ນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ສິ້ນສຸດການຢ້ຽມຢາມ ສະຫະພັນສາທາລະນະລັດເຢຍລະມັນ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດ ຈີ 20
ວກ.ອອນໄລ - ແຕ່ວັນທີ 5 ຫາ 8 ກໍລະກົດ 2017, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະ ພັນລະຍາ ໄດ້ເດີນທາງໄປຢ້ຽມຢາມ ສະຫະພັນສາທາລະນະລັດ ເຢຍລະມັນ ແລະ ເຂົ້າຮ່ວມກອງປະຊຸມສຸດຍອດ ຈີ 20 (G20) ທີ່ນະຄອນ ຮໍາບວກ, ສະຫະພັນສາທາລະນະລັດ ເຢຍລະມັນ ຕາມຄຳເຊື້ອເຊີນຂອງທ່ານນາງ ອັງເກລາ ແມເຄິນ ນາຍົກລັດຖະມົນຕີແຫ່ງ ສະຫະພັນສາທາລະນະລັດ ເຢຍລະມັນ.
ດ້ວຍລາຍການເຄື່ອນໄຫວ ເຮັດວຽກຢ່າງລຽນຕິດ, ຕໍ່ເນື່ອງຫຼາຍສິບຄັ້ງ, ການເຮັດວຽກຂອງທ່ານ ນາຍົກລັດຖະມົນຕີຫວຽດນາມ ຫງວຽນຊວັນຝຸກ ຢູ່ປະເທດເຢຍລະມັນ ໄດ້ບັນລຸຜົນສຳເລັດອັນຈົບງານ ເຊິ່ງໄດ້ຊຸກຍູ້ການພົວພັນມິດຕະພາບ ການຮ່ວມມືສອງຝ່າຍ ຫວຽດນາມ-ເຢຍລະມັນ ໃຫ້ຂະຫຍາຍຕົວຢ່າງບໍ່ຢຸດຢັ້ງ, ພິເສດແມ່ນ ການຮ່ວມມືດ້ານເສດຖະກິດ, ການຄ້າ, ການລົງທຶນໃນເວລາຕໍ່ໜ້າ, ພ້ອມກັນນັ້ນກໍ່ສະແດງໃຫ້ເຫັນເຖິງການປະກອບສ່ວນທີ່ຕັ້ງໜ້າ, ເປັນເຈົ້າການຂອງຫວຽດນາມ ໃນຂະບວນວິວັດການເຊື່ອມໂຍງສາກົນ ໂດຍຜ່ານການເຂົ້າຮ່ວມກອງປະຊຸມສຸດຍອດ ຈີ 20.
ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ມີການພົບປະເຈລະຈາກັບທ່ານນາງ ອັງເກລາ ແມເຄິນ ນາຍົກລັດຖະມົນຕີເຢຍລະມັນ, ພົບປະແລກປ່ຽນຄຳຄິດເຫັນກັບທ່ານ ຟຣານ-ວອນເຕີ ສະເຕນມາຍເອີ ປະທານາທິບໍດີເຢຍລະມັນ; ພົບປະກັບທ່ານນາງ ມາລູ ດຣີເຢີ ປະທານສາພາສູງເຢຍລະມັນ ຄວບຕຳແໜ່ງຜູ້ປົກຄອງລັດ ເຣນແລນ-ປຟານ.
ໃນການພົບປະເຈລະຈາ, ທ່ານນາງ ອັງເກລາ ແມເຄິນ ໄດ້ສະແດງຄຳອວຍພອນອັນປະເສີດຕໍ່ທ່ານນາຍົກລັດຖະມົນຕີ ຫງວຽນຊວັນຝຸກ ທີ່ໄດ້ມາຢ້ຽມຢາມສະຫະພັນສາທາລະນະລັດເຢຍລະມັນ; ຢືນຢັນວ່າ ການທີ່ເຢຍລະມັນເຊື້ອເຊີນຫວຽດນາມ ເຂົ້າຮ່ວມກອງປະຊຸມສຸດຍອດ ຈີ 20 ຄັ້ງນີ້ ເປັນການສະແດງຄວາມນັບຖືຕໍ່ອິດທິພົນແລະຖານະບົດບາດທີ່ສຳຄັນ ຂອງຫວຽດນາມ ໃນເວທີປາໄສສາກົນ; ສະແດງຄວາມເຊື່ອໝັ້ນວ່າ ການຢ້ຽມຢາມຂອງທ່ານນາຍົກລັດຖະມົນຕີ ຫງວຽນຊວັນຝຸກ ໃນຄັ້ງນີ້ຈະຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ-ເຢຍລະມັນ ໃຫ້ຂະຫຍາຍຕົວຢ່າງແຂງແຮງໃນຫຼາຍຂົງເຂດ.
