ທ່ານເລຂາທິການໃຫຍ່ ຫງວຽນຝູຈ້ອງ ສຳເລັດສິ້ນສຸດການຢ້ຽມຢາມເປັນທາງການ ທີ່ປະເທດ ສາທາລະນະລັດ ປະຊາຊົນຈີນ
ວກ.ອອນໄລ - ໂດຍຕອບສະໜອງຕາມຄຳເຊີນຂອງທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດຈີນ, ທ່ານເລຂາທິການໃຫຍ່ ຫງວຽນຝູຈ້ອງ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມປະເທດ ສາທາລະນະລັດ ປະຊາຊົນຈີນ ແຕ່ວັນທີ 12 ຫາ 15 ມັງກອນ 2017.
ທ່ານເລຂາທິການໃຫຍ່ ປະທານປະເທດຈີນ ສີ ຈິ້ນຜິງ ເປັນເຈົ້າພາບງານລ້ຽງນ້ຳຊາ ເພື່ອຕ້ອນຮັບທ່ານເລຂາທິການໃຫຍ່ ຫງວຽນຝູຈ້ອງ. (ພາບ: TTXVN)
ໃນເວລາຢ້ຽມຢາມປະເທດຈີນ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດຈີນ; ພົບປະຫາລືກັບບັນດາກຳມະການປະຈຳກົມການເມືອງສູນກາງພັກ: ນາຍົກລັດຖະມົນຕີຈີນ ຫລີ່ ເຄີ້ສຽງ, ປະທານສະພາປະຊາຊົນແຫ່ງຊາດຈີນ ຈາງ ເຕີ້ຈຽງ, ປະທານການປະຊຸມປຶກສາຫາລືການເມືອງປະຊາຊົນຈີນ ຢູ ເຈິງເຊິງ, ເລຂາຄະນະກຳມະການກວດກາວິໄນສູນກາງ ຫວາງ ກີ໋ຊານ; ເຂົ້າຮ່ວມການພົບປະມິດຕະພາບສະເຫຼີມສະຫຼອງວັນສ້າງຕັ້ງການພົວພັນທາງການທູດຫວຽດນາມ - ຈີນ ຄົບຮອບ 67 ປີ ແລະ ຕ້ອນຮັບປີໃໝ່ 2017. ໃນການຢ້ຽມຢາມ, ສອງຝ່າຍໄດ້ລົງນາມໃນເອກະສານການຮ່ວມມື 15 ສະບັບກ່ຽວກັບຂົງເຂດຕ່າງໆ; ອອກຖະແຫຼງການຮ່ວມທີ່ປະກອບດ້ວຍ 10 ຂໍ້.
ທ່ານເລຂາທິການໃຫຍ່ ຫງວຽນຝູຈ້ອງ ແລະຄະນະຜູ້ແທນຂັ້ນສູງຫວຽດນາມໄດ້ໄປຢາມແຂວງເຈີ໋ຈຽງ ເຊິ່ງເປັນທ້ອງຖິ່ນທີ່ເປັນແບບຢ່າງກ່ຽວກັບຈິດໃຈທຸລະກິດ, ຂະຫຍັນຂັນເຄື່ອນ, ປະດິດສ້າງ ເປັນອັນດັບໜຶ່ງຂອງຈີນ; ພົບປະກັບບັນດານັກທຸລະກິດທີ່ດີເດັ່ນຂອງຈີນ.
ຜ່ານການພົບປະຫາລື ປຶກສາເຈລະຈາ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະພັກ, ແຕ່ລະປະເທດ; ລົງເລິກແລກປ່ຽນຄວາມຄິດຄວາມເຫັນນຳກັນ ແລະບັນລຸເຖິງຄວາມຮັບຮູ້ລວມທີ່ກວ້າງຂວາງກ່ຽວກັບການພັດທະນາ ເຮັດໃຫ້ການພົວພັນລະຫວ່າງສອງພັກ, ສອງລັດໃນໄລຍະໃໝ່ ຂະຫຍາຍຕົວເລິກເຊິ່ງຍິ່ງຂຶ້ນ; ແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນທີ່ສອງຝ່າຍມີຄວາມສົນໃນຮ່ວມກັນ.
