຊາຊົນ; ພ້ອມກັນນັ້ນກໍ່ກຳນົດແຈ້ງຄວາມຮັບຜິດຊອບຂອງພັກ ໃນການທັງເປັນຜູ້ນຳພາ ທັງເປັນຜູ້ຮັບໃຊ້ທີ່ຈົງຮັກພັກດີຂອງປະຊາຊົນ, ກໍ່ສ້າງ ແລະ ປະຕິບັດແນວທາງການເມືອງທີ່ຖືກຕ້ອງ ຊຶ່ງມີບາດກ້າວເດີນ ແລະ ວິທີທີ່ເໝາະສົມເພື່ອ “ເຮັດຄືແນວໃດໃຫ້ປະເທດເຮົາມີເອກະລາດສົມບູນ, ປະຊາຊົນເຮົາມີອິດສະຫຼະເສລີສົມບູນ, ພີ່ນ້ອງຮ່ວມຊາດເຮົາຜູ້ໃດກໍ່ມີເຂົ້າກິນມີເຄື່ອງນຸ່ງຫົ່ມ ຜູ້ໃດກໍ່ໄດ້ຮ່ຳຮຽນ”. ທ່ານປະທານໂຮ່ຈີມິນເວົ້າ “ພັກເຮົາແມ່ນພັກກຳອຳນາດ” ແມ່ນເວົ້າເຖິງການທີ່ພັກກອມມູນິດຫວຽດນາມນຳພາສັງຄົມຢ່າງຮອບດ້ານ, ນຳໃຊ້ກົງຈັກອຳນາດການປົກຄອງເພື່ອເຕົ້າໂຮມ ແລະ ເສີມຂະຫຍາຍກຳລັງແຮງຂອງປະຊາຊົນ, ປະຕິບັດຢ່າງສຳເລັດມີໄຊແນວທາງການປະຕິວັດທີ່ພັກວາງອອກມາ ເພື່ອຜົນປະໂຫຍດຂອງປະຊາຊົນ. ສິ່ງດັ່ງກ່າວນັ້ນຮຽກຮ້ອງໃຫ້ພັກກອມມູນິດຫວຽດນາມຕ້ອງຮັກສາທາດແທ້ປະຕິວັດ ແລະ ວິທະຍາສາດຂອງຕົນໄວ້ຢ່າງໝັ້ນຄົງ, ຕ້ອງຢຶດໝັ້ນລັດທິມາກ - ເລນິນ ແລະ ແນວຄິດໂຮ່ຈີມິນ, ຍົກສູງບົດບາດນຳພາ ແລະ ຖານະກຳອຳນາດຂອງພັກ, ເຮັດວຽກງານກໍ່ສ້າງພັກໃຫ້ດີ ຊຶ່ງຖັນແຖວພະນັກງານເປັນຫຼັກແຫຼ່ງ.
3- ເພື່ອປະຊາຊົນ ແລະ ອີງໃສ່ປະຊາຊົນເພື່ອກໍ່ສ້າງພັກ ແມ່ນໜຶ່ງໃນບັນດາແນວຄິດໃຫຍ່, ມີລະດັບຍຸດທະສາດ, ທີ່ໄດ້ເປັນຮູບຂຶ້ນໃນທິດສະດີກໍ່ສ້າງພັກກຳອຳນາດຂອງທ່ານປະທານໂຮ່ຈີມິນ, ຊຶ່ງໄດ້ສ້າງປະຫວັດສາດອັນສະຫງ່າງາມຂອງພັກກອມມູນິດຫວຽດນາມ.
