ທ່ານນາຍົກລັດຖະມົນຕີ ຫງວຽນຊວນຝຸກ ຕ້ອນຮັບ ແລະ ພົບປະເຈລະຈາກັບ ທ່ານ ຣໍແບດ ຟິດຊໍ ນາຍົກລັດຖະມົນຕີແຫ່ງ ສາທາລະນະລັດ ສະໂລວາກີ. (ພາບ: TTXVN)
ໃນຂອບການຢ້ຽມຢາມ, ທ່ານ ຣໍແບດ ຟິດຊໍ ນາຍົກລັດຖະມົນຕີແຫ່ງ ສາທາລະນະລັດ ສະໂລວາກີ ໄດ້ພົບປະເຈລະຈາກັບ ທ່ານນາຍົກລັດຖະມົນຕີ ຫງວຽນຊວນຝຸກ; ພົບປະກັບ ເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ, ປະທານປະເທດຫວຽດນາມ ເຈິ່ນດ້າຍກວາງ ແລະ ປະທານສະພາແຫ່ງຊາດ ຫງວຽນທີ້ກິມເງິນ; ໃຫ້ກຽດເຂົ້າຮ່ວມເວທີປາໄສວິສາຫະກິດຫວຽດນາມ - ສະໂລວາກີ; ພົບປະກັບ ສະມາຄົມມິດຕະພາບຫວຽດນາມ - ສະໂລວາກີ; ໄປຢາມນະຄອນດ່າໜັ໊ງ. ທ່ານນາຍົກແລະຄະນະຜູ້ແທນລັດຖະບານແຫ່ງສາທາລະນະລັດ ສະໂລວາກີ ກໍໄດ້ໄປວາງພວງມາລາທີ່ອະນຸສາວະລີນັກຮົບວິລະຊົນທີ່ໄດ້ເສຍຊີວິດ; ວາງພວງມາລາໄວ້ອາໄລທີ່ອະນຸສາວະລີຫໍສົບທ່ານປະທານໂຮ່ຈິມິນ.
ບັນດາຫານພົບປະສອງຝ່າຍໄດ້ດຳເນີນໄປໃນບັນຍາກາດມິດຕະພາບ ແລະ ເຂົ້າໃຈຊຶ່ງກັນແລະກັນ. ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການການເມືອງ, ເສດຖະກິດ - ສັງຄົມ ແລະ ບັນດາບັນຫາບຸລິມະສິດໃນນະໂຍບາຍການຕ່າງປະເທດ ແລະ ເສດຖະກິດການຕ່າງປະເທດ ຂອງແຕ່ລະປະເທດ, ສົນທະນາແລກປ່ຽນກ່ຽວກັບບັນດາມາດຕະການອັນລະອຽດ ເພື່ອຊຸກຍູ້ການພົວພັນສອງຝ່າຍ, ສົນທະນາບັນດາບັນຫາສາກົນ ແລະ ພາກພື້ນ ທີ່ທັງສອງຝ່າຍມີຄວາມສົນໃຈຮ່ວມກັນ.
ສອງຝ່າຍຕີລາຄາສູງບາດກ້າວຂະຫຍາຍຕົວອັນຕັ້ງໜ້າ ຂອງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຫຼາຍດ້ານ ລະຫວ່າງຫວຽດນາມ ແລະ ສະໂລວາກີ ໃນ 66 ປີທີ່ຜ່ານມາ; ສະແດງຄວາມຊົມເຊີຍຕໍ່ການຮັກສາແລະເພີ່ມທະວີການສົນທະນາການເມືອງ ລະຫວ່າງການນຳຂັ້ນສູງຂອງສອງປະເທດ ກໍຄືການແລກປ່ຽນຄະນະຜູ້ແທນລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ; ຊຶ່ງສະແດງໃຫ້ເຫັນເຖິງຄວາມຕັດສິນໃຈການເມືອງ, ສ້າງກຳລັງຊຸກດັນການປັບປຸງຄວາມພົວພັນຮ່ວມມື ລະຫວ່າງສອງປະເທດໃນບັນດາຂົງເຂດທີ່ມີຄວາມສົນໃຈ ແລະ ມີຜົນປະໂຫຍດຮ່ວມກັນ.
ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນ ແລະ ສະໜັບສະໜູນຊຶ່ງກັນແລະກັນ ໃນບັນດາບັນຫາສາກົນ ແລະ ພາກພື້ນ ທີ່ສອງຝ່າຍມີຄວາມສົນໃຈ, ຮ່ວມມືກັນຮັບມືກັບບັນດາບັນຫາທົ່ວໂລກຄື ການປ່ຽນແປງສະພາບພູມິອາກາດ ແລະ ຄວາມໝັ້ນຄົງດ້ານແຫຼ່ງນ້ຳ, ໃນນັ້ນມີການຮ່ວມມືຄຸ້ມຄອງແຫຼ່ງນ້ຳໃນແມ່ນ້ຳຂອງ ແລະ ແມ່ນ້ຳດານູບ; ໃຫ້ຄຳໝັ້ນໝາຍຈະຮ່ວມມືກັນຢ່າງແໜ້ນແຟ້ນກວ່າອີກ ໃນສະຫະປະຊາຊາດ ແລະ ໃນເວທີປາໄສການຮ່ວມມືອາຊີ - ເອີຣົບ (ASEM), ພິຈາລະນາສະໜັບສະໜູນກັນສະໝັກຮັບເລືອກຕັ້ງເຂົ້າໃນບັນດາອົງການ ແລະ ເວທີປາໄສສາກົນ. ສອງຝ່າຍໃຫ້ຄຳໝັ້ນສັນຍາຮັກສາສັນຕິພາບ, ຊຸກຍູ້ຄວາມໝັ້ນຄົງທາງທະເລ, ເສລີພາບໃນການເດີນທະເລ ເດີນອາກາດ ແລະ ການຄ້າສີນຄ້າຖືກກົດໝາຍ ທີ່ບໍ່ຖືກກີດກັ້ນຂັດຂວາງຢູ່ທະເລຕາເວັນອອກ. ສອງຝ່າຍເຫັນດີເປັນເອກະສັນກ່ຽວກັບການແກ້ໄຂຂໍ້ພິພາດທາງເຂດແດນ ແລະ ເຂດທະເລດ້ວຍສັນຕິວິທີ, ສອດຄ່ອງກັບກົດໝາຍສາກົນ, ກົດບັດສະຫະປະຊາຊາດ, ອະນຸສັນຍາສະຫະປະຊາຊາດວ່າດ້ວຍກົດໝາຍທະເລດປີ 1982, ປະຕິບັດຢ່າງເຂັ້ມງວດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ເຈລະຈາສ້າງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໃຫ້ສຳເລັດໂດຍໄວ.
* ຕອນເຊົ້າວັນທີ 18 ກໍລະກົດ 2016, ພາຍຫຼັງພິທີຕ້ອນຮັບທ່ານນາຍົກ ຣໍແບດ ຟິດຊໍ ພ້ອມຄະນະຜູ້ແທນລັດຖະບານແຫ່ງ ສາທາລະນະລັດ ສະໂລວາດີ ຢ່າງສົມກຽດທີ່ທຳນຽບປະທານປະເທດ, ທ່ານນາຍົກລັດຖະມົນຕີ ຫງວຽນຊວນຝຸກ ໄດ້ພົບປະເຈລະຈາກັບທ່ານນາຍົກລັດຖະມົນຕີ ຣໍແບດ ຟິດຊໍ. ໃນການພົບປະເຈລະຈານັ້ນ, ທ່ານນາຍົກ ຫງວຽນຊວນຝຸກ ໄດ້ສະແດງຄວາມເຊື່ອໝັ້ນວ່າ ການຢ້ຽມຢາມຈະປະກອບສ່ວນສ້າງກຳລັງຊຸກດັນ ໃຫ້ການພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຫຼາຍດ້ານລະຫວ່າງສອງປະເທດຂະຫຍາຍຕົວເຂົ້າສູ່ລວງເລິກ ມີປະສິດທິຜົນຕົວຈິງໃນໄລຍະໃໝ່. ທ່ານນາຍົກ ຫງວຽນຊວນຝຸກ ຢັ້ງຢືນ ຫວຽດນາມຍາມໃດກໍໃຫ້ຄວາມສຳຄັນແກ່ການປັບປຸງ ແລະ ຂະຫຍາຍສາຍພົວພັນມິດຕະພາບກັບບັນດາປະເທດເພື່ອນມິດທີ່ເປັນມູນເຊື້ອ, ໃນນັ້ນມີປະເທດສະໂລວາກີ.
ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມອວຍພອນຊົນເຊີຍຕໍ່ບັນດາຜົນສຳເລັດທີ່ລັດຖະບານ ແລະ ປະຊາຊົນສະໂລວາກີຍາດມາໄດ້ ໃນການພັດທະນາເສດຖະກິດ - ສັງຄົມ ແລະເຊື່ອມໂຍງເຂົ້າກັບເອີຣົບ, ອວຍພອນຊົນເຊີຍທ່ານນາຍົກລັດຖະມົນຕີ ຣໍແບດ ຟິດຊໍ ແລະລັດຖະບານສະໂລວາກີ ທີ່ໄດ້ຮັບຕຳແໜ່ງເປັນປະທານໝູນວຽນຂອງສະຫະພາບເອີຣົບ (ອີຢູ), ທ່ານນາຍົກຫງວຽນຊວນຝຸກ ສະແດງຄວາມເຊື່ອໝັ້ນວ່າ ສະໂລວາກີ ຈະສຳເລັດໜ້າທີ່ອັນໜັກໜ່ວງນີ້ຢ່າງດີເດັ່ນ ໃນໄລຍະທີ່ ອີຢູ ກຳລັງປະເຊີນໜ້າກັບສິ່ງທ້າທາຍຫຼາຍຢ່າງ.
ທ່ານນາຍົກລັດຖະມົນຕີ ຣໍແບດ ຟິດຊໍ ສະແດງຄວາມຂອບອົກຂອບໃຈຢ່າງຈິງໃຈ ຕໍ່ການທີ່ຫວຽດນາມ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງແຫ່ງສາທາລະນະລັດ ສະໂລວາກີ ຢ່າງອົບອຸ່ນ ແລະສົມກຽດ. ທ່ານນາຍົກ ຣໍແບດ ຟິດຊໍ ຕີລາຄາສູງບັນດາຜົນສຳເລັດທີ່ປະຊາຊົນຫວຽດນາມຍາດມາໄດ້ ໃນພາລະກິດການປ່ຽນແປງໃໝ່, ກໍຄືບົດບາດ ທີ່ຕັ້ງສາກົນຂອງຫວຽດນາມນັບມື້ນັບໄດ້ຮັບການຍົກສູງ; ທ່ານຢັ້ງຢືນວ່າ ສະໂລວາກີ ຍາມໃດກໍຖືຫວຽດນາມເປັນຄູ່ຮ່ວມມືມິດຕະພາບທີ່ເປັນມູນເຊື້ອ ແລະ ມຸ່ງຫວັງພັດທະນາຄວາມພົວພັນຮ່ວມມືກັບຫວຽດນາມໃນຫຼາຍຂົງເຂດ.
ທ່ານນາຍົກລັດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ຣໍແບດ ຟິດຊໍ ສະແດງຄວາມພຶງພໍໃຈກ່ຽວກັບບາດກ້າວພັດທະນາຢ່າງຕັ້ງໜ້າຂອງຄວາມພົວພັນຫວຽດນາມ - ສະໂລວາກີ ໃນເວລາທີ່ຜ່ານມາ, ພິເສດແມ່ນສາຍພົວພັນການເມືອງ, ການຕ່າງປະເທດທີ່ຈົບງາມ ແລະ ການປະສານສົມທົບຢ່າງມີປະສິດທິຜົນໃນເວທີສາກົນ, ປະກອບສ່ວນອັນຕັ້ງໜ້າເຂົ້າໃນການພັດທະນາຂອງແຕ່ລະປະເທດ.
ທ່ານນາຍົກລັດຖະມົນຕີທັງສອງໄດ້ຕີລາຄາສູງບົດບາດຂອງ ຄະນະກຳມະການຮ່ວມວ່າດ້ວຍການຮ່ວມມືເສດຖະກິດ ລະຫວ່າງລັດຖະບານ ສສ.ຫວຽດນາມ ແລະ ລັດຖະບານ ສ.ສະໂລວາກີ; ຮັບຮູ້ບັນດາຄວາມສາມາດບົ່ງຊ້ອນ ແລະໂອກາດຮ່ວມມືອັນໃຫຍ່ຫຼວງ ລະຫວ່າງສອງປະເທດ. ສອງຝ່າຍເຫັນດີເປັນເອກະສັນຊີ້ນຳບັນດາກະຊວງ, ຂະແໜງການທີ່ກ່ຽວ ໃນການກະກຽມໃຫ້ແກ່ການປະຊຸມຄັ້ງທີ 2 ຂອງຄະນະກຳມະການຮ່ວມ ທີ່ຈະຈັດຂຶ້ນໃນເຄິ່ງຕົ້ນປີ 2017 ຢູ່ ບຣາຕິສະລາວາ (ສະໂລວາກີ). ນອກນັ້ນ, ສອງຝ່າຍກໍໄດ້ເຫັນດີຊຸກຍູ້ ແລະ ເພີ່ມທະວີການຮ່ວມມືໃນຂົງເຂດການສຶກສາ-ບຳລຸງສ້າງ, ວັດທະນາທຳ, ທ່ອງທ່ຽວ, ກົດໝາຍ, ວິທະຍາສາດ-ເຕັກໂນໂລຊີ.
ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຂອບອົກຂອບໃຈຕໍ່ລັດຖະບານສະໂລວາກີ ທີ່ໄດ້ສ້າງເງື່ອນໄຂອຳນວຍຄວມສະດວກ ໃຫ້ວົງຄະນາຍາດຊາວຫວຽດນາມໄດ້ດຳລົງຊີວິດ ເຮັດວຽກ ແລະ ທຳການຜະລິດທຸລະກິດຢູ່ສະໂລວາກີ. ທ່ານນາຍົກ ຣໍແບດ ຟິດຊໍ ຢັ້ງຢືນຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ວົງຄະນາຍາດຊາວຫວຽດນາມຢູ່ສະໂລວາກີ ທຳມາຫາກິນເປັນປົກກະຕິ ແລະ ດຳລົງຊີວິດກົມກຽວກັບທ້ອງຖິ່ນ.
ທ່ານນາຍົກລັດຖະມົນຕີ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ຣໍແບດ ຟິດຊໍ ສະແດງຄວາມພຶງພໍໃຈກ່ຽວກັບການສົມທົບຢ່າງແໜ້ນແຟ້ນ ແລະ ມີປະສິດທິຜົນ ລະຫວ່າງສອງປະເທດ ໃນເວທີສາກົນ. ທ່ານນາຍົກ ຣໍແບດ ຟິດຊໍ ຢັ້ງຢືນສະໂລວາກີ ສະໜັບສະໜູນການເພີ່ມທະວີສາຍພົວພັນລະຫວ່າງຫວຽດນາມ ແລະ ອີຢູ, ສະໜັບສະໜູນການເຊັນ ແລະ ໃຫ້ສັດຕະຍາບັນ ສັນຍາການຄ້າເສລີຫວຽດນາມ - ອີຢູ (EVFTA) ແລະ ຊຸກຍູ້ໃຫ້ ອີຢູ ຮັບຮອງເສດຖະກິດຕະຫຼາດອັນຄົບຖ້ວນຂອງຫວຽດນາມ ໂດຍໄວ.
