ປະທານາທິບໍດີ ອິດສະຣາແອນ ແລະ ພັນລະຍາ ສຳເລັດສິ້ນສຸດການຢ້ຽມຢາມປະເທດຫວຽດນາມ ຢ່າງຈົບງາມ
ໃນຂອບການຢ້ຽນຢາມປະເທດຫວຽດນາມ, ຫຼັງຈາກພິທີຕ້ອນຮັບຢ່າງເປັນທາງການ, ທ່ານປະທານາທິບໍດີ ອິດສະຣາແອນ Reuven Ruvi Rivlin ໄດ້ພົບປະເຈລະຈາກັບທ່ານປະທານປະເທດ ເຈິ່ນດ້າຍກວາງ ແລະ ໄດ້ພົບປະກັບອົງການສື່ສິ່ງພິມ; ພົບປະກັບທ່ານເລຂາທິການໃຫຍ່ ຫງວຽນຝູຈ້ອງ; ພົບປະກັບທ່ານນາຍົກລັດຖະມົນຕີ ຫງວຽນຊວນຝຸກ; ພົບປະກັບທ່ານປະທານຄະນະກຳມະການປະຊາຊົນ ນະຄອນ ຮ່າໂນ້ຍ ແລະ ເປັນສັກຂີພະຍານພິທີເຊັນບົດບັນທຶກຊ່ວຍຈຳກ່ຽວກັບການປະຕິບັດໂຄງການ “ລະບົບສາທາລະນະສຸກ - ເບິ່ງແຍງດູແລສຸຂະພາບເຕັກໂນໂລຊີສູງຢູ່ຮ່າໂນ້ຍ” ລະຫວ່າງກຸ່ມບໍລິສັດ TH True Milk ກັບບໍລິສັດ MedicDan Ltd ແລະ ບໍລິສັດ Staromedic R.N International (ອິດສະຣາແອນ); ພົບປະກັບທ່ານປະທານຄະນະກຳມະການປະຊາຊົນ ນະຄອນ ໂຮ່ຈີມິນ ແລະ ເປັນສັກຂີພະຍານພິທີເຊັນບົດບັນທຶກຊ່ວຍຈຳກ່ຽວກັບບ້ວງການເງິນ 200 ລ້ານໂດລາສະຫະລັດ ໃນຂົງເຂດສາທາລະນະສຸກ ລະຫວ່າງກຸ່ມບໍລິສັດ Jasmine (ອິດສະຣາແອນ) ແລະ ບໍລິສັດຫຸ້ນສ່ວນລົງທຶນອະສັງຫາລິມະຊັບ ໂກນເດັນ.
ໃນທີ່ບັນດາການພົບປະຫາລືນັ້ນ, ສອງຝ່າຍໄດ້ແລກປ່ຽນຢ່າງລະອຽດ, ຢືນຢັນຄວາມຕັດສິນໃຈເພີ່ມທະວີ, ພັດທະນາສາຍພົວພັນຮ່ວມມືລະຫວ່າງສອງປະເທດຍິ່ງກວ່າອີກໃນເວລາຕໍ່ໄປ, ພິເສດແມ່ນໃນຂົງເຂດເສດຖະກິດ, ວິທະຍາສາດ-ເຕັກໂນໂລຊີ.
ສອງຝ່າຍເຊື່ອໝັ້ນວ່າ, ການຮ່ວມມືຢ່າງແໜ້ນແຟ້ນລະຫວ່າງສອງລັດຖະບານ, ວິສາຫະກິດສອງປະເທດ ຈະເຮັດໃຫ້ການພົວພັນເສດຖະກິດ, ການຄ້າສອງຝ່າຍຂະຫຍາຍຕົວໄວກວ່າອີກ.
ສອງຝ່າຍເປັນເອກະພາບຖືວ່າ ເສດຖະກິດເປັນຈຸດໜັກໃຈກາງ, ເຮັດໃຫ້ວິທະຍາສາດເຕັກໂນໂລຊີກາຍເປັນເສົາຄ້ຳບຸລິມະສິດ ໃນການຮ່ວມມືສອງຝ່າຍ ໃນເວລາຕໍ່ໄປ.
ສອງຝ່າຍເປັນເອກະພາບ ຈະຂຸກຄົ້ນຢ່າງສຸດຂີດຄວາມສາມາດ ແລະ ລັກສະນະເພີ່ມເຕີມຊຶ່ງກັນແລະກັນຂອງພື້ນຖານເສດຖະກິດສອງປະເທດ, ເປັນເອກະພາບເພີ່ມມູນຄ່າການຄ້າສອງຝ່າຍຂຶ້ນເປັນ 3 ຕື້ໂດລາສະຫະລັດ ໃນຊຸມປີຕໍ່ໜ້າ.
