ຂະຫຍາຍການພົວພັນລະຫວ່າງ ຫວຽດນາມ ແລະ ເບລາຣຸດ ຢ່າງຮອບດ້ານແລະເລິກເຊິ່ງ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ອາເລັກຊານເດີ ລູກາແຊນໂກ ປະທານາທິບໍດີແຫ່ງ ສາທາລະນະລັດ ເບລາຣຸດ, ທ່ານ ເຈິ່ນດ້າຍກວາງ ປະທານປະເທດ ສາທາລະນະລັດ ສັງຄົມນິຍົມ ຫວຽດນາມ ໄດ້ດຳເນີນການຢ້ຽມຢາມປະເທດ ສາທາລະນະລັດ ເບລາຣຸດ ຢ່າງເປັນທາງການ ແຕ່ວັນທີ 26 ຫາວັນທີ 28 ມິຖຸນາ 2017.
ໃນຂອບການຢ້ຽມຢາມ, ທ່ານປະທານປະເທດ ເຈິ່ນດ້າຍກວາງ ໄດ້ພົບປະເຈລະຈາກັບທ່ານ ອາເລັກຊານເດີ ລູກາແຊນໂກ ປະທານາທິບໍດີເບລາຣຸດ, ພົບປະຫາລືກັບທ່ານ ວະລາດີເມຍ ອານໄດຣແຈນໂກ ປະທານສະພາແຫ່ງຊາດເບລາຣຸດ, ແລະທ່ານ ອາ.ວ.ໂກບາຍອາກົບ ນາຍົກລັດຖະມົນຕີເບລາຣຸດ.
ທ່ານປະທານປະເທດ ເຈິ່ນດ້າຍກວາງ ໄດ້ວາງພວງມາລາທີ່ອະນຸສາວະລີໄຊຊະນະ, ຢ້ຽມຢາມ ພິພິດທະພັນສົງຄາມປ້ອງກັນຊາດທີ່ຍິ່ງໃຫຍ່, ໂຮງງານຜະລິດລົດໂອໂຕ ມິນສະເກີ, ພື້ນຖານປ້ອງກັນປະເທດ ເຕຕຣາແອັດ, ພົບປະກັບບັນດາສະມາຊິກສະມາຄົມມິດຕະພາບເບລາຣຸດ - ຫວຽດນາມ ແລະ ບັນດານັກຮົບເກົ່າ ເບລາຣຸດ ທີ່ເຄີຍເຮັດວຽກຢູ່ຫວຽດນາມ.
ຢູ່ທີ່ບັນດາການພົບປະເຈລະຈາ, ການພົບປະຫາລືສອງຝ່າຍນັ້ນ, ໃນບັນຍາກາດມິດຕະພາບ, ຄວາມໄວ້ວາງໃຈ ແລະ ຄວາມເຂົ້າໃຈຊຶ່ງກັນແລະກັນ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະປະເທດ. ສອງຝ່າຍໄດ້ເຊັນຖະແຫຼງການຮ່ວມ ຊຶ່ງສະແດງໃຫ້ເຫັນເຖິງທັດສະນະທີ່ຄ່າຍຄືກັນ ກ່ຽວກັບບັນດາບັນຫາສອງຝ່າຍ ແລະ ສາກົນ, ຢືນຢັນແນວທາງທີ່ສະເໝີຕົ້ນສະເໝີປາຍໃນການປັບປຸງ ແລະ ພັດທະນາຄວາມພົວພັນມິດຕະພາບທີ່ປັນມູນເຊື້ອລະຫວ່າຫວຽດນາມ ແລະ ເບລາຣຸດ. ຕາມນັ້ນ, ສອງຝ່າຍສະແດງຄວາມເພິ່ງພໍໃຈ ກ່ຽວກັບການຂະຫຍາຍຕົວຢ່າງຕໍ່ເນື່ອງ, ຂະຫຍັນຂັນເຄື່ອນ ແລະ ມີລັກສະນະສ້າງສັນ ຂອງຄວາມພົວພັນຮ່ວມມືຫວຽດນາມ - ເບລາຣຸດ.
