ວກ. ອອນໄລ - ຕອນເຊົ້າວັນທີ 19 ພຶດສະພາ 2016 (ຕາມໂມງທ້ອງຖີ່ນ), ທ່ານ ຫງວຽນຊວນຝຸກ ນາຍົກລັດຖະມົນຕີແຫ່ງ ສສ ຫວຽດນາມ ໄດ້ສຳເລັດສິ້ນສຸດການຢ້ຽມຢາມສະຫະພາບລັດເຊຍ ຢ່າງຈົບງາມ ແລະ ເດີນທາງອອກຈາກນະຄອນຫຼວງມາດສະເກິວາ ໄປຍັງນະຄອນ ໂຊຈີ ເພື່ອເຂົ້າຮ່ວມກອງປະຊຸມສຸດຍອດ ສະເຫຼີມສະຫຼອງການສ້າງຕັ້ງສາຍພົວພັນຄູ່ຮ່ວມສົນທະນາ ອາຊຽນ - ລັດເຊຍ ຄົບຮອບ 20 ປີ.
ການຢ້ຽມຢາມຕາມຄຳເຊີນຂອງທ່ານດີມີຕຣີ ແມັດເວແດັບ ນາຍົກລັດຖະມົນຕີແຫ່ງສະຫະພາບລັດເຊຍ , ແຕ່ວັນທີ 16 ຫາວັນທີ 19 ພຶດສະພາ, ເຊິ່ງເປັນຄັ້ງທຳອິດທີ່ທ່ານ ຫງວຽນຊວນຝຸກ ໃນຖານະນາຍົກລັດຖະມົນຕີແຫ່ງ ສສ ຫວຽດນາມ ໄປຢ້ຽມຢາມຕ່າງປະເທດ. ໃນເວລາຢ້ຽມຢາມສະຫະພາບລັດເຊຍ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ດຳເນີນການເຮັດວຽກຢ່າງຮີບດ່ວນ ດ້ວຍການເຄື່ອນໄຫວ 17 ຄັ້ງທີ່ລຽນຕິດກັນ, ລວມມີບັນດາການພົບປະເຈລະຈາ ປຶກສາຫາລື ພົບປະກັບບັນດາທ່ານການນຳຂອງປະເທດລັດເຊຍ, ເຂົ້າຮ່ວມເວທີປາໄສວິສາຫະກິດຫວຽດນາມ - ລັດເຊຍ, ຕອບການສຳພາດຂອງໜັງສືພິມລັດເຊຍ; ວາງພວງມາລາທີ່ອານຸສາວະລີນັກລົບນິລະນາມ; ເຂົ້າໄຫວ້ອາໄລປະທານກຳມະຊີບ ວອີ. ເລນີນ; ວາງພວງມາລາ ແລະ ປູກຕົ້ນໄມ້ເປັນທີ່ລະນຶກຢູ່ອານຸສາວະລີປະທານ ໂຮ່ຈີມີນ ທີ່ກົງກັບໂອກາດສະເຫຼີມສະຫຼອງວັນເກີດຂອງເພີ່ນ; ໄປຢ້ຽມຢາມ ແລະ ໂອ້ລົມກັບພະນັກງານສະຖານທູດຫວຽດນາມ ແລະ ຊາວຫວຽດນາມ ຢູ່ລັດເຊຍ....
ໃນທີ່ການພົບປະຫາລືກັບນາຍົກລັດຖະມົນຕີລັດເຊຍ ທ່ານດີມີຕຣີ ແມັດເວແດັບ, ທ່ານນາຍົກລົດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ດີມີຕຣີ ແມັດເວແດັບ ໄດ້ຢືນຢັນຄວາມຕັດສິນໃຈກ່ຽວກັບການເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ, ໄດ້ມີການແລກປ່ຽນ ແລະ ເປັນເອກະພາບກ່ຽວກັບຫຼາຍມາດຕະການເພື່ອຊຸກຍູ້ການຮ່ວມມືສອງຝ່າຍໃຫ້ໄປສູ່ລວງເລິກ, ມີປະສິດທິຜົນ ແນໃສ່ຕອບສະໜອງຜົນປະໂຫຍດອັນຍາວນານຂອງປະຊາຊົນທັງສອງປະເທດ.
