ມຽນມາ ແລະ ຫວຽດນາມ ຍາມໃດກໍ່ເປັນເພື່ອນມິດ ທີ່ສະໜິດສະໜົມ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ທີນຈໍ ປະທານາທິບໍດີ ສາທາລະນະລັດ ສະຫະພາບ ມຽນມາ, ທ່ານເລຂາທິການໃຫຍ່ ຫງວຽນຝູຈ້ອງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ດຳເນີນການຢ້ຽມຢາມລັດຖະກິດ ທີ່ປະເທດສາທາລະນະລັດ ສະຫະພາບມຽນມາ ໃນລະຫວ່າງວັນທີ 24-26 ສິງຫາ 2017.
ໃນເວລາຢ້ຽມຢາມປະເທດມຽນມາ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະສ່ວນຕົວແລະເຈລະຈາກັບທ່ານປະທານາທິບໍດີ ທີນຈໍ; ພົບປະສ່ວນຕົວແລະແລກປ່ຽນຄວາມຄິດເຫັນກັບທ່ານນາງ ອອງ ຊານ ຊູຈີ ທີ່ປຶກສາແຫ່ງລັດມຽນມາ; ພົບປະແລກປ່ຽນຄວາມເຫັນກັບທ່ານປະທານສອງສະພາແຫ່ງຊາດ ແລະ ບັນດາຜູ້ນຳອື່ນ ຂອງມຽນມາ; ພົບປະກັບຜູ້ນຳຂອງບັນດາພັການເມືອງຂອງມຽນມາ ແລະ ໄປຢາມນະຄອນ ຢ່າງກຸ້ງ…
ຜ່ານບັນດາການພົບປະເຈລະຈາ ການພົບປະຫາລື ແລກປ່ຽນຄວາມເຫັນ, ສອງຝ່າຍໄດ້ເປັນເອກະພາບກ່ຽວກັບທິດທາງ ແລະ ບັນດາມາດຕະການຊຸກຍູ້ການພົວພັນຮອບດ້ານລະຫວ່າງສອງປະເທດ; ສືບຕໍ່ສົມທົບຢ່າງແໜ້ນແຟ້ນ, ສະໜັບສະໜູນຊຶ່ງກັນແລະກັນ ຢູ່ບັນດາເວທີປາໄສພາກພື້ນແລະສາກົນ, ເປັນຕົ້ນແມ່ນໃນຂອບເຂດອາຊຽນ, ການຮ່ວມມືຕາເວັນອອກ-ຕາເວັນຕົກ, ການຮ່ວມມືອະນຸພາກພື້ນແມ່ນ້ຳຂອງ...
ໃນການພົບປະເຈລະຈາກັບທ່ານປະທານາທິບໍດີ ທີນຈໍ, ສອງຝ່າຍເຫັນດີເປັນເອກະສັນວ່າ ຫວຽດນາມແລະມຽນມາ ມີຫຼາຍຈຸດທີ່ຄ້າຍຄືກັນ, ໃກ້ຊິດກັນ, ມີຄວາມພົວພັນທີ່ເປັນມູນເຊື້ອແລະການຮ່ວມມືທີ່ຈົບງາມ ຊຶ່ງປະທານໂຮ່ຈີມິນ ແລະ ທ່ານນາຍພົນ ອອງຊານ ກໍ່ສ້າງຂຶ້ນ ແລະ ບັນດາຮຸ່ນການນຳພ້ອມກັບປະຊາຊົນສອງປະເທດ ໄດ້ອອກແຮງເພີ່ມພູນຄູນສ້າງ ໃຫ້ຄວາມພົວພັນນັ້ນແຕກດອກອອກຜົນ.
