ຫວຽດນາມເຂົ້າຮ່ວມກອງປະຊຸມ ເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ແລວທາງ, ເສັ້ນທາງ”
ວກ.ອອນໄລ - ໃນລະຫວ່າງວັນທີ 14-15 ພຶດສະພາ 2017, ກອງປະຊຸມເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ແລວທາງ, ເສັ້ນທາງ” ໄດ້ຖືກຈັດຂຶ້ນທີ່ນະຄອນຫຼວງປັກກິ່ງ, ສປ.ຈີນ ໂດຍມີຄະນະຜູ້ແທນເຂົ້າຮ່ວມທັງໝົດປະມານ 1.200 ຄົນ ຈາກ 100 ກວ່າປະເທດ ແລະ ບັນດາອົງການຈັດຕັ້ງສາກົນ, ພາກພື້ນ, ວິສາຫະກິດ ແລະ ວົງການນັກຮຽນຮູ້.
ປະທານປະເທດຫວຽດນາມ ເຈິ່ນດ້າຍກວາງ ເຂົ້າຮ່ວມແລະປະກອບຄວາມເຫັນ ທີ່ວາລະປະຊຸມວົງມົນທີໜຶ່ງ ຂອງເວທີປຶກສາຫາລືຂັ້ນສູງ ວ່າດ້ວຍການຮ່ວມມື “ແລວທາງ, ເສັ້ນທາງ”. (ພາບ: TTXVN)
ເຂົ້າຮ່ວມເວທີປຶກສາຫາລືລວມມີການນຳຂັ້ນສູງຂອງ 29 ປະເທດ, ໃນນັ້ນມີ ລັດເຊຍ, ຄາຊັກສະຖານ, ແຊກ, ສະວິດເຊີແລນ, ອີຕາລີ, ສະເປນ, ຕຸຣະກີ, ປາກີສະຖານ, ກຳປູເຈຍ, ມາເລເຊຍ, ອິນໂດເນເຊຍ, ຟີລະບປິນ, ລາວ, ມຽນມາ, ເກນີອາ, ຈີເລ, ອາເຈນຕີນາ...; ພ້ອມດ້ວຍເລຂາທິການສະຫະປະຊາຊາດ, ປະທານທະນາຄານໂລກ ແລະ ຜູ້ອຳນວຍການໃຫຍ່ຂອງກອງທຶນການເງິນສາກົນ. ຄະນະຜູ້ແທນຂັ້ນສູງຂອງພັກແລະລັດຫວຽດນາມ ນຳໂດຍປະທານປະເທດ ເຈິ່ນດ້າຍກວາງ ກໍ່ໄດ້ເຂົ້າຮ່ວມກອງປະຊຸມ.
ໃນພິທີໄຂກອງປະຊຸມ, ທ່ານ ສີ ຈິ້ນຜິງ ເລຂາທິການໃຫຍ່ພັກກອມມູນິດຈີນ ປະທານປະເທດແຫ່ງ ສປ.ຈີນ ໃຫ້ຮູ້ວ່າ, ຈີນຈະເພີ່ມທະວີການລົງທຶນ, ຜ່ານນັ້ນຈະສືບຕໍ່ຈ່າຍເງິນຕື່ມອີກ 100 ຕື້ຢວນ (14,5 ຕື້ໂດລາສະຫະລັດ) ໃຫ້ແກ່ຄວາມຄິດລິເລີ່ມ “ແລວທາງ, ເສັ້ນທາງ”. ຕາມຄະນະກຳມາທິການກ່ຽວກັບການປະຕິຮູບແລະພັດທະນາແຫ່ງຊາດຈີນ, ນັບແຕ່ປີ 2013, ບັນດາການລົງທຶນຂອງປະເທດຈີນ ທີ່ມີຄວາມກ່ຽວຂ້ອງເຖິງຄວາມຄິດລິເລີ່ມ “ແລວທາງ, ເສັ້ນທາງ” ໄດ້ບັນລຸ 60 ຕື້ໂດລາສະຫະລັດ ແລະ ພາກສ່ວນຫຼາຍຂອງການລົງທຶນຢູ່ຕ່າງປະເທດຂອງຈີນໃນອະນາຄົດ ຈະມີຈຸດໝາຍປາຍທາງທີ່ບັນດາປະເທດທີ່ເຂົ້າຮ່ວມໂຄງການນີ້.
