ປະທານປະເທດ ເຈືອງເຕິນຊາງ ໄດ້ສຳເລັດສິ້ນສຸດການຢ້ຽມຢາມ ປະເທດສາທາລະນະລັດ ເອກະພາບ ຕັງຊານີ, ປະເທດສາທາລະນະລັດ ໂມຊຳບິກ ແລະ ປະເທດສາທາລະນະລັດ ອິດສະລາມ ອີຣານ ຢ່າງຈົບງາມ
ວກ.ອອນໄລ - ແຕ່ວັນທີ 9 ຫາ 15 ມີນາ 2016, ທ່ານປະທານປະເທດ ເຈືອງເຕິນຊາງ ພ້ອມດ້ວຍຄະນະຜູ້ແທນຂັ້ນສູງ ສາທາລະນະລັດ ສັງຄົມນິຍົມ ຫວຽດນາມ ໄດ້ດຳເນີນການຢ້ຽມຢາມຂັ້ນລັດ ທີ່ປະເທດສາທາລະນະລັດ ເອກະພາບ ຕັງຊານີ, ປະເທດສາທາລະນະລັດ ໂມຊຳບິກ ແລະ ປະເທດ ສາທາລະນະລັດ ອິດສະລາມ ອີຣານ.
ເຖິງວ່າ ຫວຽດນາມໄດ້ສ້າງຕັ້ງສາຍພົວພັນທາງການທູດກັບ ສາທາລະນະລັດ ເອກະພາບ ຕັງຊານີ ໃນວັນທີ 14 ກຸມພາ 1965, ປະເທດສາທາລະນະລັດ ໂມຊຳບິກ ໃນວັນທີ 25 ມິຖຸນາ 1975 ແລະ ປະເທດສາທາລະນະລັດ ອິດສະລາມ ອີຣານ ໃນວັນທີ 4 ສິງຫາ 1973, ແຕ່ວ່າ ການພົວພັນດ້ານເສດຖະກິດ - ການຄ້າ ຂອງປະເທດຫວຽດນາມກັບປະເທດເພື່ອນມິດດັ່ງກ່າວຍັງຖືກຈຳກັດດ້ວຍຈຳນວນບໍ່ຫຼາຍພໍປານໃດ (ປີ 2015, ລວມຍອດມູນຄ່າການຄ້າສອງສົ້ນກັບ ຕັງຊານີ ບັນລຸ 204 ລ້ານໂດລາສະຫະລັດ, ກັບໂມຊຳບິກ ບັນລຸ 66 ລ້ານໂດລາສະຫະລັດ, ກັບອີຣານ ບັນລຸ 107 ລ້ານໂດລາສະຫະລັດ), ໃນຂະນະທີ່ຄວາມສາມາດບົ່ມຊ້ອນການຮ່ວມມືລະຫວ່າງ ຫວຽດນາມ ແລະ ບັນດາປະເທດນີ້ຍັງໃຫຍ່ຫຼວງ.
ດ້ານອື່ນ, ບັນດາປະເທດ ຕັງຊານີ, ໂມຊຳບິກ ແລະ ອີຣານ ຫາກໍ່ມີເຫດການທີ່ສຳຄັນຫຼາຍຢ່າງ. ປະເທດຕັງຊານີ ຫາກໍ່ດຳເນີນການເລືອກຕັ້ງທົ່ວໄປໃນທົ່ວປະເທດ ຢ່າງສຳເລັດຜົນ ດ້ວຍໄຊຊະນະຂອງພັກປະຕິວັດ ຕັງຊານີ ຜູ້ກຳອຳນາດ (CCM), ນຳເອົາພະນະທ່ານ ຈອນ ມາກູຟູລີ ຂຶ້ນເປັນປະທານາທິບໍດີ. ປະເທດໂມຊຳບິກ ຫາກໍ່ຖ່າຍທອດມອບໂອນຮຸ່ນການນຳ ແລະ ເລີ່ມຕົ້ນຍຸດທະສາດພັດທະນາໃໝ່. ອີຣານ ຫາກໍ່ສິ້ນສຸດຂໍ້ຕົກລົງນິວເຄຼຍທີ່ສົມບູນ (JCPOA), ຍົກເລີກບັນດາມາດຕະການປິດລ້ອມຄວ້ຳບາດ. ສາມປະເທດດັ່ງກ່າວລ້ວນແຕ່ຜັນຂະຫຍາຍນະໂຍບາຍຫັນໄປທາງທິດຕາເວັນອອກຢ່າງແຂງແຮງ.
