ພັດທະນາຄວາມພົວພັນທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດ ລະຫວ່າງ ຫວຽດນາມ-ໄທ ໃຫ້ຂະຫຍາຍຕົວຂຶ້ນສູ່ລະດັບໃໝ່
ວກ.ອອນໄລ - ການຢ້ຽມຢາມປະເທດໄທຢ່າງເປັນທາງການ ຂອງທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ບັນລຸຜົນສຳເລັດອັນດີງາມທັງສາມດ້ານ ການທູດລະຫວ່າງປະເທດ, ການລົງທຶນ ແລະ ການພົວພັນຕ່າງປະເທດປະຊາຊົນ. ຜົນສຳເລັດຂອງການຢ້ຽມຢາມເປັນເງື່ອນໄຂອັນສະດວກດີ ເພື່ອຊຸກຍູ້ການພົວພັນຄູ່ຮ່ວມມືຍຸດທະສາດ ລະຫວ່າງຫວຽດນາມ-ໄທ ໃຫ້ຂະຫຍາຍຕົວຂຶ້ນສູ່ລະດັບໃໝ່.
ນາຍົກລັດຖະມົນຕີຫວຽດນາມແລະນາຍົກລັດຖະມົນຕີໄທ ເປັນສັກຂີພິຍານພິທີລົງນາມໃນເອກະສານທີ່ສຳຄັນຫຼາຍສະບັບ ລະຫວ່າງບັນດາກະຊວງ, ຂະແໜງການ ຂອງສອງປະເທດ. (ພາບ: TTXVN)
ໂດຍຕອບສະໜອງຕາມຄຳເຊື້ອເຊີນຂອງທ່ານ ປຣະຢຸດ ຈັນໂອຊາ ນາຍົກລັດຖະມົນຕີແຫ່ງລາຊະອານາຈັກໄທ, ທ່ານນາຍົກລັດຖະມົນຕີ ຫງວຽນຊວັນຝຸກ ແລະ ພັນລະຍາ ພ້ອມດ້ວຍຄະນະຜູ້ແທນຂັ້ນສູງແຫ່ງ ສສ.ຫວຽດນາມ ໄດ້ດຳເນີນການຢ້ຽມຢາມລາຊະອານາຈັກໄທ ຢ່າງເປັນທາງການ ແຕ່ວັນທີ 17 ຫາ 19 ກັນຍາ 2017. ການຢ້ຽມຢາມໄດ້ບັນລຸຜົນສຳເລັດອັນດີງາມທີ່ສຸດທັງສາມດ້ານ ການທູດລະຫວ່າງປະເທດ, ການລົງທຶນ ແລະ ການພົວພັນຕ່າງປະເທດປະຊາຊົນ.
ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຮ່ວມພິທີຕ້ອນຮັບ, ພົບປະເຈລະຈາ ແລະ ຮ່ວມງານລ້ຽງກັບທ່ານນາຍົກລັດຖະມົນຕີ ປຣະຢຸດ ຈັນໂອຊາ; ພົບປະກັບທ່ານ ພອນເພັດ ວິຊິດຊົນໄຊ ປະທານສະພານິຕິບັນຍັດແຫ່ງຊາດໄທ, ພົບປະກັບພົນເອກ ເປຣມ ຕິນະສູລານົນ ປະທານອົງຄະມົນຕີແລະລັດຖະບຸລຸດແຫ່ງລາຊະອານາຈັກໄທ, ໃຫ້ການຕ້ອນຮັບທ່ານ ປຣະຈວບ ປະທານສະມາຄົມມິດຕະພາບ ໄທ-ຫວຽດນາມ, ພົບປະກັບການນຳຂອງບາງກຸ່ມບໍລິສັດທີ່ສຳຄັນຂອງໄທ ແລະ ເຂົ້າຮ່ວມພິທີເປີດງານ "ສັບປະດາສິນຄ້າຫວຽດນາມ ຢູ່ປະເທດໄທ" ເພື່ອສົ່ງເສີມຜະລິດຕະພັນຫວຽດນາມໃນປະເທດໄທ. ຢູ່ທີ່ແຂວງນະຄອນພະນົມ, ທ່ານນາຍົກລັດຖະມົນຕີແລະຄະນະຜູ້ແທນຫວຽດນາມ ໄດ້ພົບປະກັບຜູ້ວ່າລາຊະການແຂວງນະຄອນພະນົມ, ຕ້ອນຮັບການນຳຂອງສະມາຄົມໃຫຍ່ຊາວຫວຽດນາມທີ່ອາໄສຢູ່ປະເທດໄທ ແລະ ການນຳຂອງສະມາຄົມນັກທຸລະກິດຄົນຫວຽດນາມຢູ່ປະເທດໄທ, ຕ້ອນຮັບທ່ານຮອງປະທານສະພາລາຊະດອນແຂວງໜອງຄາຍ; ໄປຢາມອະນຸສອນສະຖານປະທານ ໂຮ່ຈີມິນ ແລະ ປູກຕົ້ນໄມ້ເປັນທີ່ລະນຶກຢູ່ທີ່ນັ້ນ, ໄປຢາມສູນມິດຕະພາບ ນະຄອນພະນົມ-ຮ່າໂນ້ຍ, ພົບປະຊຸມຊົນຊາວຫວຽດນາມທີ່ອາໄສຢູ່ໃນແຂວງ ແລະ ເຂົ້າຮ່ວມກອງປະຊຸມກ່ຽວກັບການເຊື່ອມຕໍ່ເສດຖະກິດ ເພື່ອແນໃສ່ເພີ່ມທະວີແລະເຊື່ອມຕໍ່ເສດຖະກິດໃນພາກອີສານປະເທດໄທ.
ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການເຈລະຈາທີ່ບັນລຸຜົນດີທີ່ສຸດກັບທ່ານ ປຣະຢຸດ ຈັນໂອຊາ ນາຍົກລັດຖະມົນຕີແຫ່ງລາຊະອານາຈັກໄທ ຢູ່ທີ່ກຣຸງເທບມະຫານະຄອນ. ການນຳທັງສອງໄດ້ຢືນຢັນຄວາມມານະພະຍາຍາມຍົກມູນຄ່າການຄ້າສອງສົ້ນລະຫວ່າງສອງປະເທດ ຂຶ້ນເປັນ 20 ຕື້ໂດລາສະຫະລັດ ກ່ອນປີ 2020; ຊ່ວຍໜູນກັນເພື່ອກາຍເປັນໃຈກາງດຶງດູດການລົງທຶນການຄ້າຂອງພາກພື້ນ; ເຫັນດີເປັນເອກະພາບຈະສ້າງເງື່ອນໄຂໃຫ້ສິນຄ້າຂອງປະເທດຄູ່ຮ່ວມເຂົ້າເຖິງຕະຫຼາດຂອງຕົນ; ຊຸກຍູ້ການຮ່ວມມືທາງດ້ານເຂົ້າສານ.
ສອງຝ່າຍຢືນຢັນອີກຄັ້ງກ່ຽວກັບຄວາມສຳຄັນຂອງການຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບ ກໍ່ຄືຄວາມປອດໄພແລະເສລີພາບໃນການເດີນເຮືອຢູ່ທະເລຕາເວັນອອກ; ເນັ້ນໜັກວ່າ ບັນດາຝ່າຍທີ່ກ່ຽວຂ້ອງຕ້ອງຮັບປະກັນປະຕິບັດ ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ; ກໍ່ສ້າງ, ຮັກສາ ແລະ ຍົກສູງຄວາມເຊື່ອຖືແລະຄວາມໄວ້ວາງໃຈຊຶ່ງກັນແລະກັນ; ເຄົາລົບບັນດາຫຼັກການ ອົດທົນອົດກັ້ນແລະບໍ່ໃຊ້ກຳລັງອາວຸດ, ແກ້ໄຂຄວາມແຕກຕ່າງແລະຂໍ້ພິພາດດ້ວຍສັນຕິວິທີ ສອດຄ່ອງກັບກົດໝາຍສາກົນ, ປະກອບດ້ວຍອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982. ການນຳທັງສອງກໍ່ຢືນຢັນອີກຄັ້ງກ່ຽວກັບການສະໜັບສະໜູນໃຫ້ ອາຊຽນແລະຈີນ ບັນລຸປະມວນຂໍ້ກຳນົດກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ.
