ສະຫາຍ ຫງວຽນຊວັນຝຸກ ນາຍົກລັດຖະມົນຕີຫວຽດນາມ ຢ້ຽມຢາມປະເທດສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມການເຊື້ອເຊີນຂອງສະຫາຍ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະຫາຍ ຫງວຽນຊວັນຝຸກ, ນາຍົກລັດຖະມົນຕີແຫ່ງ ສາທາລະນະລັດ ສັງຄົມນິຍົມຫວຽດນາມ ໄດ້ນຳພາຄະນະຜູ້ແທນຂັ້ນສູງ ຂອງລັດຖະບານແຫ່ງ ສສ ຫວຽດນາມ ດຳເນີນການຢ້ຽມຢາມປະເທດ ສປປ ລາວ ຢ່າງເປັນທາງການ ແຕ່ວັນທີ 26-27 ເມສາ 2017.
ສະຫາຍ ຫງວຽນຊວັນຝຸກ ນາຍົກລັດຖະມົນຕີຫວຽດນາມ ແລະ ສະຫາຍ ທອງລຸນ ສີສຸລິດ ນາຍົກລັດຖະມົນຕີລາວ ໃນການພົບປະກັບນັກຂ່າວ ພາຍຫຼັງການພົບປະເຈລະຈາສອງຝ່າຍ. (ພາບ: TTXVN)
ໃນເວລາຢ້ຽມຢາມ ສປປ ລາວ, ສະຫາຍ ຫງວຽນຊວັນຝຸກ, ນາຍົກລັດຖະມົນຕີຫວຽດນາມ ໄດ້ເຂົ້າຢ້ຽມຂ່ຳນັບສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ; ພ້ອມກັບສະຫາຍ ທອງລຸນ ສີສຸລິດ, ນາຍົກລັດຖະມົນຕີ ດຳເນີນການພົບປະເຈລະຈາສອງຝ່າຍ ແລະ ຮ່ວມກັນເປີດ “ປີສາມັກຄີມິດຕະພາບ ຫວຽດນາມ - ລາວ 2017”; ພົບປະຫາລືກັບສະຫາຍນາງ ປານີ ຍາທໍ່ຕູ້, ປະທານສະພາແຫ່ງຊາດ; ຢ້ຽມຢາມພົບປະກັບສະຫາຍ ພັນວັນ ວິພາວັນ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ; ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ ວິໄລວົງ ບຸດດາຄຳ, ປະທານສະມາຄົມມິດຕະພາບ ລາວ - ຫວຽດນາມ ແລະ ຢ້ຽມຢາມບັນດາສະຫາຍອະດີດການນຳຂັ້ນສູງ ພັກ-ລັດຂອງລາວ ແລະ ຄອບຄົວ; ວາງພວງມາລາທີ່ອານຸສາວະລີນັກຮົບນິລະນາມ; ຢ້ຽມຢາມຫໍພິພິຕະພັນ ປະທານ ໄກສອນ ພົມວິຫານ ແລະ ຢ້ຽມຢາມອານຸສອນສະຖານ ປະທານ ສຸພານຸວົງ; ຢ້ຽມຢາມບາງພື້ນຖານເສດຖະກິດ - ວັດທະນະທຳ ທີ່ນະຄອນຫຼວງວຽງຈັນ; ຢ້ຽມຢາມສະຖານທູດເອກອັກຄະລັດຖະທູດແຫ່ງ ສສ ຫວຽດນາມ ປະຈຳ ສປປ ລາວ ແລະ ພົບປະໂອ້ລົມກັບພະນັກງານສະຖານທູດ, ສະມາຄົມຊາວຫວຽດນາມ ທີ່ກຳລັງດຳລົງຊີວິດ, ສຶກສາຮໍ່າຮຽນ ແລະ ເຮັດວຽກ ຢູ່ ສປປ ລາວ.
ໃນທ່າມກາງບັນຍາກາດແຫ່ງໄມຕີຈິດມິດຕະພາບ, ຄວາມສາມັກຄີພິເສດ ແລະ ຄວາມໄວ້ເນື້ອເຊື່ອໃຈຊຶ່ງກັນແລະກັນ, ໂດຍສະເພາະ ໃນບັນຍາກາດທີ່ທັງສອງປະເທດພ້ອມກັນຈັດຕັ້ງການເຄື່ອນໄຫວສະເຫຼີມສະຫຼອງ ປີມິດຕະພາບຫວຽດນາມ - ລາວ, ລາວ - ຫວຽດນາມ 2017, ການນຳຂັ້ນສູງຂອງສອງປະເທດໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງ ກ່ຽວກັບທິດທາງ ມາດຕະການຕ່າງໆ ແນ່ໃສ່ປັບປຸງ, ເພີ່ມທະວີສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ - ຫວຽດນາມ.
