ຊຸກຍູ້ຄວາມເຊື່ອຖືດ້ານການເມືອງ ລະຫວ່າງສອງປະເທດ ຫວຽດນາມ - ຈີນ
ໂດຍຕອບສະໜອງຕາມຄຳເຊີນຂອງທ່ານ ຈາງ ເຕີ້ຈຽງ ກຳມະການປະຈຳກົມການເມືອງພັກກອມມູນິດຈີນ ປະທານສະພາປະຊາຊົນແຫ່ງຊາດແຫ່ງ ສປ.ຈີນ, ທ່ານ ຫງວຽນຊິງຮຸ່ງ ກຳມະການກົມການເມືອງພັກກອມມູນິດຫວຽດນາມ ປະທານສະພາແຫ່ງຊາດແຫ່ງ ສສ.ຫວຽດນາມ ໄດ້ນຳໜ້າຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄປຢ້ຽມຢາມສັນຖະວະໄມຕີປະເທດ ສປ.ຈີນ ຢ່າງເປັນທາງການ ແຕ່ວັນທີ 23 ຫາ 27 ທັນວາ 2015. ຕໍ່ຈາກການຢ້ຽມຢາມປະເທດຈີນຢ່າງເປັນທາງການ ຂອງທ່ານ ຫງວຽນຝູຈ້ອງເລຂາທິການໃຫຍ່ພັກກອມມູນິດຫວຽດນາມໃນເດືອນ ເມສາ 2015 ແລະການຢ້ຽມຢາມຂັ້ນລັດທີ່ຫວຽດນາມຂອງທ່ານ ສີ ຈິ້ນຜິງ ເລຂາທິການໃຫຍ່ພັກກອມມູນິດຈີນ ປະທານປະເທດຈີນ ໃນເດືອນພະຈິກ 2015, ການຢ້ຽມຢາມສັນທະວະໄມຕີປະເທດຈີນຢ່າງເປັນທາງການ ຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະຄະນະຜູ້ແທນຂັ້ນສູງສະພາແຫ່ງຊາດຫວຽດນາມໃນຄັ້ງນີ້ ແມ່ນເພື່ອແນໃສ່ຜັນຂະຫຍາຍຄວາມຮັບຮູ້ລວມທີ່ບັນລຸໄດ້ລະຫວ່າງການນຳຂັ້ນສູງຂອງສອງປະເທດ.
ໃນການຢ້ຽມຢາມ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ພົບປະກັບທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດຈີນ; ພົບປະກັບທ່ານ ຢູ ເຈງຊີງ ປະທານການປະຊຸມປຶກສາຫາລືການເມືອງປະຊາຊົນຈີນ; ພົບປະຫາລືກັບທ່ານ ຈາງ ເຕີ້ຈຽງ ກຳມະການປະຈຳກົມການເມືອງພັກກອມມູນີດຈີນ ປະທານສະພາປະຊາຊົນແຫ່ງຊາດຈີນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ກໍ່ໄດ້ໃຫ້ການຕ້ອນຮັບຄະນະຜູ້ແທນສະມາຄົມມິດຕະພາບການຕ່າງປະເທດປະຊາຊົນຈີນ; ຢາມແລະໂອ້ລົມກັບພະນັກງານສະຖາມຄູດຫວຽດນາມຢູ່ປັກກິ່ງ. ໃນໂຄງການຢ້ຽມຢາມບາງທ້ອງຖີ່ນຂອງຈີນ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ພົບປະທ່ານ ສື ທູຖິງ ເລຂາພັກແຂວງ ປະທານສະພາປະຊາຊົນແຂວງ ຮູໜານ; ໄປຢາມອະນຸສອນສະຖານປະທານ ເໝົາ ເຈີ໋ຕົງ; ຕ້ອນຮັບທ່ານ ຮ່ອງ ຫຼົງຢູນ ປະທານສະພາປະຊາຊົນແຂວງ ກວາງຕຸ້ງ. ໃນການຢ້ຽມຢາມປະເທດຈີນຄັ້ງນີ້, ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ທ່ານ ຈາງ ເຕີ້ຈຽງ ປະທານສະພາປະຊາຊົນແຫ່ງຊາດຈີນ ໄດ້ປຶກສາຫາລື ແລກປ່ຽນຢ່າງກວ້າງຂວາງເລິກເຊິ່ງ ກ່ຽວກັບວິທີການ ແລະ ມາດຕະການຕ່າງໆ ເພື່ອຊຸກຍູ້ຄວາມພົວພັນຮ່ວມມືຮອບດ້ານ ລະຫວ່າງການນຳຂັ້ນສູງ, ບັນດາຄະນະກຳມາທິການ ອົງການຂອງສະພາແຫ່ງຊາດຂອງສອງປະເທດ; ສອງຝ່າຍກໍໄດ້ລົງນາມໃນຄວາມຕົກລົງຮ່ວມມືລະຫວ່າງສະພາແຫ່ງຊາດຂອງສອງປະເທດ, ເປີດໄລຍະໃໝ່ໃຫ້ແກ່ຄວາມພົວພັນຮ່ວມມືລະຫວ່າງອົງການນິຕິບັນຍັດຂອງສອງປະເທດ.
