ຫວຽດນາມຍາມໃດກໍໃຫ້ຄວາມສຳຄັນ ແກ່ການພັດທະນາສາຍພົວພັນມິດຕະພາບ ແລະ ການຮ່ວມມືຫຼາຍດ້ານກັບ ຣູມານີ
ວກ.ອອນໄລ - ໂດຍຕອບສະໜອງຕາມຄຳເຊີນຂອງທ່ານ ຫງວຽນຊວນຝຸກ ນາຍົກລັດຖະມົນຕີແຫ່ງສາທາລະນະລັດ ສັງຄົມນິຍົມ ຫວຽດນາມ, ທ່ານ ດາຊຽນ ຊີໂອບົດ ນາຍົກລັດຖະມົນຕີຣູມານີ ໄດ້ມາຢ້ຽມຢາມປະເທດຫວຽດນາມຢ່າງເປັນທາງການ ແຕ່ວັນທີ 11 ຫາວັນທີ 14 ກໍລະກົດ 2016.
ນາຍົກລັດຖະມົນຕີຫວຽດນາມ ຫງວຽນຊວນຝຸກ ຕ້ອນຮັບນາຍົກລັດຖະມົນຕີຣູມານີ ດາຊຽນ ຊີໂອບົດ. (ພາບ: TTXVN)
ໃນຂອບຂອງການຢ້ຽມຢາມ, ທ່ານນາຍົກລັດຖະມົນຕີຣູມານີ ດາຊຽນ ຊີໂອບົດ ໄດ້ພົບປະສົນທະນາກັບທ່ານນາຍົກລັດຖະມົນຕີ ຫງວຽນຊວນຝຸກ; ພົບປະຫາລືກັບກັບທ່ານເລຂາທິການໃຫຍ່ ຫງວຽນຝູຈ້ອງ, ປະທານປະເທດ ເຈິ່ນດ້າຍກວາງ; ໃຫ້ກຽດເຂົ້າຮ່ວມເວທີປາໄສວິສາຫະກິດຫວຽດນາມ - ຣູມານີ; ພົບປະກັບສະມາຄົມມິດຕະພາບຫວຽດນາມ - ຣູມານີ; ໄປຢາມແຂວງກວ໋າງນິງ.
ທ່ານຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ພົບປະກັບທ່ານລາຈາ ໂກມາແນສະກູ ລັດຖະມົນຕີກະຊວງການຕ່າງປະເທດຣູມານີ.
ໃນການພົບປະເຫຼົ່ານັ້ນ, ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການການເມືອງ, ເສດຖະກິດ - ສັງຄົມ ແລະ ສິ່ງບຸລິມະສິດຕ່າງໆ ໃນນະໂຍບາຍການຕ່າງປະເທດ ແລະ ນະໂຍບາຍເສດຖະກິດ ຂອງແຕ່ລະປະເທດ, ແລກປ່ຽນກ່ຽວກັບບັນດາມາດຕະການອັນລະອຽດ ເພື່ອຊຸກຍູ້ການຮ່ວມມືສອງຝ່າຍ, ສົນທະນາກ່ຽວກັບບັນດາບັນຫາສາກົນ ແລະ ພາກພື້ນ ທີ່ທັງສອງຝ່າຍມີຄວາມສົນໃຈ.
ທ່ານນາຍົກລັດຖະມົນຕີ ຫງວຽນຊວນຝຸກ ຢັ້ງຢືນຫວຽດນາມຍາມໃດກໍໃຫ້ຄວາມສຳຄັນແກ່ການພັດທະນາສາຍພົວພັນມິດຕະພາບ ແລະ ການຮ່ວມມືຫຼາຍດ້ານ ກັບບັນດາປະເທດເພື່ອນມິດທີ່ເປັນມູນເຊື້ອຢູ່ພາກກາງເອີຣົບຕາເວັນອອກ, ໃນນັ້ນມີປະເທດຣູມານີ; ສະແດງຄວາມອວຍພອນຊົມເຊີຍປະເທດຣູມານີ ທີ່ໄດ້ຮັບຜົນສຳເລັດອັນໃຫຍ່ຫຼວງ ໃນການພັດທະນາປະເທດ ແລະ ເຊື່ອມໂຍງເຂົ້າກັບເອີຣົບ.
