ວກ. ອອນໄລ - ໃນວັນທີ 24 ມີນາ 2016, ກອງປະຊຸມປຶກສາຫາລືປະຈຳປີເພື່ອອາຊີ ໄດ້ໄຂຂຶ້ນທີ່ ໂບອ່າວ ແຂວງໄຫຫຼຳ (ສປ. ຈີນ) ພາຍໃຕ້ຫົວຂໍ້ “ອະນາຄົດໃໝ່ຂອງອາຊີ: ພະລັງຊີວິດໃໝ່ ແລະ ວິໃສທັດໃໝ່”. ຄະນະຜູ້ແທນຫວຽດນາມ ນຳໂດຍທ່ານ ຟ້າມບິ່ງມິງ ກຳມະການສູນກາງພັກ, ຮອງນາຍົກລັດຖະມົນຕີ ວ່າການກະຊວງການຕ່າງປະເທດ ໄດ້ເຂົ້າຮ່ວມກອງປະຊຸມ.
ຮອງນາຍົກລັດຖະມົນຕີແຫ່ງ ສສ.ຫວຽດນາມ ທ່ານຟ້າມບິ່ງມິງ ຢູ່ທີ່ກອງປະຊຸມປຶກສາຫາລືໂບອ່າວ ເພື່ອອາຊີ. (ພາບ: TTXVN)
“ພະລັງຊີວິດໃໝ່, ວິໃສທັດໃໝ່”
ໂດຍໄດ້ຈັດຂຶ້ນໃນສະພາບການເສດຖະກິດໂລກກຳລັງມີການຜັນປ່ຽນຢ່າງສັບສົນ, ຄວາມສາມາດຟື້ນຟູອ່ອນ, ກອງປະຊຸມປຶກສາຫາລືໂບອ່າຍ 2016 ໄດ້ຖືເປັນໂອກາດເພື່ອໃຫ້ຝ່າຍຕ່າງໆປຶກສາຫາລືກ່ຽວກັບແບບວິທີການໃໝ່ ເພື່ອຄຸ້ມຄອງລະບຽບການເສດຖະກິດ ແລະ ການເງິນທົ່ວໂລກ, ຊອກຫາທິດທາງພັດທະນາໃໝ່ໃຫ້ແກ່ພູມິພາກ ກໍ່ຄືໂລກ, ພ້ອມທັງເສີມຂະຫຍາຍພາລະບົດບາດ “ຫົວຈັກຫຼັກແຫຼ່ງ” ຂອງອາຊີ ໃນການຊຸກຍູ້ເສດຖະກິດໂລກໃຫ້ກ້າວຄືບໜ້າ. ກອງປະຊຸມໄດ້ດຶງດູດການເຂົ້າຮ່ວມຂອງຜູ້ແທນ 2000 ກວ່າຄົນ, ລວມທັງການນຳຂອງຫຼາຍປະເທດພາຍໃນ ແລະ ພາຍນອກພູມິພາກ, ບັນດານັກຮຽນຮູ້ທີ່ມີອິດທິພົນ, ບັນດາວິສາຫະກິດ ແລະ ອົງການຖະແຫຼງຂ່າວສາກົນເຂົ້າຮ່ວມ.
ໂດຍໄດ້ຮັບການສ້າງຕັ້ງຂຶ້ນໃນປີ 2001 ດ້ວຍເປົ້າໝາຍຊຸກຍູ້ການພັດທະນາຂອງບັນດາປະເທດອາຊີ ຜ່ານການເພີ່ມທະວີການເຊື່ອມໂຍງເສດຖະກິດພູມິພາກ ກໍ່ຄືການຄ້າແລະການລົງທຶນ, ມາຮອດປັດຈຸປັນນີ້ ກອງປະຊຸມປຶກສາຫາລືໂບອ່າຍ ໄດ້ກາຍເປັນເວທີປາໃສທີ່ສຳຄັນລະຫວ່າງບັນດາການນຳ, ນັກຮຽນຮູ້ ແລະ ນັກທຸລະກິດບັນດາປະເທດ ກ່ຽວກັບຫຼາຍຂົງເຂດຂອງອາຊີ. ກອງປະຊຸມປຶກສາຫາລືໂບອ່າວ ຄັ້ງນີ້ ໄດ້ເຮັດວຽກໃນເວລາ 4 ວັນ, ຈັດຕັ້ງການປຶກສາຫາລື 83 ຄັ້ງ, ລວມມີ 51 ເວທີປາໃສ, 14 ກອງປະຊຸມໂຕະມົນ, 6 ກອງປະຊຸມຕາມຫົວຂໍ້, 12 ການສົນທະນາກັບບັນດານັກເລີ່ມທຸລະກິດ ເຊິ່ງໄດ້ສຸມໃສ່ບັນຫາຕ່າງໆ ທີ່ບັນດາປະເທດກຳລັງສົນໃຈ ຄືເສດຖະກິດມະຫາພາກ, ເລີ່ມທຸລະກິດ ແລະ ຄວາມປະດິດສ້າງ, ວິທະຍາສາດ-ເຕັກໂນໂລຊີ, ອິນເຕີເນັດ...
