ພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ Michiko ສິ້ນສຸດການຢ້ຽມຢາມຫວຽດນາມ ຢ່າງຈົບງາມ
ວກ.ອອນໄລ - ໂດຍຕອບສະໜອງຕາມຄຳເຊີນ ຂອງປະທານປະເທດຫວຽດນາມ ເຈີ່ນດ້າຍກວາງ, ພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ Michiko ໄດ້ດຳເນີນການຢ້ຽມຢາມທາງລັດຖະກິດທີ່ປະເທດຫວຽດນາມ ແຕ່ວັນທີ 28 ກຸມພາ ຫາວັນທີ 5 ມີນາ 2017.
ປະທານປະເທດຫວຽດນາມ ເຈີ່ນດ້າຍກວາງ ແລະ ພະເຈົ້າຈັກກະພັດຍີ່ປຸ່ນ Akihito ໃນງານລ້າງລະດັບລັດ (ພາບ: TTXVN)
ໃນບັນດາການພົບປະ, ສອງຝ່າຍໄດ້ໃຫ້ທັດສະນະວ່າ ການຢ້າມຢາມທາງລັດຖະກິດຄັ້ງທຳອິດທີ່ປະເທດຫວຽດນາມ ຂອງພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ ມີຄວາມໝາຍປະຫວັດສາດໃນຄວາມພົວພັນລະຫວ່າງສອງປະເທດ; ສອງຝ່າຍມີຄວາມເຊື່ອໝັ້ນວ່າ ການຢ້ຽມຢາມຂອງພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ ເປັນການປະກອບສ່ວນເພີ່ມທະວີຄວາມໄວ້ວາງໃຈ, ຄວາມເຂົ້າໃຈຊຶ່ງກັນແລະກັນ ແລະ ອາລົມຈິດລະຫວ່າງປະຊາຊົນສອງປະເທດ, ຜ່ານສິ່ງດັ່ງກ່າວນັ້ນ ເພື່ອພັດທະນາຄວາມພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ຍີ່ປຸ່ນ ໃຫ້ກວ້າງຂວາງເລິກເຊິ່ງຍິ່ງກວ່າອີກໃນເວລາຕໍ່ໄປ.
ສອງຝ່າຍເຫັນດີເປັນເອກະສັນວ່າ ຄວາມພົວພັນຫວຽດນາມ - ຍີ່ປຸ່ນ ພວມຢູ່ໃນໄລຍະແຫ່ງການພັດທະນາທີ່ດີງາມທີ່ສຸດ ໃນປະຫວັດສາດ. ປີ 2018, ຫວຽດນາມ ແລະ ຍີ່ປຸ່ນ ຈະສະເຫຼີມສະຫຼອງ 45 ປີແຫ່ງການສ້າງຕັ້ງສາຍພົວພັນທາງການທູດລະຫວ່າງສອງປະເທດ.
ສອງຝ່າຍເນັ້ນໜັກວ່າ ການທີ່ສອງປະເທດໄດ້ພົວພັນແລກປ່ຽນນຳກັນໃນປະຫວັດສາດ, ມີຫຼາຍຈຸດທີ່ຄ້າຍຄືກັນທາງດ້ານວັດທະນະທຳຄື ປູກເຂົ້າ, ລ້ຽງມ້ອນ, ຕ່ຳແຜ່ນ ແລະ ລ້ວນແຕ່ຮັກຫອມສັນຕິພາບນັ້ນ ແມ່ນພື້ນຖານທີ່ຕ້ອງໄດ້ຮັກສາ ແລະ ຊຸກຍູ້ ເພື່ອພັດທະນາຄວາມພົວພັນຫວຽດນາມ - ຍີ່ປຸ່ນ ຍິ່ງກວ່າອີກ.
ພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ Michiko ໄດ້ແບ່ງປັນຄວາມຫຍຸ້ງຍາກຕ່າງໆ ກັບປະຊາຊົນຫວຽດນາມ ທີ່ຖືກການກະທົບຂອງການປ່ຽນແປງສະພາບດິນຟ້າອາກາດເຊັ່ນ ໄພແຫ້ງແລ້ງ, ນ້ຳເຄັມຄຸກຄາມ ແລະ ມົນພິດສິ່ງແວດລ້ອມ.
ສອງຝ່າຍເຫັນດີເປັນເອກະສັນ ກ່ຽວກັບການທີ່ບັນດາປະເທດໃນໂລກຄວນເອົາໃຈໃສ່ເຖິງບັນຫາປົກປັກຮັກສາສິ່ງແວດລ້ອມ ເພື່ອແນໃສ່ຮັກສາສຸຂະພາບ ແລະ ຊີວິດຂອງປະຊາຊົນ; ແບ່ງປັນຄວາມຮັບຮູ້ລວມກ່ຽວກັບຄວາມສຳຄັນຂອງການສຶກສາຕໍ່ກັບການພັດທະນາປະເທດ...
ໃນຂອບເຂດການຢ້ຽມຢາມທາງລັດຖະກິດທີ່ປະເທດຫວຽດນາມ, ພະເຈົ້າຈັກກະພັດຍີ່ປຸ່ນ Akihito ແລະ ພະມະເຫສີ Michiko ໄດ້ຕ້ອນຮັບພາລະກອນອາສາສະໝັກ ຂອງອົງການຮ່ວມມືພັດທະນາສາກົນຍີ່ປຸ່ນ (JICA); ພົບປະພະນັກງານສະຖານທູດຍີ່ປຸ່ນຢູ່ຫວຽດນາມ; ພົບປະກັບປະຊາຄົມຊາວຍີ່ປຸ່ນທີ່ຢູ່ຫວຽດນາມ; ພົບປະກັບຄອບຄົວຂອງອະດີດທະຫານຍີ່ປຸ່ນທີ່ມີຊີວິດຢູ່ຫວຽດນາມ; ຢ້ຽມຢາມພິພິດທະພັນຊີວະວິທະຍາ (ສັງກັດມະຫາວິທະຍາໄລແຫ່ງຊາດຮ່າໂນ້ຍ); ຢ້ຽມຢາມລາຊະວັງເຫວ້ ແລະ ຮັບຟັງດົນຕີໃນລາຊະວັງ; ຢ້ຽມຢາມຫໍອະນຸສອນສະຖານ ຟານໂບ້ຍເຈົາ./.
ບນ (ສັງລວມຈາກຂ່າວສານຫວຽດນາມ)
