ເສີມຂະຫຍາຍກຳລັງແຮງ ຂອງວົງຄະນະຍາດຊາວຫວຽດນາມ ຢູ່ຕ່າງປະເທດ
ຄວາມສາມາດບົ່ມຊ້ອນ ແລະ ການປະກອບສ່ວນ ຂອງວົງຄະນາຍາດຊາວຫວຽດນາມ ຢູ່ຕ່າງປະເທດ
ເສີມຂະຫຍາຍກຳລັງແຮງດ້ານພູມປັນຍາ. ປັນຍາຊົນຊາວຫວຽດນາມຢູ່ຕ່າງປະເທດ (ຊາວຫວຽດກ່ຽວ) ຖືກຕີລາຄາວ່າເປັນແຫຼ່ງພະລັງທີ່ຫຼວງຫຼາຍ ອຸດົມສົມບູນທີ່ສຸດ ໃນຫຼາຍຂົງເຂດ ມີລະດັບວິຊາສະເພາະສູງ. ປັດຈຸບັນນີ້, ຈຳນວນຊາວຫວຽດກ່ຽວທີ່ມີລະດັບມະຫາວິທະຍາໄລ ເໜືອມະຫາວິທະຍາໄລ ປະມານເກືອບ 400.000 ຄົນ ເຊິ່ງເປັນນັກຊ່ຽວຊານ ປັນຍາຊົນ ທີ່ຢູ່ຢ່າງລວມສູນໃນບັນດາປະເທດຈະເລີນພັດທະນາ. ຕາມສະຖິຕິ, ຢູ່ອາເມລິກາມີ 150.000 ຄົນ; ຢູ່ຝຣັ່ງມີ 50.000 ຄົນ; ຢູ່ການາດາມີ 20.000 ຄົນ; ຢູ່ເອີຣົບຕາເວັນອອກ ແລະ ລັດເຊຍ 4.000 ຄົນ, ຢູ່ອົດສະຕຣາລີມີ 7.000 ຄົນ (1). ດ້ວຍມູນເຊື້ອພາກພຽນໃນການຮ່ຳຮຽນຫາຄວາມຮູ້ຂອງຊາດ, ຖັນແຖວປັນຍາຊົນຊາວຫວຽດກ່ຽວທີ່ມີລະດັບປະລິນຍາເອກ ສາດສະດາຈານ ນັບມື້ນັບເພີ່ມຂຶ້ນ, ເປັນຕົ້ນແມ່ນຜູ້ທີ່ຂຶ້ນກັບເຊັ່ນຄົນທີສາມ ທີສີ່. ຮູ່ນປັນຍາຊົນໃໝ່ທີ່ມີກົກເຄົ້າຫວຽດນາມ ພວມເປັນຮູບເປັນຮ່າງຂຶ້ນ ແລະ ຂະຫຍາຍຕົວ, ຕົ້ນຕໍແມ່ນຢູ່ອາເມຣິກາເໜືອ ເອີຣົບຕາເວັນຕົກ ອົດສະຕຣາລີ, ໃນຫຼາຍຂົງເຂດວິທະຍາສາດ ແລະ ເສດຖະກິດທີ່ເປັນປາຍແຫຼມ ເຊັ່ນສື່ຂ່າວ ໂທລະຄົມມະນາຄົມ ເອເລັກໂຕຣນິກ ວັດຖຸໃໝ່ ປະດິດເຄື່ອງຈັກ ເຕັກໂນໂລຊີນາໂນ ການເດີນອາກາດ ຈັກກະວານວິທະຍາ ຊີວະວິທະຍາ ຄຸ້ມຄອງເສດຖະກິດ ຫຼັກຊັບ. ຕົວຢ່າງເຊັ່ນ ຢູ່ຊີລີຄອນແວນລີ ທີ່ລືຊື່ຂອງອາເມຣິກາ, ປັດຈຸບັນມີຊາວຫວຽດກ່ຽວກຳລັງເຮັດວຽກປະມານ 10.000 ຄົນ; ຢູ່ທີ່ສູນຄົ້ນຄວ້າອາວະກາດນາຊາ ອາເມຣິກາ ມີຜູ້ຊ່ຽວຊານຊາວຫວຽດກ່ຽວເຮັດວຽກປະມານ 30 ຄົນ. ພ້ອມນັ້ນ ຍັງມີຖັນແຖວສາດສະດາຈານຊາວຫວຽດກ່ຽວທີ່ພວມສິດສອນ ຫຼືຄົ້ນຄວ້າວິທະຍາສາດ ຢູ່ບັນດາມະຫາວິທະຍາໄລທີ່ລືຊື່ໃນໂລກ (2). ນີ້ແມ່ນແຫຼ່ງພະລັງຊ້ອນແຝງທີ່ອາດຈະປະກອບສ່ວນເຂົ້າໃນການກໍ່ສ້າງປະເທດ, ຊ່ວຍໃຫ້ຫວຽດນາມຮັບເອົາເຕັກໂນໂລຊີໃໝ່ໄດ້ຢ່າງໄວ, ຍົກສູງຄຸນນະພາບການສຶກສາ-ກໍ່ສ້າງ, ສ້າງການພົວພັນຮ່ວມມືກັບບັນດາພື້ນຖານການຜະລິດ ວິທະຍາສາດຢູ່ຕ່າງປະເທດ.
ຄຽງຂ້າງນັ້ນ, ຖັນແຖວປັນຍາຊົນຊາວຫວຽດກ່ຽວຍັງໄດ້ມີສ່ວນປະກອບອັນຕັ້ງໜ້າ, ສະເໜີຄວາມຄິດເຫັນປະກອບເຂົ້າໃນການວາງນະໂຍບາຍພັດທະນະປະເທດ; ເຂົ້າຮ່ວມການຄົ້ນຄວ້າວິທະຍາສາດ ແລະ ຂະຫຍາຍເຕັກໂນໂລຊີໂດຍກົງ ຫຼືຊ່ວຍໜູນ ເປັນຂົວຕໍ່ ໃນການຄົ້ນຄວ້າ ຖ່າຍທອດມອບໂອນຄວາມຮູ້ວິທະຍາສາດ ເຕັກໂນໂລຊີ ແລະ ບົດຮຽນຄຸ້ມຄອງບໍລິຫານທີ່ທັນສະໄໝ; ເຂົ້າຮ່ວມໃນການເຄື່ອນໄຫວສຶກສາ-ກໍ່ສ້າງແຫຼ່ງກຳລັງຄົນທີ່ມີລະດັບສູງ. ຂໍ້ສະເໜີ ຄຳຄິດເຫັນປະກອບສ່ວນຫຼາຍປະການ ທີ່ມີຄຸນຄ່າວິທະຍາສາດ ແທດເໝາະຕົວຈິງຂອງຊາວຫວຽດກ່ຽວ ໄດ້ຖືກເກັບກຳ ແລະ ຍື່ນໃຫ້ການນຳຂັ້ນສູງຫວຽດນາມ.