ກອງປະຊຸມໄດ້ຮັບຟັງຄຳປາໄສຂອງນາຍົກລັດຖະມົນຕີບັນດາປະເທດຄື ກຳປູເຈຍ, ລາວ, ລິດວາ, ເນປານ, ໄທ ແລະ ການນຳປະເທດອື່ນພາຍໃນ ແລະ ພາຍນອກພູມິພາກຈຳນວນໜຶ່ງ. ບັນດາຜູ້ແທນທີ່ເຂົ້າຮ່ວມກອງປະຊຸມໄດ້ມີການປຶກສາຫາລືກ່ຽວກັບບັນດາແງ່ມູນຕ່າງກັນ ຂອງສະພາບການເສດຖະກິດໂລກ ແລະ ອາຊີ, ແຕ່ສຸດທ້າຍລ້ວນແຕ່ເນັ້ນເຖິງບົດບາດ ແລະ ຄວາມສາມາດບົ່ມຊ້ອນແຫ່ງການພັດທະນາຂອງອາຊີ, ຄວາມຈຳເປັນຕ້ອງເພີ່ມທະວີການຮ່ວມມືຮັບປະກັນສັນຕິພາບ ແລະ ສະຖຽມລະພາບໃນພູມິພາກ, ຄວາມສຳຄັນຂອງການປະຕິຮູບໂຄງສ້າງ, ການໝູນໃຊ້ເຕັກໂນໂລຊີໃໝ່ ແລະ ຊຸກຍູ້ການເຊື່ອມໂຍງພູມິພາກເພື່ອສ້າງກຳລັງໝູນໃໝ່ໃຫ້ແກ່ການພັດທະນາ.
ວັນເວລາໄດ້ຜ່ານພົ້ນໄປແປດແລ້ວ, ນັບແຕ່ເມື່ອເກີດວິກິດການການເງິນໂລກ, ແຕ່ຜົນກະທົບອັນກວ້າງຂວາງເລິກເຊິ່ງຂອງມັນຍັງຄົງຄ້າງຢູ່ມາຮອດທຸກວັນນີ້. ການຟື້ນຟູພາຍຫຼັງວິກິດການ ຢູ່ບັນດາລະບົບເສດຖະກິດໃໝ່ກໍ່ຍັງບໍ່ເທົ່າທຽມກັນ, ໃນຂະນະທີ່ບັນດາລະບົບເສດຖະກິດພັດທະນາກໍ່ມີການຟື້ນຟູຢ່າງຊັກຊ້າ. ໃນພິທີໄຂກອງປະຊຸມຄັ້ງນີ້, ນາຍົກລັດຖະມົນຕີແຫ່ງ ສປ.ຈີນ ທ່ານ ຫຼີ ເຄີ້ສຽງ ໃຫ້ຄຳສັງເກດວ່າ, ບັນດາປະເທດໃນພູມິພາກກຳລັງຖືກແຮງໜີບຈາກບັນດາລະບົບເສດຖະກິດອ່ອນເພຍຢູ່ນອກພູມິພາກ, ກໍ່ຄືການພັດທະນາທີ່ຂາດຄວາມສົມດຸນ, ດັ່ງນັ້ນ, ບັນດາປະເທດຕ້ອງປະສານສົມທົບກັນ ພະຍາຍາມຊຸກຍູ້ການຮ່ວມມືພັດທະນາໃນພູມິພາກ.
