ກອງປະຊຸມສຸດຍອດ ບັນດາທ່ານນາງປະທານສະພາແຫ່ງຊາດ ອອກຖະແຫຼງການ ອາບູ ດາບີ
ທ່ານນາງ ອາມານ ອາບດູນລາ ອານ ຄິວບາຍຊີ ປະທານສະພາແຫ່ງຊາດສະຫະລັດອາຣັບເອມີເຣດ ກ່າວຄຳຂອບໃຈຜູ້ແທນບັນດາປະເທດທີ່ມາຮ່ວມກອງປະຊຸມ; ພ້ອມນັ້ນ ກໍຢືນຢັນ ການເຂົ້າຮ່ວມຂອງທ່ານນາງປະທານສະພາແຫ່ງຊາດ 50 ທ່ານ ພ້ອມດ້ວຍຜູ້ແທນອົງການລັດຖະບານບັນດາປະເທດ, ອົງການຈັດຕັ້ງສາກົນ… ໄດ້ປະກອບສ່ວນເຂົ້າໃນຄວາມສຳເລັດລວມຂອງກອງປະຊຸມ. ພາຍຫຼັງການເຮັດວຽກໃນເວລາສອງວັນ, ບັນດາທ່ານນາງປະທານສະພາແຫ່ງຊາດ ໄດ້ເປັນເອກະພາບຮັບຮອງຜ່ານຖະແຫຼງການ ອາບູ ດາບີ ທີ່ມີຫົວຂໍ້ວ່າ “ສາມັກຄີເພື່ອກຳນົດທິດອະນາຄົດ, ເພື່ອໂລກທີ່ດີງາມກວ່າ”.
ຖະແຫຼງການໄດ້ຢືນຢັນ 38 ປະການ ໃນຖະແຫຼງການຂອງກອງປະຊຸມໂລກຄັ້ງທີສີ່ ຂອງບັນດາປະທານສະພາແຫ່ງຊາດ ກ່ຽວກັບປະຊາທິປະໄຕສຳລັບສັນຕິພາບ ແລະ ການພັດທະນາແບບຍືນຍົງ ກໍ່ສ້າງໂລກຕາມຄວາມປະສົງຂອງປະຊາຊົນ; ລຶ້ມຄືນບັນດາຫຼັກການ ແລະການກະທຳທີ່ໄດ້ແນະນຳໃນລາຍງານສະຫຼຸບ ຂອງກອງປະຊຸມບັນດາທ່ານນາງປະທານສະພາແຫ່ງຊາດຄັ້ງທີ 10 ກ່ຽວກັບການປ່ຽນແປງໃໝ່ເພື່ອຄວາມສະເໝີພາບທາງດ້ານເພດ: ຫັນເປັນຄວາມຈິງການພັດທະນາ, ສັນຕິພາບ ແລະ ປະຊາທິປະໄຕ ເພື່ອແມ່ຍິງ ແລະ ຜູ້ຊາຍ.
ຖະແຫຼງການມຸ່ງໝັ້ນປະກອບສ່ວນປະຕິບັດ ບັນດາເປົ້າໝາຍພັດທະນາແບບຍືນຍົງ 2030 ຊອງສະຫະປະຊາຊາດ, ຂໍ້ຕົກລົງປາຣີ ກ່ຽວກັບການປ່ຽນແປງສະພາບອາກາດ ແລະ ຂອບການກະທຳ ແຊນດາຍ ກ່ຽວກັບ ຫລຸດຜ່ອນຄວາມສ່ຽງຈາກໄພພິບັດ; ຍັງມຸ່ງໝັ້ນປະກອບສ່ວນປະຕິບັດຖະແຫຼງການ ແລະ ໂຄງການການດຳເນີນງານ ປັກກິງ, ກໍ່ຄືແກ້ໄຂບັນດາຮູບການຈຳແນກການປະພຶດ ແລະ ຄວາມຮຸນແຮງຕ້ານແມ່ຍິງ ແລະ ເດັກຍິງ ທຸກຮູບການ...