ສອງຝ່າຍເປັນເອກະສັນໃຫ້ທັດສະນະວ່າ, ບັນດາການເຄື່ອນໄຫວໃນປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2017 ແນໃສ່ສະເຫຼີມສະຫຼອງ ວັນສ້າງຕັ້ງສາຍພົວພັນທາງການທູດ ລະຫວ່າງລາວ-ຫວຽດນາມ ຄົບຮອບ 55 ປີ (05-9-1962 - 05-9-2017) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ (18-7-1977 - 18-7-2017) ມີຄວາມໝາຍສຳຄັນພິເສດ ໃນການໂຄສະນາ ແລະ ອົບຮົມສຶກສາ ໃຫ້ພະນັກງານ ແລະ ປະຊາຊົນ, ພິເສດແມ່ນຊາວໜຸ່ມ ຂອງສອງປະເທດ ກ່ຽວກັບມູນເຊື້ອ ແລະ ສາຍພົວພັນພິເສດ ລາວ-ຫວຽດນາມ; ຢືນຢັນຈະປະສານສົມທົບນຳກັນ ຢ່າງແໜ້ນແຟ້ນ ເພື່ອຈັດຕັ້ງປະຕິບັດເປັນຢ່າງດີ ບັນດາການເຄື່ອນໄຫວສະເຫຼີມສະຫຼອງ ປີສາມັດຄີ, ມິດຕະພາບລາວ - ຫວຽດນາມ 2017.
ເພີ່ມທະວີການພົບປະ, ການໄປມາຫາສູ່, ແລກປ່ຽນບັນດາຄະນະຜູ້ແທນຂັ້ນສູງຂອງສອງປະເທດ ໃນຫຼາຍຮູບແບບ; ເອົາໃຈໃສ່ຜັນຂະຫຍາຍປະຕິບັດ ເນື້ອໃນຂອງຖະແຫຼງການຮ່ວມ ແລະ ບັນດາຂໍ້ຕົກລົງຂັ້ນສູງໃຫ້ໄດ້ເປັນຢ່າງດີ, ພິເສດແມ່ນ ຜົນກອງປະຊຸມຄັ້ງທີ 39 ຂອງຄະນະກຳມະການຮ່ວມມືທະວິພາຄີ ຂອງລັດຖະບານ, ສົນທິສັນຍາຮ່ວມມື ລະຫວ່າງສອງລັດຖະບານ ແລະ ບັນດາແຜນງານ, ແຜນການຮ່ວມມື ລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນສອງປະເທດ.
ເປັນເອກະພາບກັນຜັນຂະຫຍາຍວຽກງານໂຄສະນາ ເຜີຍແຜ່ຢ່າງກວ້າງຂວາງ ແລະ ປະຕິບັດອະນຸສັນຍາວ່າດ້ວຍເສັ້ນຊາຍແດນ, ຫຼັກໝາຍຊາຍແດນ ລະຫວ່າງສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມຫວຽດນາມ, ສັນຍາວ່າດ້ວຍຫຼັກການ ໃນການຄຸ້ມຄອງຊາຍແດນ ແລະ ດ່ານຊາຍແດນທາງບົກ ລະຫວ່າງລັດຖະບານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງສາທາລະນະລັດ ສັງຄົມນິຍົມຫວຽດນາມ ໃຫ້ມີປະສິດທິຜົນສູງ ພາຍຫຼັງທີ່ເອກະສານທັງສອງສະບັບນີ້ ໄດ້ຮັບການຮັບຮອງ ແລະ ມີຜົນບັງຄັບໃຊ້.
