ຊູແອັດໃຫ້ຄວາມສະໜັບສະໜູນຫວຽດນາມ ໃນການສະໝັກຮັບເລືອກຕັ້ງເຂົ້າໃນ ຄະນະມົນຕີຄວາມໝັ້ນຄົງແຫ່ງສະຫະປະຊາຊາດ
ວກ. ອອນໄລ - ໂດຍຕອບສະໜອງຕາມການເຊື້ອເຊີນຂອງທ່ານ ອູບານ ອາລິນ ປະທານສະພາແຫ່ງຊາດ ແຫ່ງລາຊະອານາຈັກຊູແອັດ, ທ່ານນາງ ຫງວຽນທິກີມເງິນ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງ ສະພາແຫ່ງຊາດແຫ່ງ ສສ ຫວຽດນາມ ໄດ້ເດີນທາງເຖິງນະຄອນຫຼວງ ສະຕົກໂຄມ, ເລີ່ມຕົ້ນການຢ້ຽມຢາມ ລາຊະອານາຈັກຊູແອັດ ຢ່າງເປັນທາງການ ໃນລະຫວ່າງວັນທີ 6-8 ເມສາ 2017.
ທ່ານປະທານສະພາແຫ່ງຊາດຊູແອັດ ອູບານ ອາລິນ ຕ້ອນຮັບທ່ານນາງປະທານສະພາແຫ່ງຊາດຫວຽດນາມ ຫງວຽນທິກີມເງິນ. (ພາບ: TTXVN)
ໃນການພົບປະເຈລະຈາກັບທ່ານປະທານສະພາແຫ່ງຊາດຊູແອັດ ອູບານ ອາລິນ, ສອງຝ່າຍໄດ້ເປັນເອກະສັນຕີລາຄາສູງ ການພົວພັນຮ່ວມມືທີ່ເປັນມູນເຊື້ອຍາວນານລະຫວ່າງສອງປະເທດ. ໃນເວລາທີ່ຈະມາເຖິງ, ສອງຝ່າຍຄວນສືບຕໍ່ຍູ້ແຮງການພົວພັນທາງດ້ານການຄ້າ, ການລົງທຶນ ເພື່ອໃຫ້ມັນສົມຄູ່ກັບຄວາມສາມາດບົ່ມຊ້ອນຂອງສອງປະເທດ. ສອງຝ່າຍມຸ່ງຫວັງຈະພ້ອມກັນຊຸກຍູ້ການພົວພັນລະຫວ່າງລັດຖະສະພາ ໃຫ້ຂະຫຍາຍຕົວຂຶ້ນສູ່ລະດັບໃໝ່ ໂດຍຜ່ານການເພີ່ມທະວີການສົມທົບຕິດຕາມກວດກາ ແລະ ຊຸກຍູ້ການປະຕິບັດບັນດາຂໍ້ຕົກລົງຮ່ວມມື ທີ່ລັດຖະບານສອງປະເທດໄດ້ລົງນາມ, ບັນດາໂຄງການຮ່ວມມືຍຸດທະສາດ; ສະໜັບສະໜູນລັດຖະບານ, ອຳນາດການປົກຄອງທ້ອງຖິ່ນ, ວິສາຫະກິດ ແລະ ປະຊາຊົນສອງປະເທດ ໃນການເພີ່ມທະວີການແລກປ່ຽນ, ຊຸກຍູ້ການພົວພັນ ແນໃສ່ຊຸກຍູ້ຄວາມເຂົ້າໃຈຊຶ່ງກັນແລະກັນ ແລະ ການຮ່ວມມືເປັນຜົນປະໂຫຍດຮ່ວມກັນ; ຮ່ວມມືເພື່ອພັດທະນາ ແລະ ປົກປັກຮັກສາສິ່ງແວດລ້ອມ.