ປະທານາທິບໍດີ ອິດສະຣາແອນ ໃຫ້ຄຳໝັ້ນສັນຍາຈະຊ່ວຍເຫຼືອຫວຽດນາມ ໃນການຈັດການແກ້ໄຂ, ທຳຄວາມສະອາດບໍລິເວນທີ່ຕິດທາດພິດສີສົ້ມ. ນອກນັ້ນ, ສອງຝ່າຍສຸມໃສ່ແລກປ່ຽນບັນດາມາດຕະການ ເພື່ອເພີ່ມທະວີການຮ່ວມມື ໃນບັນດາຂົງເຂດ ປ້ອງກັນຊາດ-ປ້ອງກັນຄວາມສະຫງົບ, ວັດທະນະທຳ, ການສຶກສາ-ກໍ່ສ້າງ, ການທ່ອງທ່ຽວ… ກໍ່ຄືການຮ່ວມມືລະຫວ່າງບັນດາທ້ອງຖິ່ນຂອງສອງປະເທດ.
ທາງດ້ານການເມືອງ, ສອງຝ່າຍເປັນເອກະພາບ ຈະເພີ່ມທະວີການພົບປະແລກປ່ຽນກັນລະຫວ່າງຂັ້ນຕ່າງໆ, ສົ່ງເສີມການພົວພັນໂດຍກົງ ລະຫວ່າງບັນດາທ້ອງຖິ່ນ, ກະຊວງ, ຂະແໜງການ, ເພີ່ມທະວີບົດບາດຂອງບັນດາກົນໄກຮ່ວມມືສອງຝ່າຍຄື ຄະນະກຳມະການຮ່ວມມືລະຫວ່າງລັດຖະບານ, ປຶກສາຫາລືທາງດ້ານການເມືອງ…
ສອງຝ່າຍແລກປ່ຽນຄວາມຄິດຄວາມເຫັນກ່ຽວກັບບັນຫາທະເລຕາເວນອອກ, ພາກພື້ນຕາເວັນອອກກາງ ກໍ່ຄືບັນຫາສາກົນ, ເນັ້ນໜັກວ່າ ການຮ່ວມມືມີບົດບາດສຳຄັນ ແລະ ເປັນທ່າອ່ຽງ ເພື່ອຮັກສາສັນຕິພາບ, ສະຖຽນລະພາບໃນໂລກ.
ເນື່ອງໃນໂອກາດນີ້, ທ່ານປະທານາທິບໍດີ ອິດສະຣາແອນ Reuven Ruvi Rivlin ແລະ ພັນລະຍາ ໄດ້ວາງພວງມາລາທີ່ອະນຸສາວະລີວິລະຊົນທີ່ໄດ້ເສຍສະຫຼະຊີວິດເພື່ອຊາດ, ໄຫວ້ອາໄລທີ່ອະນຸສາວະລີຫໍສົບປະທານໂຮ່ຈີມິນ; ເຂົ້າຮ່ວມເວທີປາໄສວິສາຫະກິດຫວຽດນາມ-ອິດສະຣາແອນ, ເປັນສັກຂີພະຍານພິທີເຊັນບົດບັນທຶກຊ່ວຍຈຳກ່ຽວກັບການຮ່ວມມື ໃນການຄົ້ນຄວ້າ ແລະ ພັດທະນະ ລະຫວ່າງອົງການປ່ຽນແປງໃໝ່ອິດສະຣາແອນ ແລະ ກອງທຶນປ່ຽນແປງໃໝ່ເຕັກໂນໂລຊີແຫ່ງຊາດຫວຽດນາມ, ເວທີປາໄສເຕັກໂນໂລຊີການປ້ອງກັນຊາດຫວຽດນາມ-ອິດສະຣາແອນ, ລາຍການດົນຕີປະສານສຽງມິດຕະພາບ “ອິດສະຣາແອນ-ຫວຽດນາມ”; ຢາມອ່າວ ຮ້າລອງ (ແຂວງກວາງນິງ), ໂຄງການລົງທຶນກະສິກຳເຕັກໂນໂລຊີສູງ VinEco ຕາມດ໋າວ (ແຂວງຫວິງຝຸກ).
ຢູ່ທີນະຄອນໂຮ່ຈີມິນ, ທ່ານປະທານາທິບໍດີ ອິດສະຣາແອນ Reuven Ruvi Rivlin ໄດ້ໄປຢາມໂຮງຮຽນ ຫງວຽນວັນໂຈ໊ຍ (ເມືອງທີ 4), ຄຼີນິກ Family Medical Practice ຢູ່ເລກທີ່ 34 ຖະໜົນ ເລຢ໋ວນ (ເມືອງທີ 1) ແລະ ໂຄງການສັງຄົມຊ່ວຍເຫຼືອຜູ້ພິການຢູ່ຕາແສງ ຖາວດ່ຽນ (ເມືອງທີ 2)./.