ປະທານປະເທດຫວຽດນາມ ດຳເນີນການຢ້ຽມຢາມລັດຖະກິດທີ່ ສາທາລະນະລັດ ອີຕາລີ ແລະ ສັນຕະສຳນັກ ວາຕີກັນ
ວກ.ອອນໄລ - ແຕ່ວັນທີ 21 ຫາວັນທີ 24 ເດືອນພະຈິກ ປີ 2016, ປະທານປະເທດຫວຽດນາມ ເຈິ່ນດ້າຍກວາງ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງ ຫວຽດນາມ ໄດ້ດຳເນີນການຢ້ຽມຢາມລັດຖະກິດທີ່ ສາທາລະນະລັດ ອີຕາລີ ແລະ ຢາມສັນຕະສຳນັກ ວາຕີກັນ.
ປະທານາທິບໍດີອີຕາລີ ເຊຄີໂອ ມາທາແຣລາ ແລະ ປະທານປະເທດຫວຽດນາມ ເຈິ່ນດ້າຍກວາງ ກວດກອງກຽດຕິຍົດ. (ພາບ: TTXVN)
ຢູ່ທີ່ປະເທດອີຕາລີ, ປະທານປະເທດຫວຽດນາມ ໄດ້ພົບປະເຈລະຈາກັບປະທານາທິບໍດີອີຕາລີ ເຊຄີໂອ ມາທາແຣລາ, ພົບປະຫາລືກັບ ນາຍົກລັດຖະມົນຕີອີຕາລີ ມາແທໂອ ແຣຊີ, ເຮັດວຽກກັບ ການນຳພັກ ປະຊາທິປະໄຕ ອີຕາລີ, ເຮັດວຽກກັບ ພັກກອມມູນິດສ້າງໃໝ່ ອີຕາລີ ແລະ ພັກກອມມູນິດອີຕາລີ, ເຂົ້າຮ່ວມ ແລະ ກ່າວປາໄສ ທີ່ເວທີປາໄສວິສາຫະກິດຫວຽດນາມ - ອີຕາລີ, ຢ້ຽມຢາມ ແລະ ໂອ້ລົມ ທີ່ສະຖານທູດຫວຽດນາມ ຢູ່ສາທາລະນະລັດ ອີຕາລີ.
ໃນບັນດາການພົບປະເຈລະຈາແລະພົບປະຫາລືສອງຝ່າຍ, ປະທານປະເທດ ເຈິ່ນດ້າຍກວາງ ສະແດງຄວາມເຫັນອົກເຫັນໃຈ ແລະ ແບ່ງປັນກັບປະຊາຊົນອີຕາລີ ກ່ຽວກັບຄວາມເສຍຫາຍຍ້ອນແຜ່ນດິນໄຫວທີ່ເກີດຂຶ້ນຫຼາຍຄັ້ງຢູ່ພາກກາງອີຕາລີ. ປະທານປະເທດ ເຈິ່ນດ້າຍກວາງ ພ້ອມກັນນັ້ນກໍ່ຢືນຢັນວ່າ ຫວຽດນາມໃຫ້ຄວາມສຳຄັນແກ່ຄວາມພົວພັນມິດຕະພາບ ແລະການຮ່ວມມືຫຼາຍດ້ານກັບ ອີຕາລີ ໃນຄວາມພົວພັນລວມກັບສະຫະພາບເອີຣົບ.
ປະທານາທິບໍດີ ເຊຄີໂອ ມາທາແຣລາ ແລະ ນາຍົກລັດຖະມົນຕີ ມາແທໂອ ແຣລີ ໄດ້ຕີລາຄາວ່າ ການຢ້ຽມຢາມຂອງປະທານປະເທດ ເຈິ່ນດ້າຍກວາງ ເປັນຫຼັກໝາຍສຳຄັນ ເພື່ອໃຫ້ສອງຝ່າຍເພີ່ມທະວີ ຄວາມພົວພັນ ຄູ່ຮ່ວມມືຍຸດທະສາດ ລະຫວ່າງສອງປະເທດ ທີ່ໄດ້ສ້າງຕັ້ງຂຶ້ນແຕ່ປີ 2013.