ເພື່ອໃຫ້ພັກສາມາດນຳພາມະຫາປະຊາຊົນບັນດານຊົນເຜົ່າຢູ່ຫວຽດນາມໄດ້, ທ່ານປະທານໂຮ່ຈີມິນໄດ້ເອົາໃຈໃສ່ຢ່າງເປັນປະຈຳເຖິງການກໍ່ສ້າງ ແລະ ປັບປຸງພັກກອມມູນິດຫວຽດນາມ ໃຫ້ເປັນພັກການເມືອງທີ່ປອດໃສຂາວສະອາດ ໝັ້ນຄົງເຂັ້ມແຂງ ພົວພັນແບບເລືດເນື້ອກັບປະຊາຊົນ. ທ່ານປະທານໂຮ່ຈີມິນຍາມໃດກໍ່ເອົາໃຈໃສ່ເປັນພິເສດເຖິງບັນຫາເພື່ອປະຊາຊົນ ແລະ ອີງໃສ່ປະຊາຊົນ; ເພິ່ນໄດ້ຊີ້ນຳການປະຕິບັດ ແລະ ຖືວ່ານີ້ແມ່ນເງື່ອນໄຂຕົ້ນຕໍຂອງທິດສະດີກ່ຽວກັບການກໍ່ສ້າງພັກ, ກໍ່ຄືກຳນົດຢ່າງຈະແຈ້ງ ສາຍພົວພັນລະຫວ່າງພັກກັບປະຊາຊົນ ແລະ ຮຽກຮ້ອງໃຫ້ພັກຕ້ອງເອົາໃຈໃສ່ເບິ່ງແຍງກໍ່ສ້າງຮາກຖານແນວຄິດ ການເມືອງ ປັນຍາຄວາມຮູ້ ຄຸນສົມບັດປະຕິວັດ ເພື່ອຈຸດປະສົງຮັບໃຊ້ປະຊາຊົນໃຫ້ໄດ້ນັບມື້ນັບດີກວ່າອີກ, ສົມກັບຄວາມຮັກແພງໄວ້ວາງໃຈຂອງປະຊາຊົນຕໍ່ກັບພັກຂອງຕົນ. ແນວຄິດຍຸດທະສາດດັ່ງກ່າວນັ້ນຖືກທ່ານປະທານໂຮ່ຈີມິນສະແດງອອກຢ່າງຮັດກຸມໃນຄຳສັບ 456 ຄຳ 12 ຂໍ້ຢູ່ໃນພາກ “ກໍ່ສ້າງພັກປະຕິວັດທີ່ແທ້ຈິງ” ຂອງນິພົນ “ດັດແປງວິທີເຮັດວຽກ” ໂດຍເພິ່ນເປັນຜູ້ຂຽນໃນປີ 1947.
ດ້ວຍທັດສະນະ ພັກຈຳເປັນຕ້ອງພົວພັນແບບເລືອດເນື້ອກັບປະຊາຊົນ, ທ່ານປະທານໂຮ່ຈີມິນ ຖືວ່ານີ້ບໍ່ພຽງແຕ່ເປັນມາດຕະຖານຂອງພັກປະຕິວັດທີ່ແທ້ຈິງເທົ່ານັ້ນ ມັນຍັງເປັນໜຶ່ງໃນບັນດາກົດເກນແຫ່ງການຄົງຕົວແລະຂະຫຍາຍຕົວຂອງພັກກອມມູນິດຫວຽດນາມອີກນຳ. ທ່ານປະທານໂຮ່ຈີມິນຍັງກຳນົດວ່າ ສາຍພົວພັນລະຫວ່າງພັກກັບປະຊາຊົນແມ່ນສາຍພົວພັນສັດຈະວິພາກ, ມັນເປັນຮູບເປັນຮ່າງຂຶ້ນ ແລະ ຂະຫຍາຍຕົວໂດຍຕິດແໜ້ນກັບການປະຕິວັດ. ເພິ່ນໄດ້ຕັກເຕືອນພວກເຮົາຢ່າງເປັນປະຈຳວ່າ ຕ້ອງເຂົ້າໃຈຢ່າງເລິກເຊິ່ງກ່ຽວກັບຄວາມໝາຍ ບົດບາດຂອງປະຊາຊົນໃນສາຍພົວພັນລະຫວ່າງພັກ ກັບ ປະຊາຊົນ. ຕາມຄວາມເຫັນຂອງເພິ່ນ, ເພື່ອຮັກສາ ແລະ ຂະຫຍາຍສາຍພົວພັນລະຫວ່າງພັກແລະປະຊາຊົນຢ່າງໝັ້ນຄົງ, ພັກກອມມູນິດຫວຽດນາມຕ້ອງຮັບຮູ້ຢ່າງຄົບຖ້ວນ ແລະ ແກ້ໄຂໃຫ້ໄດ້ເປັນຢ່າງດີ ສີ່ບັນຫາພື້ນຖານຄື: ຮັບໃຊ້ໃຫ້ຜົນປະໂຫຍດຂອງຊົນຊັ້ນ ຂອງປະຊາຊົນ ຂອງຊາດ, ນອກນັ້ນ ພັກກອມມູນິດຫວຽດນາມບໍ່ມີຜົນປະໂຫຍດອື່ນໃດເລີຍ; ພັກຕ້ອງສົມກັນເປັນຜູ້ນຳພາ ຜູ້ຮັບໃຊ້ທີ່ຈົງຮັກພັກດີຂອງປະຊາຊົນ; ພັກຕ້ອງໃກ້ຊິດຕິດແທດກັບມະຫາຊົນ, ຮ່ຳຮຽນມະຫາຊົນ, ນຳພາມະຫາຊົນ; ພັກຕ້ອງເປັນຜູ້ຈັດຕັ້ງ ແລະ ນຳພາພາລະກິດປະຕິວັດສັງຄົມນິຍົມ ແລະ ກໍ່ສ້າງສັງຄົມນິຍົມ. ໃນພິໄນກຳອັນສັກກະລະບູຊາຂອງທ່ານປະທານໂຮ່ຈີມິນ, ເພິ່ນໄດ້ເວົ້າແຈ້ງ “ພັກເຮົາແມ່ນພັກກຳອຳນາດ” ຊຶ່ງສິ່ງທີ່ເປັນແກ່ນສານ ຫຼັກແຫຼ່ງ ແລະ ສຳຄັນຍິ່ງ ແມ່ນຄວາມພົວພັນສະໜິດແໜ້ນລະຫວ່າງພັກ ແລະ ປະຊາຊົນ.
ພາຍໃຕ້ການນຳພາຂອງພັກ, ປະຊາຊົນຫວຽດນາມຍາດໄດ້ໄຊຊະນະອັນໃຫຍ່ຫຼວງ ມີຄວາມໝາຍປະຫວັດສາດ ຊຶ່ງໄດ້ຢັ້ງຢືນໃຫ້ເຫັນກຳລັງແຮງຂອງພັກ ແລະ ກຳລັງແຮງຂອງປະຊາຊົນ. ສະຫລຸບສັງລວມບັນດາບົດຮຽນໃຫຍ່ຂອງການປະຕິວັດຫວຽດນາມນັບແຕ່ເມື່ອມີພັກນຳພາ, ພັກກອມມູນິດຫວຽດນາມຮັບຮູ້ຢ່າງເລິກເຊິ່ງວ່າ “ພາລະກິດປະຕິວັດແມ່ນຂອງປະຊາຊົນ, ໂດຍປະຊາຊົນ, ເພື່ອປະຊາຊົນ” ແລະ “ການນຳພາຢ່າງຖືກຕ້ອງຂອງພັກແມ່ນປັດໃຈຕັດສິນທຸກໆໄຊຊະນະ”. ເພາະສະນັ້ນ, ສິ່ງທີ່ເປັນຕົ້ນຕໍ ແລະ ສຳຄັນຍິ່ງຂອງທິດສະດີກ່ຽວກັບພັກນຳພາ ພັກກຳອຳນາດ ນັ້ນແມ່ນກໍ່ສ້າງ ແລະ ຂະຫຍາຍສາຍພົວພັນແບບເລືອດເນື້ອ ລະຫວ່າງພັກກັບປະຊາຊົນ, ຮັບປະກັນໃຫ້ ຄວາມຄິດຂອງພັກສ່ອງແສງຖືກຕ້ອງຕາມຈິດໃຈປະຊາຊົນ ແລະ ແນວທາງຂອງພັກຖືກກັບຄວາມປາຖະໜາຂອງປະຊາຊົນ. ພຶດຕິກຳແຫ່ງການປະຕິວັດຫວຽດນາມ, ພິເສດແມ່ນໃນເວລາເກືອບ 30 ປີແຫ່ງການປ່ຽນແປງໃໝ່ ຊຶ່ງໄດ້ບັນລຸບັນດາຜົນສຳເລັດອັນສຳຄັນກ່ຽວກັບການກໍ່ສ້າງສາຍພົວພັນລະຫວ່າງພັກ - ປະຊາຊົນ ນັ້ນຄື: ພັກຮັບຟັງປະຊາຊົນ ເພື່ອປະຊາຊົນ ອີງໃສ່ປະຊາຊົນ ແລະ ປະຊາຊົນກໍ່ເຊື່ອຖືພັກ, ຊຶ່ງໄດ້ກາຍເປັນປັດໄຈຮັບປະກັນຄວາມຖືກຕ້ອງ ແລະ ຄວາມສຳເລັດຂອງແນວທາງປະຕິວັດຂອງພັກ; ພັກໃກ້ຊິດນິດແທດກັບປະຊາຊົນ ແລະ ໄດ້ຮັບຄວາມສະໜັບສະໜຸນຂອງປະຊາຊົນ, ຊຶ່ງໄດ້ສ້າງໃຫ້ມີຜົນສຳເລັດອັນສຳຄັນທີ່ສຸດ, ຜົນສຳເລັດທີ່ມີຄວາມໝາຍປະຫວັດສາດ; ພັກເອົາໃຈໃສ່ເບິ່ງແຍງການກໍ່ສ້າງສາຍພົວພັນແບບເລືອດເນື້ອກັບປະຊາຊົນ ແມ່ນປັດໄຈທີ່ມີຄວາມໝາຍຕັດສິນ ໃນການສ້າງກຳລັງແຮງຂອງພັກ; ພັກນຳພາລະບົບການເມືອງ ແລະ ປະຕິບັດກົດລະບຽບປະຊາທິປະໄຕຢູ່ຮາກຖານນັບມື້ນັບມີປະສິດທິຜົນ ຊຶ່ງໄດ້ສ້າງຄວາມເຊື່ອຖືໃນປະຊາຊົນ ແລະ ເພີ່ມທະວີກຸ່ມກ້ອນມະຫາສາມັກຄີປວງຊົນທັງຊາດ.
ໃນຄວາມຫຍຸ້ງຍາກ, ສິ່ງທ້າທາຍຂອງການປະຕິວັດຫວຽດນາມ, ພັກກອມມູນິດຫວຽດນາມຍາມໃດກໍ່ຮັບຟັງຄວາມຄິດຄວາມເຫັນ ແລະ ຄວາມປະດິດສ້າງຂອງປະຊາຊົນ, ພິຈາລະນາວິທີແກ້ໄຂຂອງມະຫາຊົນ ແລະ ຄົ້ນຄວ້າ ຮ່ຳຮຽນບັນດາປັດໄຈໃໝ່ໃນປະຊາຊົນ. ຕໍ່ໜ້າຄວາມຮຽກຮ້ອງຕ້ອງການຂອງປະຫວັດສາດ ແລະ ສິ່ງທ້າທາຍທີ່ໃຫຍ່ຫຼວງໃນການປ່ຽນແປງໃໝ່ຂອງປະເທດຊາດ, ພັກກອມມູນິດຫວຽດນາມໄດ້ເນັ້ນວ່າ: “ການປະຕິວັດແມ່ນພາລະກິດຂອງມະຫາຊົນ. ເພາະສະນັ້ນ ຢູ່ບໍ່ວ່າສະໄໝໃດວຽກງານຂົນຂວາຍ ແລະ ຈັດຕັ້ງມະຫາຊົນ ເຮັດການປະຕິວັດກໍ່ມີຄວາມໝາຍຍຸດທະສາດ”(4). ດັ່ງນັ້ນ, ສາຍພົວພັນລະຫວ່າງພັກ - ປະຊາຊົນ ບໍ່ພຽງແຕ່ເປັນທິດສະດີກ່ຽວກັບການຂົນຂວາຍປະຊາຊົນຂອງພັກເທົ່ານັ້ນ ມັນຍັງເປັນຜົນລວມ ເປັນສູນເຕົ້າໂຮມຂອງເນື້ອໃນການກໍ່ສ້າງ ປັບປຸງພັກທາງດ້ານຕ່າງໆທຸກດ້ານ ການເມືອງ ແນວຄິດ ຄຸນສົມບັດສິນທຳ ແບບດຳລົງຊີວິດ ແລະ ການຈັດຕັ້ງພະນັກງານ ຂອງພັກກອມມູນິດຫວຽດນາມ.
