ທ່ານ ບາຣັກ ໂອບາມາ ປະທານາທິບໍດີແຫ່ງ ສະຫະລັດ ອາເມຣິກາ ຢ້ຽມຢາມປະເທດ ຫວຽດນາມຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ເຈິ່ນດ້າຍກວາງ ປະທານປະເທດແຫ່ງ ສສ ຫວຽດນາມ, ແຕ່ວັນທີ 23 - 25 ພຶດສະພາ 2016, ທ່ານ ບາຣັກ ໂອບາມາ ປະທານາທິບໍດີແຫ່ງ ສະຫະລັດ ອາເມຣິກາ ໄດ້ດຳເນີນການຢ້ຽມຢາມອັນເປັນປະຫວັດສາດ ທີ່ປະເທດຫວຽດນາມ ເພື່ອສະເຫຼີມສະຫຼອງການພົວພັນຄູ່ຮ່ວມມືຮອບດ້ານ ລະຫວ່າງສອງປະເທດ ແລະ ຊຸກຍູ້ວິໄສທັດລວມກ່ຽວກັບອະນາຄົດ.
ທ່ານ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ ຕ້ອນຮັບທ່ານ ບາຣັກ ໂອບາມາ ປະທານາທິບໍດີແຫ່ງ ສະຫະລັດ ອາເມຣິກາ ທີ່ມາຢ້ຽມຢາມປະເທດຫວຽດນາມ ຢ່າງເປັນທາງການ (ພາບ: TTXVN
ນີ້ເປັນການຢ້ຽມຢາມຫວຽດນາມຄັ້ງທຳອິດຂອງທ່ານ ບ.ໂອບາມາ ປະທານາທິບໍດີແຫ່ງ ສະຫະລັດ ອາເມຣິກາ ແລະ ເປັນການຢ້ຽມຢາມປະເທດຫວຽດນາມຂອງປະທານາທິບໍດີແຫ່ງ ສະຫະລັດອາເມຣິກາ ຜູ້ທີ່ສາມ ນັບແຕ່ເມື່ອສອງປະເທດຟື້ນຟູການພົວພັນເປັນປົກກະຕິໃນປີ 1995 (ຫຼັງຈາກປະທານາທິບໍດີ ບີນ ກຼິນເຕິນ - ປີ 2000 ແລະ ປະທານາທິບໍດີ ຈໍເຈີ ດັບເບິນຢູ.ບຸດ - ປີ 2006).
ໄປນຳປະທານາທິບໍດີ ບ.ໂອບາມາ ມີ: ລັດຖະມົນຕີຕ່າງປະເທດ ຈອນ ແຄຣີ; ຜູ້ປຶກສາຄວາມໝັ້ນຄົງແຫ່ງຊາດ ທ່ານນາງ ຊູເຊິນ ຣາຍ; ເອກອັກຄະລັດຖະທູດສະຫະລັດອາເມຣິກາ ປະຈຳຫວຽດນາມ ທ່ານ ແຕັດ ໂອຊີເອິດ; ຜູ້ຕາງໜ້າການຄ້າສະຫະລັດອາເມຣິກາ ມາຍເກີນ ຟຣໍແມນ; ເລຂາຊ່ວຍວຽກປະທານາທິບໍດີ, ຮອງທີ່ປຶກສາຄວາມໝັ້ນຄົງແຫ່ງຊາດຮັບຜິດຊອບສຸນທອນພົດ ແລະ ສື່ຂ່າວຍຸດທະສາດ ທ່ານ ແບນ ໂຣແດດ; ຮອງເລຂາຊ່ວຍວຽກປະທານາທິບໍດີ, ຮອງທີ່ປຶກສາຄວາມໝັ້ນຄົງແຫ່ງຊາດຮັບຜິດຊອບເສດຖະກິດສາກົນ ທ່ານ ອາ.ອາດີຢີໂມ; ເລຂາຊ່ວຍວຽກລັດຖະມົນຕີຕ່າງປະເທດ ຮັບຜິດຊອບອາຊີຕາເວັນອອກ - ປາຊີຟິກ ທ່ານ ດ.ຣຸດແຊວ; ຜູ້ອຳນວຍການຊັ້ນສູງຮັບຜິດຊອບອາຊີ, ສະພາຄວາມໝັ້ນຄົງແຫ່ງຊາດ ທ່ານ ດ.ກຣີທິນບຣິງ; ເລຂາຊ່ວຍວຽກພິເສດຂອງປະທານາທິບໍດີ ຮັບຜິດຊອບເສດຖະກິດສາກົນ ທ່ານ ຮ.ດາດ.