ບັນດາຜູ້ນຳຂອງສອງປະເທດໄດ້ເຫັນດີຕີລາຄາວ່າ ຄວາມພົວພັນລະຫວ່າງສອງປະເທດພວມຂະຫຍາຍຕົວຢ່າງຕັ້ງໜ້າ ໃນຫຼາຍຂົງເຂດ ແລະ ຢືນຢັນຄວາມຕັດສິນໃຈຮ່ວມກັນຊຸກຍູ້ຄວາມພົວພັນຄູ່ຮ່ວມມືຍຸດທະສາດຫວຽດນາມ - ອີຕາລີ ໃຫ້ເຂົ້າສູ່ລວງເລິກ ແລະ ມີປະສິດທິຜົນ. ສອງຝ່າຍເປັນເອກະພາບຈະເພີ່ມທະວີການແລກປ່ຽນຄະນະຜູ້ແທນ ແລະ ການພົບປະຂັ້ນຕ່າງໆ, ເປັນຕົ້ນແມ່ນການພົບປະຂັ້ນສູງ; ຜັນຂະຫຍາຍບັນດາເນື້ອໃນຂອງແຜນການປະຕິບັດການພົວພັນຄູ່ຮ່ວມມືຍຸດທະສາດໄລຍະ 2017 - 2018, ຮັກສາການພົບປະແລກປ່ຽນ ລະຫວ່າງບັນດາພັກການເມືອງ, ຊຸກຍູ້ການພົບປະສັງສັນປະຊາຊົນ, ຖືວ່ານີ້ເປັນຮາກຖານການເມືອງທີ່ສຳຄັນ ເພື່ອເຮັດໃຫ້ຄວາມພົວພັນລະຫວ່າງສອງປະເທດມີເນື້ອໃນຕົວຈິງ.
ສອງຝ່າຍຢືນຢັນການຮ່ວມມືເສດຖະກິດເປັນເສົາຄ້ຳບຸລິມະສິດໃນການຮ່ວມມືສອງຝ່າຍ; ເຫັນດີເປັນເອກະສັນຈະຍົກມູນຄ່າການຄ້າຂຶ້ນເປັນ 6 ຕື້ໂດລາສະຫະລັດໃນໄລຍະ 2017 - 2018, ເພີ່ມທະວີການລົງທຶນຂອງອີຕາລີຢູ່ຫວຽດນາມ, ເປັນຕົ້ນແມ່ນໃນບັນດາຂົງເຂດທີ່ອີຕາລີມີທ່າແຮງ; ອຳນວຍຄວາມສະດວກໃຫ້ສິນຄ້າກະສິກຳ, ສິນໃນນ້ຳຂອງຫວຽດນາມ ເຂົ້າເຖິງຕະຫຼາດອີຕາລີ. ສອງຝ່າຍກໍ່ເຫັນດີເປັນເອກະສັນຈະກໍ່ສ້າງທິດທາງໃໝ່ ກ່ຽວກັບການຮ່ວມມືເພື່ອການພັດທະນາທີ່ສອດຄ່ອງກັບຄວາມພົວພັນຄູ່ຮ່ວມມືຍຸດທະສາດລະຫວ່າງສອງປະເທດ, ລວມສູນໃສ່ບັນດາຂົງເຂດການຝຶກອົບຮົມວີຊາວີບ, ສິ່ງແວດລ້ອມ, ຄຸ້ມຄອງແຫຼ່ງນ້ຳ, ການເຕືອນໄພນ້ຳຖ້ວມ.
