ເພີ່ມທະວີການເຊື່ອມໂຍງສາກົນ ທາງດ້ານວິທະຍາສາດ ແລະ ເຕັກໂນໂລຊີ
ການເຊື່ອມໂຍງສາກົນທາງດ້ານ ວິທະຍາສາດ ແລະ ເຕັກໂນໂລຊີ ມີບົດບາດສຳຄັນ ໃນການປະກອບສ່ວນ ສ້າງຖານະທີ່ຕັ້ງໃໝ່ ຂອງຫວຽດນາມ. (ພາບ: hvct.edu.vn)
ການເຄື່ອນໄຫວເຊື່ອມໂຍງສາກົນ ທາງດ້ານວິທະຍາສາດແລະເຕັກໂນໂລຊີ ຂອງຫວຽດນາມໃນປັດຈຸບັນ
ຕໍ່ໜ້າຄວາມຮຽກຮ້ອງຕ້ອງການຂອງສະພາບການໃໝ່, ພັກ ແລະ ລັດຫວຽດນາມໄດ້ປະກາດໃຊ້ແຜນນະໂຍບາຍທີ່ສຳຄັນຫຼາຍສະບັບ, ພ້ອມກັນນັ້ນກໍ່ສືບຕໍ່ກໍ່ສ້າງ ແລະ ປັບປຸງບູລະນະນະໂຍບາຍ ເພື່ອແນໃສ່ເພີ່ມທະວີການເຊື່ອມໂຍງສາກົນ ທາງດ້ານວິທະຍາສາດແລະເຕັກໂນໂລຊີ. ແຜນຍຸດທະສາດການພັດທະນາເສດຖະກິດ - ສັງຄົມ 2011 - 2020 ໄດ້ລະບຸຢ່າງຈະແຈ້ງວ່າ ຂະຫຍາຍວິທະຍາສາດແລະເຕັກໂນໂລຊີ ຕ້ອງກາຍເປັນກຳລັງໝູນຕົ້ນຕໍ່ ຂອງຂະບວນວິວັດການພັດທະນາ. ມະຕິຕົກລົງສະບັບທີ 418/QĐ-TTg, ລົງວັນທີ 11 ເມສາ 2012, ຂອງນາຍົກລັດຖະມົນຕີ ຮັບຮອງຜ່ານແຜນຍຸດທະສາດການພັດທະນາວິທະຍາສາດແລະເຕັກໂນໂລຊີ ໄລຍະ 2011 - 2020 ກໍ່ຢັ້ງຢືນວ່າ ການເຊື່ອມໂຍງສາກົນ ທາງດ້ານວິທະຍາສາດ ແລະ ເຕັກໂນໂລຊີ ແມ່ນເປົ້າໝາຍ ພ້ອມກັນນັ້ນກໍ່ແມ່ນວິທີແກ້ອັນສຳຄັນ ເພື່ອປະກອບສ່ວນເຮັດໃຫ້ວິທະຍາສາດ ແລະ ເຕັກໂນໂລຊີຫວຽດນາມ ບັນລຸລະດັບສາກົນໄດ້ໂດຍໄວ. ການເຊື່ອມໂຍງສາກົນ ທາງດ້ານວິທະຍາສາດ ແລະ ເຕັກໂນໂລຊີ ຕ້ອງໄດ້ຮັບການປະຕິບັດຢ່າງຕັ້ງໜ້າ ເປັນເຈົ້າການ ປະດິດສ້າງ, ຮັບປະກັນເອກະລາດ ອະທິປະໄຕ ຄວາມສະຫງົບຂອງຊາດ, ສະເໝີພາບ ແລະ ມີປະໂຫຍດຮ່ວມກັນ. ການເຄື່ອນໄຫວວິທະຍາສາດແລະເຕັກໂນໂລຊີ ຂອງຫວຽດນາມ ຮອດປີ 2020 ແລະ ວິໄສທັດຮອດປີ 2030 ຕິດແທດກັບທັດສະນະເປັນເຈົ້າການຮ່ວມມື ແລະ ເຊື່ອມໂຍງສາກົນຢ່າງກວ້າງຂວາງເລິກເຊິ່ງ ດ້ວນການກຳນົດທິດຍາວນານ ແລະ ແຜນການຮ່ວມມືສາກົນໄລຍະປານກາງ. ມະຕິສະບັບທີ 20-NQ/TW, ລົງວັນທີ 31 ຕຸລາ 2012, ຂອງກອງປະຊຸມສູນກາງພັກຄັ້ງທີ 6 ສະໄໝທີ XI ວ່າດ້ວຍການພັດທະນາວິທະຍາສາດ ແລະ ເຕັກໂນໂລຊີ ຮັບໃຊ້ໃຫ້ແກ່ພາລະກິດຫັນເປັນອຸສາຫະກຳ ທັນສະໄໝ ໃນເງື່ອນໄຂເສດຖະກິດຕະຫຼາດຕາມທິດສັງຄົມນິຍົມ ແລະ ເຊື່ອມໂຍງເຂົ້າກັບສາກົນ ກໍ່ໄດ້ກຳນົດທັດສະນະ: ພັດທະນາ ແລະ ປະຍຸກວິທະຍາສາດແລະເຕັກໂນໂລຊີ ເປັນນະໂຍບາຍແຫ່ງຊາດອັນດັບໜຶ່ງ, ເປັນໜຶ່ງໃນບັນດາກຳລັງໝູນທີ່ສຳຄັນທີ່ສຸດ ເພື່ອພັດທະນາເສດຖະກິດ - ສັງຄົມ ແລະ ປົກປັກຮັກສາປະເທດຊາດ, ເປັນເນື້ອໃນໜຶ່ງທີ່ຕ້ອງໄດ້ບຸລິມະສິດໃຫ້ສຸມໃສ່ລົງທຶນກ່ອນເປັນກ້າວໜຶ່ງ ໃນການເຄື່ອນໄຫວຂອງບັນດາຂະແໜງການ ຂັ້ນຕ່າງໆ. ການນຳພາຂອງພັກ, ຄວາມສາມາດຄຸ້ມຄອງບໍລິຫານຂອງລັດ ແລະ ຄວາມເກັ່ງກ້າສາມາດ ຄວາມຕັ້ງອົກຕັ້ງໃຈຂອງຖັນແຖວພະນັກງານວິທະຍາສາດ ແລະ ເຕັກໂນໂລຊີ ຖືບົດບາດຕັດສິນຄວາມສຳເລັດຂອງພາລະກິດການພັດທະນາວິທະຍາສາດ ແລະ ເຕັກໂນໂລຊີ; ເປັນເຈົ້າການ ຕັ້ງໜ້າເຊື່ອມໂຍງສາກົນ ເພື່ອອັບເດດຄວາມຮູ້ວິທະຍາສາດ ແລະ ເຕັກໂນໂລຊີ ທີ່ກ້າວໜ້າຂອງໂລກ...
