ນາຍົກລັດຖະມົນຕີ ແຫ່ງ ລາຊະອານາຈັກ ກຳປູເຈຍ ມາຢ້ຽມຢາມ ປະເທດ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ
ວກ. ອອນໄລ - ໂດຍຮັບຄຳເຊີນຂອງ ທ່ານນາຍົກລັດຖະມົນຕີ ຫງວຽນຊວນຟຸກ, ທ່ານສົມເດັດ ອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງລາຊະອານາຈັກ ກຳປູເຈຍ ໄດ້ນຳໜ້າຄະນະຜູ້ແທນຂັ້ນສູງລັດຖະບານລາຊະວົງ ກຳປູເຈຍ ໄດ້ມາຢ້ຽມຢາມປະເທດ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ ແຕ່ວັນທີ 20 ຫາ 21 ທັນວາ 2016.
ໃນໄລຍະເວລາຢູ່ຫວຽດນາມ, ທ່ານຮຸນແຊນ ໄດ້ມີການພົບປະເຈລະຈາກັບ ທ່ານນາຍົກລັດຖະມົນຕີ ຫງວຽນຊວນຟຸກ, ເຂົ້າຢ້ຽມຄຳນັບເລຂາທິການໃຫຍ່ພັກກອມມູນິດຫວຽດນາມ ທ່ານຫງວຽນຝູຈ້ອງ, ປະທານປະເທດ ເຈີ່ນດ້າຍກວາງ, ພົບປະແລກປ່ຽນຄຳຄິດເຫັນກັບ ທ່ານນາງປະທານສະພາແຫ່ງຊາດ ຫງວຽນທິກິມເງິນ; ຕັ້ງພວງມາລາທີ່ອະນຸສາວະລີບັນດານັກຮົບວິລະຊົນຜູ້ທີ່ເສຍຊີວິດເພື່ອຊາດ, ເຂົ້າໄຫວ້ອາໄລທີ່ອະນຸສາວະລີຫໍສົບຂອງທ່ານປະທານໂຮ່ຈີມິນ; ໄປຢ້ຽມຢາມນະຄອນໂຮ່ຈີມິນ ແລະ ແຂວງ ດົ່ງນາຍ.
ໃນບັນດາການພົບປະຫາລື, ດ້ວຍບັນຍາກາດແຫ່ງຄວາມສາມັກຄີມິດຕະພາບ, ເຂົ້າໃຈ ແລະ ເຊື່ອໝັ້ນເຊິ່ງກັນ ແລະ ກັນ, ການນຳຂັ້ນສູງທັງສອງປະເທດໄດ້ມີການແລກປ່ຽນຄຳຄິດເຫັນຢ່າງເລິກເຊິ່ງກວ້າງຂວາງກ່ຽວກັບສາຍພົວພັນມິດຕະພາບ ແລະ ການຮ່ວມມືຮອບດ້ານ ລະຫວ່າງ ຫວຽດນາມ ແລະ ກຳປູເຈຍ, ບັນດາບັນຫາສາກົນ, ພາກພື້ນທີ່ສອງຝ່າຍມີຄວາມສົນໃຈຮ່ວມກັນ.
ທ່ານນາຍົກລັດຖະມົນຕີ ຮຸນແຊນ ໄດ້ສະແດງຄວາມຊົມເຊີຍຕໍ່ບັນດາຜົນງານອັນໃຫຍ່ຫຼວງທີ່ປະຊາຊົນ ຫວຽດນາມ ບັນລຸໄດ້ ໃນພາລະກິດແຫ່ງການປ່ຽນແປງໃໝ່, ກໍ່ສ້າງ ແລະ ພັດທະນາປະເທດ; ໃຫ້ຄຳອວຍພອນໄຊປະຊາຊົນຫວຽດນາມ ພາຍໃຕ້ການນຳພາຂອງພັກກອມມູນິດ ຫວຽດນາມ ແລະ ລັດຖະບານຫວຽດນາມ ປະຕິບັດພາລະກິດແຫ່ງການຫັນປະເທດເປັນອຸດສາຫະກຳ ທັນສະໄໝຢ່າງສຳເລັດຜົນ.