ສອງຝ່າຍເຫັນດີເປັນເອກະສັນຈະສືບຕໍ່ຊຸກຍູ້ການຮ່ວມມືດ້ານວັດທະນະທຳ, ການສຶກສາ-ກໍ່ສ້າງ, ການທ່ອງທ່ຽວ ແລະ ເຮັດໃຫ້ວິທະຍາສາດ-ເຕັກໂນໂລຊີກາຍເປັນຂົງເຂດຮ່ວມມືບຸລິມະສິດໃນເວລາທີ່ຈະເຖິງນີ້. ທ່ານປະທານາທິບໍດີ ອີຕາລີ ຢືນຢັນຈະສືບຕໍ່ຊ່ວຍເຫຼືອຫວຽດນາມໃນການອະນຸຮັກບູຮານສະຖານ, ເພີ່ມຈຳນວນທຶນການສຶກສາໃຫ້ນັກສຶກສາຫວຽດນາມ ໄປຮຽນແລະສຶກສາຢູ່ປະເທດອີຕາລີ.
ສອງຝ່າຍເຫັນດີເປັນເອກະສັນຈະເຈລະຈາກັນ ເພື່ອໃຫ້ມີສາຍການບິນໂດຍກົງລະຫວ່າງສອງປະເທດໃນເວລາທີ່ຈະເຖິງນີ້ ແລະ ແບ່ງປັນບົດຮຽນໃນການປະຕິບັດບັນດາໂຄງການຮ່ວມມືພາກລັດ-ເອກະຊົນ (PPP) ກ່ຽວກັບການລຳລຽງສະໜອງ, ຕໍ່ກຳປັ່ນ, ທາງລົດໄຟ, ໂຄງສ້າງພື້ນຖານ.
ໃນຂົງເຂດຄວາມສະຫງົບ - ປ້ອງກັນຊາດ, ສອງຝ່າຍເຫັນດີເປັນເອກະສັນເພີ່ມທະວີການແບ່ງປັນຂໍ້ມູນຂ່າວສານ, ບົດຮຽນ ໃນການຕໍ່ສູ້ປ້ອງກັນ ຕ້ານອາຊະຍາກຳ, ເພີ່ມທະວີການຮ່ວມມືໃນການຝຶກອົບຮົມກຳລັງກູ້ໄພ ກູ້ຊີບ, ເກັບກູ້ລູກລະເບີດທີ່ຍັງບໍ່ທັນແຕກ ແລະ ອຸດສາຫະກຳປ້ອງກັນຊາດ ກໍ່ຄືໃນກຳລັງຮັກສາສັນຕິພາບຂອງສະຫະປະຊາຊາດ.
ຫວຽດນາ ແລະ ອີຕາລີຈະເພີ່ມທະວີການປະສານສົມທົບໃນບັນດາເວທີປາໄສພະຫຸພາຄີຄື ສະຫະປະຊາຊາດ, ອາຊຽນ - ອີຢູ, ອາເຊມ, ຢູເນສະໂກ, ສືບຕໍ່ສະໜັບສະໜູນຊຶ່ງກັນແລະກັນ ເພື່ອແນໃສ່ພັດທະນາຄວາມພົວພັນລະຫວ່າງອີຕາລີ ກັບອາຊີ-ປາຊີຟິກ ແລະ ເພີ່ມທະວີຄວາມພົວພັນລະຫວ່າງຫວຽດນາມ ກັບອີຢູ, ໃນນັ້ນ ເອົາໃຈໃສ່ເປັນສຳຄັນເຖິງບັນດາໂຄງການ ແຜນງານ ຂໍ້ຄິດປະດິດ ກ່ຽວກັບການຮັບມືກັບການປ່ຽນແປງສະພາບອາກາດ ແລະ ການເຕີບໂຕສີຂຽວ.
