ເພີ່ມທະວີການພົວພັນຄູ່ຮ່ວມມືຍຸດທະສາດ ຫວຽດນາມ - ຍີ່ປຸ່ນ
ວກ.ອອນໄລ - ວັນທີ 28 ພຶດສະພາ 2016, ທ່ານນາຍົກລັດຖະມົນຕີ ຫງວຽນຊວນຝຸກ ພ້ອມກັບຄະນະຜູ້ແທນຂັ້ນສູງລັດຖະບານຫວຽດນາມ ໄດ້ດຳເນີນການຢ້ຽມຢາມປະເທດ ຍີ່ປຸ່ນ ຕາມຄຳເຊີນຂອງທ່ານ ຊິນໂຊ ອາເບະ ນາຍົກລັດຖະມົນຕີແຫ່ງ ຍີ່ປຸ່ນ ເນື່ອງໃນໂອກາດເຂົ້າຮ່ວມກອງປະຊຸມສຸດຍອດກຸ່ມບັນດາປະເທດອຸດສາຫະກຳທີ່ຂະຫຍາຍຕົວ (ຈີ7) ເປີດກວ້າງ ຢູ່ທີ່ເມືອງ ອີເຊະ ຊີມະ, ແຂວງ ມິເອະ, ປະເທດຍີ່ປຸ່ນ.
ທ່ານນາຍົກລັດຖະມົນຕີ ຊິນໂຊ ອາເບະ ຕ້ອນຮັບທ່ານນາຍົກລັດຖະມົນຕີ ຫງວຽນຊວນຝຸກ. (ພາບ: TTXVN)
ນີ້ເປັນຄັ້ງທຳອິດທີ່ທ່ານ ຫງວຽນຊວນຝຸກ ໄປຢ້ຽມຢາມປະເທດ ຍີ່ປຸ່ນ ໃນຖານະນາຍົກລັດຖະມົນຕີແຫ່ງຫວຽດນາມ ແລະ ເປັນການນຳຂັ້ນສູງທຳອິດຂອງຫວຽດນາມ ທີ່ໄປຢ້ຽມຢາມຍີ່ປຸ່ນ ພາຍຫຼັງກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ. ສິ່ງດັ່ງກ່າວນີ້ສະແດງໃຫ້ເຫັນວ່າ ການພົວພັນລະຫວ່າງສອງປະເທດພວມຂະຫຍາຍຕົວຢ່າງຈົບງາມ.
ພິທີຕ້ອນຮັບທ່ານນາຍົກລັດຖະມົນຕີ ຫງວຽນຊວນຝຸກ ໄດ້ຈັດຂຶ້ນຢ່າງສົມກຽດທີ່ທຳນຽບລັດຖະບານຍີ່ປຸ່ນ ພາຍໃຕ້ການເປັນເຈົ້າພາບຂອງທ່ານນາຍົກລັດຖະມົນຕີ ຊິນໂຢ ອາເບະ ຊຶ່ງໃນພິທີຕ້ອນຮັບມີການບັນເລງເພງຊາດຫວຽດນາມ ແລະ ເພງຊາດຍີ່ປູ່ນ, ແລະການກວດແຖວກອງກຽດຕິຍົກຍີ່ປຸ່ນ.
ພາຍຫຼັງພິທີຕ້ອນຮັບ, ສອງຝ່າຍໄດ້ດຳເນີນການປຶກສາເຈລະຈາ ໃນບັນຍາກາດແຫ່ງມິດຕະພາບ, ຄວາມໄວ້ວາງໃຈ ແລະ ເຂົ້າໃຈຊຶ່ງກັນແລະກັນ; ສອງຝ່າຍໄດ້ສະແດງຄວາມດີໃຈຕໍ່ການຂະຫຍາຍຕົວຢ່າງແຂງແຮງ ແລະ ມີເນື້ອແທ້ ຂອງການພົວພັນຮ່ວມມືລະຫວ່າງສອງປະເທດໃນເວລາທີ່ຜ່ານມາ, ພິເສດແມ່ນໃນຂົງເຂດເສດຖະກິດ, ກະສິກຳ, ການພົບປະແລກປ່ຽນລະຫວ່າງທ້ອງຖິ່ນຂອງສອງປະເທດ.
ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຂອບອົກຂອບໃຈ ຕໍ່ການຕ້ອນຮັບຢ່າງສົມກຽດຂອງລັດຖະບາມຍີ່ປຸ່ນ, ແລະສະແດງຄວາມຊົມເຊີຍຕໍ່ລັດຖະບານຍີ່ປຸ່ນ ທີ່ໄດ້ຈັດຕັ້ງກອງປະຊຸມສຸດຍອດ ຈີ7 ແລະ ກອງປະຊຸມສຸດຍອດ ຈີ7 ເປີດກວ້າງ ຢ່າງສຳເລັດຜົນ. ທ່ານນາຍົກລັດຖະມົນຕີ ຫງວຽນຊວນຝຸກ ໃຫ້ທັດສະນະວ່າ, ບັນດາຜົນສຳເລັດທີ່ບັນລຸໄດ້ ໃນກອງປະຊຸມສຸດຍອດ ຈີ7 ນັ້ນ ມັນມີຄວາມໝາຍສຳຄັນຕໍ່ກັບສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາ ຢູ່ໃນພາກພື້ນ ແລະ ໃນໂລກ. ທ່ານນາຍົກລັດຖະມົນຕີ ຫງວຽນຊວນຝຸກ ຢັ້ງຢືນນະໂຍບາຍອັນສະເໝີຕົ້ນສະເໝີປາຍຂອງຫວຽດນາມ ທີ່ຖືຍີ່ປຸ່ນເປັນຄູ່ຮ່ວມມືສຳຄັນອັນດັບໜຶ່ງ ແລະ ຍາວນານ ຂອງຫວຽດນາມ.
ທ່ານນາຍົກລັດຖະມົນຕີ ຊິນໂຊ ອາເບະ ສະແດງຄວາມຊົມເຊີຍຕໍ່ທ່ານນາຍົກລັດຖະມົນຕີ ຫງວຽນຊວນຝຸກ ທີ່ມາຢາມຍີ່ປຸ່ນ ໃນຖານະຜູ້ນຳໜ້າລັດຖະບານຫວຽດນາມ, ສະແດງຄວາມຂອບໃຈຕໍ່ ທ່ານນາຍົກລັດຖະມົນຕີ ຫງວຽນຊວນຝຸກ ມີ່ໄດ້ຮັບຄຳເຊີນມາຮ່ວມກອງປະຊຸມສຸດຍອດ ຈີ7 ເປີດກວ້າງ ແລະ ຕີລາສູງຕໍ່ບົດປາໄສຂອງທ່ານນາຍົກລັດຖະມົນຕີ ຫງວຽນຊວນຝຸກ ທີ່ກອງປະຊຸມ. ທ່ານນາຍົກລັດຖະມົນຕີ ຊິນໂຊ ອາເບະ ຢັ້ງຢືນໃຫ້ຄວາມສຳຄັນຕໍ່ການພົວພັນກັບຫວຽດນາມ ແລະ ປະສົງຢາກສືບຕໍ່ຮ່ວມມືຢ່າງແໜ້ນແຟ້ນເພື່ອຊຸກຍູ້ໃຫ້ການພົວພັນ ຫວຽດນາມ - ຍີ່ປຸ່ນ ຂະຫຍາຍຕົວຢ່າງຮອບດ້ານກວ່າອີກ.