ທ່ານນາຍົກລັດຖະມົນຕີ ຫງວຽນຊວນຟຸກ ແລະ ບັນດາທ່ານການນຳຂອງຫວຽດນາມ ໄດ້ສະແດງຄວາມຊົມເຊີຍຕໍ່ບັນດາຜົນງານອັນສຳຄັນທີ່ ປະຊາຊົນກຳປູເຈຍບັນລຸໄດ້, ພາຍໃຕ້ການປົກຄອງຢ່າງສະຫຼາດສ່ອງໃສຂອງພະມະຫາກະສັດ ໂນໂຣດົມ ສີຫະໂມນີ, ການນຳພາຂອງສະພາສູງ, ສະພາແຫ່ງຊາດ ແລະ ລັດຖະບານລາຊະວົງ ກຳປູເຈຍ ໂດຍທ່ານນາຍົກລັດຖະມົນຕີ ຮຸນແຊນ ເປັນຫົວໜ້າ, ໃນພາລະກິດແຫ່ງການກໍ່ສ້າງ ແລະ ພັດທະນາປະເທດ, ດ້ວຍສະພາບການການເມືອງ - ສັງຄົມນັບມື້ນັບໄດ້ຮັບຄວາມເປັນສະຖຽມລະພາບ, ເສດຖະກິດພັດທະນາດ້ວຍຄວາມໄວສູງ, ພາລະບົດບາດ ແລະ ຖານະຂອງກຳປູເຈຍໃນພາກພື້ນ ແລະ ໃນໂລກ ໄດ້ຮັບການຍົກສູງຢ່າງບໍ່ຢຸດຢັ້ງ. ເນື່ອງໃນໂອກາດນີ້, ບັນດາການນຳຂອງຫວຽດນາມ ໄດ້ໃຫ້ຄຳອວຍພອນໄຊຢ່າງຈິງໃຈຕໍ່ກຳປູເຈຍ ຈະຈັດຕັ້ງການເລືອກຕັ້ງຜູ້ແທນສະພາປະຊາຊົນຕາແສງໃນປີ 2017 ແລະ ການເລືອກຕັ້ງຜູ້ແທນສະພາແຫ່ງຊາດໃນປີ 2018 ຢ່າງສຳເລັດຜົນ, ສືບຕໍ່ກໍ່ສ້າງລາຊະອານາຈັກ ກຳປູເຈຍ ມີສັນຕິພາບ ແລະ ພັດທະນາຈະເລີນຮຸ່ງເຮືອງສີວິໄລ.
* ທີ່ການພົບປະເຈລະຈາລະຫວ່າງ ທ່ານນາຍົກລັດຖະມົນຕີ ຫງວຽນຊວນຟຸກ ແລະ ທ່ານນາຍົກລັດຖະມົນຕີ ຮຸນແຊນ, ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະປະເທດ.
ໃນສະພາບການໂລກ ແລະ ພາກພື້ນມີການຫັນປ່ຽນຫຼາຍຢ່າງຄືປະຈຸປັນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນໜັກວ່າ ຫວຽດນາມປະຕິບັດແນວທາງພົວພັນຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ການພົວພັນຫຼາຍຮູບຫຼາຍແບບ ກັບປະເທດຕ່າງໆຢູ່ໃນໂລກ, ແຕ່ຍາມໃດກໍ່ຖືເປັນສຳຄັນສຳລັບສາຍພົວພັນກັບບັນດາປະເທດເພື່ອນບ້ານໃກ້ຄຽງ. ທ່ານນາຍົກລັດຖະມົນຕີໄດ້ສະແດງຄວາມມຸ່ງຫວັງວ່າ ສອງປະເທດຕ້ອງເພີ່ມທະວີຄວາມສາມັກຄີ ແລະ ຮ່ວມມືກັນຍິ່ງກວ່າອີກ, ເຄົາລົບຜົບປະໂຫຍດອັນຊອບທຳຂອງກັນ ແລະ ກັນ, ຮ່ວມມືກັນແກ້ໄຂໃຫ້ໄດ້ດີ ບັນດາບັນຫາທີ່ຍັງຄ້າງຄາ, ຮັກສາສະພາບແວດລ້ອມແຫ່ງສັນຕິພາບ, ສະຖຽບລະພາບ, ກໍ່ຄືເພີ່ມທະວີຄວາມໄມຕີຈິດ ມິດຕະພາບ ຂອງປະຊາຊົນທັງສອງປະເທດ.
