ປະທານາທິບໍດີ ສາທາລະນະລັດເກົາຫຼີ ມູນ ເຈອິນ ຢ້ຽມຢາມລັດຖະກິດທີ່ປະເທດຫວຽດນາມ
ວກ.ອອນໄລ - ໃນລະຫວ່າງວັນທີ 22 - 24 ມີນາ 2018, ທ່ານປະທານາທິບໍດີ ສາທາລະນະລັດເກົາຫຼີ ມູນ ເຈອິນ ແລະພັນລະຍຍາ ໄດ້ດຳເນີນການຢ້ຽມຢາມລັດຖະກິດທີ່ປະເທດຫວຽດນາມ ຕາມຄຳເຊື້ອເຊີນຂອງທ່ານປະທານປະເທດຫວຽດນາມ ເຈິ່ນດ້າຍກວາງ. ນີ້ແມ່ນການຢ້ຽມຢາມລັດຖະກິດຄັ້ງທຳອີດທີ່ປະເທດຫວຽດນາມຂອງທ່ານປະມານນາມມິບໍດີ ມູນ ເຈອິນ. ການຢ້ຽມຢາມໄດ້ບັນລຸຜົນສຳເລັດຢ່າງຈົບງາມ ດ້ວຍການອອກຖະແຫຼງການຮ່ວມຫວຽດນາມ - ສ.ເກົາຫຼີ ມຸ່ງໄປສູ່ອະນາຄົດ.
ທ່ານປະທານປະເທດຫວຽດນາມ ເຈິ່ນດ້າຍກວາງ ປຶກສາເຈລະຈາກັບ ທ່ານປະທານາທິບໍດີ ສາທາລະນະລັດເກົາຫຼີ ມູນ ເຈອິນ, ຢ້ຽມຢາມລັດຖະກິດທີ່ປະເທດຫວຽດນາມ (ພາບ: TTXVN)
ໃນການຢ້ຽມຢາມ, ທ່ານປະທານາທິບໍດີ ສ.ເກົາຫຼີ ມູນ ເຈອິນ ໄດ້ພົບປະເຈລະຈາກັບປະທານປະເທດຫວຽດນາມ ເຈິ່ນດ້າຍກວາງ, ເປັນສັກຂີພິຍານພິທີເຊັນເອກະສານການຮ່ວມມື, ພົບປະກັບນັກຂ່າວສື່ມວນຊົນ, ເຂົ້າຮ່ວມເວທີປາໄສເສດຖະກິດຫວຽດນາມ - ສ.ເກົາຫຼີ; ພົບປະຫາລືກັບເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ, ນາຍົກລັດຖະມົນຕີ ຫງຽນຊວັນຝຸກ, ປະທານສະພາແຫ່ງຊາດ ຫງວຽນທິກີມເງິນ; ພົບປະແລກປ່ຽນກັບຫົວໜ້າຄູຝຶກ ແລະທິມບານເຕະ U 23 ຫວຽດນາມ; ເຂົ້າຮ່ວມພິທີວາງສີລາລຶກກໍ່ສ້າງສະຖາບັນວິທະຍາສາດ ແລະເຕັກໂນໂລຊີ ຫວຽດນາມ - ສ.ເກົາຫຼີ. ເນື່ອງໃນໂອກາດນີ້, ທ່ານປະທານາທິບໍດີ ມູນ ເຈອິນ ໄດ້ວາງພວງມາລາໄຫວ້ອາໄລທີ່ສຸສານປະທານໂຮ່ຈີມິນ ແລະ ຢ້ຽມຊົມເຂດອະນຸສອນສະຖານປະທານໂຮ່ຈີມິນ.
ໃນບັນດາການເຈລະຈາ ພົບປະ ຫາລື, ຜູ້ນຳຂັ້ນສູງຂອງສອງປະເທດໄດ້ລົງເລິກແລກປ່ຽນຄວາມເຫັນກ່ຽວກັບທິດທາງຊຸກຍູ້ການພົວພັນຄູ່ຮ່ວມມືຍຸດທະສາດຫວຽດນາມ - ສ.ເກົາຫຼີ ໃຫ້ຂະຫຍາຍຍິ່ງກວ່າອີກ ແລະ ແລກປ່ຽນກ່ຽວກັບບັນດາບັນຫາພາກພື້ນແລະສາກົນທີ່ສອງຝ່າຍມີຄວາມສົນໃຈຮ່ວມກັນ.