ການນຳທັງສອງໄດ້ເຫັນດີເປັນເອກະພາບສູງ ກ່ຽວກັບທິດທາງການຮ່ວມມືໃຫຍ່ ແລະ ບັນດາມາດຕະການອັນລະອຽດ ເພື່ອພາໃຫ້ການຮ່ວມມືຍຸດທະສາດ ຫວຽດນາມ - ຍີ່ປຸ່ນ ຂະຫຍາຍຕົວຢ່າງຮອບດ້ານ, ມີເນື້ອແທ້ ແລະ ມີປະສິດທິຜົນຍິ່ງກວ່າອີກ ໃນເວລາຕໍ່ໜ້າ. ລະອຽດຄື:
ທ່ານນາຍົກລັດຖະມົນຕີທັງສອງໄດ້ເຫັນດີເປັນເອກະສັນຈະເພີ່ມທະວີຄວາມໄວ້ວາງໃຈດ້ານການເມືອງ ໂດຍຜ່ານການຢ້ຽມຢາມ ແລະ ການພົບປະຂັ້ນສູງ ຢ່າງເປັນປະຈຳ, ເພີ່ມທະວີການພົບປະແລກປ່ຽນກັນຢູ່ພາຍນອກກອງປະຊຸມສາກົນຕ່າງໆ, ຍົກສູງປະສິດທິຜົນຂອງບັນດາກົນໄກສົນທະນາລະຫວ່າງສອງປະເທດ; ເຫັນດີເປັນເອກະສັນເພີ່ມທະວີການຮ່ວມມືດ້ານການປ້ອງກັນຊາດ, ປ້ອງກັນຄວາມສະຫງົບ ລະຫວ່າງສອງປະເທດ, ຮ່ວມມືກັນຢ່າງແໜ້ນແຟ້ນ ໃນການເຄື່ອນໄຫວຮັກສາສັນຕິພາບຂອງສະຫະປະຊາຊາດ ແລະ ໃນຂົງເຂດແກ້ໄຂຜ່ານຜ່າຜົນຮ້າຍຂອງສົງຄາມ.
ສອງຝ່າຍເຫັນດີເປັນເອກສັນຈະຮ່ວມມືກັນຢ່າງແໜ້ນແຟ້ນ ພ້ອມກັນແລກປ່ຽນມາດຕະການອັນລະອຽດຕ່າງໆ ເພື່ອຊຸກຍູ້ການເຊື່ອມຈອດລະບົບເສດຖະກິດຂອງສອງປະເທດ ດ້ວຍບັນດາເນື້ອໃນຄື ເຊື່ອມຈອດແຜນຍຸດທະສາດການພັດທະນາເສດຖະກິດ, ເຊື່ອມຈອດແຫຼ່ງພະລັງການຜະລິດ, ເຊື່ອມຈອດແຫຼ່ງບຸກຄະລາກອນ ໂດຍຜ່ານການຮ່ວມມືລົງທຶນ, ການຄ້າ, ການຊ່ວຍເຫຼືອເພື່ອພັດທະນາເປັນທາງການ (ODA)...
ທ່ານນາຍົກລັດຖະມົນຕີ ຊິນໂຊ ອາເບະ ຢັ້ງຢືນສືບຕໍ່ສະໜອງທຶນ ODA ຊ່ວຍໃຫ້ຫວຽດນາມພັດທະນາເສດຖະກິດ - ສັງຄົມ ແລະ ໃນບັນດາຂົງເຂດກໍ່ສ້າງໂຄງສ້າງພື້ນຖານ, ຮັບມືກັບການປ່ຽນແປງຂອງສະພາບພູມິອາກາດ; ເຫັນດີເປັນເອກສັນຮ່ວມມືຢ່າງແໜ້ນແຟ້ນກັບຫວຽດນາມ ໃນການຜັນຂະຫຍາຍແຜນການສິນເຊື່ອ 110 ຕື້ໂດລາສະຫະລັດ ເພື່ອແນໃສ່ພັດທະນາໂຄງສ້າງພື້ນຖານຄຸນນະພາບສູງ ຢູ່ອາຊີ ແລະ ໃນການຜັນຂະຫຍາຍຄວາມຄິດລິເລີ່ມການເຊື່ອມຈອດ ແມ່ນ້ຳຂອງ - ຍີ່ປຸ່ນ.
ທ່ານນາຍົກລັດຖະມົນຕີ ຫງວຽນຊວນຝຸກ ສະເໜີໃຫ້ຍີ່ປຸ່ນສະໜັບສະໜູນຫວຽດນາມ ໃນການເຂົ້າເຖິງກັບແຫຼ່ງທຶນບຸລິມະສິດຂອງບັນດາອົງການການເງິນສາກົນ, ໃນນັ້ນມີແຫຼ່ງທຶນ IDA ບຸລິມະສິດ ຂອງທະນາຄານໂລກ ພາຍຫຼັງປີ 2017.