ບັນດາຜູ້ນຳຂອງຫວຽດນາມ ແລະ ອີຕາລີ ໄດ້ຍົກໃຫ້ເຫັນແຈ້ງຄວາມສຳຄັນຂອງການຮັກສາສັນຕິພາບ ສະຖຽນລະພາບ ຄວາມປອດໄພ ແລະ ເສລີພາບໃນການເດີນເຮືອ, ການບິນ; ເຫັນດີໃຫ້ທັດສະນະວ່າ ຄວາມພິພາດຂັດແຍ້ງຢູ່ທະເລຕາເວັນອອກຕ້ອງໄດ້ແກ້ໄຂດ້ວຍສັນຕິວິທີ, ບົນພື້ນຖານເຄົາລົບກົດໝາຍສາກົນ, ອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982, ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ສ້າງປະມວນຂໍ້ກຳນົດກ່ຽວກັບວິທີປະພຶດຢູ່ທະເລຕາເວັນອອກ (COC) ໂດຍໄວ, ຮັບປະກັນເສລີພາບໃນການເດີນເຮືອ ແລະ ການບິນ ຕາມສາຍຄົມມະນາຄົມທີ່ສຳຄັນນີ້ຂອງໂລກ.
ໃນການເຮັດວຽກກັບການນຳພັກປະຊາທີປະໄຕ ອີຕາລີ, ພັກກອມມູນິດສ້າງໃໝ່ ອີຕາລີ ແລະ ພັກກອມມູນິດ ອີຕາລີ, ປະທານປະເທດ ເຈິ່ນດ້າຍກວາງ ຢືນຢັນພັກກອມມູນິດຫວຽດນາມນັບຖືທະນຸຖະໜອມຄວາມພົວພັນມິດຕະພາບທີ່ເປັນມູນເຊື້ອ ກັບບັນດາພັກຝ່າຍຊ້າຍ ອີຕາລີ; ສະແດງຄວາມຂອບໃຈຢ່າງເລິກເຊິ່ງ ຕໍ່ການສະໜັບສະໜູນ ຄວາມສາມັກຄີ ແລະ ການຊ່ວຍເຫຼືອທີ່ລ້ຳຄ່າ ຂອງກຳລັງຝ່າຍຊ້າຍ, ຊາວພັກກອມມູນິດ ແລະ ປະຊາຊົນອີຕາລີ ທີ່ໄດ້ມີແລະພວມມີ ຕໍ່ຫວຽດນາມ. ປະທານປະເທດເນັ້ນແຜນນະໂຍບາຍຮັກສາ, ປັບປຸງ ແລະ ເພີ່ມທະວີຄວາມພົວພັນກັບບັນດາພັກທີ່ເປັນມິດສະຫາຍ, ພ້ອມກັນນັ້ນກໍ່ເປີດກວ້າງການພົວພັນກັບບັນດາພັກການເມືອງໃຫຍ່, ພັກກຳອານາດຢູ່ບັນດາປະເທດ.
ການນຳພັກປະຊາທີປະໄຕ ອີຕາລີ, ພັກກອມມູນິດສ້າງໃໝ່ ອີຕາລີ ແລະ ພັກກອມມູນິດ ອີຕາລີ ສະແດງຄວາມດີໃຈທີ່ໄດ້ພົບປະກັບທ່ານປະທານປະເທດ ເຈິ່ນດ້າຍກວາງ, ຢືນຢັນຄວາມສາມັກຄີ ມິດຕະພາບຂອງບັນດາພັກຝ່າຍຊ້າຍ ອີຕາລີ ທີ່ມີຕໍ່ພາລະກິດການຕໍ່ສູ້ປົດປ່ອຍປະເທດກ່ອນໜ້ານີ້ ແລະ ການກໍ່ສ້າງປະເທດຊາດໃນປະຈຸບັນ ຂອງຫວຽດນາມ.
