ເພີ່ມທະວີການພົວພັນຄູ່ຮ່ວມມືຍຸດທະສາດ ຫວຽດນາມ-ຝຣັ່ງ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ເອມານຸເອນ ມາກຣົງ ປະທານາທິບໍດີແຫ່ງ ສາທາລະນະລັດຝຣັ່ງ, ທ່ານ ຫງວຽຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ໄດ້ດຳເນີນການຢ້ຽມຢາມປະເທດສາທາລະນະລັດຝຣັ່ງຢ່າງເປັນທາງການ ແຕ່ວັນທີ 25 ຫາ 27 ມີນາ 2018. ບັນດາການພົບປະຂັ້ນສູງໄດ້ແລກປ່ຽນຄວາມເຫັນກ່ຽວກັບບັນດາບັນຫາໃຫຍ່ຂອງສາກົນແລະພາກພື້ນ, ກໍຄືຄວາມຄືບໜ້າໃນການພົວພັນລະຫວ່າງສອງປະເທດ ເຊິ່ງມີຈຸດທີ່ໂດດເດັ່ນໃນປີ 2018 ສະເຫຼີມສະຫຼອງການສ້າງຕັ້ງສາຍພົວພັນທາງການທູດລະຫວ່າງສອງປະເທດຄົບຮອບ 45 ປີ ແລະ 5 ປີແຫ່ງການສ້າງຕັ້ງການພົວພັນຄູ່ຮ່ວມມືຍຸດທະສາດ.
ທ່ານ ຫງວຽນຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ແລະທ່ານ ເອມານຸເອນ ມາກຣົງປະທານາທິບໍດີແຫ່ງ ສາທາລະນະລັດຝຣັ່ງ. (ພາບ: TTXVN)
ໃນຂອບເຂດການຢ້ຽມຢາມ, ທ່ານເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບທ່ານປະທານາທິບໍດີຝຣັ່ງ ເອມານຸເອນ ມາກຣົງ; ພົບປະຫາລືກັບນາຍົກລັດຖະມົນຕີຝຣັ່ງ ເອດົວ ຟີລິບ; ພົບປະຫາລືກັບປະທານສະພາແຫ່ງຊາດຝຣັ່ງ ຟຣັງຊວາ ເດ ຣູເຢ; ພົບປະຫາລືກັບປະທານສະພາສູງຝຣັ່ງ ເຊຣາ ລາດຊີ; ຕ້ອນຮັບເລຂາທິການທົ່ວປະເທດພັກກອມມູນິດຝຣັ່ງ ປ.ໂລຣອງ; ເຂົ້າຮ່ວມພິມີເປີດສູນວັດທະນະທຳຫວຽດນາມແຫ່ງໃໝ່ຢູ່ປະເທດຝຣັ່ງ; ພົບປະກັບຜູ້ນຳຂອງວິສາຫະກິດທີ່ສຳຄັນຈຳນວນໜຶ່ງຂອງຝຣັ່ງ, ພົບປະກັບປັນຍາຊົນຫວຽດນາມ ແລະຊຸມຊົນຊາວຫວຽດນາມຢູ່ປະເທດຝຣັ່ງ; ຢ້ຽມຢາມນະຄອນ ຈອຍຊີ ເລີ ຣວາ.