ການນຳທັງສອງທ່ານ ໄດ້ສະແດງຄວາມເພິ່ງພໍໃຈເມື່ອເຫັນວ່າ ໃນຫຼາຍປີທີ່ຜ່ານມາ, ເຢຍລະມັນຍາມໃດກໍ່ເປັນຄູ່ຮ່ວມມືທາງການຄ້າອັນດັບໜຶ່ງຂອງຫວຽດນາມ ໃນສະຫະພາບເອີຣົບ (EU); ສອງຝ່າຍເປັນເອກະພາບໃຫ້ທັດສະນະວ່າ ສອງປະເທດຍັງມີຄວາມສາມາດບົ່ມຊ້ອນໃນການຮ່ວມມືຢ່າງຫຼວງຫຼາຍ ແລະ ຕ້ອງປະສານສົມທົບກັນຊຸກຍູ້, ສ້າງໄອກາດໃຫ້ວິສາຫະກິດຂອງສອງປະເທດພົບປະກັນຫຼາຍກວ່າອີກ ຢູ່ທີ່ບັນດາເວທີປາໄສວິສາຫະກິດສອງຝ່າຍ ເນື່ອງໃນໂອກາດບັນດາການຢ້ຽມຢາມຂັ້ນສູງ ຫຼືຢູ່ທີ່ເວທີປາໄສເສດຖະກິດທົ່ວໂລກ.
ນາຍົກລັດຖະມົນຕີທັງສອງທ່ານ ໄດ້ສະແດງຄວາມເພິ່ງພໍໃຈ ກ່ຽວກັບຜົນງານອັນຕັ້ງໜ້າ ຂອງເວທີປາໄສວິສາຫະກິດຫວຽດນາມ-ເຢຍລະມັນ ທີ່ໄດ້ຈັດຂຶ້ນເນື່ອງໃນໂອກາດການຢ້ຽມຢາມ ຂອງທ່ານນາຍົກລັດຖະມົນຕີ ຫງວຽນຊວັນຝຸກ ແລະ ການລົງນາມໃນຂໍ້ຕົກລົງຮ່ວມມື 36 ສະບັບ ທີ່ມີມູນຄ່າທັງໝົດ 4 ຕື້ໂດລາສະຫະລັດ.
ທ່ານນາຍົກລັດຖະມົນຕີ ຫງວຽນຊວນຝຸກ ກໍ່ໄດ້ມີການພົບປະ, ເຮັດວຽກກັບການນຳສະຫະພັນແລະບັນດາທ້ອງຖິ່ນຂອງເຢຍລະມັນ ຄື ລັດຖະມົນຕີເສດຖະກິດແລະພະລັງງານເຢຍລະມັນ; ທ່ານ ມີຊາແອນ ມູນເລີ ເຈົ້າຄອງນະຄອນ ເບີລິນ; ເຈົ້າຄອງນະຄອນ ຮຳບວກ; ທ່ານ ໂວນເກີ ວິດຊິງ ຮອງຜູ້ປົກຄອງລັດ, ລັດຖະມົນຕີເສດຖະກິດ ລັດ ເຣນແລນ-ປຟານ; ທ່ານ ໂວນເກີ ເບີບເຟຼີ ຜູ້ປົກຄອງລັດ ຮີສແຊນ ແລະ ພົບປະກັບທ່ານ ໂນເບີດ ກາດມານ ປະທານສະພາລັດ ຮີສແຊນ.
ໃນການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ເຂົ້າຮ່ວມແລະເປັນປະທານເວທີປາໄສວິສາຫະກິດ ຫວຽດນາມ-ເຢຍລະມັນ. ນອກຈາກນັ້ນ, ທ່ານນາຍົກລັດຖະມົນຕີກໍ່ໄດ້ພົບປະສົນທະນາກັບບັນດາວິສາຫະກິດ, ນັກລົງທຶນທີ່ສຳຄັນ ຂອງເຢຍລະມັນ; ຢ້ຽມຊົມການຜະລິດໃນໂຮງງານ ຊີແມນສ໌.
ເນື່ອງໃນໂອກາດມາຢ້ຽມຢາມປະເທດເຢຍລະມັນ, ທ່ານນາຍົກລັດຖະມົນຕີ ກໍ່ໄດ້ພົບປະໂອ້ລົມກັບພະນັກງານ ລັດຖະກອນ ສະຖານທູດ ແລະ ຜູ້ແທນຊຸມຊົນຊາວຫວຽດນາມຢູ່ນະຄອງຫຼວງ ເບີລິນ; ຢ້ຽມຢາມຖາມຂ່າວພະນັກງານ, ລັດຖະກອນ ສະຖານກົງສູນໃຫຍ່ຫວຽດນາມທີ່ ແຟຣງເຟີດ.
