ສາທາລະນະລັດ ສັງຄົມນິຍົມ ຫວຽດນາມ - ສາທາລະນະລັດ ຮົງກາລີ: ຄູ່ຮ່ວມມືທີ່ແທ້ຈິງ ແລະ ມີປະສິດທິຜົນ
ວກ. ອອນໄລ - ໂດຍຕອບສະໜອງຕາມຄຳເຊີນຂອງທ່ານ ຫງວຽນຊວັນຝຸກ ນາຍົກລັດຖະມົນຕີ ແຫ່ງ ສສ ຫວຽດນາມ, ທ່ານ ໂອບານ ວິກຕໍ ນາຍົກລັດຖະມົນຕີແຫ່ງ ສາທາລະນະລັດ ຮົງກາລີ ໄດ້ດຳເນີນການຢ້ຽມຢາມຫວຽດນາມ ຢ່າງເປັນທາງການ ແຕ່ວັນທີ 24 ຫາ 26 ກັນຍາ 2017.
ໃນຂອບການຢ້ຽມຢາມ, ທ່ານນາຍົກລັດຖະມົນຕີ ໂອບານ ວິກຕໍ ໄດ້ມີການພົບປະເຈລະຈາກັບທ່ານ ນາຍົກລັດຖະມົນຕີ ຫງວຽນຊວັນຝຸກ; ພົບປະແລກປ່ຽນຄຳຄິດເຫັນກັບ ເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ; ປະທານສະພາແຫ່ງຊາດ ຫງວຽນທິກີມເງິນ; ເຂົ້າຮ່ວມເວທີປາໄສວິສາຫະກິດ ຫວຽດນາມ - ຮົງກາລີ.
ທີ່ບັນດາການພົບປະ, ສອງຝ່າຍໄດ້ແຈ້ງໃຫ້ກັນຊາບ ກ່ຽວກັບສະພາບການການເມືອງ, ເສດຖະກິດ-ສັງຄົມ ແລະ ບັນດາການບຸລິມະສິດໃນນະໂຍບາຍການຕ່າງປະເທດ ແລະ ເສດຖະກິດກັບຕ່າງປະເທດ ຂອງແຕ່ລະປະເທດ, ແລກປ່ຽນກ່ຽວກັບບັນດາມາດຕະການອັນລະອຽດ ເພື່ອຊຸກຍູ້ການພົວພັນສອງຝ່າຍ, ປຶກສາສົນທະນາກ່ຽວກັບບັນດາບັນຫາສາກົນແລະພາກພື້ນ ເຊິ່ງສອງຝ່າຍມີການເອົາໃຈໃສ່ຮ່ວມກັນ. ຫວຽດນາມໄດ້ຢືນຢັນວ່າ ຍາມໃດກໍ່ໃຫ້ຄວາມສຳຄັນແກ່ການເປີດກວ້າງສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານ ກັບບັນດາປະເທດຢູ່ພາກພື້ນເອີຣົບກາງແລະເອີຣົບຕາເວັນອອກ ເຊິ່ງໃນນັ້ນມີ ຮົງກາລີ; ຫວຽດນາມກໍ່ໄດ້ສະແດງຄວາມຊົມເຊີຍຕໍ່ບັນດາຜົນງານໃນການພັດທະນາ ແລະ ເຊື່ອມໂຍງເຂົ້າສູ່ ສະຫະພາບເອີຣົບ ຂອງຮົງກາລີ; ສະແດງຄວາມປິຕິຊົມຊື່ນ ແລະ ຮັບຮອງເອົາ ຮົງກາລີເປັນໜຶ່ງໃນບັນດາຄູ່ຮ່ວມມືທີ່ມີປະສິດທິຜົນແລະແທ້ຈິງ ຂອງຫວຽດນາມຢູ່ພາກພື້ນນີ້. ຮົງກາລີ ກໍ່ໄດ້ຕີລາຄາສູງຕໍ່ບັນດາຜົນງານທີ່ປະຊາຊົນຫວຽດນາມ ບັນລຸໄດ້ໃນການພັດທະນາເສດຖະກິດ, ສັງຄົມ ແລະ ການເຊື່ອມໂຍງສາກົນ.