ໃນບັນຍາກາດມິດຕະພາບ, ຈິງໃຈ ແລະເຂົ້າໃຈເຊິ່ງກັນແລະກັນ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະປະເທດ; ແລກປ່ຽກ່ຽວກັບບັນດາບັນຫາສາກົນແລະພາກພື້ນທີ່ມີຄວາມສົນໃຈຮ່ວມກັນ, ໂດຍສະເພາະກ່ຽວກັບຄວາມໝັ້ນຄົງໃນພາກພື້ນ. ສອງຝ່າຍສະແດງຄວາມຊົມເຊີຍຕໍ່ການພັດທະນາທີ່ເປັນແບບຢ່າງຂອງການພົວພັນສອງຝ່າຍໃນ 45 ປີທີ່ຜ່ານມາ, ເນັ້ນໜັກເຖິງຄວາມປະສົງຢາກພັດທະນາ ແລະເຮັດໃຫ້ການພົວພັນຄູ່ຮ່ວມມືຍຸດທະສາດຫວຽດນາມ-ຝຣັ່ງເລິກເຊິ່ງກວ່າອີກ. ສອງຝ່າຍຢືນຢັນຄວາມຕັດສິນໃຈເພີ່ມທະວີການຮ່ວມມືໃນທຸກຂົງເຂດ: ການເມືອງ, ການທູດ, ການປ້ອງກັນປະເທດ, ການຮັກສາຄວາມສະຫງົບ, ເສດຖະກິດ, ການຄ້າ, ການລົງທຶນ, ການຮັບມືກັບການປ່ຽນແປງສະພາບອາດ, ການພັດທະນາແບບຍືນຍົງ, ວິທະຍາສາດ-ເຕັກໂນໂລຊີ, ການສຶກສາ-ຝຶກອົບຮົມ, ພາສາຝຣັ່ງ, ກົດໝາຍ ແລະຄວາມຍຸຕິທຳ, ສາທາລະນະສຸກ, ການຮ່ວມມືລະຫວ່າງທ້ອງຖິ່ນ, ການພົວພັນແລກປ່ຽນປະຊາຊົນ, ວັດທະນະທຳ, ການທ່ອງທ່ຽວ.
ເພື່ອຍູ້ແຮງການຮ່ວມມືຍຸດທະສາດ, ສ້າງການຫັນປ່ຽນຢ່າງແຂງແຮງໃນການຊຸກຍູ້ແລະຍົກສູງປະສິດທິຜົນການຮ່ວມມືໃນທຸກຂົງເຂດ, ສອງຝ່າຍໄດ້ເປັນເອກະສັນເພີ່ມທະວີການພົບປະແລະພົວພັນແລກປ່ຽນລະດັບສູງ. ຊົມເຊີຍການຢ້ຽມຢາມປະເທດຝຣັ່ງຂອງທ່ານເລຂາທິການໃຫຍ່ ແລະ ຕໍ່ໄປແມ່ນການພົບປະແລະແລກປ່ຽນທະວິພາຄີລະດັບສູງໃນປີ 2018. ຊົມເຊີຍຜົນສຳເລັດຂອງການສົນທະນາທາງເສດຖະກິດປະຈຳປີລະດັບສູງ ແລະການສົນທະນານະໂຍບາຍປ້ອງກັນປະເທດທີ່ໄດ້ດຳເນີນໃນເດືອນມັງກອນປີ 2018 ທີ່ຫວຽດນາມ. ເຫັນດີເປັນເອກະສັນຈະຮັກສາບັນດາກົນໄກທະວິພາຄີ ແລະເປີດກວ້າງກົນໄກການປຶກສາຫາລື, ໃນນັ້ນມີການສົນທະນາຍຸດທະສາດຂັ້ນຮອງລັດທະມົນຕີ ລະຫວ່າງສອງປະຊວງການຕ່າງປະເທດ ແລະກະຊວງປ້ອງກັນປະເທດຂອງສອງປະເທດ; ເພີ່ມທະວີການຮ່ວມມືລະຫວ່າງອົງການສະພາແຫ່ງຊາດຂອງສອງປະເທດ.