ສອງຝ່າຍຢືນຢັນຄວາມປະສົງຢາກເພີ່ມທະວີການຮ່ວມມືເສດຖະກິດ - ການຄ້າສອງຝ່າຍ; ຮັບຮູ້ຄວາມສາມາດຮ່ວມມືທີ່ໃຫຍ່ຫຼວງ, ໃນນັ້ນເຫັນດີເປັນເອກະສັນ ຈະສົມທົບກັນຜັນຂະຫຍາຍຢ່າງມີປະສິດທິຜົນ ສັນຍາການຄ້າເສລີທີ່ໄດ້ລົງນາມລະຫວ່າງຫວຽດນາມ ແລະ ສະຫະພັນເສດຖະກິດອາຊີ-ເອີຣົບ (EAEU). ສອງຝ່າຍຊົມເຊີຍການສ້າງຕັ້ງກິດຈະກຳຮ່ວມທຸລະກິດລະຫວ່າງຫວຽດນາມແລະເບລາຣຸດ ເພື່ອປະກອບລົດບັນທຸກ “MAZ Asia” ຂອງເບລາຣຸດໃນດິນແດນຫວຽດນາມ, ກຽມຄວາມພ້ອມອຳນວຍຄວາມສະດວກໃຫ້ແກ່ການເຄື່ອນໄຫວຂອງກິດຈະກຳຮ່ວມທຸລະກິດນີ້. ຄຽງຂ້າງນັ້ນ, ຊຸກຍູ້ຜັນຂະຫຍາຍບັນດາໂຄງການຮ່ວມມື, ສ້າງເງື່ອນໄຂໃຫ້ແກ່ການຫັນເປັນພາຍໃນ ການຜະລິດຜະລິດຕະພັນເຕັກນິກທີ່ສັບສົນຂອງເບລາຣຸດຢູ່ຫວຽດນາມ ເຊິ່ງໜຶ່ງໃນບັນດາເປົ້າໝາຍແມ່ນ ສົ່ງນອກຕໍ່ໄປຍັງບັນດາປະເທດສະມາຊິກອາຊຽນ, ກໍ່ຄືຮັບປະກັນສ້າງວຽກເຮັດງານທຳໃໝ່ຕື່ມອີກ ແລະ ຍົກສູງລະດັບວິຊ່າງຂອງກຳມະກອນຫວຽດນາມ, ຕອບສະໜອງຜົນປະໂຫຍດຂອງທັງສອງຝ່າຍ.
ສອງຝ່າຍກໍ່ເພີ່ມທະວີການຮ່ວມມືໃນບັນດາຂົງເຂດກະສິກຳ, ປິໂຕເຄມີ, ອຸດສາຫະກຳເບົາ, ເຕັກໂນໂລຊີສື່ຂ່າວ, ທະນາຄານ, ເອເລັກໂຕຣນິກ, ຂຸກຄົ້ນບໍ່ແຮ່, ປຸງແຕ່ງສິນໃນນ້ຳ, ຜະລິດຕະພັນອຸດສາຫະກຳ-ກະສິກຳ ແລະ ບັນດາຂົງເຂດເສດຖະກິດອື່ນ.