ສອງຝ່າຍເຫັນດີເປັນເອກະສັນສົມທົບກັນຊຸກຍູ້ການລົງທຶນຂອງຍີ່ປຸ່ນເຂົ້າຫວຽດນາມ ໂດຍຜ່ານການຜັນຂະຫຍາຍຄວາມຄິດລິເລີ່ມລວມ ຫວຽດນາມ - ຍີ່ປຸ່ນ ໄລຍະທີ VI ໃນປີ 2016; ຢັ້ງຢືນຄວາມຮ່ວມມືຢ່າງແໜ້ນແຟ້ນ ໃນການຜັນຂະຫຍາຍຍຸດທະສາດການຫັນເປັນອຸດສາປະກຳ ຂອງຫວຽດນາມ ໃນຂອບເຂດການຮ່ວມມື ຫວຽດນາມ - ຍີ່ປຸ່ນ ຮອດປີ 2020, ວິໄສທັດຮອດປີ 2030; ຍູ້ແຮງການຜັນຂະຫຍາຍບັນດາໂຄງການໃຫຍ່ ກ່ຽວກັບໂຄງສ້າງພື້ນຖານຂອງສອງປະເທດ, ໃນນັ້ນມີ ໂຄງການທາງດ່ວນເໜືອ - ໃຕ້, ໂຮງງານໄຟຟ້ານິວເກຼຍ ນິງທ້ວນ ທີ 2...
ສອງຝ່າຍໄດ້ແລກປ່ຽນກ່ຽວກັບບັນດາມາດຕະການ ເພື່ອຊຸກຍູ້ການຮ່ວມມືດ້ານການຄ້າ ລະຫວ່າງສອງປະເທດ, ການຮ່ວມມືໃນຂົງເຂດກະສິກຳເຕັກໂນໂລຊີສູງ, ສ້າງເງື່ອນໄຂໃຫ້ສິນຄ້າກະສິກຳຂອງສອງປະເທດໄດ້ເຂົ້າໃນຕະຫຼາດຂອງກັນແລະກັນ.
ສອງຝ່າຍກໍ່ໄດ້ເປັນເອກະສັນກັນຍູ້ແຮງການຮ່ວມມືໃນບັນດາຂົງເຂດ ສາທາລະນະສຸກ, ບຳລຸງສ້າງແຫຼ່ງບຸກຄະລາກອນ, ຮັບນັກຮຽນວິຊາຊ່າງຫວຽດນາມ ເຂົ້າຝຶກອົບຮົມຢູ່ຍີ່ປຸ່ນ, ສືບຕໍ່ຜັນຂະຫຍາຍໂຄງການມະຫາວິທະຍາໄລຫວຽດນາມ - ຍີ່ປຸ່ນ, ຊຸກຍູ້ການຮ່ວມມືດ້ານການທ່ອງທ່ຽວ ແລະ ການສັງສັນລະຫວ່າງປະຊາຊົນສອງປະເທດ.
ພົວພັນເຖິງການຮັບມືກັບຄວາມປ່ຽນແປງຂອງສະພາບພູມິອາກາດ, ທ່ານນາຍົກລັດຖະມົນຕີ ຊິນໂຊ ອາເບະ ໄດ້ປະກາດວ່າຈະສະໜອງເງິນຊ່ວຍເຫຼືອໃຫ້ລ້າຮີບດ່ວນ 300 ລ້ານເຢນ (2,5 ລ້ານໂດລາສະຫະລັດ) ເພື່ອຊ່ວຍໃຫ້ຫວຽດນາມແກ້ໄຂບັນຫາໄພແຫ້ງແລ້ງ, ນ້ຳເຄັມຊືມເຂົ້າທົ່ງ ແລະ ຢັ້ງຢືນວ່າ ຍີ່ປຸ່ນຈະພ້ອມກັບຫວຽດນາມຄົ້ນຄວ້າວິທີແກ້ໄຂໄລຍະກາງແລະຍາວ ແລະ ພ້ອມແລ້ວທີ່ຈະພິຈາລະນາເຖິງການສະໜອງທຶນໃຫ້ກູ້ ODA ເພື່ອກໍ່ສ້າງເຂື່ອນກັນນ້ຳ, ອ່າງເກັບນ້ຳ ແລະ ຊ່ວຍເຫຼືອບົນພື້ນຖານຄວາມສະເໜີລະອຽດຂອງຫວຽດນາມ ຊຶ່ງໃນສະເພາະໜ້າ ຈະສົ່ງຄະນະນັກວິຊາການຂອງ JICA ໄປສຳຫຼວດໂດຍດ່ວນທີ່ໂຄງການຄຸ້ມຄອງນ້ຳຢູ່ແຂວງ ເບ໊ນແຈ ຂອງຫວຽດນາມ.
