ກອງປະຊຸມ G20 ຕີລາຄາສູງການປະກອບສ່ວນທີ່ຕັ້ງໜ້າ ຂອງຫວຽດນາມ
ດ້ວຍຫົວຂໍ້ “ກໍ່ຮ່າງສ້າງຮູບລະບຽບທົ່ວໂລກ - ນະໂຍບາຍການຕ່າງປະເທດທີ່ພົ້ນອອກຈາກຂອບເຂດຂອງການຄຸ້ມຄອງຕໍ່ວິກິດການ”, ກອງປະຊຸມລັດຖະມົນຕີການຕ່າງປະເທດກຸ່ມບັນດາພື້ນຖານເສດຖະກິດທີ່ພັດທະນາ ແລະ ຫາກໍ່ພົ້ນເດັ່ນຂຶ້ນແຖວໜ້າຂອງໂລກ (G20) ຄັ້ງນີ້ ໄດ້ປຶກສາພິຈາລະນາກ່ຽວກັບການຜັນຂະຫຍາຍ ໂຄງການພັດທະນາແບບຍືນຍົງປີ 2030 ຂອງສະຫະປະຊາຊາດ, ຮັກສາສັນຕິພາບໃນສະພາບການປະຈຸບັນ, ຮ່ວມມື ແລະ ຊ່ວຍເຫຼືອບັນດາປະເທດ ອາຟຣິກກາ. ຜ່ານບັນດາການປຶກສາສົນທະນາຢ່າງເປີດອົກເປີດໃຈ, ກອງປະຊຸມໄດ້ບັນລຸຜົນສຳເລັດທີ່ພົ້ນເດັ່ນດັ່ງນີ້:
ທີໜຶ່ງ, ກອງປະຊຸມຕີລາຄາວ່າ ສະພາບແວດລ້ອມແຫ່ງສັນຕິພາບ, ສະຖຽນລະພາບ ເປັນເງື່ອນໄຂຕັດສິນເບື້ອງຕົ້ນ ຕໍ່ການພັດທະນາແບບຍືນຍົງ; ສົນທະນາກ່ຽວກັບຫຼາຍມາດຕະການເພື່ອກີດກັ້ນການປະທະກັນ, ເພີ່ມທະວີການຮ່ວມມືສາກົນ; ເສີມຂະຫຍາຍບົດບາດຂອງບັນດາອົງການຈັດຕັ້ງສາກົນ, ໃນນັ້ນມີສະຫະປະຊາຊາດເປັນໃຈກາງ, ໃນການແກ້ໄຂສິ່ງທ້າທາຍທີ່ພວມພົ້ນເດັ່ນຂຶ້ນເຊັ່ນ ຄວາມທຸກຍາກ, ໂລກລະບາດ, ຄວາມບໍ່ສະເໝີພາບທາງສັງຄົມ, ການປ່ຽນແປງສະພາບດິນຟ້າອາກາດ, ຄວາມໝັ້ນຄົງທາງດ້ານສະບຽງອາຫານ, ຄວາມໝັ້ນຄົງທາງດ້ານແຫຼ່ງນ້ຳ, ວິກິດການອົບພະຍົບ...