ສອງຝ່າຍສະແດງຄວາມຊື່ນຊົມຍິນດີແລະຄວາມພຶງພໍໃຈຕໍ່ການພັດທະນາຢ່າງໄວວາ, ຮອບດ້ານ ແລະ ມີປະສິທິຜົນຂອງການພົວພັນລະຫວ່າງສອງປະເທດໃນທຸກຂົງເຂດ ພາຍຫຼັງ 25 ປີແຫ່ງການສ້າງຕັ້ງການພົວພັນທາງການທູດ, ໂດຍສະເພາະແມ່ນຫຼັງຈາກການສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດປີ 2009.
ສອງຝ່າຍເຫັນດີເປັນເອກະສັນຈະຮັກສາການຢ້ຽມຢາມພົບປະຂັ້ນສູງປະຈຳປີ, ເພີ່ມທະວີປະສິດທິຜົນ ແລະຄວາມຖີ່ຂອງກົນໄກແລກປ່ຽນ, ສົນທະນາ; ຂະຫຍາຍການແລກປ່ຽນ ຮ່ວມມືລະຫວ່າງບັນດາອົງການຂອງລັດຖະບານ, ສະພາແຫ່ງຊາດ, ພັກການເມືອງ ແລະທ້ອງຖິ່ນ ຂອງສອງປະເທດ ແລະໃນບັນດາຂົງເຂດທີ່ສຳຄັນເຊັ່ນ ການທູດ, ການປ້ອງກັນປະເທດ, ການຮັກສາຄວາມສະຫງົບ, ການປະຕິບັດກົດໝາຍ.
ສອງຝ່າຍເຫັນດີເປັນເອກະສັນເພີ່ມທະວີການຮ່ວມມືທາງດ້ານເສດຖະກິດການຄ້າລະຫວ່າງສອງປະເທດ, ຕັດສິນໃຈບັນລຸເປົ້າໝາຍຍົກມູນຄ່າການຄ້າສອງຝ່າຍຂຶ້ນເປັນ 100 ຕື້ໂດລາສະຫະລັດໃນປີ 2020, ໄປຄຽງຄູ່ກັບການປະຕິບັດບັນດາມາດຕະການຮັກສາຄວາມສົມດຸນທາງການຄ້າ; ສືບຕໍ່ຍົກສູງປະສິດທິຜົນການຮ່ວມມືໃນບັນດາຂົງເຂດການລົງທຶນ, ການຜະລິດ, ພະລັງງານ, ແຮງງານ, ກຳນົດວິທະຍາສາດເຕັກໂນໂລຊີເປັນປາຍແຫຼມ ເພື່ອສ້າງແຮງຜັດດັນໃໝ່ໃຫ້ແກ່ການພົວພັນຮ່ວມມືລະຫວ່າງສອງປະເທດ; ເປີດກວ້າງການຮ່ວມມືທາງດ້ານວັດທະນະທຳ, ການສຶກສາ, ການທ່ອງທ່ຽວ ແລະການພົວພັນແລກປ່ຽນປະຊາຊົນຂອງສອງປະເທດ.
