ຊຸກຍູ້ການພົວພັນຫວຽດນາມ - ການາດາ ໃຫ້ຂະຫຍາຍຕົວຢ່າງມີເນື້ອແທ້ ແລະ ມີປະສິດທິຜົນກວ່າອີກ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ຫງວຽນຊວັນຝຸກ ນາຍົກລັດຖະມົນຕີແຫ່ງ ສາທາລະນະລັດ ສັງຄົມນິຍົມຫວຽດນາມ, ທ່ານ ຈັດສະຕີນ ທຣູເດີ ນາຍົກລັດຖະມົນຕີການາດາ ໄດ້ດຳເນີນການຢ້ຽມຢາມ ຫວຽດນາມຢ່າງເປັນທາງການ ໃນລະຫວ່າງວັນທີ 8-9 ພະຈິກ 2017. ການຢ້ຽມຢາມໄດ້ດຳເນີນໄປໃນສະພາບການທີ່ ການພົວພັນຫວຽດນາມ - ການາດາ ໄດ້ພັດທະນາເປັນຢ່າງດີ ແລະ ນຳມາຊຶ່ງຜົນປະໂຫຍດຕົວຈິງ, ຫຼາຍດ້ານ ແລະ ຕ່າງຝ່າຍຕ່າງມີຜົນ ໃຫ້ທັງສອງປະເທດ.
ໃນຂອບການຢ້ຽມຢາມ, ທ່ານນາຍົກລັດຖະມົນຕີການາດາ ຈັດສະຕີນ ທຣູເດີ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ, ພົບປະຫາລືກັບທ່ານ ຫງວຽນຝູຈ້ອງ ເລຂາທິການໃຫຍ່ ພັກກອມມູນິດຫວຽດນາມ, ທ່ານ ເຈິ່ນດ້າຍກວາງ ປະທານປະເທດ ແລະ ທ່ານນາງ ຫງວຽນທີ້ກິມເງິນ ປະທານສະພາແຫ່ງຊາດຫວຽດນາມ, ພົບປະກັບການນຳນະຄອນ ໂຮ່ຈີມິນ ແລະ ພົບປະໂຕະມົນທີ່ຕະຫຼາດຫຼັກຊັບນະຄອນ ໂຮ່ຈີມິນ; ພົບປະໂອ້ລົມກັບນັກຮຽນນັກສຶກສາຂອງມະຫາວິທະຍາໄລ ໂຕນດຶກຖັງ.
ໃນທີ່ການພົບປະເຫຼົ່ານັ້ນ, ສອງຝ່າຍໄດ້ສະແດງຄວາມພໍໃຈ ກ່ຽວກັບການຂະຫຍາຍຕົວທີ່ດີຂອງການພົວພັນຮ່ວມມື ມິດຕະພາບໃນຫຼາຍຂົງເຂດ ລະຫວ່າງຫວຽດນາມ - ການາດາ ໃນເວລາທີ່ຜ່ານມາ. ເນື່ອງໃນໂອກາດນີ້, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະ ທ່ານນາຍົກລັດຖະມົນຕີການາດາ ຈັດສະຕີນ ທຣູເດີ ໄດ້ຮັບຮອງຜ່ານ ຖະແຫຼງການຮ່ວມກ່ຽວກັບການສ້າງຕັ້ງການພົວພັນຄູ່ຮ່ວມມືຮອດບດ້ານຫວຽດນາມ - ການາດາ.
ຕາມນັ້ນ, ສອງຝ່າຍຕົກລົງເພີ່ມທະວີການພົວພັນຮ່ວມມື, ມິດຕະພາບລະຫວ່າງສອງປະເທດ ຕາມທິດຮອບດ້ານ, ມີເນື້ອແທ້ຕົວຈິງ, ມີປະສິດທິຜົນ, ໝັ້ນທ່ຽງ, ຍາວນານ ໃນລະດັບສອງຝ່າຍແລະຫຼາຍຝ່າຍ, ຕອບສະໜອງຜົນປະໂຫຍດຂອງສອງປະເທດ, ປະກອບສ່ວນຮັກສາສັນຕະພາບ ສະຖຽນລະພາບ ການຮ່ວມມື ການພັດທະນາ ຢູ່ພາກພື້ນອາຊີ-ປາຊີຟິກ ແລະ ໃນໂລກ. ສອງຝ່າຍຕົກລົງສ້າງຕັ້ງຂອບການພົວພັນຄູ່ຮ່ວມມືຮອບດ້ານຫວຽດນາມ - ການາດາ ໃນບັນດາຂົງເຂດ: ການເມືອງແລະການທູດ; ການຄ້າແລະການລົງທຶນ; ຮ່ວມມືພັດທະນາ; ການປ້ອງກັນປະເທດ, ປ້ອງກັນຄວາມສະຫງົບ; ວັດທະນະທຳ, ການສຶກສາ; ວິທະຍາສາດ-ເຕັກໂນໂລຊີ ແລະ ການປະດິດສ້າງ; ການຄົບຄ້າສະມາຄົມລະຫວ່າງປະຊາຊົນສອງປະເທດ. ຫວຽດນາມ ແລະ ການາດາ ຈະສືບຕໍ່ຈັດຕັ້ງການຢ້ຽມຢາມຂອງການນຳຂັ້ນສູງ, ການສົນທະນາຢ່າງເປັນປະຈຳລະຫວ່າງເຈົ້າໜ້າທີ່ອະວຸໂສຂອງທັງສອງລັດຖະບານ; ຮ່ວມມືກັນຢ່າງແໜ້ນແຟ້ນໃນບັນດາສະຖາບັນພະຫຸພາຄີ, ຮັບມືກັບສິ່ງທ້າທາຍລະດັບໂລກ.
