ທ່ານນາຍົກລັດຖະມົນຕີແຫ່ງ ສາທາລະນະລັດ ຕວກກີ ຢ້ຽມຢາມປະເທດ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ຫງວຽນຊວັນຝຸກ ນາຍົກລັດຖະມົນຕີແຫ່ງ ສສ.ຫວຽດນາມ, ທ່ານ ບີນາລີ ຢຶນດືຣຶມ ນາຍົກລັດຖະມົນຕີແຫ່ງ ສ.ຕວກກີ ໄດ້ດຳເນີນການຢ້ຽມຢາມຫວຽດນາມ ຢ່າງເປັນທາງການ ໃນລະຫວ່າງວັນທີ 22-24 ສິງຫາ 2017.
ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີຕວກກີ ບີນາລີ ຢຶນດືຣຶມ ໄດ້ພົບປະເຈລະຈາກັບທ່ານນາຍົກລັດຖະມົນຕີ ຫງວຽນຊວັນຝຸກ; ເຂົ້າຢ້ຽມຄຳນັບທ່ານນາງ ຫງວຽນທີ້ກິມເງິນ ປະທານສະພາແຫ່ງຊາດ; ເຂົ້າຮ່ວມເວທີປາໄສວິສາຫະກິດຫວຽດນາມ-ຕວກກີ; ຮັບຫຼຽນອະນຸສອນ “ເພື່ອພາລະກິດວິທະຍາສາດສັງຄົມ” ໂດຍສະຖາບັນບັນດິດວິທະຍາສາດສັງຄົມຫວຽດນາມ ປະດັບໃຫ້. ເນື່ອງໃນໂອການນີ້, ທ່ານນະຍົກລັດຖະມົນຕີ ບີນາລີ ຢຶນດືຣືນ ໄດ້ວາງພວງມາລາທີ່ອະນຸສາວະລີວິລະຊົນທີ່ໄດ້ເສຍຊີວິດເພື່ອຊາດ ແລະວາງພວງມາລາໄຫວ້ອາໄລທີ່ອະນຸສາວະລີຫໍສົບປະທານໂຮ່ຈີມິນ; ຢ້ຽມຊົມບູຮານສະຖານປະຫວັດສາດ ວັນໝຽວ ແລະ ຫໍພິພິດທະພັນຊົນເຜົ່າວິທະຍາ.
ຢູ່ທີ່ບັນດາການພົບປະນັ້ນ ສອງຝ່າຍໄດ້ແລກປ່ຽນຄວາມຄິດເຫັນ ກ່ຽວກັບສະພາບການຂອງແຕ່ລະປະເທດ ກໍ່ຄືບັນດາບັນຫາສາກົນແລະພາກພື້ນ ທີ່ທັງສອງຝ່າຍມີຄວາມສົນໃຈລວມກັນ. ຕວກກີສະແດງຄວາມນິຍົມຊົມເຊີຍຕໍ່ປະຫວັດສາດການຕໍ່ສູ້ປົດປ່ອຍຊາດຂອງປະຊາຊົນຫວຽດນາມ; ຕີລາຄາສູງການພັດທະນາຂອງຫວຽດນາມ ໃນໄລຍະເວລາທີ່ຜ່ານມາ, ຕີລາຄາສູງບົດບາດຂອງຫວຽດນາມໃນອາຊຽນ ແລະ ຫວັງວ່າຫວຽດນາມຈະເປັນຂົວຕໍ່ ເພື່ອໃຫ້ຕວກກີເພີ່ມທະວີການພົວພັນກັບບັນດາປະເທດອາຊຽນ ຊຶ່ງເປັນອົງການຈັດຕັ້ງທີ່ມີບົດບາດສຳຄັນ ໃນພາກພື້ນແລະໃນໂລກ. ຫວຽດນາມອວຍພອນຊົມເຊີຍບັນດາຜົນສຳເລັດທາງດ້ານເສດຖະກິດ-ສັງຄົມ ຂອງລັດຖະບານແລະປະຊາຊົນຕວກກີ, ພາໃຫ້ຕວກກີກາຍເປັນໜຶ່ງໃນ 20 ພື້ນຖານເສດຖະກິດແຖວໜ້າໃນໂລກ.
