ຊຸກຍູ້ແລະເປີດກວ້າງການຮ່ວມມື ຫວຽດນາມ - ຄາຊັກສະຖານ
ວກ.ອອນໄລ - ໂດຍຕອບສະໜອງຄຳເຊື້ອເຊີນຂອງທ່ານ ກາດຊິມ ໂຈມາດ ໂຕກາຢິບ ປະທານສະພາສູງແຫ່ງ ສາທາລະນະລັດ ຄາຊັກສະຖານ ແລະ ທ່ານ ນູລານ ນິກມາຕູລີນ ປະທານສະພາຕ່ຳແຫ່ງ ສາທາລະນະລັດ ຄາຊັກສະຖານ, ທ່ານປະທານສະພາແຫ່ງຊາດຫວຽດນາມ ຫງວຽນທິກີມເງິນ ພ້ອມດ້ວຍຄະນະຜູ້ແທນຂັ້ນສູງ ສະພາແຫ່ງຊາດຫວຽດນາມ ໄດ້ເດີນທາງໄປຢ້ຽມຢາມ ສາທາລະນະລັດ ຄາຊັກສະຖານ ຢ່າງເປັນທາງການ ແຕ່ວັນທີ 16 ຫາ 18 ຕຸລາ 2017.
ທ່ານນາງ ຫງວຽນທິກີມງິນ ປະທານສະພາແຫ່ງຊາດຫວຽດນາມ ແລະ ທ່ານ ນູລານ ນິກມາຕູລີນ ປະທານສະພາຕ່ຳແຫ່ງ ສາທາລະນະລັດ ຄາຊັກສະຖານ ໃນພິທີຕ້ອນຮັບເປັນທາງການ. (ພາບ:nhandan.com.vn)
ໃນຂອບເຂດການຢ້ຽມຢາມ, ທ່ານນາງ ຫງວຽນທິກີມງິນ ປະທານສະພາແຫ່ງຊາດຫວຽດນາມ ໄດ້ພົບປະເຈລະຈາກັບທ່ານ ນູລານ ນິກມາຕູລີນ ປະທານສະພາຕ່ຳ, ພົບປະຫາລືກັບທ່ານ ກາດຊິມ ໂຈມາດໂຕກາຢິບ ປະທານສະພາສູງ ຄາຊັກສະຖານ. ໃນການພົບປະຫາລື, ສອງຝ່າຍຕີລາຄາສູງຕໍ່ການຮ່ວມມືລະຫວ່າງສອງສະພາແຫ່ງຊາດ ຫວຽດນາມ - ຄາຊັກສະຖານ ຊຶ່ງເປັນຊ່ອງທາງສຳຄັນໃນການພົວພັນຮ່ວມມືລະຫວ່າງສອງປະເທດ; ສອງຝ່າຍເຫັນດີເປັນເອກະສັນຈະສືບຕໍ່ປັບປຸງ ແລະ ເພີ່ມທະວີການພົວພັນຢ່າງແໜ້ນແຟ້ນ ໃນບັນດາເວທີປາໄສພາກພື້ນແລະສາກົນ, ແບ່ງປັນບົດຮຽນໃນການເຄື່ອນໄຫວນິຕິບັນຍັດ, ຮັບປະກັນຜົນປະໂຫຍດຂອງປະຊາຊົນ ໃນວິວັດການພັດທະນາເສດຖະກິດ-ສັງຄົມ; ສືບຕໍ່ແລກປ່ຽນຄະນະຜູ້ແທນຂັ້ນສູງ, ຂັ້ນຄະນະກຳມາທິການ ແລະ ອົງການຊ່ວຍວຽກສະພາແຫ່ງຊາດ; ສົມທົບການຕິດຕາມກວດກາຕໍ່ ການປະຕິບັດຂໍ້ຕົກລົງການຮ່ວມມື ທີ່ລັດຖະບານສອງປະເທດໄດ້ລົງນາມ, ແລກປ່ຽນຂໍ້ມູນຂ່າວສານກ່ຽວກັບການເຄື່ອນໄຫວຂອງສະພາແຫ່ງຊາດແຕ່ລະປະເທດ...