ທ່ານນາຍົກລັດຖະມົນຕີ ຣໍແບດ ຟິດຊໍ ເຊີນທ່ານນາຍົກລັດຖະມົນຕີ ຫງວຽນຊວນຝຸກ ໄປຢ້ຽມຢາມປະເທດສະໂລວາກີຢ່າງເປັນທາງການໃນເວລາທີ່ຈະເຖິງນີ້. ທ່ານນາຍົກລັດຖະມົນຕີ ຫງວຽນຊວນຝຸກ ສະແດງຄວາມຂອບໃຈ ແລະຍິນດີຮັບຄຳເຊີນ.
* ຕອນບ່າຍວັນທີ 18 ກໍລະກົດ 2016, ຢູ່ທີ່ທຳນຽບປະທານປະເທດ, ທ່ານປະທານປະເທດ ເຈິ່ນດ້າຍກວາງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ຣໍແບດ ຟິດຊໍ. ທ່ານປະທານປະເທດ ຕີລາຄາສູງ ຜົນຂອງການພົບປະເຈລະຈາລະຫວ່າງນາຍົກລັດຖະມົນຕີຂອງສອງປະເທດ ແລະ ໄດ້ແບ່ງປັນຄວາມເຫັນກັບທ່ານນາຍົກ ຣໍແບດ ຟິດຊໍ ກ່ຽວກັບແງ່ມູມຕ່າງໆ ຂອງການພົວພັນເສດຖະກິດ ການຄ້າ ແລະ ການລົງທຶນສອງຝ່າຍ. ທ່ານປະທານປະເທດເນັ້ນວ່າ ສະໂລວາກີ ເປັນໜຶ່ງໃນບັນດາຄູ່ຮ່ວມມືການຄ້າແຖວໜ້າ ແລະຜູ້ລົງທຶນໃຫຍ່ທີ່ສຸດໃນພາກກາງແລະເອຣົບຕາເວັນອອກ ທີ່ໄດ້ລົງທຶນຢູ່ຫວຽດນາມ. ເພາະສະນັ້ນ, ຫວຽດນາມຫວັງວ່າ ສະໂລວາກີ ຈະສ້າງເງື່ອນໄຂອຳນວຍຄວາມສະດວກດີກວ່າອີກ ໃຫ້ສິນຄ້າຫວຽດນາມເຂົ້າໃນຕະຫຼາດສະໂລວາກີ, ເປັນຕົ້ນແມ່ນສິນຄ້າກະສິກຳ, ສິນຄ້າປ່າໄມ້, ອາຫານທະເລ, ເຄື່ອງຕັດຫຍິບ, ເກີບເຄື່ອງໜັງ... ພ້ອມນັ້ນ, ຫວຽດນາມກໍກຽມຄວາມພ້ອມຈະສ້າງເງື່ອນໄຂອຳນວຍຄວາມສະດວກໃຫ້ສິນຄ້າຂອງສະໂລວາກີ ເຂົ້າຕະຫຼາດຫວຽດນາມ. ທ່ານປະທານປະເທດຢັ້ງຢືນ, ໃນເວລາປະຕິບັດແນວທາງການຕ່າງປະເທດຫຼາຍຮູບຫຼາຍແບບ ຫຼາຍກ້ຳຫຼາຍຝ່າຍນັ້ນ, ຫວຽດນາມໄດ້ໃຫ້ຄວາມສຳຄັນເປັນພິເສດແກ່ການປັບປຸງ ແລະຂະຫຍາຍສາຍພົວພັນກັບສະໂລວາກີ ແລະ ບັນດາປະເທດເພື່ອນມິດທີ່ເປັນມູນເຊື້ອ ຢູ່ພາກກາງແລະເອີຣົບຕາເວັນອອກ.
ເນື່ອງໃນໂອກາດນີ້, ຜ່ານທ່ານນາຍົກລັດຖະມົນຕີ ຣໍແບດ ຟິດຊໍ, ທ່ານປະທານປະເທດ ເຈິ່ນດ້າຍກວາງ ຝາກຄຳຢ້ຽມຢາມຖາມຂ່າວເຖິງປະທານາທິບໍດີແຫ່ງ ສາທາລະນະລັດ ສະໂລວາກີ ທ່ານ ອານເດຣດ ກິດສະກາ ແລະຖືເປັນກຽດເຊື້ອເຊີນທ່ານປະທານາທິບໍດີມາຢາມປະເທດຫວຽດນາມຢ່າງເປັນທາງການໃນເວລາທີ່ເໝາະສົມ.
