ນາຍົກລັດຖະມົນຕີ ຫງວຽນຊວັນຝຸກ ສຳເລັດສິ້ນສຸດການຢ້ຽມຢາມປະເທດ ອົດສະຕຣາລີ ຢ່າງເປັນທານການ ແລະເຂົ້າຮ່ວມກອງປະຊຸມຂັ້ນສູງພິເສດ ອາຊຽນ-ອົດສະຕຣາລີ ຢ່າງຈົບງາມ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ມານໂກມ ເທີນບຸນ ນາຍົກລັດຖະມົນຕີອົດສະຕຣາລີ, ໃນລະຫວ່າງວັນທີ 14-18 ມີນາ 2018, ທ່ານນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນຂັ້ນສູງຫວຽດນາມ ໄດ້ດຳເນີນການຢ້ຽມຢາມປະເທດອົດສະຕຣາລີ ຢ່າງເປັນທາງການ ແລະເຂົ້າຮ່ວມກອງປະຊຸມຂັ້ນສູງພິເສດ ອາຊຽນ-ອົດສະຕຣາລີ ເຊິ່ງການເຄື່ອນໄຫວເຮັດວຽກຂອງທ່ານນາຍົກລັດຖະມົນຕີມີ 43 ກິດຈະກຳຢູ່ 2 ເມືອງໃຫຍ່ຄື ແຄນເບີຣາ ແລະຊິດນີ ຂອງອົດສະຕຣາລີ.
ນາຍົກລັດຖະມົນຕີຫວຽດນາມ ຫງວຽນຊວັນຝຸກ ແລະນາຍົກລັດຖະມົນຕີອົດສະຕຣາລີ ມານໂກມ ເທີນບຸນ ລົງນາມໃນຖະແຫຼງການຮ່ວມ ກ່ຽວກັບການສ້າງຕັ້ງຄູ່ຮ່ວມມືຍຸດທະສາດ ລະຫວ່າງສອງປະເທດ. (Ảnh: TTXVN)
ໂດຍດຳເນີນໃນສະພາບການທີ່ສັນຍາຄູ່ຮ່ວມມືຮອບດ້ານແລະກ້າວໜ້າຂ້າມປາຊີຟິກ (CPTPP) ຫາກໍ່ໄດ້ລົງນາມ ເຊິ່ງຫວຽດນາມແລະອົດສະຕຣາລີ ເປັນສະມາຊິກ, ການຢ້ຽມຢາມອົດສະຕຣາລີຢ່າງເປັນທາງການໄດ້ບັນລຸຜົນສຳເລັດທີ່ສຳຄັນ 3 ປະການຄື: ການພົວພັນລະຫວ່າງສອງປະເທດໄດ້ຍົກຂຶ້ນເປັນການພົວພັນຄູ່ຮ່ວມມືຍຸດທະສາດ, ສະເຫຼີມສະຫຼອງການພົວພັນທາງການທູດຫວຽດນາມ-ອົດສະຕຣາລີຄົບຮອບ 45 ປີ ແລະສອງຝ່າຍໄດ້ລົງນາມໃນເອກະສານ, ຂໍ້ຕົກລົງການຮ່ວມມືເກືອບ 30 ສະບັບ.
ລັດຖະສະພາສະຫະພາບອົດສະຕຣາລີໄດ້ຈັດຕັ້ງພິທີຕ້ອນຮັບນາຍົກລັດຖະມົນຕີ ຫງວຽນຊວັນຝຸກ ຢ່າງສົມກຽດ ດ້ວຍການຍິງປືນໃຫຍ່ 19 ນັດພ້ອມພິທີສູງສຸດສຳລັບຜູ້ນຳໜ້າລັດຖະບານຂອງປະເທດໜຶ່ງ.
ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການພົບປະເຈລະຈາກັບທ່ານ ມານໂກມ ເທີນບຸນ ນາຍົກລັດຖະມົນຕີອົດສະຕຣາລີ; ພົບປະກັບຜູ້ສຳເລັດລາຊະການອົດສະຕຣາລີ, ປະທານສະພາສູງ, ປະທານສະພາຕ່ຳ; ພົບປະໂອ້ລົມກັບຄູອາຈານ ແລະນັກຮຽນນັກສຶກສາມະຫາວິທະຍາໄລແຫ່ງຊາດອົດສະຕຣາລີ - ມະຫາວິທະຍາໄລຊັ້ນນຳຂອງອົດສະຕຣາລີ; ພົບປະກັບສະມາຄົມມິດຕະພາບຫວຽດນາມ-ອົດສະຕຣາລີ; ຢ້ຽມຢາມອົງການຄົ້ນຄວ້າວິທະຍາສາດແລະອຸດສາຫະກຳເຄືອຈັກກະພົບ (CSIRO) ແລະງານວາງສະແດງນະວັດຕະກຳ ທີ່ແນະນຳຫຼາຍໂຄງການຮ່ວມມືກັບຫວຽດນາມທາງດ້ານສາທາລະນະສຸກ, ກະສິກຳ, ການວາງແຜນນ້ຳ…; ພົບປະກັບນັກທຸລະກິດ ແລະປັນຍາຊົນຄົນຫວຽດນາມທີ່ດີເດັ່ນ ຢູ່ອົດສະຕຣາລີ; ເຂົ້າຮ່ວມພິທີສະເຫຼີມສະຫຼອງການສ້າງຕັ້ງສາຍພົວພັນທາງການທູດຫວຽດນາມ-ອົດສະຕຣາລີ ຄົບຮອບ 45 ປີ; ພົບປະໂອ້ລົມກັບພີ່ນ້ອງຊາວຫວຽດນາມ ຢູ່ອົດສະຕຣາລີ…
ໃນນະຄອນຊິດນີ, ເມືອງຫຼວງຂອງລັດນິວເຊົາເວນ ແລະເປັນສູນກາງທາງການເງິນແລະການຄ້າທີ່ໃຫຍ່ທີ່ສຸດຂອງອົດສະຕຣາລີ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ພົບປະກັບຜູ້ວ່າລາຊະການ ແລະຜູ້ປົກຄອງລັດນິວເຊົາເວນ, ແລະມີການເຄື່ອນໄຫວທີ່ສຳຄັນຄື ສົ່ງເສີມການລົງທຶນ, ເຂົ້າຮ່ວມເວທີປາໄສວິສາຫະກິດຫວຽດນາມ-ອົດສະຕຣາລີ ທີ່ມີການເຂົ້າຮ່ວມຂອງນັກທຸລະກິດ ນັກລົງທຶນຂອງສອງປະເທດ 400 ກວ່າຄົນ.
ທ່ານນາຍົກລັດຖະມົນຕີ ຫງວຽນຊວັນຝຸກ ແລະ ທ່ານນາຍົກລັດຖະມົນຕີ ມານໂກນ ເທີນບຸນ ໄດ້ສະແດງຄວາມພຶງພໍໃຈກ່ຽວກັບການພັດທະນາຢ່າງແຂງແຮງ ແລະມີເນື້ອແທ້ຕົວຈິງຂອງການພົວພັນຫວຽດນາມ-ອົດສະຕຣາລີ ພາຍຫຼັງ 45 ປີແຫ່ງການສ້າງຕັ້ງສາຍພົວພັນທາງການທູດ. ສອງຝ່າຍເຫັນດີເປັນເອກະສັນຈະເພີ່ມທະວີການແລກປ່ຽນຄະນະຜູ້ແທນຂັ້ນສູງແລະຂັ້ນຕ່າງໆ, ຍູ້ແຮງການແລກປ່ຽນລະຫວ່າງປະຊາຊົນ; ເຫັນດີຈະສ້າງຕັ້ງບັນດາກົນໄກຕິດຕໍ່ໃນລະດັບລັດຖະມົນຕີການຕ່າງປະເທດ, ລັດຖະມົນຕີການປ້ອງກັນປະເທດ ແລະລັດຖະມົນຕີວ່າການເສດຖະກິດ.
ສອງຝ່າຍເຫັນດີເປັນເອກະສັນຈະເພີ່ມທະວີການຮ່ວມມືໃນການຮັບມືກັບສິ່ງທ້າທາຍດ້ານຄວາມປອດໄພທົ່ວໄປ, ໃນນັ້ນມີການກໍ່ການຮ້າຍ, ອາດຊະຍາກຳຂ້າມຊາດ, ການຄ້າມະນຸດ ແລະການພາຄົນຂ້າມຊາດຜິດກົດໝາຍ.