ສອງຝ່າຍຢືນຢັນເຖິງຄວາມໝາຍສຳຄັນ ແລະ ມີຄວາມເປັນເອກະພາບກັນພ້ອມກັນຊຸກຍູ້, ເປີດກວ້າງ ແລະ ຍົກສູງປະສິດທິຜົນ ຂອງການຮ່ວມມືໃນຂົງເຂດເສດຖະກິດ, ການລົງທຶນ, ການຄ້າ, ຄົມມະນຄົມ-ຂົນສົ່ງ ...; ປະສານສົມທົບກັນ ໃນການຈັດຕັ້ງຜັນຂະຫຍາຍ ສັນຍາການຄ້າ ລະຫວ່າງສອງລັດຖະບານ ທີ່ໄດ້ລົງນາມກັນວັນທີ 3 ມີນາ 2015 ແລະ ສັນຍາການຄ້າຊາຍແດນ ລະຫວ່າງສອງລັດຖະບານ ທີ່ໄດ້ລົງນາມກັນວັນທີ 27 ມິຖຸນາ 2015, ສູ້ຊົນເພີ່ມມູນຄ້າການຄ້າສອງສົ້ນ ລະຫວ່າງສອງປະເທດ ໃຫ້ເພີ່ມຂຶ້ນ 10% ທຽບໃສ່ປີ 2016; ເອົາໃຈໃສ່ປະຕິບັດ ບົດບັນທຶດຄວາມຊົງຈຳ ລະຫວ່າງສອງລັດຖະບານ ກ່ຽວກັບຍຸດທະສາດການຮ່ວມມືໃນຂົງເຂດຄົມມະນາຄົມ-ຂົນສົ່ງ ໄລຍະ 2016 - 2025, ວິໄສທັດຮອດປີ 2030.
ສອງຝ່າຍໃຫ້ຄວາມສຳຄັນເປັນພິເສດ ໃນການຮ່ວມມືດ້ານການສຶກສາ-ບຳລຸງສ້າງ ແລະ ພັດທະນາຊັບພະຍາກອນມະນຸດ, ສືບຕໍ່ຈັດຕັ້ງປະຕິບັດການນຳເອົາເນື້ອໃນບັນດາຜະລິຕະພັນຂອງໂຄງການປະຫວັດສາດການພົບພັນພິເສດລາວ - ຫວຽດນາມ ເຂົ້າໃນການສິດສອນຢູ່ບັນດາໂຮງຮຽນຂອງສອງປະເທດ; ຍົກສູງຄຸນນະພາບການຮ່ວມມືດ້ານການສຶກສາ-ບຳລຸງສ້າງ ແລະ ພັດທະນາຊັບພະຍາກອນມະນຸດ, ໃນນັ້ນເນັ້ນໃສ່ການກໍ່ສ້າງຊັບພະຍາກອນມະນຸດທີ່ມີຄຸນນະພາບສູງ.
ສອງຝ່າຍຢືນຢັນສືບຕໍ່ການປະສານສົມທົບກັນຢ່າງແໜ້ນແຟ້ນ ຢູ່ເວທີພາກພື້ນ ແລະ ສາກົນ, ໂດຍສະເພາະ ຢູ່ສະຫະປະຊາຊາດ, ອາຊຽນ ແລະ ບັນດາກົນໄກການຮ່ວມມື ໃນອະນຸພາກພື້ນອື່ນໆ; ສືບຕໍ່ປະກອບສ່ວນ ເຂົ້າໃນການສ້າງ ປະຊາຄົມອາຊຽນ ໃຫ້ເຂັ້ມແຂງ; ເພີ່ມທະວີຄວາມສາມັກຄີ, ຄວາມເປັນເອກະພາບກັນ ແລະ ເສີມຂະຫາຍບົດບາດການເປັນແກນກາງ ຂອງອາຊຽນ ໃນໂຄງສ້າງພາກພື້ນ ທີ່ພວມເປັນຮູບເປັນຮ່າງຂຶ້ນ.
ສອງຝ່າຍສືືບຕໍ່ເນັ້ນເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ ແລະ ຮັບປະກັນຄວາມສະຫງົບປອດໄພ ຢູ່ທະເລຕາເວັນອອກ; ເປັນເອກະພາບກັນ ຊຸກຍູ້ການແກ້ໄຂ ບັນດາຂໍ້ຂັດແຍ່ງໃນທະເລຕາເວັນອອກ ໂດຍສັນຕິວິທີ ບົນພື້ນຖານກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດ ວ່າດ້ວຍກົດໝາຍທະເລປີ 1982 (UNCLOS 1982); ຮ່ວມກັບບັນດາຝ່າຍທີ່ກ່ຽວຂ້ອງ ປະຕິບັດຖະແຫຼງການກ່ຽວກັບການປະພຶດ ຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ກ້າວໄປສູ່ການບັນລຸ ປະມວນຂໍ້ກຳນົດກ່ຽວກັບການປະພຶດ (COC) ໂດຍໄວ.