ໃນສະພາບການນັ້ນ, ການຢ້ຽມຢາມຂອງການນຳຫວຽດນາມຢູ່ສາມປະເທດດັ່ງກ່າວແມ່ນການປຸກກຳລັງໃຈ ແລະ ສະໜັບສະໜູນຢ່າງທັນເວລາ ແລະ ລ້ຳຄ່າຕໍ່ເພື່ອນມິດ, ພ້ອມກັນນັ້ນກໍ່ເປັນການກໄອກາດຮ່ວມມື ເພື່ອພ້ອມກັນພັດທະນາ. ການຢ້ຽມຢາມໄດ້ສ້າງແຮງກະຕູ້ນໃໝ່ເພື່ອຊຸກຍູ້ການພົວພັນທາງດ້ານເສດຖະກິດ - ການຄ້າ ລະຫວ່າງ ຫວຽດນາມ ແລະ ບັນດາປະເທດເພື່ອນມິດ ໃຫ້ຂະຫຍາຍຂຶ້ນສູ່ບາດກ້າວພັດທະນາໃໝ່, ສົມຄູ່ກັບການພົວພັນດ້ານການເມືອງອັນເປັນມູນເຊື້ອທີ່ດີງາມ, ຊ່ວຍເຫຼືອ ແລະສະໜັບສະໜູນຊຶ່ງກັນແລະກັນ ລະຫວ່າງຫວຽດນາມ ກັບເພື່ອນມິດຕ່າງໆ.
ທັງສາມປະເທດ ຕັງຊານີ, ໂມຊຳບິກ ແລະ ອີຣານ ລ້ວນແຕ່ໄດ້ໃຫ້ການຕ້ອນຮັບ ປະທານປະເທດ ເຈືອງເຕິນຊາງ ແລະ ຄະນະຜູ້ແທນຂັ້ນສູງ ຫວຽດນາມ ຢ່າງສົມກຽດ ດ້ວຍພິທີການຕ້ອນຮັບສູງສຸດ. ມີປະຊາຊົນຈຳນວນຫຼວງຫຼາຍໄດ້ຊົມເຊີຍ ຕ້ອນຮັບປະທານປະເທດ ແລະ ຄະນະຜູ້ແທນຂັ້ນສູງຫວຽດນາມ ໃນບັນດາພິທີຕ້ອນຮັບເປັນທາງການ ກໍ່ຄືບັນດາການເຄື່ອນໄຫວຂອງຄະນະໃນຕະຫຼອດໄລຍະການຢ້ຽມຢາມ.
ໃນບັນດາການພົບປະຫາລື, ປະທານປະເທດໄດ້ຕາງໜ້າປະຊາຊົນຫວຽດນາມ ສະແດງຄວາມຂອບອົກຂອບໃຈຕໍ່ປະຊາຊົນສາມປະເທດ ທີ່ໄດ້ໃຫ້ຄວາມສະໜັບສະໜູນອັນໃຫຍ່ຫຼວງແກ່ຫວຽດນາມ, ປະກອບສ່ວນບໍ່ນ້ອຍເພື່ອຊ່ວຍເຫຼືອປະຊາຊົນຫວຽດນາມຍາດເອົາໄຊະນະໃນພາລະກິດການຕໍ່ຕ້ານ ແລະ ໂຮມປະເທດຊາດເປັນເອກະພາບ.
ຫວຽດນາມແລະບັນດາປະເທດດັ່ງກ່າວ ກໍ່ໄດ້ພ້ອມກັນທົບທວນຄືນການພົວພັນດ້ານເສດຖະກິດ, ການຄ້າ, ຊີ້ໃຫ້ເຫັນຄວາມສາມາດບົ່ມຊ້ອນທີ່ໃຫຍ່ຫຼວງຕ່າງໆ ເຊິ່ງຍັງບໍ່ໄດ້ນຳໃຊ້ຢ່າງສຸດຂີດ (ຄື: ຕັງຊານີ: ປູກຝັງແລະຜະລິດໝາກມ່ວງຫິມະພານ, ທ່ອງທ່ຽວ, ຂຸດຄົ້ນບໍ່ແຮ່; ໂມຊຳບິກ: ເສດທະກິດທະເລ, ຂຸດຄົ້ນແຮ່ທາດ...; ອີຣານ: ວິທະຍາສາດ - ເຕັກໂນໂລຢີ, ພະລັງງານ, ໂທລະຄົມມະນະຄົມ...).
ຈາກນັ້ນ, ປະທານປະເທດ ເຈືອງເຕິນຊາງ ພ້ອມກັບການນຳບັນດາປະເທດດັ່ງກ່າວໄດ້ເປັນເອກະພາບກ່ຽວກັບບັນດາຂົງເຂດບຸລິມະສິດ, ບັນດາມາດຕະການພື້ນຖານ ເພື່ອຍູ້ແຮງການພົວພັນທາງດ້ານເສດຖະກິດ - ການຄ້າສອງສົ້ນ. ຫວຽດນາມໄດ້ໃຫ້ຄຳໝັ້ນສັນຍາຈະພ້ອມກັບ ຕັງຊານີ ຍົກສູງການພົວພັນດ້ານເສດຖະກິດ - ການຄ້າ ຂຶ້ນໃຫ້ມີມູນຄ່າ 1 ຕື້ໂດລາສະຫະລັດ, ກັບໂມຊຳບິກ ຂຶ້ນເປັນ 500 ລ້ານ ໂດລາສະຫະລັດ, ແລະກັບອີຣານ ຂຶ້ນເປັນ 2 ຕື້ໂດລາສະຫະລັດໃນປີ 2020.