ສອງຝ່າຍໃຫ້ທັດສະນະວ່າ, ຫວຽດນາມ ແລະ ຈີນ ເປັນສອງປະເທດເພື່ອນບ້ານໄກ້ຄຽງທີ່ມີມູນເຊື້ອມິດຕະພາບມາແຕ່ດົນນານ, ລ້ວນແຕ່ເປັນປະເທດສັງຄົມນິຍົມໂດຍແມ່ນພັກກອມມູນິດນຳພາ; ການພັດທະນາຍືນຍົງຂອງແຕ່ລະປະເທດ ແລະ ຄວາມພົວພັນມິດຕະພາບ, ການຮ່ວມມືທີ່ດີງາມລະຫວ່າງສອງປະເທດມີຄວາມໝາຍສຳຄັນສຳລັບທັງສອງປະເທດ.
ສອງຝ່າຍເຫັນດີເປັນເອກະສັນວ່າ, ໄມຕີຈິດມິດຕະພາບອັນເປັນມູນເຊື້ອລະຫວ່າງຫວຽດນາມ - ຈີນ ທີ່ທ່ານປະທານໂຮ່ຈີມິນ ແລະ ທ່ານປະທານເໝົາເຈີ໋ຕຸງ ພ້ອມດ້ວຍບັນດາທ່ານຜູ້ນຳຮຸ່ນກ່ອນ ໄດ້ກໍ່ຕັ້ງແລະເພີ່ມພູນຄູນສ້າງມາຕະຫຼອດນັ້ນ ແມ່ນຊັບສົມບັດອັນປະເສີດຂອງສອງພັກ, ສອງປະເທດ ແລະ ປະຊາຊົນສອງປະເທດຕ້ອງສືບທອດ, ຮັກສາ ແລະ ເສີມຂະຫຍາຍໃນສະພາບການໃໝ່ໃຫ້ໄດ້ດີວ່າວອີກ.
ສອງຝ່າຍເຫັນດີເປັນເອກະສັນຈະຮັກສາ ແລະ ເພີ່ມທະວີການແລກປ່ຽນຂັ້ນສູງຫວຽດນາມ - ຈີນ; ເສີມຂະຫຍາຍບົດບາດປະສານງານລວມ ຂອງບັນດາກົນໄກແລກປ່ຽນ, ຮ່ວມມືລະຫວ່າງສອງພັກ, ສອງປະເທດ; ເພີ່ມທະວີການແລກປ່ຽນ, ຮ່ວມມືນຳກັນ ໃນບັນດາຂົງເຂດ ການທູດ, ການປ້ອງກັນຊາດ, ການຮັກສາຄວາມສະຫງົບ ແລະ ປະຕິບັດກົດໝາຍ.
ສອງຝ່າຍເຫັນດີເປັນເອກະສັນຈະເພີ່ມທະວີການຮ່ວມມືທາງດ້ານເສດຖະກິດການຄ້າ, ຍູ້ແຮງການແລກປ່ຽນ, ຮ່ວມມືໃນບັນດາຂົງເຂດເຊັ່ນ ກະສິກຳ, ສິ່ງແວດລ້ອມ, ວິທະຍາສາດເຕັກໂນໂລຊີ, ຄົມມະນາຄົມຂົນສົ່ງ... ສົ່ງເສີມໃຫ້ບັນດາວິສາຫະກິດດີເດັ່ນຂອງຈີນ ມາລົງທຶນໃນບັນດາໂຄງການທີ່ສອດຄ່ອງກັບຄວາມຕ້ອງການ ແລະ ຍຸດທະສາດການພັດທະນາແບບຍືນຍົງ ຂອງຫວຽດນາມ, ເປີດກວ້າງການນຳເຂົ້າບັນດາປະເພດສິນຄ້າທີ່ມີແຮງແຂ່ງຂັນຂອງຫວຽດນາມ, ພ້ອມນັ້ນກໍ່ສ້າງເງື່ອນໄຂອຳນວຍຄວາມສະດວກໃຫ້ບັນດາວິສາຫະກິດຫວຽດນາມເຂົ້າລົງທຶນ ທຳທຸລະກິດທີ່ປະທດຈີນ.
