ເລຂາທິການໃຫຍ່ ພັກກອມມູນິດຫວຽດນາມ ສຳເລັດສິ້ນສຸດການຢ້ຽມຢາມ ສັນທະວະໄມຕີເປັນທາງການທີ່ ປະເທດລາວ ຢ່າງຈົບງາມ
ວກ.ອອນໄລ - ແລງວັນທີ 26 ພະຈິກ 2016, ທ່ານເລຂາທິການໃຫຍ່ ຫງວຽນຝູຈ້ອງ ແລະຄະນະຜູ້ແທນຂັ້ນສູງຫວຽດນາມ ໄດ້ກັບມາເຖິງ ຮ່າໂນ້ຍ, ສຳເລັດສິ້ນສຸດຢ່າງຈົບງາມ ການຢ້ຽມຢາມສັນທະວະໄມຕີເປັນທາງການ ທີ່ປະເທດ ສປປ ລາວ ຕາມຄຳເຊີນຂອງ ທ່ານເລຂາທິການໃຫຍ່ ປະທາປະເທດລາວ ບຸນຍັງ ວໍລະຈິດ.
ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ຕ້ອນຮັບທ່ານເລຂາທິການໃຫຍ່ ພັກກອມມູນິດຫວຽດນາມ ຫງວຽນຝູຈ້ອງ. (ພາບ: TTXVN)
ໃນເວລາຂອງການຢ້ຽມຢາມ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບທ່ານເລຂາທິການໃຫຍ່ ປະທານປະເທດລາວ ບຸນຍັງ ວໍລະຈິດ; ພົບປະຫາລືກັບທ່ານນາຍົກລັດຖະມົນຕີລາວ ທອງລຸນ ສີສູລິດ, ທ່ານນາງປະທານສະພາແຫ່ງຊາດ ປານີ ຍາທໍ້ຕູ້; ຕ້ອນຮັບທ່ານປະທານຄະນະກຳມະການແນວລາວສ້າງຊາດ ໄຊສົມພອນ ພົມວິຫານ; ທ່ານປະທານສະມາຄົມມິດຕະພາບ ລາວ - ຫວຽດນາມ ວິໄລວົງ ບຸດດາຄຳ ແລະ ໄປຢາມບັນດາສະຫາຍອະດີດການນຳຂັ້ນສູງຂອງພັກ ແລະ ລັດລາວ; ຢາມແລະໂອ້ລົມກັບພະນັກງານ, ຄູອາຈານ, ນັກຮຽນນັກສຶກສາຂອງມະຫາວິທະຍາໄລແຫ່ງຊາດລາວ; ໄປຢາມພື້ນຖານເສດຖະກິດ, ວັດທະນະທຳຈຳນວນໜຶ່ງ ຢູ່ນະຄອນຫຼວງວຽງຈັນ ແລະ ແຂວງບໍລິຄຳໄຊ.
ບັນດາການພົບປະເຈລະຈາ ຫາລືໄດ້ດຳເນີນໄປໃນບັນຍາກາດມິດຕະພາບ ສາມັກຄີພິເສດ ແລະ ໄວ້ວາງໄຈຊຶ່ງກັນແລະກັນ. ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະພັກ, ແຕ່ລະປະເທດ; ແລກປ່ຽນກ່ຽວກັບບັນດາແຜນນະໂຍບາຍ, ມາດຕະການ ເພື່ອແນໃສ່ສືບຕໍ່ເຮັດໃຫ້ຄວາມພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ - ລາວ ຂະຫຍາຍຄົວເຂົ້າສູ່ລວງເລິກ ແລະມີປະສິດທິຜົນຕົວຈິງ; ພ້ອມກັນນັ້ນ ກໍ່ແລກປ່ຽນຄວາມຄິດຄວາມເຫັນກ່ຽວກັບບັນດາບັນຫາພາກພື້ນ ແລະ ສາກົນ ຊຶ່ງສອງຝ່າຍມີຄວາມສົນໃຈຮ່ວມກັນ.
