ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ຢ້ຽມຢາມ ສາທາລະນະລັດ ສັງຄົມນິຍົມ ຫຽດນາມ ຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານ ສູນກາງ ພັກກອມມູນິດ ຫວຽດນາມ ແລະ ສະຫາຍ ເຈິ່ນດ້າຍກວາງ ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງ ພັກປະຊາຊົນ ປະຕິວັດ ລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະຜູ້ແທນຂັ້ນສູງ ພັກ - ລັດ ດຳເນີນການຢ້ຽມຢາມ ສັນຖະວະໄມຕີ ສສ ຫວຽດນາມ ຢ່າງເປັນທາງການ ແຕ່ວັນທີ 25 - 27 ເມສາ 2016.
ສະຫາຍ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ກວດແຖວກອງກຽດຕິຍົດ ກອງທັບປະຊາຊົນຫວຽດນາມ (ພາບ: TTXVN)
ຕອນເຊົ້າວັນທີ 25 ເມສາ 2016, ທີ່ທຳນຽບປະທານປະເທດຫວຽດນາມ, ສະຫາຍຫງວຽນຝູຈ້ອງ ເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ ໄດ້ເປັນເຈົ້າພາບ ຈັດພິທີຕ້ອນຮັບ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ຢ່າງສົມກຽດຕາມພິທີການຕ້ອນຮັບສູງສຸດສຳລັບປະມຸກລັດ.
ໃນກອບການຢ້ຽມຢາມ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ພົບປະຫາລືກັບສະຫາຍ ຫງວຽນຝູຈ້ອງ ເລຂາທິການໃຫຍ່; ພົບປະກັບສະຫາຍ ເຈິ່ນດ້າຍກວາງ ປະທານປະເທດ, ສະຫາຍ ຫງວຽນຊວນຝຸກ ນາຍົກລັດຖະມົນຕີ, ສະຫາຍນາງ ຟ້າມທິກິມເງິນ ປະທານສະພາແຫ່ງຊາດ; ຢ້ຽມຢາມແລະໂອ້ລົມກັບພະນັກງານ, ນັກຮຽນ ສະຖາບັນການເມືອງແຫ່ງຊາດໂຮ່ຈີມິນ; ຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນສະມາຄົມມິດຕະພາບຫວຽດນາມ - ລາວ ພ້ອມດ້ວຍຄະນະຕິດຕໍ່ສະມາຄົມອະດິດຊ່ຽວຊານ ແລະ ທະຫານອາສາສະໝັກຫວຽດນາມທີ່ເຄື່ອນໄຫວຢູ່ລາວ; ໃຫ້ການຕ້ອນຮັບສະຫາຍ ດິງລາທັງ ເລຂາຄະນະພັກນະຄອນໂຮ່ຈີມິນ.
ໃນການພົບປະສອງຝ່າຍ, ບັນດາການນຳຂັ້ນສູງຫວຽດນາມ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນແລະສົມກຽດ ຕໍ່ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ພ້ອມຄະນະຜູ້ແທນຂັ້ນສູງພັກ - ລັດ ແຫ່ງ ສປປ ລາວ ທີ່ມາຢ້ຽມຢາມສັນທະວະໄມຕີປະເທດຫວຽດນາມຢ່າງເປັນທາງການ; ສະແດງຄວາມຄຳນັບຊົມເຊີຍຢ່າງສຸດອົກສຸດໃຈ ຕໍ່ຜົນສຳເລັດອັນໃຫຍ່ຫຼວງໃນການດຳເນີນກອງປະຊຸມໃຫຍ່ຄັ້ງທີ X ຂອງ ພັກປະຊາຊົນ ປະຕິວັດລາວ ແລະ ການເລືອກຕັ້ງສະມາຊິກສະພາແຫ່ງຊາດຊຸດທີ VIII ຂອງລາວ ພ້ອມທັງສະແດງຄວາມຊົມເຊີຍຢ່າງຈິງໃຈ ຕໍ່ສະຫາຍ ບຸນຍັງ ວໍລະຈິດ ທີ່ໄດ້ຮັບການແຕ່ງຕັ້ງເປັນເລຂາທິການໃຫຍ່ ຄະນະບໍລິຫານງານສູງກອງພັກ, ປະທານປະເທດແຫ່ງ ສປປ ລາວ. ບັນດາການນຳຂັ້ນສູງຫວຽດນາມ ກໍໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໄຕ້ການນຳພາຂອງພັກປະຊາຊົນ ປະຕິວັດລາວ ທີ່ມີສະຫາຍ ບຸນຍັງ ວໍລະຈິດ ເປັນຜູ້ນຳພາ, ປະຊາຊົນລາວອ້າຍນ້ອງ ຈະໄດ້ຮັບຜົນສຳເລັດອັນໃຫຍ່ຫຼວງ ໃນການປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ແລະ ແຜນການພັດທະນາເສດຖະກິດ - ສັງຄົມແຫ່ງຊາດຄັ້ງທີ VIII (2016 - 2020), ກໍ່ສ້າງປະເທດລາວໃຫ້ມີສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນຕາມເປົ້າໝາຍສັງຄົມນິຍົມຢ່າງແນ່ນອນ.
ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ສະແດງຄວາມດີໃຈທີ່ສຸດທີ່ໄດ້ນຳຄະນະຜູ້ແທນຂັ້ນສູງພັກ - ລັດລາວ ມາຢ້ຽມຢາມປະເທດຫວຽດນາມຢ່າງເປັນທາງການ ທ່າມກາງບັນຍາກາດທີ່ສອງພັກຫາກໍ່ດຳເນີນກອງປະຊຸມໃຫຍ່ດ້ວຍຜົນສຳເລັດຢ່າງຈົບງາມ, ຫວຽດນາມກຳລັງກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ XIV, ສະເຫຼີມສະຫຼອງ 41 ປີແຫ່ງການປົດປ່ອຍພາກໃຕ້ ໂຮມປະເທດຊາດເປັນເອກະພາບ, ສະເຫຼີມສະຫຼອງວັນຄ້າຍວັນເກີດຂອງທ່ານປະທານໂຮ່ຈີມິນຄົບຮອບ 126 ປີ; ສະຫາຍ ບຸນຍັງ ວໍລະຈິດ ໃຫ້ຮູ້ວ່າ, ຫວຽດນາມເປັນປະເທດທຳອິດທີ່ສະຫາຍມາຢ້ຽມຢາມ ພາຍຫຼັງທີ່ໄດ້ຮັບການເລືອກຕັ້ງເປັນເລຂາທິການໃຫຍ່ ປະທານປະເທດແຫ່ງ ສປປ ລາວ ເຊິ່ງສະແດງໃຫ້ເຫັນວ່າ ພັກ - ລັດລາວ ແລະ ສ່ວນຕົວສະຫາຍເອງ ໄດ້ໃຫ້ຄວາມສຳຄັນເປັນພິເສດເຖິງການປົກປັກຮັກສາ ແລະ ເພີ່ມພູນຄູນສ້າງໄມຕີຈິດມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ - ຫວຽດນາມ. ສະຫາຍ ບຸນຍັງ ວໍລະຈິດ ເນັ້ນວ່າ, ຫວຽດນາມຍາມໃດກໍ່ເປັນເພື່ອນມິດທີ່ໄວ້ເນື້ອເຊື່ອໃຈ ສະໜິດສະໜົມຂອງປະຊາຊົນລາວ ພ້ອມທັງສະແດງຄວາມເຊື່ອໝັ້ນວ່າ ພາຍໃຕ້ການນຳພາຂອງພັກກອມມູນິດຫວຽດນາມ, ປະຊາຊົນຫວຽດນາມຈະສືບຕໍ່ຍາດໄດ້ຜົນງານໃໝ່ທີ່ໃຫຍ່ຫຼວງກວ່າອີກ ແລະ ໄດ້ຮັບຜົນສຳເລັດໃນການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ປະຕິບັດເປົ້າໝາຍສ້າງປະເທດຫວຽດນາມເປັນປະເທດອຸດສາຫະກຳຕາມທິດທັນສະໃໝໂດຍພື້ນຖານ ໃຫ້ສຳເລັດໂດຍໄວ, ຍົກສູງຖານະບົດບາດຂອງຫວຽດນາມໃນພາກພື້ນ ແລະ ໃນໂລກ.
ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ສະຫາຍ ຫງວຽນຝູຈ້ອງ ທີ່ສືບຕໍ່ໄດ້ຮັບຄວາມເຊື່ອຖື ເລືອກຕັ້ງເປັນເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດຫວຽດນາມ ສະໄໝປີ 2016 - 2021, ຊົມເຊີຍສະຫາຍ ເຈິ່ນດ້າຍກວາງ ທີ່ໄດ້ຮັບການເລືອກຕັ້ງເປັນປະທານປະເທດແຫ່ງ ສສ ຫວຽດນາມ ຈາກກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຊຸດທີ XIII, ຊົມເຊີຍສະຫາຍ ຫງວຽນຊວນຝຸກ ທີ່ໄດ້ຮັບຄວາມເຊື່ອຖືຈາກສະພາແຫ່ງຊາດ ເລືອກຕັ້ງເປັນນາຍົກລັດຖະມົນຕີແຫ່ງ ສສ ຫວຽດນາມ; ຊົມເຊີຍສະຫາຍນາງ ຫງວຽນທິກິມເງິນ ທີ່ໄດ້ຮັບຄວາມເຊື່ອຖືຈາກສະພາແຫ່ງຊາດ ເລືອກຕັ້ງເປັນປະທານສະພາແຫ່ງຊາດ ແຫ່ງ ສສ ຫວຽດນາມ; ພ້ອມນັ້ນ ສະຫາຍ ບຸນຍັງວໍລະຈິດ ເລຂາທິການໃຫຍ່ກໍໄດ້ສະແດງຄວາມຂອບອົກຂອບໃຈມາຍັງບັນດາການນຳ ແລະ ປະຊາຊົນຫວຽດນາມ ທີ່ໄດ້ໃຫ້ການຕ້ອນຮັບຢ່າງສົມກຽດແລະອົບອຸ່ນ ແກ່ຄະນະຜູ້ແທນຂັ້ນສູງພັກ - ລັດແຫ່ງ ສປປ ລາວ.