ບົນພື້ນຖານການພົວພັນສອງຝ່າຍລະຫວ່າງຫວຽດນາມແລະມຽນມາທີ່ນັບມື້ນັບຈົບງາມ, ກໍ່ຄືບັນດາບາດກ້າວຂະຫຍາຍຕົວໃໝ່ໃນພາກພື້ນແລະໃນໂລກ, ທ່ານເລຂາທິການໃຫຍ່ ຫງວຽນຝູຈ້ອງ ແລະ ທ່ານປະທານາທິບໍດີ ທີນຈໍ ໄດ້ເຫັນດີເປັນເອກະສັນສ້າງຕັ້ງຂອບການພົວພັນ “ຄູ່ຮ່ວມມືຮອບດ້ານ” ຫວຽດນາມ - ມຽນມາ. ສອງຝ່າຍໄດ້ແລກປ່ຽນແລະເຫັນດີເປັນເອກະພາບກ່ຽວກັບບັນດາການກຳນົດທິດ, ທິດທາງໃຫຍ່ ແນໃສ່ສ້າງຫຼັກໝາຍໃໝ່, ລະດັບສູງໃໝ່ ແລະ ກຳລັງໜູນໃໝ່ ໃຫ້ແກ່ການພົວພັນລະຫວ່າງສອງປະເທດ ໃນທຸກຂົງເຂດ ໃນເວລາຕໍ່ໜ້າ.
ການນຳທັງສອງເຫັນດີເປັນເອກະສັນເພີ່ມທະວີການພົວພັນທາງດ້ານການເມືອງໃນທຸກຂັ້ນ, ພິເສດແມ່ນໃນຂັ້ນສູງສຸດ, ສືບຕໍ່ປັບປຸງການພົວພັນລະຫວ່າງສອງປະເທດໃນທຸກຊ່ອງສາຍ ພັກ, ລັດຖະບານ, ສະພາແຫ່ງຊາດ, ກະຊວງ ແລະ ບັນດາທ້ອງຖິ່ນ; ຍູ້ແຮງການພົວພັນລະຫວ່າງປະຊາຊົນ, ໃນນັ້ນມີການເປີດກວ້າງການພົວພັນແລກປ່ຽນລະຫວ່າງຮຸ່ນການນຳໜຸ່ມ ແລະ ລະຫວ່າງຊາວໜຸ່ມ ເຍົາວະຊົນ ຂອງສອງປະເທດ.
ກ່ຽວກັບການຮ່ວມມືດ້ານການປ້ອງກັນປະເທດ-ປ້ອງກັນຄວາມສະຫງົບ, ສອງຝ່າຍເຫັນດີເປັນເອກະພາບຈະສ້າງຕັ້ງໂດຍໄວ ກົນໄກສົນທະນານະໂຍບາຍປ້ອງກັນປະເທດ ຂັ້ນຮອງລັດຖະມົນຕີກະຊວງປ້ອງກັນປະເທດ ແລະ ຮອງເສນາທິການໃຫຍ່ ແລະ ກົນໄກໜ່ວຍປະຕິບັດງານຮ່ວມ ຂັ້ນຫົວໜ້າກົມການຕ່າງປະເທດ; ເພີ່ມທະວີການຮ່ວມມືດ້ານອຸດສາຫະກຳການປ້ອງກັນປະເທດ, ວິສາຫະກິດການປ້ອງກັນປະເທດ, ຮ່ວມມືໃນການອົບຮົມກໍ່ສ້າງ, ເສນາຮັກ; ເພີ່ມທະວີການແລກປ່ຽນຂໍ້ມູນຂ່າວສານ, ແລກປ່ຽນຄວາມເຫັນຊຶ່ງກັນແລະກັນ, ສະໜັບສະໜູນກັນໃນບັນດາເວດທີປາໄສພະຫຸພາຄີ, ເປັນຕົ້ນແມ່ນໃນຂອບເຂດກອງປະຊຸມລັດຖະມົນຕີປ້ອງກັນປະເທດອາຊຽນ (ADMM) ແລະ ກອງປະຊຸມລັດຖະມົນຕີປ້ອງກັນປະເທດອາຊຽນເປີດກວ້າງ (ADMM+), ຢືນຢັນຄຳໝັ້ນສັນຍາກ່ຽວກັບການບໍ່ອະນຸຍາດໃຫ້ບຸກຄົນ ຫຼືອົງການຈັດຕັ້ງໃດ ນຳໃຊ້ແຜ່ນດິນຂອງປະເທດນີ້ເພື່ອຕ້ານຢັນທຳລາຍປະເທດນັ້ນ.