ສອງຝ່າຍເຫັນດີເປັນເອກະສັນຈະສ້າງເງື່ອນໄຂດີສຸດເພື່ອພັດທະນາເສດຖະກິດຢ່າງກວ້າງຂວາງ ຮອບດ້ານ, ເພີ່ມຜົນປະໂຫຍດເສດຖະກິດໃນການຮ່ວມມືສອງຝ່າຍ ບົນພື້ນຖານເສີມຂະຫຍາຍລັກສະນະເພີ່ມເຕີມໃຫ້ແກ່ກັນ ແລະກຳລັງບົ່ມຊ້ອນອັນໃຫຍ່ຫຼວງຂອງພື້ນຖານເສດຖະກິດສອງປະເທດ. ຜູ້ນຳທັງສອງໄດ້ເນັ້ນໜັກເຖິງການເຊື່ອມຕໍ່ນັບມື້ນັບເລິກເຊິ່ງລະຫວ່າງປະຊາຊົນສອງປະເທດ ໂດຍຜ່ານການຮ່ວມມືທາງດ້ານການສຶກສາ, ແລກປ່ຽນວັດທະນະທຳ ແລະພັດທະນາການທ່ອງທ່ຽວ ເຊິ່ງເປັນພື້ນຖານອັນໝັ້ນຄົງຂອງການພົວພັນຄູ່ຮ່ວມມືຍຸດທະສາດໃນປະຈຸບັນ ແລະໃນອະນາຄົດ.
ຄຽງຄູ່ກັບການຮ່ວມມືທະວິພາຄີ, ສອງຝ່າຍກໍໄດ້ແລກປ່ຽນຢ່າງເລິກເຊິ່ງກ່ຽວກັບບັນດາບັນຫາສາກົນ ແລະພາກພື້ນ; ເປັນເອກະສັນຈະສືບຕໍ່ສົມທົບກັນຢ່າງແໜ້ນແຟ້ນ ແລະມີປະສິດທິຜົນໃນບັນດາເວທີປາໄສພາກພື້ນແລະສາກົນ, ໃນນັ້ນມີອາຊຽນ, EAS, APEC…
ສອງຝ່າຍເຫັນດີເປັນເອກະສັນກ່ຽວກັບຄວາມສຳຄັນຂອງການຮັບປະກັນສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ເສລີພາບໃນການເດີນເຮືອແລະການບິນ ຢູ່ທະເລຕາເວັນອອກ ກໍຄືແກ້ໄຂຂໍ້ຂັດແຍ່ງພິພາດທາງທະເລ ອີງໃສ່ກົດໝາຍສາກົນ, ໃນນັ້ນມີອະນຸສັນຍາສະຫະປະຊາສາດກ່ຽວກັບກົດໝາຍທະເລປີ 1982; ສະໜັບສະໜູນການສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ທີ່ມີລັກສະນະຜຸດມັດຕາມກົດໝາຍ ໃຫ້ສຳເລັດໂດຍໄວ.
ພາຍຫຼັງການເຈລະຈາ, ນາຍົກລັດຖະມົນຕີທັງສອງໄດ້ລົງນາມໃນຖະແຫຼງການຮ່ວມກ່ຽວກັບການສ້າງຕັ້ງການພົວພັນຄູ່ຮ່ວມມືຍຸດທະສາດ ແລະເປັນສັກຂີພິຍານການລົງນາມໃນເອກະສານທີ່ສຳຄັນ 4 ສະບັບ, ເປີດກວ້າງຂອບເຂດການຮ່ວມມືໃໝ່, ພ້ອມກັນປະຕິບັດວິໄສທັດກ່ຽວກັບພາກພື້ນທີ່ມີຄວາມໝັ້ນຄົງ, ເປີດເຜີຍ ແລະຈະເລີນຮຸ່ງເຮືອງ.
ໃນຂອບເຂດການຢ້ຽມຢາມ, ທ່ານນາຍົກລັດຖະມົນຕີ ຫງວຽນຊວັນຝຸກ ແລະຜູ້ສຳເລັດລາຊະການອົດສະຕຣາລີ ປີເຕີ ຄອສະໂກຣດ ໄດ້ຮ່ວມກັນເປັນປະທານໃນພິທີສະເຫຼີມສະຫຼອງການສ້າງຕັ້ງການພົວພັນທາງການທູດຫວຽດນາມ-ອົດສະຕຣາລີຄົບຮອບ 45 ປີ.