4- ເສີມຂະຫຍາຍບົດບາດຂອງພັກ ແລະ ບົດບາດຂອງປະຊາຊົນ ໃນສາຍພົວພັນລະຫວ່າງພັກ - ປະຊາຊົນ ເພື່ອຍົກສູງບົດບາດຖານະຂອງພັກ.
ບົດບາດຂອງພັກສະແດງອອກຢູ່ທີ່, ພັກກອມມູນິດຫວຽດນາມວາງແນວທາງອັນຖືກຕ້ອງອອກມາ ຄຽງຂ້າງນັ້ນ ພັກກໍ່ເອົາໃຈໃສ່ເປັນພິເສດເຖິງການກໍ່ສ້າງໃຫ້ພັກທຽບເທົ່າກັບລະດັບຂອງພັກກຳອຳນາດ, ນຳພາປະຊາຊົນດຳເນີນການກໍ່ສ້າງສັງຄົມນິຍົມ ຢູ່ຫວຽດນາມ. ໃນຂະບວນວິວັດແຫ່ງການນຳພາການປະຕິວັດ ແລະ ພັດທະນາເສດຖະກິດຕະຫຼາດ ກຳນົດທິດສັງຄົມນິຍົມ, ພັກກອມມູນິດຫວຽດນາມຍາມໃດກໍ່ຕັ້ງໝັ້ນໃນບົດບາດນຳພາ ແລະ ເອົາໃຈໃສ່ເຮັດວຽກງານກໍ່ສ້າງພັກໃຫ້ໄດ້ຮັບຜົນດີ, ຮັກສາທາດແທ້ປະຕິວັດ ແລະ ວິທະຍາສາດຂອງພັກ, ຍົກສູງລະດັບປັນຍາຄວາມຮູ້ ແລະ ຄຸນນະພາບຂອງວຽກງານຄົ້ນຄວ້າ ສະຫລຸບສັງລວມທິດສະດີຂອງພັກ, ເອົາໃຈໃສ່ເປັນສຳຄັນເຖິງການປ່ຽນແປງໃໝ່ການຈັດຕັ້ງ ແລະ ພະນັກງານ ຮັບປະກັນຮັກສາສາຍພົວພັນແບບເລືອດເນື້ອກັບປະຊາຊົນ. ບົດບາດຂອງພັກສະແດງອອກຢູ່ທີ່, ພັກນຳພາການເສີມຂະຫຍາຍສິດເປັນເຈົ້າຂອງປະຊາຊົນ ຕາມທິດນຳ “ປະຊາຊົນຮູ້, ປະຊາຊົນປຶກສາພິຈາລະນາ, ປະຊາຊົນເຮັດ, ປະຊາຊົນກວດກາ” ຕາມຄຳສັ່ງສະບັບທີ 30-CT/TW ຂອງກົມການເມືອງສູນກາງພັກ ສະໄໝທີ VIII, ວັນທີ 18 ກຸທພາ 1998, “ວ່າດ້ວຍການກໍ່ສ້າງ ແລະ ປະຕິບັດ ກົດລະບຽບປະຊາທິປະໄຕຢູ່ຮາກຖານ”; ມະຕິຕົກລົງສະບັບທີ 290-QĐ/TW, ວັນທີ 25 ກຸມພາ 2010, ຂອງກົມການເມືອງສູນກາງພັກ, “ວ່າດ້ວຍກົດລະບຽບປະຕິບັດງານຂົນຂວາຍປະຊາຊົນ ຂອງລະບົບການເມືອງ”; ມະຕິສະບັບທີ 25-NQ/TW, ວັນທີ 3 ມິຖຸນາ 2013, ຂອງຄະນະບໍລິຫານງານສູນກາງພັກ, “ວ່າດ້ວຍການເພີ່ມທະວີ ແລະ ປ່ຽນແປງໃໝ່ ການນຳພາຂອງພັກ ຕໍ່ກັບວຽກງານຂົນຂວາຍປະຊາຊົນ ໃນສະພາບການໃໝ່”. ພັກນຳພາປະຊາຊົນ ເຮັດວຽກງານຕິດຕາມກວດກາ, ຕິຊົມ ແລະ ປະກອບຄວາມຄິດຄວາມເຫັນກໍ່ສ້າງພັກ ອຳນາດການປົກຄອງ ຕາມມະຕິຕົກລົງສະບັບທີ 217-QĐ/TW ແລະ ມະຕິຕົກລົງສະບັບທີ 218-QĐ/TW, ວັນທີ 12 ທັນວາ 2013, ຂອງກົມການເມືອງສູນກາງພັກ. ພັກປ່ຽນແປງໃໝ່ເນື້ອໃນ ແລະ ແບບວິທີການນຳພາຕໍ່ກັບປະຊາຊົນ ໂດຍຜ່ານແນວໂຮມປະເທດຊາດ, ບັນດາອົງຄະນະການເມືອງ - ສັງຄົມ ແລະ ສະມາຄົມຂອງປະຊາຊົນ.