ທີສອງ, ກອງປະຊຸມຢືນຢັນຮັບປະກັນການພັດທະນາແບບຍືນຍົງ, ຮັບປະກັນບໍ່ໃຫ້ຜູ້ໃດ ແລະ ບໍ່ມີພາກພື້ນໃດຖືກຕົກຄ້າງຢູ່ຂ້າງຫຼັງ ເປັນແບບວິທີດີທີ່ສຸດເພື່ອຮັກສາສັນຕີພາບ ສະຖຽນລະພາບຢ່າງຍືນຍົງ; ຮຽກຮ້ອງສາກົນຈົ່ງມີການກະທຳຕົວຈິງ, ມີຄວາມຮັບຜິດຊອບ ເພື່ອປະຕິບັດໂຄງການພັດທະນາແບບຍືນຍົງປີ 2030; ເນັ້ນໜັກເຖິງຄວາມຈຳເປັນຕ້ອງ ເພີ່ມທະວີການຮ່ວມມືທົ່ວໂລກ ແລະ ພາກພື້ນ, ລະດົມຊັບພະຍາກອນທຸກຢ່າງໃນປະເທດ ແລະ ສາກົນ ເພື່ອປະຕິບັດບັນດາເປົ້າໝາຍການພັດທະນາແບບຍືນຍົງ; ຮຽກຮ້ອງບັນດາປະເທດພັດທະນາເພີ່ມທະວີການຊ່ວຍເຫຼືອ ບັນດາປະເທດກຳລັງພັດທະນາ, ປະຕິບັດຢ່າງຖືກຕ້ອງຕາມຄຳແນະນຳຂອງສະຫະປະຊາຊາດກ່ຽວກັບ ການຊ່ວຍເຫຼືອການພັດທະນຢ່າງເປັນທາງການ (ODA) ໃຫ້ບັນດາປະເທດກຳລັງພັດທະນາ... ກອງປະຊຸມເນັ້ນໜັກວ່າ ODA ແລະ ການຊ່ວຍເຫຼືອການພັດທະນາເວົ້າລວມ ບໍ່ແມ່ນ “ຄວາມເອື້ອອາທອນ” ຫຼືໃຈດີແຕ່ຝ່າຍດຽວ ແຕ່ມັນທັງເປັນການຕອງສະໜອງຜົນປະໂຫຍດຂອງບັນດາປະເທດພັດທະນາອີກ.
ທີສາມ, ກອງປະຊຸມເນັ້ນໜັກວ່າ ການຊ່ວຍເຫຼືອບັນດາປະເທດອາຟຣິກກາໃນການຮັກສາສັນຕິພາບ, ສະຖຽນລະພາບ ແລະ ການພັດທະນາ ຈະປະກອບສ່ວນອັນສຳຄັນເຂົ້າໃນການປັບປຸງສິ່ງແວດລ້ອມສັນຕິພາບ, ສະຖຽນລະພພາບ ແລະ ການພັດທະນາໃນໂລກ; ຢືນຢັນຄຳໝັ້ນສັນຍາຂອງບັນດາປະເທດ G20 ກ່ຽວກັບການຊ່ວຍເຫຼືອບັນດາປະເທດອາຟຣິກກາເຊັ່ນ ຊຸກຍູ້ການຫັນເປັນອຸສາຫະກຳ, ສຶກສາ-ກໍ່ສ້າງ, ສະຫວັດດີການສັງຄົມ, ປົກປັກຮັກສາສິ່ງແວດລ້ອມ...
ກອງປະຊຸມສິ້ນສຸດລົງດ້ວຍຖະແຫຼງການຮ່ວມ ກ່ຽວກັບການສະໜັບສະໜູນກົນໄກຮ່ວມມືພະຫຸພາຄີ ເພື່ອແກ້ໄຂທຸກໆສິ່ງທ້າທາຍທົ່ວໂລກ. ກອງປະຊຸມ G20 ຄັ້ງນີ້ຖືກຖືວ່າເປັນບາດກ້າວກະກຽມທີ່ສຳຄັນ ໃຫ້ແກ່ກອງປະຊຸມສຸດຍອດໃນເດືອນກໍລະກົດ, ຊຶ່ງເປັນບ່ອນທີ່ G20 ຊອກຫາໄດ້ ທິດທາງແກ້ໄຂບັນດາສິ່ງທ້າທາຍທີ່ໃຫຍ່ຫຼວງ ເພື່ອຊຸກຍູ້ການພັດທະນາແບບຍືນຍົງ, ກ້າວໄປເຖິງເປົ້າໝາຍກາຍເປັນໂລກທີ່ເຊື່ອມຕໍ່.
ໃນຖານະເປັນເຈົ້າພາບຂອງ APEC 2017, ຫວຽດນາມຖືກເຊີນເຂົ້າຮ່ວມເກືອບທັງໝົດທຸກກອງປະຊຸມ, ການເຄື່ອນໄຫວຂອງກຸ່ມ G20 ໃນຖານະເປັນເຈົ້າພາບຂອງ APEC 2017. ນີ້ກໍ່ແມ່ນຄັ້ງທຳອິດທີ່ປະເທດເຈົ້າພາບ "ປີ APEC" ທີ່ບໍ່ແມ່ນສະມາຊິກຂອງ G20 ໄດ້ຮັບການເຊື້ອເຊີນໃຫ້ເຂົ້າຮ່ວມກອງປະຊຸມສຸດຍອດ G20.
