ເຄື່ອງໝາຍທີ່ສຳຄັນ ໃນການພົວພັນຄູ່ຮ່ວມມືຮອບດ້ານ ຫວຽດນາມ - ສະຫະລັດອາເມຣິກາ
ວກ.ອອນໄລ - ໂດຍຕອບສະໜອງຕາມຄຳເຊື້ອເຊີນຂອງທ່ານ ເຈິ່ນດ້າຍກວາງ ປະທານປະເທດຫວຽດນາມ, ທ່ານໂດນັນ ທຣັມ ປະທານາທິບໍດີ ສະຫະລັດອາເມຣິກາ ໄດ້ດຳເນີນການຢ້ຽມຢາມລັດຖະກິດທີ່ປະເທດຫວຽດນາມ ໃນລະຫວ່າງວັນທີ 11-12 ພະຈິກ 2017. ໃນຂອບການຢ້ຽມຢາມ, ທ່ານປະທານາທິບໍດີ ໂດນັນ ທຣັມ ໄດ້ພົບປະເຈລະຈາກັບ ທ່ານປະທານປະເທດຫວຽດນາມ ເຈິ່ນດ້າຍກວາງ ແລະ ເປັນສັກຂີພະຍານໃນພິທີເຊັນເອກະສານຕ່າງໆ, ພົບກັບສື່ມວນຊົນ; ຢ້ຽມຄຳນັບທ່ານເລຂາທິການໃຫຍ່ ຫງວຽນຝູຈ້ອງ; ພົບປະຫາລືກັບທ່ານນາຍົກລັດຖະມົນຕີ ຫງວຽນຊວັນຝຸກ.
ປະທານປະເທດຫວຽດນາມ ເຈິ່ນດ້າຍກວາງ ຕ້ອນຮັບປະທານາທິບໍດີ ສະຫະລັດອາເມຣິກາ ໂດນັນ ທຣັມ ໃນງານລ້ຽງແຫ່ງຊາດ. (ພາບ: TTXVN)
ການຢ້ຽມຢາມລັດຖະກິດທີ່ຫວຽດນາມຂອງ ປະທານາທິບໍດີ ສະຫະລັດອາເມລິກາ ໂດນັນ ທຣັມ ໄດ້ດຳເນີນໃນສະພາບການ ທີ່ການພົວພັນຄູ່ຮ່ວມມືຮອບດ້ານ ຫວຽດນາມ - ສະຫະລັດອາເມຣິກາ ສືບຕໍ່ພັດທະນາເປັນຢ່າງດີ, ພິເສດແມ່ນ ພາຍຫຼັງການຢ້ຽມຢາມສະຫະລັດອາເມຣິກາ ຢ່າງເປັນທາງການສຳເລັດຜົນ ຂອງທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໃນລະຫວ່າງວັນທີ 29-31 ພຶດສະພາ 2017. ສອງຝ່າຍສືບຕໍ່ແລກປ່ຽນຄະນະຜູ້ແທນຂັ້ນຕ່າງໆ ແລະ ໄດ້ຕັ້ງໜ້າຜັນຂະຫຍາຍບັນດາຜົນທີ່ໄດ້ຮັບແລະຂໍ້ຕົກລົງ ໃນການຢ້ຽມຢາມຂອງນາຍົກລັດຖະມົນຕີຫວຽດນາມ ຫງວຽນຊວັນຝຸກ. ເນື່ອງໃນໂອກາດການຢ້ຽມຢາມນີ້, ສອງຝ່າຍໄດ້ອອກຖະແຫຼງການຮ່ວມ ລະຫວ່າງສະຫະລັດອາເມຣິກາ ແລະ ຫວຽດນາມ.
ໃນທີ່ການພົບປະຫາລື, ສອງຝ່າຍໄດ້ຢືນຢັນອີກຄັ້ງຄຳໝັ້ນສັນຍາເພີ່ມທະວີການພົວພັນ ບົນພື້ນຖານຖະແຫຼງການຮ່ວມກ່ອນໜ້ານີ້ລະຫວ່າງສອງປະເທດ; ເຄົາລົບກົດບັດຂອງສະຫະປະຊາຊາດ ແລະ ກົດໝາຍສາກົນ; ເຄົາລົບເອກະລາດ ອະທິປະໄຕ ຜືນແຜ່ນດິນອັນຄົບຖ້ວນ ແລະ ລະບອບການເມືອງຂອງກັນແລະກັນ; ພ້ອມກັນຕີລາຄາສາຍພົວພັນຫວຽດນາມ - ສະຫະລັດອາເມຣິກາ ໃນເວລາຜ່ານມາ ຊຶ່ງໄດ້ບັນລຸຜົນສຳເລັດຕົວຈິງຫຼາຍຢ່າງ ທີ່ນຳເອົາຜົນປະໂຫຍດອັນໃຫຍ່ຫຼວງມາໃຫ້ປະຊາຊົນສອງປະເທດ. ໃນການຢ້ຽມຢາມລັດຖະກິດທີ່ຫວຽດນາມຄັ້ງນີ້ ຂອງປະທານາທິບໍດີ ໂດນັນ ທຣັມ, ສອງຝ່າຍໄດ້ອອກຖະແຫຼງການຮ່ວມ ຊຶ່ງໄດ້ເປັນເອກະພາບຈະສືບຕໍ່ພັດທະນາການພົວພັນຄູ່ຮ່ວມມືຮອບດ້ານ ຫວຽດນາມ - ສະຫະລັດອາເມຣິກາ ໃຫ້ເລິກເຊິ່ງກວ່າອີກ.
