ທ່ານເລຂາທິການໃຫຍ່ ຫງວຽນຝູຈ້ອງ ສຳເລັດສິ້ນສຸດການຢ້ຽມຢາມ ສາທາລະນະລັດ ອິນໂດເນເຊຍ ຢ່າງຈົບງາມ
ໃນເວລາຢ້ຽມຢາມອິນໂດເນເຊຍ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບທ່ານປະທານາທິບໍດີ ໂຈໂກ ວີໂດໂດ, ພົບປະສ່ວນຕົວແລະແລກປ່ຽນກັບທ່ານນາງ ເມກາວາຕີ ຊູກາຣ໌ໂນປູຕຣີ ປະທານພັກປະຊາທິປະໄຕຕໍ່ສູ້; ພົບປະແລກປ່ຽນຄວາມເຫັນກັບບັນດາການນຳອົງການນິຕິບັນຍັດ; ກ່າວປາໄສທີ່ສູນຄົ້ນຄວ້າຍຸດທະສາດແລະສາກົນອິນໂດເນເຊຍ; ເຂົ້າຮ່ວມແລະກ່າວຄຳເຫັນທີ່ງານລ້ຽງ ຂອງເວທີປາໄສວິສາຫະກິດອິນໂດເນເຊຍ - ຫວຽດນາມ.
ຜ່ານບັນດາການພົບປະເຈລະຈາ, ແລກປ່ຽນຄວາມເຫັນເຫຼົ່ານັ້ນ, ສອງຝ່າຍໄດ້ແລກປ່ຽນຄວາມເຫັນຢ່າງເລິກເຊິ່ງ ແລະ ບັນລຸຄວາມຮັບຮູ້ລວມທີ່ສຳຄັນ ກ່ຽວກັບທິດທາງໃຫຍ່ໃນການຊຸກຍູ້ການພົວພັນລະຫວ່າງສອງປະເທດ ແນໃສ່ປະກອບສ່ວນປັບປຸງພື້ນຖານຂອງຄວາມໄວ້ວາງໃຈທາງດ້ານການເມືອງ, ຊຸກຍູ້ການພົວພັນຮ່ວມມືການພັດທະນາທີ່ມີເນື້ອແທ້ແລະມີປະສິດທິຜົນດີກວ່າ.
ໃນການເຈລະຈາກັບທ່ານປະທານາທິບໍດີ ໂຈໂກ ວີໂດໂດ, ການນຳທັງສອງໄດ້ເຫັນດີເປັນເອກະພາບໃຫ້ທັດສະນະວ່າ ການຢ້ຽມຢາມແມ່ນເຫດການທີ່ມີຄວາມໝາຍປະຫວັດສາດ, ສ້າງຂີດໝາຍທີ່ສຳຄັນ, ເພີ່ມທະວີຄວາມໄວ້ວາງໃຈທາງດ້ານການເມືອງ, ປັບປຸງຄວາມພົວພັນມິດຕະພາບ, ຊຸກຍູ້ການຮ່ວມມືທີ່ມີເນື້ອແທ້, ສ້າງບາດກ້າວການພັດທະນາໃໝ່, ເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ ເລິກເຊິ່ງກວ່າອີກ.
ສອງຝ່າຍໃຫ້ທັດສະນະວ່າ ສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ ໂດຍແມ່ນປະທານໂຮ່ຈີມິນ ແລະ ປະທານາທິບໍດີ ຊູກາຣ໌ໂນ ປູພື້ນຖານ ແລະ ບັນດາການນຳພ້ອມກັບປະຊາຊົນສອງປະເທດ ອອກແຮງເພີ່ມພູນຄູນສ້າງນັ້ນ ມາຮອດປະຈຸບັນໄດ້ກາຍເປັນສາຍພົວພັນຄູ່ຮ່ວມມືຍຸດທະສາດ; ສອງຝ່າຍຢືນຢັນຫວຽດນາມແລະອິນໂດເນເຊຍ ຈະສືບຕໍ່ເປັນເພື່ອນມິດທີ່ໄວ້ວາງໃຈກັນ, ຜູກພັນສະໜິດແໜ້ນນຳກັບໃນອາລົມຈິດມິດຕະພາບ, ແບ່ງປັນບັນດາຄຸນຄ່າແລະຜົນປະໂຫຍດທີ່ຄ້າຍຄືກັນ.