ບັນດາ
ການພົບປະຫາລືສອງຝ່າຍໄດ້ນຳມາເຊິ່ງຜົນສຳເລັດທີ່ຈົບງາມ
ເຊິ່ງສະແດງໃຫ້ເຫັນເຖິງມູນເຊື້ອແຫ່ງຄວາມສາມັກຄີທີ່ສະໜິດແໜ້ນເປັນ
ພິເສດ ລະຫວ່າງ ພັກ, ລັດ, ປະຊາຊົນສອງປະເທດລາວ - ຫວຽດນາມ.
ສະຫາຍ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ກວດແຖວກອງກຽດຕິຍົດ ກອງທັບປະຊາຊົນຫວຽດນາມ (ພາບ: TTXVN)
ຕອນເຊົ້າວັນທີ 25 ເມສາ, ໃນການພົບປະຫາລືສອງຝ່າຍຢູ່ສຳນັກງານສູນກາງພັກ, ໂດຍຕາງໜ້າພັກ - ລັດ ແລະ ປະຊາຊົນສອງປະເທດຫວຽດນາມ ແລະ ລາວ, ສະຫາຍເລຂາທິການໃຫຍ່ ຫງວຽນຝູຈ້ອງ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ຕີລາຄາສູງຕໍ່ການສະໜັບສະໜູນ ຊ່າວເຫຼືອອັນປະເສີດໃຫຍ່ຫຼວງ ເຕັມໄປດ້ວຍມິດຈິດມິດໃຈ ແລະ ມີປະສິດທິຜົນ ທີ່ສອງພັກ, ສອງລັດ ແລະ ປະຊາຊົນສອງປະເທດໄດ້ຊ່ວຍເຫຼືອໃຫ້ແກ່ກັນ ໃນພາລະກິດການຕໍ່ສູ້ປົດປ່ອຍຊາດ ໂຮມປະເທດຊາດເປັນເອກະລາດກ່ອນໜ້ານີ້ ກໍຄືໃນການສ້າງສາພັດທະນາ ແລະ ປົກປັກຮັກສາປະເທດຊາດໃນປັດຈຸບັນ. ການນຳທັງສອງໄດ້ຢືນຢັນ ໃນບໍ່ວ່າສະພາບການໃດ, ສອງພັກ ແລະ ປະຊາຊົນສອງປະເທດ ກໍຈະຄຽງບ່າຄຽງໄຫຼ່ກັນປົກປັກຮັກສາ ແລະ ເພີ່ມພູນຄູນສ້າງຄວາມສາມັກຄີພິເສດຫວຽດນາມ - ລາວ ໃຫ້ແຕກດອກອອກໝາກ, ໝັ້ນຄົງຕະຫຼອດການ.
ການນຳຂອງສອງປະເທດໄດ້ແລກປ່ຽນຄວາມຄິດຄວາມເຫັນ ແລະ ເປັນເອກະພາບກັນໃຫ້ທັດສະນະວ່າ, ໃນປີ 2016 ແລະຊຸມປີຕໍ່ໄປ, ພາລະກິດການປ່ຽນແປງໃໝ່, ກໍ່ສ້າງແລະປົກປັກຮັກສາປະເທດຊາດຂອງປະຊາຊົນສອງຊາດ ຍັງຈະມີຄວາມຫຍຸ້ງຍາກ ສິ່ງທ້າທາຍຫຼາຍຢ່າງ, ມີຫຼາຍບັນຫາໃໝ່ຕັ້ງອອກມາ ເຊິ່ງຮຽກຮ້ອງໃຫ້ສອງຝ່າຍຕ້ອງມີການປະສານສົມທົບກັນຢ່າງແໜ້ນແຟ້ນ ແລະ ມີປະສິດທິຜົນ ໃນການຜັນຂະຫຍາຍປະຕິບັດ ມະຕິກອງປະຊຸມໃຫຍ່ຂອງແຕ່ລະພັກ ແລະ ປະຕິບັດແຜນຍຸດທະສາດການພັດທະນາຂອງແຕ່ລະປະເທດ ໃຫ້ປະກົດຜົນເປັນຈິງ. ຕາມນັ້ນ, ສອງຝ່າຍເຫັນດີເປັນເອກະພາບຈະຍູ້ແຮງການພົວພັນຮ່ວມມືຮອບດ້ານລະຫວ່າງຫວຽດນາມ - ລາວ ບົນພື້ນຖານເສີມຂະຫຍາຍຈິດໃຈເອກະລາດແຫ່ງຊາດ, ເປັນເຈົ້າຕົນເອງ, ຮ່ວມມືສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ໃຫ້ບຸລິມະສິດ ເອື້ອເຟື້ອເກື້ອກູນໃຫ້ແກ່ກັນ, ຊ່ວຍເຫຼືອແລະອຳນວຍຄວາມສະດວກໃຫ້ກັນພ້ອມກັນພັດທະນາ ເພື່ອຄວາມຈະເລີນພັດທະນາຂອງແຕ່ລະປະເທດ, ເພື່ອສັນຕິພາບ ສະຖຽນລະພາບ ການຮ່ວມມື ແລະ ຄວາມພັດທະນາຢູ່ອາຊີຕາເວັນອອກສຽງໃຕ້ ແລະ ໃນໂລກ. ສອງຝ່າຍເນັ້ນເຖິງການສືບຕໍ່ຍົກສູງຄຸນນະພາບຂອງການເຄື່ອນໄຫວແລກປ່ຽນທິດສະດີ ແລະ ບົດຮຽນປະສົບການກ່ຽວກັບການກໍ່ສ້າງພັກ, ຄຸ້ມຄອງບໍລິຫານລັດ, ຄຸ້ມຄອງເສດຖະກິດ - ສັງຄົມ ແລະ ບັນດາມາດຕະການຜັນຂະຫຍາຍປະຕິບັດມະຕິກອງປະຊຸມໃຫຍ່; ສົມທົບກັນຍູ້ແຮງການໂຄສະນາອົບຮົມກ່ຽວກັບມູນເຊື້ອແຫ່ງຄວາມສາມັກຄີພິເສດຫວຽດນາມ - ລາວ ໃຫ້ພະນັກງານ ສະມາຊິກພັກ ແລະ ປະຊາຊົນ, ເປັນຕົ້ນແມ່ນຮຸ່ນຄົນໜຸ່ມນ້ອຍ ຂອງສອງປະເທດ.
ສອງຝ່າຍຢືນຢັນຈະສືບຕໍ່ສົມທົບກັນຢ່າງແໜ້ນແຟ້ນໃນບັນດາບັນຫາສາກົນ ແລະ ພາກພື້ນ, ໃນການເຄື່ອນໄຫວຢູ່ທີ່ເວທີປາໄສພະຫຸພາຄີ, ປະກອບສ່ວນອັນຕັ້ງໜ້າເຂົ້າໃນການກໍ່ສ້າງປະຊາຄົມອາຊຽນໃຫ້ໝັ້ນຄົງເຂັ້ມແຂງ; ສົມທົບນຳກັນ ແລະ ສົມທົບກັບບັນດາປະເທດ ບັນດາອົງການຈັດຕັ້ງ ໃນການຄຸ້ມຄອງແລະນຳໃຊ້ແຫຼ່ງນ້ຳແມ່ນ້ຳຂອງແບບຍືນຍົງ ແລະ ມີປະສິດທິຜົນ; ສົມທົບປະຕິບັດບັນດາໂຄງການຮ່ວມມືໃນເຂດສາມຫຼ່ຽມພັດທະນາກຳປູເຈຍ - ລາວ - ຫວຽດນາມ ໃຫ້ປະກົດຜົນເປັນຈິງ; ຫວຽດນາມສະໜັບສະໜູນ ແລະ ແບ່ງປັນບົດຮຽນກັບຝ່າຍລາວ ເພື່ອໃຫ້ລາວປະຕິບັດໜ້າທີ່ເປັນປະທານໝູນວຽນອາຊຽນໃນປີ 2016 ຢ່າງສຳເລັດຜົນ. ກ່ຽວກັບສະພາບການຢູ່ທະເລຕາເວັນອອກ, ສອງຝ່າຍສະແດງຄວາມເປັນຫ່ວງເປັນໄຍກ່ຽວກັບສະພາບຄວາມເຄັ່ງຕືງ ຢູ່ທະເລຕາເວັນອອກໃນປັດຈຸບັນ ແລະ ເນັ້ນເຖິງຄວາມສຳຄັນຂອງການປົກປັກຮັກສາສັນຕິພາບ ສະຖຽນລະພາບ ຄວາມສະຫງົບ ຄວາມປອດໄພ ຢູ່ທະເລຕາເວັນອອກ; ສອງຝ່າຍເຫັນດີເປັນເອກະພາບຈະຊຸກຍູ້ການແກ້ໄຂຂໍ້ພິພາດຢູ່ທະເລຕາເວັນອອກດ້ວຍສັນຕິວິທີ ບົນພື້ນຖານກົດໝາຍສາກົນ; ພ້ອມກັນກັບບັນດາຝ່າຍທີ່ກ່ຽວ ປະຕິບັດ ຖະແຫຼງການກ່ຽວກັບວິທີການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ, ແລະບັນລຸປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ ເພື່ອແນໃສ່ຮັກສາສັນຕິພາບ ສະຖຽນລະພາບ ຄວາມສະຫງົບ ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ. ສະຫາຍບຸນຍັງ ວໍລະຈິດ ເລຂາທິການໃຫຍ່ ປະທານປະເທດລາວ ຖືເປັນກຽດເຊື້ອເຊີນສະຫາຍເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ ພ້ອມດ້ວຍພັນລະຍາ ໄປຢ້ຽມຢາມສັນທະວະໄມຕີປະເທດ ສປປ ລາວ ຢ່າງເປັນທາງການ. ສະຫາຍ ຫງວຽນຝູຈ້ອງ ສະແດງຄວາມຂອບອົກຂອບໃຈ ແລະຍີນດີຮັບຄຳເຊີນ.