ໂດຍສັງເກດເຫັນບັນດາໂອການອັນໃຫຍ່ຫຼວງ ແລະ ຄວາມປະສົງຢາກເຂົ້າຮ່ວມຢ່າງຕັ້ງໜ້າກວ່າອີກ ເຂົ້າໃນບັນດາໂຄງການແຫ່ງຊາດ, ໃນເວລາຕໍ່ໄປ ສອງຝ່າຍຈະເອົາໃຈໃສ່ພັດທະນາບັນດາກິດຈະກຳໂຄງສ້າງພື້ນຖານ, ພະລັງງານ ແລະ ບັນດາໂຄງການອື່ນທີ່ພວມໄດ້ຜັນຂະຫຍາຍປະຕິບັດຢູ່ຫວຽດນາມ ແລະ ເບລາຣຸດ, ໃນນັ້ນມີບັນດາໂຄງການອອກແບບ ແລະ ກໍ່ສ້າງລົດໄຟໃຕ້ດິນ, ອຸມົງ, ຫໍສະໝຸດແຫ່ງຊາດ, ຂຸດຄົ້ນບໍ່ແຮ່ຢູ່ຫວຽດນາມ; ຜັນຂະຫຍາຍບັນດາໂຄງການໃນຂົງເຂດອຸດສະຫະກຳ-ກະສິກຳ, ການສື່ສານ, ອຸດສາຫະກຳ ແລະ ທ່ອງທ່ຽວຢູ່ເບລາຣຸດ. ສອງຝ່າຍຢືນຢັນລັກສະນະຮີບດ່ວນ ແລະ ຄວາມຈຳເປັນ ຂອງການປະຕິບັດໂຄງການຮ່ວມມືລະຫວ່າງເບລາຣຸດ ແລະ ຫວຽດນາມ ໃນບັນດາຂົງເຂດວິທະຍາສາດ, ການສຶກສາ ແລະ ວັດທະນະທຳ ໃນໄລຍະ 2016 - 2018.
ດ້ວຍການຮ່ວມມືຢ່າງມີປະສິດທິຜົນ, ໄວ້ວາງໃຈກັນ ໃນຂົງເຂດການປ້ອງກັນປະເທດ-ປ້ອງກັນຄວາມສະຫງົບ, ປະກອບສ່ວນຮັບປະກັນຄວາມໝັ້ນຄົງແຫ່ງຊາດຂອງແຕ່ລະປະເທດ ກໍ່ຄືສະຖຽນລະພາບໃນພາກພື້ນ ແລະ ໃນໂລກ, ສອງຝ່າຍສືບຕໍ່ປະຕິບັດໂຄງການພັດທະນາການຮ່ວມມືທາງເຕັກນິກການທະຫານ ໄລຍະ 2016 – 2020 ໃຫ້ມີປະສິດທິຜົນ.
ຫວຽດນາມຕີລາຄາສູງ ແລະ ສະແດງຄວາມປະສົງໃຫ້ຝ່າຍເບລາຣຸດ ສືບຕໍ່ສ້າງເງື່ອນໄຂອຳນວຍຄວາມສະດວກ ໃຫ້ຊຸມຊົນຊາວຫວຽດນາມດຳລົງຊີວິດ, ຮ່ຳຮຽນ ແລະ ອອກແຮງງານຢ່າງເປັນປົກກະຕິ, ຖືກກົດໝາຍຢູ່ເບລາຣຸດ. ຫວຽດນາມຕີລາຄາສູງຕໍ່ ການຕົກລົງຂອງເບລາຣຸດ ໃນການຫັນລະບອບວີຊາເປັນຮຽບງ່າຍ ຕໍ່ພົນລະເມືອງຫວຽດນາມທີ່ມີວີຊາເຊງເກັນ ຫຼືວີຊາຂອງປະເທດສະມາຊິກອີຢູ ແຕ່ວັນທີ 12 ກຸມພາ 2017. ເບລາຣຸດສະແດງຄວາມຂອບໃຈຫວຽດນາມ ກ່ຽວກັບການຕົກລົງຍົກເວັ້ນວີຊາ ໃຫ້ພົນລະເມືອງເບລາຣຸດເຂົ້າເມືອງໃນໄລຍະສັ້ນ ນັບແຕ່ວັນທີ 1 ກໍລະກົດ 2015, ກໍ່ຄືການຈັດເບລາຣຸດ ເຂົ້າໃນບັນຊີລາຍຊື່ບັນດາປະເທດທີ່ມີພົນລະເມືອງໄດ້ຮັບການທົດລອງໃຫ້ວີຊາເອເລັກໂຕຣນິກ ແລະ ໃຫ້ທັດສະນະວ່າ ການຕົກລົງນີ້ມີຄຸນປະໂຫຍດອັນຕັ້ງໜ້າເຖິງທ່າອຽງພັດທະນາການທ່ອງທ່ຽວ, ຕິດຕໍ່ລະຫວ່າງວິສາຫະກິດ ແລະ ການພົບປະແລກປ່ຽນປະຊາຊົນ ລະຫວ່າງສອງປະເທດ.