ທ່ານນາຍົກລັດຖະມົນຕີ ຫງວຽນຊວັນຝຸກ ກໍໄດ້ເຄື່ອນໄຫວຊຸກຍູ້ການລົງທຶນ, ເຂົ້າຮ່ວມເວທີປາໄສວິສາຫະກິດຫວຽດນາມ-ອົດສະຕຣາລີ ແລະເປັນສັກຂີພິຍານໃນພິທີມອບຮັບເອກະສານການຮ່ວມມືລະຫວ່າງສອງປະເທດ 18 ສະບັບ; ພົບປະສົນທະນາ, ປຶກສາຫາລືກັບຜູ້ນຳຂອງຫຼາຍບໍລິສັດ, ວິສາຫະກິດໃຫຍ່ຂອງອົດສະຕຣາລີ; ເປັນສັກຂີພິຍານໃນພິທີເປີດນຳໃຊ້ສຳນັກງານປະຈຳທີ່ຂອງວິທະຍຸກະຈາຍສຽງຫວຽດນາມ ຢູ່ອົດສະຕຣາລີ. ທ່ານນາຍົກລັດຖະມົນຕີຊີ້ແຈງວ່າ ການປະຕິຮູບທີ່ຫວຽດນາມໄດ້ດຳເນີນໃນຊຸມປີທີ່ຜ່ານມານັ້ນ ພວມສ້າງໂອກາດດີຫຼາຍຢ່າງເຊິ່ງນັກລົງທຶນອົດສະຕຣາລີບໍ່ຄວນປະຂ້າມ; “ຫວຽດນາມເຊີນຊວນນັກລົງທຶນອົດສະຕຣາລີເວົ້າລວນ ແລະບັນດານັກລົງທຶນທີ່ກຳລັງນັ່ງຢູ່ທີ່ນີ້ເວົ້າສະເພາະ ຈົ່ງຮີບໄປຫວຽດນາມ, ຮີບເລືອກເອົາໂອກາດທາງທຸລະກິດທີ່ພວມເປີດກວ້າງ, ຖ້າບໍ່ດັ່ງນັ້ນ ໂອກາດດັ່ງກ່າວຈະບໍ່ລໍຖ້າໃຜ ຍ້ອນຈະຖືກວິສາຫະກິດອື່ນເອົາໄປ”.
ພາຍໃຕ້ຫົວຂໍ້ “ເສີມສ້າງຄວາມໝັ້ນຄົງແລະຄວາມຈະເລີນຮູ່ງເຮືອງໃນພາກພື້ນ”, ກອງປະຊຸມຂັ້ນສູງພິເສດອາຊຽນ-ອົດສະຕຣາລີ ເປັນເວທີປາໄສທີ່ສຳຄັນເພື່ອໃຫ້ບັນດາຜູ້ນຳອາຊຽນ-ອົດສະຕຣາລີ ແລກປ່ຽນຄວາມຄິດເຫັນກ່ຽວກັບທິດທາງເພີ່ມທະວີການພົວພັນຄູ່ຮ່ວມມືຍຸດທະສາດລະຫວ່າງສອງຝ່າຍ ທີ່ໄດ້ສ້າງຕັ້ງຂຶ້ນແຕ່ປີ 2014, ພ້ອມກັນນັ້ນກໍສະແດງໃຫ້ເຫັນເຖິງຄຳໝັ້ນສັນຍາຂອງອົດສະຕຣາລີ ຕໍ່ພາກພື້ນກໍຄືຕໍ່ການພົວພັນກັບອາຊຽນ.
ກ່າວຄຳເຫັນໃນກອງປະຊຸມໄດ້ຈັດຂຶ້ນຄັ້ງທຳອິດໃນອົດສະຕຣາລີ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ເນັ້ນຢ້ຳບັນດາທິດທາງທີ່ສຳຄັນສຳລັບການພົວພັນຄູ່ຮ່ວມມືຍຸດທະສາດອາຊຽນ-ອົດສະຕຣາລີ ເຊິ່ງມີສອງເນື້ອໃນບຸລິມະສິດຄື ເພີ່ມທະວີການຮ່ວມມືທາງເສດຖະກິດ ແລະ ຮັກສາສັນຕິພາບແລະຄວາມໝັ້ນຄົງໃນພາກພື້ນ.
ທາງດ້ານເສດຖະກິດ, ທ່ານນາຍົກລັດຖະມົນຕີເນັ້ນວ່າ ສອງຝ່າຍຄວນຮັກສາການເຊື່ອມໂຍງເສດຖະກິດ ແລະເປີດປະຕູປະເທດເພື່ອພ້ອມກັນພັດທະນາຄວາມຈະເລີນຮຸ່ງເຮືອງ, ກ່ອນອື່ນໝົດແມ່ນ ຜັນຂະຫຍາຍສັນຍາການຄ້າເສລີອາຊຽນ - ອົດສະຕຣາລີ ແລະນູແວນເຊລັງ ຢ່າງມີປະສິດທິຜົນ, ສຳເລັດການເຈລະຈາສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ໂດຍໄວ, ເອົາໃຈໃສ່ເຖິງການປ່ຽນແປງໃໝ່ປະດິດສ້າງ, ຊຸກຍູ້ການເຊື່ອມຕໍ່ ແລະຊ່ວນເຫຼືອພັດທະນາວິສາຫະກິດ, ຍົກສູງມູນຄ່າເພີ່ມຂອງພື້ນຖານເສດຖະກິດອາຊຽນ ແລະອົດສະຕຣາລີ ໃນພວງພະນັງຄຸນຄ່າທົ່ວໂລກ.