ສະແດງຄວາມປິຕິຍິນດີທີ່ໄດ້ມາຢ້ຽມຢາມປະເທດຫວຽດນາມຢ່າງເປັນທາງການ, ທ່ານນາຍົກລັດຖະມົນຕີ ຣໍແບດ ຟິດຊໍ ຢັ້ງຢືນ ບັນດາການຢ້ຽມຢາມ ການພົບປະຂອງການນຳຂັ້ນສູງສະໂລວາກີ ແລະ ຫວຽດນາມ ແມ່ນເປັນກຳລັງຊຸກດັນການຮ່ວມມືເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ ໃຫ້ຂະຫຍາຍຕົວຢ່າງແຂງແຮງ, ໃຫ້ສົມຄູ່ກັບກຳລັງຄວາມສາມາດບົ່ມຊ້ອນ ແລະ ຄວາມປະສົງຂອງແຕ່ລະປະເທດ. ໜຶ່ງໃນບັນດາກຳລັງໜູນທີ່ພວມໄດ້ຫັນເປັນຄວາມຈິງໃນການຢ້ຽມຢາມຄັ້ງນີ້ຄື ມີສັນຍາຂໍ້ຕົກລົງທີ່ສຳຄັນລະຫວ່າງສອງປະເທດໄດ້ຮັບການລົງນາມ. ທ່ານນາຍົກລັດຖະມົນຕີ ຣໍແບດ ຟິດຊໍ ເນັ້ນວ່າ, ໃນເວລາ 8 ປີທີ່ຜ່ານມາ, ມູນຄ່າການຄ້າສອງສົ້ນສະໂລວາກີ - ຫວຽດນາມ ໄດ້ເພີ່ມຂຶ້ນທົບ 15 ເທົ່າ ແຕ່ມັນຍັງໜ້ອຍພໍຄວນທຽບກັບຄວາມສາມາດບົ່ມຊ້ອນອັນໃຫຍ່ຫຼວງ, ມູນເຊື້ອຮ່ວມມືລະຫວ່າງສອງປະເທດ. ເພາະສະນັ້ນ, ພິຈາລະນາເຫັນວ່າຄວາມສຳຄັນຂອງການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດ, ລັດຖະບານສະໂລວາກີ ຈຶ່ງຈະຈັດຕັ້ງການປະຊຸມພິເສດໃນໄວໆນີ້ ເພື່ອພິຈາລະນາບັນຫາສະເພາະກ່ຽວກັບແງ່ມູມການຮ່ວມມືເສດຖະກິດລະຫວ່າງສະໂລວາກີ ແລະ ຫວຽດນາມ.