ປະທານສະພາແຫ່ງຊາດຫວຽດນາມ ຫງວຽນທິກີມງິນ ໄດ້ແຈ້ງໃຫ້ຊາບວ່າ ສະພາແຫ່ງຊາດຫວຽດນາມຊຸດທີ່ XIV ໄດ້ສ້າງຕັ້ງ ກຸ່ມມິດຕະພາບລັດຖະສະພາ ຫວຽດນາມ - ຄາຊັກສະຖານ ເພື່ອແນໃສ່ເສີມຂະຫຍາຍບົດບາດເປັນຂົວຕໍ່ ໃນການຊຸກຍູ້ການພົວພັນຮ່ວມມືລະຫວ່າງສອງປະເທດ, ສອງອົງການນິຕິບັນຍັດ. ປະທານສະພາແຫ່ງຊາດຫວຽດນາມ ກໍ່ສະເໜີໃຫ້ສອງຝ່າຍ ກໍ່ສ້າງແລະເສີມຂະຫຍາຍກົນໄກປຶກສາຫາລື, ສົມທົບ ແລະ ສະໜັບສະໜູນຊຶ່ງກັນແລະກັນ ໃນບັນດາເວທີປາໄສລັດຖະສະພາພະຫຸພາຄີ ຄື IPU, APPF..., ແລກປ່ຽນກ່ຽວກັບບັນດາບັນຫາພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈຮ່ວມກັນ; ເພີ່ມທະວີການແລກປ່ຽນຄະນະຜູ້ແທນຂັ້ນຕ່າງໆ; ສົມທົບການຕິດຕາມກວດກາຕໍ່ການປະຕິບັດບັນດາຂໍ້ຕົກລົງທີ່ສອງປະເທດໄດ້ລົງນາມ ແລະ ກໍ່ຕັ້ງພື້ນຖານກົດໝາຍໃຫ້ແກ່ການພົວພັນຮ່ວມມືໃນຫຼາຍດ້ານລະຫວ່າງສອງປະເທດ.
ໂດຍສະແດງຄວາມຊົມເຊີຍການຢ້ຽມຢາມຂອງປະທານສະພາແຫ່ງຊາດຫວຽດນາມ ຫງວຽນທິກີມງິນ ກົງກັບໂອກາດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 25 ປີ, ບັນດາການນຳຂອງ ຄາຊັກສະຖານ ໄດ້ຕີລາຄາວ່າ ການຢ້ຽມຢາມຄັ້ງນີ້ເປັນກຳລັງໜູນ ທີ່ຊຸກຍູ້ການຮ່ວມມືລະຫວ່າງສອງປະເທດໃຫ້ຂະຫຍາຍຕົວຂຶ້ນສູ່ລະດັບສູງໃໝ່.
ປະທານສະພາແຫ່ງຊາດຫວຽດນາມ ຫງວຽນທິກີມງິນ ໄດ້ມີການຢ້ຽມຄຳນັບທ່ານ ບາຄີດຈານ ຊາກີນຕາຢິບ ນາຍົກລັດຖະມົນຕີຄາຊັກສະຖານ ແລະ ໄດ້ພົບປະກັບການນຳພັກກຳອຳນາດ ນູຣ໌ ໂອຕັນ, ພັກກອມມູນິດປະຊາຊົນຄາຊັກສະຖານ; ໃນການພົບປະເຫຼົ່ານີ້, ບັນດາການນຳ, ຜູ້ຕາງໜ້າພັກການເມືອງຄາຊັກສະຖານ ລ້ວນແຕ່ໄດ້ສະແດງຄວາມດີໃຈຕໍ່ບັນດາຜົນສຳເລັດໃນການພັດທະນາເສດຖະກິດ-ສັງຄົມຂອງຫວຽດນາມ ໃນເວລາທີ່ຜ່ານມາ; ສະແດງຄວາມຮັກແພງ ມິດຕິດມິດໃຈທີ່ດີງານ ແລະ ຄວາມພ້ອມທີ່ຈະເປີດກວ້າງການພົວພັນຮ່ວມມືກັບຫວຽດນາມ.