ສອງຝ່າຍໄດ້ຮ່ວມກັນເປັນສັກຂີພິຍານການລົງນາມເອກະສານຮ່ວມມື 9 ສະບັບຄື: 1. ຂໍ້ຕົກລົງ ລະຫວ່າງກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ແຫ່ງ ສສ ຫວຽດນາມ ວ່າດ້ວຍການຮ່ວມລົງທຶນ ເພື່ອພັດທະນາ, ຄຸ້ມຄອງ ແລະ ຂຸດຄົ້ນ ທ່າເຮືອຫວຸ້ງອ່າງ (ທ່າທຽບເຮືອ 1,2 ແລະ 3); 2. ຂໍ້ຕົກລົງລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ແຫ່ງ ສສ ຫວຽດນາມ ວ່າດ້ວຍການລົງທຶນກໍ່ສ້າງເສັ້ນທາງລົດໄຟ ວຽງຈັນ - ທ່າແຂກ - ມຸຢ້າ - ເຕິນເອິບ - ຫວຸ້ງອ່າງ; 3. ຂໍ້ຕົກລົງລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ແຫ່ງ ສສ ຫວຽດນາມ ວ່າດ້ວຍການລົງທຶນກໍ່ສ້າງເສັ້ນທາງ ພູທິດເຜິ້ງ, ແຂວງຫຼວງພະບາງ ຫາ ຊາຍແດນນາຊອນ ຕິດກັບເມືອງດຽນບຽນ, ແຂວງດຽນບຽນ, ສສ ຫວຽດນາມ; 4. ຂໍ້ຕົກລົງລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ແຫ່ງ ສສ ຫວຽດນາມ ວ່າດ້ວຍການສຶກສາຄວາມເປັນໄປໄດ້ (FS) ບັນດາໂຄງການ: ໂຄງການຍົກລະດັບເສັ້ນທາງ 18B, ແຂວງອັດຕະປື, ເສັ້ນທາງມາແຕ່ບ້ານ ປຸ່ງທ່າ - ລຽບແມ່ນ້ຳທາມາ - ເພຍລີ, ແຂວງໄຊສົມບູນ, ເສັ້ນທາງແຕ່ແຂວງໄຊສົມບູນ - ເຕເບເລ - ພູກ່ອງເຂົ້າ - ຊ້ຳຫໍ້ປາດົງ, ແຂວງໄຊສົມບູນ ສປປ ລາວ; 5. ອະນຸສັນຍາ ເພື່ອປັບປຸງສັນຍາວ່າດ້ວຍສິນຄ້າຜ່ານແດນ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ໃນປີ 2009; 6. ອະນຸສັນຍາ ວ່າດ້ວຍການຮ່ວມມື ໃນການສຶກສາ-ບຳລຸງສ້າງບຸກຄະລາກອນ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ; 7. ບົດບັນທຶກຄວາມເຂົ້າໃຈ ລະຫວ່າງກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ກະຊວງອຸດສາຫະກຳ ແລະ ການຄ້າ ແຫ່ງ ສສ ຫວຽດນາມ ກ່ຽວກັບໂຄງການກໍ່ສ້າງສາງພັກນ້ຳມັນຮ່ອນລາ ແລະ ລະບົບທໍ່ສົ່ງນ້ຳມັນ ຮ່ອນລາ - ຄຳມ່ວນ; 8. ຂໍ້ຕົກລົງການຮ່ວມມື ລະຫວ່າງກະຊວງການເງິນ ແຫ່ງ ສປປ ລາວ ແລະ ກະຊວງການເງິນ ແຫ່ງ ສສ ຫວຽດນາມ; 9. ບົດບັນທຶກຄວາມເຂົ້າໃຈ ວ່າດ້ວຍການຊື້ - ຂາຍໄຟຟ້າຢູ່ໂຮງງານໄຟຟ້າພະລັງຄວາມຮ້ອນ ເຊກອງ ລະຫວ່າງກຸ່ມບໍລິສັດພະລັງງານໄຟຟ້າຫວຽດນາມ ແລະ ກຸ່ມບໍລິສັດ ພອນສັກລາວ.
ການຢ້ຽມຢາມມິດຕະພາບຢ່າງເປັນທາງການທີ່ປະເທດລາວ ຂອງສະຫາຍຫງວຽນຊວັນຝຸກ, ນາຍົກລັດຖະມົນຕີຫວຽດນາມ ໄດ້ປະກອບສ່ວນເຮັດໃຫ້ຄວາມພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດລາວ ແລະ ຫວຽດນາມ ນັບມື້ນັບຂະຫຍາຍຕົວຂຶ້ນ ແລະ ມີປະສິດທິຜົນ, ຕອບສະໜອງຄວາມປາຖະໜາຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ໃນພາກພື້ນ ແລະ ໃນໂລກ./.
ສັງລວມໂດຍ ເຟືອງຈ່າ