ຖະແຫຼງການເປັນເອກະພາບ “ສາມັກຄີເພື່ອກຳນົດທິດອະນາຄົດ” ໂດຍຜ່ານຄວາມມຸ່ງໝັ້ນຮ່ວມມື ແລະ ຊຸກຍູ້ການພົວພັນຄູ່ຮ່ວມມື ລະຫວ່າງລັດຖະບານ, ຂົງເຂດເອກະຊົນ ແລະ ສັງຄົມເວົ້າລວມ ເພື່ອແກ້ໄຂບັນດາສິ່ງທ້າທາຍທີ່ໂລກຂອງພວກເຮົາພວມປະເຊີນໜ້າ.
ໃນຖະແຫຼງການ ອາບູ ດາບີ, ບັນດາທ່ານນາງປະທານສະພາແຫ່ງຊາດ ໃຫ້ຄຳໝັ້ນສັນຍາ: ຕັ້ງຄວາມຜາສຸກຂອງປະຊາຊົນ, ສັນຕິພາບ, ຄວາມວັດທະນາຖາວອນ ແລະ ຄວາມຄົບຖ້ວນຂອງໜ່ວຍໂລກແລະມະນຸດຊາດ ເຂົ້າໃນທີ່ຕັ້ງຫຼັກ ໃນບັນດາເປົ້າໝາຍຍຸດທະສາດຂອງສະພາແຫ່ງຊາດ, ແລະ ເຂົ້າໃນທີ່ຕັ້ງໃຈກາງ ໃນຄວາມພະຍາຍາມພັດທະນາ.
ກ່ອນນັ້ນ, ກ່າວປາໄສໃນວາລະສົນທະນາສະເພາະ ກ່ຽວກັບຖະແຫຼງການ ອາບູ ດາບີ, ທ່ານນາງປະທານສະພາແຫ່ງຊາດຫວຽດນາມ ຫງວຽນທີ້ກິມເງິນ ໄດ້ສະແດງຄວາມຊົມເຊີຍສະພາແຫ່ງຊາດສະຫະລັດເອມິເຣດ ແລະ ຄະນະເລຂາທິການສະຫະພາບລັດຖະສະພາໂລກ (IPU) ທີ່ໄດ້ສ້າງຮ່າງຖະແຫຼງການ ອາບູ ດາບີ ຊຶ່ງໄດ້ສະແດງອອກເຖິງເຈດຈຳນົງ, ຄຳໝັ້ນສັນຍາ ຂອງບັນດາທ່ານນາງປະທານສະພາແຫ່ງຊາດ ໃນການຮ່ວມມືຮ່ວມແຮງກັນແກ້ໄຂບັນດາສິ່ງທ້າທາຍທົ່ວໂລກ ຕໍ່ສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ.
ກອງປະຊຸມສຸດຍອດ ບັນດາທ່ານນາງປະທານສະພາແຫ່ງຊາດຂອງໂລກ ຄັ້ງທີ 11 ໄດ້ດຳເນີນການປະຊຸມສົນທະນາບັນຫາສະເພາະ 4 ຄັ້ງ. ຕໍ່ຈາກນັ້ນ, ບັນດາຜູ້ແທນກໍ່ໄດ້ສົນທະນາບັນດາເນື້ອໃນຄື: “ຄວບຄຸມຄວາມອະນຸໂລມຜ່ອນຜັນ”, “ທັດສະນະຂອງຊາວໜຸ່ມ”, “ເຕັກໂນໂລຊີການຫັນປ່ຽນ: ບັນດາໂອກາດ ແລະ ສິ່ງທ້າທາຍ”, “ປ່ຽນແປງໃໝ່ລັດຖະສະພາ ເພື່ອອະນາຄົດທີ່ດີງາມກວ່າ”
