ທ່ານນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ຫງວຽນຊວັນຝຸກ ເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 31 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ
ທ່ານນາຍົກລັດຖະມົນຕີ ຫງວຽນຊວັນຝຸກ ທີ່ກອງປະຊຸມ. (ພາບ: TTXVN)
ກອງປະຊຸມສຸດຍອດ ອາຊຽນ ຄັ້ງທີ 31 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ເປັນເຫດການສຳຄັນທີ່ສຸດຂອງ ອາຊຽນ ໃນປີນີ້ ໂດຍການເຂົ້າຮ່ວມຂອງການນຳຈາກ 10 ປະເທດ ອາຊຽນ ແລະ ບັນດາຄູ່ຮ່ວມມື ທີ່ເປັນບັນດາປະເທດໃຫຍ່ ບັນດາອົງການຈັດຕັ້ງສຳຄັນຢູ່ພາກພື້ນແລະສາກົນ, ລວມມີ ປະເທດ ສປ.ຈີນ, ຍີ່ປຸ່ນ, ສ.ເກົາຫຼີ, ເອເມຣີກາ, ລັດເຊຍ, ອີນເດຍ, ອົດສຕາລີ, ນູແວນເຊລັງ, ທ່ານເລຂາທິການໃຫຍ່ສະຫະປະຊາຊາດ ແລະ ປະທານສະພາ ເອີຣົບ, ເຊິ່ງກອງປະຊຸມໄດ້ຈັດຂຶ້ນແຕ່ວັນທີ 12 ຫາ 14 ພະຈິກ 2017 ທີ່ນະຄອນຫຼວງ ມານີລາ ປະເທດ ສ.ຟີລິບປີນ. ນີ້ກໍ່ແມ່ນໂອກາດອັນດຽວ ທີ່ມີການເຂົ້າຮ່ວມຢ່າງຄົບຖ້ວນ ຂອງບັນດາການນຳຂັ້ນສູງຂອງ ອາຊຽນ ແລະ ບັນດາຄູ່ຮ່ວມມື ໃນໂອກາດສະເຫຼີມສະຫຼອງ ວັນສ້າງຕັ້ງ ອາຊຽນ ຄົບຮອບ 50 ປີ.
ພ້ອມກັບພິທີການພິເສດ ເພື່ອສະເຫຼີມສະຫຼອງວັນສ້າງຕັ້ງ ອາຊຽນ ຄົບຮອບ 50 ປີ, ພິທີເປີດ ແລະ ປິດກອງປະຊຸມ, ການມອບຮັບບົດບາດເປັນປະທານ ອາຊຽນ ໃຫ້ປະເທດ ສິງກາໂປ, ໃນກອງປະຊຸມຄັ້ງນີ້ ມີການປະຊຸມຢ່າງເປັນທາງການ 10 ຄັ້ງ ເຊິ່ງລວມມີ ກອງປະຊຸມສຸດຍອດ ອາຊຽນ ຄັ້ງທີ 31, ອາຊຽນ ບວກ 3, ອາຊຽນ ບວກ 1 ກັບ ສປ.ຈີນ, ຍີ່ປຸ່ນ, ສ.ເກົາຫຼີ; ກອງປະຊຸມຂັ້ນສູງ ອາຊີຕາເວັນອອກ (EAS), ກອງປະຊຸມ ອາຊຽນ - ສ.ອາເມຣີກາ; ອາຊຽນ - ສ.ອິນເດຍ, ອາຊຽນ - ສະຫະປະຊາຊາດ, ອາຊຽນ - ການາດາ ແລະ ອາຊຽນ - ອີຢູ; ແມ່ນ້ຳຂອງ - ຍີ່ປຸ່ນ; ກອງປະຊຸມບັນດາການນຳຂອງ ສັນຍາຄູ່ຮ່ວມມືຮອບດ້ານພາກພື້ນ (RCEP); ໃນງານຮັບປະທານອາຫານທ່ຽງ ມີການເຮັດວຽກກັບ ສະພາທີ່ປຶກສາດ້ານທຸລະກິດ ອາຊຽນ ແລະ ການສົນທະນາລະຫວ່າງການນຳ ອາຊຽນ ບວກ 3 ກັບສະພາທຸລະກິດ ອາຊີຕາເວັນອອກ. ໃນຕອບບ່າຍວັນທີ 14 ພະຈິກ 2017, ທ່ານນາຍົດລັດຖະມົນຕີ ຫງວຽນຊວັນຝຸກ ກໍ່ໄດ້ພ້ອມກັບ ບັນດາການນຳຂອງ ອາຊຽນ ເຂົ້າຮ່ວມພິທີເຊັນຂໍ້ຕົກລົງ ອາຊຽນ ກ່ຽວກັບການຮັກສາ ແລະ ຊຸກຍູ້ ສິດຂອງຜູ້ອອກແຮງງານຂ້າມຊາດ.
ໃນຂອບຂອງບັນດາກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການສົນທະນາ, ວາງຂໍ້ສະເໜີ, ມາດຕະການເປັນຈຳນວນຫຼາຍ ເພື່ອປະກອບສ່ວນເຂົ້າໃນເອກະສານທີ່ສຳຄັນຫຼາຍສະບັບ ທີ່ໄດ້ຮັບຮອງ, ສ່ອງແສງເຖິງເນື້ອໃນຮ່ວມມືໃນຫຼາຍຂົງເຂດ, ເປັນຕົ້ນແມ່ນມີການພົວພັນໂດຍກົງເຖິງຜົນປະໂຫຍດ ຂອງປະຊາຊົນບັນດາປະເທດ ອາຊຽນ. ບັນດາຖະແຫຼງການ, ເອກະສານ ທີ່ໄດ້ຮັບຮອງເອົາໃນຄັ້ງນີ້ ລ້ວນແຕ່ມີລັກສະນະເປັນຈິງສູງ ແລະເປັນຫົວຂໍ້ທີ່ໄດ້ຮັບການເອົາໃຈໃສ່ຂອງປະຊາຊົນໃນເວລາທີ່ຜ່ານມາມໍ່ນີ້, ຄື ບັນຫາຮັກສາສັນຕິພາບ, ຕໍ່ສູ້ຕ້ານການກໍ່ການຮ້າຍ, ຮັບປະກັນສະພາບແວດລ້ອມຄວາມສະຫງົບ ປອດໄພ ໃຫ້ແກ່ການຮ່ວມມືເສດຖະກິດ ການຄ້າ ການລົງທຶນ, ບັນດາບັນຫາທາງສັງຄົມ, ກ່ຽວກັບສິດຂອງຜູ້ອອກແຮງງານ ແລະ ໂອກາດເຂົ້າເຖິງວຽກເຮັດງານທຳ, ຄວາມສະເໝີພາບຍິງ-ຊາຍ ແລະ ຍົກສູງສິດທິຂອງແມ່ຍິງ, ຊາວໜຸ່ມ, ບັນດາບັນຫາກ່ຽວກັບສຸຂະພາບ ຄື ແກ້ໄຂການສູ້ຄືນຢາຕ້ານເຊື້ອ, ລົບລ້າງຄວາມຂາດສານອາຫານ ແລະ ການຄຸ້ມຄອງດ້ານສາທາລະນະສຸກໃນການຮັບມືກັນການປ່ຽນແປງດິນຟ້າອາກາດ, ແລະ ສ້າງຄວາມສະດວກໃຫ້ແກ່ວິສາຫະກິດໃນຂອບການທຸລະກິດຮອບດ້ານຂອງ ອາຊຽນ.
