ທ່ານ ຫງວຽນຊວັນຝຸກ ນາຍົກລັດຖະມົນຕີແຫ່ງ ສສ ຫວຽດນາມ ສຳເລັດສິ້ນສຸດການຢ້ຽມຢາມປະເທດ ນູແວນເຊລັງ ຢ່າງຈົບງາມ
ວກ. ອອນໄລ - ໃນລະຫວ່າງວັນທີ 12 - 14 ມີນາ 2018, ທ່ານນາຍົກລັດຖະມົນຕີ ຫງວຽນຊວັນຝຸກ ແລະພັນລະຍາ ພ້ອມຄະນະຜູ້ແທນຂັ້ນສູງຫວຽດນາມ ໄດ້ດຳເນີນການຢ້ຽມຢາມຢ່າງເປັນທາງການທີ່ປະເທດ ນູແວນເຊລັງ ຕາມຄຳເຊີນຂອງນາຍົກລັດຖະມົນຕີ ຈາຊິນດາ ອາເດິນ.
ໃນຂອບຂອງການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ພົບປະເຈລະຈາກັບທ່ານນາງ ຈາຊິນດາ ອາເດິນ ນາຍົກລັດຖະມົນຕີແຫ່ງ ນູແວນເຊລັງ ແລະເປັນສັກຂີພິຍານການເຊັນເອກະສານການຮ່ວມມືລະຫວ່າງສອງປະເທດ; ພົບປະຫາລືກັບທ່ານ ແຕຣເວີ ທານລາດ ປະທານສະພາແຫ່ງຊາດນູແວນເຊລັງ; ແລກປ່ຽນກັບທ່ານ ແພດຊີ ເຣດດີ ຜູ້ສຳເລັດລາຊະການນູແວນເຊລັງ; ພົບປະກັບນາຍົກເທດສະມົນຕີເມືອງ ໂອ໊ຄະແລນ; ເຂົ້າຮ່ວມເວທີປາໄສການທຸລະກິດ ຫວຽດນາມ-ນູແວເຊລັງ, ຕ້ອນຮັບຜູ້ຕາງໜ້າຂອງບາງບໍລິສັດແລະວິສາຫະກິດໃຫຍ່ ຂອງນູແວນເຊລັງ; ຢ້ຽມຢາມສະຖາບັນຄົ້ນຄວ້າພືດ - ອາຫານນູແວນເຊລັງ; ພົບປະໂອ້ລົມກັບຄູອາຈານແລະນັກຮຽນນັກສຶກສາມະຫາວິທະຍາໄລ ວາຍຄາໂຕ (Waikato), ແລກປ່ຽນຄວາມຄິດເຫັນກັບຜູ້ອຳນວຍການມະຫາວິທະຍາໄລເຕັກໂນໂລຊີ ໂອ໊ຄະແລນ ແລະພົບປະກັບຊຸມຊົນຊາວຫວຽດນາມຢູ່ນູແວນເຊລັງ…
ພິທີຕ້ອນຮັບທ່ານນາຍົກລັດຖະມົນຕີ ຫງວຽນຊວັນຝຸກ ແລະພັນລະຍາ ພ້ອມຄະນະຜູ້ແທນຂັ້ນສູງຫວຽດນາມ ໄດ້ຈັດຂຶ້ນຢ່າງເປັນທາງການແລະສົມກຽດທີ່ທຳນຽບລັດຖະບານຢູ່ ໂອ໊ຄະແລນ ໂດຍມີການຍິງປືນໃຫຍ່ 19 ນັດ ແລະພິທີຕ້ອນຮັບພິເສດຕາມປະເພນີດັ້ງເດີມຂອງຄົນມາວຣີ ເຊິ່ງເປັນຊົນເຜົ່າພື້ນເມືອງທຳອິດທີ່ຕັ້ງຖິ່ນຖານແລະດຳລົງຊີວິດຢູ່ນູແວນເຊລັງ. ນີ້ແມ່ນພິທີການຕ້ອນຮັບສູງສຸດສຳລັບຜູ້ນຳໜ້າລັດຖະບານຂອງປະເທດໜຶ່ງ.