ຕອນເຊົ້າວັນທີ 23 ພຶດສະພາ 2016, ພາຍຫຼັງພິທີຕ້ອນຮັບຢ່າງສົມກຽດ ເປັນທາງການ, ປະທານປະເທດຫວຽດນາມ ເຈິ່ນດ້າຍກວາງ ໄດ້ພົບປະເຈລະຈາກັບ ປະທານາທິບໍດີສະຫະລັດອາເມຣິກາ ບາຣັກ ໂອບາມາ ທີ່ທຳນຽບປະທານປະເທດ ແລະ ເຂົ້າຮ່ວມການປະຊຸມຖະແຫຼງຂ່າວຮ່ວມກັນທີ່ສູນການປະຊຸມສາກົນ.
ການນຳທັງສອງໄດ້ແລກປ່ຽນກ່ຽວກັບສາຍພົວພັນສອງຝ່າຍ ແລະ ບັນດາບັນຫາພາກພື້ນ, ສາກົນທີ່ທັງສອງຝ່າຍມີຄວາມສົນໃຈ, ແລະສະແດງຄວາມພຶງພໍໃຈກ່ຽວກັບຄວາມຄືບໜ້າຢ່າງໄວວາ, ມີເນື້ອແທ້ ແລະຮອບດ້ານ ຂອງການພົວພັນຫວຽດນາມ - ສະຫະລັດອາເມຣິກາ ໃນເວລາທີ່ຜ່ານມາ ຕາມທິດທາງຂອງການພົວພັນຄູ່ຮ່ວມມືຮອບດ້ານ ຫວຽດນາມ - ສະຫະລັດອາເມຣິກາ ປີ 2013 ແລະ ຖະແຫຼງການຮ່ວມກ່ຽວກັບວິໄສທັດຮ່ວມກັນ ເນື່ອງໃນໂອກາດການຢ້ຽມຢາມສະຫະລັດອາເມຣິກາ ອັນເປັນປະຫວັດສາດ ຂອງທ່ານ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ເມື່ອເດືອນກໍລະກົດ 2015.
ປະທານປະເທດ ເຈິ່ນດ້າຍກວາງ ສະແດງຄວາມຂ່ຳນັບຊົມເຊີຍ ປະທານາທິບໍດີ ບ.ໂອບາມາ ພ້ອມຄະນະຜູ້ແທນຂັ້ນສູງຂອງລັດຖະບານສະຫະລັດອາເມຣິກາ ທີ່ມາຢາມປະເທດຫວຽດນາມຢ່າງເປັນທາງການ, ຕີລາຄາສູງຄວາມໝາຍອັນສຳຄັນຂອງການຢ້ຽມຢາມ ຕໍ່ການພົວພັນລະຫວ່າງສອງປະເທດ. ປະທານາທິບໍດີ ບ.ໂອບາມາ ສະແດງຄວາມດີໃຈທີ່ໄດ້ມາຢ້ຽມຢາມປະເທດຫວຽດນາມທີ່ສວຍງາມ ເປັນຄັ້ງທຳອິດ, ຢັ້ງຢືນການຢ້ຽມຢາມຈະຊຸກຍູ້ການພົວພັນຄູ່ຮ່ວມມືຮອບດ້ານລະຫວ່າງສອງປະເທດໃຫ້ຂະຫຍາຍຕົວຍິ່ງກວ່າອີກ.