ພາຍຫຼັງທີ່ກອງປະຊຸມສຸດຍອດ ບັນດາທ່ານນາງປະທານສະພາແຫ່ງຊາດຂອງໂລກ ຄັ້ງທີ 11 ປິດລົງ, ຄ່ຳວັນທີ 13 ທັນວາ, ຢູ່ທີ່ນະຄອນຫຼວງ ອາບູ ດາບີ, ທ່ານນາງປະທານສະພາແຫ່ງຊາດຫວຽດນາມ ຫງວຽນທີ້ກິມເງິນ ໄດ້ພົບປະ ແລະ ໂອ້ລົມກັບພະນັກງານ, ລັດຖະກອນ ສະຖານທູດຫວຽດນາມ ແລະ ຜູ້ແທນຂອງຊຸມຊົນຊາວຫວຽດນາມຢູ່ສະຫະລັດເອມິເຣດ. ທ່ານນາງປະທານສະພາແຫ່ງຊາດ ຫງວຽນທີ້ກິມເງິນ ໄດ້ໃຫ້ທຸກຄົນຮູ້ກ່ຽວກັບຜົນສຳເລັດຂອງກອງປະຊຸມ ກໍ່ຄືສ່ວນປະກອບຂອງຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ເຂົ້າໃນຜົນສຳເລັດລວມຂອງ ກອງປະຊຸມສຸດຍອດບັນດາທ່ານນາງປະທານສະພາແຫ່ງຊາດ ຂອງໂລກ ຄັ້ງທີ 11. ທ່ານນາງປະທານສະພາແຫ່ງຊາດໃຫ້ຮູ້ວ່າ, ຖະແຫຼງການ ອາບູ ດາບີ ໄດ້ຮັບເອົາຄຳສະເໜີຂອງຫວຽດນາມກ່ຽວກັບເນື້ອໃນສັນຕິພາບ ແລະ ຄວາມສະຫງົບ. ເນື້ອໃນນີ້ຖືກຮັບຮອງຜ່ານແມ່ນໄດ້ສະແດງໃຫ້ເຫັນເຖິງເຈດຈຳນົງ, ຄຳໝັ້ນສັນຍາຂອງບັນດາທ່ານນາງປະທານສະພາແຫ່ງຊາດ ໃນການຮ່ວມແຮງຮ່ວມມືກັນແກ້ໄຂບັນດາສິ່ງທ້າທາຍທົ່ວໂລກ ທີ່ມີຕໍ່ສັນຕະພາບ, ຄວາມສະຫງົບ ແລະ ການພັດທະນາແບບຍືນຍົງ, ເຖິງບົດບາດຂອງສະພາແຫ່ງຊາດໃນການຊຸກຍູ້ແກ້ໄຂຄວາມຂັດແຍ້ງພິພາດດ້ວຍສັນຕິວິທີ, ເຄົາລົບກົດໝາຍສາກົນຢ່າງຄົບຖ້ວນ. ພ້ອມກັນນັ້ນ, ທ່ານນາງປະທານສະພາແຫ່ງຊາດຫວຽດນາມ ໄດ້ມີບົດປາໄສ ແລະ ເປັນປະທານຮ່ວມການສົນທະນາກ່ຽວກັບຫົວຂໍ້ "ສາມັກຄີກັນປົກປັກຮັກສາໜ່ວຍໂລກໃຫ້ມີຄວາມສົກໃສ" ແລະ ມີບັນດາການພົບປະຂັ້ນສູງສອງຝ່າຍ...
ຕອນເຊົ້າວັນທີ 14 ທັນວາ, ທ່ານນາງປະທານສະພາແຫ່ງຊາດ ຫງວຽນທີ້ກິມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ອອກເດີນທາງກັບເມືອປະເທດ, ສຳເລັດສິ້ນສຸດການເຄື່ອນໄຫວເຂົ້າຮ່ວມກອງປະຊຸມສຸດຍອດບັນດາທ່ານນາງປະທານສະພາແຫ່ງຂາດ ຄັ້ງທີ 11 ຕາມຄຳເຊີນຂອງທ່ານ ຊາເບີ ໂຈພູຣີ ປະທານສະຫະພາບລັດຖະສະພາໂລກ (IPU) ແລະ ຂອງທ່ານນາງ ອາມານ ອາບດູນລາ ອານ ຄິວບາຍຊີ ປະທານສະພາແຫ່ງຊາດສະຫະລັດເອມິເຣດ./.
ໂດຍ ບນ (ສັງລວມຈາກຂ່າວສານຫວຽດນາມ)