ການນຳທັງສອງສະແດງຄວາມດີໃຈກ່ຽວກັບການຂະຫຍາຍຕົວຂອງການພົວພັນລະຫວ່າງສອງປະເທດໃນເວລາ 60 ກວ່າປີທີ່ຜ່ານມາ, ພິເສດແມ່ນ ນັບແຕ່ເມື່ອສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດແຕ່ປີ 2013; ການນຳທັງສອງໃຫ້ທັດສະນະວ່າ ການຜັນຂະຫຍາຍການຮ່ວມມືໃນຫຼາຍຂົງເຂດໄດ້ບັນລຸຜົນສຳເລັດອັນດີງາມທີ່ໜ້າພຶງພໍໃຈ, ແຕ່ກໍ່ຍັງບໍ່ທັນສົມຄູ່ກັບຄວາມສາມາດບົ່ມຊ້ອນ ແລະ ຄວາມຄອງຄອຍຂອງສອງຝ່າຍ, ເປັນຕົ້ນແມ່ນກ່ຽວກັບເສດຖະກິດ, ການຄ້າ ແລະ ການລົງທຶນ.
ການນຳທັງສອງສະແດງຄວາມເຊື່ອໝັ້ນວ່າ ມູນຄ່າການຄ້າສອງສົ້ນລະຫວ່າງສອງປະເທດຈະບັນລຸ 10 ຕື້ໂດລາສະຫະລັດໃນໄວໆນີ້ ໂດຍຜ່ານບັນດາມາດຕະການສົ່ງເສີມການຄ້າ, ສ້າງສະພາບແວດລ້ອມທີ່ສະດວກດີ ໃຫ້ວິສາຫະກິດຂອງສອງປະເທດຮ່ວມມືນຳກັນ, ລົງທຶນເຂົ້າຕະຫຼາດຂອງກັນແລະກັນ, ພິເສດແມ່ນຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງ ແລະອາດຈະເພີ່ມເຕີມໃຫ້ແກ່ກັນໄດ້ ເຊັ່ນນ້ຳມັນອາຍແກັສ, ຖ່ານຫີນ, ເຂົ້າສານ, ອາຫານ Halal, ໝາກຜິກໄທ, ຢາງພາລາ…
ການນຳທັງສອງໄດ້ແລກປ່ຽນຄວາມຄິດເຫັນແລະເຫັນດີເປັນເອກະສັນກ່ຽວກັບບັນດາທິດທາງ, ມາດຕະການ ແນໃສ່ຊຸກຍູ້ແລະເຮັດໃຫ້ການພົວພັນຄູ່ຮ່ວມມືຍຸດທະສາດ ລະຫວ່າງສອງປະເທດ ຂະຫຍາຍຕົວຢ່າງຮອບດ້ານແລະເລິກເຊິ່ງຍິ່ງຂຶ້ນ, ເພື່ອຜົນປະໂຫຍດຂອງປະຊາຊົນສອງປະເທດ, ປະກອບສ່ວນອັນຕັ້ງໜ້າເຂົ້າໃນການຮັກສາສັນຕິພາບ ສະຖຽນລະພາບ ການຮ່ວມມື ການພັດທະນາ ຢູ່ໃນພາກພື້ນແລະໃນໂລກ, ປະກອບສ່ວນປັບປຸງແລະເພີ່ມທະວີຄວາມສາມັກຄີ, ຄວາມເປັນເອກະພາບ ແລະ ຄວາມໝັ້ນຄົງເຂັ້ມແຂງ ຂອງອາຊຽນ.