ປະທານປະເທດ ເຈິ່ນດ້າຍກວາງ ຢັ້ງຢືນຫວຽດນາມປະຕິບັດຢ່າງສະເໝີຕົ້ນສະເໝີປາຍ ແນວທາງການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ຮ່ວມມື ແລະ ພັດທະນາ; ຫັນການພົວພັນສາກົນເປັນຫຼາຍຮູບຫຼາຍແບບ, ຫຼາຍກ້ຳຫຼາຍຝ່າຍ; ໃຫ້ຄວາມສຳຄັນ ແລະ ມີຄວາມປະສົງຢາກພັດທະນາການພົວພັນ ຫວຽດນາມ - ສະຫະລັດອາເມຣິກາ ໃຫ້ເປັນປົກກະຕິ, ກວ້າງຂວາງ ແລະ ມີປະສິດທິຜົນ.
ປະທານາທິບໍດີ ບ.ໂອບາມາ ເຫັນດີເປັນເອກະພາບວ່າ ຈະຊຸກຍູ້ໃຫ້ ສະພາແຫ່ງຊາດ ສະຫະລັດອາເມຣິກາ ຮັບຮອງສັນຍາຄູ່ຮ່ວມມືຂ້າມປາຊີຟິກ (TPP - ທີພີພີ ), ໃຫ້ຄຳໝັ້ນສັນຍາຈະຊ່ວຍເຫຼືອຫວຽດນາມຍົກສູງຄວາມສາມາດ ເພື່ອຜັນຂະຫຍາຍສັນຍາສະບັບນີ້. ສອງຝ່າຍເຫັນດີເປັນເອກະສັນ ຖືການຮ່ວມມືພັດທະນາເສດຖະກິດ-ການຄ້າ, ການສຶກສາ-ກໍ່ສ້າງ, ວິທະຍາສາດ-ເຕັກໂນໂລຊີ, ຮັບມືກັບການປ່ຽນແປງສະພາບພູມິອາກາດ ເປັນໜຶ່ງໃນບັນດາຈຸດໜັກໃຈກາງຂອງການພົວພັນລະຫວ່າງສອງປະເທດ.
ສອງຝ່າຍໃຫ້ທັດສະນະວ່າ ຕ້ອງສືບຕໍ່ເພີ່ມທະວີການຮ່ວມມືແກ້ໄຂຜົນຮ້າຍຂອງສົງຄາມ, ພິເສດແມ່ນລຶບລ້າງທາດພິດ ໄດອອກຊີນ, ລະເບີດທີ່ຍັງບໍ່ທັນແຕກ ແລະ ຄົນພິການ, ຊ່ວຍເຫຼືອດ້ານມະນຸດສະທຳ ແລະ ບັນເທົາໄພພິບັດ.
ເນື່ອງໃນໂອກາດນີ້, ປະທານາທິບໍດີ ບ.ໂອບາມາ ປະກາດເປັນທາງການວ່າ ສະຫະລັດອາເມຣິກາ ຍົກເລີກຢ່າງສິ້ນເຊີງຄຳສັ່ງຫ້າມຂາຍອາວຸດທຳລາຍໃຫ້ຫວຽດນາມ. ປະທານປະເທດ ເຈິ່ນດ້າຍກວາງ ໄດ້ສະແດງຄວາມຊົມເຊີຍຕໍ່ການຕັດສິນຕົກລົງນັ້ນ.