ສອງຝ່າຍກໍ່ໄດ້ເຫັນດີເປັນເອກະພາບຈະສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ, ຕາມຊ່ອງທາງພັກ, ລັດ, ລັດຖະບານ, ສະພາແຫ່ງຊາດ, ກະຊວງ ຂະແໜງການຕ່າງໆ, ບັນດາອົງການຈັດຕັ້ງສັງຄົມ ກໍ່ຄືລະຫວ່າງທ້ອງຖິ່ນຕ່າງໆ, ຮັກສາປະສິດທິຜົນຂອງບັນດາກົນໄກສົນທະນາ, ປຶກສາຫາລືທີ່ມີຢູ່.
ກ່ຽວກັບການຮ່ວມມືດ້ານ ເສດຖະກິດ - ການຄ້າ, ສອງຝ່າຍໄດ້ເຫັນດີເປັນເອກະພາບຈະຕ້ອງພະຍາຍາມຢ່າງສຸດຄວາມສາມາດ ເພື່ອແກ້ໄຂຄວາມຕົກຕ່ຳຂອງການແລກປ່ຽນການຄ້າສອງຝ່າຍ, ຜັນຂະຫຍາຍຢ່າງຄົບຊຸດມາດຕະການຕ່າງໆ ຄືອຳນວຍຄວາມສະດວກໃຫ້ແກ່ວິສາຫະກິດຂອງສອງປະເທດໃນການນຳເຂົ້າ ແລະ ສົ່ງອອກ, ເພີ່ມທະວີການເຄື່ອນໄຫວສົ່ງເສີມການຄ້າ, ຜັນຂະຫຍາຍເປີດກວ້າງການຊຳລະສະສາງໂດຍກົງດ້ວຍສະກຸນເງິນແຫ່ງຊາດຂອງທັງສອງປະເທດ, ຍາດແຍ່ງບັນດາທ່າແຮງຂອງສັນຍາວ່າດ້ວຍການຄ້າເສລີ ຫວຽດນາມ - ສະຫະພັນເສດຖະກິດ ອາຊີ - ເອີຣົບ ກໍ່ຄືຂອງບັນດາສັນຍາວ່າດ້ວຍການຄ້າເສລີທີ່ຫວຽດນາມໄດ້ເຂົ້າຮ່ວມ.
ໃນສະພາບການເສດຖະກິດໂລກ ແລະ ໃນແຕ່ລະປະເທດ ມີຄວາມຫຍຸ້ງຍາກ, ສອງຝ່າຍກໍ່ໄດ້ເຫັນດີເປັນເອກະພາບກັນວ່າຕ້ອງເພີ່ມທະວີການຮ່ວມມືທາງດ້ານພະລັງງານ, ຂົງເຂດຮ່ວມມືທີ່ເປັນຫຼັກແຫຼ່ງ, ຊ່ວຍເຫຼືອບໍລິສັດຮ່ວມທຸລະກິດນ້ຳມັນອາຍແກສຂອງສອງປະເທດ ທີ່ລົງທຶນຢູ່ຫວຽດນາມແລະຢູ່ລັດເຊຍ ເຄື່ອນໄຫວຢ່າງມີປະສິດທິຜົນ, ເປີດກວ້າງການຮ່ວມມືໄປສູ່ຂົງເຂດອື່ນ ຄືກັ່ນຕອງນ້ຳມັນ ເຄມີນ້ຳມັນ, ຜະລິດແກສປິໂຕຣລຽມເຫຼວ... ພ້ອມກັນເປີດກວ້າງການຮ່ວມມືໄປສູ່ປະເທດທີ່ສາມ.