ຈີນໃຫ້ຮູ້ວ່າ ເມື່ອສຳເລັດຜົນ, ຄວາມຄິດລິເລີ່ມ “ແລວທາງ, ເສັ້ນທາງ” ຈະສ້າງເປັນເຄືອຂ່າຍເສດຖະກິດການຄ້າມີ່ໃຫຍ່ໂຕ ດ້ວຍກຳລັງຄວາມສາມາດພັດທະນາປົກຫຸ້ມພູມີພາກທີ່ກວ້າງໃຫຍ່ ກວມດ້ວຍພົນລະເມືອງ 4,4 ຕື້ຄົນ, ຍອດປະລິມານຜະລິດຕະພັນພາຍໃນ (ຈີດີພີ) 21.000 ຕື້ໂດລາສະຫະລັດ (ກວມເອົາ 30% ຂອງ ຈີດີພີ ທົ່ວໂລກ) ແລະ ອາດຈະສ້າງໃຫ້ມີມູນຄ່າການຄ້າຫຼາຍກວ່າ 2.500 ຕື້ໂດລາສະຫະລັດ ໃນເວລາໜຶ່ງທົດສະວັດ ກໍ່ຄືເຊື່ອມຕໍ່ກັບບັນດາຕະຫຼາດກຳລັງພົ້ນເດັ່ນຂຶ້ນ ທີ່ມີຄວາມສາມາດເຕີບໂຕຢ່າງແຂງແຮງ.
ໃນທີ່ເວທີປຶກສາຫາລື, ການນຳຂອງບັນດາປະເທດ ແລະ ຄູ່ຮ່ວມມືສາກົນ ໄດ້ເນັ້ນເຖິງຄວາມສຳຄັນຂອງບັນດາຮູບການຮ່ວມມືສອງຝ່າຍ, ສາມຝ່າຍ, ພາກພື້ນ ແລະ ພະຫຸພາຄີ ໃນສະພາບການທີ່ເສດຖະກິດໂລກ ພວມຜ່ານການຜັນປ່ຽນຢ່າງເລິກເຊິ່ງ ພ້ອມດ້ວຍໂອກາດແລະສິ່ງທ້າທາຍທີ່ແຊກຊ້ອນກັນ, ແລະກໍໄດ້ໃຫ້ຄວາມຊົມເຊີຍແກ່ຄວາມຄິດລິເລີ່ມ “ແລວທາງ, ເສັ້ນທາງ”. ບັນດາບົດຮຽນ ແລະ ຜົນສຳເລັດທີ່ພົວພັນເຖິງການຜັນຂະຫຍາຍປະຕິບັດໃນພາກຕົວຈິງ ຂອງຄວາມຄິດລິເລີ່ມນັ້ນ ໄດ້ຖືກແນະນຳໃນເວທີປຶກສາຫາລື. ບັນດາປະເທດແລະຄູ່ຮ່ວມມືສາກົນທີ່ເຂົ້າຮ່ວມ ໄດ້ແລກປ່ຽນກ່ຽວກັບເປົ້າໝາຍ, ຫຼັກການ ແລະ ມາດຕະການຮ່ວມມືໃນເວລາທີຈະມາເຖິງ.
ພາຍໃຕ້ຫົວຂໍ້ “ແລວທາງ ແລະ ເສັ້ນທາງ: ການຮ່ວມມືເພື່ອຄວາມວັດທະນາຖາວອນຮ່ວມກັນ”, ບັນດາລັດຖະມົນຕີ, ວິສາຫະກິດ ແລະ ວົງການນັກຮຽນຮູ້ ໄດ້ເຂົ້າຮ່ວມກອງປະຊຸມວົງມົນ - ການເຄື່ອນໄຫວທີ່ສຳຄັນທີ່ສຸດຂອງເວທີປຶກສາຫາລື ທີ່ໄດ້ຈັດຕັ້ງຂຶ້ນໃນວັນທີ 15 ພຶດສະພາ 2017 ໂດຍມີການເຂົ້າຮ່ວມຂອງທ່ານ ສີ ຈິ້ນຜິງ ປະທານປະເທດຈີນ ແລະ ເກືອບ 30 ປະມຸກລັດ, ຫົວໜ້າລັດຖະບານ ແລະ ບັນດາຕົວແທນຈາກອົງການຈັດຕັ້ງສາກົນຕ່າງໆ, ເປັນຕົ້ນແມ່ນ ເລຂາທິການສະຫະປະຊາຊາດ, ປະທານທະນາຄານໂລກ ແລະ ຜູ້ອຳນວຍການກອງທຶນການເງິນສາກົນ.
