ວກ.ອອນໄລ - ໂດຍຕອບສະໜອງຕາມການເຊື້ອເຊີນຂອງທ່ານ ໂຄເວີ ລາສໂລ ປະທານສະພາແຫ່ງຊາດຮຸງກາຣີ, ທ່ານນາງ ຫວຽນທິກີມເງິນ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ໄປຢ້ຽມຢາມ ແລະ ເຮັດວຽກຢູ່ປະເທດຮຸງກາຣີ ໃນລະຫວ່າງວັນທີ 8-11 ເມສາ 2017.
ພາຍຫຼັງພິທີຕ້ອນຮັບ, ທ່ານປະທານສະພາແຫ່ງຊາດຮຸງກາຣີ ໂຄເວີ ລາສໂລ ແລະ ທ່ານນາງປະທານສະພາແຫ່ງຊາດຫວຽດນາມ ຫງວຽນທິກີມເງິນ ໄດ້ດຳເນີນການພົບປະເຈລະຈາ ຊຶ່ງໃນນັ້ນ, ສອງຝ່າຍຕີລາຄາສູງຕໍ່ຜົນສຳເລັດຂອງກອງປະຊຸມຄັ້ງທີ 7 ຂອງຄະນະກຳມະການປະສົມກ່ຽວກັບການຮ່ວມມືເສດຖະກິດ ຫວຽດນາມ-ຮຸງກາຣີ ທີ່ຈັດຂຶ້ນຢູ່ນະຄອນຫຼວງ ບູດາແປັດ ໃນວັນທີ 23 ແລະ 24 ມີນາ ທີ່ຜ່ານມາ, ສອງຝ່າຍເປັນເອກະພາບກ່ຽວກັບບັນດາແຜນການຮ່ວມມືທະວິພາຄີ, ໃນນັ້ນ ມີມາດຕະການເພີ່ມທະວີການແລກປ່ຽນເສດຖະກິດ - ການຄ້າ ໂດຍຜ່ານການຈັດຕັ້ງງານຕະຫຼາດນັດ, ການວາງສະແດງສິນຄ້າ ແລະ ເຕັກໂນໂລຊີ ຂອງແຕ່ລະປະເທດ. ແຕ່, ສອງຝ່າຍກໍ່ໄດ້ໃຫ້ທັດສະນະວ່າ ການລົງທຶນໂດຍກົງຂອງ ຮຸງກາຣີ ເຂົ້າຫວຽດນາມ ຍັງຢູ່ໃນລະດັບຕ່ຳ, ບໍ່ສົມຄູ່ກັບຄວາມສາມາດບົ່ມຊ້ອນ ແລະ ຄວາມປາດຖະໜາຂອງທັງສອງຝ່າຍ.
ຝ່າຍຫວຽດນາມສະເໜີໃຫ້ຮຸງການຣີເພີ່ມທະວີການລົງທຶນເຂົ້າໃນບັນດາຂົງເຂດທີ່ຫວຽດນາມມີຄວາມຕ້ອງການ ແລະ ຮຸງກາຣີມີທ່າແຮງ ເຊັ່ນ ການຂຸດຄົ້ນຊັບພະຍາກອນນ້ຳ, ການແກ້ໄຂສິ່ງແວດລ້ອມ, ການຢາປົວພະຍາດ, ການປຸງແຕ່ງອາຫານ, ການຜະລິດຝຸ່ນຊີວະພາບຈຸລິນຊີ, ພະລັງງານທົດແທນ... ຫວຽດນາມຊົມເຊີຍນະໂຍບາຍຂອງຮຸງກາຣີ ທີ່ແນໃສ່ຊຸກຍູ້ການຮ່ວມມືລະຫວ່າງສອງປະເທດ, ໃນນັ້ນມີການເຊັນສັນຍາຂອບກ່ຽວກັບການຮ່ວມມືດ້ານສິນເຊື່ອທີ່ມີມູນຄ່າ 440 ລ້ານເອີໂຣ.
ສອງຝ່າຍເປັນເອກະພາບໃຫ້ທັດສະນະວ່າ ການສຶກສາ-ກໍ່ສ້າງແມ່ນຂົງເຂດຮ່ວມມືທີ່ເປັນມູນເຊື້ອລະຫວ່າງຫວຽດນາມ ແລະ ຮຸງກາຣີ. ຫວຽດນາມຕີລາຄາສູງກ່ຽວກັບການທີ່ຮຸງກາຣີ ໃຫ້ບຸລິມະສິດພິເສດແກ່ຫວຽດນາມ ໂດຍຜ່ານການເພີ່ມຈຳນວນທຶນການສຶກສາຂຶ້ນເປັນ 100 ທຶນຕໍ່ປີ ໃຫ້ນັກຮຽນນັກສຶກສາຫວຽດນາມໄປຮຽນຢູ່ຮຸງກາຣີ ໃນບັນດາວິຊາທີ່ຫວຽດນາມມີຄວາມຕ້ອງການ ແລະ ຮຸງກາຣີມີທ່າແຮງ ເຊັ່ນພະລັງງານທົດແທນ, ອຸດສະຫາກຳສະໜັບສະໜູນ, ການປົກປັກຮັກສາສິ່ງແວດລ້ອມ, ການແກ້ໄຂແຫຼ່ງນ້ຳ, ເຕັກໂນໂລຊີຂໍ້ມູນຂ່າວສານ, ກະສິກຳ, ສາທາລະນະສຸກ...