ສະຫາຍ ເຈິ່ນດ້າຍກວາງ ປະທານປະເທດຫວຽດນາມ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ. (ພາບ: TTXVN)
ຕອນເຊົ້າວັນທີ 26 ເມສາ, ຢູ່ທີ່ທຳນຽບປະທານປະເທດ, ສະຫາຍ ເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ ໄດ້ພົບປະເຈລະຈາກັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ. ສະຫາຍປະທານປະເທດ ເຈິ່ນດ້າຍກວາງ ສະແດງຄວາມຊົມເຊີຍຢ່າງສຸດໃຈຕໍ່ບັນດາຜົນສຳເລັດອັນໃຫຍ່ຫຼວງຮອບດ້ານ ແລະມີຄວາມໝາຍຍຸດທະສາດ ທີ່ພັກ ລັດ ແລະ ປະຊາຊົນລາວຍາດມາໄດ້ໃນ 30 ປີແຫ່ງການປ່ຽນແປງໃໝ່; ສະແດງຄວາມດີອົກດີໃຈທີ່ເຫັນວ່າ ໃນຊຸມປີທີ່ຜ່ານມາຄວາມພົວພັນສາມັກຄີພິເສດຫວຽດນາມ - ລາວ ສືບຕໍ່ຂະຫຍາຍຕົວຢ່າງແຂງແຮງ ແລະມີປະສິດທິຜົນ; ສະຫາຍຢືນຢັນ ຫວຽດນາມຍາມໃດກໍ່ໃຫ້ຄວາມສຳຄັນແກ່ການຮ່ວມມືລະຫວ່າງສອງພັກ ສອງລັດ ເຊິ່ງເປັນຊັບສົມບັດອັນລ້ຳຄ່າ ແລະ ມີຄວາມໝາຍເປັນຕາຍສຳລັບພາລະກິດການປະຕິວັດຂອງຫວຽດນາມ ກໍ່ຄືລາວ.
ສະຫາຍ ເຈິ່ນດ້າຍກວາງ ແລະ ສະຫາຍ ບຸນຍັງ ວໍລະຈິດ ໄດ້ພ້ອມກັນແລກປ່ຽນກ່ຽວກັບທິດທາງເພີ່ມທະວີການຮ່ວມມືຫວຽດນາມ - ລາວ ໃນເວລາຕໍ່ໜ້າ; ສົມທົບກັນຈັດຕັ້ງປະຕິບັດສັນຍາຮ່ວມມື ແລະ ບັນດາຂໍ້ຕົກລົງຂັ້ນສູງຂອງກອງປະຊຸມຄະນະກຳມະການຮ່ວມມືລະຫວ່າງລັດຖະບານ ຄັ້ງທີ 38 ໃຫ້ປະກົດຜົນເປັນຈິງ. ປີ 2017, ສອງປະເທດຈະຈັດຕັ້ງການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 55 ປີ ແລະ ສະເຫຼີມສະຫຼອງວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 40 ປີ. ນີ້ເປັນໂອກາດອັນສຳຄັນ ເພື່ອໃຫ້ສອງປະເທດຊຸກຍູ້ເສີມຂະຫຍາຍຢ່າງແຂງແຮງ ການຮ່ວມມືລະຫວ່າງສອງປະເທດໃນຂົງເຂດຕ່າງໆ, ເປັນຕົ້ນແມ່ນຮ່ວມມືທາງດ້ານເສດຖະກິດ ການຄ້າ ແລະ ການລົງທຶນ ບົນພື້ນຖານຄວາມສາມາດບົ່ມຊ້ອນ ແລະ ທ່າແຮງຂອງແຕ່ລະປະເທດ, ສອດຄ່ອງກັບຜົນປະໂຫຍດຮ່ວມກັນຂອງປະຊາຊົນສອງປະເທດ.