ບົດບາດຂອງປະຊາຊົນສະແດງອອກຢ່າງຈະແຈ້ງໃນການປະກອບຄວາມຄິດຄວາມເຫັນກໍ່ສ້າງແນວທາງ ແຜນນະໂຍບາຍຂອງພັກ; ໃນການເຂົ້າຮ່ວມການກໍ່ສ້າງພັກ, ເຂົ້າໃຈພັກຢ່າງຈະແຈ້ງ, ສະໜັບສະໜູນພັກ, ຕອບສະໜອງຄຳຮຽກຮ້ອງຂອງພັກ, ຊ່ວຍໃຫ້ພັກຮູ້ສະພາບການຂອງປະຊາຊົນຢ່າງຈະແຈ້ງ, ປະກອບຄວາມຄິດຄວາມເຫັນໃຫ້ພັກ ແລະ ຕິຊົມພັກຢ່າງຈິງໃຈ; ປະກອບສ່ວນປ້ອງກັນແລະຕ້ານ ພະຍາດອາດຍາສິດ, ການສໍ້ລາດບັງຫຼວງ ແລະ ຄວາມຟຸມຟືອຍ; ຕິດຕາມກວດກາພະນັກງານ ແລະ ຜູ້ແທນປະຊາຊົນຢູ່ເຂດພົນລະເມືອງ.
ໃນໄລຍະປັດຈຸບັນ, ຕ້ອງປະຕິບັດເປັນຢ່າງດີບັນດາມາດຕະການກໍ່ສ້າງພັກທາງດ້ານແນວຄິດ ທິດສະດີ ປັນຍາຄວາມຮູ້ ແລະ ການຈັດຕັ້ງພະນັກງານ; ເປີດກວ້າງຄວາມໂປ່ງໃສ ແລະ ປະຊາທິປະໄຕໃນພັກ; ເສີມຂະຫຍາຍສິດເປັນເຈົ້າຂອງປະຊາຊົນ ກຸ່ມກ້ອນສາມັກຄີສຳພັນທະພາບກຳມະກອນ - ຊາວນາ - ປັນຍາຊົນ; ແກ້ໄຂຄວາມຕ້ອງການອັນຮີບດ່ວນ ຊອບທຳຂອງປະຊາຊົນ ຢ່າງທັນການ ມີປະສິດທິຜົນ./.
ໂດຍ ດຣ. ຖ່າວຊວນສຸ່ງ,
ກຳມະການສູນກາງພັກ,
ຮອງຫົວໜ້າຄະນະຂົນຂວາຍປະຊາຊົນສູນກາງ
(1) ໂຮ່ຈີມິນ: ນິພົນຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 1996, ເຫຼັ້ມທີ 6, ໜ້າທີ 175.
(2) ໂຮ່ຈີມິນ: ນິພົນທີ່ໄດ້ແນະນຳ, ເຫຼັ້ມທີ 10, ໜ້າທີ 323.
(3) ໂຮ່ຈີມິນ: ນິພົນທີ່ໄດ້ແນະນຳ, ເຫຼັ້ມທີ 12, ໜ້າທີ 672.
(4) ພັກກອມມູນິດຫວຽດນາມ: ເອກະສາພັກຄົບຊຸດ, ສຳນັກພິມຈຳໜ່າຍການເມືອງແຫ່ງຊາດ, ຮ່າໂນ້ຍ, 2006, ເຫຼັ້ມທີ 43, ໜ້າທີ 119.