ສອງຝ່າຍເນັ້ນເຖິງການປົກປ້ອງ ຮັກສາ ແລະ ພັດທະນາ ຄວາມພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ - ລາວ ຊຶ່ງເປັນຄວາມຮັບຜິດຊອບລວມຂອງສອງພັກ, ສອງລັດ ແລະ ປະຊາຊົນສອງປະເທດ, ເປັນຕົ້ນແມ່ນຊາວໜຸ່ມ ຕໍ່ປະຫວັດສາດຂອງສອງຊາດ, ມີຄວາມໝາຍຕັດສິນ ຮັບປະກັນການພັດທະນາຍືນຍົງ ແລະ ອະນາຄົດຂອງສອງປະເທດ, ປະກອບສ່ວນອັນຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ ຢູ່ໃນພາກພື້ນ ແລະ ໃນໂລກ.
ສອງຝ່າຍເຫັນດີເປັນເອກະສັນຈະເພີ່ມທະວີການພົວພັນແລກປ່ຽນ, ຮ່ວມມືກັນໃນບັນດາຂົງເຂດ: ການເມືອງ, ເສດຖະກິດ, ວັດທະນະທຳ, ການສຶກສາ, ວິທະຍາສາດ-ເຕັກນິກ…; ຍູ້ແຮງການໂຄສະນາ, ອົບຮົມສຶກສາກ່ຽວກັບມູນເຊື້ອພົວພັນພິເສດ ຫວຽດນາມ - ລາວ ໃຫ້ພະນັກງານ, ສະມາຊິກພັກ ແລະ ປະຊາຊົນ, ເປັນຕົ້ນແມ່ນຊາວໜຸ່ມ ຂອງສອງປະເທດ; ສົມທົບກັນຈັດຕັ້ງເປັນຢ່າງດີ ບັນດາການເຄື່ອນໄຫວສະເຫຼີມສະຫຼອງ ວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ ໃນປີ 2017.
ສອງຝ່າຍເຫັນດີເປັນເອກະສັນຈະແບ່ງປັນຂໍ້ມູນຂ່າວສານຢ່າງທັນການ ແລະ ສົມທົບກັນຢ່າງແໜ້ນແຟ້ນ ໃນບັນດາເວທີປາໄສສາກົນ ແລະ ພາກພື້ນ; ເນັ້ນເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມສະຫງົບປອດໄພ ຢູ່ທະເລຕາເວັນອອກ, ເຫັນດີເປັນເອກະສັນກັບການຊຸກຍູ້ການແກ້ໄຂຂໍ້ຂັດແຍ້ງພິພາດ ຢູ່ທະເລຕາເວັນອອກ ດ້ວຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລດປີ 1982 (UNCLOS 1982); ພ້ອມກັນກັບບັນດາປະເທດທີ່ກ່ຽວຂ້ອງ ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍ ຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ ແລະ ບັນລຸເຖິງປະມວນຂໍ້ກຳນົດກ່ຽວກັບການປະພຶດ ຢູ່ທະເລຕາເວັນອອກ (COC) ໂດຍໄວ ເພື່ອປະກອບສ່ວນຮັກສາສັນຕິພາບ, ສະຖຽນລະພາບ, ຄວາມສະຫງົບ, ການຮ່ວມມື ແລະ ພັດທະນາ ຢູ່ໃນພາກພື້ນ ແລະໃນໂລກ.
ເນື່ອງໃນໂອກາດນີ້, ພັກ ລັດ ແລະປະຊາຊົນຫວຽດນາມ ໄດ້ມອບກິດຈະການກໍ່ສ້າງອາຄານສະພາແຫ່ງຊາດຢູ່ທີ່ສະໜາມຫຼວງ ທາດຫຼວງວຽງຈັນ ເປັນຂອງຂວັນໃຫ້ ພັກ ລັດ ແລະ ປະຊາຊົນລາວ, ແລະ ທ່ານເລຂາທິການໃຫຍ່ ຫງວຽນຝູຈ້ອງ ກໍ່ໄດ້ມອບກິດຈະການກໍ່ສ້າງໂຮງຮຽນມັດທະຍົມສຶກສາ ເປັນຂອງຂວັນໃຫ້ແຂວງບໍລິຄຳໄຊ. ສອງຝ່າຍໄດ້ລົງນາມໃນເອກະສານ 7 ສະບັບ ກ່ຽວກັບການຮ່ວມມືໃນຂົງເຂດຕ່າງໆ. ໃນໂອກາດການຢ້ຽມຢາມ, ສອງຝ່າຍໄດ້ອອກຖະແຫຼງການຮ່ວມ ຫວຽດນາມ - ລາວ./.
ບນ ສັງລວມຈາກຂ່າວສານຫວຽດນາມ