ສະພາບການເຊື່ອມໂຍງສາກົນຢ່າງຮອບດ້ານ ດ້ວຍທ່າອຽງໂລກາພິວັດ ແລະ ການພັດທະນາຢ່າງແຂງແຮງຂອງວິທະຍາສາດ ແລະ ເຕັກໂນໂລຊີໃນໂລກ ໄດ້ຍູ້ຫວຽດນາມເຂົ້າໃນໄພອັນຕະລາຍແຫ່ງການຖອຍຫຼັງທາງດ້ານວິທະຍາສາດແລະເຕັກໂນໂລຊີ ເຊິ່ງໃນເມື່ອກຳລັງ ຄວາມສາມາດຄົ້ນຄວ້າວິທະຍາສາດ ແລະ ຂະຫຍາຍເຕັກໂນໂລຊີ ຂອງຫວຽດນາມຍັງອ່ອນນ້ອຍ. ຍ້ອນຮັບຮູ້ບັນຫານີ້ໄດ້, ຫວຽດນາມຈຶ່ງໄດ້ ແລະ ພວມມີຄວາມມານະພະຍາຍາມຫຼາຍພໍຄວນ ເພື່ອເພີ່ມທະວີກຳລັງບົ່ມຊ້ອນ, ຍົກສູງລະດັບ ວິທະຍາສາດ ແລະ ເຕັກໂນໂລຊີ ຢູ່ໃນປະເທດ, ເຊື່ອມໂຍງສາກົນເປັນແຕ່ລະກ້າວທາງດ້ານວິທະຍາສາດ ແລະ ເຕັກໂນໂລຊີ, ປະກອບສ່ວນປະຕິບັດບັນດາໂຄງການພັດທະນາເສດຖະກິດ - ສັງຄົມ ແລະ ແກ້ໄຂຄວາມຮຽກຮ້ອງຕ້ອງການອັນຮີບດ່ວນ ຂອງການຜະລິດ ແລະ ຊີວິດການເປັນຢູ່. ປັດຈຸບັນ, ຄຽງຂ້າງກັບການປ່ຽນແປງໃໝ່ການຄຸ້ມຄອງບໍລິຫານ ຈັດຕັ້ງ ແລະ ເຄື່ອນໄຫວວິທະຍາສາດ-ເຕັກໂນໂລຊີ ຢ່າງຮອບດ້ານ ແລະ ຄົບຊຸດນັ້ນ, ກະຊວງວິທະຍາສາດ ແລະ ເຕັກໂນໂລຊີ ພວມເຕົ້າໂຮມບັນດາແຫຼ່ງພະລັງ ເພື່ອຜັນຂະຫຍາຍແຜນຍຸດທະສາດພັດທະນາວິທະຍາສາດ ແລະ ເຕັກໂນໂລຊີ ໄລຍະ 2011 - 2020, ແຜນການວິທະຍາສາດ ແລະ ເຕັກໂນໂລຊີ ໄລຍະ 5 ປີ (2011 - 2015) ແລະ ບັນດາໂຄງການ ໂຄງການຈຸດສຸມແຫ່ງຊາດ ກ່ຽວກັບວິທະຍາສາດ ແລະ ເຕັກໂນໂລຊີ ໃນບັນດາຂົງເຂດບຸລິມະສິດ ຮອດປີ 2020, ໃນນັ້ນ ມີໂຄງການປ່ຽນແປງໃໝ່ເຕັກໂນໂລຊີແຫ່ງຊາດ, ໂຄງການພັດທະນາເຕັກໂນໂລຊີສູງ, ໂຄງການພັດທະນານະວັດຕະກຳແຫ່ງຊາດ; ໂຄງການພັດທະນາຕະຫຼາດວິທະຍາສາດ-ເຕັກໂນໂລຊີ,... ນີ້ແມ່ນບັນດາໂຄງການທີ່ສຳຄັນເປັນພິເສດ, ມີຄວາມສາມາດກະທົບຢ່າງແຂງແຮງເຖິງຄວາມສາມາດບົ່ມຊ້ອນ ແລະ ລະດັບວິທະຍາສາດ-ເຕັກໂນໂລຊີ ຢູ່ໃນປະເທດ, ເພີ່ມທະວີການເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ ຍິ່ງກວ່າອີກ; ຈາກນັ້ນປະກອບສ່ວນອັນສຳຄັນ ເຂົ້າໃນການຍົກສູງຄຸນນະພາບ ແລະ ຄວາມໄວໃນການເຕີບໂຕຂອງລະບົບເສດຖະກິດ, ຊຸກຍູ້ການພັດທະນາຢ່າງໄວວາ ແລະ ຍືນຍົງຂອງປະເທດຊາດ.
ປັດຈຸບັນນີ້, ຫວຽດນາມໄດ້ມີການພົວພັນຮ່ວມມືດ້ານວິທະຍາສາດ ແລະ ເຕັກໂນໂລຊີ ກັບເກືອບ 70 ປະເທດ ອານາເຂດ ແລະ ອົງການຈັດຕັ້ງສາກົນ. ສັນຍາວ່າດ້ວຍການຮ່ວມມືດ້ານວິທະຍາສາດ ແລະ ເຕັກໂນໂລຊີ ຂັ້ນລັດຖະບານ ແລະ ຂັ້ນກະຊວງ ທີ່ໄດ້ຮັບການລົງນາມ ແລະ ພວມໄດ້ຮັບການປະຕິບັດນັ້ນ ມີກວ່າ 80 ສະບັບ. ຫວຽດນາມພວມເປັນສະມາຊິກຂອງເກືອບ 100 ອົງການຈັດຕັ້ງສາກົນ ແລະ ພາກພື້ນ ກ່ຽວກັບວິທະຍາສາດ ແລະ ເຕັກໂນໂລຊີ. ແຕ່ປີ 2000 ມາເຖິງປີນີ້, ມີຂໍ້ຕົກລົງ ສັນຍາຮ່ວມມືສາກົນ ຫຼາຍກວ່າ 540 ສະບັບ ທີ່ໄດ້ຮັບການປະຕິບັດຢູ່ບັນດາພື້ນຖານຄົ້ນຄວ້າຜັນຂະຫຍາຍຂັ້ນຕ່າງໆ; ໜ້າທີ່ຄົ້ນຄວ້າວິທະຍາສາດສອງຝ່າຍ ລະຫວ່າງອົງການຈັດຕັ້ງວິທະຍາສາດແລະເຕັກໂນໂລຊີຫວຽດນາມ ກັບອົງການຈັດຕັ້ງວິທະຍາສາດແລະເຕັກໂນໂລຊີຂອງບັນດາປະເທດໃນໂລກ ທີ່ໄດ້ ແລະ ພວມໄດ້ຮັບການປະຕິບັດນັ້ນ ມີຫຼາຍກວ່າ 400 ຫົວຂໍ້. ກະຊວງວິທະຍາສາດ ແລະ ເຕັກໂນໂລຊີ ພວມຕັ້ງໜ້າຜັນຂະຫຍາຍປະຕິບັດໂຄງການ “ເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ ຮອດປີ 2020” ເຊິ່ງໄດ້ຮັບການອະນຸມັດຜ່ານໂດຍມະຕິຕົກລົງສະບັບທີ 735/QĐ-TTg, ລົງວັນທີ 18 ພຶດສະພາ 2011, ຂອງນາຍົກລັດຖະມົນຕີ; ໄດ້ສ້າງ ແລະ ປະກາດໃຊ້ເອກະສານນິຕິກຳທີ່ກ່ຽວຂ້ອງຈຳນວນໜຶ່ງ ຄືໂຄງການຮ່ວມມືຄົ້ນຄວ້າສອງຝ່າຍ ແລະ ຫຼາຍຝ່າຍ ກ່ຽວກັບວິທະຍາສາດ ແລະ ເຕັກໂນໂລຊີ ຮອດປີ 2020, ໂຄງການຊອກຫາ ແລະ ມອບຮັບເຕັກໂນໂລຊີຂອງຕ່າງປະເທດ ເຂົ້າຫວຽດນາມ ຮອດປີ 2020,... ການເຄື່ອນໄຫວເຊື່ອມໂຍງສາກົນກ່ຽວກັບວິທະຍາສາດ ແລະ ເຕັກໂນໂລຊີ ເວົ້າລວມໄດ້ບັນລຸຜົນສຳເລັດອັນສຳຄັນ, ສັນຍາ ແລະ ຂໍ້ຕົກລົງຮ່ວມມືລະຫວ່າງລັດຖະບານທີ່ສຳຄັນຫຼາຍສະບັບ ໄດ້ສຳເລັດການເຈລະຈາ ແລະ ລົງນາມ ເຊັ່ນສັນຍາຮ່ວມມືລະຫວ່າງລັດຖະບານຫວຽດນາມ ແລະ ລັດຖະບານສະຫະລັດອາເມຣິກາ ວ່າດ້ວຍການນຳໃຊ້ພະລັງງານນິວເກຼຍໂດຍສັນຕິ (ສັນຍາ 123), ອັນໄດ້ຂີດໝາຍບາດກ້າວທີ່ສຳຄັນກ່ຽວກັບຄວາມເຊື່ອຖືໃນການພົວພັນລະຫວ່າງຫວຽດນາມ ແລະ ສະຫະລັດອາເມຣິກາ ກ່ຽວກັບການນຳໃຊ້ພະລັງງານນິວເກຼຍເພື່ອຈຸດປະສົງສັນຕິພາບ, ເຊິ່ງໄດ້ສ້າງແງ່ຫວັງອັນໃຫຍ່ຫຼວງໃຫ້ທັງສອງຝ່າຍ ໃນການຊຸກຍູ້ບັນດາໂຄງການຮ່ວມມືຕົວຈິງ ກ່ຽວກັບການປະຍຸກກຳມັນຕະລັງສີ ກໍ່ຄືການພັດທະນາໄຟຟ້ານິວເກຼຍ ເພື່ອພັດທະນາເສດຖະກິດ - ສັງຄົມ ຂອງແຕ່ລະປະເທດ. ນອກຈາກນັ້ນ ຍັງມີບັນດາສັນຍາ ແລະ ຂໍ້ຕົກລົງຮ່ວມມືອື່ນ ທີ່ສອງຝ່າຍກ່ຽວຂ້ອງໄດ້ລົງນາມແລ້ວເຊັ່ນ ສັນຍາຮ່ວມມືລະຫວ່າງລັດຖະບານ ສສ.ຫວຽດນາມ ກັບລັດຖະບານສະຫະພາບລັດເຊຍ ວ່າດ້ວຍຄູ່ຮ່ວມມືຍຸດທະສາດໃນຂົງເຂດສຶດສາ ວິທະຍາສາດ ແລະ ເຕັກໂນໂລຊີ; ຂໍ້ຕົກລົງກ່ຽວກັບການຮ່ວມມືດ້ານເຕັກໂນໂລຊີ ຄົ້ນຄວ້າວິທະຍາສາດ ແລະ ການສຶກສາ ລະຫວ່າງກະຊວງວິທະຍາສາດແລະເຕັກໂນໂລຊີຫວຽດນາມ ກັບກະຊວງວິທະຍາສາດ ຄົ້ນຄວ້າ ແລະ ເຕັກໂນໂລຊີ ອີຣານ; ບົດບັນທຶກຄວາມຕົກລົງ ລະຫວ່າງກະຊວງວິທະຍາສາດແລະເຕັກໂນໂລຊີຫວຽດນາມ ກັບອົງການຮ່ວມມືສາກົນແຫ່ງ ສ.ເກົາຫຼີ (KOICA) ວ່າດ້ວຍໂຄງການສ້າງຕັ້ງສະຖາບັນວິທະຍາສາດ ແລະ ເຕັກໂນໂລຊີ ຫວຽດນາມ - ສ.ເກົາຫຼີ (V-KIST); ສັນຍາວ່າດ້ວຍໂຄງການຊ່ວຍເຫຼືອກໍ່ສ້າງນະໂຍບາຍປ່ຽນແປງໃໝ່ ແລະ ພັດທະນາພື້ນຖານບຳລຸງສ້າງວິສາກະກິດ (BIPP) ກັບລາຊະອານາຈັກແບນຊິກ ແລະ ເອກະສານຮ່ວມມືອື່ນອີກຈຳນວນໜຶ່ງ.
ການເຄື່ອນໄຫວຮ່ວມມືສາກົນກ່ຽວກັບວິທະຍາສາດ ແລະ ເຕັກໂນໂລຊີ ໃນຂອບຫຼາຍຝ່າຍ ແລະ ສອງຝ່າຍໃນເວລາທີ່ຜ່ານມາ ໄດ້ດຳເນີນໄປຢ່າງເປັນປະຈຳ ແລະ ມີບາດກ້າວຂະຫຍາຍຕົວພໍສົມຄວນ, ຊ່ວຍສະແດງໃຫ້ເຫັນເຖິງຖານະທີ່ຕັ້ງ ແລະ ບົດບາດດ້ານວິທະຍາສາດ ແລະ ເຕັກໂນໂລຊີ ຂອງຫວຽດນາມໃນປະຊາຄົມໂລກ. ກະຊວງວິທະຍາສາດ ແລະ ເຕັກໂນໂລຊີ ໄດ້ຕັ້ງໜ້າ ເປັນເຈົ້າການເຂົ້າຮ່ວມ, ເຈລະຈາ, ເຊັນບົດບັນທຶກການປະຊຸມ ຄະນະກຳມະການລະຫວ່າງລັດຖະບານ ໃນຂອບການຮ່ວມມືສອງຝ່າຍ ແລະ ຫຼາຍຝ່າຍ; ເຂົ້າຮ່ວມບັນດາເວທີປາໄສສາກົນ, ຍູ້ແຮງການເຂົ້າຮ່ວມຂອງຫວຽດນາມໃນບັນດາອົງການຈັດຕັ້ງສາກົນ ແລະ ພາກພື້ນ, ເຊັ່ນ ອົງການພະລັງງານປະລະມານູສາກົນ (IAEA), ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ASEAN), ເວທີປາໄສການຮ່ວມມືເສດຖະກິດອາຊີ - ປາຊີຟິກ (APEC), ຄະນະກຳມະການນຳໃຊ້ຍ່ານເວຫາເພື່ອສັນຕິພາບແຫ່ງສະຫະປະຊາຊາດ (COPUOS)...; ຈັດຕັ້ງການຕ້ອນຮັບ ແລະ ເຮັດວຽກກັບຄະນະຜູ້ແທນ 20 ກວ່າຄະນະທີ່ເຂົ້າຫວຽດນາມຜັນຂະຫຍາຍສັນຍາ ຂໍ້ຕົກລົງຕ່າງໆທີ່ໄດ້ລົງນາມແລ້ວ; ແລກປ່ຽນ, ສົນທະນາ, ເປີດກວ້າງເນື້ອໃນ ແລະ ການເຄື່ອນໄຫວຮ່ວມມືດ້ານວິທະຍາສາດ ແລະ ເຕັກໂນໂລຊີ; ຍື່ນສະເໜີຕໍ່ນາຍົກລັດຖະມົນຕີ ເພື່ອປະກາດໃຊ້ມະຕິຕົກລົງສອງສະບັບ ໃນຂອບໂຄງການເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ, ນັ້ນແມ່ນ ມະຕິຕົກລົງອະນຸມັດໂຄງການຮ່ວມມືຄົ້ນຄວ້າສອງຝ່າຍ ແລະ ຫຼາຍຝ່າຍ ກ່ຽວກັບວິທະຍາສາດ ແລະ ເຕັກໂນໂລຊີ ຮອດປີ 2020, ແລະ ອະນຸມັດໂຄງການຊອກຫາ ແລະ ມອບຮັບເຕັກໂນໂລຊີຂອງຕ່າງປະເທດ ເຂົ້າຫວຽດນາມຮອດປີ 2020(1).