ກ່າວປາໄສທີ່ກອງປະຊຸມລັດຖະມົນຕີການຕ່າງປະເທດ G20, ທ່ານຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຢືນຢັນແນວທາງການຕ່າງປະເທດທີ່ເປີດກວ້າງ, ຫຼາຍກ້ຳຫຼາຍຝ່າຍ, ຫຼາຍຮູບຫຼາຍແບບ ແລະ ການເຊື່ອມໂຍງສາກົນຢ່າງເປັນເຈົ້າການ, ຕັ້ງໜ້າຂອງຫວຽດນາມ. ຕໍ່ໜ້າການຜັນປ່ຽນຢ່າງສັບສົນຂອງສະພາບການໂລກປະຈຸບັນ, ທ່ານຮອງນາຍົກລັດຖະມົນຕີ ຮຽກຮ້ອງໃຫ້ບັນດາປະເທດເພີ່ມທະວີການຮ່ວມມືທົ່ວໂລກ ໃນການຮັກສາສັນຕິພາບ, ສະຖຽນລະພາບ, ການພັດທະນາແບບຍືນຍົງ; ສະເໜີໃຫ້ແກ້ໄຂຄວາມຂັດແຍ້ງ ຂໍ້ພິພາດດ້ວຍສັນຕິວິທີ, ປະຕິບັດຕາມກົດໝາຍສາກົນ ແລະ ບັນດາຂະບວນວິວັດກົດໝາຍ - ການທູດ.
ທ່ານຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ກໍ່ໄດ້ສະເໜີໃຫ້ບັນດາປະເທດ G20 ເພີ່ມທະວີການຊ່ວຍເຫຼືອບັນດາປະເທດກຳລັງພັດທະນາ ໃນການປະຕິບັດບັນດາເປົ້າໝາຍການພັດທະນາແບບຍືນຍົງ, ເປັນຕົ້ນແມ່ນ ໃນຂົງເຂດໂຄງສ້າງພື້ນຖານ, ພັດທະນາແຫຼ່ງຊັບພະຍາກອນມະນຸດ, ມອບໂອນເຕັກໂນໂລຊີ ແລະ ຕ້ານການປ່ຽນແປງຂອງສະພາບອາກາດ. ທ່ານຮອງນາຍົກລັດຖະມົນຕີ ເນັ້ນວ່າ ລັດທິອາລັກຂາ ແລະ ການແຍກປ່ຽວເຫັນແກ່ຕົວເອງ ບໍ່ແມ່ນວິທີແກ້ໄຂໃຫ້ແກ່ບັນດາບັນຫາເສດຖະກິດ - ສັງຄົມ ແລະ ທ່ານໄດ້ຮຽກຮ້ອງໃຫ້ບັນດາປະເທດຈົ່ງເພີ່ມທະວີການສົມທົບກັນຊຸກຍູ້ການຄ້າທົ່ວໂລກ ແລະ ພາກພື້ນ, ພະຍາຍາມກໍ່ສ້າງລະບົບການຄ້າພະຫຸພາຄີທີ່ສົມດຸນ, ຮັບໃຊ້ການພັດທະນາ ແລະ ອີງໃສ່ລະບຽບກົດໝາຍ; ຮັບປະກັນໃຫ້ບັນດາປະຊາຊາດ ແລະ ປະຊາຊົນ ລ້ວນແຕ່ໄດ້ຮັບຜົນປະໂຫຍດຈາກການຄ້າ ແລະ ການເຕີບໂຕເສດຖະກິດ.