ກຳລັງປັນຍາຊົນຊາວຫວຽດກ່ຽວຍັງເຂົ້າຮ່ວມການປະຕິບັດບັນດາໂຄງການລົງທຶນຢູ່ໃນປະເທດ ເຊັ່ນ ສູນວິທະຍາສາດ ແລະ ການສຶກສາສະຫະຂະແໜງສາກົນ ຢູ່ກວີເຍິນ, ໂຄງການຄົ້ນຄວ້າໂຮງງານໄຟຟ້ານິວເຄຼຍ, ໂຄງການປະດິດຈັກກັ່ນຕອງເລືອດດ້ວຍໝາກໄຂ່ຫຼັງທຽມ, ໂຄງການຕ້ານນ້ຳຖ້ວນ ດິນຊາຍຄູນກັ້ນປາກນ້ຳ ຢູ່ນະຄອນໂຮ່ຈີມິນ, ບັນດາກິດຈະການກໍ່ສ້າງຂົວທາງ (3). ແຕ່ລະປີ ມີຊາວຫວຽດກ່ຽວປະມານ 400 ເທື່ອຄົນ ຈາກທົ່ວທຸກທະວີບໃນໂລກ ກັບເມືອປະເທດທຳການສິດສອນ ຮ່ວມມື ປະກອບສ່ວນວິຊາສະເພາະຫຼາຍຂົງເຂດສາຂາ, ໃຫ້ຄຳປຶກສາໃນການວາງກຳນົດນະໂຍບາຍພັດທະນາປະເທດ, ເປັນຕົ້ນແມ່ນ ກ່ຽວກັບເສດຖະກິດ ວິທະຍາສາດ ຖ່າຍທອດມອບໂອນເຕັກໂນໂລຊີ ການສຶກສາ; ເປັນຂົວຕໍ່ການຮ່ວມມື ຊອກຫາແຫຼ່ງລົງທຶນສາກົນ ໃຫ້ແກ່ວິທະຍາສາດ-ເຕັກໂນໂລຊີ, ກໍ່ສ້າງແຫຼ່ງກຳລັງຄົນຢູ່ໃນປະເທດ. ປັນຍາຊົນຊາວຫວຽດກ່ຽວສ່ວນຫຼາຍລ້ວນແຕ່ສະໝັກໃຈກັບເມືອປະເທດເພື່ອຮ່ວມມື ເຮັດວຽກ ແລະ ເສຍຄ່າໃຊ້ຈ່າຍທັງໝົດດ້ວຍຕົນເອງ(4).
ເສີມຂະຫຍາຍກຳລັງແຮງດ້ານເສດຖະກິດ. ເບີ່ງລວມແລ້ວ ວົງຄະນະຍາດຊາວຫວຽດນາມຢູ່ຕ່າງປະເທດ ມີຄວາມສາມາດຊ້ອນແຝງທາງເສດຖະກິດທີ່ແນ່ນອນ. ນັກວິສາຫະກິດ ນັກທຸລະກິດຫຼາຍຄົນໄດ້ປະສົບຄວາມສຳເລັດໃນການທຸລະກິດ, ຊື່ສຽງອິດທິພົນນັບມື້ໄດ້ຍົກສູງຂຶ້ນ. ເພາະສະນັ້ນ, ກຳລັງນີ້ໄດ້ກາຍເປັນຂົວຕໍ່ທີ່ສຳຄັນ ຊ່ວຍໃຫ້ຫວຽດນາມເຊື່ອມໂຍງເສດຖະກິດໂລກນັບມື້ນັບໄດ້ຮັບຜົນດີ.
ວິສາຫະກິດຂອງຊາວຫວຽດນາມຢູ່ຕ່າງປະເທດ ເປັນຊ່ອງສາຍໜຶ່ງທີ່ສົ່ງເສີມການຄ້າ ແລະ ການທ່ອງທ່ຽວເປັນຢ່າງດີ ແລະ ມີປະສິດທິຜົນ. ຢາກເອົາສິນຄ້າຫວຽດນາມໄປຂາຍສົ່ງນອກ, ບັນດາຜູ້ຜະລິດໃນປະເທດຕ້ອງອິງໃສ່ບັນດາວິສາຫະກິດຫວຽດນາມຢູ່ປະເທດທີ່ຈະນຳເຂົ້າສິນຄ້ານັ້ນ, ກໍ່ຄືອິງໃສ່ສະໂມສອນ ສະມາຄົນວິສາຫະກິດຫວຽດກ່ຽວຢູ່ຕ່າງປະເທດ, ຍ້ອນວ່າເຂົາຮູ້ດີວັດທະນະທຳ ຮີດຄອງປະເພນີ, ກຳໄດ້ສະພາບການຕະຫຼາດ ຂອງປະເທດທີ່ຈະນຳເຂົ້ານັ້ນ. ສິ່ງທີ່ສຳຄັນກວ່າອີກແມ່ນ, ຖັນແຖວນັກທຸລະກິດນີ້ສ່ວນຫຼາຍເປັນປັນຍາຊົນ ຜູ້ຊ່ຽວຊານທີ່ມີລະດັບສູງ, ມີການເງິນຄ້ຳປະກັນ ແລະ ມີບົດຮຽນປະສົບການຕະຫຼາດ. ນີ້ແມ່ນບັນດາປັດໃຈອັນສຳຄັນໃນການສ້າງສາພັດທະນາປະເທດ, ສ້າງຄວາມພົວພັນສະໜິດແໜ້ນໃນຕາໜ່າງວິສາຫະກິດຫວຽດນາມໃນທົ່ວໂລກ, ເຊື່ອມໂຍງເສດຖະກິດປະເທດກັບຕະຫຼາດໂລກ.
ຢູ່ຫຼາຍປະເທດ, ວົງຄະນະຍາດຊາວຫວຽດນາມໄດ້ປະກອບສ່ວນສຳຄັນ ນຳເອົາສິນຄ້າຫວຽດນາມເຂົ້າໃນຕະຫຼາດປະເທດເຈົ້າພາບ, ກໍ່ຮ່າງສ້າງຮູບຕາໜ່າງຈຳໜ່າຍສິນຄ້າຂຶ້ນ ທີ່ມີຫຼາຍສູນການຄ້າ ຫຼາຍການຈັດຕັ້ງສະມາຄົມວິສາຫະກິດຕາມຂະແໜງການ ວິຊາຊີບ. ສະມາຄົມນັກທຸລະກິດຊາວຫວຽດກ່ຽວຢູ່ຫຼາຍແຫ່ງ ໄດ້ຮ່ວມມືກັນຈັດຕັ້ງການເຄື່ອນໄຫວຕ່າງໆເປັນຢ່າງດີ ແລະ ສ້າງເປັນກຸ່ມເສດຖະກິດທີ່ມີສ່ວນປະກອບ ມີຊື່ສຽງຢູ່ປະເທດເຈົ້າພາບ, ປະກອບສ່ວນເປັນຂົວຕໍ່ ເພື່ອສົ່ງເສີມການລົງທຶນ ການຄ້າລະຫວ່າງປະເທດ. ຍ້ອນການເຄື່ອນໄຫວດັ່ງກ່າວເທິງນີ້ ຂອງວົງຄະນະຍາດຊາວຫວຽດນາມຢູ່ຕ່າງປະເທດ, ສິນຄ້າຂອງຫວຽດນາມຈຶ່ງໄດ້ຂາຍນັບມື້ນັບຫຼາຍ ໃນຕະຫຼາດໂລກ. ຍອດມູນຄ່າສິນຄ້າສົ່ງນອກນັບມື້ນັບເພີ່ມຂຶ້ນ, ໃນນັ້ນ ສິນຄ້າສົ່ງນອກບາງປະເພດມີຈຳນວນຫຼາຍໃນອັນດັບທີໜຶ່ງ ທີສອງຂອງໂລກ, ໄດ້ຄືແນວນັ້ນ ສ່ວນໜຶ່ງແມ່ນຍ້ອນການປະກອບສ່ວນ ຂອງຊາວຫວຽດນາມຢູ່ຕ່າງປະເທດ.
