ຊຸກຍູ້ຄວາມພົວພັນຫວຽດນາມ - ລາວ ໃຫ້ຂະຫຍາຍຕົວຢ່າງຮອບດ້ານ
ວກ.ອອນໄລ - ໃນສອງວັນ ຄືວັນທີ 7 ແລະ 8 ກຸມພາ 2017, ກອງປະຊຸມຄັ້ງທີ 39 ຄະນະກຳມະການລະຫວ່າງລັດຖະບານ ກ່ຽວກັບການຮ່ວມມືສອງຝ່າຍ ຫວຽດນາມ - ລາວ ໄດ້ດຳເນີນທີ່ນະຄອນຮ່າໂນ້ຍ ພາຍໃຕ້ການເປັນປະທານຮ່ວມຂອງ ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ແລະ ທ່ານນາຍົກລັດຖະມົນຕີລາວ ທອງລຸນ ສີສຸລິດ.
ທ່ານນາຍົກລັດຖະມົນຕີ ຫວຽດນາມ ຫງວຽນຊວນຝຸກ ແລະ ທ່ານນາຍົກລັດຖະມົນຕີ ລາວ ທອງລຸນ ສີສຸລິດ. (ພາບ: TTXVN)
ກອງປະຊຸມຄະນະກຳມະການລະຫວ່າງລັດຖະບານ ກ່ຽວກັບການຮ່ວມມືສອງຝ່າຍ ຫວຽດນາມ - ລາວ ຄັ້ງທີ 39 ນີ້ ແມ່ນການປະຊຸມຄັ້ງທຳອິດ ໂດຍນາຍົກລັດຖະມົນຕີທັງສອງທ່ານເປັນປະທານຮ່ວມ ຊຶ່ງສະແດງໃຫ້ເຫັນເຖິງຄວາມຕັດສິນໃຈຢ່າງສູງ ຂອງການນຳຂັ້ນສູງຂອງສອງປະເທດ ໃນການຜັນຂະຫຍາຍປະຕິບັດແຜນການຮ່ວມມືປີ 2017.
ໃນເວລາເຮັດວຽກຢູ່ຫວຽດນາມ, ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ໄດ້ເຂົ້າຢ້ຽມຂ່ຳນັບ: ເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ, ປະທານປະເທດຫວຽດນາມ ເຈິ່ນດ້າຍກວາງ; ພົບປະຫາລະກັບທ່ານນາງປະທານສະພາແຫ່ງຊາດຫວຽດນາມ ຫງວຽນທີ້ກິມເງິນ.
ໃນທີ່ບັນດາການພົບປະ ຫາລືລະຫວ່າງການນຳຂັ້ນສູງຂອງສອງປະເທດດັ່ງກ່າວນັ້ນ, ສອງຝ່າຍໄດ້ສະແດງຄວາມດີໃຈກ່ຽວກັບຄວາມພົວພັນສາມັກຄີແບບພິເສດ ແລະ ຮ່ວມມືຮອບດ້ານ ລະຫວ່າງຫວຽດນາມ - ລາວ ທີ່ນັບມື້ນັບຂະຫຍາຍຕົວເຂົ້າສູ່ລວງເລິກ, ປະກອບສ່ວນອັນສຳຄັນເຂົ້າໃນພາລະກິດການສ້າງສາ ແລະ ປົກປັກຮັກສາປະເທດຊາດຂອງແຕ່ລະປະເທດ. ສອງຝ່າຍຢືນຢັນຈະພ້ອມກັນຮັກສາ, ເພີ່ມພູນຄູນສ້າງ, ເສີມຂະຫຍາຍ ຄວາມພົວພັນສາມັກຄີແບບພິເສດ ຫວຽດນາມ - ລາວ ໃຫ້ໝັ້ນຄົງຂະໜົງແກ່ນຕະຫຼອດກາລະນານ.
ສອງຝ່າຍຕີລາຄາສູງໝາກຜົນຂອງກອງປະຊຸມຄະນະກຳມະການລະຫວ່າງລັດຖະບານຄັ້ງທີ 39 ໂດຍນາຍົກລັດຖະມົນຕີ 2 ປະເທດເປັນປະທານຮ່ວມ; ພ້ອມກັນນັ້ນກໍ່ໃຫ້ຄຳໝັ້ນສັນຍາຈະຜັນຂະຫຍາຍຢ່າງມີປະສິດທິຜົນ ບັນດາຂໍ້ຕົກລົງຂັ້ນສູງລະຫວ່າງສອງປະເທດ ແລະ ບັນດາສັນຍາລະຫວ່າງສອງລັດຖະບານ; ເພີ່ມທະວີການປະສານສົບທົບໃນການຕິດຕາມກວດກາ, ສ້າງເງື່ອນໄຂອຳນວຍຄວາມສະດວກໃຫ້ແຫ່ການຜັນຂະຫຍາຍບັນດາໂຄງການຮ່ວມມືລົງທຶນ, ການຄ້າ ລະຫວ່າງສອງປະເທດ ກໍ່ຄືບັນດາເນື້ອໃນທີ່ນາຍົກລັດຖະມົນຕີທັງສອງທ່ານ ໄດ້ເຫັນດີປັນເອກະພາບກັນ ໃນກອງປະຊຸມຄັ້ງທີ 39, ປະກອບສ່ວນປະຕິບັດແຜນການຮ່ວມມືລະຫວ່າງສອງລັດຖະບານ ປີ 2017 ຢ່າງສຳເລັດມີໄຊ.