ກ່າວປາໄສຕໍ່ວົງການວິສາຫະກິດສອງປະເທດທີ່ເວທີປາໄສວິສາຫະກິດຫວຽດນາມ - ອີຕາລີ, ທ່ານປະທານປະເທດ ເຈິ່ນດ້າຍກວາງ ຊີ້ແຈ້ງວ່າ ຜ່ານເວລາ 30 ກວ່າປີແຫ່ງການດຳເນີນການປ່ຽນແປງໃໝ່ປະເທດຢ່າງຮອບດ້ານ, ຫວຽດນາມໄດ້ບັນລຸຜົນສຳເລັດອັນໃຫຍ່ຫຼວງຫຼາຍຢ່າງ ທີ່ມີຄວາມໝາຍປະຫວັດສາດ. ຈີດີພີ ສະເຫຼ່ຍຕໍ່ຫົວຄົນຂອງຫວຽດນາມປະຈຸບັນບັນລຸປະມານ 2.100 ໂດລາສະຫະລັດ, ຂະໜາດຂອງພື້ນຖານເສດຖະກິດຫຼາຍກວ່າ 200 ຕື້ໂດລາສະຫະລັດ. ໃນເວລາທີ່ຈະເຖິງນີ້, ຫວຽດນາມຈະປະຕິບັດຢ່າງຄົບຖ້ວນ ບັນດາສັນຍາໃນປະຊາຄົມອາຊຽນ ແລະ ອົງການການຄ້າໂລກ, ເຂົ້າຮ່ວມແລະຜັນຂະຫຍາຍປະຕິບັດບັນດາສັນຍາການຄ້າເສລີຮຸ່ນໃໝ່, ໃນນັ້ນມີສັນຍາການຄ້າເສລີລະຫວ່າງຫວຽດນາມ ແລະ ອີຢູ, ສືບຕໍ່ເຊື່ອມໂຍງສາກົນຢ່າງເລິກເຊິ່ງ.
ປະທານປະເທດ ເຈິ່ນດ້າຍກວາງ ໃຫ້ທັດສະນະວ່າ ໃນສະພາບການທີ່ສັນຍາການຄ້າເສລີລະຫວ່າງຫວຽດນາມ ແລະ ອີຢູ ຈວນຈະໄດ້ລົງນາມ, ສອງປະເທດມີຄວາມສາມາດຢ່າງພຽງພໍເພື່ອຍົກມູນຄ່າການຄ້າສອງສົ້ນຂຶ້ນເປັນ 6 ຕື້ໂດລາສະຫະລັດ ໃນໄລຍະ 2017 - 2018. ຫວຽດນາມຫວັງວ່າ ອີຕາລີ ຈະເປີດປະຕູຕະຫຼາດໃຫ້ສິນຄ້າກະສິກຳ, ສິນໃນນ້ຳຂອງຫວຽດນາມ ເພື່ອຮັບໃຊ້ໃຫ້ຜູ້ບໍລິໂພກອີຕາລີ; ຕີລາຄາສູງຄຸນນະພາບຜະລິດຕະພັນກົນຈັກ, ເຕັກໂນໂລຊີສູງ, ອຸດສະຫະກຳສະໜັບສະໜູນ, ການອອກແບບອຸດສະຫະກຳ ແລະ ແຟຊັ່ນ ຂອງອີຕາລີ. ທ່ານປະທານປະເທດ ເຈິ່ນດ້າຍກວາງ ຢືນຢັນຫວຽດນາມຖືວ່າຄວາມສຳເລັດຂອງວິສາຫະກິດອີຕາລີ ກໍ່ແມ່ນຄວາມສຳເລັດຂອງຫວຽດນາມ, ລັດຫວຽດນາມໃຫ້ຄຳໝັ້ນສັນຍາຈະສືບຕໍ່ສ້າງສະພາບແວດລ້ອມແຫ່ງການລົງທຶນ ທຸລະກິດ ທີ່ປອດໂປ່ງລຸລ່ວງ, ສະດວກດີ ແລະ ສະເໝີພາບ, ຕອບສະໜອງຄວາມຕ້ອງການເຊື່ອມໂຍງສາກົນ ເພື່ອຜົນປະໂຫຍດຂອງວິສາຫະກິດສອງປະເທດ.