ສອງຝ່າຍສະແດງຄວາມຕັດສິນໃຈເພີ່ມທະວີການຮ່ວມມືດ້ານເສດຖະກິດ, ການຄ້າ ແລະການລົງທຶນ, ພ້ອມກັນນັ້ນກໍສືບຕໍ່ຊຸກຍູ້ໃຫ້ວິສາຫະກິດຂອງສອງປະເທດເຂົ້າຮ່ວມໃນຕະລາດຂອງກັນແລະກັນ. ສອງຝ່າຍຢືນຢັນອີກຄັ້ງກ່ຽວກັບຄວາມປະສົງຢາກເພີ່ມທະວີການພົວພັນຄູ່ຮ່ວມມືເສດຖະກິດ ແລະອຸດສາຫະກຳໄລຍະຍາວ, ໂດຍສະເພາະໃນຂົງເຂດໂຄງສ້າງພື້ນຖານ, ການຄົມມະນາຄົມ, ພະລັງງານ ແລະອະວະກາດ. ຊຸກຍູ້ການຮ່ວມມືໃນຂົງເຂດກະສິກຳ ແລະການປະມົງ, ເຄົາລົບປະຕິບັດຕາມມາດຕະຖານສາກົນທີ່ຫວຽດນາມ ແລະຝຣັ່ງໄດ້ຍອມຮັບ. ໃຫ້ຄຳໝັ້ນສັນຍາຈະເປີດເສລີພາບ ແລະອຳນວຍຄວາມສະດວກໃຫ້ແກ່ການຄ້າແລະການລົງທຶນ, ພ້ອມກັນນັ້ນກໍໃຫ້ຄວາມສຳຄັນແກ່ບົດບາດຂອງອົງການການຄ້າໂລກ (WTO). ສອງຝ່າຍສະແດງຄວາມປະສົງຢາກເພີ່ມທະວີການຮ່ວມມືແນໃສ່ປັບປຸງກົນໄກການຄຸ້ມຄອງບໍລະຫານທົ່ວໂລກ, ຊຸກຍູ້ການເຕີບໂຕແບບຍືນຍົງ.
ສອງຝ່າຍຢືນຢັນຄວາມປະສົງເຮັດໃຫ້ການຮ່ວມມືດ້ານການປ້ອງກັນປະເທດໃນການພົວພັນຄຸ່ຮ່ວມມືຍຸດທະສາດມີຄວາມເລິກເຊິ່ງກວ່າອີກ. ບົນຈິດໃຈດັ່ງກ່າວ, ເຫັນດີເປັນເອກະສັນຈະເພີ່ມທະວີການສົນທະນາຍຸດທະສາດ ແລະການຮ່ວມມືດ້ານການປ້ອງກັນປະເທດ, ສືບຕໍ່ຮ່ວມມືໃນການຝຶກອົບຮົມນາຍທະຫານ, ເປັນຕົ້ນແມ່ນໃນຂົງເຂດຮຽນພາສາຝຣັ່ງ, ການຝຶກອົບຮົມຂັ້ນພື້ນຖານແລະລະອຽດສະເພາະ ແລະບັນດາການເຄື່ອນໄຫວຮັກສາສັນຕິພາບ.
ຫວຽດນາມແລະຝຣັ່ງເຫັນດີເປັນເອກະສັນຈະເພີ່ມທະວີການຮ່ວມມືກ່ຽວກັບສິ່ງແວດລ້ອມ ແລະການຮັບມືກັບການປ່ຽນແປງສະພາບອາກາດ, ຫວັງຈະສືບຕໍ່ສົນທະນາດ້ວຍຈິດໃຈສ້າງສັນໃນການກໍ່ສ້າງສົນທິສັນຍາກ່ຽວກັບສິ່ງແວດລ້ອມລະດັບໂລກ. ໂດຍຜ່ານການເຄື່ອນໄຫວຂອງອົງການພັດທະນາຝຣັ່ງ AFD, ຝຣັ່ງໃຫ້ຄຳໝັ້ນສັນຍາຈະສືບຕໍ່ຊ່ວຍເຫຼືອໃຫ້ຫວຽດນາມບັນລຸການເຕີບໂຕ ທາດກາກບອນ ລະດັບຕ່ຳແລະຍືນຍົງ. ສອງຝ່າຍຊົມເຊີຍການລົງນາມໃນບົດບັນທຶກຄວາມຈຳລະຫວ່າງກະຊວງຊັບພະຍາກອນແລະສິ່ງແວດລ້ອມຫວຽດນາມ ແລະ AFD ແນໃສ່ເພີ່ມທະວີການຮ່ວມມືກ່ຽວກັບການເຕີບໂຕສີຂຽວ ແລະຮັບມືກັບໄພພິບັດທາງທຳມະຊາດ ແລະການປ່ຽນແປງສະພາບອາກາດ, ພິເສດແມ່ນຜ່ານການພັດທະນາໂຄງການ Gemmes ຫວຽດນາມ ແລະການກະກຽມສ້າງຮ່າງກົດໝາຍກ່ຽວກັບການປ່ຽນແປງສະພາບອາກາດ.