ສອງຝ່າຍກໍ່ໄດ້ຢືນຢັນວ່າ ຈະສືບຕໍ່ຮ່ວມມືຢ່າງແໜ້ນແຟ້ນ, ມີປະສິດທິຜົນໃນຂົງເຂດປ້ອງກັນປະເທດ ປ້ອງກັນຄວາມສະຫງົບ, ພິເສດກ່ຽວກັບເຕັກນິກການທະຫານ; ເຫັນດີເປັນເອກະພາບຈະເປີດກວ້າງການຮ່ວມມືໃນບັນດາຍຂົງເຂດທີ່ມີຄວາມສາມາດບົ່ມຊ້ອນອື່ນຄື ວິທະຍາທະຍາສາດ - ເຕັກໂນໂລຊີ, ການສຶກສາ - ກໍ່ສ້າງ, ວັດທະນະທຳ, ທ່ອງທ່ຽວ, ແຮງງານ, ການຮ່ວມມືລະຫວ່າງທ້ອງຖີ່ນຕ່າງໆ...., ເຮັດໃຫ້ການຮ່ວມມືໃນບັນດາຂົງເຂດນີ້ ຂະຫຍາຍຕົວນັບມື້ນັບຂະຫຍັນຂັນເຄື່ອນ, ມີປະສິດທິຜົນ, ສົມກັບການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ.
ແລກປ່ຽນກ່ຽວກັບການຜັນແປຢ່າງສັບສົນຢູ່ທະເລຕາເວັນອອກໃນເວລາຜ່ານມາມໍ່ນີ້, ສອງຝ່າຍລ້ວນແຕ່ເຫັນດີເປັນເອກະພາບວ່າ ການພິພາດຊ່ວງຊິງກັນຢູ່ທະເລຕາເວັນອອກ ຕ້ອງໄດ້ແກ້ໄຂດ້ວຍສັນຕິວິທີ ບົນພື້ນຖານເຄົາລົບກົດໝາຍສາກົນ, ກ່ອນອື່ນໝົດແມ່ນອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS 1982), ຜັນຂະຫຍາຍຖະແຫຼງການກ່ຽວກັບວິທີປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ ແລະ ສ້າງປະມວນຂໍ້ກຳນົດກ່ຽວກັບວິທີປະພຶດຢູ່ທະເລຕາເວັນອອກ (COC) ຂຶ້ນໂດຍໄວ.
ພາຍຫຼັງການພົບປະເຈລະຈາ, ທ່ານນາຍົກລັດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ດີມີຕຣີ ແມັດເວແດັບ ໄດ້ເປັນສັກຂີພິຍານພິທີລົງນາມໃນຂໍ້ຕົກລົງຮ່ວມມື 8 ສະບັບລະຫວ່າງກະຊວງ, ຂະແໜງການ ແລະ ກຸ່ມບໍລິສັດເສດຖະກິດຈຳນວນໜຶ່ງ ຂອງສອງປະເທດ ໃນບັນດາຂົງເຂດ ນ້ຳມັນອາຍແກສ, ການລົງທຶນ, ບຳລຸງສ້າງພະນັກງານ...
ຕອນແລງວັນທີ 19 ພຶດສະພາ, ທ່ານນາຍົກລັດຖະມົນຕີ ຫງວຽນຊວນຝຸກ ມີການພົບປະແລກປ່ຽນຄວາມຄິດເຫັນ ກັບທ່ານ ວະລາດີເມຍ ປູຕີນ ປະທານາທິບໍດີລັດເຊຍ ເພື່ອປຶກສາຫາລືກ່ຽວກັບບັນຫາໃຫຍ່ຈຳນວນໜຶ່ງທີ່ທັງສອງປະເທດມີຄວາມສົນໃຈ ແລະ ວາງທິດທາງການຮ່ວມມືໃໝ່ລະຫວ່າງ ຫວຽດນາມ - ສະຫະພາບລັດເຊຍ. ການນຳທັງສອງໄດ້ທົບທວນການປະຕິບັດການຮ່ວມມືສອງຝ່າຍໃນຂົງເຂດຕ່າງໆ, ເຫັນດີເປັນເອກະພາບຈະສືບຕໍ່ປະສານສົມທົບຢ່າງແໜ້ນແຟ້ນ ແລະ ເອົາໃຈໃສ່ຍົກສູງປະສິດທິຜົນຂອງບັນດາໂຄງການ ແຜນການຮ່ວມມືຈຸດໜັກໃຈກາງ, ເປັນຕົ້ນແມ່ນການແລກປ່ຽນການຄ້າ, ນ້ຳມັນອາຍແກສ, ໄຟຟ້ານິວເກຼຍ, ການທ່ອງທ່ຽວ ເປັນພື້ນຖານເພື່ອເພີ່ມທະວີການຮ່ວມມືໃນບັນດາຂົງເຂດອື່ນ.