ທ່ານນາຍົກລັດຖະມົນຕີຣູມານີ ດາຊຽນ ຊີໂອບົດ ໄດ້ຕີລາຄາສູງຕໍ່ບັນດາຜົນສຳເລັດທີ່ໜ້າປະທັບໃຈ ຊຶ່ງປະຊາຊົນຫວຽດນາມຍາດມາໄດ້ ໃນການພັດທະນາເສດຖະກິດ - ສັງຄົມ.
ທ່ານນາຍົກລັດຖະມົນຕີທັງສອງໄດ້ພ້ອມກັນທົບທວນສາຍພົວພັນມິດຕະພາບອັນເປັນມູນເຊື້ອລະຫວ່າງຫວຽດນາມ ແລະ ຣູມານີ ໃນ 66 ປີທີ່ຜ່ານມາ, ແລະສະແດງຄວາມດີໃຈ ຊົມເຊີຍຕໍ່ຜົນງານຕ່າງໆ ທີ່ບັນລຸໄດ້ໃນບັນດາຂົງເຂດຮ່ວມມືສອງຝ່າຍ, ພ້ອມນັ້ນກໍເຫັນວ່າຍັງມີຄວາມສາມາດບົ່ມຊ້ອນຫຼາຍ ເພື່ອເປີດກວ້າງການຮ່ວມມືລະຫວ່າງສອງປະເທດ. ທ່ານຜູ້ນຳລັດຖະບານທັງສອງທ່ານໄດ້ເນັ້ນເປັນພິເສດເຖິງຄວາມເອົາໃຈໃສ່ພັດທະນາການພົວພັນສອງຝ່າຍທີ່ມີຢູ່ໃຫ້ຂະຫຍາຍຕົວຍິ່ງກວ່າອີກ.
ສອງຝ່າຍຢັ້ງຢືນວ່າ ການສົນທະນາການເມືອງມີບົດບາດສຳຄັນເປັນພິເສດ ໃນການເພີ່ມທະວີຄວາມເຂົ້າໃຈ ແລະ ຄວາມໄວ້ວາງໃຈຊຶ່ງກັນແລະກັນ ລະຫວ່າງສອງປະເທດ ກໍຄືຊຸກຍູ້ການພົວພັນສອງຝ່າຍ. ເພື່ອແນໃສ່ຈຸດໝາຍນີ້, ການນຳທັງສອງໄດ້ເຫັນດີເປັນເອກະສັນ ເພີ່ມທະວີການພົບປະຂັ້ນສູງ ແລະ ຍາດແຍ່ງບັນດາການປະຊຸມສາກົນ ກໍຄືການພົບປະອື່ນ ເພື່ອແລກປ່ຽນຄວາມຄິດຄວາມເຫັນກ່ຽວກັບບັນດາບັນຫານທີ່ສອງຝ່າຍມີຄວາມສົນໃຈ.
ທ່ານນາຍົກລັດຖະມົນຕີທັງສອງໄດ້ເຫັນດີເປັນເອກະສັນ ຈະສືບຕໍ່ເປີດກວ້າງການຮ່ວມມືເສດຖະກິດໃນຫຼາຍຮູບແບບ, ເອົາໃຈໃສ່ເປັນພິເສດເຖິງບາງຂົງເຂດຕົ້ນຕໍ, ຄື: ການຄ້າ, ພະລັງງານ, ທະນາຄານ, ກະສິກຳ, ອຸດສາປະກຳປະດິດເຄື່ອງ, ໂຄງສ້າງພື້ນຖານ, ເຕັກໂນໂລຊີສື່ສານ, ວິທະຍາສາດ ແລະ ເຕັກໂນໂລຊີ, ປົກປັກຮັກສາສິ່ງແວດລ້ອມ, ການປ່ຽນແປງສະພາບພູມິອາກາດ, ການທ່ອງທ່ຽວ ກໍຄືບັນດາຂົງເຂດອື່ນທີ່ທັງສອງຝ່າຍມີຄວາມສົນໃຈ.