ສອງຝ່າຍໃຫ້ທັດສະນະວ່າ, ຕ້ອງຊຸກຍູ້ການແລກປ່ຽນຢ່າງຟົກຟື້ນ, ເຊື່ອມຕິດສະໜິດແໜ້ນລະຫວ່າງປະຊາຊົນສອງປະເທດ, ພິເສດແມ່ນລະຫວ່າງຊາວໜຸ່ມ ເພື່ອແນໃສ່ເພີ່ມທະວີຄວາມເຂົ້າໃຈແລະມິດຕະພາບລະຫວ່າງສອງປະເທດ. ສອງຝ່າຍໄດ້ແລກປ່ຽນຢ່າງກົງໄປກົງມາ ຊື່ສັດສຸດຈະລິດ ກ່ຽວກັບບັນຫາເທິງທະເລ; ເນັ້ນໜັກວ່າຄວນປະຕິຄວາມຮັບຮູ້ລວມທີ່ສຳຄັນ ເຊິ່ງການນຳຂອງສອງພັກ, ສອງປະເທດໄດ້ບັນລຸ ແລະ “ຂໍ້ຕົກລົງກ່ຽວກັບບັນດາຫຼັກການອັນພື້ນຖານ ທີ່ຊີ້ນຳການແກ້ໄຂບັນຫາຢູ່ທະເລຫວຽດນາມ - ຈີນ”; ນຳໃຊ້ເປັນຢ່າງດີ ກົນໄກເຈລະຈາຂັ້ນລັດຖະບານ ກ່ຽວກັບຊາຍແດນປະເທດຫວຽດນາ - ຈີນ; ຕັ້ງໝັ້ນຜ່ານການປຶກສາຫາລື, ເຈລະຈາມິດຕະພາບ ເພື່ອຊອກຫາວິທີແກ້ໄຂອັນພື້ນຖານ ແລະ ຍາວນານ ທີ່ສອງຝ່າຍອາດຈະຍອມຮັບໄດ້; ຕັ້ງໜ້າຄົ້ນຄວ້າວິທີແກ້ໄຂທີ່ມີລັກສະນະຂ້າມຜ່ານ ທີ່ບໍ່ເປັນຜົນສະທ້ອນເຖິງຫຼັກໝັ້ນ ແລະ ແຜນນະໂຍບາຍຂອງແຕ່ລະຝ່າຍ, ປະກອບດ້ວຍການຄົ້ນຄວ້າ ແລະ ປຶກສາເຈລະຈາຢ່າງຕັ້ງໜ້າກ່ຽວກັບການຮ່ວມມືພ້ອມກັນພັດທະນາ.
ສອງຝ່າຍເຫັນດີເປັນເອກະສັນຈະສືບຕໍ່ປະຕິບັດ “ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ” (DOC) ຢ່າງຮອບດ້ານ ແລະ ມີປະສິດທິຜົນ ບົນພື້ນຖານປຶກສາເຈລະຈາເປັນເອກະພາບ, ກໍ່ສ້າງ “ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ” ໂດຍໄວ” (COC); ຄວບຄຸມຂໍ້ພິພາດຂັດແຍ້ງຢູ່ທະເລໃຫ້ໄດ້ເປັນຢ່າງດີ, ບໍ່ມີການກະທຳທີ່ເປັນການກໍ່ຄວາມສັບສົນ ເປີດກວ້າງຂໍ້ພິພາດຂັດແຍ່ງ, ເພື່ອຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ./.
ໂດຍ ບນ (ສັງລວມຈາກຂ່າວສານຫວຽດນາມ)