ສອງຝ່າຍໃຫ້ຄຳໝັ້ນສັນຍາຈະເພີ່ມທະວີ ແລະ ເປີດກວ້າງການພົວພັນດ້ານການຄ້າ ແລະ ການລົງທຶນສອງຝ່າຍ ໂດຍຜ່ານບັນດາກົນໄກເປັນທາງການ, ປະກອບດ້ວຍ ຂອບສັນຍາກ່ຽວກັບການຄ້າແລະການລົງທຶນ (TIFA); ໃຫ້ຄຳໝັ້ນສັນຍາ ຈະຊອກຫາວິທີແກ້ໄຂໃຫ້ແກ່ບັນດາບັນຫາທີ່ຍັງຄົງຄ້າງ ໃນຂົງເຂດການຄ້າກະສິກຳ, ໃນນັ້ນ ມີປາໜັງ (Catfish), ກຸ້ງ, ໝາກມ່ວງ; ໃຫ້ຄຳໝັ້ນສັນຍາຊຸກຍູ້ການຄ້າ, ການລົງທຶນແບບເສລີແລະຍຸຕິທຳ ໃນບັນດາຂົງເຂດບຸລິມະສິດ, ໃນນັ້ນມີການບໍລິການຊຳລະເອເລັກໂຕຣນິກ, ລົດໂອໂຕ ແລະ ການປະຕິບັດສິດທິຊັບສິນທາງປັນຍາ.
ສອງຝ່າຍຢືນຢັນຄຳໝັ້ນສັນຍາລວມຈະເພີ່ມທະວີການຮ່ວມມືທາງດ້ານການປ້ອງກັນປະເທດ ແລະ ຄວາມຕັດສິນໃຈຮັບມືກັບບັນດາສິ່ງທ້າທາຍຕໍ່ຄວາມສະຫງົບໃນພາກພື້ນ; ຢືນຢັນແຜນການດຳເນີນງານກ່ຽວກັບການຮ່ວມມືທາງດ້ານການປ້ອງກັນປະເທດຫວຽດນາມ - ສະຫະລັດອາເມຣິກາ ໄລຍະ 2018 - 2020 ແນໃສ່ປະຕິບັດບົດບັນທຶກຄວາມຈຳ ກ່ຽວກັບການເພີ່ມທະວີການຮ່ວມມືທາງດ້ານການປ້ອງກັນປະເທດສອງຝ່າຍປີ 2011 ແລະ ຖະແຫຼງການວິໄສທັດລວມກ່ຽວກັບການພົວພັນທາງດ້ານການປ້ອງກັນປະເທດປີ 2015; ຢືນຢັນອີກຄັ້ງກ່ຽວກັບຄວາມສຳຄັນຂອງການສືບຕໍ່ການຮ່ວມມືເພື່ອແກ້ໄຂຜົນກະທົບຈາກສົງຄາມ; ສະຫະລັດອາເມຣິກາໃຫ້ຄຳໝັ້ນສັນຍາຈະຮ່ວມມືກັບຫວຽດນາມ ໃນການຄົ້ນຫາຂ່າວຂອງທະຫານຫວຽດນາມທີ່ຫາຍໄປໃນສົງຄາມ; ສະໜັບສະໜູນການເພີ່ມທະວີການພົວພັນລະຫວ່າງປະຊາຊົນສອງປະເທດ.
ສອງຝ່າຍໃຫ້ຄຳໝັ້ນສັນຍາຈະເພີ່ມທະວີການພົວພັນຄູ່ຮ່ວມມືຍຸດທະສາດສະຫະລັດອາເມຣິກາ - ອາຊຽນ ບົນພື້ນຖານບັນດາຫຼັກການທີ່ລະບຸໄວ້ໃນຖະແຫຼງການ ຊັນນີແລນ 2016 (Sunnylands 2016); ເຫັນດີເປັນເອກະສັນກ່ຽວກັບຄວາມສຳຄັນ ຂອງການເຮັດໃຫ້ແຫຼມເກົາຫຼີບໍ່ມີອາວຸດນິວເຄຼຍດ້ວຍສັນຕິວິທີ. ການນຳຂອງສອງປະເທດຮຽກຮ້ອງໃຫ້ ປະຕິບັດຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນແລະມີປະສິດທິຜົນ, ແລະ ສ້າງປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC) ທີ່ມີປະສິດທິຜົນ, ມີລັກສະນະຜູດມັດທາງກົດໝາຍ ໃຫ້ສຳເລັດໂດຍໄວ. ສອງຝ່າຍກໍ່ຮຽກຮ້ອງໃຫ້ທຸກຝ່າຍທີ່ອ້າງສິດທິໃນທະເລຕາເວັນອອກ ຈົ່ງທຳຄວາມກະຈ່າງແຈ້ງ ແລະ ປະຕິບັດຄຳອ້າງສິດທິທາງທະເລຂອງຕົນ ໃຫ້ສອດຄ່ອງກັບກົດໝາຍສາກົນ, ຄືທີ່ໄດ້ສ່ອງແສງໃນອະນຸສັນຍາສະຫະປະຊາຊາດ ກ່ຽວກັບກົດໝາຍທະເລ 1982, ແລະປະຕິບັດດ້ວຍເຈຕະນາດີ ບັນດາພັນທະທາງກົດໝາຍສາກົນຂອງຕົນ ໃນຂະບວນການຄວບຄຸມແລະແກ້ໄຂຂໍ້ພິພາດຂັດແຍ່ງ.