ກ່ຽວກັບການຮ່ວມມືທາງດ້ານເສດຖະກິດ, ສອງຝ່າຍໃຫ້ທັດສະນະວ່າ ຕ້ອງເສີມຂະຫຍາຍຢ່າງແຂງແຮງທ່ວງທ່າພັດທະນາໃນປະຈຸບັນ; ຕັ້ງໜ້າຊ່ວຍເຫຼືອກັນໃນການຈັດຕັ້ງການເຄື່ອນໄຫວສົ່ງເສີມການຄ້າແລະການລົງທຶນຢ່າງກວ້າງຂວາງ, ສ້າງເງື່ອນໄຂອັນສະດວກໃຫ້ແກ່ການຄ້າແລະການລົງທຶນ ແນໃສ່ເພີ່ມຄຸນຄ່າການຄ້າ, ໃຫ້ຄວາມສຳຄັນແກ່ການຮ່ວມມືໃນບັນດາຂົງເຂດທີ່ມີລັກສານະເຊື່ອມຕໍ່, ເປີດເສັ້ນທາງເຊັ່ນ ທະນາຄານ, ການເງິນ, ການເດີນອາກາດ, ໂທລະຄົມມະນາຄົນ, ບັນດາຂົງເຂດທ່າແຮງທີ່ມີປັດໄຈເພີ່ມເຕີມໃຫ້ແກ່ກັນເຊັ່ນ ແຮ່ທາດ, ກະສິກຳ, ການປ່າໄມ້, ການປະມົງ, ທ່ອງທ່ຽວ, ສິນຄ້າບໍລິໂພກ; ເພີ່ມທະວີການແລກປ່ຽນ, ແບ່ງປັນບົດຮຽນກ່ຽວກັບການຄຸ້ມຄອງເສດຖະກິດ, ປ່ຽນແປງໃໝ່ລະບຽບກົດໝາຍ ແລະ ປະຕິຮູບໂຄງປະກອບ ຢູ່ຂັ້ນອຳນາດການປົກຄອງ, ນັກຮຽນຮູ້ ແລະ ວິສາຫະກິດ.
ກ່ຽວກັບການເພີ່ມທະວີການເຊື່ອນຕໍ່ຄົມມະນາຄົມຂົນສົ່ງ ແລະ ການທ່ອງທ່ຽວ, ສອງຝ່າຍເປັນເອກະສັນເຊື່ອມຕໍ່ທັງດ້ານການເດີນອາກາດ, ຄົມມະນາຄົມທາງບົກ ແລະ ທາງທະເລ ເຊັ່ນຮ່ວມມືກໍ່ສ້າງທ່າກຳປັ່ນທະເລ, ຂົນສົ່ງທາງທະເລ, ຕໍ່ກຳປັ່ນ, ຮ່ວມມືໃນການຂົນສົ່ງທາງອາກາດ, ໃນນັ້ນ ຄົ້ນຄວ້າພິຈາລະນາຄວາມສາມາດຫຸ້ນສ່ວນສ້າງຕັ້ງບໍລິສັດການບິນສອງປະເທດ ແລະ ພັດທະນາບັນດາສາຍທາງບົກເຊື່ອມຕໍ່ລະຫວ່າງສອງປະເທດ ແລະ ໃນຂອບເຂດການຮ່ວມມື ອາຊຽນ, ອະນຸພາກພື້ນແມ່ນ້ຳຂອງເປີດກວ້າງ (GMS) ແລະ ການຮ່ວມມື ກຳປະເຈຍ-ລາວ-ມຽນມາ-ຫວຽດນາມ (CLMV), ການຂົນສົ່ງຜູ້ໂດຍສານແລະສິນຄ້າໃນບັນດາແລວທາງເສດຖະກິດ ທີ່ເຊື່ອມຕໍ່ສອງປະເທດ ເພື່ອຊຸກຍູ້ການແລກປ່ຽນການຄ້າ, ການລົງທຶນ, ການທ່ອງທ່ຽວ ລະຫວ່າງຫວຽດນາມແລະມຽນມາເວົ້າສະເພາະ ແລະ ໃນພາກພື້ນເວົ້າລວມ.