ນາຍົກລັດຖະມົນຕີທັງສອງໄດ້ປຶກສາເຈລະຈານຳກັນຢ່າງເປີດອົກເປີດໃຈ ກົງໄປກົງມາ ແລະຈິງໃຈ, ຕີລາຄາໝາກຜົນຂອງການຮ່ວມມືໃນເວລາທີ່ຜ່ານມາ ແລະເປັນເອກະພາບກັນກ່ຽວກັບບັນດາທິດທາງຮ່ວມມືທີ່ສຳຄັນໃນສະພາບທີ່ ສັນຍາຄູ່ຮ່ວມມືຂ້າມປາຊີຟິກຮອບດ້ານແລະກ້າວໜ້າ (CPTPP) ຫາກໍ່ໄດ້ລົງນາມ ເຊິ່ງພວມເປີດໂອກາດໃໝ່ ແລະຄວາມສາມາດບົ່ມຊ້ອນທີ່ໃຫຍ່ຫຼວງ ເພື່ອເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງສອງປະເທດ. ສອງຝ່າຍເຫັນດີເປັນເອກະສັນຈະສືບຕໍ່ການແລກປ່ຽນຄະນະຜູ້ແທນຂັ້ນສູງ ແລະຂັ້ນຕ່າງໆ, ເພີ່ມທະວີການພົວພັນແລກປ່ຽນປະຊາຊົນ; ຕັ້ງໜ້າຜັນຂະຫຍາຍການຮ່ວມມືຕົວຈິງໃນຂອບໂຄງການປະຕິບັດງານກ່ຽວກັບການຮ່ວມມືດ້ານການປ້ອງກັນປະເທດ 2018-2021 ທີ່ຫາກໍ່ໄດ້ລົງນາມ. ສອງຝ່າຍເຫັນດີຈະຊຸກຍູ້ການປະຕິບັດມາດຕະການຕ່າງໆ ເພື່ອສົ່ງເສີມການລົງທຶນ ການຄ້າ, ໃນນັ້ນມີການອຳນວຍຄວາມສະດວກໃຫ້ແກ່ການແລກປ່ຽນສິນຄ້າກະສິກຳແລະສັດນ້ຳ, ສູ້ຊົນຍົກມູນຄ່າການຄ້າສອງສົ້ນຂຶ້ນສອງເທົ່າ, ບັນລຸເປົ້າໝາຍ 1,7 ຕຶ້ - 2 ຕື້ໂດລາສະຫະລັດໃນປີ 2020.
ສອງຝ່າຍເຫັນດີເປັນເອກະສັນຈະພ້ອມກັນຍູ້ແຮງການຮ່ວມມືທາງດ້ານການສຶກສາ, ຖືວ່ານີ້ເປັນຈຸດໜັກທີ່ມີຄວາມສາມາດບົ່ມຊ້ອນຫຼາຍ. ຜູ້ນຳທັງສອງເຫັນດີຈະເພີ່ມຈຳນວນນັກສຶກສາຫວຽດນາມໄປຮຽນຢູ່ ນູແວນເຊລັງ ຂຶ້ນ 30% ໃນປີ 2020 ໂດຍການສົ່ງເສີມການແລກປ່ຽນນັກສຶກສາ ແລະຫຼັກສູດຮ່ວມກັນລະຫວ່າງບັນດາມະຫາວິທະຍາໄລຂອງສອງປະເທດ. ສອງຝ່າຍໄດ້ເປັນເອກະພາບຍູ້ແຮງການຮ່ວມມືໃນບັນດາຂົງເຂດອື່ນຄື ການຮັກສາຄວາມປອດໄພແລະການປ້ອງກັນປະເທດ, ກະສິກຳ, ແຮງງານ, ການທ່ອງທ່ຽວ, ວັດທະນະທຳ… ນາຍົດລັດຖະມົນຕີທັງສອງໄດ້ຕີລາຄາສູງ ແລະຢືນຢັນສືບຕໍ່ປະສານງານ, ສະໜັບສະໜູນເຊິ່ງກັນແລະກັນ ໃນບັນດາເວທີປາໄສພາກພື້ນແລະສາກົນ, ໃນນັ້ນມີສະຫະປະຊາຊາດ, WTO, EAS, APEC, ASEM.