ຢູ່ທີ່ກອງປະຊຸມວົງມົນນີ້, ບັນດາການນຳຂອງເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ແລວທາງ, ເສັ້ນທາງ” ໄດ້ຮັບຮອງຜ່ານແຈ້ງການຮ່ວມ ເພື່ອເຊີດຊູຈິດໃຈສັນຕິພາບ, ການຮ່ວມມື, ສະເໝີພາບ, ຄວາມໂປ່ງໃສ, ມີຜົນປະໂຫຍດຮ່ວມກັນ, ເຄົາລົບຊຶ່ງກັນແລະກັນ ແລະ ສະແດງເຖິງຄວາມປະສົງຢາກພ້ອມກັນມານະພະຍາຍາມໂດຍຜ່ານຄວາມຄິດລິເລີ່ມ “ແລວທາງ, ເສັ້ນທາງ” ໃນການປະສານສົມທົບກັບບັນດາຄວາມຄິດປະດິດການເຊື່ອມຕໍ່ອື່ນ ເພື່ອຊຸກຍູ້ການຮ່ວມມືສາກົນ. ບັນດາຫຼັກການຕົ້ນຕໍສຳລັບການຮ່ວມມື ກໍໄດ້ວາງອອກມາ, ໃນນັ້ນມີການປຶກສາຫາລືສະເໝີພາບ, ບົນພື້ນຖານປະຕິບັດຕາມກົດບັດສະຫະປະຊາຊາດ ແລະ ກົດໝາຍສາກົນ, ເຄົາລົບເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງບັນດາປະຊາຊາດ, ມີຜົນປະໂຫຍດຮ່ວມກັນ ແລະ ຮັບປະກັນຄວາມສົມດຸນທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ.
ແຈ້ງການກໍໄດ້ຊີ້ແຈງບັນດາມາດຕະການຮ່ວມມືໃນບັນດາຂົງເຂດຄົມມະນາຄົມ, ການຄ້າ, ວິທະຍາສາດ ເຕັກໂນໂລຊີ, ປົກປັກຮັກສາສິ່ງແວດລ້ອມ ແລະ ພົວພັນແລກປ່ຽນປະຊາຊົນ ຕາມທິດເຈາະຈິ້ມ ເພື່ອໃຫ້ບັນດາປະເທດພິຈາລະນາປະຕິບັດການຮ່ວມມື. ລະອຽດຄື ການເພີ່ມທະວີການສົນທະນາກ່ຽວກັບນະໂຍບາຍ, ການຊຸກຍູ້ການເຊື່ອມຕໍ່ໂຄງສ້າງພື້ນຖານ ລະຫວ່າງບັນດາປະເທດ, ການຊ່ວຍເຫຼືອໃຫ້ວິສາຫະກິດຂະໜາດນ້ອຍແລະກາງ ເຂົ້າຮ່ວມນັບມື້ນັບເລິກເຂົ້າໃນພວງພະນັງຄຸນຄ່າພາກພື້ນ ແລະ ໂລກ, ການອຳນວຍຄວາມສະດວກໃຫ້ແກ່ການຄ້າແລະການລົງທຶນ, ການປົກປັກຮັກສາຄວາມຫຼາກຫຼາຍທາງຊີວະພາບ ແລະ ບັນດາແຫຼ່ງຊັບພະຍາກອນທຳມະຊາດ, ການຮັບມືກັບການປ່ຽນແປງສະພາບອາກາດ, ການຮ່ວມມືທາງດ້ານການສຶກສາ ວິທະຍາສາດ ເຕັກໂນໂລຊີ ວັດທະນະທຳ ກິລາ ການທ່ອງທ່ຽວ ສາທາລະນະສຸກ ແລະ ການສື່ສານ.
ໂດຍປະຕິບັດແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ຫັນການພົວພັນເປັນຫຼາຍກ້ຳຫຼາຍຝ່າຍ ຫຼາຍຮູບແບບ, ເປັນເຈົ້າການແລະຕັ້ງໜ້າເຊື່ອມໂຍງສາກົນ, ຫວຽດນາມໄດ້ເຂົ້າຮ່ວມການເຄື່ອນໄຫວຕ່າງໆຂອງເວທີປຶກສາຫາລື ແລະເຂົ້າໃນຂະບວນວິວັດການສ້າງເອກະສານຕ່າງໆ ຢ່າງຕັ້ງໜ້າ.