ກ່າວປາໄສທີ່ບັນດາກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຢືນຢັນຄວາມໝາຍຂອງປີສະເຫຼີມສະຫຼອງວັນສ້າງຕັ້ງ ອາຊຽນ ຄົບຮອບ 50 ປີ, ແລະ ໄດ້ເນັ້ນວ່າ ໃນໄລຍະປະຈຸປັນ, ອາຊຽນ ຕ້ອງມີການບຸລິມະສິດປະຕິບັດ ສາມຂໍ້ຈຸດສຸມໃຈກາງດັ່ງນີ້. ທີໜຶ່ງ, ອາຊຽນ ຕ້ອງເອົາໃຈໃສ່ຜົນປະໂຫຍດຂອງປະຊາຊົນ, ພະຍາຍາມເສີມສ້າງສີສັນໃໝ່ ໂດຍຜ່ານການຊຸກຍູ້ບັນດາບັນຫາລວມ, ພິເສດແມ່ນຕັດສິນໃຈຮ່ວມກັນກໍ່ສ້າງ ອາຊຽນ ໃຫ້ມີຄວາມເຂັ້ມແຂງດ້ວຍຕົນເອງ, ເຊີດຊູຜົນປະໂຫຍດລວມຂອງປະຊາຊົນໃນປະຊາຄົມ ແລະ ພະຍາຍາມປະກອບສ່ວນເພື່ອສ້າງຜົນສຳເລັດ ທີ່ມີຊື່ລວມວ່າ ອາຊຽນ. ທີສອງ, ອາຊຽນ ໃຫ້ຄວາມສຳຄັນຍິ່ງກວ່າອີກແກ່ການກໍ່ສ້າງປະຊາຄົມເສດຖະກິດ ອາຊຽນ (AEC) ແລະ ການຂະຫຍາຍຕົວຂອງວິສາຫະກິດ ໂດຍຜ່ານການຊຸກຍູ້ການເຊື່ອມຕໍ່ເສດຖະກິດ ແລະ ການຄ້າພາຍໃນກຸ່ມ, ເພີ່ມທະວີການຊ່ວຍເຫຼືອເຊິ່ງກັນແລະກັນ ລະຫວ່າງບັນດາພື້ນຖານເສດຖະກິດໃນປະຊາຄົມ. ທີສາມ, ອາຊຽນ ຕ້ອງເສີມຂະຫຍາຍຍິ່ງກວ່າອີກ ບົດບາດເປັນໃຈກາງແລະຕຳແໜ່ງຂອງຕົນ ໃນເວທີສາກົນ, ສູ້ຊົນເພື່ອເປົ້າໝາຍຮັກສາສັນຕິພາບ ສະຖຽນລະພາບ ແລະ ຄວາມຈະເລີນໝັ້ນຄົງຢູ່ພາກພື້ນ. ບົນຈິດໃຈດັ່ງກ່າວ, ທ່າມກາງບັນຍາກາດສະເຫຼີມສະຫຼອງວັນສ້າງຕັ້ງ ອາຊຽນ ຄົບຮອບ 50 ປີ, ທ່ານນາຍົດລັດຖະມົນຕີ ຫງວຽນຊວັນຝຸກ ໄດ້ຢືນຢັນຄວາມຕັດສິນໃຈ ແລະ ຄຳໝັ້ນສັນຍາຂອງຫວຽດນາມ ຈະຮ່ວມແຮງຮ່ວມໃຈ ພ້ອມກັບບັນດາປະເທດສະມາຊິກອື່ນໆ ໃນການກໍ່ສ້າງປະຊາຄົມອາຊຽນ ໃຫ້ມີຄວາມເຂັ້ມແຂງ, ສ້າງຄວາມເຂັ້ມແຂງດ້ວຍຕົນເອງ, ມຸ່ງສູ່ປະຊາຊົນ.
ໃນການສົນທະນາທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ແບ່ງປັນທັດສະນະ, ຫຼັກໝັ້ນຂອງຫວຽດນາມ ກ່ຽວກັບບັນດາບັນຫາຂອງພາກພື້ນແລະສາກົນ ທີ່ຕ່າງຝ່າຍຕ່າງມີຄວາມເອົາໃຈໃສ່. ກ່ຽວກັບບັນຫາທະເລຕາເວັນອອກ, ບັນດາເຫດການທີ່ເກີດຂຶ້ນໃນມໍ່ໆນີ້ ສືບຕໍ່ດຶງດູດຄວາມເອົາໃຈໃສ່ຂອງຫຼາຍປະເທດ ຄູ່ຮ່ວມມື ຢູ່ໃນກອງປະຊຸມສົນທະນາຄັ້ງຕ່າງໆ. ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີໃຫ້ ບັນດາເອກະສານຂອງກອງປະຊຸມຂັ້ນສູງຄັ້ງນີ້ ຕ້ອງສ່ອງແສງຢ່າງຄົບຖ້ວນເຖິງບັນດາຫຼັກການ, ຫຼັກໝັ້ນ ຄືທີ່ໄດ້ລະບຸໄວ້ໃນ ແຈ້ງການລວມ ຂອງກອງປະຊຸມລັດຖະມົນຕີການຕ່າງປະເທດ ອາຊຽນ ຄັ້ງທີ 50, ເຊິ່ງລວມມີການຮັບປະກັນຄວາມສະຫງົບປອດໄພ, ເສລີພາບໃນການເດີນທະເລແລະເດີນອາກາດ ຢູ່ທະເລຕາເວັນອອກ, ແກ້ໄຂຂໍ້ພິພາດ ດ້ວຍສັນຕິວິທີ ບົນພື້ນຖານຂອງກົດໝາຍສາກົນ, ອະນຸສັນຍາຂອງສະຫະປະຊາຊາດວ່າດ້ວຍ ກົດໝາຍທະເລ ປີ 1982, ເຄົາລົບຢ່າງຄົບຖ້ວນ ຂະບວນການທາງກົດໝາຍແລະການທູດ, ປະຕິບັດຖະແຫຼງການ DOC ຢ່າງຄົບຖ້ວນແລະເຂັ້ມງວດ. ທ່ານນາຍົກລັດຖະມົນຕີພ້ອມກັບບັນດາການນຳໄດ້ສະແດງ ຄວາມຊົມເຊີຍ ອາຊຽນ ແລະ ສປ.ຈີນ ທີ່ໄດ້ອະນຸມັດຜ່ານຮ່າງປະມວນຂໍ້ກຳນົດການປະພຶດຂອງຝ່າຍຕ່າງໆ ຢູ່ທະເລຕາເວັນອອກ (COC) ແລະ ສະເໜີໃຫ້ມີການພົບປະສົນທະນາໂດຍໄວ ກ່ຽວກັບ COC ທີ່ມີຄວາມສາມາດເປັນໄປໄດ້ ແລະ ມີຄວາມຜູກມັດດ້ານນິຕິກຳ.
ທ່ານນາຍົກລັດຖະມົນຕີ ຫງວຽນຊວັນຝຸກ ກໍ່ໄດ້ຢືນຢັນວ່າ ຫວຽດນາມຍາມໃດກໍ່ຖືເປັນສຳຄັນຕໍ່ການພົວພັນກັບບັນດາຄູ່ຮ່ວມມື, ຕີລາຄາສູງຄຳໝັ້ນສັນຍາສືບຕໍ່ຊ່ວຍເຫຼືອ ອາຊຽນ ກໍ່ສ້າງປະຊາຄົມ ແລະ ເສີມຂະຫຍາຍຖານະບົດບາດເປັນໃຈກາງໃນໂຄງປະກອບພາກພື້ນ; ສະເໜີໃຫ້ບັນດາຄູ່ຮ່ວມມືສືບຕໍ່ເພີ່ມທະວີການຮ່ວມມືກັບ ອາຊຽນ, ຊຶ່ງເປັນພື້ນຖານເສດຖະກິດໃຫຍ່ອັນດັບທີ 6 ແລະ ກຳລັງມຸ່ງສູ່ຕຳແໜ່ງທີ 4 ຂອງໂລກໃນປີ 2025. ທ່ານນາຍົກລັດຖະມົນຕີ ກໍ່ເນັ້ນວ່າ ຫວຽດນາມຫວັງວ່າບັນດາຄູ່ຮ່ວມມືຈະສືບຕໍ່ປະກອບສ່ວນເຂົ້າໃນການຮັກສາສັນຕິພາບ ສະຖຽມລະພາບ, ຮັບປະກັນຄວາມສະຫງົບ ປອດໄພ ໃນການເດີນທະເລ ແລະ ການເດີນອາກາດ ຢູ່ທະເລຕາເວັນອອກ ບົນຈິດໃຈເຄົາລົບກົດໝາຍ, ເຄົາລົບອະນຸສັນຍາຂອງສະຫະປະຊາຊາດວ່າດ້ວຍກົດໝາຍທະເລ ປີ 1982.
ເນື່ອງໃນໂອກາດເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງນີ້, ທ່ານນາຍົກລັດຖະມົນຕີຫວຽດນາມ ໄດ້ເຂົ້າຮ່ວມການພົບລະຫວ່າງ ນາຍົກລັດຖະມົນຕີສາມປະເທດ ກຳປູເຈຍ-ລາວ-ຫວຽດນາມ; ພົບປະເຈລະຈາກັບນາຍົກລັດຖະມົນຕີ ຫຼີ ເຄີ້ສຽງ ແຫ່ງ ສປ.ຈີນ, ນາຍົກລັດຖະມົນຕີ ດີມີຕຣີ ເມກເວແດບ ແຫ່ງສະຫະພາບ ລັດເຊຍ, ນາຍົກລັດຖະມົນຕີ ໂມດີ ແຫ່ງສາທາລະນະລັດ ອິນເດຍ; ຕ້ອນຮັບເລຂາທີ່ການໃຫຍ່ ສະຫະປະຊາຊາດ, ປະທານສະພາແຫ່ງ ເອີຣົບ. ນາຍົກລັດຖະມົນຕີ ຫງວຽນຊວັນຝຸກ ພ້ອມດ້ວຍຄະນະຜູ້ແທນຂັ້ນສູງ ຫວຽດນາມ ໄດ້ມາຢ້ຽມຢາມສະຖານທູດ, ພົບປະແລະໂອ້ລົມກັນຜູ້ຕາງໜ້າຊາວຫວຽດນາມ ທີ່ກຳລັງເຮັດວຽກ, ຮ່ຳຮຽນ ແລະ ດຳລົງຊີວິດຢູ່ຟີລິບປີນ. ຄະນະຜູ້ແທນວິສາຫະກິດລາຍໃຫຍ່ຂອງຫວຽດນາມຫຼາຍຄະນະ ໄດ້ເຂົ້າຮ່ວມບັນດາການເຄື່ອນໄຫວຂອງເວທີປາໄສເຊື່ອມຕໍ່ວິສາຫະກິດ, ຫາໂອກາດເປີດກວ້າງການຮ່ວມມື.
ດ້ວຍການເຄື່ອນໄຫວພົບປະສອງຝ່າຍແລະຫຼາຍຝ່າຍ ເກືອບ 30 ຄັ້ງ, ການເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 31 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ ໄດ້ຮັບຜົນສຳເລັດຢ່າງຈົບງາມ, ໄດ້ສືບຕໍ່ສົ່ງຂ່າວກ່ຽວກັບ ອາຊຽນ ທີ່ມີ “ສັນຕິພາບ, ສະຖຽມລະພາບ ແລະ ເຂັ້ມແຂງດ້ວຍຕົນເອງ”, “ເປັນພາກພື້ນທີ່ເປີດກວ້າງກັບພາຍນອກໃນປະຊາຄົມບັນດາປະເທດທົ່ວໂລກ. ບັນດາການພົບປະສອງຝ່າຍ ຂອງຄະນະຜູ້ແທນຂັ້ນສູງຫວຽດນາມ ໄດ້ສືບຕໍ່ຊຸກຍູ້ການຮ່ວມມືຮອບດ້ານ, ແທ້ຈິງ, ມີປະສິດທິຜົນ ກັບບັນດາຄູ່ຮ່ວມມືທີ່ສຳຄັນ ແລະ ປະກອບສ່ວນເຊີດຊູຮູບພາບຂອງປະເທດຫວຽດນາມ ທີ່ປ່ຽນແປງໃໝ່, ເຂົ້າຮ່ວມການພົວພັນສາກົນຢ່າງເປັນເຈົ້າການ ຕັ້ງໜ້າ, ເປັນສະມາຊິກທີ່ມີຄວາມຮັບຜິດຊອບໃນພາກພື້ນ ແລະ ໃນໂລກ./.
ໂດຍ ບກ.