ນາຍົກລັດຖະມົນຕີທັງສອງທ່ານກໍ່ໄດ້ມີການເຫັນດີເປັນເອກະພາບກັນ ຈະຮັກສາການແລກປ່ຽນການຢ້ຽມຢາມ, ພົບປະຕ່າງໆ ລະຫວ່າງການນຳຂັ້ນສູງຂອງທັງສອງປະເທດ, ກໍ່ຄືລະຫວ່າງບັນດາກະຊວງ, ຂະແໜງການ, ທ້ອງຖີ່ນ, ອົງການຈັດຕັ້ງຂອງທັງສອງປະເທດ ແນໃສ່ເພີ່ມທະວີການຮ່ວມມືໃນຫຼາຍດ້ານ. ສອງຝ່າຍໄດ້ມີຄຳໝັ້ນສັນຍາຈະສືບຕໍ່ປັບປຸງ ແລະ ຂະຫຍາຍສາຍພົວພັນລະຫວ່າງສອງປະເທດຕາມທິດ “ບ້ານໃກ້ເຮືອນຄຽງທີ່ດີ, ມິດຕະພາບອັນເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ”, ປະຕິບັດບັນດາຫຼັກການທີ່ໄດ້ວາງອອກ ໃນບັນດາຖະແຫຼງການຮ່ວມ ລະຫວ່າງຫວຽດນາມ - ກຳປູເຈຍ ໃນບັນດາປີ 1999, 2005, 2009, 2011, 2014, 2016, ເຄົາລົບຄວາມເປັນເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງເຂົ້າວຽກງານພາຍໃນຂອງກັນ ແລະ ກັນ, ບໍ່ໃຫ້ກຳລັງສັດຕູໃດໆນຳໃຊ້ດິນແດນປະເທດຕົນ ເພື່ອນາບຂູ່ຕໍ່ຄວາມສະຫງົບຂອງປະເທດອື່ນ, ແກ້ໄຂບັນຫາທີ່ເກີດຂຶ້ນລະຫວ່າງສອງປະເທດດ້ວຍສັນຕິພິທີ.
ກ່ຽວກັບບັນຫາຊາຍແດນ, ສອງຝ່າຍກໍ່ໄດ້ເຫັນດີເປັນເອກະພາບກັນ ຈະມອບໃຫ້ຄະນະກຳມະການຮ່ວມກ່ຽວກັບການແບ່ງເຂດປັກຫຼັກໝາຍຊາຍແດນສອງຝ່າຍ ປະສານສົມທົບກັນແກ້ໄຂດ້ວຍມາດຕະການຍຸຕິທຳ, ເໝາະສົມ ເຊິ່ງທັງສອງຝ່າຍອາດສາມາດຮັບຮອງໄດ້ ແນໃສ່ສຳເລັດວຽກງານແບ່ງເຂດປັກຫຼັກໝາຍຊາຍແດນຢູ່ທາງບົກໂດຍໄວ, ກໍ່ຄືແກ້ໄຂໃຫ້ໄດ້ດີ ບັນດາບັນຫາທີ່ເກີດຂຶ້ນໃນທົ່ວສາຍຊາຍແດນຕາມກົນໄກທີ່ມີຢູ່ ແລະ ບົນຈິດໃຈບ້ານໃກ້ເຮືອນຄຽງ ມິດຕະພາບ ລະຫວ່າງສອງປະເທດ.
ສອງຝ່າຍໄດ້ເນັ້ນເຖິງຄວາມສຳຄັນຂອງການຮັກສາສັນຕິພາບ, ສະຖຽມລະພາບ ແລະ ຄວາມສະຫງົບປອດໄພ ຢູ່ທະເລຕາເວັນອອກ; ແກ້ໄຂຂໍ້ຂັດແຍ້ງພິພາດຕ່າງໆ ດ້ວຍສັນຕິວິທີ, ອົດທົນອົດກັ້ນ, ບໍ່ນຳໃຊ້ກຳລັງອາວຸດ ຫຼືນາບຂູ່ໃຊ້ກຳລັງອາວຸດ, ສອດຄ່ອງກັບບັນດາຫຼັກການທີ່ໄດ້ຮັບການຮັບຮອງເອົາຢ່າງກວ້າງຂວາງຂອງກົດໝາຍສາກົນ ລວມທັງອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS), ສອງຝ່າຍກໍ່ໄດ້ໃຫ້ຄຳໝັ້ນສັນຍາ ຈະປະສານສົມທົບພ້ອມກັນພະຍາຍາມປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ, ແລະບັນລຸປະມວນຂໍ້ກຳນົດກ່ຽວກັບວິທີປະພຶດຢູ່ທະເລຕາເວັນອອກ (COC) ໂດຍໄວ.
ສອງຝ່າຍກໍ່ໄດ້ໃຫ້ຄຳໝັ້ນສັນຍາຈະສືບຕໍ່ປະສານສົມທົບກັນຢ່າງແໜ້ນແຟ້ນ ແລະ ກັບບັນດາປະເທດສະມາຊິກອື່ນ ໃນບັນດາຂອບຂອງຄະນະກຳມາທິການແມ່ນ້ຳຂອງສາກົນ, ຮ່ວມມືແມ່ນ້ຳຂອງ - ລານກາງ ແລະ ການຮ່ວມມືອື່ນໆ ແນໃສ່ຮັບປະກັນການຄຸ້ມຄອງ ແລະ ນຳໃຊ້ແຫຼ່ງນ້ຳຢູ່ລົ່ງແມ່ນ້ຳຂອງຢ່າງຍືນຍົງ.