ສອງຝ່າຍໄດ້ເປັນເອກະສັນຈະຊຸກຍູ້ ແລະເຮັດໃຫ້ຄວາມພົວພັນມິດຕະພາບ ການຮ່ວມມືທີ່ເປັນມູນເຊື້ອລະຫວ່າງສອງປະເທດເລິກເຊິ່ງກວ່າອີກ, ນຳເອົາຂົງເຂດການຮ່ວມມືດ້ານຕ່າງໆເຂົ້າສູ່ລວງເລິກ ມີເນື້ອແທ້ ແລະ ເປີດກວ້າງການຮ່ວມມືເຂົ້າສູ່ບັນດາຂົງເຂດທີ່ສອງຝ່າຍມີທ່າແຮງ. ລະອຽດຄື, ກ່ຽວກັບເສດຖະກິດ-ການຄ້າ, ສອງຝ່າຍເປັນເອກະສັນຈະສືບຕໍ່ຍູ້ແຮງການຮ່ວມມື, ຍົກມູນຄ່າການຄ້າສອງຝ່າຍຂຶ້ນຕື່ມ; ຕີລາຄາຜົນສຳເລັດຂອງປີໜຶ່ງແຫ່ງການຜັນຂະຫຍາຍສັນຍາການຄ້າເສລີ ຫວຽດນາມ - ສະຫະພັນເສດຖະກິດອາຊີ-ເອີຣົບ, ຈາກນັ້ນ ຖອດຖອນບົດຮຽນ ແລະ ຊອກຫາມາດຕະການ ເພື່ອຜັນຂະຫຍາຍສັນຍານີ້ໃຫ້ມີປະສິດທິຜົນກວ່າອີກ; ຍາດແຍ່ງເອົາຄວາມເອື້ອອຳນວຍດ້ານພາສີສຸລະກາກອນຂອງສັນຍາ ເພື່ອຍູ້ແຮງການແລກປ່ຽນສິນຄ້າ; ເສີມຂະຫຍາຍປະສິດທິຜົນຂອງກົນໄກຄະນະກຳມະການລະຫວ່າງລັດຖະບານຫວຽດນາມ - ຄາຊັກສະຖານ.
ສອງຝ່າຍຫວັງວ່າຈະຊຸກຍູ້ ເພີ່ມທະວີການຮ່ວມມືໃນບັນດາຂົງເຂດ ການປ້ອງກັນຄວາມສະຫງົບ, ການສຶກສາ ຝຶກອົບຮົມ, ວັດທະນະທຳ, ທ່ອງທ່ຽວ. ສອງຝ່າຍຈະເປັນເອກະພາບກັນໂດຍໄວກ່ຽວກັບເນື້ອໃນຂອງສັນຍາວ່າດ້ວຍການມອບສົ່ງຜູ້ຖືກຕັດສິນຈຳຄຸກກັບເມືອປະເທດ ເພື່ອຈະໄດ້ລົງລາຍເຊັນໃນເວລາຕໍ່ໜ້າ; ຊຸກຍູ້ການຮ່ວມມືຕາມສັນຍາວ່າດ້ວຍການຮ່ວມມືໃນຂົງເຂດການສຶກສາ-ຝຶກອົບຮົມ ທີ່ໄດ້ລົງນາມໃນເດືອນກັນຍາປີ 2009 ແລະ ອະນຸສັນຍາເພີ່ມເຕີມ ທີ່ໄດ້ລົງນາມໃນເດືອນພະຈິດປີ 2011; ຜັນຂະຫຍາຍຢ່າງມີປະສິດທິຜົນ ສັນຍາວ່າດ້ວຍການຮ່ວມມືດ້ານການທ່ອງທ່ຽວ ທີ່ໄດ້ລົງນາມໃນເດືອນພະຈິກປີ 2011 ແລະ ບັນດາຂໍ້ຕົກລົງທີ່ກ່ຽວຂ້ອງ, ສະໜັບສະໜູນການໂຄສະນະເຜີຍແຜ່ການທ່ອງທ່ຽວ, ເພີ່ມທະວີການຈັດຕັ້ງບັນດາກິດຈະກຳວັດທະນະທຳ; ແລກປ່ຽນຂໍ້ມູນຂ່າວສານ, ເຂົ້າຮ່ວມການວາງສະແດງ ນິທັດສະການທ່ອງທ່ຽວຂອງກັນແລະກັນ…