ໃນກອງປະຊຸມ, ສອງຝ່າຍກໍ່ໄດ້ຕີລາຄາສູງ ແລະ ສະແດງຄວາມປິຕິຍິນດີ ກ່ຽວກັບຜົນງານຂອງການຮ່ວມມືຮອບດ້ານລະຫວ່າງສອງປະເທດ. ໃນປີ 2016, ສອງຝ່າຍໄດ້ຜັນຂະຫຍາຍຢ່າງມີປະສິດທິຜົນ ບັນດາຂໍ້ຕົກລົງຂັ້ນສູງ ແລະ ຂໍ້ຕົກລົງລະຫວ່າງກະຊວງ, ຂະແໜງການ, ທ້ອງຖິ່ນ ຂອງສອງປະເທດ. ພິເສດ, ການຮ່ວມມືດ້ານການເມືອງ, ການຕ່າງປະເທດ, ການປ້ອງກັນຊາດ ປ້ອງກັນຄວາມສະຫງົບ, ເສດຖະກິດ, ວັດທະນະທຳ - ສັງຄົມ, ພົວພັນແລກປ່ຽນປະຊາຊົນ ນັບມື້ນັບໄດ້ເພີ່ມທະວີ ແລະ ຂະຫຍາຍຕົວຢ່າງກວ້າງຂວາງ ເລິກເຊິ່ງ, ຂົງເຂດການສຶກສາກໍ່ສ້າງໄດ້ຮັບການຍູ້ແຮງ. ປະຈຸບັນ, ມີນັກຮຽນ, ນັກສຶກສາລາວ ກວ່າ 14.000 ຄົນ ກຳລັງຮ່ຳຮຽນສຶກສາຢູ່ຫວຽດນາມ. ບັນດາວິສາຫະກິດຫວຽດນາມໄດ້ລົງທຶນເຂົ້າລາວ ໃນ 400 ກວ່າໂຄງການ ດ້ວຍຈຳນວນທຶນປະມານ 3,7 ຕື້ໂດລາສະຫະລັດ.
ໃນກອງປະຊຸມຄັ້ງນີ້, ສອງຝ່າຍໄດ້ວາງກົນໄກໃໝ່ເພື່ອຂັບເຄື່ອນຊຸກຍູ້ການພົວພັນຮ່ວມມືລະຫວ່າງສອງປະເທດ. ໃນປີ 2017, ສອງຝ່າຍເປັນເອກະພາບຈະສຸມໃສ່ປະຕິບັດການຊີ້ນຳຂອງສອງກົມການເມືອງໃຫ້ໄດ້ເປັນຢ່າງດີ, ຊຸກຍູ້ການພົວພັນ ການເມືອງ-ການຕ່າງປະເທດ-ການປ້ອງກັນຊາດປ້ອງກັນຄວາມສະຫງົບ, ການລົງທຶນ, ການຄ້າ, ເປີດກວ້າງການຮ່ວມມືກໍ່ສ້າງແຫຼ່ງກຳລັງຄົນ, ລົງທຶນເຂົ້າໃນບັນດາໂຄງການກໍ່ສ້າງໂຄງສ້າງພື້ນຖານຄົມມະນາຄົມເຊື່ອມຕໍ່ສອງປະເທດ, ຮ່ວມມືຄຸ້ມຄອງນຳໃຊ້ແຫຼ່ງນ້ຳ ແລະ ຊັບພະຍາກອນທຳມະຊາດຢ່າງຍືນຍົງ..., ພ້ອມກັນຈັດຕັ້ງເປັນຢ່າງດີ “ປີສາມັກຄີມິດຕະພາບຫວຽດນາມ - ລາວ 2017”, ສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ຮ່ວມມືລະຫວ່າງ ຫວຽດນາມ ແລະ ລາວ. ບົນຈິດໃຈເຊື່ອຖືຊຶ່ງກັນແລະກັນ, ສອງປະເທດສະໜັບສະໜູນ ແລະ ຮ່ວມມືນຳກັນເປັນຢ່າງດີ ຢູ່ໃນບັນດາການຈັດຕັ້ງ ແລະ ເວທີປາໄສສາກກົນ ແລະ ພາກພື້ນ.
ຫຼັງຈາກການປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວນຝຸກ ແລະ ທ່ານນາຍົກລັດຖະມົນຕີລາວ ທອງລຸນ ສີສຸລິດ ໄດ້ເປັນສັກຂີພະຍານໃນພິທີເຊັນເອກະສານການຮ່ວມມື 4 ສະບັບ ແລະ ເປັນປະທານຮ່ວມ ໃນການປະຊຸມນັກຂ່າວ ເພື່ອແຈ້ງຂ່າວ ກ່ຽວກັບຜົນສຳເລັດຂອງກອງປະຊຸມຄັ້ງທີ 39 ຄະນະກຳສະການລະຫວ່າງລັດຖະບານ ຫວຽດນາມ - ລາວ ແລະ ເຂົ້າຮ່ວມພິທີປະດັບຫຼຽນໄຊອັນສູງສົ່ງຂອງລັດຖະບານສອງປະເທດ ໃຫ້ແກ່ໜ່ວຍງານ ແລະ ພະນັກງານຫ້ອງການຄະນະກຳມະການຮ່ວມມືສອງປະເທດ ທີ່ມີຄຸນງາມຄວາມດີໃນໄລຍະ 2012 - 2015./.
ໂດນ ບນ. (ສັງລວມຈາກຂ່າວສາມຫວຽດນາມ)