ການນຳທັງສອງເຫັນດີເປັນເອກະສັນຈະສືບຕໍ່ດຳເນີນການຢ້ຽມຢາມຊຶ່ງກັນແລະກັນຢ່າງເປັນປະຈຳ, ເພີ່ມທະວີການພົບປະກັນໃນທຸກຂັ້ນ ແລະ ຕາມຊ່ອງສາຍຕ່າງໆ ແນໃສ່ເພີ່ມທະວີຄວາມເຂົ້າໃຈ ຄວາມໄວ້ວາງໃຈກັນ, ຊຸກຍູ້ການຮ່ວມມືຕົວຈິງແລະມີຜົນປະໂຫຍດຮ່ວມກັນ; ເສີມຂະຫຍາຍປະສິດທິຜົນຂອງບັນດາກົນໄກຮ່ວມມືທີ່ມີຢູ່, ໃນນັ້ນມີ ຄະນະກຳມະການຮ່ວມມືສອງຝ່າຍ ແລະ ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ, ວິທະຍາສາດແລະເຕັກນິກ; ຊຸກຍູ້ການຮ່ວມມືລະຫວ່າງທ້ອງຖິ່ນຂອງສອງປະເທດ.
ສອງຝ່າຍຕີລາຄາສູງ ແລະ ໃຫ້ທັດສະນະວ່າ ການຮ່ວມມືໃນຂົງເຂດການປ້ອງກັນຊາດ ປ້ອງກັນຄວາມສະຫງົບ ແມ່ນຈຸດທີ່ພົ້ນເດັ່ນໜຶ່ງໃນການພົບພັນລະຫວ່າງສອງປະເທດໃນເວລາທີ່ຜ່ານມາ ແລະ ເປັນເສົາຄ້ຳທີ່ສຳຄັນທີ່ສຸດແຫ່ງການຮ່ວມມືໃນປະຈຸບັນ ຊຶ່ງຕ້ອງໄດ້ຮັບການເພີ່ມທະວີ. ບົນພື້ນຖານນັ້ນ, ສອງຝ່າຍໃຫ້ຄຳໝັ້ນສັນຍາຈະສົມທົບຢ່າງແໜ້ນແຟ້ນນຳກັນ ໃນບັນຫາຕໍ່ສູ້ຕ້ານການກໍ່ການຮ້າຍ, ຕ້ານອາຊະຍາກຳເຄືອຂ່າຍແລະເຕັກໂນໂລຊີສູງ, ຕ້ານການຄ້າມະນຸດ, ການຄ້າຢາເສບຕິດ ແລະ ອາຊະຍາກຳຂ້າມຊາດ; ຕັ້ງໜ້າຍູ້ແຮງການເຈລະຈາ ແລະ ສຳເລັດສິ້ນສຸດໂດຍໄວ ການເຈລະຈາກ່ຽວກັບການແບ່ງກຳນົດເຂດເສດຖະກິດພິເສດ, ກ້າວໄປເຖິງວິທີແກ້ໄຂທີ່ມີລັກສະນະສັງລວມ, ກວມທັງການແກ້ໄຂບັນດາບັນຫາທີ່ກ່ຽວພັນເຖິງເຮືອຫາປາທະເລ ແລະ ຊາວປະມົງ ບົນຈິດໃນມະນຸດສະທຳ, ມິດຕະພາບ ແລະ ສາມັກຄີໃນອາຊຽນ, ສອດຄ່ອງກັບຄວາມພົວພັນຄູ່ຮ່ວມມືຍຸດທະສາດ, ເຄົາລົບເອກະລາດ ອະທິປະໄຕຂອງແຕ່ລະປະເທດ.