ປີ 2005, ສະຫະລັດອາເມຣິກາ ກາຍເປັນໜຶ່ງໃນບັນດາຄູ່ຮ່ວມການຄ້າແຖວໜ້າ ຂອງຫວຽດນາມ. ແລະ ນັບແຕ່ເມື່ອສອງປະເທດສ້າງການພົວພັນຄູ່ຮ່ວມມືຮອບດ້ານ (ເດືອນກໍລະກົດ 2013) ການພົວພັນຫວຽດນາມ - ສະຫະລັດອາເມຣິກາ ໄດ້ມີການພັດທະນາເປັນຢ່າງດີໃນທຸກຂົງເຂດ. ມູນຄ່າການຄ້າສອງສົ້ນໃນຊຸມປີທີ່ຜ່ານມາມໍ່ນີ້ ໄດ້ເພີ່ມຂຶ້ນຢ່າງຕໍ່ເນື່ອງ ປະມານ 20% ຕໍ່ປີ, ປີ 2016 ບັນລຸ 53 ຕື້ໂດລາສະຫະລັດ, ໃນນັ້ນຫວຽດນາມຂາຍເກີນດຸນ 30,9 ຕື້ໂດລາສະຫະລັດ. ປະຈຸບັນ ຫວຽດນາມຢູ່ໃນອັນດັບທີ 16 ໃນຄູ່ຮ່ວມການຄ້າແຖວໜ້າຂອງສະຫະລັດອາເມຣິກາ.
ການຢ້ຽມຫາມລັດຖະກິດທີ່ຫວຽດນາມຄັ້ງນີ້ ຂອງປະທານາທິບໍດີ ໂດນັນ ທຣັມ ໄດ້ເປັນຫຼັກໝາຍທີ່ສຳຄັນໃນການພົວພັນສອງຝ່າຍ, ສ້າງກຳລັງໜູນທີ່ແຂງແຮງໃຫ້ແກ່ການພັດທະນາການພົວພັນຄູ່ຮ່ວມມືຮອບດ້ານຫວຽດນາມ - ສະຫະລັດອາເມຣິກາ ຢ່າງມີປະສິດທິຜົນ. ການຢ້ຽມຢາມຫວຽດນາມຂອງປະທານາທິບໍດີ ສະຫະລັດອາເມຣິກາ ໂດນັນ ທຣັມ ຄັ້ງນີ້ເປັນຄັ້ງທຳອິດ ແລະ ໄດ້ດຳເນີນໃນປີກຳອຳນາດທຳອິດ ຊຶ່ງສະແດງຄວາມນັບຖືຕໍ່ການພົວພັນກັບຫວຽດນາມ, ສ້າງພື້ນຖານຊຸກຍູ້ການພົວພັນຫວຽດນາມ - ສະຫະລັດອາເມຣິກາ ໃນເວລາຕໍ່ໄປ. ພ້ອມກັນນັ້ນ, ການຢ້ຽມຢາມກໍ່ໃຫ້ເຫັນວ່າ ຫວຽດນາມຕັ້ງໝັ້ນໃນການປະຕິບັດແນວທາງການຕ່າງປະເທດທີ່ເປັນເອກະລາດ, ເປັນດເຈົ້າຕົນເອງ, ຫຼາຍຮູບແບບ ຫຼາຍກ້ຳຫຼາຍຝ່າຍ, ເປັນເຈົ້າການ ຕັ້ງໜ້າເຊື່ອມໂຍງເຂົ້າກັບສາກົນ, ໃນນັ້ນໃຫ້ຄວາມສຳຄັນແກ່ການຊຸກຍູ້ການພົວພັນກັບສະຫະລັດອາເມຣິກາ ບົນພື້ນຖານເຄົາລົບລະບອບການເມືອງ, ເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງແຕ່ລະປະເທດ, ປະກອບສ່ວນເຂົ້າໃນການຮັກສາສັນຕິພາບ ສະຖຽນລະພາບ ການຮ່ວມມື ແລະ ການພັດທະນາຢູ່ໃນພາກພື້ນ ແລະ ໃນໂລກ./.
ໂດຍ ທູ່ຍລິງ
