ໃນຂອບການຢ້ຽມຢາມ ຫວຽດນາມ (ແຕ່ວັນທີ 18 ຫາ 21 ມີນາ), ປະທານສະພາແຫ່ງຊາດ ປະເທດ ສາທາລະນະລັດຝຣັ່ງ ທ່ານ ເກຼົາເດີ ບາໂຕໂລນ ໄດ້ມີການພົບປະເຈລະຈາກັບປະທານສະພາແຫ່ງຊາດ ຫວຽນຊິງຮູ່ງ; ຢ້ຽມຄ່ຳນັບເລຂາທິການໃຫຍ່ພັກກອມມູນິດຫວຽດນາມ ທ່ານ ຫງວຽນຝູຈ້ອງ, ພົບປະແລກປ່ຽນຄຳຄິດເຫັນກັບຮອງນາຍົກລັດຖະມົນຕີ ຫງວຽນຊວນຟູກ; ພົບປະກັບຊື່ມວນຊົນທີ່ສະຖານທູດ ສ.ຝຣັ່ງ.
ທ່ານປະທານສະພາແຫ່ງຊາດຝຣັ່ງ ກໍໄດ້ເຂົ້າຮ່ວມພິທີສະເຫຼີມສະຫຼອງວັນສາກົນໃຊ້ພາສາຝຣັ່ງ ປີ 2016 ທີ່ໄດ້ຈັດຕັ້ງຂຶ້ນໃນໂຮງຮຽນມະຫາວິທະຍາໄລ ຮ່າໂນ້ຍ; ພົບປະແລະເຮັດວຽກກັບທ່ານ ຫງວຽນແທ່ງຟອງ ປະທານຄະນະກຳມະການ ປະຊາຊົນນະຄອນ ໂຮ່ຈີມິນ ແລະ ໄດ້ໄປຢ້ຽມຊົມທັດສະນີຍະພາບຂອງຫວຽດນາມ ບາງແຫ່ງ.
ຢູ່ທີ່ບັນດາການພົບປະຫາລືນັ້ນ ສອງຝ່າຍໄດ້ສະແດງຄວາມເຊື່ອໝັ້ນ ແລະ ຢືນຢັນວ່າ: ຈະພະຍາຍາມເຮັດໃຫ້ການພົວພັນຮ່ວມມືດ້ານລັດຖະສະພາງະຫວ່າງສອງປະເທດ ຂຶ້ນເປັນລະດັບໃໝ່, ນຳເອົາຜົນປະໂຫຍດມາໃຫ້ປະຊາຊົນທັງສອງປະເທດ ເພື່ອຄວາມສັນຕິພາບ ແລະ ວັດທະນາຖາວອນໃນໂລກ.
ສອງຝ່າຍກໍ່ໄດ້ເຊື່ອໝັ້ນວ່າ: ການຢ້ຽມຢາມຄັ້ງນີ້ຈະເປັນຂີດໝາຍອັນສຳຄັນ, ຍົກລະດັບການພົວພັນຮ່ວມມືລະຫວ່າງສອງອົງການນິຕິບັນຍັດ ແລະ ເປັນການປະກອບສ່ວນທີ່ສຳຄັນເຂົ້າໃນການເຮັດໃຫ້ສາຍພົວພັນຍຸດທະສາດຂອງສອງປະເທດນັບມື້ນັບເຂົ້າສູ່ລວງເລິກ, ແທ້ຈິງ ແລະ ມີປະສິດທິຜົນກວ່າອີກ.