ສອງຝ່າຍເຫັນດີເພີ່ມທະວີການຮ່ວມມືລະຫວ່າງບັນດາທ້ອງຖິ່ນຂອງຫວຽດນາມ ແລະ ເບລາຣຸດ ໂດຍຜ່ານການຮ່າງຂໍ້ຕົກລົງຮ່ວມມືໃໝ່, ແລກປ່ຽນຄະນະຜູ້ແທນ ກໍ່ຄືການເຊັນໂຄງການ (ແຜນການ) ຮ່ວມມືທີ່ລະອຽດ. ຫວຽດນາມຊົມເຊີຍການຈັດຕັ້ງ "ວັນວັດທະນະທຳເບລາຣຸດຢູ່ຫວຽດນາມ" ໃນເກືອນພຶດສະພາ 2017. ເບລາຣຸດຍິນດີຕ້ອນຮັບແຜນການຂອງຝ່າຍຫວຽດນາມທີ່ຈະຈັດຕັ້ງ "ວັນວັດທະນະທຳຫວຽດນາມຢູ່ເບລາຣຸດ" ໃນປີ 2018.
ສອງຝ່າຍຢືນຢັນທັດສະນະທີ່ຄ້າຍຄືກັນ ກ່ຽວກັບບັນດາບັນຫາພາກພື້ນ ແລະ ໂລກທີ່ສຳຄັນ; ສະແດງຄວາມກຽມພ້ອມທີ່ຈະຮ່ວມມືຢ່າງແໜ້ນແຟ້ນ ໃນຂອບບັນດາອົງການຈັດຕັ້ງສາກົນ, ກ່ອນອື່ນໝົດແມ່ນອົງການສະຫະປະຊາຊາດ ແລະ ຂະບວນການບໍ່ເຂົ້າຮ່ວມກຸ່ມ, ມີຄວາມມານະພະຍາຍາມພ້ອມກັນເພື່ອເປົ້າໝາຍຊຸກຍູ້ການກໍ່ສ້າງລະບຽບການເມືອງ ແລະ ເສດຖະກິດສາກົນທີ່ຍຸຕິທຳ ແລະ ສະເໝີພາບ. ສອງຝ່າຍເຫັນດີເປັນເອກະສັນຈະສົມທົບກັນຢ່າງແໜ້ນແຟ້ນ ແລະ ຢືນຢັນຄຳໝັ້ນສັນຍາພ້ອມກັນຊຸກຍູ້ປະຕິບັດບັນດາຂໍ້ຕົກລົງລະດັບໂລກຄື ໂຄງການພັດທະນາແບບຍືນຍົງ 2030, ຂໍ້ຕົກລົງປາຣີກ່ຽວກັບການປ່ຽນແປງສະພາບອາກາດ.