ທ່ານປະທານາທິບໍດີ ສະຫະພາບລັດເຊຍ ໄດ້ສະແດງຄວາມເຫັນດີເປັນເອກະພາບຈະຊຸກຍູ້ບັນດາປະເທດເທດສະມາຊິກຂອງ ສະຫະພັນເສດຖະກິດ ອາຊີ - ເອີຣົບ ຄື ເບລາຣຸດຊີ ອາກເມນີ ແລະ ກຽກກິດສະຖານ ສຳເລັດບັນດາຂັ້ນຕອນໃຫ້ສັດຕະຍາບັນສັນຍາວ່າດ້ວຍການຄ້າເສລີກັບ ຫວຽດນາມ ເພື່ອຜັນຂະຫຍາຍການປະຕິບັດ, ປະກອບສ່ວນຍົກລະດັບການຮ່ວມມືເສດຖະກິດ, ການຄ້າ, ການລົງທຶນລະຫວ່າງສອງປະເທດໃນເວລາຕໍ່ໄປ.
ສຳລັບການແລກປ່ຽນກ່ຽວກັບສະພາບການຢູ່ທະເລຕາເວັນອອກ, ທ່ານປະທານາທິບໍດີ ປູຕີນ ໄດ້ແບ່ງປັນວ່າ ລັດເຊຍຍາມໃດກໍ່ເອົາໃຈໃສ່ ຕິດຕາມສະພາບການຢູ່ອາຊີຕາເວັນອອກສຽງໃຕ້ເວົ້າລວມ ແລະ ຢູ່ທະເລຕາເວັນອອກເວົ້າສະເພາະ, ແລະຢືນຢັນຫຼັກໝັ້ນຂອງລັດເຊຍ ແມ່ນຕ້ອງແກ້ໄຂບັນດາການແກ່ງແຍ້ງຊ່ວງຊິງກັນຢູ່ທະເລຕາເວັນອອກດ້ວຍສັນຕິວິທີ ບົນພື້ນຖານເຄົາລົບກົດໝາຍສາກົນ, ກ່ອນອື່ນໝົດແມ່ນອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS 1982), ຜັນຂະຫຍາຍຖະແຫຼງການກ່ຽວກັບວິທີປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ ແລະ ສະໜັບສະໜູນ ອາຊຽນປະສານສົມທົບກັບຈີນ ກໍ່ສ້າງປະມວນຂໍ້ກຳນົດກ່ຽວກັບວິທີປະພຶດຢູ່ທະເລຕາເວັນອອກ (COC).
ເນື່ອງໃນໂອກາດຢ້ຽມຢາມສະຫະພາບລັດເຊຍຢ່າງເປັນທາງການ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ມີການພົບປະກັບປະທານສະພາຕ່ຳລັດເຊຍ ທ່ານ ແຊກໄກ ນາຣີສະກີນ; ປະທານສະພາສູງ ລັດເຊຍ ທ່ານນາງ ວາແລນຕີນາ ມາດວີແອນໂກ; ປະທານພັກກອມມູນິດສະຫະພາບລັດເຊຍ ທ່ານ ແກນາດີ ຢູການົບ, ພົບປະກັບຜູ້ຕາງໜ້າສະມາຄົມມິດຕະພາບ ລັດເຊຍ - ຫວຽດນາມ ແລະ ສະມາຄົມອະດີດຜູ້ຊ່ຽຍຊານດ້ານການທະຫານຂອງລັດເຊຍທີ່ໄດ້ເຂົ້າຮ່ວມການຊ່ວຍເຫຼືອຫວຽດນາມ ໃນສະໄໝສົງຄາມ.
ຜົນສຳເລັດອັນດີງາມຂອງການຢ້ຽມຢາມສະຫະພາບລັດເຊຍ ຢ່າງເປັນທາງການ ຂອງທ່ານ ນາຍົກລັດຖະມົນຕີ ຫງວຽນຊວນຝຸກ ຈະສ້າງເປັນແຮງກະຕຸ້ນໃໝ່ເພື່ອຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ ແລະ ລັດເຊຍ ໃຫ້ຂະຫຍາຍຕົວຢ່າງແຂງແຮງ./.
ສັງລວມໂດຍ ບທ