ພ້ອມກັບການຄ້າພານິດ, ວົງຄະນະຍາດຊາວຫວຽດນາມຢູ່ຕ່າງປະເທດຍັງຕັ້ງໜ້າລົງທຶນຢູ່ບ້ານເກີດເມືອງນອນ. ຮອດເດືອນສິງຫາ 2013, ມີ 3.600 ວິສາຫະກິດກັບມາລົງທຶນ 8,6 ຕື້ໂດລາສະຫະລັດຢູ່ຫວຽດນາມ, ໃນນັ້ນ ປະມານ 60% ຂອງຈຳນວນໂຄງການ ຖືກຕີລາຄາວ່າເຄື່ອນໄຫວມີປະສິດທິຜົນ. ວິສາຫະກິດໃຫຍ່ຈຳນວນໜຶ່ງຂອງຊາວຫວຽດກ່ຽວໄດ້ປະສົບຜົນສຳເລັດດີທີ່ສຸດ, ໄດ້ບືນຕົວຂຶ້ນເປັນບໍລິສັດທີ່ມີເຄື່ອງໝາຍການຄ້າອັນດັບໜຶ່ງຢູ່ຫວຽດນາມ, ຄື Vingroup, Eurowindows,... ປັດຈຸບັນ, ລະບົບໂຄງສ້າງພື້ນຖານການທ່ອງທ່ຽວ ຣີສອດຂະໜາດໃຫຍ່ແຕ່ເໜືອ ຕະຫຼອດໃຕ້ ໂດຍຊາວຫວຽດນາມຢູ່ຕ່າງປະເທດກັບມາລົງທຶນກໍ່ສ້າງ, ເຊັ່ນ ສະຖານີລົດສາຍ Bà Nà Hills, Vinpearl Land, Da Lat Eden. ເຖິງວ່າໄດ້ພົບຄວາມຫຍຸ້ງຍາກຫຼາຍຢ່າງກໍຕາມ ແຕ່ຫຼາຍໂຄງການກໍ່ໄດ້ປະຕິບັດໃຫ້ສຳເລັດ ເຊິ່ງສະແດງໃຫ້ເຫັນຄວາມຕັດສິນໃຈຂອງນັກທຸລະກິດຊາວຫວຽດກ່ຽວ ທີ່ຢາກລົງທຶນກໍ່ສ້າງ ປະກອບສ່ວນເປັນຄຸນປະໂຫຍດໃຫ້ບ້ານເກີດເມືອງນອນ(5).
ກ່ຽວກັບການສົ່ງເງິນເມືອປະເທດ, ໃນ 5 ປີທີ່ຜ່ານມານີ້, ແຕ່ລະປີ ມີຊາວຫວຽດກ່ຽວກັບເມືອຢາມບ້ານເກີດເມືອງນອນປະມານ 500.000 ຄົນ. ຕາມນັ້ນ ເງິນຕາຕ່າງປະເທດກໍ່ໄດ້ນຳເຂົ້າມາເປັນຈຳນວນຫຼາຍທີ່ສຸດ ເຊິ່ງບໍ່ພຽງແຕ່ເອົາມາໃຫ້ຍາດຕິພີ່ນ້ອງເທົ່ານັ້ນ ຫາກຍັງໄດ້ລົງທຶນເຂົ້າໃນຫຼາຍໂຄງການນຳອີກ. ຕາມສະຖິຕິ, ຈຳນວນເງິນຕາຕ່າງປະເທດທີ່ຊາວຫວຽດກ່ຽວຝາກມາໃນປະເທດ ແຕ່ລະປີໄດ້ເພີ່ມຂຶ້ນປະມານ 10% - 15%, ແຕ່ 3 ຕື້ໂດລາສະຫະລັດປີ 2004 ຂຶ້ນເປັນ 7,4 ຕື້ໂດລາສະຫະລັດປີ 2008; ປີ 2010 ບັນລຸປະມານ 8,4 ຕື້ໂດລາສະຫະລັດ; ປີ 2011 ໄດ້ 9 ຕື້ໂດລາສະຫະລັດ; ປີ 2012 ໄດ້ 10,5 ຕື້ໂດລາສະຫະລັດ; ປີ 2013 ໄດ້ກວ່າ 11 ຕື້ໂດລາສະຫະລັດ, ແລະປີ 2014 ໄດ້ປະມານ 12 ຕື້ໂດລາສະຫະລັດ, ທຽບເທົ່າປະມານ 8% ຈີດີພີ, ເຮັດໃຫ້ຫວຽດນາມກາຍເປັນໜຶ່ງໃນ 9 ປະເທດທີ່ມີພີ່ນ້ອງຮ່ວມຊາດຢູ່ຕ່າງປະເທດຝາກເງິນຕາຕ່າງປະເທດມາໃນປະເທດຫຼາຍທີ່ສຸດ(6). ສິ່ງສຳຄັນຄື ແຫຼ່ງການເງິນນີ້ໄດ້ລົງທຶນຕົ້ນຕໍ່ເຂົ້າໃນການຜະລິດ ທຸລະກິດ, ຊົດເຊີຍຂາດດຸນການຄ້າ, ຊ່ວຍລົດຜ່ອນຄວາມສ່ຽງໃນການລະດົມທຶນ, ປະກອບສ່ວນແກ້ໄຂວຽກເຮັດງານທຳໃຫ້ຜູ້ອອກແຮງງານ. ການນຳໃຊ້ແຫຼ່ງເງິນຕາທີ່ຊາວຫວຽດນາມຝາກມາຈາກຕ່າງປະເທດ ໄດ້ມີບາດກ້າວຫັນປ່ຽນຢ່າງຕັ້ງໜ້າ ແລະ ບັນລຸຜົນສຳເລັດຫຼາຍຢ່າງທີ່ໜ້າຈົດຈຳ, ມີຜົນກະທົບເປັນຢ່າງດີຕໍ່ເສດຖະກິດຫວຽດນາມ. ໃນສະພາບການເສດຖະກິດໂລກຍັງມີຄວາມຫຍຸ້ງຍາກຫຼາຍຢ່າງ, ບັນດາປະເທດທີ່ມີຊາວຫວຽດນາມດຳລົງຊີວິດຢູ່ ກໍ່ຖືກຜົນກະທົບບໍ່ໜ້ອຍ, ແຕ່ຊາວຫວຽດນາມຢູ່ຕ່າງປະເທດກໍ່ຍັງປະຢັດຄ່າໃຊ້ຈ່າຍ ຝາກເງິນເມືອປະເທດເພື່ອລົງທຶນ ຊ່ວຍເຫຼືອຄອບຄົວ ຍາດຕິພີ່ນ້ອງ, ພ້ອມກັນນັ້ນກໍ່ຊ່ວຍໃຫ້ປະເທດມີແຫຼ່ງພະລັງເພີ່ມເຕີມເພື່ອພັດທະນາ. ຍ້ອນແນວນັ້ນ, ຈຳນວນເງິນທີ່ຊາວຫວຽດກ່ຽວສົ່ງມາໃນປະເທດບໍ່ພຽງແຕ່ມີຄວາມໝາຍເສດຖະກິດເທົ່ານັ້ນ ຫາກຍັງມີຄວາມໝາຍອັນໃຫຍ່ຫຼວງທາງດ້ານຈິດໃຈ ຄວາມຮັບຜິດຊອບຂອງຊາວຫວຽດກ່ຽວແຕ່ລະຄົນຕໍ່ກັບປະເທດຊາດ.
ພ້ອມກັບການເຄື່ອງໄຫວຕ່າງໆເທິງນີ້, ວົງຄະນະຍາດຊາວຫວຽດນາມຢູ່ຕ່າງປະເທດໄດ້ເຂົ້າຮ່ວມໃນສັງຄົມປະເທດທີ່ຕົນອາໄສຢູ່ນັບມື້ນັບດີກວ່າ, ຢືນຢັນທີ່ຕັ້ງຂອງຕົນໄດ້ ແລະ ມີສ່ວນປະກອບໃນການພັດທະນາເສດຖະກິດ-ສັງຄົມຂອງປະເທດທີ່ຕົນອາໄສ. ປັດຈຸບັນ ຢູ່ເຢຍລະມັນ ມີ 8.000 ວິສາຫະກິດຂອງຊາວຫວຽດກ່ຽວ(7). ບັນດາວິສາຫະກິດເຫຼົ່ານີ້ ເຄື່ອນໄຫວຢ່າງມີປະສິດທິຜົນ, ສ້າງວຽກເຮັດງານທຳໃຫ້ຄົນຫວຽດ ຄົນເຢຍລະມັນ ແລະ ຄົນຕ່າງປະເທດອື່ນ ໄດ້ເປັນຈຳນວນຫຼາຍ, ເຊັ່ນ ສູນການຄ້າ ໂດ່ງຊວນ ຢູ່ເບີລິນ ແລະ ໄລຊິກ, ສູນການຄ້າປາຊີຟິກຢູ່ ເບີລິນ, ຫຼາຍສູນການຄ້າຢູ່ ເດຣສະເດັນ, ມັກເດບູກ,... ນາຍົກລັດຖະມົນຕີ ເຢຍລະມັນ ທ່ານນາງ ອັງເກລາ ແມເຄິນ ໄດ້ຕີລາຄາວ່າ ວົງຄະນະຍາດຊາວຫວຽດນາມໄດ້ເຂົ້າຮ່ວມຢ່າງສຳເລັດຜົນ ໃນສັງຄົມເຢຍລະມັນ ແລະເວົ້າວ່າ ລັດຖະບານເຢຍລະມັນຈະສືບຕໍ່ອຳນວຍຄວາມສະດວກ ໃຫ້ຊາວຫວຽດນາມດຳລົງຊີວິດ ແລະ ທຳມາຫາກິນເປັນປົກກະຕິ, ປະກອບສ່ວນອັນຕັ້ງໜ້າ ເຂົ້າໃນວິວັດການພັດທະນາ ແລະ ຄວາມຈະເລີນວັດທະນາຖາວອນຂອງປະເທດເຢຍລະມັນ. ວົງຄະນະຍາດຊາວຫວຽດນາມຢູ່ອັງກິດ ແມ່ນວົງຄະນາຍາດທີ່ຍັງໜຸ່ມ ແຕ່ກໍ່ຖືກຕີລາຄາວ່າໄດ້ເຂົ້ນຮ່ວມໃນສັງຄົງອັງກິດຢ່າງໄວ, ໄດ້ປະກົດມີບາງຄຸ້ມການຄ້າຂອງຊາວຫວຽດນາມຢູ່ອັງກິດ, ຫຼາຍຄົນກໍ່ໄດ້ກັບມາລົງທຶນຢູ່ໃນປະເທດຫວຽດນາມ(8).
ວັນທີ 3 ກໍລະກົດ 2013, ລັດຖະບານສາທາລະນະລັດແຊັກ ໄດ້ຮັບຮູ້ຢ່າງເປັນທາງການ ວົງຄະນະຍາດຊາວຫວຽດນາມຢູ່ສາທາລະນະລັດແຊັກ ເປັນຊົນເຜົ່າສ່ວນໜ້ອຍທີ 14 ຂອງແຊັກ. ນີ້ແມ່ນເຫດການທີ່ສຳຄັນ, ສະແດງເຖິງຄວາມເອົາໃຈໃສ່ ຕີລາຄາຂອງອຳນາດການປົກຄອງ ແລະ ປະຊາຊົນແຊັກ ຕໍ່ກັບຄົນສັນຊາດແຊັກເຊື້ອຊາດຫວຽດນາມ ແລະ ກວ້າງກວ່າແມ່ນຕໍ່ກັບວົງຄະນະຍາດຊາວຫວຽດນາມຢູ່ສາທາລະນະລັດແຊັກ, ຍ້ອນການເຂົ້າຮ່ວມ ແລະ ການປະກອບສ່ວນຂອງກຸ່ມຄົນນີ້ໃຫ້ສັງຄົມແຊັກ. ຕົວຢ່າງ ສະເພາະຢູ່ນະຄອນຫຼວງ ປຣາຮາ ໄດ້ມີ 5.000 ຮ້າຍຂາຍຜັກ-ເຄື່ອງອາຫານ, 100 ຮ້ານອາຫານ ພັດຕາຄານ ຂອງຊາວຫວຽດກ່ຽວ. ສິ່ງທີ່ຄວນເອົາໃຈໃສ່ແມ່ນ ເຄື່ອງປາອາຫານທີ່ຂາຍຢູ່ນັ້ນ ສ່ວນຫຼາຍແມ່ນໄດ້ປູກແລະລ້ຽງຢູ່ຕາມຟາມຕ່າງໆ ຂອງຊາວຫວຽດນາມ ໃນດິນແດນແຊັກ. ຊາວຫວຽດນາມບໍ່ພຽງແຕ່ທຳການຄ້າຂາຍເທົ່ານັ້ນ ຫາກຍັງໄດ້ຜະລິດຜະລິດຕະພັນໃຫ້ສັງຄົມ(9).
ລັດຖະບານໄທກໍ່ຢັ້ງຢືນວ່າ ຊາວຫວຽດນາມທີ່ດຳລົງຊີວິດຢູ່ປະເທດໄທ ສ່ວນຫຼາຍແມ່ນປັດໃຈຕັ້ງໜ້າ ປະກອບສ່ວນຊຸກຍູ້ຄວາມພົວພັນມິດຕະພາບ ການຮ່ວມມືລະຫວ່າງສອງປະເທດ; ລັດຖະບານໄທຈະໃຫ້ຄວາມຊ່ວຍເຫຼືອ ແລະ ອຳນວຍຄວາມສະດວກ ໃຫ້ຊາວຫວຽດນາມສືບຕໍ່ດຳລົງຊີວິດ ທຳມາຫາກິນ ແລະ ປະກອບສ່ວນອັນຕັ້ງໜ້າ ເຂົ້າໃນການເພີ່ມທະວີຄວາມພົວພັນມິດຕະພາບ ການຮ່ວມມືໄທ - ຫວຽດນາມ. ວົງຄະນະຍາດຊາວຫວຽດນາມຢູ່ຊູແອດ ສະວິດ ອົດສະຕຣາລີ ແມ່ນວົງຄະນະຍາດທີ່ມີຄວາມສາມັກຄີດີ, ສ່ວນຫຼາຍໄດ້ດຳລົງຊີວິດຢ່າງເປັນປົກກະຕະ, ປະຕິບັດກົດໝາຍຢ່າງເຂັ້ມງວດ ແລະ ເຂົ້າຮ່ວມຢ່າງເລິກເຊິ່ງໃນສັງຄົມປະເທດທີ່ຕົນອາໃສ.
ປັດຈຸບັນ, ຢູ່ເກືອບທຸກປະເທດທີ່ມີຊາວຫວຽດນາມຕ່າງດ້າວ ລ້ວນແຕ່ມີອົງການຈັດຕັ້ງ ສະມາຄົນຂອງຊາວຫວຽດນາມ. ເຖິງວ່າຈະຈັດຕັ້ງຂຶ້ນໃນສະພາບການໃດ, ເຄື່ອນໄຫວພາຍໃຕ້ຮູບການໃດ, ບັນດາອົງການຈັດຕັ້ງເຫຼົ່ານີ້ກໍ່ໄດ້ເຊີດຊູຈິດໃຈສາມັກຄີ ຊ່ວຍເຫຼືອເຊິ່ງກັນແລະກັນ ສ້າງຄວາມຜູກພັນສະໜິດແໜ້ນລະຫວ່າງຊາວຫວຽດກ່ຽວ ກັບປະເທດຊາດ ບ້ານເກີດເມືອງນອນ. ໃນຈຳນວນນັ້ນ ບັນດາສະມາຄົນນັກວິສາຫະກິດ ນັກທຸລະກິດຂອງຊາວຫວຽດນາມມີບົບບາດສຳຄັນ. ນອກຈາກການຊ່ວຍເຫຼືອກັນຂຸດຄົ້ນ ສວຍໃຊ້ໂອກາດເພື່ອຜະລິດ ທຸລະກິດໃນຕະຫຼາດໃຫ້ໄດ້ເປັນຢ່າງດີ, ການເຄື່ອນໄຫວຂອງສະມາຄົມເຫຼົ່ານີ້ຍັງຊຸກຍູ້ການພົວພັນລະຫວ່າງວິສາຫາກິດຫວຽດນາມຢູ່ຕ່າງປະເທດ ກັບໃນປະເທດ, ເພີ່ມທະວີການສົນທະນາລະຫວ່າງອົງການຄຸ້ມຄອງລັດ ກັບນັກທຸລະກິດຊາວຫວຽດກ່ຽວ.