ກ່ຽວກັບບັນຫາພາກພື້ນ, ການນຳທັງສອງແບ່ງປັນຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງໃນພາກພື້ນ, ຮັບປະກັນຄວາງສະຫງົບ ແລະ ຄວາມປອດໄພໃນການເດີນທະເລ ເດີນອາກາດ, ແກ້ໄຂຂໍ້ພິພາດດ້ວຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS), ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ກ້າວໄປເຖິງ ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC). ສອງຝ່າຍເຫັນດີວ່າ ຕ້ອງເພີ່ມທະວີການສົມທົບກັນ ໃນຄວາມພະຍາຍາມລວມຂອງປະຊາຄົມໂລກ ເພື່ອແນໃສ່ແກ້ໄຂບັນດາບັນຫາພາກພື້ນ ແລະ ທົ່ວໂລກຄື ຮັບມືກັບການປ່ຽນແປງສະພາບພູມິອາກາດ, ໃນນັ້ນມີ ບັນຫານ້ຳເຄັມຊືມເຂົ້າທົ່ງ ແລະ ໄພແຫ້ງແລ້ງ, ຄວາມໝັ້ນຄົງດ້ານແຫຼ່ງນ້ຳໃນແມ່ນ້ຳຂອງ, ຕ້ານການກໍ່ການຮ້າຍ, ຕ້ານການເຜີຍແຜ່ອາວຸດນິວເກຼຍ, ຕ້ານການຄ້າສັດປ່າ ແລະ ປົກປັກຮັກສາຄວາມຫຼາກຫຼາຍດ້ານຊີວະພາບ.
ຖະແຫຼງການຮ່ວມລະຫວ່າງສອງປະເທດເນື່ອງໃນໂອກາດການຢ້ຽມຢາມ ໄດ້ເນັ້ນວ່າ: “ຫວຽດນາມ ແລະ ສະຫະລັດອາເມຣິກາ ຢັ້ງຢືນອີກຄັ້ງຄຳໝັ້ນສັນຍາລວມກ່ຽວກັບການແກ້ໄຂຄວານພິພາດຊ່ວງຊິງດິນແດນ ແລະ ເຂດທະເລດ້ວຍສັນຕິວິທີ, ໃນນັ້ນ ມີການເຄົາລົບນັບຖືຢ່າງສົມບູນ ຕໍ່ບັນດາຂະບວນການທາງການທູດ ແລະ ນິຕິກຳ, ບໍ່ໃຊ້ອາວຸດ ຫຼືນາບຂູ່ວ່າຈະໃຊ້ກຳລັງອາວຸດ, ສອດຄ່ອງກັບກົດບັດສະຫະປະຊາຊາດ, ກົດໝາຍສາກົນ, ໃນນັ້ນມີ ອະນຸສັນຍາສະຫະປະຊາຊາດວ່າດ້ວຍກົດໝາຍທະເລ ປີ 1982 (UNCLOS).
ສອງຝ່າຍເນັ້ນຄຳໝັ້ນສັນຍາຂອງບັນດາຝ່າຍທີ່ພົວພັນເຖິງຄວາມພິພາດ ຈະບໍ່ມີການກະທຳທີ່ເຮັດໃຫ້ເກີດຄວາມສັບສົນ ແລະ ເປີດກວ້າງການພິພາດຊ່ວງຊິງກັນ, ຮັບຮູ້ຄວາມສຳຄັນຂອງການປະຕິບັດຢ່າງເຂັ້ມງວດ ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ຊຸກຍູ້ການເຈລະຈາຢ່າງລະອຽດຕົວຈິງ ແລະ ເຊັນປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ. ຕາມນັ້ນ, ສອງຝ່າຍເປັນຫ່ວງເປັນພິເສດກ່ຽວກັບເຫດການເກີດຂຶ້ນໃນເວລາຜ່ານມາມໍ່ນີ້ ຢູ່ທະເລຕາເວັນອອກ ເຊິ່ງເຮັດໃຫ້ມີຄວາມເຄັ່ງຕຶງ, ກັດເຊາະຄວາມໄວ້ວາງໃຈ, ນາບຂູ່ຕໍ່ສັນຕິພາບ ຄວາມໝັ້ນຄົງ ແລະ ສະຖຽນລະພາບ.