ທ່ານປະທານປະເທດ ເຈິ່ນດ້າຍກວາງ ໄດ້ມາຢາມສະຖານທູດຫວຽດນາມຢູ່ ສາທາລະນະລັດ ອີຕາລີ ແລະ ໂອ້ລົມກັບພະນັກງານ ລັດຖະກອນສະຖານທູດ ແລະ ຊຸມຊົນຊາວຫວຽດນາມທີ່ດຳລົງຊີວິດຢູ່ອີຕາລີ; ທ່ານປະທານປະເທດຢືນຢັນແຜນນະໂຍບາຍ, ນະໂຍບາຍທີ່ບໍ່ມີການປ່ຽນແປງຂອງລັດຫວຽດນາມ ທີ່ຍາມໃດກໍ່ຮັກແພງທະນຸຖະໜອມຊາວຫວຽດນາມຢູ່ຕ່າງປະເທດ, ຖືວ່າຊາວຫວຽດນາມຢູ່ຕ່າງປະເທດເປັນພາກສ່ວນໜຶ່ງທີ່ບໍ່ອາດຈະແຍກໄດ້ຂອງຊາດຫວຽດນາມ. ທ່ານປະທານປະເທດຫວັງວ່າ ຊາວຫວຽດນາມແຕ່ລະຄົນໃນຊຸມຊົນຊາວຫວຽດນາມກວ່າ 5.000 ຄົນຢູ່ອີຕາລີ ຈະເປັນຜູ້ປະກອບສ່ວນໂຄສະນາເຜີຍແຜ່ກ່ຽວກັບປະເທດ, ວັດທະນະທຳ ແລະ ຜູ້ຄົນຫວຽດນາມ, ເຮັດໃຫ້ສອງຊາດຫວຽດນາມ - ອີຕາລີ ນັບມື້ນັບໃກ້ຊິດສະໜິດສະໜົມກັນ.ສັນຕະສຳນັກວາຕີກັນ ປາຖະໜາທີ່ຈະຊຸກຍູ້ ຄວາມພົວພັນກັບຫວຽດນາມ
ປະທານປະເທດ ເຈິ່ນດ້າຍກວາງ ພົບປະກັບ ນາຍົກລັດຖະມົນຕີວາຕີກັນ ປີແອໂຕຣ ປາໂຣລິນ. (ພາບ: TTXVN)
ຕອນຄ່ຳວັນທີ 23 ພະຈິກ 2016 ຕາມເວລາທ້ອງຖິ່ນ (ຮຸ່ງເຊົ້າວັນທີ 24 ພະຈິກ ຕາມເວລາຮ່າໂນ້ຍ), ໂດຍຕອບສະໜອງຕາມຄຳເຊີນຂອງພະສັນຕະປາປາ ຟຣານຊິດ, ທ່ານປະທານປະເທດແຫ່ງ ສສ ຫວຽດນາມ ເຈິ່ນດ້າຍກວາງ ໄດ້ດຳເນີນການຢ້ຽມຢາມ ສັນຕະສຳນັກ ວາຕີກັນ, ພົບປະຫາລືກັບພະສັນຕະປາປາ ຟຣານຊິດ ແລະ ພົບປະກັບນາຍົກລັດຖະມົນຕີວາຕີກັນ ປີແອໂຕຣ ປາໂຣລິນ.
ພະສັນຕະປາປາ ຟຣານຊິດ ຊົມເຊີຍແລະຕີລາຄາສູງການຢ້ຽມຢາມຂອງທ່ານປະທານປະເທດຫວຽດນາມ ເຈິ່ນດ້າຍກວາງ, ຢືນຢັນນີ້ເປັນໂອກາດເພື່ອໃຫ້ຫວຽດນາມ ແລະ ສັນຕະສຳນັກ ເພີ່ມທະວີຄວາມເຂົ້າໃຈຊຶ່ງກັນແລະກັນ, ຜ່ານນັ້ນເພື່ອຊຸກຍູ້ຄວາມພົວພັນລະຫວ່າງສອງຝ່າຍ. ສັນຕະສຳນັກຕີລາຄາສູງຕໍ່ບັນດາຜົນສຳເລັດໃນການພັດທະນາເສດຖະກິດ ສັງຄົມຂອງຫວຽດນາມ ແລະ ຕໍ່ການທີ່ຫວຽດນາມຈັດຕັ້ງການເກັບກຳຄວາມເຫັນສັງຄົມຢ່າງກວ້າງຂວາງ ໃນເມື່ອຮັບຮອງຜ່ານ ກົດໝາຍວ່າດ້ວຍຄວາມເຊື່ອຖື, ສາສະໜາ; ຢືນຢັນສັນຕະສຳນັກປາຖະໜາຈະຊຸກຍູ້ຄວາມພົວພັນກັບຫວຽດນາມ.