ໃຫ້ບຸລິມະສິດແກ່ການຮ່ວມມືດ້ານວິທະຍາສາດ ແລະເຕັກໂນໂລຊີ, ບົນພື້ນຖານ ຈົດໝາຍເຈຕະນາ ທີ່ລົງນາມໃນວັນທີ 05 ກັນຍາ 2016 ລະຫວ່າງກະຊວງວິທະຍາສາດແລະເຕັກໂນໂລຊີຫວຽດນາມ ແລະ ກະຊວງການສອນມະຫາວິທະຍາໄລ, ຄົ້ນຄວ້າ ແລະປ່ຽນແປງໃໝ່ຂອງຝຣັ່ງ, ສອງຝ່າຍຢືນຢັນອີກຄັ້ງຄວາມປະສົງຢາກກໍ່ສ້າງຂອບການຮ່ວມມືໃໝ່ໃນຂົງເຂດວິທະຍາສາດ ແລະເຕັກໂນໂລຊີທີ່ສອດຄ່ອງກັບຜົນປະໂຫຍດຮ່ວມກັນ. ສອງຝ່າຍເນັ້ນໜັກຄວາມສຳຄັນຂອງວຽກງານຄົ້ນຄວ້າໃນຂົງເຂດການຮ່ວມມືພັດທະນາ, ຊົນເຊີຍບົດບາດຂອງສະຖາບັນຄົ້ນຄວ້າການພັດທະນາຝຣັ່ງ (IRD) ໃນຂົງເຂດນີ້. ສອງຝ່າຍຊົມເຊີນການລົງນາມໃນຂໍ້ຕົກລົງການຮ່ວມມືທາງດ້ານວິທະຍາສາດແລະເຕັກໂນໂລຊີລະຫວ່າງສະຖາບັນບັນດິດວິທະຍາສາດແລະເຕັກໂນໂລຊີຫວຽດນາມ ແລະ IRD.
ໂດຍຖືວ່າການແລກປ່ຽນວັດທະນະທຳເປັນຂົງເຂດສຳຄັນໃນການຮ່ວມມືຝຣັ່ງ-ຫວຽດນາມ, ປະກອບສ່ວນເພີ່ທະວີຄວາມເຂົ້າໃຈເຊິ່ງກັນແລະກັນ ແລະເພີ່ມທະວີຄວາມສາມັກຄີລະຫວ່າງປະຊາຊົນສອງປະເທດ, ຫວຽດນາມຊົມເຊີຍການປັບປຸງສ້ອມແປງສູນວັດທະນະທຳຫວຽດນາມຢູ່ປາຣີ, ກໍຄືການສ້າງຕັ້ງເຮືອນຝຣັ່ງຢູ່ນະຄອນໂຮ່ຈີມິນ; ຢືນຢັນຄວາມສະໜັບສະໜູນຄວາມຄິດລິເລີ່ມສົ່ງເສີມວັດທະນະທຳຫວຽດນາມຢູ່ປະເທດຝຣັ່ງ. ຂົງເຂດການທ່ອງທ່ຽວໄດ້ຮັບການຊຸກຍູ້ດ້ວຍການເຊັນຈົດໝາຍເຈຕະນາກ່ຽວກັບການຮ່ວມມືດ້ານການທ່ອງທ່ຽວລະຫວ່າງກະຊວງວັດທະນະທຳ, ກິລາແລະທ່ອງທ່ຽວຂອງຫວຽດນາມ ແລະ ກະຊວງເອີຣົບແລະການຕ່າງປະເທດຝຣັ່ງ.