ການນຳທັງສອງເຫັນດີເປັນເອກະພາບວ່າ ສອງຝ່າຍຄວນສືບຕໍ່ສົມທົບແລກປ່ຽນຂໍ້ມູນຂ່າວສານແລະທັດສະນະ ໃນບັນດາອົງການຈັດຕັ້ງເຊັ່ນ ອະນຸພາກພື້ນແມ່ນນ້ຳຂອງເປີດກວ້າງ (GMS), ແລວທາງເສດຖະກິດຕາເວັນອອກ-ຕາເວັນຕົກ (EWEC) ແລະ ການຈັດຕັ້ງຮ່ວມມືເສດຖະກິດລະຫວ່າງແມ່ນ້ຳສາມສາຍ ອິຣາວະດີ-ເຈົ້າພະຍາ-ແມ່ນ້ຳຂອງ (ACMECS) ແນໃສ່ຍູ້ແຮງການຮ່ວມມືໃນການນຳໃຊ້ແຫຼ່ງນ້ຳໃນແນ່ນ້ຳຂອງ ຢ່າງຍືນຍົງແລະມີປະສິດທິຜົນ, ເພື່ອການພັດທະນາຈະເລີນຮຸ່ງເຮືອງລວມ ຂອງພາກພື້ນ ກໍ່ຄືຂອງແຕ່ລະປະເທດ. ທ່ານປະທານາທິບໍດີ ທີນຈໍ ຢືນຢັນຄວາມສະໜັບສະໜູນເຕັມສ່ວນໃຫ້ຫວຽດນາມ ອອກສະໝັກຮັບເລືອກຕັ້ງ ເປັນກຳມະການບໍ່ຖາວອນ ຂອງສະພາຄວາມໝັ້ນຄົງສະຫະປະຊາຊາດ ວາລະ 2020-2021.
ກ່ຽວກັບບັນຫາທະເລຕາເວັນອອກ, ການນຳທັງສອງເປັນເອກະສັນໃຫ້ທັດສະນະວ່າ ບັນດາການຂັດແຍ່ງພິພາດຢູ່ທະເລຕາເວັນອອກ ຕ້ອງໄດ້ແກ້ໄຂດ້ວຍສັນຕິສິທີ, ບົນພື້ນຖານບັນດາຫຼັກການຂອງກົດໝາຍສາກົນ, ໃນນັ້ນມີອະນຸສັນຍາສະຫະປະຊາຊາດວ່າດ້ວຍກົດໝາຍທະເລປີ 1982; ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ, ບັນລຸເຖິງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ໂດຍໄວ ເພື່ອຮັກສາສັນຕິພາບ ສະຖຽນລະພາບ ຄວາມສະຫງົບ ແລະ ການຮ່ວມມືຢູ່ໃນພາກພື້ນ.
ເນື່ອງໃນໂອກາດການຢ້ຽມຢາມ, ສອງຝ່າຍໄດ້ອອກຖະແຫຼງການຮ່ວມກ່ຽວກັບການພົວພັນຄູ່ຮ່ວມມືຮອບດ້ານຫວຽດນາມ-ມຽນມາ ແລະ ລົງນາມໃນ 4 ເອກະສານການຮ່ວມມື ປະກອບດ້ວຍ: ບົດບັນທຶກຄວາມຈຳກ່ຽວກັບການຮ່ວມມືໃນຂົງເຂດການຄ້າ ລະຫວ່າງກະຊວງອຸດສາຫະກຳການຄ້າຫວຽດນາມ ແລະ ກະຊວງອຸດສາຫະກຳການຄ້າມຽນມາ; ໂຄງການຮ່ວມມືດ້ານວັດທະນະທຳໄລຍະ 2017-2020 ລະຫວ່າງກະຊວງວັດທະນະທຳ ກິລາ ແລະ ການທ່ອງທ່ຽວຫວຽດນາມ ແລະ ກະຊວງບັນດາບັນຫາສາສະໜາແລະວັດທະນະທຳ ມຽນມາ; ສັນຍາວ່າດ້ວຍການຮ່ວມມືແລະຊ່ວຍເຫຼືອກັນໃນບັນຫາສຸລະກາກອນ ລະຫວ່າງກະຊວງການເງິນຫວຽດນາມ ແລະ ກະຊວງແຜນການ-ການເງິນມຽນມາ; ຂໍ້ຕົກລົງກ່ຽວກັບການຮ່ວມມືດ້ານການສຶກສາແລະຮັບຮອງສັນນິຍະບັດ ລະຫວ່າງສອງປະເທດຫວຽດນາມ-ມຽນມາ./.
ບກ. ສັງລວມຈາກຂ່າວສານຫວຽດນາມ