* ຕອນບ່າຍວັນທີ 18 ກໍລະກົດ 2016, ທີ່ສຳນັກງານສູນກາງພັກກອມມູນິດຫວຽດນາມ, ທ່ານເລຂາທິການໃຫຍ່ ຫງວຽຝູຈ້ອງ ໄດ້ຕ້ອນຮັບ ແລະ ແລກປ່ຽນຄວາມຄິດເຫັນຢ່າງສະໜິດສະໜົມກັບທ່ານນາຍົກລັດຖະມົນຕີ ຣໍແບດ ຟິດຊໍ. ທ່ານເລຂາທິການໃຫຍ່ ຫງວຽຝູຈ້ອງ ໄດ້ແຈ້ງໃຫ້ທ່ານນາຍົກ ຣໍແບດ ຟິດຊໍ ຊາບບາງຈຸດພື້ນຖານກ່ຽວກັບສະພາບການຫວຽດນາມ ໃນເວລາຜ່ານມາມໍ່ນີ້; ສະແດງຄວາມຂອບອົກຂອບໃຈ ຕໍ່ການຊ່ວຍເຫຼືອທີ່ລ້ຳຄ່າ ແລະ ມີປະສິດທິຜົນ ຂອງປະຊາຊົນສະໂລວາກີ ທີ່ມີຕໍ່ຫວຽດນາມໃນພາລະກິດປົກປັກຮັກສາ ແລະ ສ້າງສາປະເທດຊາດ. ທ່ານເລຂາທິການໃຫຍ່ຕີລາຄາສູງບັນດາຜົນສຳເລັດທີ່ສະໂລວາກີຍາດມາໄດ້ ໃນວິວັດການເຊື່ອມໂຍງສາກົນ ແລະ ພັດທະນາປະເທດ; ເຊື່ອໝັ້ນວ່າ, ການທີ່ສະໂລວາກີຮັບຕຳແໜ່ງເປັນປະທານໝູນວຽນຂອງສະຫະພາບເອຣົບ ແຕ່ເດືອນກໍລະກົດ 2016 ຈະມີຄຸນປະໂຫຍດອັນຕັ້ງໜ້າເຖິງຄວາມພົວພັນ ອີຢູ - ຫວຽດນາມ.
ທ່ານນາຍົກລັດຖະມົນຕີ ຣໍແບດ ຟິດຊໍ ໄດ້ແຈ້ງໃຫ້ທ່ານເລຂາທິການໃຫຍ່ຊາບບາງຈຸດໃຫຍ່ຂອງສະພາບການເອຣົບ ແລະ ສະພາບການສະໂລວາກີທີ່ຜ່າມມາມໍ່ນີ້; ກ່ຽວກັບຜົນສຳເລັດອັນດີງາມຂອງບັນດາການພົບປະເຈລະຈາ ກັບບັນດາການນຳຫວຽດນາມ. ທ່ານນາຍົກລັດຖະມົນຕີ ຣໍແບດ ຟິດຊໍ ເນັ້ນວ່າ ສະໂລວາກີໃຫ້ຄວາມສຳຄັນແກ່ການປັບປຸງ ແລະ ຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອກັບຫວຽດນາມ, ນັບທັງການພົວພັນດ້ານລັດ, ການພົວພັນດ້ານພັກ ແລະ ການພົວພັນແລກປ່ຽນລະຫວ່າງປະຊາຊົນ ກໍຄືການຮ່ວມມືລະຫວ່າງທ້ອງຖິ່ນຕ່າງໆຂອງສອງປະເທດ; ຢັ້ງຢືນສະໂລວາກີຈະຕັ້ງໜ້າພະຍາຍາມຊຸກຍູ້ການປະຕິບັດບັນດາຂໍ້ຕົກລົງຮ່ວມມືທີ່ໄດ້ເຊັນກັນລະຫວ່າງສອງປະເທດ, ສ້າງໃຫ້ມີການຫັນປ່ຽນຕົວຈິງໃນການພົວພັນສອງຝ່າຍ. ພ້ອມນັ້ນ, ດ້ວຍຖານະເປັນປະທານໝູນວຽນຂອງສະຫະພາບເອີຣົບ ແຕ່ວັນທີ 1 ກໍລະກົດ 2016, ສະໂລວາກີຈະເຮັດທຸກສິ່ງທຸກຢ່າງທີ່ສາມາດເຮັດໄດ້ ເພື່ອຊຸກຍູ້ການພົວພັນລະຫວ່າງອີຢູ ແລະ ຫວຽດນາ; ສົມທົບຢ່າງແໜ້ນແຟ້ນກັບຫວຽດນາມໃນບັນດາເວທີສາກົນ, ສູ້ຊົນເພື່ອສັນຕິພາບ, ສະຖຽນລະພາບ ແລະ ຄວາມເຄົາລົບນັບຖືກົດໝາຍສາກົນ.