ໃນເວທີປຶກສາຫາລື, ປະທານປະເທດຫວຽດນາມ ເຈິ່ນດ້າຍກວາງ ໄດ້ກ່າວຄຳປາໄສໃນສອງວະລະປະຊຸມຕອນເຊົ້າ ແລະ ຕອນແລງວັນທີ 15 ພຶກສະພາ ກ່ຽວກັບບັນດາຫົວຂໍ້ “ເພີ່ມທະວີການເຊື່ອມຕໍ່ນະໂຍບາຍເຮັດໃຫ້ການພົວພັນຮ່ວມມືເລິກເຊິ່ງຍິ່ງຂຶ້ນ” ແລະ “ຄວາມຮ່ວມມືເພື່ອການພັດທະນາໃນການເຊື່ອມໂຍງ”. ໃນນັ້ນ, ຫວຽດນາມຊົມເຊີຍບັນດາຄວາມຄິດເຊື່ອມໂຍງເສດຖະກິດ, ເຊື່ອມຕໍ່ພາກພື້ນເວົ້າລວມ, ຄວາມຄິດລິເລີ່ມ “ແລວທາງ, ເສັ້ນທາງ” ເວົ້າສະເພາະ ເພື່ອຊຸກຍູ້ການເຊື່ອມໂຍງເສດຖະກິດ ລະຫວ່າງປະເທດ, ລະຫວ່າງພາກພື້ນ, ລະຫວ່າງທະວີບ ໃນສະພາບທີ່ໂລກນັບມື້ນັບຕິດແໜ້ນກັນ ແລະ ຂຶ້ນກັບຊຶ່ງກັນແລະກັນ ພ້ອມດ້ວຍບັນດາໂອກາດແລະສິ່ງທ້າທາຍທີ່ແຊກຊ້ອນກັນ.
ໃນບົດປາໄສຂອງຕົນ, ປະທານປະເທດ ເຈິ່ນດ້າຍກວາງ ໄດ້ຊີ້ແຈງບັນດາທິດທາງເພື່ອບັນລຸເຖິງການຮ່ວມມືແບບຍືນຍົງ, ມີປະສິດທິຜົນ, ເພື່ອຜົນປະໂຫຍດຮ່ວມກັນ ຂອງບັນດາປະຊາຊາດ; ເນັ້ນເຖິງການຮ່ວມມືຄວນຕິດກັບການປະຕິບັດ ໂຄງການການພັດທະນາແບບຍືນຍົງ 2030 ຂອງສະຫະປະຊາຊາດ, ສົມທົບຢ່າງກົມກຽວກັບບັນດາກົນໄກພາກພື້ນແລະສາກົນ ທີ່ມີຢູ່ໃນປະຈຸບັນ, ຮັບປະກົນລັກສະນະໝັ້ນຄົງ, ມີປະສິດທິຜົນ, ເລີ່ມຈາກຄວາມຕ້ອງການພັດທະນາ ຂອງບັນດາປະເທດ ຂອງພາກພື້ນ, ປະຕິບັດຕາມກົດບັດສະຫະປະຊາຊາດແລະກົດໝາຍສາກົນ, ສະໝັກໃຈ, ມີຜົນປະໂຫຍດຮ່ວມກັນ.
ໃນໂອກາດນີ້, ປະທານປະເທດ ເຈິ່ນດ້າຍກວາງ ໄດ້ແບ່ງປັນບົດຮຽນແລະການປະກອບສ່ວນ ຂອງຫວຽດນາມ ໃນການຊຸກຍູ້ການເຊື່ອມໂຍງເສດຖະກິດ, ເຊື່ອມຕໍ່ພາກພື້ນ, ປະຕິບັດບັນດາເປົ້າໝາຍການພັດທະນາແບບຍືນຍົງ 2030. ບັນດາຄວາມເຫັນທີ່ປະກອບສ່ວນຂອງຫວຽດນາມ ໄດ້ຮັບການຕີລາຄາສູງຂອງກອງປະຊຸມ ແລະ ມີຫຼາຍເນື້ອໃນໄດ້ຖືກສ່ອງແສງເຂົ້າໃນແຈ້ງການຮ່ວມ.