ໂດຍເປັນໜຶ່ງໃນບັນດາສະມາຊິກກໍ່ຕັ້ງຂອງເວທີປາໃສນີ້, ຫວຽດນາມໄດ້ເຂົ້າຮ່ວມກອງປະຊຸມປຶກສາຫາລືໂບອ່າຍ ຂັ້ນລັດຖະບານຫຼາຍເທື່ອແລ້ວ ແລະ ໄດ້ປະກອບສ່ວນຫຼາຍຢ່າງໃຫ້ແກ່ບັນດາກອງປະຊຸມດັ່ງກ່າວ. ກອງປະຊຸມປຶກສາຫາລືໂບອ່າຍ 2016 ອີກເທື່ອໜຶ່ງເປັນໂອກາດດີເພື່ອໃຫ້ຫວຽດນາມສືບຕໍ່ຍົກສູງບົດບາດຂອງຕົນໃນພູມິພາກ, ຊອກຮູ້ ເຈລະຈາ ແບ່ງປັນຄວາມຄິດເຫັນກັບບັນດາການນຳໂລກ ແລະ ພູມິພາກ ກ່ຽວກັບການປ່ຽນແປງຕ່າງໆ ໃນບັນດາບັນຫາ ເສດຖະກິດ ການເງິນ ການສຶກສາ ສິ່ງແວດລ້ອມ ວິທະຍາສາດ-ເຕັກນິກ ເພື່ອປະກອບສ່ວນນຳເອົາຮູບພາບປະເທດຫວຽດນາມທີ່ຂະຫຍັນຂັນເຄື່ອນ ມີຄວາມສາມາດບົ່ມຊ້ອນທີ່ອຸດົມສົມບຸນ, ປ່ຽນແປງໃໝ່ ແລະ ພະຍາຍາມເຊື່ອມໂຍງເສດຖະກິດພູມິພາກແລະເສດຖະກິດໂລກຢ່າງແຂງແຮງ ມາໃຫ້ເວທີປາໄສນີ້.
ກ່າວປາໄສທີ່ພິທີເປີດກອງປະຊຸມ ທ່ານຟ້າມບິ່ງມິງ ຮອງນາຍົກລັດຖະມົນຕີແຫ່ງ ສສ.ຫວຽດນາມ ໄດ້ຊີ້ແຈງວ່າ ອາຊີມີຫຼາຍໂອກາດເພື່ອສືບຕໍ່ບືນຕົວຂຶ້ນຢ່າງແຂງແຮງ, ແຕ່ພວມປະເຊີນໜ້າກັບສິ່ງທ້າທາຍຫຼາຍຢ່າງ, ດັ່ງນັ້ນ ອາຊີຄວນຖືເອົາການປ່ຽນແປງໃໝ່ແລະຫົວຄິດປະດິດສ້າງ ເປັນແຮງຊຸກດັນຕົ້ນຕໍ່ເພື່ອພັດທະນາແບບຍືນຍົງ. ການທີ່ບັນດາປະເທດອາຊີກຳລັງຍູ້ແຮງການປະຕິຮູບ, ຈັດວາງໂຄງປະກອບເສດຖະກິດຄືນໃໝ່, ພັດທະນາວິທະຍາສາດ-ເຕັກນິກ ແລະ ແຫຼ່ງບຸກຄະລາກອນມີຄຸນນະພາບສູງ ເພື່ອກໍ່ສ້າງລະບົບເສດຖະກິດທີ່ປະດິດສ້າງນັ້ນ ເປັນທິດທາງທີ່ເໝາະສົມ. ທ່ານຮອງນາຍົກລັດຖະມົນຕີໃຫ້ທັດສະນະວ່າ ບັນດາປະເທດອາຊີຄວນຍາດແຍ່ງເອົາແຮງຊຸກດັນແລະເທສະພັດທະນາໃໝ່ຕ່າງໆ ໂດຍຜ່ານການເພີ່ມທະວີການເຊື່ອມຕໍ່ເສດຖະກິດພູມິພາກໃນຂອບສອງຝ່າຍ, ຮ່ວມມືອະນຸພາກພື້ນ, ປະຊາຄົມອາຊຽນ, ສັນຍາຄູ່ຮ່ວມມືເສດຖະກິດຮອບດ້ານໃນພູມິພາກ...