ທ່ານປະທານປະເທດ ເຈິ່ນດ້າຍກວາງ ສະແດງຄວາມຂອບໃຈຕໍ່ສັນທາຄະຕິອັນດີງາມທີ່ພະສັນຕະປາປາ ມີຕໍ່ຫວຽດນາມ; ສະແດງຄວາມປິຕິຍິນດີຕໍ່ບັນດາບາດກ້າວຄືບໜ້າທີ່ດົນໃຈໃນຄວາມພົວພັນສອງຝ່າຍໃນເວລາທີ່ຜ່ານມາ. ທ່ານປະທານປະເທດຢືນຢັນ ຫວຽດນາມປະຕິບັດຢ່າງສະເໝີຕົ້ນສະເໝີປາຍ ນະໂຍບາຍເຄົາລົບນັບຖື ແລະ ຮັບປະກັນ ສິດເສລີພາບໃນຄວາມເຊື່ອຖືແລະສາສະໜາ ຂອງທຸກຄົນ, ພ້ອມກັນນັ້ນ ກໍ່ປັບປຸງບູລະນະຂອບກົດໝາຍ ເພື່ອຮັບປະກັນສິດທິເຫຼົ່ານັ້ນ.
ທ່ານປະທານປະເທດ ເຈິ່ນດ້າຍກວາງ ແລະ ພະສັນຕະປາປາ ຟຣານຊິດ ຕີລາຄາສູງການປະກອບສ່ວນທີ່ຕັ້ງໜ້າຂອງຊຸມຊົນກາໂຕລິກຫວຽດນາມໃນເວລາທີ່ຜ່ານມາ. ທ່ານປະທານປະເທດກກໍ່ເຫັນດີຕີລາຄາວ່າ ຄວາມພົວພັນຫວຽດນາມ - ສັນຕະສຳນັກ ໄດ້ມີບາດກ້າວຄືບໜ້າທີ່ດີ, ສະແດງອອກໂດຍຜ່ານການພົບປະຂັ້ນສູງໃນຊຸມປີທີ່ຜ່ານມາມໍ່ນີ້ ແລະ ການທີ່ສອງຝ່າຍຮັກສາການສົນທະນາໂດຍຜ່ານກົນໄກຄະນະເຮັດວຽກຮ່ວມກັນ.
ທ່ານປະທານປະເທດ ເຈິ່ນດ້າຍກວາງ ແລະ ພະສັນຕະປາປາ ຟຣານຊິດ ເນັ້ນເຖິງການທີ່ສະພາກາໂຕລິກຫວຽດນາມເຄື່ອນໄຫວໃນຂອບກົດໝາຍ, ດຳລົງຊີວິດຢ່າງດີງາມແລະເຫຼື້ອມໃສໃນສາສະໜາ, ປະຊາຊົນດີເປັນພົນລະເມືອງດີ; ສອງຝ່າຍເຫັນດີຈະຮັກສາການພົບປະ, ສົນທະນານຳກັນ.
ເນື່ອງໃນໂອການນີ້, ທ່ານປະທານປະເທດ ເຈິ່ນດ້າຍກວາງ ໄດ້ມີການພົບປະແລະແລກປ່ຽນຄວາມຄິດເຫັນກັບທ່ານນາຍົກລັດຖະມົນຕີວາຕີກັນ ປີແອໂຕຣ ປາໂຣລິນ ກ່ຽວກັບສະພາບການສາສະໜາກາໂຕລິກຫວຽດນາມ ແລະ ຄວາມພົວພັນລະຫວ່າງຫວຽດນາມ - ວາຕີກັນ./.
ວາລະສານກອມມູນິດ