* ຕອນແລງວັນທີ 18 ກໍລະກົດ 2016, ຢູ່ທີ່ຫໍສະພາແຫ່ງຊາດ, ປະທານສະພາແຫ່ງຊາດ ທ່ານນາງ ຫງວຽນທີ້ກິມເງິນ ໄດ້ຕ້ອນຮັບທ່ານນາຍົກລັດຖະມົນຕີ ຣໍແບດ ຟິດຊໍ ແລະ ໄດ້ແບ່ງປັນບັນດາເນື້ອໃນຈຸດໜັກໃຈກາງຂອງການປະຊຸມຄັ້ງປະຖົມມະລືກຂອງສະພາແຫ່ງຊາດຫວຽດນາມ ຊຸດທີ XIV, ກໍຄືຂອງຊຸມປີຕົ້ນສະໄໝປະຈຳການຂອງສະພາແຫ່ງຊາດຊຸດນີ້; ໃນນັ້ນ, ສະພາແຫ່ງຊາດຫວຽດນາມຈະສຸມໃສ່ກໍ່ສ້າງລະບົບກົດໝາຍໃຫ້ບໍລິບູນ ໃນເງື່ອນໄຂປະເທດຊາດພວມເຊື່ອມໂຍງຢ່າງກວ້າງຂວາງເລິກເຊິ່ງເຂົ້າກັບສາກົນ ແລະ ເຂົ້າຮ່ວມໃນສັນຍາການຄ້າເສລີຮຸ່ນໃໝ່ຫຼາຍສະບັບ…
ທ່ານນາຍົກລັດຖະມົນຕີ ຣໍແບດ ຟິດຊໍ ຕີລາຄາສູງບັນດາຜົນສຳເລັດທີ່ຫວຽດນາມຍາດມາໄດ້ໃນພາລະກິດການປ່ຽນແປງໃໝ່, ພິເສດແມ່ນໃນການພັດທະນາເສດຖະກິດ, ທ່ານນາຍົກກໍສະແດງຄວາມປະທັບໃຈກ່ຽວກັບການປ່ຽນແປງຢ່າງຈະແຈ້ງໃນການພັດທະນາເສດຖະກິດ - ສັງຄົມຂອງຫວຽດນາມ ນັບແຕ່ການມາຢາມຫວຽດນາມຄັ້ງທຳອິດໃນປີ 2008 ມາເຖິງປັດຈຸບັນ.
ໂດຍຕີລາຄາວ່າ ສະພາແຫ່ງຊາດຫວຽດນາມມີບົດບາດສຳຄັນທີ່ສຸດໃນການສ້າງລະບົບກົດໝາຍ, ທ່ານນາຍົກລັດຖະມົນຕີ ຣໍແບດ ຟິດຊໍ ສະແດງຄວາມປະສົງໃຫ້ສອງຝ່າຍສືບຕໍ່ຮັກສາກົນໄກແລກປ່ຽນຄະນະຜູ້ແທນ, ໃນນັ້ໜມີບັນດາກຸ່ມ ສສ ມິດຕະພາບຂອງສອງປະເທດ, ບັນດາຄະນະກຳມາທິການຂອງສະພາແຫ່ງຊາດ ເພື່ອແນໃສ່ເພີ່ມທະວີການຮ່ວມມື ແລກປ່ຽນບັນດາເນື້ອໃນທີ່ຄວນເອົາໃຈໃສ່, ແບ່ງປັນບົດຮຽນປະສົບການໃນການສ້າງກົດໝາຍ, ການຕິດຕາມກວດກາ.
ຕອນຄ່ຳວັນທີ 19 ກໍລະກົດ 2016, ທ່ານນາຍົກລັດຖະມົນຕີ ຣໍແບດ ຟິດຊໍ ໄດ້ສຳເລັດສິ້ນສຸດການຢ້ຽມຢາມປະເທດຫວຽດນາມຢ່າງເປັນທາງການຢ່າງຈົບງາມ, ປະກອບສ່ວນຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານ ລະຫວ່າງຫວຽດນາມ ແລະ ສະໂລວາກີ ໃຫ້ຂະຫຍາຍຕົວຍິ່ງຂຶ້ນໃນເວລາຕໍ່ໜ້າ./.
ສັງລວມໂດຍ ເຟືອງຈ່າ