ເຖິງວ່າບັນດາຕົວເລດເທິງນີ້ຍັງບໍ່ທັນຄົບຖ້ວນກໍຕາມ ແຕ່ກໍ່ໄດ້ໃຫ້ເຫັນເຖິງກຳລັງບົ່ມຊ້ອນຂອງວົງຄະນະຍາດຊາວຫວຽດນາມຢູ່ຕ່າງປະເທດ ກໍ່ຄືການປະກອບສ່ວນຂອງເຂົາໃຫ້ບ້ານເກີດເມືອງນອນ ແລະ ໃຫ້ປະເທດເຈົ້າພາບ ເຊິ່ງແມ່ນສ່ວນປະກອບທີ່ໃຫຍ່ຫຼວງ. ບັນຫາວາງອອກມາກໍ່ຄື, ຖ້າຫາກພວກເຮົາດຶງດູດກຳລັງຫວຽດກ່ຽວ ແລະ ວິສາຫະກິດເຫຼົ່ານັ້ນໄດ້ ເພື່ອປະກອບສ່ວນຫຼາຍກວ່າອີກ ໃຫ້ແກ່ປະເທດຊາດ ກໍ່ຈະນັບເປັນແຫຼ່ງພະລັງອັນໃຫຍ່ຫຼວງ.
ວຽກງານຕໍ່ກັບຊາວຫວຽດນາມຢູ່ຕ່າງປະເທດ: ຄວາມມານະພະຍາຍາມ ແລະ ບັນຫາທີ່ວາງອອກມາ
ໃນຊຸມປີທີ່ຜ່ານມາ, ວຽກງານຕໍ່ກັບຊາວຫວຽດນາມຢູ່ຕ່າງປະເທດໄດ້ຮັບການຜັນຂະຫຍາຍປະຕິບັດຢ່າງຕັ້ງໜ້າ ແລະ ບັນລຸຜົນສຳເລັດໄດ້ຫຼາຍພໍປະມານ. ເພື່ອຢືນຢັນບົດບາດທີ່ຕັ້ງຂອງວົງຄະນະຍາດຊາວຫວຽດນາມຢູ່ຕ່າງປະເທດ, ກໍ່ຄືສ້າງຄວາມເປັນເອກະພາບທາງດ້ານຄວາມຮັບຮູ້ ແລະ ການກະທຳ ໃນວຽກງານກ່ຽວກັບຊາວຫວຽດນາມຢູ່ຕ່າງປະເທດ, ລັດຖະບານຫວຽດນາມໄດ້ປະກາດໃຊ້ແຜນນະໂຍບາຍ ນະໂຍບາຍຫຼາຍສະບັບ ແລະ ນັບມື້ນັບອຳນວຍຄວາມສະດວກໃຫ້ພີ່ນ້ອງຊາວຫວຽດກ່ຽວ. ນະໂຍບາຍກ່ຽວກັບຄົນຜ່ານດ່ານ, ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍສັນຊາດ, ນະໂຍບາຍກຳມະສິດອະສັງຫາລິມະຊັບ,…ໄດ້ອຳນວຍຄວາມສະດວກໃຫ້ຊາວຫວຽດກ່ຽວກັບເມືອບ້ານເກີດເມືອງນອນ, ປະກອບສ່ວນສະຕິປັນຍາ ກຳລັງວັງຊາ ໃຫ້ແກ່ການສ້າງສາພັດທະນາປະເທດ ແລະ ເຊື່ອມໂຍງເຂົ້າກັບສາກົນ.
ທາງດ້ານເສດຖະກິດ, ຫວຽດນາມຕັ້ງແຜນຈະປັບປຸງບູລະນະ ແລະ ກໍ່ສ້າງໃໝ່ບັນດານະໂຍບາຍດຶງດູດການລົງທຶນ ການທຸລະກິດ, ເສີມຂະຫຍາຍຄວາມສາມາດຂອງຊາວຫວຽດນາມຢູ່ຕ່າງປະເທດ ໃນການບໍລິການ ເປີດກວ້າງການຈຳໜ່າຍສິນຄ້າຫວຽດນາມ, ເພີ່ມທະວີການຮ່ວມມືລົງທຶນກັບຕ່າງປະເທດ. ການສ້າງຕັ້ງສະຫະສະມາຄົມນັກວິສາຫະກິດຊາວຫວຽດນາມຢູ່ຕ່າງປະເທດຂຶ້ນມານັ້ນ ແມ່ນຫຼັກໝາຍອັນສຳຄັນໃນການເຕົ້າໂຮມ ເຊື່ອມສຳພັນກຳລັງແຮງຂອງບັນດາວິສາຫະກິດຫວຽດນາມໃນໂລກ. ຄຽງຂ້າງການແນະນຳ ຊ່ວຍເຫຼືອການເຄື່ອນໄຫວຂອງສະຫະສະມາຄົມ, ຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ໄດ້ຊີ້ນຳ ແນະນຳ ຊ່ວຍໜູນການເຄື່ອນໄຫວຂອງສະມາຄົມນັກທຸລະກິດຫຼາຍແຫ່ງ; ໃຫ້ຄຳປຶກສາ ຊ່ວຍແກ້ຂໍ້ຄົງຄ້າງຂອງບຸກຄົນ ແລະ ຂອງສະມາຊິກສະມາຄົມຫຼາຍຄົນ, ຂົນຂວາຍຊາວຫວຽດກ່ຽວເຂົ້າຮ່ວມການເຄື່ອນໄຫວການທູດເສດຖະກິດ; ໂຄສະນາ ແນະນຳຊ່ວຍຊາວຫວຽດກ່ຽວທີ່ເຮັດວຽກໃນຂົງເຂດການຄ້າ ການບໍລິການ; ເຂົ້າຮ່ວມການຂົນຂວາຍ “ຄົນຫວຽດນາມນິຍົມໃຊ້ສິນຄ້າຫວຽດນາມ”. ໂຄງການ “ພົບປະນັກວິສາຫະກິດ” ໄດ້ເພີ່ມທະວີການຂົນຂວາຍ ແລະ ເຊື່ອນຕໍ່ນັກທຸລະກິດຊາວຫວຽດນາມຢູ່ຕ່າງປະເທດ ກັບນັກທຸລະກິດໃນປະເທດ, ພ້ອມກັນແບ່ງປັນບົດຮຽນ ຊອກຫາຄູ່ຮ່ວມມືຜູ້ຫຸ້ນສ່ວນໃນການເຄື່ອນໄຫວລົງທຶນ ຜະລິດ ທຸລະກິດ ເພື່ອຂຸດຄົ້ນ ສວຍໃຊ້ໂອກາດທຳການຜະລິດທຸລະກິດໃນປະເທດ ແລະ ຕ່າງປະເທດ ໃຫ້ໄດ້ດີທີ່ສຸດ.