ໃນການຮ່ວມມືດ້ານການສຶກສາ-ຝຶກອົບຮົມ, ສອງຝ່າຍຢືນຢັນຄວາມປະສົງຢາກຊຸກຍູ້ການນຳໃຊ້ພາສາຝຣັ່ງຢູ່ຫວຽດນາມ ແລະ ໃນເທສະພາສາຝຣັ່ງທັງໝົດ, ໂດຍສະເພາະແມ່ນຜ່ານອົງການ ຟຣັງໂກໂພນ ສາກົນ (OIF) ແລະອົງການພາສາຝຣັ່ງ. ສອງຝ່າຍເນັ້ນໜັກເຖິງລັກສະນະຮູບແບບຂອງການຮ່ວມມືໃນຂົງເຂດການສອນໃນມະຫາວິທະຍາໄລ ແລະການຄົ້ນຄວ້າ. ຕາມນັ້ນ, ສະໜັບສະໜູນໂຄງການພັດທະນາສູນຝຣັ່ງຫວຽດ ກ່ຽວກັບການຝຶກອົບຮົມແລະຄຸ້ມຄອງ (CFVG) ເປັນມະຫາວິທະຍາໄລການຄຸ້ມຄອງເອີຣົບ ແລະ ຊົມເຊີຍການເຈລະຈາແນໃສ່ຕໍ່ສັນຍາລະຫວ່າງລັດຖະບານກ່ຽວກັບມະຫາວິທະຍາໄລວິທະຍາສາດແລະເຕັກໂນໂລຊີຮ່າໂນ້ຍ. ຄຽງຂ້າງນັ້ນ, ເພີ່ມທະວີການຮ່ວມມືໃນຂົງເຂດຝຶກອົບຮົມວິຊາຊີບ ພ້ອມກັບການຫັນເປັນທັນສະໄໝຕໍ່ກັບມະຫາວິທະຍາໄລ ແລະສູນຝຶກອົບຮົມຄຸນນະພາບສູງຢູ່ຫວຽດນາມ.
ການຮ່ວມມືໃນຂົງເຂດກົດໝາຍ ແລະຄວາມຍຸດຕິທຳໄດ້ຮັບການເພີ່ມທະວີໂດຍຜ່ານຄຳໝັ້ນສັນຍາຈະພະຍາຍາມປະຕິບັດໂຄງການຮ່ວມມືໄລຍະ 2018 - 2019 ລະຫວ່າງສອງກະຊວງຍຸຕິທຳ. ການຮ່ວມມືທາງດ້ານການແພດແລະການຄົ້ນຄວ້າຢາ ໄດ້ຂະຫຍາຍຕົວຢ່າງດີງາມດ້ວຍການທີ່ສອງຝ່າຍໃຫ້ຄຳໝັ້ນສັນຍາຈະສືບຕໍ່ການແລກປ່ຽນໃນດ້ານການຝຶກອົບຮົມທ່ານໝໍ ແລະ ຊຸກຍູ້ການຮ່ວມມືດ້ານການລົງທຶນໃນຂົງເຂດເພສັດຊະກຳ. ການຮ່ວມມືລະຫວ່າງທ້ອງຖິ່ນຖືກຖືວ່າເປັນເສົາຄ້ຳຂອງການຮ່ວມມືສອງຝ່າຍ, ເພີ່ມທະວີການເຊື່ອມຕໍ່ແລະຄວາມສາມັກຄີລະຫວ່າງສອງປະເທດ ແລະປະຊາຊົນສອງປະເທດ.