ກ່ຽວກັບການພົວພັນທາງດ້ານການເມືອງ, ສອງຝ່າຍເປັນເອກະສັນເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ, ສົ່ງເສີມການພົວພັນຮ່ວມມືລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ; ສົ່ງເສີມເພີ່ມທະວີການຮ່ວມມື ລະຫວ່າງບັນດາອົງການຈັດຕັ້ງມິດຕະພາບ ຂອງສອງປະເທດ ກໍ່ຄືພັດທະນາການພົວພັນ ລະຫວ່າງບັນດານະຄອນທີ່ແຮກສ່ຽວກັນ ຂອງສອງປະເທດ, ໃຫ້ຄຳໝັ້ນສັນຍາສືບຕໍ່ສົມທົບຢ່າງແໜ້ນແຟ້ນ ແລະສະໜັບສະໜູນຊຶ່ງກັນແລະກັນ ໃນເວທີປາໄສສາກົນ. ຕວກກີຢືນຢັນສະໜັບສະໜູນຄວາມພະຍາຍາມຂອງຫວຽດນາມ ໃນການຮັກສາສະຖຽນລະພາບໃນພາກພື້ນເວົ້າລວມ ແລະ ຢູ່ທະເລຕາເວັນອອກເວົ້າສະເພາະ; ສະໜັບສະໜູນຫຼັກໝັ້ນຂອງຫວຽດນາມ ແລະບັນດາປະເທດອາຊຽນ ໃນການແກ້ໄຂຂໍ້ຂັດແຍ່ງພິພາດຢູ່ທະເລຕາເວັນອອກດ້ວຍສັນຕິວິທີ, ຜ່ານການສົນທະນານຳກັນ, ເຄົາລົບກົດໝາຍສາກົນ; ສະເໜີໃຫ້ຫວຽດນາມສະໜັບສະໜູນຕວກກີ ໃນການສະໝັກຮັບເລືອກຕັ້ງເຂົ້າໃນຄະນະກຳມະການບໍລິຫານ ຢູເນັສໂກ ວາລະ 2017 - 2021 ແລະ ສະແດງຄວາມສະໜັບສະໜູນ ໃຫ້ຫວຽດນາມເຂົ້າເປັນ ກຳມະການບໍ່ຖາວອນຂອງສະພາຄວາມໝັ້ນຄົງ ແຫ່ງສະຫະປະຊາຊາດ ວາລະ 2020 - 2021. ຫວຽດນາມຢືນຢັນຈະເຮັດຈົນສຸດຄວາມສາມາດຂອງຕົນ ເພື່ອຊຸກຍູ້ການພົວພັນຂອງອາຊຽນກັບບັນດາປະເທດ, ບັນດາຄູ່ຮ່ວມມື, ໃນນັ້ນມີຕວກກີ.
ກ່ຽວກັບການຮ່ວມມືທາງດ້ານການຄ້າ, ຍອດມູນຄ່າການຄ້າສອງສົ້ນຫວຽດນາມ-ຕວກກີ ໃນປີ 2016 ບັນລຸເກືອບ 2 ຕື້ໂດລາສະຫະລັດ ແລະ ສືບຕໍ່ເພີ່ມຂຶ້ນຢ່າງໄວ. ກ່ຽວກັບການລົງທຶນ, ປະຈຸບັນ ຕວກກີມີ 13 ໂຄງການລົງທຶນຢູ່ຫວຽດນາມ ດ້ວຍຈຳນວນທຶນທີ່ລົງທັງໝົດ 730 ລ້ານໂດລາສະຫະລັດ. ຫວຽດນາມຊົມເຊີຍຕວກກີທີ່ໄດ້ໃຫ້ສັດຕະຍາບັນ ສັນຍາວ່າດ້ວຍການຫຼີກລ່ຽງການເກັບພາສີຊ້ຳຊ້ອນ ແລະສັນຍາວ່າດ້ວຍການສົ່ງເສີມແລະປົກປ້ອງການລົງທຶນ. ສອງປະເທດກໍ່ໄດ້ເຊັນສັນຍາຂົນສົ່ງທາງອາກາດໃນປີ 2015. ສອງຝ່າຍໃຫ້ຄຳໝັ້ນສັນຍາຈະສູ້ຊົນຍົກມູນຄ່າການຄ້າລະຫວ່າງສອງປະເທດຂຶ້ນເປັນ 4 ຕື້ໂດລາສະຫະລັດ ໃນປີ 2020 ໂດຍຜ່ານການເພີ່ມທະວີບັນດາການເຄື່ອນໄຫວສົ່ງເສີມການລົງທຶນແລະການຄ້າ. ຝ່າຍຫວຽດນາມສະເໜີໃຫ້ຝ່າຍຕວກກີຮັບຮອງໂດຍໄວວ່າ ຫວຽດນາມມີພື້ນຖານເສດຖະກິດຕະຫຼາດ, ພ້ອມນັ້ນ ກໍ່ສະເໜີໃຫ້ຕວກກີຍົກເລີກພາສີທີ່ບໍ່ສົມຄວນຈຳນວນໜຶ່ງຕໍ່ສິນຄ້າສົ່ງນອກຫຼາຍປະເພດຂອງຫວຽດນາມເຊັ່ນ ເກີບ, ເສັ້ນໄຍ, ສາຍພານຂົນສົ່ງ, ເຄື່ອງປັບອາກາດ, ໂທລະສັບມືຖື...