ສອງຝ່າຍພ້ອມກັນແລກປ່ຽນກ່ຽວກັບບັນຫາສາກົນ ແລະ ພາກພື້ນທີ່ທັງສອງຝ່າຍມີຄວາມສົນໃຈ. ທ່ານນາຍົກລັດຖະມົນຕີ ຊິນໂຊ ອາເບະ ຢັ້ງຢືນຈະສົມທົບຢ່າງແໜ້ນແຟ້ນກັບຫວຽດນາມໃນການກະກຽມປີ ເອເປກ 2017. ແບ່ງປັນຄວາມເປັນຫ່ວງເປັນໄຍຢ່າງເລິກເຊິ່ງຂອງປະຊາຄົມໂລກ ກ່ຽວກັບສະພາບການຢູ່ທະເລຕາເວັນອອກໃນເວລາທີ່ຜ່ານມາມໍ່ນີ້, ພິເສດແມ່ນການກະທຳແຕ່ຝ່າຍດຽວ ໃນການຄູນສ້າງແນວປະກາລັງເປັນເກາະທຽມຂະໜາດໃຫຍ່.
ສອງຝ່າຍເຫັນດີເປັນເອກະພາບກ່ຽວກັບຄວາມສຳຄັນຂອງການຮັບປະກັນສັນຕິພາບ, ສະຖຽນລະພາບ, ຄວາມປອດໄພ ແລະ ເສລີພາບໃນການເດີນທະເລ ແລະ ເດີນອາກາດ ຢູ່ເຂດທະເລຕາເວັນອອກ; ບັນດາຝ່າຍທີ່ກ່ຽວ ບໍ່ມີການກະທຳເຮັດໃຫ້ສະພາບການດັ້ງເດີມປ່ຽນແປງໄປ, ກໍ່ຄວາມສັບສົນ, ເປີດກວ້າງການແກ່ງແຍ້ງຊ່ວງຊີງກັນ ແລະ ຫັນເປັນການທະຫານທີ່ທະເລຕາເວັນອອກ; ແກ້ໄຂຂໍ້ພິພາດດ້ວຍສັນຕິວິທີ, ເຄົາລົບນັບຖືຂະບວນການທາງການທູດ ແລະ ນິຕິກຳ; ປະຕິບັດຢ່າງເຂັ້ມງວດຕາມກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982, ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ຊຸກຍູ້ການສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ຂຶ້ນໂດຍໄວ.