ສອງຝ່າຍເນັ້ນເຖິງລັກສະນະຮີບດ່ວນຂອງການຮັບປະກັນເສລີພາບໃນການເດີນທະເລ ແລະ ເດີນອາກາດ, ກໍ່ຄືຮັກສາການເຄື່ອນໄຫວການຄ້າຊອບກົດໝາຍໂດຍບໍ່ຖືກກີດຂວາງ ຢູ່ທະເລຕາເວັນອອກ; ຮຽກຮ້ອງໃຫ້ໄຮ້ການທະຫານ ແລະ ອົດທົນອົດກັ້ນ ໃນການແກ້ໄຂຂໍ້ພິພາດ, ຢັ້ງຢືນອີກຄັ້ງຄຳໝັ້ນສັນຍາລວມຕາມຖະແຫຼງການ ຊັນນີແລນ ແລະ ໃຫ້ຄຳໝັ້ນສັນຍາຈະສົມທົບຢ່າງແໜ້ນແຟ້ນກັບບັນດາຄູ່ຮ່ວມມືອາຊຽນອື່ນ ໃນການປະຕິບັດຖະແຫຼງການສະບັບນີ້”.
ພາຍຫຼັງການພົບປະເຈລະຈາ, ປະທານປະເທດ ເຈິ່ນດ້າຍກວາງ ແລະ ປະທານາທິບໍດີ ບ.ໂອບາມາ ໄດ້ເປັນສັກຂີພະຍານພິທີເຊັນຂໍ້ຕົກລົງຮ່ວມມືດ້ານເສດຖະກິດທີ່ສຳຄັນຈຳນວນໜຶ່ງ ຄື: ສັນຍາຊື້ເຮືອບິນ ໂບອິງ ບີ737 ມາກ (Boeing B737 Max) 100 ລຳ ລະຫວ່າງບໍລິສັນຫຸ້ນສ່ວນ ວຽດແຈັດ ແອ (VietJet Air) ແລະ ກຸ່ມບໍລິສັດ ໂບອິງ, ສັນຍາສະໜອງເຄື່ອງຍົນເຮືອບິນ ແລະ ໃຫ້ການບໍລິການເຕັກນິກການບຳລຸງຮັກສາແກ່ເຣືອບິນ ແອເບິສ ຮຸ່ນໃໝ່ ເອ320/ເອ321 ເນໂອ (Airbus A320/A321 NEO) 63 ລຳ ລະຫວ່າງບໍລິສັນຫຸ້ນສ່ວນ ວຽດແຈັດ ແອ ແລະ ບໍລິສັດ ພຣາດ ແອນ ວາຍນີ (Pratt & Whitney), ແລະ ບົດບັນທຶກຄວາມຈຳລະຫວ່າງກະຊວງອຸດສາຫະກຳການຄ້າ ແລະ ກຸ່ມບໍລິສັດ ຈີອີ ກ່ຽວກັບການຮ່ວມມືປະຕິບັດບັນດາວິທີພັດທະນາພະລັງລົມຢູ່ຫວຽດນາມ.
ຕໍ່ຈາກນັ້ນ, ຢູ່ທີ່ສູນການປະຊຸມສາກົນ, ປະທານປະເທດ ເຈິ່ນດ້າຍກວາງ ແລະ ປະທານາທິບໍດີ ບາຣັກ ໂອບາມາ ໄດ້ຮ່ວມກັນຈັດການຖະແຫຼງຂ່າວສາກົນ, ຕອບຄຳຖາມຕ່າງໆຂອງນັກຂ່າວກ່ຽວກັບຜົນຂອງການພົບປະເຈລະຈາ, ທິດທາງຂອງການພົວພັນຫວຽດນາມ - ສະຫະລັດອາເມຣິກາ ໃນເວລາຕໍ່ໜ້າ.
ປະທານປະເທດ ເຈິ່ນດ້າຍກວາງ ໄດ້ຈັດງານລ້ຽງເພື່ອຄຳນັບຮັບຕ້ອນປະທານາທິບໍດີ ບ.ໂອບາມາ ແລະ ຄະນະຜູ້ແທນຂັ້ນສູງ ລັດຖະບານສະຫະລັດອາເມຣິກາ ທີ່ມາຢາມປະເທດຫວຽດນາມຢ່າງເປັນທາງການ.