ສອງຝ່າຍກໍ່ໄດ້ສະແດງຄວາມດີໃຈຕໍ່ການພັດທະນາຢ່າງຕັ້ງໜ້າ ຂອງການພົວພັນມິດຕະພາບ ແລະການຮ່ວມມືໃນຫຼາຍດ້ານ ລະຫວ່າງຫວຽດນາມ ແລະ ຮົງກາລີ ໃນໄລຍະເວລາປະຫວັດສາດ 67 ປີທີ່ຜ່ານມາ; ຊົມເຊີຍການຮັກສາ ແລະ ເພີ່ມທະວີການແລກປ່ຽນຄະນະຜູ້ແທນຂັ້ນສູງ ກໍ່ຄືລະຫວ່າງບັນດາກະຊວງ, ຂະແໜງການ, ທ້ອງຖິ່ນແລະວິສາຫະກິດ ຂອງສອງປະເທດ, ເຊິ່ງໄດ້ສ້າງກຳລັງໜູນເພື່ອປັບປຸງ ແລະ ເພີ່ມທະວີການຮ່ວມມືສອງຝ່າຍ ໃນບັນດາຂົງເຂດທີ່ສອງຝ່າຍມີຄວາມເອົາໃຈໃສ່ ແລະ ມີຜົນປະໂຫຍດຮ່ວມກັນ.
ສອງຝ່າຍໄດ້ຢືນຢັນການຮ່ວມມືທາງດ້ານເສດຖະກິດ-ການເງິນ ເປັນເສົາຄ້ຳບຸລິມະສິດ ໃນການພົວພັນສອງຝ່າຍໃນເວລາຕໍ່ໄປ ແລະໄດ້ເນັ້ນເຖິງຄວາມສຳຄັນຂອງຄະນະກຳມະການປະສົມ ກ່ຽວກັບການຮ່ວມມືດ້ານເສດຖະກິດລະຫວ່າງ ຫວຽດນາມ-ຮົງກາລີ; ເຫັນດີເປັນເອກະພາບ ຈະຊີ້ນຳບັນດາກະຊວງ, ຂະແໜງການທີ່ກ່ຽວຂ້ອງ ຂອງແຕ່ລະປະເທດ ໃຫ້ຕັ້ງໜ້າຜັນຂະຫຍາຍບັນດາຜົນສຳເລັດທີ່ບັນລຸໄດ້ ໃນກອງປະຊຸມຄັ້ງທີ VII ຂອງຄະນະກຳມະການ ທີ່ໄດ້ດຳເນີນຢູ່ນະຄອນ ບູດາແປັດ ໃນເດືອນມີນາ 2017. ສອງຝ່າຍກໍ່ໄດ້ຊົມເຊີຍການລົງນາມໃນບົດບັນທຶກຄວາມຈຳ ກ່ຽວກັບການຮ່ວມມືດ້ານການເງິນ ລະຫວ່າງກະຊວງການເງິນຫວຽດນາມ ແລະ ກະຊວງເສດຖະກິດແຫ່ງຊາດຮົງກາລີ; ຢືນຢັນຄວາມຕັດສິນໃຈໃນການຕັ້ງໜ້າປະສານສົມທົບ ແລະ ຜັນຂະຫຍາຍບັນດາໂຄງການທີ່ປະຕິບັດດ້ວຍແຫຼ່ງສິນເຊື່ອເອື້ອເຟື້ອ ທີ່ມີມຸນຄ່າ 440 ລ້ານເອີໂຣ ຂອງຮົງກາລີ ໃຫ້ມີປະສິດທິຜົນ.
ຫວຽດນາມໄດ້ຕີລາຄາສູງຕໍ່ການທີ່ ຮົງກາລີ ສະໜອງທຶນການສຶກສາໃຫ້ແກ່ນັກສຶກສາຫວຽດນາມ ໃນແຕ່ລະປີເພີ່ມຂຶ້ນເປັນຈຳນວນ 200 ທຶນ ເລີ່ມແຕ່ສົກຮຽນປີໜ້າ ແລະ ສະເໜີໃຫ້ຝ່າຍຮົງກາລີ ໃຫ້ບຸລິມະສິດແກ່ນັກສຶກສາຫວຽດນາມ ໄດ້ຮຽນບັນດາວິຊາທີ່ຫວຽດນາມມີຄວາມຮຽກຮ້ອງຕ້ອງການ ແລະ ຮົງກາລີ ມີທ່າແຮງຄື ສາທາລະນະສຸກ, ການຢາ, ເຕັກໂນໂລຊີຊີວະສາດ, ການຄຸ້ມຄອງແຫຼ່ງນ້ຳ, ເຕັກໂນໂລຊີຂໍ້ມູນຂ່າວສານ...