ຄຽງຄູ່ກັນນັ້ນ, ທ່ານຮອງນາຍົກລັດຖະມົນຕີ ຟ້າມບິ່ງມິງ ໄດ້ເນັ້ນເຖິງຄວາມສຳຄັນຂອງການເພີ່ມທະວີການຮ່ວມມືພັດທະນາແບບຍືນຍົງ, ພິເສດແມ່ນຮ່ວມມືເພື່ອຮັບມືກັບສິ່ງທ້າທາຍຍ້ອນການປ່ຽນແປງສະພາບພູມິອາກາດ, ຄວາມໝັ້ນຄົງດ້ານສະບຽງອາຫານ, ຄວາມໝັ້ນຄົງດ້ານພະລັງງານ ແລະ ແຫຼ່ງນ້ຳ; ທ່ານກໍ່ໄດ້ໃຫ້ຮູ້ວ່າ ນີ້ແມ່ນຄວາມຮຽກຮ້ອງອັນຈຳເປັນຍິ່ງ, ພ້ອມທັງເປັນກຳລັງແຮງອັນສຳຄັນເພື່ອຊຸກຍູ້ການພັດທະນາແບບຍືນຍົງຂອງແຕ່ລະປະເທດ ກໍ່ຄືຂອງທົ່ວພູມິພາກ.
ຕາມທັດສະນະຂອງທ່ານຮອງນາຍົກລັດຖະມົນຕີ ຟ້າມບິ່ງມິງ ປັບປຸງສິ່ງແວດລ້ອມແຫ່ງສັນຕິພາບ ແລະ ສະຖຽມລະພາບ ເປັນປະຖົມປັດໃຈທີ່ບໍ່ອາດຂາດໄດ້ ສຳລັບການພັດທະນາຂອງອາຊີ; ທຸກຄວາມຂັດແຍ່ງ, ຊ່ວງຊິງກັນຕ້ອງໄດ້ແກ້ໄຂດ້ວຍສັນຕິວິທີ, ປະຕິບັດຕາມກົດໝາຍສາກົນ. ທ່ານຮອງນາຍົກລັດຖະມົນຕີ ຍັງຢືນຢັນວ່າ ຫວຽດນາມຍາມໃດກໍ່ພະນາຍາມຮ່ວມືກັບປະເທດຕ່າງໆ ຕາມຈິດໃຈຄູ່ຮ່ວມືຍຸດທະສາດ, ເຄົາລົບນັບຖື ເຊື່ອໝັ້ນເຊິ່ງກັນແລະກັນ ແລະ ພ້ອມກັນແບ່ງປັນຄວາມຮັບຜິດຊອບຕໍ່ບັນດາບັນຫາຮ່ວມກັນຂອງໂລກ ແລະ ພູມິພາກ.
ກອງປະຊຸມປຶກສາຫາລືໂບອ່າຍ ໄດ້ອັດລົງດ້ວຍຂໍ້ສະເໜີ ແລະ ຄວາມຄິດລິເລີ່ມໃໝ່ຫຼາຍປະການ ແນໃສ່ຊຸກຍູ້ການຮ່ວມມືພູມິພາກ, ຊອກຫາບັນດາກຳລັງຊຸກດັນຄວາມເຕີບໂຕໃໝ່ ໃຫ້ແກ່ເສດຖະກິດໂລກ, ຊຸກຍູ້ການພັດທະນາຂອງວິສາຫະກິດໃນຍຸກສະໃໝໂລກາພິວັດຢ່າງແຂງແຮງ... ກອງປະຊຸມປຶກສາຫາລືໂບອ່າຍ 2016 ໄດ້ນຳເອົາຄວາມຫວັງ ວິໃສທັດໃໝ່ໃຫ້ແກ່ອະນາຄົດຂອງອາຊີ ດ້ວຍຄຳໝັ້ນສັນຍາລະຫວ່າງບັນດາປະເທດ ກ່ຽວກັບການຊຸກຍູ້ການພົວພັນຮ່ວມມືມິດຕະພາບອັນດີງາມ, ຊຸກຍູ້ການເຕີບໂຕເສດຖະກິດ, ເຊື່ອມໂຍງພູມິພາກ, ເຊື່ອມຕໍ່ຄວາມສາມາດການຜະລິດ, ເອົາໃຈໃສ່ການພັດທະນາເສດຖະກິດເປີດປະຕູແລະປົກຄຸມ, ສົ່ງເສີມການປ່ຽນແປງໃໝ່ ແລະ ຫົວຄິປະດິດສ້າງ ແນ່ໃສ່ສ້າງກຳລັງຊຸກດັນໃຫ້ແກ່ການພັດທະນາໃໝ່./.
ສັງລວມໂດຍ ເຟືອງຈ່າ