ການນຳທັງສອງຢືນຢັນຄືນໃໝ່ອີກຄັ້ງ ກ່ຽວກັບຄວາມສຳຄັນຂອງການຮັກສາສັນຕິພາບ ສະຖຽນລະພາບໃນພາກພື້ນ, ຮັບປະກັນຄວາມສະຫງົບ ຄວາມປອດໄພ ເສລີພາບໃນການເດີນເຮືອແລະການບິນຢູ່ເຂດທະເລຕາເວັນອອກ, ແກ້ໄຂຂໍ້ຂັດແຍ່ງພິພາດຕ່າງໆດ້ວຍສັນຕິວິທີ, ປະຕິບັດຕາມກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982 (UNCLOS); ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງເຖິງຖອງແລະມີປະສິດທິຜົນ ແລະ ບັນລຸເຖິງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ.
ພາຍຫຼັງການພົບປະເຈລະຈາຂັ້ນສູງ, ທ່ານເລຂາທິການໃຫຍ່ ຫງວຽນຝູຈ້ອງ ແລະ ທ່ານປະທານາທິບໍດີ ໂຈໂກ ວີໂດໂດ ໄດ້ເປັນສັກຂີພິຍານພິທີລົງນາມໃນບັນດາເອກະສານການຮ່ວມມືລະຫວ່າງສອງປະເທດ. ບັນດາເອກະສານທີ່ໄດ້ລົງນາມນັ້ນ ກວມມີ ບົດບັນທຶກຄວາມຈຳກ່ຽວກັບການຮ່ວມມືລະຫວ່າງ ກະຊວງຍຸຕິທຳຫວຽດນາມ ແລະ ກະຊວງຍຸຕິທຳ ແລະສິດທິມະນຸດອິນໂດເນເຊຍ; ບົດບັນທຳກຄວາມຈຳ ກ່ຽວກັບການຮ່ວມມືພັດທະນາການສື່ຂ່າວ ລະຫວ່າງກະຊວງກະສິກຳແລະພັດທະນາຊົນນະບົດຫວຽດນາມ ແລະ ກະຊວງພັດທະນາຕາແສງໝູ່ບ້ານ ໃນເຂດທີ່ຫຍຸ້ງຍາກແລະການອົບພະຍົດເຂົ້າປະເທດອິນໂດເນເຊຍ; ບົດບັນທຶກຄວາມຈຳກ່ຽວກັບການຮ່ວມມືໃນການນຳໃຊ້ອາຍແກັສຢູ່ເຂດຊາຍແດນ ລະຫວ່າງ ກະຊວງອຸດສາຫະກຳການຄ້າຫວຽດນາມ ແລະ ກະຊວງພະລັງງານແລະຊັບພະຍາກອນແຮ່ທາດອິນໂດເນເຊຍ.
ນອກຈາກນັ້ນ ຍັງມີບົດບັນທຶກຄວາມຈຳກ່ຽວກັບການຮ່ວມມືໃນຂົງເຂດຖ່ານຫີນລະຫວ່າງກະຊວງອຸດສາຫະກຳການຄ້າຫວຽດນາມ ແລະ ກະຊວງພະລັງງານແລະຊັບພະຍາກອນແຮ່ທາດອິນໂດເນເຊຍ; ບົດບັນທຶກຄວາມປະສົງກ່ຽວກັບການເພີ່ມທະວີການຮ່ວມມືລະຫວ່າງຕຳຫຼວດຊາຍຝັ່ງຫວຽດນາມແລະອິນໂດເນເຊຍ; ແລະ ບົດບັນທຶກຄວາມຈຳກ່ຽວກັບການຮ່ວມມືທາງດ້ານການສຶກສາ ລະຫວ່າງລັດຖະບານຫວຽດນາມ ແລະ ລັດຖະບານອິນໂດເນເຊຍ./.
ບກ. ສັງລວມຈາກຂ່າວສານຫວຽດນາມ