ເຂົ້າຮ່ວມການເຄື່ອນໄຫວໃນກອງປະຊຸມສຸດຍອດ ຈີ 20, ໂດຍຖືກເຊີນຂຶ້ນກ່າວປາໄສໃນຖານະເປັນນັກປາຖະກະຖາທີ່ສຳຄັນ ໃນວາລະປະຊຸມປຶກສາສົນທະນາກ່ຽວກັບການພັດທະນາແບບຍືນຍົງ, ການປ່ຽນແປງສະພາບອາກາດແລະພະລັງງານ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໃຫ້ຂໍ້ຄວາມທີ່ເຂັ້ມແຂງກ່ຽວກັບຄວາມສຳຄັນຂອງການເພີ່ມທະວີການຮ່ວມມື ເພື່ອຮັບມືກັບການປ່ຽນແປງສະພາບອາກາດ. ທ່ານ ນາຍົກລັດຖະມົນຕີ ກໍ່ໄດ້ກ່າວຢ່າງຈະແຈ້ງວ່າ ດ້ວຍບົດບາດຂອງປະເທດເຈົ້າພາບເອເປກ 2017, ຫວຽດນາມ ຊຸກຍູ້ບັນດາຫົວຂໍ້ບຸລິມະສິດໃນວາລະກອງປະຊຸມເອເປກ 2017 ນັ້ນຄື ການພັດທະນາແບບຍືນຍົງ, ການຮັບມືກັບການປ່ຽນແປງສະພາບອາກາດ ແລະ ນຳໃຊ້ພະລັງງານຢ່າງມີປະສິດທິຜົນ; ສົມທົບກັບບັນດາປະເທດສະມາຊິກ ເອເປກ ເພື່ອຊຸກຍູ້ການແລກປ່ຽນຄວາມຄິດຄວາມເຫັນຢ່າງກວ້າງຂວາງເລິກເຊິ່ງ ແລະ ມີກົນໄກ, ຂອບການຮ່ວມມືກ່ຽວກັບການພັດທະນາແບບຍືນຍົງ, ປົກຫຸ້ມ ທັງດ້ານເສດຖະກິດ, ສັງຄົມ ແລະ ການເງິນ.
ໃນເວລາຮ່ວມກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການພົບປະສອງຝ່າຍ, ພົບປະກັບການນຳບັນດາປະເທດ ຈີ 20 (ປະທານປະເທດ ຈີນ, ປະທານາທິບໍດີສະຫະລັດອາເມຣີກາ, ນາຍົກລັດຖະມົນຕີ ອົດສະຕຣາລີ, ປະທານາທິບໍດີສາທາລະນະລັດ ເກົາຫຼີ, ປະທານາທິບໍດີ ອິນໂດເນເຊຍ, ນາຍົກລັດຖະມົນຕີ ອິນເດຍ, ນາຍົກລັດຖະມົນຕີ ສິງກະໂປ, ປະທານາທິບໍດີ ຕວັກກີ, ປະທານາທິບໍດີ ເຊເນກັນ, ປະທານຄະນະກຳມາທິການເອີຣົບ, ປະທານຄະນະມົນຕີເອີຣົບ, ຜູ້ອຳນວຍການໃຫຍ່ອົງການອະນາໄມໂລກ...), ສຸມໃສ່ແລກປ່ຽນຄວາມຄິດຄວາມເຫັນກ່ຽວກັບທິດທາງ, ມາດຕະການຊຸກຍູ້ການພົວພັນຮ່ວມມື ລະຫວ່າງຫວຽດນາມ ແລະ ບັນດາປະເທດສະມາຊິກ ຈີ 20.
ການຢ້ຽມຢາມແລະເຮັດວຽກຢູ່ ສະຫະພັນສາທາລະນະລັດເຢຍລະມັນ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດ ຈີ 20 ຂອງທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ສຳເລັດສິ້ນສຸດຢ່າງຈົບງາມ, ໄດ້ເພີ່ມພະລັງຊຸກດັນໃຫ້ການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ-ເຢຍລະມັນ, ພ້ອມນັ້ນກໍ່ສືບຕໍ່ເຜີຍແຜ່ຮູບພາບຂອງປະເທດຫວຽດນາມທີ່ປ່ຽນແປງໃໝ່, ພັດທະນາຢ່າງຂະຫຍັນຂັນເຄື່ອນ, ເປັນຄູ່ຮ່ວມມືທີ່ໄວ້ວາງໃຈໄດ້ແລະມີຄວາມຮັບຜິດຊອບ ຂອງວົງຄະນາຍາດສາກົນ./
ບັນນາທິການສັງລວມຈາກ TTXVN