ທາງດ້ານສັນຕິພາບ ຄວາມໝັ້ນຄົງ, ທ່ານນາຍົກລັດຖະມົນຕີໃຫ້ທັດສະນະວ່າ ອາຊຽນແລະອົດສະຕຣາລີ, ໃນຖານະຂອງບັນດາຄູ່ຮ່ວມມືທີ່ມີບົດບາດສຳຄັນໃນພາກພື້ນ, ຄວນຍູ້ແຮງການຮ່ວມມື, ເພີ່ມທະວີຄວາມໄວ້ວາງໃຈ, ພະຍາຍາມກໍ່ສ້າງລະບຽບພາກພື້ນທີ່ເປີດກວ້າງ ໂປ່ງໃສ ແລະ ຮັບໃໝ່, ຮັບປະກັນວ່າ ການກະທຳທັງໝົດຂອງທຸກປະເທດສອດຄ່ອງກັບກົດໝາຍສາກົນ ແລະເຄົາລົບຜົນປະໂຫຍດຮ່ວມກັນຂອງກັນແລະກັນ. ບັນດາກົນໄກຮ່ວມມືໂດຍອາຊຽນຖືບົດບາດນຳພາ ແມ່ນບັນດາເວທີປາໄສທີ່ສຳຄັນເພື່ອໃຫ້ສອງຝ່າຍພ້ອມກັນເສີມຂະຫຍາຍຄວາມພະຍາຍາມເຫຼົ່ານີ້.
ເປັນຜູ້ປະກອບຄວາມເຫັນທີ່ສຳຄັນໃນກອງປະຊຸມແຄບກ່ຽວກັບຫົວຂໍ້ການຮ່ວມມືທາງທະເລ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີການກໍ່ສ້າງບັນດາເຂດທາງທະເລ, ໃນນັ້ນມີທະເລຕາເວັນອອກ ເປັນພື້ນທີ່ແຫ່ງສັນຕິພາບ ຄວາມໝັ້ນຄົງ ຄວາມສະຫງົບປອດໄພ ເສລີພາບໃນການເດີນເຮືອການບິນ, ດັ່ງນັ້ນ ຕ້ອງເອົາການປະຕິບັດຕາມກົດໝາຍເປັນພື້ນຖານເພື່ອສ້າງຄວາມໄວ້ວາງໃຈ, ພ້ອມກັນນັ້ນກໍນຳໃຊ້ວິທີເຂົ້າເຖິງແບບຮອບດ້ານໃນການຮ່ວມມືທາງທະເລ. ການເຂົ້າຮ່ວມຢ່າງເປັນເຈົ້າການ ແລະການປະກອບສ່ວນຢ່າງຕັ້ງໜ້າຂອງຄະນະຜູ້ແທນຫວຽດນາມໃນກອງປະຊຸມ ໄດ້ຮັບຄວາມຮັບຮູ້ແລະຕີລາຄາສູງຈາກອົດສະຕຣາລີ ແລະບັນດານປະເທດອາຊຽນ.
ການຢ້ຽມຢາມອົດສະຕຣາລີຢ່າງເປັນທາງການ ແລະການເຂົ້າຮ່ວມກອງປະຊຸມຂັ້ນສູງພິເສດອາຊຽນ-ອົດສະຕຣາລີ ຂອງທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ປະກອບສ່ວນສ້າງຢຸກໃໝ່ແຫ່ງການຮ່ວມມືອາຊຽນ-ອົດສະຕຣາລີ, ພ້ອມກັນນັ້ນກໍປະກອບສ່ວນທີ່ສຳຄັນເຂົ້າໃນຜົນສຳເລັດຂອງກອງປະຊຸມຂັ້ນສູງພິເສດອາຊຽນ-ອົດສະຕຣາລີ, ເພີ່ມທະວີການຮ່ວມມື ເຊື່ອມຕໍ່ລະຫວ່າງອາຊຽນແລະອົດສະຕຣາລີໃນເວລາຕໍ່ໄປ./.
ໂດຍ ຫງວຽນດຶກ