ສອງຝ່າຍເຫັນດີເປັນເອກະພາບຈະອຳນວຍຄວາມສະດວກໃຫ້ແກ່ການແລກປ່ຽນການຄ້າ, ແກ້ໄຂຢ່າງທັນການ ກ່ຽວກັບບັນດາບັນຫາທີ່ອາດຈະເກີດຂຶ້ນໃນການພົວພັນດ້ານການຄ້າ-ການລົງທຶນ ບົນຫຼັກການຮ່ວມມື, ສະເໝີພາບ, ມີຜົນປະໂຫຍດຮ່ວມກັນ. ການຮ່ວມມືພັດທະນາຂອງການາດາ ຈະຊ່ວຍໜູນຄວາມພະຍາຍາມຕ່າງໆຂອງຫວຽດນາມ ໃນການຮັບມືກັບການປ່ຽນແປງສະພາບອາກາດ, ຊຸກຍູ້ການພັດທະນາແບບຍືນຍົງ ໂດຍຜ່ານການປະຕິບັດໂຄງການພັດທະນາແບບຍືນຍົງຮອດປີ 2030 ຂອງສະຫະປະຊາຊາດ. ສອງປະເທດຕັດສິນໃຈເພີ່ມທະວີ, ອຳນວຍຄວາມສະດວກໃຫ້ແກ່ການເປີດກວ້າງການຮ່ວມມື ແລະ ແລກປ່ຽນທາງວິຊາການ, ກວມດ້ວຍການຜ່ານການສ້າງຕັ້ງການພົວພັນຄູ່ຮ່ວມ ແລະ ບັນດາໂຄງການແລກປ່ຽນນັກຮຽນນັກສຶກສາ ລະຫວ່າງບັນດາສະຖາບັນການສຶກສາຂອງສອງປະເທດ.
ຫວຽດນາມ ແລະ ການາດາ ເຫັນດີເປັນເອກະພາບຈະຊຸກຍູ້ການຮ່ວມມືໃນບັນດາຂົງເຂດເຊັ່ນ ພະລັງງານ, ເຕັກໂນໂລຊີສະອາດຍືນຍົງ, ກະສິກຳ, ອາຫານ, ເຕັກໂນໂລຊີການສື່ສານຂໍ້ມູນ, ຄົ້ນຄວ້າສິ່ງແວດລ້ອມ, ຄົ້ນຄວ້າທະເລ, ຫຼຸດຜ່ອນການກະທົບຂອງໄພທຳມະຊາດ ແລະ ຄ່ອງຕົວກັບການປ່ຽນແປງສະພາບອາກາດ. ສອງປະເທດຈະພະຍາຍາມກວ່າອີກ ໃນການຊອກຫາໂອກາດຊ້ອນແຝງ ເພື່ອຮ່ວມມືນຳກັນໃນການຄົ້ນຄວ້າພັດທະນາ, ຜັນຂະຫຍາຍ ແລະ ຫັນເປັນການຄ້າ ກ່ຽວກັບເຕັກໂນໂລຊີສະອາດ, ກ້າວໜ້າ, ຄວາມຄິດປະດິດສ້າງ ເພື່ອຮັບມືກັບສິ່ງທ້າທາຍຂອງການປ່ຽນແປງສະພາບອາກາດ. ສອງຝ່າຍຈະສົມທົບຊຸກຍູ້ບັນດາການພົວພັນເຫຼົ່ານີ້ ໂດຍຜ່ານການຮ່ວມມືໃນຫຼາຍຂົງເຂດ ແລະ ການຮ່ວມມືລະຫວ່າງທ້ອງຖິ່ນຂອງສອງປະເທດ; ສົ່ງເສີມການພົວພັນລະຫວ່າງປະຊາຊົນຂອງສອງປະເທດ ເພື່ອຊຸກຍູ້ການພົວພັນຮ່ວມມື, ມິດຕະພາບຫວຽດນາມ - ການາດາ.