ໃນການຊຸກຍູ້ການຮ່ວມມືໃນພາກພື້ນແລະໃນໄລກ, ສອງຝ່າຍເນັ້ນໜັກເຖິງຄວາມສຳຄັນຂອງການພົວພັນລະຫວ່າງອາຊຽນ ແລະສະຫະພາບເອີຣົບ (EU - ອີຢູ). ສອງຝ່າຍສະໜັບສະນູນຄວາມມານະພະຍາຍາມມຸ່ງໄປສູ່ການຍົກລະດັບການພົວພັນອາຊຽນ - ອີຢູ ຂຶ້ນເປັນການພົວພັນຄູ່ຮ່ວມມືຍຸດທະສາດ ແລະສົ່ງເສີມການເຂົ້າຮ່ວມນັບມື້ນັບຕັ້ງໜ້າຂອງອີຢູ ເຂົ້າໃນໂຄງສ້າງຍຸດທະສາດທີ່ອາຊຽນຖືບົດບາດເປັນເຈົ້າພາທາງ. ສອງຝ່າຍຫວັງວ່າຈະລົງນາມໂດຍໄວແລະໃຫ້ສັດຕະຍາບັນສັນຍາການຄ້າເສລີຫວຽດນາມແລະອີຢູ ໃນປີ 2018 ແລະນຳສັນຍາເຂົ້າສູ່ການປະຕິບັດຢ່າງໄວແລະມີປະສິດທິຜົນ.
ສອງຝ່າຍຊົມເຊີນບົດບາດຂອງອາຊຽນໃນການຊຸກຍູ້ດ້ວຍສັນຕິວິທີການຮ່ວມມືລະຫວ່າງປະເທດໃນທະເລ. ສອງຝ່າຍເນັ້ນໜັກເຖິງຄວາມສຳຄັນຂອງການເຄົາລົບນັບຖືອະນຸສັນຍາສະຫະປະຊາຊາດກ່ຽວກັບກົດໝາຍທະເລປີ 1982 ກໍຄືແກ້ໄຂຂໍ້ຂັດແຍ່ງຕ່າງໆດ້ວຍສັນຕິວິທີ, ບໍ່ໃຊ້ກຳລັງອາວຸດຫຼືນາບຂູ່ຈະໃຊ້ກຳລັງອາວຸດ. ສອງຝ່າຍຢືນຢັນຄວາມສຳຄັນຂອງການຮັກສາຄວາມສະຫງົບແລະເສລີພາບໃນການເດີນເຮືອແລະການບີນຢູ່ທຸກເຂດທະເລແລະມະຫາສະໝຸດ, ເຄົາລົບນັບຖືບັນດາຫຼັກການຂອງກົດໝາຍສາກົນ. ຫວຽດນາມ ແລະຝຣັ່ງຫວັງວ່າຈະເພີ່ມທະວີການຮ່ວມມື ແລະສົນທະນາແນໃສ່ປະກອບສ່ວນທີ່ຕັ້ງໜ້າເຂົ້າໃນການຊຸກຍູ້ການເຊື່ອມຕໍ່ຢູ່ອາຊີຕາເວັນອອກສຽງໃຕ້ ແນໃສ່ສ້າງເງື່ອນໄຂອຳນວຍຄວາມສະດວກໃຫ້ແກ່ການແລກປ່ຽນລະຫວ່າງເອີຣົບ ແລະ ອາຊີ ແລະຊຸກຍູ້ການເຕີບໂຕເສດຖະກິດຢ່າງຍືນຍົງ, ກວມລວມ./.
ໂດຍ ເຟືອງຈ່າ