ນອກນັ້ນ, ວຽກງານສື່ຂ່າວ ວັດທະນະທຳການຕ່າງປະເທດ ກໍ່ໄດ້ຮັບຄວາມເອົາໃຈໃສ່ຫຼາຍກວ່າເກົ່າ. ຄະນະກຳມະການແຫ່ງລັດກ່ຽວກັບຊາວຫວຽດນາມຢູ່ຕ່າງປະເທດ ໄດ້ເປັນປະທານ ຈັດຕັ້ງການປະຊຸມນັກຂ່າວ ຢ່າງເປັນປະຈຳ ເພື່ອສື່ຂ່າວກ່ຽວກັບການເຄື່ອນໄຫວຂອງຊາວຫວຽດນາມຢູ່ຕ່າງປະເທດ. ການເຄື່ອນໄຫວຂອງຊາວຫວຽດນາມຢູ່ຕ່າງປະເທດ ໄດ້ຮັບການເພີ່ມທະວີ ດ້ວຍຫຼາຍຮູບການທີ່ອຸດົມສົມບູນ, ຄື ຈັດພິທີນະມັດສະການປູຊະນີຍະກະສັດ ຮຸ່ງເວືອງ, ເຄື່ອນໄຫວໃນໂອກາດວັນບຸນມະໂຫລານ, ຕັ້ງຄ້າຍພັກແລ້ງ. ລັດຫວຽດນາມໄດ້ອຳນວຍຄວາມສະກວດ ຊ່ວຍເຫຼືອນັກວິທະຍາສາດຊາວຫວຽດກ່ຽວ ໃນການຈັດຕັ້ງສຳມະນາວິທະຍາສາດສະເພາະຂະແໜງ, ເຊັ່ນ ສຳມະນາຟີຊິກວິທະຍາສາຂານາໂນ ຢູ່ແຂວງກວ໋າງນິງ (ປີ 2012), ສຳມະນາຟີຊິກວິທະຍາດາລາສາດ ຢູ່ແຂວງບິ່ງດິ້ງ (ປີ 2013).
ພິເສດ, ມະຕິສະບັບທີ 36/NQ-TW, ວັນທີ 26 ມີນາ 2004, ຂອງກົມການເມືອງສູນກາງພັກວ່າດ້ວຍວຽກງານຕໍ່ກັບຊາວຫວຽດນາມຢູ່ຕ່າງປະເທດ ໄດ້ຮັບການຜັນຂະຫຍາຍ ຊາບຊືມ ຊຶ່ງໄດ້ສ້າງບາດກ້າວບຸກທະລຸໃໝ່ໃນວຽກງານຕໍ່ກັບຊາວຫວຽດກ່ຽວ. ລະບົບຂອບກົດໝາຍ ແລະ ນະໂຍບາຍທີ່ໄດ້ເປັນຮູບເປັນຮ່າງຂຶ້ນໃນເບື້ອງຕົ້ນນັ້ນ ໄດ້ຕອບສະໜອງຜົນປະໂຫຍດອັນແທດຈິງ ຂອງຊາວຫວຽດນາມຢູ່ຕ່າງປະເທດ, ສ້າງເງື່ອນໄຂອັນສະດວກ ໃຫ້ຊາວຫວຽດກ່ຽວອຸ່ນອຽນໃຈ ກັບເມືອປະກອບສ່ວນກໍ່ສ້າງບ້ານເກີດເມືອງນອນ.
ເຖິງວ່າລັດຖະບານຫວຽດນາມ ກໍ່ຄືວົງຄະນະຍາດຊາວຫວຽດນາມຢູ່ຕ່າງປະເທດ ໄດ້ມີຄວາມມານະພະຍາຍາມເສີມຂະຫຍາຍຄວາມສາມາດບົ່ມຊ້ອນ, ກຳລັງແຮງປະກອບສ່ວນສ້າງສາພັດທະນາປະເທດກໍ່ຕາມ ແຕ່ໃນພາກຕົວຈິງ, ວຽກງານນີ້ຍັງມີຂໍ້ຈຳກັດ ສິ່ງຄົງຄ້າງທີ່ແນ່ນອນ ເຊິ່ງສະແດງອອກໃນດ້ານຕ່າງໆລຸ່ມນີ້:
ທີໜຶ່ງ, ການຜັນຂະຫຍາຍນະໂຍບາຍຍັງຊັກຊ້າ, ມີປະສິດທິຜົນໜ້ອຍ. ບັນດາກົນໄກແລກປ່ຽນເອກະສານ, ຂໍ້ກຳນົດກົດໝາຍ, ລະບຽບການບໍລິຫານ ຍັງຫຍຸ້ງເຫຍືອງ ແລະ ມີການປ່ຽນແປງເລື້ອຍ ອັນໄດ້ກໍ່ຄວາມຫຍຸ້ງຍາກ ໃຫ້ແກ່ການເຄື່ອນໄຫວຢູ່ໃນປະເທດຂອງຊາວຫວຽດກ່ຽວ. ແຜນນະໂຍບາຍ ນະໂຍບາຍຂອງລັດຖະບານຫວຽດນາມໄດ້ອຳນວຍຄວາມສະດວກ ແຕ່ເມື່ອລົງເຖິງທ້ອງຖິ່ນ ເຊິ່ງເປັນບ່ອນທີ່ໂຄງການໄດ້ຮັບການຜັນຂະຫຍາຍ ພັດພົບຄວາມຫຍຸ້ງຍາກຫຼາຍຢ່າງ. ນັກວິສາຫະກິດຊາວຫວຽດກ່ຽວຫຼາຍຄົນໄດ້ຮັບຄວາມຊົມເຊີຍ ຊ່ວຍເຫຼືອຈາກແຂວງ ພະແນກການ, ແຕ່ພະນັກງານປະຕິບັດງານພັດແກ້ໄຂວຽກງານຢ່າງຊັກຊ້າ ມີລັກສະນະກີດຂວາງໂຄງການ. ຊ້ຳບໍ່ໜຳ ຍັງມີການຈຳແນກການປະພຶດ ລະຫວ່າງວິສາຫະກິດທີ່ມີການລົງທຶນ 100% ຈາກຕ່າງປະເທດ ກັບວິສາຫະກິດໃນປະເທດ. ດ້ວຍເຫດນັ້ນ, ພີ່ນ້ອງຊາວຫວຽດກ່ຽວສ່ວນຫຼາຍຢາກໃຫ້ລັດຖະບານສືບຕໍ່ປົວແປງສິ່ງແວດລ້ອມແຫ່ງການລົງທຶນ, ສ້າງເງື່ອນໄຂໃຫ້ມີຄວາມປອດໂປ່ງ ແລະ ສະດວກດີກວ່າອີກ ໃຫ້ແກ່ການເຄື່ອນໄຫວລົງທຶນ ທຳການທຸລະກິດຂອງຊາວຫວຽດກ່ຽວ.
ທີສອງ, ປະສິດທິຜົນໃນການດຶງດູດພູມປັນຍາຍັງບໍ່ທັນສູງ. ໃນກົນໄກ, ວິທີແກ້ໄຂແນໃສ່ດຶງດູດພູມປັນຍາຂອງຖັນແຖວປັນຍາຊົນຊາວຫວຽດກ່ຽວ ຍັງມີຄວາມຫຍຸ້ງຍາກ, ສິ່ງຄົງຄ້າງຢູ່. ປັດຈຸບັນ, ຈຳນວນປັນຍາຊົນກັບມາເຮັດວຽກຢູ່ໃນປະເທດໃນແຕ່ລະປີຍັງໜ້ອຍໂພດ. ໂຄງການດຶງດູດປັນຍາຊົນເມືອປະເທດຍັງບໍ່ໄດ້ຮັບການບູລະນະ. ຜູ້ຊ່ຽວຊານຫຼາຍຄົນທີ່ກຳລັງເຮັດວຽກຢູ່ຕ່າງປະເທດດ້ວຍເງິນເດືອນສູງ ໄດ້ກຽມຄວາມພ້ອມກັບເມືອປະເທດເຮັດວຽກ ປະກອບສະຕິປັນຍາຂອງຕົນ ດ້ວຍລະດັບເງິນເດືອນພຽງເຄິ່ງໜຶ່ງເທົ່ານັ້ນ,ແຕ່ຫວຽດນາມກໍບໍ່ທັນຕອບສະໜອງໄດ້. ດ້ານອື່ນ, ລະຫວ່າງປັນຍາຊົນໃນປະເທດ ແລະ ປັນຍາຊົນຢູ່ຕ່າງປະເທດກໍມີບາງຈຸດທີ່ຍັງບໍ່ເປັນເອກະພາບ. ໃນການຮັບເອົາຄວາມເຫັນປະກອບສ່ວນຂອງນັກວິທະຍາສາດ ຜູ້ຊ່ຽວຊານຊາວຫວຽດນາມຢູ່ຕ່າງປະເທດນັ້ນ ບັນດາສຳນັກງານອົງການໃນປະເທດ ກໍຍັງບໍ່ທັນເຮັດຢ່າງສຸດໃຈເພື່ອຜົນປະໂຫຍດລວມເທື່ອ (10). ບາງກະຊວງ ຂະແໜງການ ທ້ອງຖິ່ນຍັງບໍ່ທັນຮັບຮູ້ຢ່າງເລິກເຊິ່ງ ແລະ ເອົາໃຈໃສ່ຢ່າງຖືກລະດັບ ເຖິງການດຶງດູດປັນຍາຊົນ ແລະ ສ້າງເງື່ອນໄຂອຳນວຍຄວາມສະດວກໃຫ້ປັນຍາຊົນ ຜູ້ຊ່ຽວຊານກັບມາເຄື່ອນໄຫວຢູ່ໃນປະເທດ. ບາງແຫ່ງໄດ້ໜັກໄປທາງດ້ານຂຸດຄົ້ນຄວາມສາມາດດ້ານເສດຖະກິດຂອງນັກວິສາຫະກິດຊາວຫວຽດກ່ຽວ ຫຼາຍກວ່າທາງດ້ານແຫຼ່ງພະລັງສະຕິປັນຍາຂອງເຂົາ.