ກ່ຽວພັນເຖິງບັນຫາທະເລຕາເວັນອອກ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນທະເລຕາເວັນອອກເປັນບັນຫາທີ່ສຳຄັນທີ່ສຸດໃນການພົວພັນລະຫວ່າງສອງປະເທດ; ມັນກ່ຽວພັນເຖິງອະທິປະໄຕ, ອຳນາດອະທິປະໄຕ, ອຳນາດພິຈາລະນາຕັດສີນ, ຜົນປະໂຫຍດຫຼັກ ແລະ ພ້ອມກັນນັ້ນມັນກໍກ່ຽວພັນເຖິງແນວຄິດຈິດໃຈຂອງປະຊາຊົນສອງປະເທດ. ເພາະສະນັ້ນ, ແກ້ໂຂບັນຫາທະເລຕາເວັນອອກມີຄວາມໝາຍສຳຄັນພິເສດ ຕໍ່ກັບສອງພັກ, ສອງລັດຫວຽດນາມ-ຈີນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ເຫັນດີເປັນເອກະສັນກັບທັດສະນະຂອງທ່ານສີ ຈິ້ນຜິງ ເລຂາທິການໃຫຍ່ ປະທານປະເທດຈີນ ທີ່ວ່າ ລະຫວ່າງສອງຝ່າຍຍັງມີຄວາມແຕກຕ່າງກັນ ເຊິ່ງບໍ່ອາດຈະແກ້ໄຂໃນມື້ໜຶ່ງຍາມດຽວໄດ້. ສິ່ງສຳຄັນແມ່ນສອງຝ່າຍຕ້ອງກວດກາ, ຄວບຄຸມຄຸ້ມຄອງສະພາບການໃຫ້ດີ; ຕ້ອງຮັບຮູ້ວ່າຜົນປະໂຫຍດຮ່ວມກັນຂອງສອງຝ່າຍແມ່ນໃຫຍ່ຫຼວງກວ່າຕັ້ງຫຼາຍທຽບກັບຄວາມແຕກຕ່າງກັນ, ເພື່ອຜົນປະໂຫຍດລວມຂອງປະຊາຊົນສອງປະເທດ ແລະ ຄວາມປາຖະໜາອັນພື້ນຖານຂອງສອງພັກ, ສອງລັດຫວຽດນາມ - ຈີນ.
ທ່ານເລຂາທິການໃຫຍ່ ປະທານປະເທດແຫ່ງ ສປ.ຈີນ ສີ ຈິ້ນຜິງ ເນັ້ນວ່າ ສອງຝ່າຍລ້ວນແຕ່ມີບົດຮຽນ ແລະ ຄວາມສາມາດໃນການກວດກາ ແລະ ຄວບຄຸມຄຸ້ມຄອງຄວາມແຕກຕ່າງກັນ, ຖ້າຫາກການນຳຂັ້ນສູງຂອງສອງພັກ, ສອງລັດ ພ້ອມກັນຕັດສີນໃຈການເມືອງ ສືບຕໍ່ເອົາໃຈໃສ່ຊຸກຍູ້ຄວາມພົວພັນມິດຕະພາບອັນເປັນມູນເຊື້ອ ຫັນໄປສູ່ແກ້ໄຂຄວາມແຕກຕ່າງກັນລະຫວ່າງສອງປະເທດ ແມ່ນອາດຈະເຮັດເປັນຢ່າງດີໄດ້. ຢືນຢັນບັນຫາເຂດທະເລເປັນບັນຫາສຳຄັນທີ່ສຸດໃນຄວາມພົວພັນລະຫວ່າງສອງປະເທດ, ມັນຫລຸດຜ່ອນຄວາມເຊື່ອຖືຂອງສອງປະເທດ, ເຮັດໃຫ້ປະຊາຊົນສອງປະເທດກັງວົນໃຈ, ເພາະສະນັ້ນ, ໃນການພົບປະຫາລືເຫຼົ່ນັ້ນ ສອງຝ່າຍໄດ້ແລກປ່ຽນຢ່າງກົງໄປກົງມາທີ່ສຸດ; ພ້ອມກັນນັ້ນ ກໍໄດ້ເຫັນດີເປັນເອກະສັນກັນ ເພີ່ມທະວີການຕິດຕໍ່ແລກປ່ຽນ, ປຶກສາເຈລະຈາຢ່າງທົນທານໜຽວແໜ້ນ, ແລກປ່ຽນແລະກວດກາສະພາບການໃຫ້ດີ; ບໍ່ໃຫ້ເກີດບັນຫາສັບສົນ ແລະ ຊອກຫາວິທີແກ້ອັນພື້ນຖານ ຍາວນານ ເພື່ອແກ້ໄຂບັນດານີ້ບົນພື້ນຖານຂອງກົດໝາຍສາກົນ ແລະ ຮັບປະກັນຜົນປະໂຫຍດຮ່ວມກັນ ເຊິ່ງສອງຝ່າຍສາມາດຍອມຮັບໄດ້.