ທີ່ການພົບປະຫາລື, ທ່ານປະທານສະພາແຫ່ງຊາດ ຫງວຽນຊິງຮູ່ງ ໃຫ້ຮູ້ວ່າ: ສະພາແຫ່ງຊາດ ຫວຽດນາມພວມກໍ່ສ້າງປັບປຸງລະບົບກົດໝາຍໃຫ້ສົມບູນແບບເທື່ອລະກ້າວ ແລະ ສອດຄ່ອງກັບລັດຖະທຳມະນູນປີ 2013, ໃນນັ້ນມີກົດໝາຍຫຼາຍສະບັບທີ່ກ່ຽວຂ້ອງເຖິງດ້ານເສດຖະກິດ, ການຄ້າ ແລະ ການລົງທຶນ. ກົດໝາຍ ຫວຽດນາມ ຍາມໃດກໍ່ຮັກສາສິດ ແລະ ຜົນປະໂຫຍດຖືກກົດໝາຍຂອງບັນດານັກລົງທຶນຕ່າງປະເທດ, ໃນນັ້ນມີບັນດານັກລົງທຶນຂອງຝຣັ່ງ. ທ່ານປະທານສະພາແຫ່ງຊາດສະເໜີວ່າ: ໃນໄລຍະເວລາຕໍ່ໜ້າ, ສອງຝ່າຍຕ້ອງເພີ່ມທະວີການຮ່ວມມືດ້ານເສດຖະກິດ, ພິເສດແມ່ນໃນຂົງເຂດຄົມມະນາຄົມ, ກະສິກຳ, ການຢາ, ສາທາລະນະສຸກ, ວິທະຍາສາດ, ການສຶກສາ, ກໍ່ສ້າງແຫຼ່ງບຸກຄະລາກອນ,...ຜ່ານນັ້ນຈະຊ່ວຍໃຫ້ ຫວຽດນາມເຊື່ອມໂຍງສາກົນ, ເພີ່ມທະວີການເຂົ້າໃຈລະຫວ່າງປະຊາຊົນສອງປະເທດ. ສອງຝ່າຍຕ້ອງເອົາໃຈໃສ່ການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ ແນໃສ່ປະກອບສ່ວນເຂົ້າໃນການຮັກສາຄວາມສະຫງົບ, ສັນຕິພາບຢູ່ພາກພື້ນ ແລະ ໃນໂລກ.
ປະທານສະພາແຫ່ງຊາດ ຫງວຽນຊິງຮູ່ງ ໃຫ້ທັດສະນະວ່າ ເພື່ອເຮັດໃຫ້ສາຍພົວພັນຄູ່ຮ່ວມມືຍຸດທະສາດລະຫວ່າງສອງປະເທດນັບມື້ນັບມີປະສິດທິຜົນ ແລະ ໄປສູ່ລວງເລິກ, ພັກທີ່ເປັນຜູ້ກຳອຳນຢູ່ທັງສອງປະເທດ, ສະພາແຫ່ງຊາດ, ຄະນະກຳມະການປະສົມ ແລະ ພິເສດແມ່ນວິສາຫະກິດ, ທ້ອງຖິ່ນຕ່າງໆຂອງສອງປະເທດຕ້ອງເພີ່ມທະວີການພົວພັນ, ແລກປ່ຽນ, ເລ່ງທວງການຮ່ວມມືໃນທຸກຂົງເຂດທີ່ສອງຝ່າຍມີທ່າແຮງ.
ກ່ຽວກັບສະພາບການໃນທະເລຕາເວັນອອກ, ທ່ານປະທານສະພາແຫ່ງຊາດ ຫງວຽນຊິງຮູ່ງ ຫວັງວ່າ ສະພາແຫ່ງຊາດ ຝຣັ່ງ ຕັ້ງໜ້າສະໜັບສະໜູນ ຫວຽດນາມໃນການຮັບປະກັນຄວາມໝັ້ນຄົງໃນການເດີນທະເລ ແລະ ຕໍ່ສູ້ເພື່ອຄັດຄ້ານການເຄື່ອນໄຫວນຳໃຊ້ກຳລັງການທະຫານຢູ່ທະເລຕາເວັນອອກ; ພ້ອມກັນແລກປ່ຽນ ປຶກສາຫາລື ແລະ ເຄົາລົບນັບຖືກົດໝາຍສາກົນໃນການແກ້ໄຂຄວາມຂັດແຍ່ງກັນໃນເຂດທະເລ.