ໃນໂອກາດນີ້, ສະຫາຍ ເຈິ່ນດ້າຍກວາງ ປະທານປະເທດຫວຽດນາມ ໄດ້ສະແດງຄວາມຂອບອົກຂອບໃຈຕໍ່ການແບ່ງປັນຊ່ວຍເຫຼືອອັນລ້ຳຄ່າ ທີ່ພັກ ລັດ ແລະປະຊາຊົນລາວໄດ້ຊ່ວຍໃຫ້ປະຊາຊົນຫວຽດນາມຢູ່ບັນດາແຂວງທີ່ຖືກເສຍຫາຍຍ້ອນໄພແຫ້ງແລ້ງ ແລະ ນ້ຳເຄັມຄຸກຄາມ ໃນເຂດທົ່ງພຽງແມ່ນ້ຳຂອງ ແລະ ໄຕງວຽນຂອງຫວຽດນາມ ເຊິ່ງສະແດງໃຫ້ເຫັນຢ່າງມີຊີວິດຊີວາເຖິງຄວາມຮັກແພງຊ່ວຍເຫຼືອເຊິ່ງກັນແລະກັນ ແຫ່ງຄວາມສາມັກຄີພິເສດລາວ - ຫວຽດນາມ.
ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ເນັ້ນເຖິງຄວາມສຳຄັນ ແລະ ຕີລາຄາສູງຕໍ່ຄວາມພົວພັນລາວ - ຫວຽດນາມ, ຫວຽດນາມ - ລາວ ເຊິ່ງໃນບໍ່ວ່າສະພາບການໃດກໍມີບາດກ້າວຂະຫຍາຍຕົວຢ່າງແຂງແຮງໃນທຸກຂົງເຂດ ການເມືອງ ເສດຖະກິດ ສັງຄົມ ການປ້ອງກັນຊາດ-ປ້ອງກັນຄວາມສະຫງົບ. ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ເຊື້ອເຊີນສະຫາຍປະທານປະເທດ ເຈິ່ນດ້າຍກວາງ ພ້ອມດ້ວຍພັນະຍາ ໄປຢ້ຽມຢາມສັນທະວະໄມຕີປະເທດລາວຢ່າງເປັນທາງການໃນໄວໆນີ້. ສະຫາຍປະທານປະເທດ ເຈິ່ນດ້າຍກວາງ ສະແດງຄວາມຂອບອົກຂອບໃຈ ແລະ ຍິນດີຈະກຽມການຢ້ຽມຢາມໃນເວລາທີ່ເໝາະສົມ.
ສະຫາຍ ຫງວຽນຊວນຝຸກ ນາຍົກລັດຖະມົນຕີແຫ່ງ ສສ ຫວຽດນາມ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ແລະ ບັນດາຜູ້ແທນທີ່ຮ່ວມການພົບປະ
(ພາບ: TTXVN)
ໃນການພົບປະກັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ, ສະຫາຍ ຫງວຽນຊວນຝຸກ ຕາງໜ້າລັດຖະບານແຫ່ງ ສສ ຫວຽດນາມຫວຽດນາມ ໄດ້ສະແດງຄວາມປິຕິຍິນດີກ່ຽວກັບການຂະຫຍາຍຕົວຢ່າງດີງາມ ຂອງຄວາມພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງຫວຽດນາມ - ລາວ ໃນເວລາທີ່ຜ່ານມາ. ສອງປະເທດໄດ້ປະສານສົມທົບກັນ ແລະ ບັນລຸໄດ້ຫຼາຍເປົ້າໝາຍທີ່ສຳຄັນໃນແຜນຍຸດທະສາດການຮ່ວມມືດ້ານເສດຖະກິດ ວັດທະນະທຳ ວິທະຍາສາດ - ເຕັກນິກ ລະຫວ່າງຫວຽດນາມ - ລາວ ສົກປີ 2011 - 2020, ພິເສດແມ່ນໄດ້ສຳເລັດສັນຍາຮ່ວມມືຫວຽດນາມ - ລາວ ສົກປີ 2011 - 2015 ຢ່າງຈົບງາມ.
ສະຫາຍ ຫງວຽນຊວນຝຸກ ໄດ້ແຈ້ງໃຫ້ສະຫາຍ ບຸນຍັງ ວໍລະຈິດ ຊາບກ່ຽວກັບບາງຈຸດທີ່ພົ້ນເດັ່ນດ້ານເສດຖະກິດ - ສັງຄົມຂອງຫວຽດນາມໃນເວລາທີ່ຜ່ານມາມໍ່ນີ້ ແລະ ຢືນຢັນລັດຖະບານຫວຽດນາມຈະສືບຕໍ່ພະຍາຍາມຈົນສຸດຄວາມສາມາດຂອງຕົນ ແລະ ສົມທົບແໜ້ນແຟ້ນກັບລັດຖະບານລາວ ໃນການເພີ່ມພູນຄູນສ້າງສາຍພົວພັນມິດຕະພາບ ຄວາມຮ່ວມມືອັນເປັນມູນເຊື່ອທີ່ດີງາມລະຫວ່າງສອງຊາດຫວຽດນາມ - ລາວ ໃຫ້ຂະຫຍາຍຕົວ ແຕກດອກອອກຜົນ, ນຳເອົາຜົນປະໂຫຍດຕົວຈິງມາໃຫ້ປະຊາຊົນສອງປະເທດ, ພິເສດແມ່ນປະຕິບັດ ບັນດາກົນໄກຮ່ວມມືທີ່ການນຳຂັ້ນສູງຂອງສອງປະເທດໄດ້ຮັບຮອງຜ່ານ ກໍຄືຂໍ້ຕົກລົງຂອງກອງປະຊຸມຄະນະກຳມະການຮ່ວມມືລະຫວ່າງລັດຖະບານ ຄັ້ງທີ 38 ໃຫ້ປະກົດຜົນເປັນຈິງ, ເຊິ່ງໃນນັ້ນ ສຸມໃສ່ຜັນຂະຫຍາຍປະຕິບັດສັນຍາຮ່ວມມືສອງຝ່າຍຫວຽດນາມ - ລາວປີ 2016 ແລະ ສົນທິສັນຍາວ່າດ້ວຍການຮ່ວມມືລະຫວ່າງຫວຽດນາມ - ລາວ ສົກປີ 2016 - 2020; ຍູ້ແຮງການຜັນຂະຫຍາຍປະຕິບັດບັນດາໂຄງການລົງທຶນຂອງຫວຽດນາມຢູ່ລາວ, ສົມທົບກັນຍູ້ແຮງການຜັນຂະຫຍາຍແຜນຍຸດທະສາດການຮ່ວມມືຢູ່ສອງແຂວງຫົວພັນ ແລະ ຊຽງຂວາງ, ຂຶ້ນແຜນໂຄງການເຊື່ອມຕໍ່ສອງລະບົບເສດຖະກິດໃຫ້ແລ້ວໂດຍໄວ.