ການເຄື່ອນໄຫວຮ່ວມມືທາງດ້ານກຳມະສິດພູມປັນຍາ ກໍ່ໄດ້ຮັບການຜັນຂະຫຍາຍໃນຂອບອົງການການຄ້າໂລກ, ເອເປັກ, ອາຊຽນ, ຮ່ວມມືສອງຝ່າຍກັບອົງການຊັບສິນທາງປັນຍາແຫ່ງໂລກ (WIPO), ຮ່ວມມືສອງຝ່າຍກັບຍີ່ປຸ່ນ, ສ.ເກົາຫຼີ, ຝຣັ່ງ; ການຮ່ວມມືກັບບັນດາອົງການຊັບສິນທາງປັນຍາໃນພາກພື້ນ ແລະ ຂອງປະເທດອື່ນ ກໍ່ໄດ້ຮັບການດຳເນີນເປັນປົກກະຕິ ແລະ ມີບາດກ້າວຂະຫຍາຍຕົວ, ເປັນຕົ້ນແມ່ນ ກັບສຳນັກງານສິດທິບັດເອີຣົບ (EPO), ສະຫະລັດອາເມຣິກາ, ອົດສະຕຣາລີ, ລັດເຊຍ, ສິງຄະໂປ, ລາວ,... ຫວຽດນາມພວມຕັ້ງໜ້າເຂົ້າຮ່ວມ ແລະ ປະຕິບັດບັນດາສັນຍາລະດັບພາກພື້ນ ແລະ ລະດັບໂລກ ເພື່ອແນໃສ່ຕອບສະໜອງວິວັດທະນາການເຊື່ອມໂຍງສາກົນ; ສືບຕໍ່ຜັນຂະຫຍາຍຢ່າງມີປະສິດທິຜົນ ໂຄງການສົ່ງເສີມການພັດທະນາຊັບສິນທາງປັນຍາ ກໍ່ຄືຍູ້ແຮງການຮ່ວມມືສາກົນ ແນໃສ່ຍາດແຍ່ງເອົາການຊ່ວຍເຫຼືອຂອງປະຊາຄົມໂລກ ເພື່ອຮັບໃຊ້ໃຫ້ແກ່ການພັດທະນາຂອງລະບົບກຳມະສິດພູມປັນຍາຫວຽດນາມ; ຜັນຂະຫຍາຍຂໍ້ຕົກລົງ ໂຄງການ ແຜນງານການຮ່ວມມືທາງດ້ານກຳມະສິດພູມປັນຍາກັບບັນດາຄູ່ຮ່ວມສາກົນຢ່າງມີປະສິດທິຜົນ.
ການຮ່ວມມືສາກົນທາງດ້ານ ມາດຕະຖານ ວັດຜອງ ຄຸນນະພາບ ກໍ່ສືບຕໍ່ໄດ້ຮັບຄວາມເອົາໃຈໃສ່ຂອງກະຊວງວິທະຍາສາດ ແລະ ເຕັກໂນໂລຊີ; ກະຊວງໄດ້ປະຕິບັດຢ່າງຄົບຖ້ວນພັນທະສ້າງຕັ້ງ, ໜ່ວງໜ່ຽວຮັກສາ ແລະ ຍູ້ແຮງການເຂົ້າຮ່ວມຂອງຫວຽດນາມໃນ 14 ອົງການຈັດຕັ້ງສາກົນ ແລະ ພາກພື້ນ ກ່ຽວກັບຂົງເຂດມາດຕະຖານ ວັດຜອງ ແລະ ຄຸນນະພາບ, ໂດຍບຸລິມະສິດໃຫ້ບັນດາອົງການຈັດຕັ້ງສາກົນ ແລະ ພາກພື້ນ; ສືບຕໍ່ຄົ້ນຄວ້າເປີດກວ້າງຄວາມສາມາດສອດຄ່ອງກັບບັນດາມາດຕະຖານສາກົນໃໝ່ ໃນການເຄື່ອນໄຫວປະເມີນຄວາມສອດຄ່ອງ; ສົມທົບກັບບັນດາກະຊວງ ຂະແໜງການ ໃນການເຂົ້າຮ່ວມຢ່າງຕັ້ງໜ້າ ແລະ ມີປະສິດທິຜົນ ໃນບັນດາສັນຍາວ່າດ້ວຍການຮັບຮູ້ເຊິ່ງກັນ ແລະ ກັນໃນກຸ່ມ ອາຊຽນ, ເອເປັກ...; ຈັດຕັ້ງປະຕິບັດບັນດາໂຄງການ ແຜນງານຮ່ວມມືສາກົນກ່ຽວກັບມາດຕະຖານ ວັດຜອງ ແລະ ຄຸນນະພາບ; ຂຸດຄົ້ນການຊ່ວຍເຫຼືອຂອງບັນດາອົງການສາກົນ ພາກພື້ນ ແລະ ຄູ່ຮ່ວມຕ່າງປະເທດຢ່າງມີປະສິດທິຜົນ ແນໃສ່ຍົກສູງຄວາມຮັບຮູ້ຂອງບັນດາຝ່າຍທີ່ກ່ຽວຂ້ອງ, ບຳລຸງກໍ່ສ້າງ ຍົກສູງຄວາມສາມາດຂອງຖັນແຖວພະນັກງານຂະແໜງການມາດຕະຖານ ວັດຜອງ ແລະ ຄຸນນະພາບ. ຫວຽດນາມກໍ່ໄດ້ເພີ່ມທະວີການເຄື່ອນໄຫວຮ່ວມມືສອງຝ່າຍ, ເອົາໃຈໃສ່ເປັນສຳຄັນເຖິງບັນດາຄູ່ຮ່ວມທີ່ມີຄວາມສາມາດບົ່ມຊ້ອນ, ເຊັ່ນຍີ່ປຸ່ນ ສ.ເກົາຫຼີ ອາເມຣິກາ, ພ້ອມກັນນັ້ນກໍ່ສືບຕໍ່ຮ່ວມມືກັບບັນດາຄູ່ຮ່ວມໃນບັນດາປະເທດອາຊຽນ, ລັດເຊຍ, ເບລາຣຸດຊີ, ສາທາລະນະລັດແຊັກ,... ເຂົ້າຮ່ວມຢ່າງຕັ້ງໜ້າໃນການເຈລະຈາຫຼາຍຝ່າຍ ແລະ ສອງຝ່າຍ; ກຽມຄວາມພ້ອມເພື່ອປະຕິບັດໜ້າທີ່ໃຫ້ໄດ້ເປັນຢ່າງດີ ເມື່ອສັນຍາຄູ່ຮ່ວມເສດຖະກິດຍຸດທະສາດຂ້າມປາຊີຟິກ (TPP), ສັນຍາຫວຽດນາມ - ສະຫະພັນພາສີສຸລະກາກອນ,... ໄດ້ຮັບການລົງນາມ. ບັນດາໜ້າທີ່ໃນໂຄງການແຫ່ງຊາດ ຕາມມະຕິຕົກລົງສະບັບທີ 712/QĐ-TTg ຂອງນາຍົກລັດຖະມົນຕີ; ໂຄງການຮົ້ວເຕັກນິກໃນການຄ້າລະຫວ່າງປະເທດໄລຍະ 2011 - 2015 ສືບຕໍ່ໄດ້ຮັບການຜັນຂະຫຍາຍ.