ທ່ານນາຍົກລັດຖະມົນຕີທັງສອງໄດ້ພ້ອມກັນພິຈາລະນາຄວາມສາມາດຮ່ວມມືລະຫວ່າງບັນດາເຂດອຸດສາຫະກຳ, ກຸ່ມທຸລະກິດ ແລະ ບັນດາຂົງເຂດມີຄວາມສາມາດແຂ່ງຂັນສູງ ຂອງຫວຽດນາມແລະຣູມານີ, ພ້ອມນັ້ນກໍສົ່ງເສີມການເຂົ້າຮ່ວມໃນງານວາງສະແດງສິນຄ້າການຄ້າສາກົນ ທີ່ແຕ່ລະຝ່າຍເປັນຜູ້ຈັດຕັ້ງ.
ສອງຝ່າຍໃຫ້ຄວາມຊົມເຊີຍຢ່າງສຸດໃຈ ຕໍ່ການສຳເລັດສິ້ນສຸດການເຈລະຈາສັນຍາການຄ້າເສດລີຫວຽດນາມ - ອີຢູ ແລະ ສະແດງຄວາມເຊື່ອໝັ້ນວ່າ ການລົງນາມແລະຜັນຂະຫຍາຍປະຕິບັດສັນຍາສະບັບນີ້ໂດຍໄວ ຈະຊຸກຍູ້ການຮ່ວມມືດ້ານການຄ້າແລະການລົງທຶນ ລະຫວ່າງຫວຽດນາມແລະຣູມານີ ໃຫ້ຂະຫຍາຍຕົວຢ່າງແຂງແຮງ, ເປີດໂອກາດຮັບຮອງລະບົບເສດຖະກິດຕະຫຼາດຂອງຫວຽດນາມ.
ສອງຝ່າຍໄດ້ເນັ້ນເຖິງຄວາມສຳຄັນ ຂອງການເພີ່ມທະວີການຮ່ວມມືສອງຝ່າຍ ໃນຂົງເຂດວິທະຍາສາດ ແລະ ການປະດິດສ້າງ; ເຫັນດີເປັນເອກະສັນຊຸດຍູ້ການລົງນາມໃນໂຄງການຮ່ວມມືໃໝ່ ລະຫວ່າງກະຊວງວິທະຍາສາດແລະເຕັກໂນໂລຊີ ແຫ່ງ ສສ ຫວຽດນາມ ກັບອົງການແຫ່ງຊາດກ່ຽວກັບການຄົ້ນຄວ້າວິທະຍາສາດແລະການປະດິດສ້າງ ຂອງຣູມານີ ໄລຍະປີ 2017 - 2018.
ທ່ານນາຍົກລັດຖະມົນຕີທັງສອງໄດ້ສະແດງຄວາມຊົມເຊີຍ ຕໍ່ການລົງນາມໃນເອກະສານທີ່ສຳຄັນຈຳນວນໜຶ່ງ ເພື່ອແນໃສ່ເປີດກວ້າງຂອບເຂດການຮ່ວມມືສອງຝ່າຍ. ທ່ານນາຍົກລັດຖະມົນຕີຣູມານີ ແຈ້ງໃຫ້ຊາບວ່າ ລັດຖະບານຣູທານີໄດ້ຕົກລົງເພີ່ມທຶນການສຶກສາຂຶ້ນທົບສອງເທົ່າ ໃຫ້ແກ່ນັກຮຽນນັກສຶກສາຫວຽດນາມທີ່ຢາກໄປຮ່ຳຮຽນຢູ່ຣູມານີ.
ທ່ານນາຍົກລັດຖະມົນຕີທັງສອງຢັ້ງຢືນຄວາມຈຳເປັນຕ້ອງເພີ່ມທະວີການຮ່ວມມືລະຫວ່າງບັນດາອົງການຫວຽດນາມ ແລະ ຣູມານີ ໃນຂົງເຂດປະຕິບັດກົດໝາຍ ແລະ ຊົນເຊີຍການເຈລະຈາເຊັນສັນຍາຮ່ວມມືລະຫວ່າງສອງປະເທດ ກ່ຽວກັບການປ້ອງກັນແລະຕ້ານການກໍ່ການຮ້າຍ, ອາຊະຍາກຳທີ່ມີການຈັດຕັ້ງ ແລະ ອາຊະຍາກຳອື່ນ.
ທ່ານນາຍົກລັດຖະມົນຕີທັງສອງກ່າວປະນາມຢ່າງແຂງແຮງ ຕໍ່ລັດທິກໍ່ການຮ້າຍສາກົນ, ລັດທິຄວາມຮຸນແຮງສຸດຂີດພາຍໃຕ້ທຸກຮູບການ ແລະ ການສະແດງອອກຂອງມັນ, ຊຶ່ງສອງຝ່າຍໄດ້ສະແດງໃຫ້ເຫັນເຖິງຄວາມຕັດສິນໃຈເຮັດໃຫ້ການພົວພັນຮ່ວມມືໃນຂົງເຂດນີ້ເລິກເຊິ່ງຕື່ມອີກ.
ທ່ານຜູ້ນຳລັດຖະບານທັງສອງທ່ານໄດ້ໃຫ້ຄຳໝັ້ນສັນຍາຈະໃຫ້ການຊ່ວຍເຫຼືອແກ່ການເພີ່ມທະວີການສັງສັນລະຫວ່າງປະຊາຊົນ ຊຶ່ງເປັນໜຶ່ງໃນບັນດາມາດຕະການທີ່ສຳຄັນເພື່ອເພີ່ມທະວີຄວາມເຂົ້າໃຈຊຶ່ງກັນແລະກັນ ແລະ ຂະຫຍາຍສາຍພົວພັນສອງຝ່າຍແບບຍືນຍົງ.
ທ່ານນາຍົກລັດຖະມົນຕີທັງສອງພ້ອມກັນຕີລາຄາສູງຕໍ່ບົດບາດທີ່ພົ້ນເດັ່ນ ຂອງສະມາຄົມມິດຕະພາບຫວຽດນາມ - ຣູມານີ ໃນການຊຸກຍູ້ການພົວພັນມິດຕະພາບ, ການແລກປ່ຽນເສດຖະກິດ ແລະ ວັດທະນະທຳ ລະຫວ່າງສອງປະເທດ ໃນ 25 ປີແຫ່ງການເຄື່ອນໄຫວຂອງສະມາຄົມ, ດ້ວຍບົດບາດເປັນຂົວຕໍ່ທີ່ໝັ້ນແກ່ນ ລະຫວ່າງປະຊາຊົນສອງປະເທດຫວຽດນາມ ແລະ ຣູມານີ.
ທ່ານນາຍົກລັດຖະມົນຕີທັງສອງໄດ້ສົນທະນາແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນ ທີ່ທັງສອງຝ່າຍມີຄວາມສົນໃຈ, ເນັ້ນເຖິງການຮ່ວມມືເປັນຢ່າງດີລະຫວ່າງຫວຽດນາມ ແລະ ຣູມານີໃນຂອບຂອງເວທີການຮ່ວມມືອາຊີ - ເອີຣົບ (ASEM). ທ່ານນາຍົກລັດຖະມົນຕີທັງສອງສະແດງຄວາມສະໜັບສະໜູນຢ່າງສູງ ຕໍ່ການຂະຫຍາຍຂອງ ASEM ແລະ ຮັບຮູ້ໄດ້ວ່າ ການເຊື່ອມຕໍ່ແມ່ນປັດໄຈທີ່ສຳຄັນໃນການສ້າງຄວາມໄວ້ວາງໃຈ ແລະ ຄວາມໝັ້ນຄົງ. ການຮ່ວມມືນີ້ແມ່ນຈຳເປັນສຳລັບອາຊີ ແລະ ເອຣົບ, ສ້າງເງື່ອນໄຂເພື່ອພ້ອມກັນແກ້ໄຂສິ່ງທ້າທາຍທົ່ວໂລກ ແລະ ພາກພື້ນ. ເພື່ອແນໃສ່ຈຸດປະສົງນີ້, ທ່ານຜູ້ນຳລັດທະບານທັງສອງໄດ້ເນັ້ນເຖິງຄວາມສະໜັບສະໜູນຕໍ່ການແກ້ໄຂຂໍ້ພິພາດຕ່າງໆ ດ້ວຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດກ່ຽວກັບກົດໝາຍທະເລ.