ສອງຝ່າຍໃຫ້ທັດສະນະວ່າ, ການລົງນາມແລະໃຫ້ສັດຕະຍາບັນ ສັນຍາການຄ້າເສລີຫວຽດນາມ - ອີຢູ ໂດຍໄວ ຈະນຳມາຊຶ່ງຜົນປະໂຫຍດລວມໃຫ້ແກ່ບັນດາຝ່າຍທີ່ເຂົ້າຮ່ວມ, ປະກອບສ່ວນເພີ່ມມູນຄ່າການຄ້າສອງຝ່າຍ, ໃນນັ້ນມີຫວຽດນາມ ແລະ ຊູແອັດ. ທ່ານປະທານສະພາແຫ່ງຊາດຊູແອັດ ຢືນຢັນຄວາມສະໜັບສະໜູນໃຫ້ສະຫະພາບເອີຣົບ ລົງນາມເປັນທາງການ ແລະ ໃຫ້ສັດຕະຍາບັນ ສັນຍາສະບັບນີ້ໂດຍໄວ.
ສອງຝ່າຍກໍ່ໄດ້ແລກປ່ຽນກ່ຽວກັບຄວາມສະເໝີພາບທາງດ້ານເພດ, ບົດບາດຂອງແມ່ຍິງໃນສັງຄົມ; ບົດຮຽນໃນວຽກງານປ້ອງກັນແລະຕ້ານການສໍ້ລາດບັງຫຼວງ. ທ່ານປະທານສະພາແຫ່ງຊາດ ອູບານ ອາລິນ ໃຫ້ຮູ້ວ່າ ຊູແອັດມີບົດຮຽນປະສົບການໃນຂົງເຂດນິຕິບັນຍັດ ແລະ ພ້ອມແລ້ວທີ່ຈະແບ່ງປັນກັບຫວຽດນາມ ໃນການຕິດຕາມກວດກາການເຄື່ອນໄຫວຂອງອົງການລັດ; ກໍ່ສ້າງຕົວເມືອງສະໝາດ, ປົກປັກຮັກສາສິ່ງແວດລ້ອມ, ຫລຸດຜ່ອນການປ່ອຍອາຍແກັດເຮືອນແກ້ວ; ຮ່ວມມືສອງຝ່າຍໃນຂົງເຂດຄົ້ນຄວ້າວິທະຍາສາດ, ສຶກສາກໍ່ສ້າງ…
ເນື່ອງໃນໂອກາດນີ້, ທ່ານນາມປະທານສະພາແຫ່ງຊາດ ຫງວຽນທິກີມເງິນ ໄດ້ສະເໜີນຳຊູແອັດ ໃຫ້ການສະໜັບສະໜູນຫວຽດນາມສະໝັກຮັບເລືອກຕັ້ງເຂົ້າໃນ ຄະນະມົນຕີຄວາມໝັ້ນຄົງແຫ່ງສະຫະປະຊາຊາດ ສະໄໝ 2020 - 2021. ທ່ານນາມປະທານສະພາແຫ່ງຊາດ ກໍ່ສະເໜີນຳຊູແອັດ ສົ່ງເສີມແລະຊຸກຍູ້ສະຫະພາບເອີຣົບ ລົງນາມແລະໃຫ້ສັດຕະຍາບັນໂດຍໄວ ໃນສັນຍາການຄ້າເສລີລະຫວ່າງຫວຽດນາມ ແລະ ອີຢູ, ຮັບຮອງລະບຽບກົດໝາຍເສດຖະກິດຕະຫຼາດສຳລັບຫວຽດນາມ, ປະກອບສ່ວນສ້າງໂອກາດໃໝ່ໃຫ້ວິສາຫະກິດຂອງສອງປະເທດ ຮ່ວມມືແລະເປີດກວ້າງການລົງທຶນ ທຸລະກິດ.
ທ່ານນາງປະທານສະພາແຫ່ງຊາດຫວຽດນາມ ຫງວຽນທິກີມເງິນ ຕີລາຄາວ່າ ຊູແອັດເປັນປະເທດທີ່ມີທ່າແຮງໃນຂົງເຂດຕຸລາການແລະກົດໝາຍ, ສະເໜີນຳສະພາແຫ່ງຊາດຊູແອັດ ສືບຕໍ່ຊ່ວຍໜູນ, ແບ່ງປັນບົດຮຽນ ກັບສະພາແຫ່ງຊາດຫວຽດນາມ ໃນການກໍ່ສ້າງກົດໝາຍ, ຕິດຕາມກວດກາການເຄື່ອນໄຫວຂອງກົງຈັກແຫ່ງລັດ.