ການຢ້ຽມຢາມປະເທດຈີນນີ້ ເປັນການຢ້ຽມຢາມຄັ້ງທຳອິດຂອງປະທານສະພາແຫ່ງຊາດຫວຽດນາມພາຍຫຼັງ 8 ປີ (ນັບແຕ່ປີ 2007) ແລະ ເປັນການຢ້ຽມຢາມປະເທດຈີນຄັ້ງທຳອິດຂອງທ່ານຫງວຽນຊິງຮຸ່ງ ໃນຖານະເປັນປະທານສະພາແຫ່ງຊາດຊຸດທີ XIII. ໃນສະພາບທີ່ຄວາມພົວພັນຫວຽດນາມ-ຈີນກຳລັງຢູ່ໃນທ່າອຽງພັດທະນາທີ່ຕັ້ງໜ້າ, ການຢ້ຽມຢາມປະກອບສ່ວນປະຕິບັດຄວາມຮັບຮູ້ຮ່ວມກັນຂອງການນຳຂັ້ນສູງຂອງສອງພັກ, ສອງປະເທດ ກ່ຽວກັບການຮັກສາການຢ້ຽມຢາມ ພົວພັນຕິດຕໍ່ຂັ້ນສູງຢ່າງເປັນປະຈຳ; ແລະກໍເປັນໂອກາດເພື່ອໃຫ້ສອງຝ່າຍຊຸກຍູ້ການແລກປ່ຽນ ຮ່ວມມືລະຫວ່າງສອງສະພາແຫ່ງຊາດ ແລະ ແລກປ່ຽນກ່ຽວກັບບັນດາບັນຫາທີ່ສຳຄັນໃນຄວາມພົວພັນຫວຽດນາມ-ຈີນ. ຜ່ານການຢ້ຽມຢາມ, ຫວຽດນາມຢັ້ງຢືນຢຶດໝັ້ນແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ຫຼາຍຮູບແບບ ຫຼາຍກ້ຳຫຼາຍຝ່າຍ; ຍາມໄດກໍໃຫ້ຄວາມສຳຄັນແລະປາຖະໜາຢາກພັດທະນາຄວາມພົວພັນທີ່ດີງາມ ແລະມີເນື້ອແທ້ຕົວຈິງກັບຈີນ ບົນພື້ນຖານເຄົາລົບນັບຖືເຊິ່ງກັນແລະກັນ, ສະເໝີພາບ ຕ່າງຝ່າຍຕ່ງມີຜົນປະໂຫຍດ; ຮັກສາການແລກປ່ຽນຄະນະຜູ້ແທນຂັ້ນສູງລະຫວ່າງສອງພັກ, ສອງປະເທດ; ປົກປັກຮັກສາຜົນປະໂຫຍດອັນຊອບທຳຂອງຫວຽດນາມຢູ່ເຂດທະເລຕາເວັນອອກ ບົນພື້ນຖານກົດໝາຍສາກົນ, ກວດກາຄວາມຜິດແຜກແຕກຕ່າງໃຫ້ດີ, ພ້ອມກັນຮັກສາທ່າອຽງສັນຕິພາບ ສະຖຽນລະພາບຢູ່ເຂດທະເລຕາເວັນອອກ, ເພື່ອສັນຕິພາບ ສະຖຽນລະພາບ ຄວາມຮ່ວມມື ແລະການພັດທະນາ ຢູ່ພາກພື້ນ ແລະ ໃນໂລກ./.
ສັງລວມໂດຍ ທູ່ຍລີງ