ສອງຝ່າຍເຫັນດີເປັນເອກະສັນຈະສືບຕໍ່ສົມທົບກັນປະຕິບັດບັນດາໂຄງການອະນຸພາກພື້ນແມ່ນ້ຳຂອງ ແລະ ແມ່ນ້ຳດານູບ ຊຶ່ງໄດ້ເປັນເອກະພາບໃນຂອບຂອງການສົນທະນາ ASEM ກ່ຽວກັບການພັດທະນະແບບຍືນຍົງ, ດ້ວຍການເຂົ້າຮ່ວມຂອງບັນດາອົງການສູນກາງ ແລະ ທ້ອງຖິ່ນ.
ສອງຝ່າຍໃຫ້ຄຳໝັ້ນສັນຍາຈະສືບຕໍ່ເພີ່ມທະວີການຮ່ວມມືສອງຝ່າຍໃນຂອບຂອງສະຫະປະຊາຊາດ, ASEM, ການພັວພັນຫວຽດນາມ - ອີຢູ ແລະ ໃນບັນດາກົນໄກຮ່ວມມືອາຊຽນ - ອີຢູ.
ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຂອບອົກຂອບໃຈຕໍ່ລັດຖະບານຣູມານີ ທີ່ໄດ້ສ້າງເງື່ອນໄຂອຳນວຍຄວາມສະດວກໃຫ້ວົງຄະນາຍາດຊາວຫວຽດນາມ ດຳລົງຊີວິດ ເຮັດວຽກ ແລະ ທຳການຜະລິດທຸລະກິດຢູ່ປະເທດຣູມານີ. ທ່ານນາຍົກລັດຖະມົນຕີຣູມານີ ດາຊຽນ ຊີໂອບົດ ຕີລາຄາສູງຕໍ່ການປະກອບສ່ວນຂອງຊາວຫວຽດນາມ ເຂົ້າໃນການເພີ່ມທະວີນ້ຳໄຈມິດຕະພາບລະຫວ່າງສອງປະເທດ; ຢັ້ງຢືນວ່າ ຣູມານີຈະສືບຕໍ່ສ້າງເງື່ອນໄຂອຳນວຍຄວມສະດວກໃຫ້ຊາວຫວຽດນາມຢູ່ຣູມານີ ທຳມາຫາກິນເປັນປົກກະຕິ ແລະ ດຳລົງຊີວິດກົມກຽວກັບທ້ອງຖິ່ນ.
ສອງຝ່າຍສະແດງຄວາມພຶງພໍໃຈຕໍ່ຜົນສຳເລັດຂອງການຢ້ຽມຢາມຫວຽດນາມຢ່າງເປັນທາງການ ຂອງທ່ານນາຍົກລັດຖະມົນຕີຣູມານີ ດາຊຽນ ຊີໂອບົດ; ຖືວ່ານີ້ເປັນເຫດການການເມືອງທີ່ມີຄວາມໝາຍສຳຄັນ ໃນການປັບປຸງ ແລະ ເພີ່ມທະວີການພົບພັນມິດຕະພາບອັນເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງຫວຽດນາມ ແລະ ຣູມານີ.
ທ່ານນາຍົກລັດຖະມົນຕີຣູມານີ ດາຊຽນ ຊີໂອບົດ ສະແດງຄວາມຂອບອົກຂອບໃຈຢ່າງຈິງໃຈຕໍ່ຫວຽດນາມ ທີ່ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ແລະ ຄະນະຜູ້ແທນຂັ້ນສູງຣູມານີ ຢ່າງສຸດອົກສຸດໃຈ ແລະ ສົມກຽດ. ເນື່ອງໃນໂອກາດນີ້, ທ່ານນາຍົກລັດຖະມົນຕີຣູມານີ ຖືເປັນກຽດເຊື້ອເຊີນທ່ານນາຍົກລັດຖະມົນຕີ ຫງວຽນຊວນຝຸກ ໄປຢ້ຽມຢາມປະເທດຣູມານີຢ່າງເປັນທາງການ ໃນເວລາທີ່ເໝາະສົມ. ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຂອບອົກຂອບໃຈ ແລະ ຍິນດີຮັບຄຳເຊີນ. ເວລາການຢ້ຽມຢາມຈະໄດ້ຕົກລົງກັນໂດຍຜ່ານເສັ້ນທາງການທູດ./.
ສັງລວມໂດຍ ບນ