ນາຍົກລັດຖະມົນຕີ ນູແວນເຊລັງ ປະກາດໂຄງການ ODA ໃໝ່ສອງໂຄງການ, ລວມມີໂຄງການຮ່ວມມື 3 ປີມູນຄ່າ 1,5 ລ້ານໂດລານູແວນເຊລັງ ເພື່ອຊ່ວຍເຫຼືອຊາວກະສິກອນຫວຽດນາມໃນການຫັນການຜະລິດເປັນທັນສະໄໝ ຜະລິດອາຫານທີ່ປອດໄພແລະເພີ່ມລາຍໄດ້ ແລະໂຄງການທົດລອງພະລັງງານທົດແທນທີ່ມີມູນຄ່າ 5 ແສນໂດລານູແວນເຊລັງ ເພື່ອຊ່ວຍເຫຼືອກົມຄວບຄຸມໄຟຟ້າຫວຽດນາມ ໃນການກໍ່ສ້າງຕະຫຼາດໄຟຟ້າຂາຍສົ່ງ, ຊ່ວຍເພີ່ມປະສິດທິພາບແລະການໃຊ້ພະລັງງານທົດແທນ.
ພາຍຫຼັງການພົບປະເຈລະຈາ, ນາຍົກລັດຖະມົນຕີທັງສອງໄດ້ເປັນສັກຂີພິຍານໃນພິທີເຊັນເອກະສານການຮ່ວມມືທີ່ສຳຄັນ 3 ສະບັບລະຫວ່າງກະຊວງ ຂະແໜງການຂອງສອງປະເທດ ກ່ຽວກັບບັນດາຂົງເຂດເສດຖະກິດແລະການຄ້າ, ຄວາມປອດໄພດ້ານອາຫານແລະການຄຸ້ມຄອງຄຸນນະພາບ, ການສຶກສາແລະການຝຶກອົບຮົມ. ສອງຝ່າຍໄດ້ອອກຖະແຫຼງການຮ່ວມກ່ຽວກັບການຊຸກຍູ້ການພົວພັນຄູ່ຮ່ວມມືຮອບດ້ານ ຫັນໄປຍັງການພົວພັນຄູ່ຮ່ວມມືຍຸດທະສາດ.
ກ່າວຄຳເຫັນໃນງານລ້ຽງຂອງນາຍົກລັດຖະມົນຕີນູແວນເຊລັງຫຼັງຈາກການເຈລະຈາ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໃຊ້ຄຳສຸພາສິດຂອງຊາວ ມາວຣີ “ນາວ ແທ ຣາວຣາວ ນາຄູ ແທ ຣາວຣາວ ກາ ໂອຣາ ອາຍ ແທ ໄອວີ” ທີ່ມີຄວາມໝາຍວ່າການຮ່ວມມືແລະຄວາມພະຍາຍາມຂອງສອງຝ່າຍຈະມີຜົນດີງາມ, ເພື່ອເນັ້ນວ່າ ດ້ວຍຄວາມພະຍາຍາມແລະຄວາມຕັດສິນໃຈຂອງການນຳແລະປະຊາຊົນສອງປະເທດ, ສອງຝ່າຍຈະບັນລຸເປົ້າໝາຍຍົກລະດັບການພົວພັນສອງປະເທດຂຶ້ນເປັນຄູ່ຮ່ວມມືຍຸດທະສາດໃນເວລາທີ່ໄວທີ່ສຸດ.
ໃນຂອບຂອງການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການເຄື່ອນໄຫວສົ່ງເສີມການລົງທຶນ, ພົບປະກັບນັກທຸລະກິດທີ່ເວທີປາໄສການທຸລະກິດຫວຽດນາມ - ນູແວນເຊລັງ ແລະເປັນສັກຂີພິຍານໃນພິທີເຊັນສັນຍາການຮ່ວມມືລະຫວ່າງສອງຝ່າຍ.