ທ່ານນາງປະທານສະພາແຫ່ງຊາດຫວຽດນາມ ຫງວຽນທິກີມເງິນ ສະແດງຄວາມຂອບໃຈຕໍ່ຮຸງກາຣີ ທີ່ໄດ້ຊ່ວຍເຫຼືອຫວຽດນາມໃນການກໍ່ສ້າງໂຮງໝໍປົວມະເຮັງ ເກີ່ນເທີ ຊຶ່ງເປັນໂຄງການສາທາລະນະສຸກທີ່ສຳຄັນ ແທດຈິງ, ສ້າງສິ່ງປະທັບໃຈທີ່ດີງາມ ໃນຄວາມພົວພັນລະຫວ່າງສອງປະເທດ.
ກ່ຽວກັບການຮ່ວມມືລະຫວ່າງສອງສະພາແກ່ງຊາດ, ສອງຝ່າຍເຫັນວ່າ ສະພາແຫ່ງຊາດຂອງສອງປະເທດໄດ້ມີການສົມທົບ ແລະ ສະໜັບສະໜູນຊຶ່ງກັນແລະກັນເປັນຢ່າງດີ ໃນບັນດາເວທີສະຫະພັນລັດຖະສະພາໃນພາກພື້ນ ແລະ ສາກົນ. ສະພາແຫ່ງຊາດຮຸງກາຣີຢາກໃຫ້ການແລກປ່ຽນຄະນະຜູ້ແທນຂອງສອງອົງການນິຕິບັນຍັດ, ພິເສດແມ່ນຄະນະຜູ້ນຳຂັ້ນສູງຂອງສະພາແຫ່ງຊາດ ໄດ້ດຳເນີນຢ່າງເປັນປະຈຳ. ເພື່ອໃຫ້ການຮ່ວມມືລະຫວ່າງສອງສະພາແຫ່ງຊາດນັບມື້ນັບຂະຫຍາຍຕົວ, ທ່ານປະທານທັງສອງໄດ້ເປັນເອກະສັນກັນວ່າ: ສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ ຂອງການນຳສະພາແຫ່ງຊາດ, ຂອງບັນດາອົງການຂອງສະພາແຫ່ງຊາດ, ກູ່ມສະມາຊິກມິດຕະພາບ ແລະ ບັນດາສະມາຊິກຂອງສະພາແຫ່ງຊາດ.
ທ່ານປະທານສະພາແຫ່ງຊາດຮຸງກາຣີເຫັນດີເປັນເອກະສັນກ່ຽວກັບການສືບຕໍ່ໃຫ້ການຊ່ວຍໜູນ, ແບ່ງປັນບົດຮຽນປະສົບການ ໃນວຽກງານກໍ່ສ້າງກົດໝາຍ, ຕິດຕາມກວດກາການເຄື່ອນໄຫວຂອງກົງຈັກແຫ່ງລັດ ແລະ ກໍ່ສ້າງພະນັກງານໃຫ້ຫວຽດນາມ. ສອງຝ່າຍເຫັນດີຈະເພີ່ມທະວີການສົມທົບໃນການຕິດຕາມກວດກາ ແລະ ຊຸກຍູ້ປະຕິບັດບັນດາຂໍ້ຕົກລົງຮ່ວມມື ຊຶ່ງລັດຖະບານຂອງສອງປະເທດໄດ້ລົງນາມ, ບັນດາໂຄງການຮ່ວມມືຍຸດທະສາດ; ສະໜັບສະໜູນລັດຖະບານ, ທ້ອງຖິ່ນ, ວິສາຫະກິດ ແລະ ປະຊາຊົນສອງປະເທດ ເພີມທະວີການແລກປ່ຽນ, ຊຸກຍູ້ການພົວພັນ ແນໃສ່ເພີ່ມທະວີຄວາມເຂົ້າໃຈຊຶ່ງກັນແລະກັນ ແລະ ການຮ່ວມມືເປັນຜົນປະໂຫຍດຮ່ວມກັນ.
ໃນຂອບການຢ້ຽມຢາມ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກີມເງິນ ໄດ້ພົບປະຫາລືກັບທ່ານປະທານາທິບໍດີຣຸງກາຣີ ແອສເດີ ຈານອສ; ພົບປະຫາລືກັບທ່ານນາຍົກລັດຖະມົນຕີຮຸງກາຣີ ວິກເຕີ ອໍບົນ; ພົບປະກັບຮອງປະທານສະພາແຫ່ງຊາດຮຸງກາຣີ ແຈຄາບ ອິສແວນ; ໃຫ້ການຕ້ອນຮັບທ່ານ ໂບສະ ລາສໂລ ປະທານສະມາຄົມມິດຕະພາບຮຸງກາຣີ - ຫວຽດນາມ; ເປັນປະທານຮ່ວມໃນພິທີເປີດການສຳມະນາທາງກົດໝາຍລະຫວ່າງສະພາແຫ່ງຊາດຂອງສອງປະເທດ ພາຍໃຕ້ຫົວຂໍ້ “ປັບປຸງບູລະນະກົດໝາຍໃນຂະບວນວິວັດການເຊື່ອມໂຍງສາກົນ”; ພົບປະໂອ້ລົມກັບພະນັກງານສະຖານທູດຫວຽດນາມ ແລະ ຊຸມຊົນຊາວຫວຽດນາມຢູ່ຮຸງກາຣີ; ໄປວາງພວງມາລາທີ່ອະນຸສາວະລີວິລະຊົນຢູ່ນະຄອນຫຼວງ ບູດາແປັດ; ໄປຢາມ ແລະ ເຮັດວຽກຢູ່ນະຄອນ ຊິນເທິນດຣີ./.
ໂດຍ ບນ (ສັງລວມຈາກຂ່າວສານຫວຽດນາມ)