ໃນການພົບປະກັບທ່ານ ພອນເພັດ ວິຊິດຊົນໄຊ ປະທານສະພານິຕິບັນຍັດແຫ່ງຊາດໄທ ແລະການພົບປະກັບພົນເອກ ເປຣມ ຕິນະສູລານົນ ປະທານອົງຄະມົນຕີແລະລັດຖະບຸລຸດແຫ່ງລາຊະອານາຈັກໄທ. ການນຳຂັ້ນສູງຂອງສອງປະເທດໄດ້ແລກປ່ຽນຄວາມຄິດຄວາມເຫັນທີ່ເລິກເຊິ່ງ ກ່ຽວກັບບັນດາບັນຫາສອງຝ່າຍ, ບັນຫາພາກພື້ ແລະ ສາກົນທີ່ມີຄວາມສົນໃຈຮ່ວມກັນ. ສອງຝ່າຍຊົມເຊີຍຜົນສຳເລັດທີ່ບົນລຸໄດ້ ໃນຂອບເຂດແຜນປະຕິບັດການຮ່ວມມືຍຸດທະສາດໄທ-ຫວຽດນາມ (2014-2018) ແລະ ເຫັນດີເປັນເອກະພາບຈະເປີດກວ້າງບັນດາຂົງເຂດການຮ່ວມມື ແນໃສ່ຊຸກຍູ້ຄວາມພົວພັນຮ່ວມມືຍຸດທະສາດ ລະຫວ່າງສອງປະເທດ.
ໃນການພົວພັນສົ່ງເສີມການລົງທຶນຫວຽດນາມ-ໄທ, ນາຍົກລັດຖະມົນຕີສອງທ່ານໄດ້ເປັນສັກຂີພິຍານພິທີລົງນາມໃນເອກະສານທີ່ສຳຄັນຫຼາຍສະບັບ, ໃນນັ້ນມີສັນຍາລະຫວ່າງລັດຖະບານ ສສ. ຫວຽດນາມ ແລະ ລັດຖະບານລາຊະອານາຈັກໄທ ກ່ຽວກັບການຮ່ວມມືທາງດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳແຫ່ການປະດິດສ້າງ; ບັນດາບົດບັນທຶກຄວາມຈຳລະຫວ່າງກະຊວງຂອງສອງປະເທດ ໃນບັນດາຂົງເຂດເສດຖະກິດ, ການຄ້າ, ໄປຊະນີ, ໂທລະຄົມມະນາຄົມ, ເຕັກໂນໂລຊີຂໍ້ມູນຂ່າວສານ, ທະນາຄານ; ແລະບັນດາບົດບັນທຶກຄວາມຈຳອື່ນອີກລະຫວ່າງທ້ອງຖິ່ນ ແລະ ວິສາຫະກິດຂອງສອງປະເທດ.
ກ່ຽວກັບເນື້ອໃນຂອງການສົ່ງເສີມການລົງທຶນ - ຜົນສຳເລັດທີ່ພົ້ນເດັ່ນຂອງການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ເຂົ້າຮ່ວມເວທີປາໄສການຮ່ວມມືເສດຖະກິດຫວຽດນາມ-ໄທ. ພ້ອມກັນເຂົ້າຮ່ວມໃນເວທີຍັງມີພົນເອກ ປຣະຈີນ ຈັນຕອງ, ຮອງນາຍົກລັດຖະມົນຕີໄທ ແລະ ນັກທຸລະກິດຂອງສອງປະເທດ 500 ກວ່າຄົນ. ໃນເວທີທີ່ສຳຄັນນີ້ ທ່ານນາຍົກລັດຖະມົນຕີ ຫງວຽນຊວັນຝຸກ ແລະ ພົນເອກ ປຣະຈີນ ຈັນຕອງ ຮອງນາຍົກລັດຖະມົນຕີໄທ ໄດ້ເປັນສັກຂີພິຍານການລົງນາມໃນເອກະສານ, ບົດບັນທຶກຄວາມຈຳຫຼາຍສະບັບ ກ່ຽວກັບການຮ່ວມມືລະຫວ່າງບັນດາວິສາຫະກິດຫວຽດນາມ-ໄທ.
ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໃຊ້ເວລາຫຼາຍພໍຄວນ ເພື່ອເຮັດວຽກ, ພົບປະກັບການນຳຂອງບັນດາກຸ່ມບໍລິສັດ ວິສາຫະກິດແຖວໜ້າຂອງໄທ ເພື່ອແນໃສ່ສົ່ງເສີມການຄ້າ, ຮຽກຮ້ອງບໍລິສັດ ວິສາຫະກິດໄທ ລົງທຶນເຂົ້າຫວຽດນາມ. ທ່ານນາຍົກລັດຖະມົນຕີກໍ່ໄດ້ເຂົ້າຮ່ວມພິທີເປີດງານ "ສັບປະດາສິນຄ້າຫວຽດນາມ ຢູ່ປະເທດໄທ" ເພື່ອສົ່ງເສີມຜະລິດຕະພັນຂອງຫວຽດນາມໃນປະເທດໄທ. ບົນພື້ນຖານຄວາມພົວພັນຄູ່ຮ່ວມມືຍຸດທະສາດຫວຽດນາມ-ໄທ, ດ້ວຍການເຄື່ອນໄຫວດຳເນີນງານທີ່ໜາແໜ້ນ, ມີປະສິດທິຜົນຂອງທ່ານນາຍົກລັດຖະມົນຕີ, ຫວັງວ່າ ການຢ້ຽມຢາມຈະສ້າງກະແສແຫ່ງການລົງທຶນ ຂອງວິສາຫະກິດໄທ ເຂົ້າໃນຫວຽດນາມ.
ພິເສດແມ່ນ ໃນການຢ້ຽມຢາມປະເທດໄທຄັ້ງນີ້, ທ່ານນາຍົກລັດຖະມົນຕີ ຫງວຽນຊວັນຝຸກ ແລະ ພັນລະຍາ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຖະຫວາຍທູບທຽນແລະດອກໄມ້ແຫ່ງຄວາມຊົງຈຳເຖິງລຸງໂຮ່ ທີ່ອະນຸສອນສະຖານປະທານໂຮ່ຈີມິນ ຢູ່ບ້ານໄມ້ ແຂວງນະຄອນພະນົມ. ອະນຸສອນສະຖານແຫ່ງນີ້ບໍ່ພຽງແຕ່ເປັນກິດຈະກຳລະນຶກເຖິງລຸງໄຮ່ ທີ່ໄດ້ກໍ່ສ້າງຂະໜາດໃຫຍ່ ຢູ່ປະເທດໄທເທົ່ານນັ້ນ, ຫາກຍັງເປັນກິດຈະກຳວັດທະນະທຳ, ປະຫວັດສາດ ທີ່ໄດ້ກໍ່ສ້າງຂຶ້ນດ້ວຍການສົມທົບລະຫວ່າງ ຄວາມຮັກແພງປາຖະໜາອັນແຮງກ້າຂອງພີ່ນ້ອງຊາວຫວຽດນາມທີ່ອາໄສຢູ່ປະເທດໄທ ແລະ ມະໂນຄະຕິຂອງພັກ ລັດ ແລະ ປະຊາຊົນຫວຽດນາມ ຕໍ່ທ່ານປະທານ ໂຮ່ຈີມິນ ທີ່ເຄົາລົບຮັກ.
ການຢ້ຽມຢາມໄດ້ດຳເນີນໄປໃນສະພາບຄວາມພົວພັນຄູ່ຮ່ວມມືຍຸດທະສາດຫວຽດນາມ-ໄທ ສືບຕໍ່ໄດ້ຮັບການປັບປຸງ ແລະ ນັບມື້ນັບຂະຫຍາຍຕົວຢ່າງຈົບງາມ. ບົນພື້ນຖານຄວາມພົວພັນດ້ານການເມືອງ, ເສດຖະກິດ, ການຮັກສາຄວາມໝັ້ນຄົງ, ການປ້ອງກັນຊາດ ທີ່ໄວ້ວາງໃຈແລະໃກ້ຊິດຕິດແທດກັນ, ການຮ່ວມມືໃນຂົງເຂດເສດຖະກິດ, ການຄ້າ ແລະບັນດາຂົງເຂດອື່ນ ທີ່ໄດ້ຮັບການຍູ້ແຮງ. ໄທເປັນຄູ່ຮ່ວມມືດ້ານການຄ້າທີ່ໃຫຍ່ທີ່ສຸດຂອງຫວຽດນາມຢູ່ອາຊຽນ. ຜົນສຳເລັດຂອງການຢ້ຽມຢາມປະກອບສ່ວນອັນສຳຄັນເຂົ້າໃນການພັດທະນາຄວາມພົວພັນທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດລະຫວ່າງຫວຽດນາມ-ໄທ ໃຫ້ຂະຫຍາຍຕົວຂຶ້ນສູ່ລະດັບໃໝ່./.
ໂດຍ ທຸ່ຍລີງ