ສອງຝ່າຍກໍ່ໄດ້ເຫັນດີເປັນເອກະພາບ ຈະຊຸກຍູ້ຂະບວນວິວັດການປັບປຸງບູລະນະ ແລະ ເຊັນບົດບັນທຶກຄວາມຈຳ ກ່ຽວກັບການຮ່ວມມື ລະຫວ່າງກະຊວງປ້ອງກັນຊາດຫວຽດນາມ ແລະ ກະຊວງປ້ອງກັນຊາດ ຮົງກາລີ, ຕາມນັ້ນ, ຊຸກຍູ້ການຮ່ວມມືໃນບັນດາຂົງເຂດອຸດສາຫະກຳດ້ານປ້ອງກັນຊາດ, ຊ່ວຍເຫຼືອເຕັກນິກ, ຄວາມສະຫງົບປອດໄພດ້ານຂໍ້ມູນຂ່າວສານ, ເຄືອຂ່າຍອິນເຕິແນັດ, ຝຶກອົບຮົມນັກວິຊາການເຕັກໂນໂລຊີສູງ ແລະ ການຮັກສາສັນຕິພາບຂອງສະຫະປະຊາຊາດ.
ສອງຝ່າຍເນັ້ນເຖິງຄວາມສຳຄັນຂອງການຮ່ວມມືດ້ານວິທະຍາສາດ - ເຕັກໂນໂລຊີ, ການສື່ສານ - ຂໍ້ມູນຂ່າວສານ, ວັດທະນະທຳ, ກີລາ, ການທ່ອງທ່ຽວ; ຊົນເຊີຍການເຊັນບົດບັນທຶກຄວາມຈຳ ກ່ຽວກັບການຮ່ວມມືໃນຂົງເຂດເຕັກໂນໂລຊີຂໍ້ມູນຂ່າວສານແລະການສື່ສານ ລະຫວ່າງກະຊວງຂໍ້ມູນ-ການສື່ສານຫວຽດນາມ ແລະ ກະຊວງພັດທະນາແຫ່ງຊາດ ຮົງກາລີ, ກໍ່ຄືໂຄງການຮ່ວມມືດ້ານວັດທະນະທຳ ໄລຍະ 2017 – 2019 ລະຫວ່າງກະຊວງວັດທະນະທຳ, ກີລາ ແລະການທ່ອງທ່ຽວຫວຽດນາມ ແລະ ກະຊວງຊັບພະຍາກອນມະນຸດ ຮົງກາລີ.
ສອງຝ່າຍກໍ່ໄດ້ເປັນເອກະພາບ ຈະແບ່ງປັນບົດຮຽນ ແລະ ເພີ່ມທະວີການຮ່ວມມືໃນບັນດາຂົງເຂດຄື ກະສິກຳ, ສາທາລະນະສຸກ, ການແຮງງານ, ຊັບພະຍາກອນທຳມະຊາດແລະສິ່ງແວດລ້ອມ; ຊົມເຊີຍການເຊັນຂໍ້ຕົກລົງວ່າດ້ວຍການຮ່ວມມືໃນຂົງເຂດກະສິກຳ ລະຫວ່າງກະຊວງກະສິກຳແລະພັດທະນາຊົນນະບົດ ຫວຽດນາມ ແລະ ກະຊວງກະສິກຳ ຮົງກາລີ, ກໍ່ຄື ບົດບັນທຶກຄວາມຈຳ ກ່ຽວກັບການຮ່ວມມືໃນຂົງເຂດອາຊີວະສຶກສາ ລະຫວ່າງກະຊວງແຮງງານ ທະຫານເສຍອົງຄະແລະສັງຄົມ ຫວຽດນາມ ແລະ ກະຊວງເສດຖະກິດ ຮົງກາລີ.