ທີສາມ, ບັນດາວິສາຫະກິດຂອງຊາວຫວຽດກ່ຽວເຄື່ອນໄຫວຍັງບໍ່ທັນເປັນເອກະພາບເໝືອນດັງອົງການຈັດຕັ້ງໜຶ່ງ, ການເຄື່ອນໄຫວກໍ່ກະແຈກກະຈ່າຍ ແລະ ຍັງບໍ່ມີຄວາມສາມັກຄີ. ສະມາຄົມອາຊີບຫຼາຍແຫ່ງຍັງຊັກຊ້າໃນການປ່ຽນແປງໃໝ່ແບບວິທີການເຄື່ອນໄຫວ. ສະຖານະນິຕິກຳຂອງຊາວຫວຽດກ່ຽວຢູ່ຫຼາຍປະເທດຍັງເລື່ອນລອຍ.
ເພື່ອເສີມຂະຫຍາຍແຫຼ່ງພະລັງ ຂອງວົງຄະນະຍາດຊາວຫວຽດນາມຢູ່ຕ່າງປະເທດ ໃຫ້ດີກວ່າອີກ
ພາຍຫຼັງ 10 ປີແຫ່ງການປະຕິບັດມະຕິສະບັບທີ 36/NQ-TW ຂອງກົມການເມືອງສູນກາງພັກ ວ່າດ້ວຍວຽກງານຕໍ່ກັບຊາວຫວຽດນາມຢູ່ຕ່າງປະເທດ ໄດ້ໃຫ້ເຫັນປະສິດທິຜົນເບື້ອງຕົ້ນ, ແຕ່ກໍ່ເຫັນຂໍ້ຂາດຕົກບົກພ່ອງທີ່ຕ້ອງແກ້ໄຂຜ່ານຜ່າ. ເພື່ອແກ້ໄຂຜ່ານຜ່າຂໍ້ຈຳກັດທີ່ກ່າວມາເທິງນີ້ ຕ້ອງປະຕິບັດວິທີແກ້ຈຳນວນໜຶ່ງລຸ່ມນີ້ໃຫ້ດີ:
ທີໜຶ່ງ, ຕ້ອງຢືນຢັນວ່າ, ຫວຽດນາມບໍ່ພຽງແຕ່ມີຄວາມປະສົງໃຫ້ຊາວຫວຽດກ່ຽວຢູ່ເຢັນເປັນປົກກະຕິ ແລະ ຂະຫຍາຍຕົວຢູ່ບ້ານເກີດເມືອງນອນທີສອງເທົ່ານັ້ນ, ຫາກຍັງມຸ່ງຫວັງໃຫ້ພີ່ນ້ອງຊາວຫວຽດກ່ຽວຫັນມາຫາປະທດຊາດ ເຊື້ອຊາດຫວຽດນຳອີກ. ມີຄວາມປະສົງເສີມຂະຫຍາຍແຫຼ່ງພະລັງຂອງຊາວຫວຽດກ່ຽວ ເພື່ອໃຫ້ແຫຼ່ງພະລັງດັ່ງກ່າວນັ້ນນັບມື້ນັບຂະຫຍາຍຕົວຢ່າງແຂງແຮງ ແລະ ໄດ້ນຳໃຊ້ຢ່າງມີປະສິດທິຜົນ, ນອກຈາກວຽກງານທີ່ໄດ້ເຮັດແລ້ວ, ພວກເຮົາຕ້ອງສະແດງອອກໃຫ້ເຫັນແຈ້ງກວ່າອີກເຖິງຄວາມເອົາໃຈໃສ່ຂອງພັກ-ລັດ ຕໍ່ກັບວົງຄະນະຍາດຊາວຫວຽດນາມຢູ່ຕ່າງປະເທດ. ພ້ອມກັນນັ້ນ ຕ້ອງຮັບຟັງຄວາມຄິດຄວາມເຫັນ ຄວາມມຸ່ງມາດປາຖະໜາ ຂອງຊາວຫວຽດກ່ຽວ ເພື່ອວາງກຳນົດກົນໄກນະໂຍບາຍ, ມີບາດກ້າວປະຕິບັດທີ່ຖືກຕ້ອງ ຊັດເຈນ ເໝາະສົມກວ່າອີກ.
ທີສອງ, ກໍ່ສ້າງແຜນການ ແລະ ການເງິນ ເພື່ອເຊື່ອມຕໍ່ບັນດາຊາວຫວຽດນາມທີ່ພວມທຸລະກິດຢູ່ປະເທດຕ່າງໆໃນໂລກ, ຈັດຕັ້ງການຝຶກອົບຮົມຄວາມຮູ້ກ່ຽວກັບການບໍລິຫານທຸລະກິດ ແລະ ສົ່ງເສີມການຄ້າ-ການທ່ອງທ່ຽວ, ນະໂຍບາຍບຸລິມະສິດລົງທຶນຂອງລັດ. ສົ່ງເສີມ ແລະ ອຳນວຍຄວາມສະດວກໃຫ້ວິສາຫະກິດໃນປະເທດ ເຊັນສັນຍາກັບ ວິສາຫະກິດຂອງຊາວຫວຽດນາມຢູ່ຕ່າງປະເທດ. ຈຳເປັນຕ້ອງມີນະໂຍບາຍສົ່ງເສີມການລົງທຶນ ສຳລັບບັນດາວິສາຫະກິດຂອງຊາວຫວຽດນາມຢູ່ຕ່າງປະເທດ ເພື່ອໃຫ້ເຂົາພັດທະນາແບບຍືນຍົງ, ເປັນ “ແນວໜ້າ” ໃຫ້ແກ່ການເຄື່ອນໄຫວຮ່ວມມືເສດຖະກິດຂອງຫວຽດນາມກັບປະເທດເຈົ້າພາບ.
ທີສາມ, ຄົ້ນຄວ້າ, ນຳໃຊ້ແຫຼ່ງພະລັງຂອງຊາວຫວຽດກ່ຽວ ໃນບົດບາດເຮັດການຕະຫຼາດໃຫ້ຜະລິດຕະພັນຂອງຫວຽດນາມ, ສ້າງເປັນເຄືອຂ່າຍສື່ຂ່າວ ລະຫວ່າງບັນດາພື້ນຖານການຜະລິດຢູ່ໃນປະເທດ ແລະ ຊາວຫວຽດນາມຢູ່ຕ່າງປະເທດ. ຍ້ອງຍໍຊົມເຊີຍ ລະດົມກຳລັງໃຈຢ່າງທັນການ ຕໍ່ວິສາຫະກິດ ນັກທຸລະກິດຊາວຫວຽດກ່ຽວທີ່ດີເດັ່ນ ມີການປະກອບສ່ວນຫຼາຍຢ່າງໃຫ້ແກ່ການເພີ່ມທະວີການຮ່ວມມືເສດຖະກິດລະຫວ່າງຫວຽດນາມ ແລະ ປະເທດເຈົ້າພາບ.