ພາຍຫຼັງການພົບປະເຈລະຈາ, ທ່ານນາຍົກລັດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ຊິນໂຊ ອາເບະ ໄດ້ເປັນສັດຂີພະຍານໃນພິທີມອບຮັບເອກະສານການຮ່ວມມື 5 ສະບັບ ລະຫວ່າງບັນດາກະຊວງ, ຂະແໜງການຂອງສອງປະເທດ, ໃນນັ້ນມີເອກະສານການຮ່ວມມື 4 ສະບັບ ກ່ຽວກັບທຶນກູ້ຢືມ ODA ດ້ວຍຈຳນວນເງິນທັງໝົດ 166 ຕື້ເຢນ (ເທົ່າກັບ 1,5 ຕື້ໂດລາສະຫະລັດ), ປະກອບດ້ວຍ ຈົດໝາຍທາງການກ່ຽວກັບ ໂຄງການທາງລົດໄຟຕົວເມືອງໝາຍເລດ I ນະຄອນໂຮ່ຈີມິນ, ສາຍທາງ ເບ໊ນແທັ່ງ - ສວຍຕຽນ; 3 ສັນຍາກູ້ຢືມເງິນໃຫ້ 3 ໂຄງການ: ກໍ່ສ້າງໂຮງງານໄຟຟ້າຄວາມຮ້ອນ ຖາຍບິ່ງ ແລະ ສາຍໄຟນຳສົ່ງໄຟຟ້າ (54,982 ຕື້ເຢນ ເທົ່າກັບ 500 ລ້ານໂດລາສະຫະລັດ); ປົວແປງສິ່ງແວດລ້ອມທາລາ ຢູ່ນະຄອນໂຮ່ຈີມິນ ໄລຍະທີ 2 (ການປ່ອຍເງິນກູ້ຄັ້ງທີ 3; 20,967 ຕື້ເຢນ ເທົ່າກັບ 191 ລ້ານໂດລາສະຫະລັດ); ໂຄງການທາງລົດໄຟຕົວເມືອງໝາຍເລດ I ນະຄອນໂຮ່ຈີມິນ, ສາຍທາງ ເບ໊ນແທັ່ງ - ສວຍຕຽນ (ການປ່ອຍເງິນກູ້ຄັ້ງທີ 3; ມູນຄ່າ 90,175 ຕື້ເຢນ ເທົ່າກັບ 820 ລ້ານໂດລາສະຫະລັດ) ແລະ ສັນຍາຊື້ຂາຍຫຸ້ນລະຫວ່າງ ສະຫະບໍລິສັດການເດີນອາກາດຫວຽດນາມ ແລະ ກຸ່ມບໍລິສັດການເດີນອາກາດ ເອ.ແອນ.ເອ. ໂຮນດິງ ຈຳກັດ (ANA Holdings Inc).
ພາຍຫຼັງສຳເລັດສິ້ນສຸດພິທີມອບຮັບເອກະສານການຮ່ວມມື, ນາຍົກລັດຖະມົນຕີທັງສອງໄດ້ມີການພົບປະກັບນັກຂ່າວ ເພື່ອແຈ້ງຂ່າວກ່ຽວກັບຜົນສຳເລັດຂອງການພົບປະເຈລະຈາລະຫວ່າງສອງຝ່າຍ.
ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ໃຫ້ກຽດຕ້ອນຮັບຜູ້ນຳຂອງອົງການ, ວິສາຫະກິດຍີ່ປຸ່ນຈຳນວນໜຶ່ງເຊັ່ນ ປະທານອົງການຮ່ວມມືສາກົນຂອງຍີ່ປຸ່ນ (JICA) ທ່ານ ຊ.ກິຕາໂອກະ, ປະທານກິຕິມະສັກ ກຸ່ມບໍລິສັດ ຄ.ອີໂອຣີຮີໂກະ, ຜູ້ວ່າລາຊະການແຂວງ ຮ.ໂອມູຣາ; ໄປຢາມຟາມກະເສດ ໂຢໂກຢາມາ ທີ່ແຂວງມາຍຈິ.
ການຢ້ຽມຢາມປະເທດຍີ່ປຸ່ນຂອງທ່ານນາຍົກລັດຖະມົນຕີ ຫງວຽນຊວນຝຸກ ໄດ້ສຳເລັດສິ້ນສຸດລົງຢ່າງຈົບງາມ, ປະກອບສ່ວນຢັ້ງຢືນການພັບພັນຫວຽດນາມ - ຍີ່ປຸ່ນ ໃນ 43 ປີທີ່ຜ່ານມາ ໄດ້ມີການຂະຫຍາຍຕົວຢ່າງກະໂດດຂັ້ນ, ຮອບດ້ານ ແລະ ເລິກເຊິ່ງ./.
ສັງລວມໂດຍ ເຟືອນຈ່າ