ຄຽງຂ້າງນັ້ນ, ບາງໂຄງການຮ່ວມມືກັບຄູ່ຮ່ວມຕ່າງປະເທດ ກໍ່ໄດ້ຜັນຂະຫຍານຢ່າງແຂງແຮງ, ປະກອບສ່ວນປ່ຽນແປງໃໝ່ການປະດິດສ້າງ, ມອບໂອນເຕັກໂນໂລຊີ. ໂດຍຜ່ານໂຄງການຮ່ວມມືກັບບໍລິສັດ ເອບີໄອ (ຍີ່ປຸ່ນ), ລຳດັບດຳເນີນການຮັກສາໝາກລິ່ນຈີ່ດ້ວຍເຕັກໂນໂລຊີ CAS ໄດ້ຮັບການປັບປຸງໃຫ້ສົມບູນ ແລະ ໄດ້ສົ່ງຜະລິດຕະພັນໄປແນະນຳຄັ້ງທຳອິດ ທີ່ງານວາງສະແດງຜະລິດຕະພັນກະສິກຳ ການດາ ຢູ່ນະຄອນໂຕກີໂອ. ຜ່ານການຮ່ວມມືກັບບໍລິສັດ ຈູຣານ (ອິດສະຣາແອນ), ລະບົບເຄື່ອງແກ້ໄຂອະນາໄມໝາກລິ່ນຈີ່ ໂດຍບໍ່ຮົມອາຍ SO2 (ກຳມະຖັນໄດອອກໄຊ) ພວມໄດ້ແນະນຳ ແລະ ຜັນຂະຫຍາຍທົດລອງຢູ່ແຂວງ ບັກຢາງ. ສັນຍາວ່າດ້ວຍການຊ່ວຍເຫຼືອໂຄງການປ່ຽນແປງໃໝ່ການປະດິດສ້າງ (IPP) ໄລຍະ 2 ໄດ້ສຳເລັດການລົງນາມ, ແນໃສ່ຊ່ວຍເຫຼືອປັບປຸງບູລະນະລະບົບເອກະສານນິຕິກຳ ເພື່ອໃຫ້ກົດໝາຍ ແລະ ແຜນຍຸດທະສາດວິທະຍາສາດ ແລະ ເຕັກໂນໂລຊີຂອງຫວຽດນາມ ເຂົ້າສູ່ຊີວິດຕົວຈິງ; ເພີ່ມທະວີການບຳລຸງກໍ່ສ້າງກ່ຽວກັບການປ່ຽນແປງໃໝ່ການປະດິດສ້າງ ແລະ ຖັນແຖວຜູ້ຊ່ຽວຊານທີ່ປຶກສາກ່ຽວກັບການປ່ຽນແປງໃໝ່ເຕັກໂນໂລຊີ ໃຫ້ແກ່ວິສາຫະກິດ.
ປັດຈຸບັນ, ກະຊວງວິທະຍາສາດ ແລະ ເຕັກໂນໂລຊີ ພວມຕັ້ງໜ້າສືບຕໍ່ຜັນຂະຫຍາຍແຜນງານ “ຍູ້ແຮງການປ່ຽນແປງໃໝ່ການປະດິດສ້າງໂດຍຜ່ານການຄົ້ນຄວ້າ ວິທະຍາສາດ ແລະ ເຕັກໂນໂລຊີ” (FIRST) ດ້ວຍທຶນຊ່ວຍເຫຼືອຂອງທະນາຄານໂລກ (WB) ແລະ ໂຄງການຄູ່ຮ່ວມການປ່ຽນແປງໃໝ່ການປະດິດສ້າງຫວຽດນາມ - ແຟງລັງ (IPP) ໄລຍະ 2 (2014 - 2018); ຜັນຂະຫຍາຍໂຄງການ “ກໍ່ສ້າງສູນບຳລຸງອົບຮົມພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີໃຫ້ລາວ”; ຈັດຕັ້ງຜັນຂະຫຍາຍໂຄງການ “ຊ່ວຍເຫຼືອກໍ່ສ້າງນະໂຍບາຍປ່ຽນແປງໃໝ່ ແລະ ພັດທະນາພື້ນຖານບຳລຸງສ້າງວິສາກະກິດ (BIPP) ທີ່ຮ່ວມມືກັບລາຊະອານາຈັກແບນຊິກ, ພ້ອມກັນນັ້ນ ກໍ່ສືບຕໍ່ປະຕິບັດໂຄງການ ເພີ່ມທະວີຕາໜ່າງຜູ້ຕາງໜ້າວິທະຍາສາດ ແລະ ເຕັກໂນໂລຊີ ຢູ່ຕ່າງປະເທດ. ການເຄື່ອນໄຫວຮ່ວມມືຄົ້ນຄວ້າວິເຄາະລວມສອງຝ່າຍຕາມອະນຸສັນຍາ ກໍ່ສືບຕໍ່ໄດ້ຮັບການຜັນຂະຫຍາຍຢ່າງແຂງແຮງ ແນໃສ່ດຶງດູດເອົາບັນດາແຫຼ່ງພະລັງ ແລະ ບົດຮຽນຈາກຄູ່ຮ່ວມຕ່າງປະເທດ ເພື່ອພັດທະນາວິທະຍາສາດ ແລະ ເຕັກໂນໂລຊີຂອງຊາດ. ສືບຕໍ່ປັບປຸງຕາໜ່າງຜູ້ຕາງໜ້າວິທະຍາສາດ ແລະ ເຕັກໂນໂລຊີຢູ່ສະຖານທີ່ ປະເທດທີ່ເປັນຈຸດໜັກ ເພື່ອເປັນຫົວເງື່ອນເຊື່ອມຕໍ່ສື່ສານ, ຜັນຂະຫຍາຍບັນດາໜ້າທີ່ວິທະຍາສາດ ແລະ ເຕັກໂນໂລຊີ.