ໃນວັນດຽວກັນຄືວັນທີ 23 ພຶດສະພາ 2016, ປະທານາທິບໍດີ ບ.ໂອບາມາ ໄດ້ຢ້ຽມຄຳນັບທ່ານເລຊາທິການໃຫຍ່ ຫງວຽນຝູຈ້ອງ; ພົບປະກັບນາຍົກລັດຖະມົນຕີ ຫງວຽນຊວນຝຸກ; ພົບປະກັບປະທານສະພາແຫ່ງຊາດ ຫງວຽນທິກິມເງິນ; ຢ້ຽມເບິ່ງເຮືອນລຸງໂຮ່.
ໃນການພົບປະເຫຼົ່ານີ້, ບັນດາການນຳພັກ, ລັດຫວຽດນາມ ໄດ້ສະແດງຄວາມດີໃຈ, ຕີລາຄາສູງຄວາມໝາຍ ແລະ ຄວາມສຳຄັນຂອງການຢ້ຽມຢາມຂອງປະທານາທິບໍດີ ບ.ໂອບາມາ, ຖືວ່ານີ້ເປັນການຢັ້ງຢືນອີກຄັ້ງຄຳໝັ້ນສັນຍາຂອງການນຳສອງປະເທດ ກ່ຽວກັບການພົວພັນຄູ່ຮ່ວມມືຮອບດ້ານຫວຽດນາມ - ສະຫະລັດອາເມຣິກາ; ແຈ້ງໃຫ້ປະທານາທິບໍດີ ບ.ໂອບາມາ ຊາບກ່ຽວກັບແນວທາງ, ນະໂຍບາຍການຕ່າງປະເທດຂອງຫວຽດນາມໃນໄລຍະໃໝ່.
ຫວຽດນາມສືບຕໍ່ຖືວ່າ ສະຫະລັດອາເມຣິກາ ເປັນໜຶ່ງໃນບັນດາຄູ່ຮ່ວມມືທີ່ສຳຄັນແຖວໜ້າຂອງຕົນ ແລະ ເນັ້ນວ່າ ສອງຝ່າຍຄວນສືບຕໍ່ຊຸກຍູ້ການພົວພັນຄູ່ຮ່ວມມືຮອບດ້ານໃຫ້ເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ, ບົນພື້ນຖານເຄົາລົບນັບຖືເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບການເມືອງຂອງກັນແລະກັນ, ບໍ່ແຊກແຊງເຂົ້າວຽກງານພາຍໃນຂອງກັນ, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ ສະຖຽນລະພາບ ການຮ່ວມມື ການພັດທະນາ ແລະ ຄວາມວັດທະນາຖາວອນຮ່ວມກັນໃນພາກພື້ນ ແລະ ໃນໂລກ. ຊົມເຊີບອຳນາດການປົກຄອງ, ລັດຖະສະພາ ແລະ ຫຼາຍອົງການຈັດຕັ້ງປະຊາຊົນ ຂອງສະຫະລັດອາເມຣິກາ ທີ່ໄດ້ແລະພວນຮ່ວມມືກັບຫວຽດນາມ ໃນການເຄື່ອນໄຫວແກ້ໄຂຜົນຮ້າຍຂອງສົງຄາມ; ສະແດງຄວາມຫວັງວ່າ ສະຫະລັດອາເມຣິກາຈະສືບຕໍ່ຊຸກຍູ້ການຮ່ວມມືຕົວຈິງ ແລະ ມີປະສິດທິຜົນຍິ່ງກວ່າອີກ ໃນຂົງເຂດທີ່ມີຄວາມໝາຍສຳຄັນນີ້.