ສອງຝ່າຍເຫັນດີເປັນເອກະສັນເພີ່ມທະວີການຮ່ວມມືຢ່າງແໜ້ນແຟ້ນ ແລະສະໜັບສະໜູນເຊິ່ງກັນແລະກັນຢູ່ໃນເວດທີປາໄສສາກົນຕ່າງໆ, ສົມທົບກັນຮັບມືກັບສິ່ງທ້າທາຍລະດັບໂລກ ແລະບັນດາບັນຫາຄວາມປອດໄພທີ່ບໍ່ເປັນແບບດັ້ງເດີມ; ຢືນຢັນຄວາມສຳຄັນຂອງການຮັບປະກັນສັນຕິພາບ ສະຖຽນລະພາບ ຄວາມປອດໄພ ແລະເສລີພາບໃນການເດີນເຮືອແລະການບິນ ຢູ່ເຂດທະເລຕາເວັນອອກ; ຊຸກຍູ້ການແກ້ໄຂຂໍ້ຂັດແຍ່ງພິພາດຢູ່ເຂດທະເລຕາເວັນອອກດ້ວຍສັນຕິວິທີ, ສອດຄ່ອງກັບກົດໝາຍສາກົນ…
ເນື່ອງໃນໂອກາດນີ້, ທ່ານປະທານາທິບໍດີ ສ.ເກົາຫຼີ ມູນ ເຈອິນ ແລະ ທ່ານປະທານປະເທດຫວຽດນາມ ເຈິ່ນດ້າຍກວາງ ໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳກ່ຽວກັບແຜນປະຕິບັດງານໃນຂົງເຂດຮ່ວມມືການຄ້າໄລຍະ 2018-2020 ເພື່ອບັນລຸເປົ້າໝາຍຍົກມູນຄ່າການຄ້າສອງຝ່າຍຂຶ້ນເປັນ 100 ຕື້ໂດລາສະຫະລັດ, ບົດບັນທຶກຊ່ວຍຈຳກ່ຽວກັບການຮ່ວມມືດ້ານອຸດສາຫະກຳສະໜັບສະໜູນ, ບົດບັນທຶກຊ່ວຍຈຳກ່ຽກັບການຮ່ວມມືດ້ານໂຄງສ້າງພື້ນຖານ ແລະການຄົມມະນາຄົມ, ບົດບັນທຶກຊ່ວຍຈຳກ່ຽວກັບການຮ່ວມມືກໍ່ສ້າງແລະພັດທະນາຕົວເມືອງ, ບົດບັນທຶກຊ່ວຍຈຳກ່ຽວກັບການຮ່ວມມືຮັບມືກັບການປະຕິວັດອຸດສາຫະກຳ 4.0, ບົດບັນທຶກຊ່ວຍຈຳກ່ຽວກັບການຮ່ວມມືທາງດ້ານການສົ່ງແລະຮັບແຮງງານຫວຽດນາມ - ສ.ເກົາຫຼີ; ນອກຈາກນັ້ນ, ບົດບັນທຶກຊ່ວຍຈຳການຮ່ວມມືອື່ນອີກຫຼາຍສະບັບກໍໄດ້ຮັບການລົງນາມໃນໂອກາດການຢ້ຽມຢາມ ເພື່ອເພີ່ມທະວີການຮ່ວມມືໃນຫຼາຍຂົງເຂດລະຫວ່າງສອງປະເທດ.
ສອງຝ່າຍໄດ້ອອກຖະແຫຼງການຮ່ວມຫວຽດນາມ - ສ.ເກົາຫຼີ ມຸ່ງໄປສູ່ອະນາຄົດ; ຕີລະຄາສູງການພັດທະນາຢ່າງແຂງແຮງຂອງການພົວພັນລະຫວ່າງສອງປະເທດພາຍຫຼັງ 25 ປີແຫ່ງການສ້າງຕັ້ງການພົວພັນທາງການທູດ; ຮັບຮູ້ວ່າການພົບປະແລກປ່ຽນຂັ້ນສູງໄດ້ດຳເນີນຢ່າງເປັນປະຈຳ. ດ້ວຍຄວາມພະຍາຍາມຮ່ວມກັນຂອງສອງຝ່າຍ, ການພົວພັນຮ່ວມມືໃນບັນດາຂົງເຂດການຄ້າ ການລົງທຶນ ການຮ່ວມມືພັດທະນາ ວັດທະນະທຳ ການທ່ອງທ່ຽວ ໄດ້ມີຄວາມຄືບໜ້າພັດທະນາທີ່ຍິ່ງໃຫຍ່, ການແລກປ່ຽນມິດຕະພາບລະຫວ່າງປະຊາຊົນສອງປະເທດນັບມື້ນັບຟົດຟື້ນ ສະໜິດສະໜົມ. ແຕ່ລະປະເທດໄດ້ກາຍເປັນໜຶ່ງໃນບັນດາຄູ່ຮ່ວມມືສຳຄັນອັນດັບໜຶ່ງຂອງກັນ.