ການຮ່ວມມືສາກົນທາງດ້ານຮັບປະກັນຄວາມປອດໄພກຳມັນຕະລັງສີ, ຄວາມປອດໄພນິວເກຼຍ ແລະ ການປະຍຸກພະລັງງານປະລະມານູເພື່ອຈຸດປະສົງສັນຕິພາບ ໄດ້ດຳເນີນເປັນປົກກະຕິ ແລະ ມີບາດກ້າວພັດທະນາ. ການເຄື່ອນໄຫວຮ່ວມມືສາກົນໃນການປະຍຸກພະລັງງານປະລະມານູ, ຮັບປະກັນຄວາມປອດໄພດ້ານກຳມັນຕະລັງສີນິວເກຼຍ ທີ່ຮັບໃຊ້ໃຫ້ແກ່ການພັດທະນາເສດຖະກິດ - ສັງຄົມ ແລະ ສ້າງສາພັດທະນາປະເທດແບບຍືນຍົງນັ້ນ ໄດ້ຮັບການຊຸກຍູ້. ຫວຽດນາມໄດ້ດຶງດູດ ແລະ ພວມຍາດແຍ່ງເອົາການຊ່ວຍເຫຼືອຂອງບັນດາຄູ່ຮ່ວມຕ່າງປະເທດ ຂອງອົງການຈັດຕັ້ງສາກົນ ແລະ ພາກພື້ນ ເພື່ອແນໃສ່ປັບປຸງບູລະນະລະບົບເອກະສານນິຕິກຳ ທີ່ພົວພັນເຖິງຄວາມສະຫງົບ ຄວາມປອດໄພດ້ານນິວເກຼຍ, ພັດທະນາໂຄງສ້າງພື້ນຖານໄຟຟ້ານິວເກຼຍ, ບຳລຸງກໍ່ສ້າງກຳລັງຄົນເຮັດວຽກໃນຂົງເຂດພະລັງງານປະລະມານູ; ຜັນຂະຫຍາຍການເຄື່ອນໄຫວຮ່ວມມືສາກົນຕ່າງໆ ແນໃສ່ຍູ້ແຮງບັນດາທິດທາງໝູນໃຊ້ກຳມັນຕະລັງສີ ແລະ ໄອໂຊໂທບແຜ່ລັງສີ ໃນບັນດາຂະແໜງການ ເຊັ່ນສາທາລະນະສຸກ ກະສິກຳ ອຸດສາຫະກຳ ຊັບພະຍາກອນ ແລະ ສິ່ງແວດລ້ອມ ທີ່ເປັນທ່າແຮງຂອງຫວຽດນາມ, ແລະ ສ້າງເງື່ອນໄຂຍົກສູງຄວາມສາມາດແຂ່ງຂັນໃຫ້ພະລິດຕະພັນ ແລະ ສິນຄ້າໃນປະເທດ.
ວຽກງານຮ່ວມມືສອງຝ່າຍ ແລະ ຫຼາຍຝ່າຍ ກັບບັນດາອົງການສື່ສານ, ຫໍສະໝຸດ, ສະຖິຕິວິທະຍາສາດ ແລະ ເຕັກໂນໂລຊີ ຂອງບັນດາປະເທດ ແລະ ສາກົນ ສືບຕໍ່ໄດ້ຮັບການເພີ່ມທະວີ ແລະ ເປີດກວ້າງໃນເວລາທີ່ຜ່ານມາ. ບັນດາການເຄື່ອນໄຫວແລກປ່ຽນດ້ານວິຊາສະເພາະ ວິຊາຊີບສະເພາະຂະແໜງການສື່ສານ ຫໍສະໝຸດ ສະຖິຕິ; ການຊອກຫາຄູ່ຮ່ວມໃໝ່ ແລະ ດຳເນີນແຜນງານຮ່ວມມືຄົ້ນຄວ້າວິເຄາະລວມກັນ, ການເຄື່ອນໄຫວຂອງຕາໜ່າງຄົ້ນຄວ້າວິເຄາະ ແລະ ບຳລຸງກໍ່ສ້າງຫວຽດນາມ (VinaREN) ໃນຂອບ TEIN4/APAN ແລະ ການເຄື່ອນໄຫວປະຍຸກເຕັກໂນໂລຊີເຄືອຂ່າຍທັນສະໄໝ ທີ່ຮັບໃຊ້ການຄົ້ນຄວ້າວິທະຍາສາດ ແລະ ບຳລຸງກໍ່ສ້າງພະນັກງານ ໄດ້ຮັບການຍູ້ແຮງ.
ທິດທາງໃນເວລາສະເພາໜ້າ
ວິວັດການເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ ຂອງຫວຽດນາມໃນເວລາທີ່ຜ່ານມາ ໄດ້ເລີ່ມຕົ້ນຕິດຈອດກັບຄວາມຮຽກຮ້ອງຕ້ອງການຕົວຈິງ ຂອງບັນດາຂະແໜງການ ທ້ອງຖິ່ນ ແລະ ຮັບໃຊ້ຢ່າງມີປະສິດທິຜົນເບື້ອງຕົ້ນ ໃຫ້ແກ່ບັນດາໜ້າທີ່ພັດທະນາເສດຖະກິດ - ສັງຄົມ ຂອງປະເທດຊາດ. ເນື້ອໃນ ແລະ ຮູບການຮ່ວມມືສາກົນທາງດ້ານວິທະຍາສາດ ແລະ ເຕັກໂນໂລຊີ ນັບມື້ນັບອຸດົມສົມບູ ແລະ ຫຼາຍຮູບຫຼາຍແບບ (ປະກອບດ້ວຍ ຮ່ວມມືຄົ້ນຄວ້າວິເຄາະລວມກັນ, ມອບໂອນເຕັກໂນໂລຊີ, ແລກປ່ຽນຜູ້ຊ່ຽວຊານ, ຈັດຕັ້ງກອງປະຊຸມ ສຳມະນາ, ສະແດງເຕັກໂນໂລຊີ, ງານວາງສະແດງນະວັດຕະກຳ ເຕັກໂນໂລຊີ,…). ບັນດາຂົງເຂດເຊື່ອມໂຍງໄດ້ຮັບການເປີດກວ້າງອອກ, ແຕ່ການຄົ້ນຄວ້າພື້ນຖານ ຈົນເຖິງຄົ້ນຄວ້າປະຍຸກ, ມອບໂອນເຕັກໂນໂລຊີ, ວິທະຍາສາດສັງຄົມ - ມະນຸດອະລິຍະທຳ, ວິທະຍາສາດທຳມະຊາດ, ຄົ້ນຄວ້າສະຫະຂະແໜງ. ການເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີໃນເວລາທີ່ຜ່ານມາ ໄດ້ປະກອບສ່ວນເພີ່ມທະວີພື້ນຖານວັດຖຸເຕັກນິກ ໃຫ້ບັນດາອົງການຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ, ຍົກສູງລະດັບຂອງພະນັກງານ, ຊຸກຍູ້ການປ່ຽນແປງໃໝ່ເຕັກໂນໂລຊີໃນປະເທດ. ແຕ່ວ່າ, ໃນພາກຕົວຈິງ, ແຫຼ່ງກຳລັງຄົນເຮັດວຽກງານວິທະຍາສາດ ແລະ ເຕັກໂນໂລຊີ ຢູ່ຫວຽດນາມປັດຈຸບັນ ຍັງບໍ່ທັນມີຄວາມສາມາດພຽງພໍ ເພື່ອເຂົ້າຮ່ວມຢ່າງມີປະສິດທິຜົນ ໃນການເຄື່ອນໄຫວວິທະຍາສາດ ແລະ ເຕັກໂນໂລຊີສາກົນ ແລະ ພາກພື້ນ; ຄວາມຈຸວິທະຍາສາດ ແລະ ເຕັກໂນໂລຊີ ທີ່ປະກອບໃຫ້ການເຄື່ອນໄຫວວິທະຍາສາດ ແລະ ເຕັກໂນໂລຊີສາກົນ ແລະ ພາກພື້ນ ກໍ່ຍັງຕ່ຳ. ບັນດາອົງການຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ, ມະຫາວິທະຍາໄລຕ່າງໆ ຍັງບໍ່ທັນມີຄວາມສາມາດ ແລະ ເງື່ອນໄຂພຽງພໍ ເພື່ອຊຸກຍູ້ເປີດກວ້າງການເຄື່ອນໄຫວເຊື່ອມໂຍງສາກັນ ຍ້ອນພື້ນຖານວັດຖຸເຕັກນິກບໍ່ຄົບຊຸດ, ສິ່ງແວດລ້ອມແຫ່ງການເຮັດວຽກຍັງບໍ່ທັນເປັນແບບອາຊີບ, ພະນັກງານຄົ້ນຄວ້ານຳໜ້າ ແລະ ພະນັກງານເຕັກນິກທີ່ມີລະດັບ ກໍ່ຍັງຂາດຫຼາຍ,... ການເຄື່ອນໄຫວຮ່ວມມືສາກົນທາງດ້ານວິທະຍາສາດ ແລະ ເຕັກໂນໂລຊີ ໃນເວລາທີ່ຜ່ານມາ ສ່ວນຫຼາຍພຽງແຕ່ໄດ້ປະຕິບັດໃນຂອບຂອງບັນດາສັນຍາ/ຂໍ້ຕົກລົງສອງຝ່າຍ ຫຼືຫຼາຍຝ່າຍ. ການເຄື່ອນໄຫວມອບໂອນເຕັກໂນໂລຊີຢູ່ວິສາຫະກິດຕ່າງໆ ຕົ້ນຕໍ່ແມ່ນຢຸດຢູ່ໃນລະດັບຮັບເອົາເຕັກໂນໂລຊີໂດຍຜ່ານໂຄງການລົງທຶນໂດຍກົງ ຫຼືໂຄງການຊ່ວຍເຫຼືອຂອງຕ່າງປະເທດ, ຍັງບໍ່ທັນມີການລົງທຶນຄົ້ນຄວ້າ, ເປັນເຈົ້າ ແລະ ປ່ຽນແປງໃໝ່ເຕັກໂນໂລຊີ. ວິສາຫະກິດຕ່າງໆ ກໍ່ເຄີຍຖືກຂາດເຂີນຂໍ້ມູນຂ່າວສານວິທະຍາສາດ ແລະ ເຕັກໂນໂລຊີ ຈາກໃນ ແລະ ຕ່າງປະເທດ. ການເຊື່ອມຈອດລະຫວ່າງການຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ ກັບການເຄື່ອນໄຫວບຳລຸງກໍ່ສ້າງກຳລັງຄົນສຳລັບວິທະຍາສາດ-ເຕັກໂນໂລຊີ ກໍ່ຄືຄວາມຕ້ອງການເຊື່ອມໂຍງສາກົນຂອງວິສາຫະກິດຫວຽດນາມ ກໍ່ຍັງຖືກຈຳກັດ.
ໃນເວລາຕໍ່ໜ້າ, ເພື່ອສືບຕໍ່ຍູ້ແຮງການເຄື່ອນໄຫວເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ ແນໃສ່ຍົກສູງຄວາມສາມາດຮັບເອົາ ແລະ ເປັນເຈົ້າເຕັກໂນໂລຊີທັນສະໄໝ, ປະດິດສ້າງນະວັດຕະກຳ ການບໍລິການ ເຕັກໂນໂລຊີໃໝ່, ປະກອບສ່ວນເຂົ້າໃນການພັດທະນາກຳລັງແຮງວິທະຍາສາດ ແລະ ເຕັກໂນໂລຊີ, ຍົກສູງສະມັດຕະພາບ ຄຸນນະພາບຂອງຜະລິດຕະພັນ ການບໍລິການ ດ້ວຍຄຸນຄ່າເພີ່ມສູງ, ກະຊວງວິທະຍາສາດ ແລະ ເຕັກໂນໂລຊີ ສືບຕໍ່ຕັ້ງໜ້າຜັນຂະຫຍາຍປະຕິບັດໂຄງການ “ເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ ຮອດປີ 2020” ດ້ວຍບັນດາມາດຕະການຕົ້ນຕໍ່ດັ່ງນີ້:
ທີໜຶ່ງ, ສືບຕໍ່ຍູ້ແຮງວຽກງານໂຄສະນາ ໂດຍຜ່ານບັນດາພາຫະນະສື່ມວນຊົນ ເພື່ອຍົກສູງຄວາມຮັບຮູ້ຂອງບັນດາຄະນະພັກ ອຳນາດການປົກຄອງ ບຸກຄົນ ວິສາຫະກິດ ແລະ ທົ່ວສັງຄົມ ກ່ຽວກັບຄວາມສຳຄັນຂອງການເຄື່ອນໄຫວພົວພັນແລກປ່ຽນ ຮ່ວມມືສາກົນທາງດ້ານວິທະຍາສາດ ແລະ ເຕັກໂນໂລຊີ ຕໍ່ກັບຄວາມພັດທະນາເສດຖະກິດ - ສັງຄົມ ຂອງປະເທດຊາດໃນໄລຍະໃໝ່.
ທີສອງ, ກໍ່ສ້າງ ແລະ ປະຕິບັດບັນດາໂຄງການ ແຜນງານ ໜ້າທີ່ຄົ້ນຄວ້າລວມກັນ ໃນຂອບບັນດາສັນຍາຂໍ້ຕົກລົງສອງຝ່າຍ, ຫຼາຍຝ່າຍ. ສົ່ງເສີມການຮ່ວມມືຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ ລະຫວ່າງວິສາຫະກິດ ມະຫາວິທະຍາໄລ ສະຖາບັນຄົ້ນຄວ້າ ບຸກຄົນນັກຄົ້ນຄວ້າ ໃນປະເທດ ກັບບັນດາຄູ່ຮ່ວມຕ່າງປະເທດ. ດຶງດູດເອົາແຫຼ່ງທຶນຈາກພາຍນອກ ໂດຍຜ່ານບັນດາໂຄງການຄົ້ນຄວ້າຢູ່ຫວຽດນາມ. ເພີ່ມທະວີການຈັດຕັ້ງ ແລະ ເປັນເຈົ້າພາບກອງປະຊຸມ ສຳມະນາວິທະຍາສາດສາກົນຢູ່ຫວຽດນາມ ແລະ ເຂົ້າຮ່ວມກອງປະຊຸມ ສຳມະນາວິທະຍາສາດຢູ່ຕ່າງປະເທດ. ຈັດຕັ້ງງານວາງສະແດງແນະນຳຜົນສຳເລັດວິທະຍາສາດ-ເຕັກໂນໂລຊີ ແລະ ນະວັດຕະກຳໃໝ່, ທັນສະໄໝຂອງຕ່າງປະເທດ ແລະ ຂອງຫວຽດນາມ.