ບັນດາການນຳຫວຽດນາມຢັ້ງຢືນແຜນນະໂຍບາຍຕໍ່ກັບ ສັນຍາຄູ່ຮ່ວມມືຂ້າມປາຊີຟິກ (TPP) ແລະ ສະເໜີໃຫ້ສະຫະພາບອາເມຣິກາສືບຕໍ່ປະຕິບັດຄຳໝັ້ນສັນຍາຊ່ວຍເຫຼືອດ້ານເຕັກນິກ ໃຫ້ຫວຽດນາມ ໃນວິວັດການປະຕິບັດສັນຍາ ທີພີພີ ກໍ່ຄືຊຸກຍູ້ການຮ່ວມມືດ້ານເສດຖະກິດລະຫວ່າງສອງປະເທດ.
ກ່ຽວກັບບັນຫາສາກົນ ແລະ ພາກພື້ນ, ບັນດາການນຳຂອງຫວຽດນາມໄດ້ສະແດງຄວາມຊົມເຊີຍຕໍ່ຄຳຖະແຫຼງ ແລະ ການກະທຳຂອງບັນດາປະເທດ, ໃນນັ້ນມີສະຫະລັດອາເມຣິກາ, ທີ່ແນໃສ່ປະກອບສ່ວນຮັກສາສັນຕິພາບ, ສະຖຽນລະພາບ ແລະ ຄວາມສະຫງົບຢູ່ພາກພື້ນ; ພ້ອມນັ້ນກໍຢັ້ງຢືນອີກຄັ້ງຫຼັກໝັ້ນຂອງຫວຽດນາມ ກ່ຽວກັບການແກ້ໄຂຂໍ້ພິພາດໃນທະເລດ້ວຍບັນດາວິທີສັນຕິພາບ ການທູດ ແລະ ກົດໝາຍ, ບົນພື້ນຖານກົດໝາຍສາກົນ.
ປະທານາທິບໍດີ ບ.ໂອບາມາ ສະແດງຄວາມຂອບໃຈຕໍ່ການຕ້ອນຮັບຢ່າງສົມກຽດ ທີ່ພັກ, ລັດ ແລະປະຊາຊົນຫວຽດນາມໄດ້ໃຫ້ການຕ້ອນຮັບເພິ່ນໃນການຢ້ຽມຢາມຫວຽດນາມຄັ້ງທຳອິດນີ້; ສະແດງຄວາຮູ້ສຶກປະທັບໃຈຢ່າງເລິກເຊິ່ງກ່ຽວກັບປະເທດຫວຽດນາມທີ່ສວຍງາມ, ຂະຫຍາຍຕົວຢ່າງຂະຫຍັນຂັນແຂງ; ຕີລາຄາສູງບົດບາດ ແລະ ວິໄສທັດຂອງ ພັກກອມມູນິດຫວຽດນາມ ໃນການນຳພາປະເທດຊາດຍາດເອົາຜົນສຳເລັດອັນໃຫຍ່ຫຼວງໃນເວລາທີ່ຜ່ານມາເວົ້າລວມ ແລະ ໃນແຜນນະໂຍບາຍຍຸດທະສາດກ່ຽວກັນຂະບວນວິວັດການເຈລະຈາສັນຍາ ທີພີພີ ເວົ້າໂດຍສະເພາະ.
ປະທານາທິບໍດີ ບ.ໂອບາມາ ຢັ້ງຢືນ ສະຫະລັດອາເມຣິກາຖືວ່າ ຫວຽດນາມເປັນຄູ່ຮ່ວມມືທີ່ສຳຄັນໃນພາກພື້ນ; ເນັ້ນຈະເຮັດທຸກສິ່ງທີ່ອາດຈະເຮັດໄດ້ ເພື່ອຊຸກຍູ້ການຮ່ວມມືກັບຫວຽດນາມໃນບັນດາຂົງເຂດທີ່ບຸລິມະສິດ, ພິເສດແມ່ນ ຊ່ວຍໜູນດ້ານເຕັກນິກໃຫ້ຫວຽດນາມປະຕິບັດສັນຍາ ທີພີພີ, ຕາມຈິດໃຈຂອງຖະແຫຼງການຮ່ວມ ກ່ຽວກັບການພົວພັນຄູ່ຮ່ວມມືຮອບດ້ານ ລະຫວ່າງສອງປະເທດປີ 2013 ແລະ ຖະແຫຼງການກ່ຽວກັບວິສທັດລວມຫວຽດນາມ - ສະຫະລັດອາເມຣິກາ ປີ 2015.