ກ່າວຄຳເຫັນຕໍ່ໜ້ານັກທຸລະກິດ 300 ຄົນຂອງສອງປະເທດ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຍົກໃຫ້ເຫັນແຈ້ງວ່າ ເສດຖະກິດຂອງສອງປະເທດມີລັກສະນະເພີ່ມເຕີມໃຫ້ແກ່ກັນຫຼາຍກວ່າການແຂ່ງຂັນກັນ, ນັ້ນແມ່ນໂອກາດສຳລັບການຮ່ວມມືທີ່ເປັນຜົນປະໂຫຍດຮ່ວມກັນ, ພ້ອມກັນພັດທະນາຂອງວິສາຫະກິດສອງປະເທດ ແລະຢືນຢັນສະພາບແວດລ້ອມການລົງທຶນຢູ່ຫວຽດນາມໃນເວລາທີ່ຜ່ານມາໄດ້ຮັບການປັບປຸງໃຫ້ກ້າວໜ້າຕື່ມອີກກ້າວໜຶ່ງ, ລັດຖະບານຫວຽດນາມພວມສູ້ຊົນເຮັດໃຫ້ສະພາບແວດລ້ອມການລົງທຶນມີລັກສະນະແຂ່ງຂັນອັນດັບໜຶ່ງຂອງອາຊຽນ. “ຂ້າພະເຈົ້າຄິດວ່າການພົບປະກັນໃນມື້ນີ້ເປັນພຽງການເລີ່ມຕົ້ນ, ດ້ວຍຕະຫຼາດຂະໜາດໃຫຍ່ເຊັ່ນຫວຽດນາມ, ແນ່ນອນວ່າຈະເປັນໂອກາດທີ່ດີເພື່ອໃຫ້ສອງປະເທດຮ່ວມມືເພື່ອຜົນປະໂຫຍດຮ່ວມກັນ ແລະການພັດທະນາຮ່ວມກັນ”, ທ່ານນາຍົກລັດຖະມົນຕີເວົ້າ ແລະສະແດງຄວາມເຊື່ອໝັ້ນວ່າ ຫຼັງຈາກເວທີປາໄສນີ້, ແນ່ນອນສັນຍາໃໝ່ຫຼາຍສະບັບຈະໄດ້ຮັບການລົງນາມ ດ້ວຍຈິດໃຈທັງສອງຝ່າຍໄດ້ໄຊຊະນະ.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໄປຢ້ຽມຢາມມະຫາວິທະຍາໄລ ວາຍຄາໂຕ ເຊິ່ງເປັນມະຫາວິທະຍາໄລນຳໜ້າຂອງນູແວນເຊລັງ ແລະຖືກຈັດອັນດັບສູງໃນໂລກ. ໂອ້ລົມສົນທະນາກັບນັກຮຽນນັກສຶກສາ, ທ່ານນາຍົກລັດຖະມົນຕີຊີ້ແຈງ ຫວຽດນາມຖືວ່າການສຶກສາ-ຝຶກອົບຮົມເປັນນະໂຍບາຍແຫ່ງຊາດສູງສຸດ; ຖືຄົນເກັ່ງເປັນມິ່ງຂວັນສຳຄັນຂອງຊາດ ແລະຖືການສຶກສາ-ຝຶກອົບຮົມເປັນເສົາຄ້ຳທີ່ສຳຄັນໃນການຮ່ວມມືກັບນູແວນເຊລັງ. ທ່ານນາຍົກລັດຖະມົນຕີສະແດງຄວາມຫວັງວ່າ ນັກຮຽນນັກສຶກສາຈະປະກອບສ່ວນທີ່ສຳຄັນເຂົ້າໃນການພັດທະນາການພົວພັນຫວຽດນາມ - ນູແວນເຊລັງ, ສ້າງຄວາມຈະເລີນພັດທະນາ ແລະອະນາຄົດທີ່ສົດໃສໃຫ້ປະຊາຊົນສອງປະເທດ.
ໃນການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ພົບປະ ໂອ້ລົມກັບພະນັກງານສະຖານທູດ ແລະຜູ້ແທນຂອງຊຸມຊົນຊາວຫວຽດນາມທີ່ກຳລັງດຳລົງຊີວິດ ທຳມາຫາກິນ ຮ່ຳຮຽນຢູ່ປະເທດນູແວນເຊລັງ.
ການຢ້ຽມຢາມນູແວນເຊລັງຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສ້າງກຳລັງໜູນໃໝ່ ຊຸກຍູ້ການພົວພັນຄູ່ຮ່ວມມືຮອບດ້ານລະຫວ່າງສອງປະເທດ, ທີ່ໄດ້ສ້າງຕັ້ງຂຶ້ນໃນປີ 2009, ໃຫ້ນັບມື້ນັບເຂົ້າສູ່ລວງເລິກແລະມີປະສິດທິຜົນ, ສ້າງແຮງຜັດດັນໃຫ້ການພົວພັນລະຫວ່າງສອງປະເທດຂະຫຍາຍຕົວຂຶ້ນສູ່ລະດັບສູງໃໝ່ - ການພົວພັນຄູ່ຮ່ວມມືຍຸດທະສາດ./.
ໂດຍ ຫງວຽນດຶກ