ໃນຂອບການຢ້ຽມຢາມ ແລະ ເຂົ້າຮ່ວມເວທີປຶກສາຫາລື, ປະທານປະເທດຫວຽດນາມ ເຈິ່ນດ້າຍກວາງ ກໍ່ໄດ້ມີການພົບປະສອງຝ່າຍກັບການນຳຂັ້ນສູງ ຂອງຫຼາຍປະເທດຄື ສປປ.ລາວ, ກຳປູເຈຍ, ອິນໂດເນເຊຍ, ຟິລິບປິນ, ມາເລເຊຍ, ສີ ລັງກາ, ລັດເຊຍ, ອີຕາລີ, ຍີ່ປຸ່ນ, ມຽນມາ, ອາເຈນຕີນາ, ຈີເລ, ປາກີສະຖານ, ເບລາຣຸດ, ອູຊະເບກິສະຖານ, ສະວິດເຊີແລນ, ຮຸງກາຣີ, ແຊກເບຍ...
ໃນທີ່ການພົບປະເຫຼົ່ານັ້ນ, ປະທານປະເທດ ເຈິ່ນດ້າຍກວາງ ໄດ້ປຶກສາຫາລືກັບການນຳຂອງບັນດາປະເທດ ກ່ຽວກັບບັນດາມາດຕະການເພື່ອຍຸກຍູ້ຍິ່ງກວ່າອີກ ການພົວພັນຮ່ວມມືສອງຝ່າຍ ກໍຄືເພີ່ມທະວີການປະສານສົມທົບກັນຢູ່ທີ່ບັນດາເວທີປາໄສພະຫຸພາຄີ, ປະກອບສ່ວນໃຫ້ແກ່ສັນຕິພາບ, ສະຖຽນລະພາຍ ແລະ ຄວາມວັດທະນາຖາວອນລວມຢູ່ພາກພື້ນ ແລະ ໃນໂລກ. ການນຳຂອງບັນດາປະເທດຕີລາຄາສູງບັນດາຜົນງານແຫ່ງການພັດທະນາ ທີ່ຫວຽດນາມບັນລຸໄດ້ ໃນໄລຍະເວລາທີ່ຜ່ານມາ, ຢືນຢັນຄວາມນັບຖືຕໍ່ບົດບາດ ແລະ ຖານະຂອງຫວຽດນາມຢູ່ໃນພາກພື້ນ ແລະ ສະແດງຄວາມປະສົງຢາກຍູ້ແຮງການພົວພັນຮ່ວມມືຫຼາຍດ້ານກັບຫວຽດນາມ. ຜູ້ນຳຫຼາຍທ່ານໄດ້ສະແດງຄວາມຊົມເຊີຍ ແລະ ສະໜັບສະໜູນຫວຽດນາມ ໃນການຈັດຕັ້ງປີ ເອເປກ 2017 ໃຫ້ໄດ້ຮັບຜົນສຳເລັດ.
ອາດຈະເວົ້າໄດ້ວ່າ, ຢູ່ທີ່ເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ແລວທາງ, ເສັ້ນທາງ” ຄັ້ງນີ້, ປະທານປະເທດຫວຽດນາມ ເຈິ່ນດ້າຍກວາງ ໄດ້ສະແດງໃຫ້ເຫັນແຈ້ງເຖິງແນວທາງການຕ່າງປະເທດທີ່ເປັນເອກະລາດ ເປັນເຈົ້າຕົນເອງ, ເປັນຫຼາຍກ້ຳຫຼາຍຝ່າຍ ຫຼາຍຮູບແບບ, ເປັນເຈົ້າການແລະຕັ້ງໜ້າເຊື່ອມໂຍງສາກົນ ຂອງພັກແລະລັດຫວຽດນາມ. ບັນດາການເຄື່ອນໄຫວທີ່ອຸດົມສົມບູນ, ແທ້ຈິງຢູ່ທີ່ເວທີປຶກສາຫາລື ຂອງທ່ານປະທານປະເທດ ເຈິ່ນດ້າຍກວາງ ແລະ ຄະນະຜູ້ແທນຫວຽດນາມ ໄດ້ຢືນຢັນເຈດຕະນາດີ ແລະ ຖານະບົດບາດຂອງຫວຽດນາມ ໃນການເປີດກວ້າງການຮ່ວມມື ແລະ ເຊື່ອມໂຍງສາກົນ ເພື່ອສັນຕິພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ./.
ໂດຍ ທຸ່ຍລີງ