ປະທານາທິບໍດີ ບ.ໂອບາມາ ຢັ້ງຢືນການຍົກເລີກຢ່າງສິ້ນເຊີງຄຳສັ່ງຫ້າມຂາຍອາວຸດທຳລາຍໃຫ້ຫວຽດນາມ ແມ່ນເພື່ອປະກອບສ່ວນສ້າງຄວາມຫັນປ່ຽນໃໝ່ ໃນການພົວພັນລະຫວ່າງສອງປະເທດ; ຍົກໃຫ້ເຫັນຢ່າງເດັ່ນຊັດເຖິງຄວາມຈຳເປັນຕ້ອງຮັບປະກັນຄວາມປອດໄພ, ຄວາມໝັ້ນຄົງ ແລະ ເສລີພາບໃນການເດີນທະເລ ເດີນອາກາດ, ການແກ້ໄຂຂໍ້ພິພາດໃນທະເລຕາເວັນອອກດ້ວຍສັນຕິວິທີ, ບົນພື້ນຖານປະຕິບັດຕາມກົດໝາຍສາກົນ; ສະແດງຄວາມເຊື່ອໝັ້ນວ່າ ການພົວພັນຫວຽດນາມ - ສະຫະລັດອາເມຣິກາ ຈະສືບຕໍ່ຂະຫຍາຍຕົວຢ່າງແຂງແຮງກວ່າອີກໃນເວລາຕໍ່ໜ້າ ເພື່ອຜົນປະໂຫຍດຂອງແຕ່ລະປະເທດ, ເພື່ອສັນຕິພາບ ສະຖຽນລະພາບ ການຮ່ວມມື ແລະ ການພັດທະນາຢູ່ໃນພາກພື້ນ ແລະ ໃນໂລກ.
ເນື່ອງໃນໂອກາດການຢ້ຽມຢາມ, ສອງຝ່າຍໄດ້ອອກຖະແຫຼງການຮ່ວມ ເຫັນດີເປັນເອກະສັນເພີ່ມທະວີການພົວພັນຄູ່ຮ່ມມືຮອບດ້ານ ຕາມທິດມີເນື້ອແທ້, ເລິກເຊິ່ງ, ມີປະສິທິຜົນຍິ່ງກວ່າອີກ ເພື່ອຜົນປະໂຫຍດຂອງສອງປະເທດ, ເພື່ອສັນຕິພາບ ສະຖຽນລະພາບ ການຮ່ວມມື ແລະ ການພັດທະນໃນພາກພື້ນ ແລະ ໃນໂລກ.
ໃນເວລາການຢ້ຽມຢາມນີ້, ປະທານາທິບໍດີ ບາຣັກ ໂອບາມາ ໄດ້ກ່າວປາໄສຕໍ່ນັກຮຽນນັກສຶກສາ, ນັກທຸລະກິດໜຸ່ມນ້ອຍ 2.000 ກວ່າຄົນທີ່ ຮ່າໂນ້ຍ; ໄດ້ພົບປະ, ແລກປ່ຽນຄວາມເຫັນກັບຜູ້ນຳໜຸ່ມນ້ອຍຫວຽດນາມ 800 ກວ່າຄົນ ທີ່ເປັນສະມາຊິກຂອງ ອົງການຄວາມຄິດລິເລິ່ມຜູ້ນຳໜຸ່ມນ້ອຍອາຊີຕາເວັນອອກສຽງໃຕ້ ຢູ່ນະຄອນໂຮ່ຈີມິນ ແລະ ມີການເຄື່ອນໄຫວອື່ນອີກຈຳນວນໜຶ່ງ./.
ສັງລວມໂດຍ ນດ.