ສອງຝ່າຍເປັນເອກະພາບຈະສົມທົບນຳກັນຢ່າງແໜ້ນແຟ້ນ ເພື່ອຊຸກຍູ້ການຮ່ວມມືໃນບັນດາຂົງເຂດຄົມມະນາຄົມຂົນສົ່ງ (ພິເສດແມ່ນຮ່ວມມືດ້ານການເດີນທະເລ, ການຕໍ່ເຮືອ, ຝຶກອົບຮົມລູກເຮືອ; ສົ່ງເສີມການຮ່ວມມືລະຫວ່າງບັນດາບໍລິສັດການບິນ ຂອງສອງປະເທດເຊັ່ນ Turkish Airline ແລະ Vietnam Airlines), ຮ່ວມມືດ້ານວິທະຍາສາດ-ເຕັກໂນໂລຊີ, ການສຶກສາ-ວັດທະນະທຳ, ແລກປ່ຽນຮ່ວມມືລະຫວ່າງບັນດາມະຫາວິທະຍາໄລຂອງສອງປະເທດ, ດ້ານການປ້ອງກັນຊາດ-ປ້ອງກັນຄວາມສະຫງົບ ແລະ ການທູດປະຊາຊົນ. ໃນປີ 2018, ສອງປະເທດຈະສົມທົບກັນຈັດຕັ້ງການເຄື່ອນໄຫວສະເຫຼີມສະຫຼອງ ວັນສ້າງຕັ້ງການພົວພັນທາງການທູດ ລະຫວ່າງສອງປະເທດຄົບຮອບ 40 ປີ (1978 - 2018) ຢ່າງສົມກຽດແລະມີຄວາມໝາຍ.
ໃນໂອກາດນີ້, ສອງຝ່າຍໄດ້ຈັດຕັ້ງພິທີລົງນາມໃນຂໍ້ຕົກລົງລະຫວ່າງກະຊວງການເງິນແຫ່ງ ສສ.ຫວຽດນາມ ແລະ ກະຊວງສຸລະກາກອນແລະການຄ້າແຫ່ງ ສ.ຕວກກີ ກ່ຽວກັບການຮ່ວມມື, ຊ່ວຍເຫຼືອກັນດ້ານການບໍລິຫານໃນຂົງເຂດສຸລະກາກອນ; ບົດບັນທຶກຄວາມຈຳລະຫວ່າງກະຊວງແຜນການແລະການລົງທຶນແຫ່ງ ສສ.ຫວຽດນາມ ແລະ ກະຊວງເສດຖະກິດແຫ່ງ ສ.ຕວກກີ ກ່ຽວກັບການຮ່ວມມືໃນຂົງເຂດ ເຂດການຄ້າເສດລີ, ເຂດຜະລິດສົ່ງນອກ, ເຂດເສດຖະກິດ, ເຂດເສດຖະກິດພິເສດ; ແຜນການຜັນຂະຫຍາຍການຮ່ວມມືປີ 2017 - 2018 ລະຫວ່າງສະຖາບັນມາດຕະຖານຕວກກີ (TSE) ແຫ່ງ ສ,ຕວກກີ ແລະ ສະຫະກົມມາດຕະຖານການວັດແທກຄຸນນະພາບ (STAMEQ) ແຫ່ງ ສສ.ຫວຽດນາມ.
ການຢ້ຽມຢາມປະເທດຫວຽດນາມຂອງທ່ານນາຍົກລັດຖະມົນຕີຕວກກີ ບີນາລີ ຢຶນດືຣຶມ ໄດ້ສຳເລັດສິ້ນສຸດຢ່າງຈົບງາມ, ປະກອບສ່ວນພັດທະນາການພົວພັນຫຼາຍດ້ານລະຫວ່າງສອງປະເທດໃນເວລາຕໍ່ໜ້າ./.
ສັງລວມໂດຍ ເຟືອງຈ່າ