ສະຫາຍ ບຸນຍັງ ວໍລະຈິດ ກໍແຈ້ງໃຫ້ສະຫາຍ ຫງວຽນຊວນຝຸກ ຊາບບາງຈຸດຕົ້ນຕໍກ່ຽວກັບສະພາບການເສດຖະກິດ - ສັງຄົມຂອງລາວ; ທັງຢືນຢັນວ່າ ພັກ-ລັດຖະບານ ກໍຄືປະຊາຊົນລາວ ຢຶດໝັ້ນທີ່ຈະຄຽງບ່າຄຽງໄຫຼ່ກັບພັກ-ລັດຖະບານ ແລະ ປະຊາຊົນຫວຽດນາມອ້າຍນ້ອງ ສືບຕໍ່ປົກປັກຮັກສາ ແລະ ເສີມຂະຫຍາຍ ມູນເຊື້ອແຫ່ງຄວາມສາມັກຄີພິເສດ ການຮ່ວມມືຮອບດ້ານ ລະຫວ່າງລາວ - ຫວຽດນາມ ໃຫ້ນັບມື້ເຂັ້ມແຂງໝັ້ນຄົງ ເພື່ອຄວາມໝັ້ນຄົງໃນພາກພື້ນ ແລະ ສາກົນ; ພ້ອມກັນນັ້ນກໍສະເໜີໃຫ້ລັດຖະບານຂອງສອງປະເທດ ເພີ່ມທະວີການປະສານສົມທົບ ຊີ້ນຳນຳພາການຜັນຂະຫຍາຍປະຕິບັດບັນດາໂຄງການຮ່ວມມື ເພື່ອແນໃສ່ຍູ້ແຮງການພົວພັນເສດຖະກິດ ການຄ້າ ການລົງທຶນຍິ່ງກວ່າອີກ ໃຫ້ສົມຄູ່ກັບຄວາມພົວພັນການເມືອງພິເສດ ລະຫວ່າງສອງພັກ ສອງລັດ ແລະ ປະຊາຊົນສອງປະເທດ.
ສະຫາຍນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ພົບປະກັບສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ (ພາບ: nhandan.com.vn)
ຢູ່ທີ່ຫໍສະພາແຫ່ງຊາດ, ໂດຍຕາງໜ້າສະພາແຫ່ງຊາດ ແລະ ຄະນະກຳມະການປະຈຳສະພາແຫ່ງຊາດ, ສະຫາຍນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ຕີລາຄາສູງຕໍ່ຄວາມໝາຍແຫ່ງການຢ້ຽມຢາມຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ທີ່ ສສ ຫວຽດນາມ ໃນຄັ້ງນີ້ ເປັນເຫດການທີ່ມີຄວາມໝາຍສຳຄັນພິເສດ, ປະກອບສ່ວນເຂົ້າໃນການຊຸກຍູ້ເສີມຂະຫຍາຍສາຍສຳພັນມິດຕະພາບທີ່ເປັນມູນເຊື້ອ ຄວາມສາມັກຄີພິເສດ ສະເໝີຕົ້ນສະເໝີປາຍ ຜ່ອງໃສລະຫວ່າງຫວຽດນາມ - ລາວ. ສະຫາຍນາງ ຫງວຽນທິກິມເງິນ ໄດ້ແຈ້ງໃຫ້ສະຫາຍ ບຸນຍັງ ວໍລະຈິດ ຊາບກ່ຽວກັບຜົນສຳເລັດການດຳເນີນກອງປະຊຸມສະໄໝສາມັນເທື່ອທີ 11 - ກອງປະຊຸມສຸດທ້າຍຂອງສະພາແຫ່ງຊາດຊຸດທີ່ XIII ຂອງຫວຽດນາມ ເຊິ່ງໃນນັ້ນມີການຮັບຮອງຜ່ານບົດສະຫລຸບສັງລວມວຽກງານໃນສະໄໝປະຈຳການ 2011 - 2016 ຂອງສະພາແຫ່ງຊາດ, ເລືອກຕັ້ງປະທານປະເທດ, ເລືອກຕັ້ງນາຍົກລັດຖະມົນຕີ, ຮັບຮອງຜ່ານມະຕິກ່ຽວກັບແຜນການພັດທະນາເສດຖະກິດ - ສັງຄົມ 5 ປີສົກປີ 2016 - 2020; ປັບປຸງບູລະນະບັນດາສັກການນຳຕົ້ນຕໍໃນກົງຈັກແຫ່ງລັດ ເພື່ອແນໃສ່ອຳນວຍຄວາມສະດວກໃຫ້ແກ່ການປະຕິບັດໜ້າທີ່ພັດທະນາເສດຖະກິດ - ສັງຄົມໃນເວລາຕໍ່ໜ້າໃຫ້ໄດ້ຮັບຜົນສຳເລັດເປັນຢ່າງດີ.