ທ່ານນາງປະທານສະພາແຫ່ງຊາດ ຫງວຽນທິກີມເງິນ ເນັ້ນວ່າ ສະພາແຫ່ງຊາດຫວຽດນາມຕີລາຄາສູງ ທ່ານປະທານສະພາແຫ່ງຊາດ ອູບານ ອາລິນ ແລະຄະນະຜູ້ແທນຂັ້ນສູງສະພາແຫ່ງຊາດຊູແອັດ ທີ່ໄດ້ເຂົ້າຮ່ວມກອງປະຊຸມສະມັດຊາໃຫຍ່ສະຫະພັນລັດຖະສະພາສາກົນ ຄັ້ງທີ 32 (ອາຍປູ -132) ຢູ່ທີ່ ຮ່າໂນ້ຍ, ປະກອບສ່ວນເຂົ້າໃນຜົນສຳເລັດຂອງສະມັດຊາ.
ທ່ານປະທານສະພາແຫ່ງຊາດຊູແອັດ ອູບານ ອາລິນ ສະແດງຄວາມຍິນດີຕ້ອນຮັບທ່ານນາງປະທານສະພາແຫ່ງຊາດ ຫງວຽນທິກີມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ແລະ ຫວັງວ່າການຢ້ຽມຢາມຄັ້ງນີ້ຈະປະກອບສ່ວນຊຸກຍູ້ຄວາມພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອກັບຊູແອັດເວົ້າລວມ ແລະ ກັບສະພາແຫ່ງຊາດຊູແອັດ ເວົ້າສະເພາະ ໃຫ້ຂະຫຍາຍຕົງເລິກເຊິ່ງກວ່າອີກ, ເປີດໂອກາດຄວາມຮ່ວມມືໃໝ່ລະຫວ່າງສອງຝ່າຍ ກໍ່ຄືຄວາມຮ່ວມມືລະດັບພາກພື້ນ ແລະ ສາກົນ.
ທ່ານປະທານສະພາແຫ່ງຊາດ ອູບານ ອາລິນ ສະແດງຄວາມເພິ່ງພໍໃຈເມື່ອເຫັນວ່າ ຄວາມພົວພັນຮ່ວມມືທີ່ເປັນມູນເຊື້ອລະຫວ່າງສອງປະເທດໄດ້ມີບາດກ້າວຂະຫຍາຍຕົວທີ່ຕັ້ງໜ້າໃນບັນດາຂົງເຂດ, ພິເສດແມ່ນການຮ່ວມມືດ້ານເສດຖະກິດ, ການຄ້າ, ການລົງທຶນ, ຄົມມະນາຄົມ, ສາທາລະນະສຸກ; ຄວາມພົວພັນລະຫວ່າງສອງສະພາແຫ່ງຊາດໄດ້ຮັບການປັບປຸງ ແລະ ຂະຫຍາຍຕົວນັບມືນັບດີງາມ.
ໃນຂອບຂອງການຢ້ຽມຢາມ, ທ່ານນາງສະພາແຫ່ງຊາດ ຫງວຽນທິກີມເງິນ ໄດ້ເຂົ້າຢ້ຽມຄຳນັບ ເຈົ້າຍິງ ວິກຕໍເຣຍ ອະລີຊ ເດຊີເຣ ຜູ້ປະສົບຄວາມສຳເລັດໃນການຂຶ້ນຄອງບັນລັງ; ຢ້ຽມຢາມຫໍສະພາແຫ່ງຊາດ ແລະ ເຮັດວຽກກັບກຸ່ມບໍລິສັດ ອີຣິກເຊິນ; ຢ້ຽມຊົມເມືອງສະໝາດ ຮາມາບີ ໂຊສະເຕດ; ຢາມກູ່ມບໍລິສັດ ສະວີກໍ./.