ທີສາມ, ເສີມຂະຫຍາຍປະສິດທິຜົນແຫ່ງການເຄື່ອນໄຫວຂອງຕາໜ່າງຜູ້ຕາງໜ້າວິທະຍາສາດ ແລະ ເຕັກໂນໂລຊີ ຫວຽດນາມຢູ່ຕ່າງປະເທດ. ດຶງດູດຜູ້ຊ່ຽວຊານ ນັກວິທະຍາສາດ ທີ່ເປັນຄົນຕ່າງປະເທດ, ຄົນຫວຽດນາມຢູ່ຕ່າງປະເທດ ໃຫ້ເຂົ້າຮ່ວມໃນບັນດາໂຄງການ ແຜນງານການຄົ້ນຄວ້າ, ບຳລຸງກໍ່ສ້າງກຳລັງຄົນສຳລັບວິທະຍາສາດ ແລະ ເຕັກໂນໂລຊີ, ກໍ່ຕັ້ງບັນດາໜ່ວຍງານຄົ້ນຄວ້າທີ່ແຂງແຮງຢູ່ຫວຽດນາມ, ໃນນັ້ນ ໃຫ້ຄວາມສຳຄັນແກ່ບັນດາໜ່ວຍງານຄົ້ນຄວ້າໜຸ່ມ.
ທີສີ່, ກໍ່ສ້າງ ແລະ ຜັນຂະຫຍາຍເນື້ອໃນ, ແຜນການຮ່ວມມືດ້ານວິທະຍາສາດ ແລະ ເຕັກໂນໂລຊີລະດັບຊາດ ກັບບັນດາປະເທດທີ່ແຂງແຮງທາງດ້ານວິທະຍາສາດ ແລະ ເຕັກໂນໂລຊີ ແລະ ເປັນຄູ່ຮ່ວມຍຸດທະສາດຂອງຫວຽດນາມ. ກໍ່ຕັ້ງບັນດາສູນຄົ້ນຄວ້າວິທະຍາສາດທີ່ດີເດັ່ນ ບົນພື້ນຖານຮ່ວມມືຍາວນາມລະຫວ່າງບັນດາອົງການຈັດຕັ້ງຄົ້ນຄວ້າວິທະຍາສາດຂອງຫວຽດນາມ ແລະ ຂອງຕ່າງປະເທດ. ທົດລອງຮ່ວມມືກໍ່ສ້າງສະຖາບັນວິທະຍາສາດ ແລະ ເຕັກໂນໂລຊີທັນສະໄໝບາງແຫ່ງ ທີ່ມີທຶນປະກອບຂອງຕ່າງປະເທດຢູ່ຫວຽດນາມ.
ທີຫ້າ, ກໍ່ສ້າງຕາໜ່າງຜູ້ຊ່ຽວຊານຊອກຫາເຕັກໂນໂລຊີ, ຮຽບຮຽງຂຽນລາຍງານກ່ຽວກັບຂ່າວສານເຕັກໂນໂລຊີສາກົນ, ສຳເນົາເຕັກໂນໂລຊີສາກົນ ແລະ ລາຍງານອື່ນທີ່ກ່ຽວພັນເຖິງທ່າອຽງພັດທະນາເຕັກໂນໂລຊີ ຢູ່ປະເທດທີ່ກ່ຽວ ແລະ ຢູ່ໃນໂລກ. ຈັດຕັ້ງໜ່ວຍຊ່ຽວຊາມຕາມແຕ່ລະຂົງເຂດວິທະຍາສາດ ແລະ ເຕັກໂນໂລຊີ ທີ່ບຸລິມະສິດຂອງປະເທດ, ສົມທົບລະຫວ່າງຜູ້ຊ່ຽວຊານເຕັກໂນໂລຊີ ກັບຜູ້ຊ່ຽວຊານຄຸ້ມຄອງບໍລິຫານເຕັກໂນໂລຊີ; ຈັດຕັ້ງກອງປະຊຸມ ສຳມະນາວິທະຍາສາດ; ປຶກສາຫາລືບັນຫາສະເພາະ, ແລກປ່ຽນລະຫວ່າງບັນດາໜ່ວຍຊ່ຽວຊານຊອກຫາເຕັກໂນໂລຊີ ກັບບັນດາວິສາຫະກິດ, ຈັດຕັ້ງສຳນັກງານອົງການໃນປະເທດທີ່ມີຄວາມຕ້ອງການຊອກຫາເຕັກໂນໂລຊີຂອງຕ່າງປະເທດ; ດຳເນີນການທົດລອງສົ່ງນັກວິທະຍາສາດ-ເຕັກໂນໂລຊີໜຸ່ມຂອງຫວຽດນາມ ໄປເຮັດວຽກໃນບັນດາວິສາຫະກິດເຕັກໂນໂລຊີຂອງໂລກ.
ທີຫົກ, ກໍ່ສ້າງບັນຊີລາຍຊື່ເຕັກໂນໂລຊີ ທີ່ຕ້ອງການຊອກຫາ (ປະກອບດ້ວຍ ຄວາມຕ້ອງການທາງດ້ານເຕັກນິກ, ຫຼັກດຳເນີນເຕັກໂນໂລຊີ; ຈຸດປະສົງນຳໃຊ້ເຕັກໂນໂລຊີ ທີ່ຕ້ອງການຊອກຫາ; ແຫຼ່ງກຳມະສິດເຕັກໂນໂລຊີ ທີ່ພວມຊອກຫາ (ປະເທດ, ເຈົ້າກຳມະສິດເຕັກໂນໂລຊີ, ລັກສະນະພິເສດຂອງເຕັກໂນໂລຊີ); ຄວາມສາມາດຮັບເອົາເຕັກໂນໂລຊີ ຂອງອົງການຈັດຕັ້ງການຮັບເອົາເຕັກໂນໂລຊີ) ແລະ ຈັດຕັ້ງການຊອກຫາເຕັກໂນໂລຊີ. ກໍ່ສ້າງ ແລະ ຊ່ວຍໜູນການປະຕິບັດບັນດາໂຄງການມອບໂອນເຕັກໂນໂລຊີ. ປັບປຸງບູລະນະລະບົບກົນໄກ ນະໂຍບາຍ ແລະ ຂໍ້ມູນຂ່າວສານກ່ຽວກັບການເຊື່ອມໂຍງສາກົນທາງດ້ານວິທະຍາສາດ ແລະ ເຕັກໂນໂລຊີ./.
ຂຽນໂດຍ ຫງວຽນກວັນ
ກຳມະການສູນກາງພັກ,
ລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ
--------------------------------
ບົດນີ້ໄດ້ລົງພິມໃນວາລະສານກອມມູນິດ ສະບັບທີ 874 (ເດືອນສິງຫາ 2015)
(1) ມະຕິຕົກລົງສະບັບທີ 538/QĐ-TTg ລົງວັນທີ 16 ເມສາ 2014 ແລະ ມະຕິຕົກລົງສະບັບທີ 1069/QĐ-TTg ລົງວັນທີ 4 ກໍລະກົດ 2014 ຂອງນາຍົກລັດຖະມົມຕີ ແຫ່ງ ສສ.ຫວຽດນາມ.