ກ່ຽວກັບການພົວພັນຮ່ວມມືລະຫວ່າງສະພາແຫ່ງຊາດສອງປະເທດ, ສະຫາຍນາງ ຫງວຽນທິກິມເງິນ ສະເໜີໃຫ້ເສີມຂະຫຍາຍມູນເຊື້ອ ແລະ ຜົນສຳເລັດທີ່ບັນລຸໄດ້, ໃນເວລາທີ່ຈະມາເຖິງ ສອງຝ່າຍຄວນເພີ່ມທະວີການຮ່ວມມື, ແລກປ່ຽນຂໍ້ມູນຂ່າວສານ ບົດຮຽນປະສົບການໃນຂົງເຂດນິຕິບັນຍັດ, ຕິດຕາມກວດກາ ແລະ ຕັດສິນຕົກລົງບັນດາບັນຫາທີ່ສຳຄັນຂອງປະເທດຊາດ, ໃນນັ້ນ ເອົາໃຈໃສ່ເປັນພິເສດເຖິງການຊີ້ນຳ, ຕິດຕາມກວດກາການປະຕິບັດຂໍ້ຕົກລົງຂັ້ນສູງ ກໍຄືສັນຍາວ່າດ້ວຍການຮ່ວມມືລະຫວ່າງສອງປະເທດ.
ສະຫາຍ ບຸນຍັງ ວໍລະຈິດ ຕີລາຄາສູງການປະສານສົມທົບນັບມື້ນັບແໜ້ນແຟ້ນ, ມີປະສິດທິຜົນລະຫວ່າງສະພາແຫ່ງຊາດສອງປະເທດໃນເວລາທີ່ຜ່ານມາ ທັງສະແດງຄວາມປະສົງຢາກໃຫ້ສະພາແຫ່ງຊາດສອງປະເທດສືບຕໍ່ຍູ້ແຮງ ເພີ່ມທະວີການຮ່ວມມື, ແບ່ງປັນບົດຮຽນປະສົບການນຳກັນ, ປະສານສົມທົບຢ່າງແໜ້ນແຟ້ນໃນບັນດາບັນຫາທີ່ສອງຝ່າຍມີຄວາມສົນໃຈ. ສະຫາຍ ບຸນຍັງ ວໍລະຈິດ ຢືນຢັນວ່າ ປະຊາຊົນລາວຈະສືບຕໍ່ຮັກສາ ແລະເພີ່ມພູນຄູນສ້າງຄວາມສາມັກຄີພິເສດ ການຮ່ວມມືຮອບດ້ານລະຫວ່າງສອງຊາດລາວ - ຫວຽດນາມ ເພື່ອຄວາມສົມບູນພູມສຸກຂອງປະຊາຊົນສອງຊາດ.
ການຢ້ຽມຢາມສັນຖະວະໄມຕີ ສສ ຫວຽດນາມຢ່າງເປັນທາງການ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ສຳເລັດຜົນຢ່າງຈົບງາມ, ປະກອບສ່ວນອັນສຳຄັນເຂົ້າໃນການສືບຕໍ່ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ມູນເຊື້ອທີ່ດີງາມ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງປະເທດລາວ - ຫວຽດນາມ ໃຫ້ຂະຫຍາຍຂຶ້ນສູ້ລະດັບໃໝ່, ເພື່ອຜົນປະໂຫຍດຂອງປະຊາຊົນສອງປະເທດ ລາວ - ຫວຽດນາມ ກໍຄືເພື່ອສັນຕິພາບ ສະຖຽນລະພາບ ການຮ່ວມມື ແລະ ຄວາມພັດທະນາຢູ່ໃນພາກພື້ນ ແລະ ໃນໂລກ./.
ໂດຍ ເຟືອງຈ່າ