ຫວຽດນາມ ແລະ ການາດາ ໄດ້ສ້າງຕັ້ງການພົວພັນທາງການທູດແຕ່ປີ 1973. ເດືອນສິງຫາ 2014, ລັດຖະມົນຕີກະຊວງການຕ່າງປະເທດຂອງສອງປະເທດໄດ້ລົງນາມໃນບົດບັນທຶກເຈຕະນາ ແນໃສ່ປັບປຸງແລະຊຸກຍຸ້ການພົວພັນລະຫວ່າງສອງປະເທດ. ເດືອນກໍລະກົດ 2017, ສອງຝ່າຍໄດ້ຈັດຕັ້ງການປຶກສາຫາລືທາງການເມືອງ ລະດັບຮອງລັດຖະມົນຕີກະຊວງການຕ່າງປະເທດ ຄັ້ງທຳອິດ (ຊຶ່ງໄດ້ຍົກລະດັບຈາກການສົນທະນານະໂຍບາຍລະດັບກົມ). ບັນດາການພົບປະຂັ້ນສູງລະຫວ່າງສອງປະເທດ, ການແລກປ່ຽນຄະນະຜູ້ແທນຂັ້ນຕ່າງໆ ໄດ້ຮັບການເພີ່ມທະວີ, ການຮ່ວມມືໃນຂົງເຂດຕ່າງໆໄດ້ຮັບການຊຸກຍູ້ ເຊັ່ນ ການເມືອງ-ການທູດ, ເສດຖະກິດ-ການຄ້າ, ການສຶກສາ-ຝຶກອົບຮົມ, ຊ່ວຍໜູນ-ພັດທະນາ,… ປະຈຸບັນ, ຫວຽດນາມເປັນຄູ່ຮ່ວມການຄ້າໃຫຍ່ທີ່ສຸດຂອງການາດາຢູ່ອາຊີຕາເວັນອອກສຽງໃຕ້, ເປັນຕະຫຼາດບຸລິມະສິດຂອງໂຄງການປະຕິບັດງານຕະຫຼາດໂລກຂອງການາດາ. ໃນຂະນະນັ້ນ ການາດາເປັນປະເທດທີ 14 ໃນ 112 ປະເທດແລະເຂດແດນ ທີ່ໄດ້ລົງທຶນຢູ່ຫວຽດນາມ ຊຶ່ງມີ 149 ໂຄງການລົງທຶນ ດ້ວຍຈຳນວນທຶນ 5,28 ຕື້ໂດລາສະຫະລັດ. ໂຄງການໃຫຍ່ຈຳນວນໜຶ່ງຄື ເຂດທ່ອງທ່ຽວ ໂຮ່ຈ່າມ (Ho Tram Tourist Resort) ຢູ່ແຂວງບ່າເຣ້ຍ-ວຸ໋ງເຕົ່າ 4,2 ຕື້ໂດລາສະຫະລັດ; ໂຄງການກໍ່ສ້າງໂຮງໝໍຢູ່ແຂວງຫາຍເຢືອງ 220 ລ້ານໂດລາສະຫະລັດ; ໂຄງການບໍລິສັດພະລັງງານລົມຈຳກັດ ຢູ່ແຂວງນິງທ້ວນ 74,4 ລ້ານໂດລາສະຫະລັດ; ບໍລິສັດປະກັນໄພ Manulife 50 ລ້ານໂດລາສະຫະລັດ... ການທີ່ຫວຽດນາມ ແລະ ການາດາ ສ້າງຕັ້ງຂອບການພົວພັນຄູ່ຮ່ວມມືຮອບດ້ານຫວຽດນາມ - ການາດາ ຢ່າງເປັນທາງການນັ້ນ ມັນເປັນຂອບກົດໝາຍທີ່ສຳຄັນ ເພື່ອໃຫ້ສອງປະເທດຍູ້ແຮງການພົວພັນຮ່ວມມືທີ່ມີຢູ່ໃນບັນດາຂົງເຂດຍິ່ງກວ່າອີກ.
ການຢ້ຽມຢາມຫວຽດນາມຢ່າງເປັນທາງການຂອງທ່ານນາຍົກລັດຖະມົນຕີການາດາ ຈັດສະຕີນ ທຣູເດີ ໃນໄອກາດກອງປະຊຸມຜູ້ນຳເສດຖະກິດ APEC ປີ 2017 ເປັນຂີດໝາຍທີ່ສຳຄັນ, ເພື່ອເສີມຂະຫຍາຍສາຍພົວພັນລະຫວ່າງສອງປະເທດ, ສ້າງພື້ນຖານເພື່ອຊຸກຍູ້ການພົວພັນມິດຕະພາບ ຮ່ວມມືລະຫວ່າງສອງປະເທດໃນເວລາຕໍ່ໜ້າ ຕາມທິດມີເນື້ອແທ້ຕົວຈິງ, ມີປະສິດທິຜົນ./.
ໂດຍ ແທັງແອັງ