ພ້ອມກັບການຊຸກຍູ້ພັດທະນາເສດຖະກິດ - ການຄ້າ, ຫວຽດນາມ ແລະ ບັນດາປະເທດໄດ້ຢືນຢັນວ່າ ຈະສືບຕໍ່ສະໜັບສະໜູນຊຶ່ງກັນແລະກັນ, ສືບຕໍ່ແລກປ່ຽນດ້ານການເມືອງ, ສະໜັບສະໜູນຜູ້ສະໝັກຮັບເລືອກຕັ້ງຂອງກັນ ຢູ່ເວທີປາໄສຕ່າງໆ. ບັນດາປະເທດຢືນຢັນຈະສະໜັບສະໜູນ ຫວຽດນາມເປັນສະມາຊິກບໍ່ຖາວອນ ອົງການສະຫະປະຊາຊາດ ໄລຍະ (2020 – 2021), ເປັນກຳມະການຄະນະກຳມະການກົດໝາຍສາກົນ ໄລຍະ (2017 – 2021).
ການຢ້ຽມຢາມດັ່ງກ່າວກໍ່ເປັນໂອກາດດີເພື່ອເຮັດໃຫ້ການນຳຫວຽດນາມ ແລະ ການນຳບັນດາປະເທດທີ່ກ່ຽວ ແລກປ່ຽນຄວາມເຫັນກ່ຽວກັບບັນຫາຕ່າງໆ ຂອງພາກພື້ນ ແລະ ສາກົນ, ໃນນັ້ນມີບັນຫາຕ່າງໆທີ່ພວມດຶງດູດຄວາມສົນໃຈຂອງວົງຄະນະຍາດສາກົນຢູ່ພາກພື້ນອາຊີຕາເວັນອອກສຽງໃຕ້, ພາກພື້ນຕາເວັນອອກກາງ, ກ່ຽວກັບຄວາມຕັດສິນໃຈຮ່ວມມືແກ້ໄຂບັນດາບັນຫາທີ່ມີລັກສະນະທົ່ວໂລກ, ພົວພັນເຖິງສັນຕິພາບ, ສະຖຽມລະພາບ ແລະ ພັດທະນາຮ່ວມກັນຂອງໂລກ.
ທັງສາມປະເທດດັ່ງກ່າວໄດ້ສະແດງຄວາມສະໜັບສະໜູນຢ່າງແຂງແຮງຕໍ່ທັດສະນະ, ຫຼັກໝັ້ນຫຼັກການ ກ່ຽວກັບການແກ້ໄຂຄວາມພິພາດຕ່າງໆ ດ້ວຍສັນຕິວິທີ ຜ່ານການສົນທະນາ; ນຳເອົາກົດໝາຍສາກົນ ບັນດາຫຼັກການຂອງກົດບັດສະຫະປະຊາຊາດ, ໃນນັ້ນມີສົມທິສັນຍາວ່າດ້ວຍກົດໝາຍທະເລປີ 1982 ເປັນພື້ນຖານສຳຄັນເບື້ອງຕົ້ນ ໃຫ້ແກ່ທຸກການປະພຶດຕໍ່ທີ່ພົວພັນເຖິງຄວາມພິດພາດ ແລະ ການປະທະກັນ.
ໃນການຢ້ຽມຢາມຢູ່ທະວີບອາຟຣິກກາ ແລະ ຕາເວັນອອກກາງຄັ້ງນີ້ ຂອງທ່ານປະທານປະເທດ, ໄດ້ມີເອກະສານຮ່ວມມືສຳຄັນຫຼາຍສະບັບໃນຂົງເຂດຕ່າງໆຄື ການສຶກສາ, ທະນາຄານ, ນ້ຳມັນອາຍແກັສໄດ້ຮັບການລົງນາມ ແນໃສ່ຊຸກຍູ້ການຮ່ວມມືຢ່າງກວ້າງຂວາງເລິກເຊິ່ງກວ່າອີກ ລະຫວ່າງຫວຽດນາມ ແລະ ສາມປະເທດດັ່ງກ່າວ.
ຜົນສຳເລັດຂອງການຢ້ຽມຢາມຄັ້ງນີ້ ພ້ອມກັບບັນດາຂໍ້ຕົກລົງ ເອກະສານຮ່ວມມື ທີ່ບັນລຸໄດ້ ເປັນຂີດໝາຍອັນສຳຄັນ ແລະເປັນພື້ນຖານອັນແໜ້ນແກ່ນ ເພື່ອເຮັດໃຫ້ການພົວພັນລະຫວ່າງ ຫວຽດນາມກັບສາມປະເທດ ຕັງຊານີ, ໂມຊຳບິກ ແລະ ອີຣານ ກ້າວເຂົ້າສູ່ບາດກ້າວໃໝ່, ເພື່ອຄວາມພັດທະນາຮູ່ງເຮືອງຖາວອນຂອງ ຫວຽດນາມ ແລະ ຂອງບັນດາປະເທດອ້າຍນ້ອງເພື່ອນມິດ.
ສັງລວຍໂດຍ BTV