ທີສີ່, ມີນະໂຍບາຍໃໝ່ ທີ່ມີລັກສະນະບຸກທະລຸ ເພື່ອດຶງດູດຜູ້ຊ່ຽວຊານ ປັນຍາຊົນຊາວຫວຽດກ່ຽວກັບເມືອປະເທດ. ພ້ອມກັນນັ້ນ, ຈຳເປັນຕ້ອງມີບັນດາອົງການຈັດຕັ້ງຫົວຂອດ ເພື່ອເຕົ້າໂຮມແລະຊ່ວຍໜູນໃຫ້ກຳລັງນີ້. ບັນດາກະຊວງ ຂະແໜງການ ກໍ່ຕ້ອງສ້າງຕັ້ງໜ່ວຍຜູ້ຊ່ຽວຊານປັນຍາຊົນນຳໜ້າ ໃນບັນດາຂົງເຂດທີ່ສຳຄັນ ເພື່ອແນໃສ່ເພີ່ມທະວີການແລກປ່ຽນຂ່າວສານ ລະຫວ່າງບັນດານັກວິທະຍາສາດຢູ່ໃນ ແລະ ຕ່າງປະເທດ. ລັດຕ້ອງເອົາໃຈໃສ່ ສ້າງເງື່ອນໄຂ ອຳນວຍຄວາມສະດວກໃຫ້ເຂົາປະກອບສ່ວນ ໂດຍຜ່ານບັນດາໂຄງການຮ່ວມມືສິດສອນ ຄົ້ນຄວ້າວິທະຍາສາດ ຖ່າຍທອດມອບໂອນເຕັກໂນໂລຊີ ກໍ່ຄືແລກປ່ຽນ ຕິດຕໍ່ພົວພັນລະຫວ່າງນັກວິທະຍາສາດ ຜູ້ຊ່ຽວຊານ ຢູ່ໃນປະເທດ ແລະ ຕ່າງປະເທດ.
ທີຫ້າ, ຍູ້ແຮງການເຈລະຈາ ລົງນາມໃນບັນດາສັນຍາ ແລະ ຂໍ້ຕົກລົງທະວິພາຄີ, ພະຫຸພາຄີ ກັບບັນດາປະເທດທີ່ມີຊາວຫວຽດນາມດຳລົງຊີວິດເປັນຈຳນວນຫຼາຍ, ແນໃສ່ຊ່ວຍໃຫ້ຊາວຫວຽດກ່ຽວມີຖານະນິຕິທຳເປັນປົດກະຕິ ເພື່ອຮັບປະກັນໃຫ້ເຂົາມີຊີວິດການເປັນຢູ່ຍາວນານຢູ່ບ່ອນອາໃສ.
ທີຫົກ, ມີຮູບການສົ່ງເສີມ ລະດົມກຳລັງໃຈໃຫ້ວົງຄະນາຍາດຊາວຫວຽດກ່ຽວເຂົ້າຮ່ວມໃນສັງຄົມປະເທດທີ່ຕົນອາໃສ ເພື່ອດຳລົງຊີວິດຢ່າງຍາວນານ; ຍົກສູງຄວາມສາມາດຄຸ້ມຄອງ ແລະ ຈັດຕັ້ງບັນດາສະມາຄົມ; ປັບປຸງຄວາມສາມັກຄີເປັນເອກະພາບ, ຕັ້ງຜົນປະໂຫຍດຂອງວົງຄະນາຍາດຂຶ້ນເໜືອຜົນປະໂຫຍດສ່ວນຕົວ; ເສີມຂະຫຍາຍບົດບາດຂອງບັນດາອົງການຜູ້ຕາງໜ້າໃນວຽກງານຂອງວົງຄະຍາຍາດ; ເປັນເຈົ້າການຕໍ່ກັບການປ່ຽນແປງໃນນະໂຍບາຍຂອງປະເທດທີ່ຊາວຫວຽດກ່ຽວອາໃສ.
ທີເຈັດ, ຫັນແຜນນະໂຍບາຍ ນະໂຍບາຍຂອງພັກ-ລັດກ່ຽວກັບຊາວຫວຽດກ່ຽວເປັນນິຕິກຳ. ມະຕິສະບັບທີ 36/NQ-TW ໄດ້ຖືກປະຕິບັດໃນເວລາ 10 ກວ່າປີແລ້ວ, ດຽວນີ້ຕ້ອງມີມະຕິສະບັບໃໝ່ ເຊິ່ງມະຕິສະບັບໃໝ່ນີ້ຕ້ອງຕີລາຄາຢ່າງຖືກຕ້ອງກ່ຽວກັບເນື້ອແທ້ ຄວາມສາມາດບົ່ມຊ້ອນຂອງຊາວຫວຽດກ່ຽວ, ກຳນົດທິດທາງຈະແຈ້ງ ແລະ ລະອຽດ, ສອດຄ່ອງກັບໄລຍະແຫ່ງການພັດທະນາໃໝ່.
ປະຕິບັດບັນດາເນື້ອໃນເທິງນີ້ໄດ້ດີ ຈະປະກອບສ່ວນຊ່ວຍໃຫ້ວົງຄະນະຍາດຊາວຫວຽດນາມຢູ່ຕ່າງປະເທດ ມີຊີວິດການເປັນຢູ່ເປັນປົກກະຕິກວ່າອີກ, ຜູກພັນສະໜິດແໜ້ນກວ່າອີກກັບປະເທດ ແລະ ເຮັດບົດບາດເປັນຂົວຕໍ່ມິດຕະພາບ ລະຫວ່າງຫວຽດນາມ ແລະ ບັນດາປະເທດ, ປະກອບສ່ວນຍົກສູງຖານະບົດບາດຂອງຫວຽດນາມໃນເວທີໂລກ./.
ໂດຍ: ຮສ. ດຣ ຫງວຽນວັນລິກ
ອັກຄະລັດຖະທູດທີ່ປຶກສາຫວຽດນາມປະຈຳອີຕາລີ
* ບົດນີ້ໄດ້ລົງພິມໃນວາລະສານກອມມູນິດ ສະບັບທີ 873 (ເດືອນ ກໍລະກົດ 2015)
(1) http://www.vietnamplus.vn/thu-hut-tri-thuc-viet-kieu-can-moi-truong-lam-viec-tot/95371.vnp
(2) http://vi.wikipedia.org/wiki/Vi%E1%BB%87t_ki%E1%BB%81u
(3) http://www.vietnamplus.vn/kieu-bao-bay-to-tam-nguyen-huong-ve-dat-nuoc/26046.vnp
(4) http://www.tgvn.com.vn/Item/VN/KieuBao/2012/8/AC00DE8998409F1F/
(5) http://vi.wikipedia.org/wiki/Vi%E1%BB%87t_ki%E1%BB%81u
(6) http://www.vietnamplus.vn/kieu-bao-la-cau-noi-thuc-day-quan-he-viet-nam-voi-cac-nuoc/260366.vnp
(7) http://www.vietnamplus.vn/hoi-doanh-nghiep-viet-nam-o-duc-to-chuc-dai-hoi-iv/179010.vnp
(8) http://www.vietnamplus.vn/nhung-nguyen-vong-thiet-tha-tu-nguoi-viet-xa-que/117288.vnp
(9) http://www.vietnamplus.vn/tieu-thuong-viet-o-sec-canh-tranh-voi-cac-sieu-dai-gia/251166.vnp
(10) http://www.vietnamplus.vn/kieu-bao-va-chuyen-hang-chuc-ty-usd-chat-xam-luu-lac/183013.vnp