ການນຳຂັ້ນສູງຂອງສອງປະເທດໄດ້ແບ່ງປັນຄວາມເຫັນວ່າ, ການພັດທະນາການພົວພັນລະຫວ່າງສອງປະເທດໄດ້ນຳຜົນປະໂຫຍດມາໃຫ້ປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ ສະຖຽນລະພາບ ຄວາມຈະເລີນພັດທະນາຂອງພາກພື້ນ ແລະຂອງໂລກ. ໃນສະພາບການໂລກທີ່ພວມມີການຜັນປ່ຽນຢ່າງໄວວາ ສັບສົນ, ບົນຈິດໃຈມຸ່ງໄປສູ່ອະນາຄົດ ແລະເຄົາລົບນັບຖືເຊິ່ງກັນແລະກັນ ເພື່ອການພັດທະນາຢ່າງໜັກແໜ້ນຂອງການພົວພັນລະຫວ່າງສອງປະເທດ, ສອງຝ່າຍຈະສືບທອດ ແລະຕິດຕາມຜົນສຳເລັດແຫ່ງການພັດທະນາການພົວພັນລະຫວ່າງສອງປະເທດໃນ 25 ປີທີ່ຜ່ານມາ, ປັບປຸງຕື່ມອີກຮາກຖານການພົວພັນຮ່ວມມືທີ່ມີຜົນປະໂຫຍດຮ່ວມກັນ, ຕັ້ງໜ້າ, ປະດິດສ້າງ, ຊຸກຍູ້ການເປີດກວ້າງ ແລະເຮັດໃຫ້ການພົວພັນຮ່ວມມືໃນບັນດາຂົງເຂດໃຫ້ເລິກເຊິ່ງກວ່າອີກ, ມຸ່ງໄປສູ່ການພັດທະນາ ແລະເຮັດໃຫ້ການພົວພັນຄູ່ຮ່ວມມືຍຸດທະສາດຫວຽດນາມ - ສ.ເກົາຫຼີ ເລິກເຊິ່ງ ແລະອຸດົມສົມບູນກວ່າອີກ.
ທ່ານປະທານາທິບໍດີ ມູນ ເຈອິນ ໄດ້ແນະນຳນະໂຍບາຍມຸ່ງໄປສູ່ທິດໃຕ້ໃໝ່ ຂອງລັດຖະບານ ສ.ເກົາຫຼີ ດ້ວຍວິໄສທັດການຮ່ວມມືຈຸດໜັກໃຈກາງຄືຄວາມຈະເລີນຮຸ່ງເຮືອງຮ່ວມກັນ, ມະນຸດເປັນໃຈກາງ, ສັນຕິພາບ; ເນັ້ນໜັກ, ໃນຂອບເຂດນັ້ນ, ສ.ເກົາຫຼີ ຈະພະຍາຍາມພັດທະນາການພົວພັນກັບຫວຽດນາມ - ປະເທດທີ່ສຳຄັນໃນອາຊຽນ ຍິ່ງກວ່າອີກ. ທ່ານປະທານປະເທດຫວຽດນາມ ເຈິ່ນດ້າຍກວາງ ສະແດງຄວາມຊົມເຊີຍນະໂຍບາຍມຸ່ງໄປສູ່ທິດໃຕ້ໃໝ່, ຢືນຢັນວ່າຫວຽດນາມ, ດ້ວຍບົດບາດເປັນຄູ່ຮ່ວມມືທີ່ສຳຄັນຂອງນະໂຍບາຍມຸ່ງໄປສູ່ທິດໃຕ້ໃໝ່ ຈະກຽມຄວາມພ້ອມເພື່ອຖືບົດບາດຕັ້ງໜ້າໃນການຊຸກຍູ້ການພົວພັນ ອາຊຽນ - ສ.ເກົາຫຼີ.
ໃນຂອບການຢ້ຽມຢາມ, ທ່ານນາງ ຫງວຽນທິຫ່ຽນ - ພັນລະຍາຂອງທ່ານປະທານປະເທດ ເຈິ່ນດ້າຍກວາງ ແລະທ່ານນາງ ກິມ ຈູງຊຸກ - ພັນລະຍາຂອງທ່ານປະທານາທິບໍດີ ມູນ ເຈອິນ ໄດ້ໄປຢ້ຽມຢາມພິພິດທະພັນຊາດພັນວິທະຍາຫວຽດນາມ, ເພື່ອຊອກຮູ້ກ່ຽວກັບວັດທະນະທຳຊົນເຜົ່າຫວຽດນາມ, ຍູ້ແຮງການແລກປ່ຽນ ແລະຮ່ວມມືທາງວັດທະນະທຳລະຫວ່າງສອງປະເທດ./.
ໂດຍ ຫງວຽນດຶກ