ເຫັນດີເປັນເອກະພາບຢ່າງສູງກັບຂໍ້ສະເໜີຕ່າງຂອງທ່ານປະທານສະພາແຫ່ງຊາດ ຫວຽນຊິງຮູ່ງ, ທ່ານ ເກຼົາເດີ ບາໂຕໂລນ ໄດ້ຢືນຢັນວ່າ: ປະຊາຊົນ ຝຣັ່ງ ກໍ່ຄືປະຊາຊົນ ຫວຽດນາມ ຍາມໃດກໍ່ປາຖະໜາແລະຮັກຫອມສັນຕິພາບ. ດັ່ງນັ້ນ, ການເຄົາລົບກົດໝາຍສາກົນ ແມ່ນຈຳເປັນຕ້ອງການທີ່ສຸດເພື່ອຫຼີກລ້ຽງການກໍ່ຄວາມເສຍຫາຍໃຫ້ແກ່ການຄ້າທາງທະເລຢູ່ທະເລຕາເວັນອອກ. ປະທານສະພາແຫ່ງຊາດປະເທດ ສາທາລະນະລັດ ຝຣັ່ງ ເນັ້ນວ່າ: ເຄົາລົບກົດໝາຍສາກົນກໍ່ເປັນວິທີເພື່ອຫຼີກລ້ຽງຄວາມເຄັ່ງຕຶງທີ່ບໍມີປະເທດໃດຄາດຫວັງ.
ທ່ານປະທານສະພາແຫ່ງຊາດ ຝັ່ງ ທ່ານ ເກຼົາເດີ ບາໂຕໂລນ ໄດ້ເຫັນດີກັບ ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງວ່າ: ໃນເວລາຕໍ່ໜ້າ, ສອງຝ່າຍຈະເພີ່ມທະວີການແລກປ່ຽນຄະນະຜູ້ແທນຂັ້ນສູງ, ບົກລວມຍອດມູນຄ່າການຄ້າສອງສົ້ນຂຶ້ນໃຫ້ສົມກັບສາຍພົວພັນຮ່ວມມືລະຫວ່າງສອງປະເທດ.
ທ່ານ ເກຼົາເດີ ບາໂຕໂລນ ໃຫ້ຮູ້ວ່າ: ສະພາແຫ່ງຊາດຝຣັ່ງ ຫາກໍ່ອະນຸມັດຜ່ານສັນຍາກ່ຽວກັບການຮ່ວມມືລະຫວ່າງ ຫວຽດນາມ ແລະ ອີຢູ (EU). ພະລັງງານ, ນ້ຳ, ການແກ້ໄຂມົນລະຜິດສິ່ງແວດລ້ອມ ແມ່ນບັນດາຂົງເຂດທີ່ ຝຣັ່ງ ມີທ່າແຮງ ແລະ ພ້ອມແລ້ວທີ່ຈະໃຫ້ການຮ່ວມມືກັບຫວຽດນາມ. ຝຣັ່ງ ຈະຊຸກຍູ້ການຮ່ວມມືບຳລຸງສ້າງແຫຼ່ງຊັບພະຍາກອນມະນຸດກັບຫວຽດນາມ; ກຽມພ້ອມບຳລຸງສ້າງ ແລະ ຖ່າຍທອດເຕັກໂນໂລຢີສາທາລະນະສຸກ, ບຳລຸງສ້າງດ້ານພາສາຝຣັ່ງ, ສ້າງເງື່ອນໄຂສະດວກໃຫ້ແກ່ນັກສຶກສາ ຫວຽດນາມ ໄປຮ່ຳຮຽນ ແລະ ຄົ້ນຄວ້າຢູ່ປະເທດຝຣັ່ງ./.
ສັງລວມໂດຍ BTV