ນາຍົກລັດຖະມົນຕີທັງສອງທ່ານກໍ່ໄດ້ເປັນສັກຂີພິຍານພິທີລົງນາມໃນເອກະສານຮ່ວມມື 3 ສະບັບຄື: ສົມທິສັນຍາວ່າດ້ວຍການຊ່ວຍເຫຼືອຊຶ່ງກັນແລະກັນທາງດ້ານກົດໝາຍອາຍາ ລະຫວ່າງລັດຖະບານສາທາລະນະລັດ ສັງຄົມນິຍົມ ຫວຽດນາມ ແລະ ລັດຖະບານລາຊະວົງ ກຳປູເຈຍ; ສັນຍາວ່າດ້ວຍການສົ່ງຜູ້ທີ່ຖືກຕັດສິນຈຳຄຸກ ລະຫວ່າງສາທາລະນະລັດ ສັງຄົມນິຍົມ ຫວຽດນາມ ແລະ ລາຊະອານາຈັກ ກຳປູເຈຍ; ຂໍ້ຕົກລົງຮ່ວມມືລະຫວ່າງ ຄະນະກຳມະການຊົນເຜົ່າ ແຫ່ງສາທາລະນະລັດ ສັງຄົມນິຍົມ ຫວຽດນາມ ແລະ ກະຊວງພິທີກຳແລະສາສະໜາ ແຫ່ງລາຊະອານາຈັກ ກຳປູເຈຍ.
ສອງຝ່າຍໄດ້ເປັນເອກະພາບ ໃນການປະສານສົມທົບຈັດຕັ້ງການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ຫວຽດນາມ - ກຳປູເຈຍ ຄົບຮອບ 50 ປີ (24 ມິຖຸນາ 1967 – 24 ມິຖຸນາ 2017) ແນໃສ່ເພີ່ມທະວີຄວາມເຂົ້າໃຈລະຫ່າງປະຊາຊົນສອງປະເທດ, ພິເສດແມ່ນໄວໜຸ່ມ ແລະ ມອບໃຫ້ກະຊວງການຕ່າງປະເທດຂອງທັງສອງປະເທດ ຈັດຕັ້ງບັນດາການເຄື່ອນໄຫວສະເຫຼີມສະຫຼອງນີ້.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຮຸນແຊນ ໄດ້ຖືເປັນກຽດເຊີນທ່ານນາຍົກລັດຖະມົນຕີ ຫງວຽນຊວນຟຸກ ໄປຢ້ຽມຢາມລາຊະອານາຈັກ ກຳປູເຈຍໃນປີໜ້ານີ້. ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ສະແດງຄວາມຂອບອົກຂອບໃຈຢ່າງຈິງໃຈ ແລະ ຮັບຄຳເຊີນດ້ວຍຄວາມປິຕິຍິນດີ.
* ໃນຂອບການຢ້ຽມຢາມຄັ້ງນີ້, ທ່ານນາຍົກລັດຖະມົນຕີ ຮຸນແຊນ ໄດ້ມາຢ້ຽມຢາມເຂດຮ່ອງຮອຍປະຫວັດສາດ ກອງ 125 - ເປັນບັນພະອົງການຂອງກອງກຳລັງປະກອບອາວຸດສາມັກຄີກູ້ຊາດ ກຳປູເຈຍ, ທີ່ຕາແສງ ລອງຢາວ, ເມືອງເກີ໋ມໝີ, ແຂວງດົ່ງນາຍ; ໄປເຜົາເຄື່ອງຫອມທີ່ຂຸມຝັງສົບຂອງນັກຮົບກຳປູເຈຍ 49 ຄົນໃນສຸສານທີ່ນັ້ນ.
ທ່ານນາຍົກລັດຖະມົນຕີ ຮຸນແຊນ ໄດ້ສະແດງຄວາມຂອບອົກຄອບໃຈຕໍ່ພັກ, ລັດຖະບານ ຫວຽດນາມ ທີ່ໄດ້ໃຫ້ການເບິ່ງແຍງຮັກສາ ເຂດຮ່ອງຮອຍ ກອງ 125 ແລະ ສຸສານຂອງນັກຮົບກຳປູເຂຍຢູ່ບໍລິເວນນີ້.
ການຢ້ຽມຢາມຫວຽດນາມຂອງທ່ານນາຍົກລັດຖະມົນຕີ ຮຸນແຊນ ໄດ້ສິ້ນສຸດລົງດ້ວຍຜົນສຳເລັດອັນດີງາມ, ໄດ້ປະກອບສ່ວນສ້າງກຳລັງໜູນເພື່ອຊຸກຍູ້ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບບ້ານໃກ້ເຮືອນຄຽງອັນດີງາມ ລະຫວ່າງສອງປະເທດ ຫວຽດນາມ - ກຳປູເຈຍ ໃຫ້ຂະຫຍາຍຕົວຢ່າງແຂງແຮງກວ່າອີກ./.
ສັງລວມໂດຍ ເຟືອງຈ່າ