ສອງຝ່າຍກໍ່ໄດ້ເຫັນດີເປັນເອກະພາບ ຈະເພີ່ມທະວີການປຶກສາຫາລື ແລະ ປະສານສົມທົບກັນທີ່ບັນດາອົງການຈັດຕັ້ງ, ເວທີປາໄສສາກົນ ແລະ ພາກພື້ນ, ພິເສດແມ່ນສະຫະປະຊາຊາດ, ເວທີປາໄສການຮ່ວມມື ອາຊີ - ເອີຣົບ (ASEM), ການຮ່ວມມືດ້ານແມ່ນ້ຳຂອງ - ແມ່ນ້ຳດານູບ, ກ່ຽວກັບບັນດາບັນຫາສາກົນແລະພາກພື້ນ ທີ່ສອງຝ່າຍມີຄວາມເອົາໃຈໃສ່ຮ່ວມກັນ, ໃນນັ້ນມີການຮ່ວມມືແກ້ໄຂບັນດາບັນຫາທົ່ວໂລກຄື ການປ່ຽນແປງດິນຟ້າອາກາດ, ໄພພິບັດ, ການນຳໃຊ້ແລະຄຸ້ມຄອງແຫຼ່ງນ້ຳແບບຍືນຍົງ, ລວມທັງບັນດາແຫຼ່ງນ້ຳທີ່ຂ້າມຜ່ານຊາຍແດນ ແລະ ຄວາມປອດໄພດ້ານສະບຽງອາຫານ; ພິຈາລະນາສະໜັບສະໜູນເຊິ່ງກັນແລະກັນ ໃນການອອກສະໝັກຮັບເລືອກຕັ້ງ ເຂົ້າໃນບັນດາອົງການຈັດຕັ້ງ ແລະ ເວທີປາໄສສາກົນ.
ໂດຍບົນພື້ໜຖານສາຍພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງສອງປະເທດ, ຮົງກາລີ ກໍ່ໄດ້ໃຫ້ຄຳໝັ້ນສັນຍາວ່າ ຈະສືບຕໍ່ສະໜັບສະໜູນ, ຊຸກຍູ້ການພົວພັນຮອບດ້ານ ລະຫວ່າງຫວຽດນາມ ແລະ ອີຢູ, ໃນນັ້ນມີການລົງນາມເປັນທາງການ, ການໃຫ້ສັດຕະຍາບັນ ແລະ ປະຕິບັດຢ່າງເຕັມສ່ວນ ສັນຍາການຄ້າເສລີ ລະຫວ່າງ ຫວຽດນາມ - ອີຢູ (EVFTA). ກ່ຽວກັບຕົນເອງ, ຫວຽດນາມພ້ອມແລ້ວທີ່ຈະຊ່ວຍເຫຼືອ ຮົງກາລີ ເພີ່ມທະວີການຮ່ວມມືກັບ ອາຊຽນ.
ເນື່ອງໃນໂອກາດນີ້, ສອງຝ່າຍໄດ້ລົງນາມໃນບັນດາເອກະສານຮ່ວມມື ໃນຂົງເຂດການເງິນ, ວັດທະນະທຳ, ການສຶກສາ, ກະສິກຳ, ການແຮງງານ, ການສື່ສານ-ຂໍ້ມູນຂ່າວສານ ແລະ ຂໍ້ຕົກລົງກ່ຽວກັບການແຮກສ່ຽວລະຫວ່າງນະຄອນເກິ່ນເທີ ຂອງຫວຽດນາມ ແລະ ນະຄອນກາໂປວາ ຂອງຮົງກາລີ.
ຜົນສຳເລັດແຫ່ງການຢ້ຽມຢາມຫວຽດນາມຢ່າງເປັນທາງການ ຂອງທ່ານນາຍົກລັດຖະມົນຕີ ໂອບານ ວິກຕໍ ເປັນເຫດການການເມືອງທີ່ມີຄວາມໝາຍສຳຄັນໃນການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານ ລະຫວ່າງຫວຽດນາມ ແລະ ຮົງກາລີ./.
ໂດຍ ເຟືອງຈ່າ