ສອງຝ່າຍຢືນຢັນຄວາມສຳຄັນ ແລະ ຄວາມຈຳເປັນຕ້ອງເຄົາລົບອະທິປະໄຕ, ຄວາມສະເໝີພາບ ແລະ ຜືນແຜ່ນດິນອັນຄົບຖ້ວນຂອງກັນແລະກັນ, ຫຼັກການບໍ່ແຊກແຊງເຂົ້າວຽກງານພາຍໃນຂອງປະເທດອື່ນ, ບໍ່ໃຊ້ກຳບັງອາວຸດຫຼືນາບຂູ່ຈະໃຊ້ກຳລັງອາວຸດ, ກໍ່ຄືຫຼັກການຮ່ວມມືສ້າງຜົນປະໂຫຍດຮ່ວມກັນ ເພື່ອສັນຕິພາບ ສະຖຽນລະພາບ ແລະ ກັາພັດທະນາ, ປະຕິບັດຕາມບັນດາບັນທັດຖານຂອງກົດໝາຍສາກົນ ແລະ ກົດບັດຂອງສະຫະປະຊາຊາດ. ສອງຝ່າຍສະໜັບສະໜູນການແກ້ໄຂຂໍ້ພິພາດທາງດ້ານດິນແດນ, ໃນນັ້ນມີການພິພາດຢູ່ທະເລຕາເວັນອອກ ດ້ວຍສັນຕິວິທີ, ບໍ່ໃຊ້ກຳລັງອາວຸດຫຼືນາບຂູ່ຈະໃຊ້ກຳລັງອາວຸດ, ດ້ວຍການເຂົ້າຮ່ວມຂອງທຸກຝ່າຍທີ່ກ່ຽວຂ້ອງ ແລະ ຊົມເຊີຍຄວາມພະຍາຍາມຕ່າງໆ ທີ່ແນໃສ່ຮຽບຮຽງ ແລະ ຮັບຮອງປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ.
ສອງຝ່າຍປະກາດການສະໜັບສະໜູນນະໂຍບາຍເຊື່ອມໂຍງສາກັນທີ່ຕັ້ງໜ້າຂອງຫວຽດນາມ ແລະ ເບລາຣຸດ. ຝ່າຍຫວຽດນາມຢືນຢັນການກຽມຄວາມພ້ອມສະໜັບສະໜູນ ຄວາມປະສົງຂອງເບລາຣຸດ ທີ່ຢາກປັບປຸງການຮ່ວມມືຫຼາຍດ້າຍກັບບັນດາປະເທດອາຊີຕາເວັນອອກສຽງໃຕ້. ເບລາຣຸດສະແດງຄວາມພ້ອມທີ່ຈະຊ່ວຍເຫຼືອຫວຽດນາມ ໃນການພັດທະນາການຮ່ວມມືທີ່ມີຜົນປະໂຫຍດຮ່ວມກັນ ກັບບັນດາປະເທດສະມາຊິກສະຫະພັນເສດຖະກິດອາຊີ-ເອີຣົບ ແລະ ປະຊາຄົມບັນດາປະເທດທີ່ມີເອກະລາດ (SNG). ເບລາຣຸດຊົມເຊີຍບົດບາດທີ່ນັບມື້ນັບເພີ່ມຂຶ້ນຂອງຫວຽດນາມຢູ່ໃນພາກພື້ນ, ພິເສດແມ່ນການເຮັດໜ້າທີ່ເປັນປະເທດເຈົ້າພາບຂອງເອເປກ 2017 ແລະ ອວຍພອນໃຫ້ຫວຽດນາມຈັດຕັ້ງປີເອເປກ 2017 ຢ່າງສຳເລັດຜົນ.
ການຢ້ຽມຢາມປະເທດເບລາຣຸດຢ່າງເປັນທາງການຂອງທ່ານປະທານປະເທດ ເຈິ່ນດ້າຍກວາງ ໄດ້ປະກອບສ່ວນສຳຄັນເຂົ້າໃນການປັບປຸງ ແລະ ເພີ່ມທະວີຄວາມພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະ ເປັນບາດກ້າວທີ່ສຳຄັນເພື່ອກ້າວໄປເຖິງການສ້າງຕັ້ງສາຍພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ ແລະ ເບລາຣຸດ./.
ສັງລວມໂດຍ ເຟືອງຈ່າ