ດ້ວຍຫຼັກນຳເປັນເຈົ້າການ, ຕັ້ງໜ້າເຊື່ອມໂຍງສາກົນ, ເປັນຄູ່ຮ່ວມທີ່ໄວ້ວາງໃຈ ແລະ ມີຄວາມຮັບຜິດຊອບ, ອີງໃສ່ຫົວຂໍ້ ແລະ ເນື້ອໃນຂອງກອງປະຊຸມ, ຫວຽດນາມໄດ້ເຂົ້າຮ່ວມຢ່າງຕັ້ງໜ້າ ແລະ ປະກອບສ່ວນເຂົ້າໃນບັນດາການເຄື່ອນໄຫວ ແລະ ການປະຊຸມຂອງ G20 ປີນີ້, ເຊື່ອມໂຍງບັນດາເນື້ອໃນບຸລິມະສິດຂອງ APEC ແນໃສ່ເພີ່ມທະວີການສົມທົບພາກພື້ນ ແລະ ທົ່ວໂລກ ໃນການແກ້ໄຂບັນດາບັນຫາເສດຖະກິດ ແລະ ການບໍລິຫານທົ່ວໂລກ ໃນສະພາບການໂລກພວມຢືນຕໍ່ໜ້າສິ່ງທ້າທາຍ ແລະ ຄວາມບໍ່ແນ່ນອນຕ່າງໆ. ການເຂົ້າຮ່ວມຢ່າງຕັ້ງໜ້າ ແລະ ການປະກອບສ່ວນແທດຈິງຂອງຫວຽດນາມ ໃນລະດັບໜ່ວຍປະຕິບັດງານ ຈົນເຖິງບັນດາກອງປະຊຸມລັດຖະມົນຕີການຕ່າງປະເທດ ແລະ ຂະແໜງການສະເພາະຕ່າງໆ (ເສດຖະກິດ, ການຄ້າ, ການເງິນ - ທະນາຄານ, ການກະເສດ...) ໄດ້ຮັບການຕີລາຄາສູງຈາກປະເທດເຈົ້າພາບ ເຢຍລະມັນ ແລະ ບັນດາຄະນະຜູ້ແທນທີ່ເຂົ້າຮ່ວມ G20.
ເນື່ອງໃນໂອກາດເຂົ້າຮ່ວມກອງປະຊຸມລັດຖະມົນຕີການຕ່າງປະເທດ G20, ທ່ານຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽນາມ ໄດ້ມີການພົບປະຕ່າງໆຢ່າງກວ້າງຂວາງກັບບັນດາຄູ່ຮ່ວມມືຄື ລັດຖະມົນຕີການຕ່າງປະເທດ ຂອງປະເທດເຈົ້າພາບ ເຢຍລະມັນ, ລັດຖະມົນຕີການຕ່າງປະເທດສະຫະລັດອາເມຣິກາ Rex Tillerson, ລັດຖະມົນຕີການຕ່າງປະເທດອັງກິດ Boris Johnson, ບັນດາລັດຖະມົນຕີການຕ່າງປະເທດ ປະເທດ Brazil, Spain... ໃນບັນດາການພົບປະຫາລືເຫຼົ່ານັ້ນ, ບັນດາລັດຖະມົນຕີກະຊວງການຕ່າງປະເທດ ລ້ວນແຕ່ຕີລາຄາສູງບົດບາດ, ຖານະທີ່ຕັ້ງຂອງຫວຽດນາມຢູ່ໃນພາກພື້ນ, ການເຂົ້າຮ່ວມຢ່າງຕັ້ງໜ້າຂອງຫວຽດນາ ໃນກອງປະຊຸມຂອງ G20 ໃນຖານະເປັນປະເທດເຈົ້າພາບຂອງ APEC 2017. ທ່ານຟ້າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ໄດ້ພ້ອມກັນກັບບັນດາທ່ານລັດຖະມົນຕີກະຊວງການຕ່າງປະເທດຂອງປະເທດຕ່າງໆ ປຶກສາຫາລືບັນດາມາດຕະການເພື່ອຊຸກຍູ້ການຮ່ວມມືສອງຝ່າຍ ກໍ່ຄືປະສານສົມທົບກັນໃນບັນດາເວທີປາໄສພະຫຸພາຄີ ລະດັບພາກພື້ນ ແລະ ທົ່ວໂລກ./.
ໂດຍ ຖູ່ຍລີງ