ໃນຂອບເຂດການຢ້ຽມຢາມ, ປະທານສະພາແຫ່ງຊາດ ຫງວຽນທິກີມງິນ ໄດ້ມີການພົບປະໂອ້ລົມກັບພະນັກງານ ລັດຖະກອນສະຖານທູດ ແລະ ຜູ້ຕາງໜ້າຊຸມຊົນຊາວຫວຽດນາມຢູ່ຄາຊັກສະຖານ. ປະທານສະພາແຫ່ງຊາດຫວຽດນາມ ໄດ້ເວົ້າກ່ຽວກັບຈຸດປະສົງຂອງການຢ້ຽມຢາມປະເທດຄາຊັກສະຖານຢ່າງເປັນທາງການຄັ້ງນີ້ ແລະ ສະແດງຄວາມຊົມເຊີຍຕໍ່ການນຳ ພະນັການ ລັດຖະກອນສະຖານທູດທັງໝົດ ທີ່ໄດ້ມີຄວາມມານະພະຍາຍາມ ໃນການຜ່ານຜ່າຄວາມຫຍຸ້ງຍາກ ເພື່ອສຳເລັດໜ້າທີ່ທີ່ພັກແລະລັດມອບໝາຍໃຫ້; ພ້ອມນັ້ນກໍ່ຢືນຢັນພັກ-ລັດ ຍາມໃດກໍ່ເອົາໃຈໃສ່ ສະໜັບສະໜູນ ຊ່ວຍເຫຼືອໃຫ້ບັນດາອົງການຕາງໜ້າຫວຽດນາມຢູ່ຕ່າງປະເທດ ມີເງື່ອນໄຂເຄື່ອນໄຫວຢ່າງສະດວກທີ່ສຸດ, ແນໃສ່ປະກອບສ່ວນຮັບໃຊ້ພາລະກິດການປົກປັກຮັກສາ ສ້າງສາ ແລະ ພັດທະນາປະເທດ. ປະທານສະພາແຫ່ງຊາດ ຫງວຽນທິກີມງິນ ສະແດງຄວາມດີໃຈເມື່ອເຫັນຊຸມຊົນຊາວຫວຽດນາມຢູ່ຄາຊັກສະຖານ ເຖິງວ່າມີຈຳນວນນ້ອຍ ແຕ່ກໍ່ໄດ້ສາມັກຄີ ຊ່ວຍເຫຼືອຊຶ່ງກັນແລະກັນເປັນຢ່າງດີ, ນັກຮຽນນັກສຶກສາກໍ່ມີຄວາມມານະພາຍາຍາມຫຼາຍແລະໄດ້ຮັບຜົນການຮ່ຳຮຽນທີ່ດີ... ແລະປະທານສະພາແຫ່ງຊາດກໍ່ສະແດງຄວາມຫວັງວ່າ ຊຸມຊົນຊາວຫວຽດນາມຈະປະຕິບັດຕາມກົດໝາຍຂອງປະເທດທີ່ຕົນອາໄສຢູ່ຢ່າງເຂັ້ມງວດ, ເພື່ອກາຍເປັນຮູບພາບທີ່ແທ້ຈິງ ເປັນຂົວຕໍ່ທີ່ສຳຄັນໃນການປະກອບສ່ວນປັບປຸງ ແລະ ເພີ່ມທະວີການພົວພັນມິດຕະພາບແລະການຮ່ວມມືທີ່ເປັນມູນເຊື້ອ ລະຫວ່າງຫວຽດນາມ ແລະ ຄາຊັກສະຖານ./.
ໂດຍ ເຟືອງຈ່າ
