ກອງປະຊຸມສຸດຍອດການຮ່ວມມືອະນຸພາກພື້ນແມ່ນ້ຳຂອງເປີດກວ້າງ ຄັ້ງທີ 6 ແລະ ກອງປະຊຸມຂັ້ນສູງການຮ່ວມມືເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ ຄັ້ງທີ 10
ວກ.ອອນໄລ - ພາຍຫຼັງການເຮັດວຽກໃນເວລາສາມວັນ ແຕ່ວັນທີ 29 ຫາ 31 ມີນາ 2018, ຢູ່ທີ່ຮ່າໂນ້ຍ, ກອງປະຊຸມສຸດຍອດການຮ່ວມມືອະນຸພາກພື້ນແມ່ນ້ຳຂອງເປີດກວ້າງ ຄັ້ງທີ 6 (GMS6) ແລະ ກອງປະຊຸມຂັ້ນສູງການຮ່ວມມືເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 10 (CLV10) ໄດ້ສິ້ນສຸດລົງດ້ວຍຜົນສຳເລັດທີ່ຈົບງາມ. ໂດຍເປັນປະເທດເຈົ້າພາບຈັດກອງປະຊຸມ, ຫວຽດນາມໄດ້ສ້າງຄວາມປະທັບໃຈໃຫ້ເພື່ອນມິດສາກົນກ່ຽວກັບການກະກຽມ ກໍ່ຄືການດຳເນີນວາລະການປະຊຸມຕ່າງໆ.
ບັນດາກອງປະຊຸມໄດ້ດຳເນີນພາຍໃຕ້ການເປັນປະທານຂອງທ່ານນາຍົກລັດຖະມົນຕີ ຫງວຽນຊວັນຝຸກ ພ້ອມກັບການເຂົ້າຮ່ວມຂອງ ທ່ານສົມເດັດ ເຕໂຈ ຮຸນເຊນ ນາຍົກລັດຖະມົນຕີກຳປູເຈຍ, ທ່ານ ທອງລຸນ ສີສຸລິດນາຍົກລັດຖະມົນຕີລາວ, ທ່ານ ເຮນຣີ ແວນ ທາຍໂອ ຮອງປະທານາທິບໍດີມຽນມາ, ທ່ານ ປຣາຢຸດ ຈັນໂອຊາ ນາຍົກລັດຖະມົນຕີໄທ, ທ່ານ ຫວາງອີ ສະມາຊິກສະພາແຫ່ງລັດ, ລັດຖະມົນຕີການຕ່າງປະເທດຈີນ ແລະທ່ານ ຕາເກຮີໂກ ນາກາວ ປະທານທະນາຄານພັດທະນາອາຊີ (ADB).
ເຂົ້າຮ່ວມກອງປະຊຸມຍັງມີເລຂາທິການ ອາຊຽນ ແລະ ຜູ້ອຳນວຍການທະນາຄານໂລກ (WB) ໃນຖານະແຂກພິເສດຂອງກອງປະຊຸມ. ເຂົ້າຮ່ວມກອງປະຊຸມຍັງມີຜູ້ແທນລັດຖະບານ, ທ້ອງຖິ່ນຂອງບັນດາປະເທດສະມາຊິກ GMS, ຄູ່ຮ່ວມມືທີ່ພັດທະນາ, ວົງການນັກຮຽນຮູ້, ວິສາຫະກິດ ຢູ່ໃນແລະນອກພາກພື້ນ. ບັນດາກອງປະຊຸມໄດ້ສ້າງເຄື່ອງໝາຍສຳຄັນທີ່ໃຫ້ເຫັນເຖິງຄວາມຫວັງ, ຄວາມຕັດສິນໃຈຂອງບັນດາປະເທດສະມາຊິກ ໃນການກໍ່ສ້າງພາກພື້ນແມ່ນ້ຳຂອງໃຫ້ມີສັນຕິພາບ, ຈະເລີນຮຸ່ງເຮືອງ, ພັດທະນາແບບຍືນຍົງ ແລະ ເພື່ອປະຊາຊົນ.
25 ປີແຫ່ງການຮ່ວມມື GMS
GMS ປະກອບດ້ວຍບັນດາປະເທດທີ່ມີລາຍໄດ້ປານກາງທີ່ຂະຫຍັນຂັນເຄື່ອນທີ່ສຸດຢູ່ອາຊີແລະໃນໂລກ. ໃນເວລາຫຼາຍກວ່າໜຶ່ງສ່ວນສີ່ສະຕະວັດ, ການເຕີບໂຕເສດຖະກິດສະເລ່ຍແຕ່ລະປີບັນລຸ 6,3% ແລະ ລະດັບການເຕີບໂຕສະເລ່ຍຕໍ່ຫົວຄົນແມ່ນ 5%. ການຄ້າພາຍໃນກຸ່ມເພີ່ມຂຶ້ນ 90 ເທື່ອ. ປະຊາຊົນບັນດາປະເທດໃນກຸ່ມມີຊີວິດການເປັນຢູ່ດ້ວຍຄຸນະພາບນັບມື້ນັບສູງ ແລະ ອະນຸພາກພື້ນພວມມຸ່ງໄປສູ່ການພັດທະນາທີ່ມີຄຸນນະພາບສູງ.
ການຮ່ວມມື GMS ໄດ້ຢືນຢັນເອກະລັກຂອງຕົວເອງໃນຍຸດທະສາດ 3 ຊ “ເຊື່ອມໂຍງ, ຊ່ວງເສັງ ແລະ ຊຸມຊົນ”. ຂະໜາດຂອງການຮ່ວມມືບັນລຸ 21 ກວ່າຕື້ໂດລາສະຫະລັດ ດ້ວຍຫຼາຍຮ້ອຍໂຄງການໃນຫຼາຍຂົງເຂດ, ພົ້ນເດັ່ນທີ່ສຸດແມ່ນການຮ່ວມມືເຊື່ອມໂຍງ. ອະນຸພາກພື້ນແມ່ນ້ຳຂອງເປີດກວ້າງປະຈຸບັນໄດ້ກາຍເປັນພາກພື້ນທີ່ຂະຫຍັນຂັນເຄື່ອນ, ເຊື່ອມໂຍງ ແລະມີການເຕີບໂຕເສດຖະກິດໄວທີ່ສຸດໃນໂລກ. ຜົນສຳເລັດນີ້ໃຫ້ເຫັນເຖິງຄວາມຫວັງ ແລະຄວາມຕັດສິນໃນຂອງບັນດາປະເທດ GMS ທີ່ຢາກກໍ່ສ້າງພາກພື້ນແມ່ນ້ຳຂອງໃຫ້ມີສັນຕິພາບ, ຈະເລີນຮຸ່ງເຮືອງ, ພັດທະນາແບບຍືນຍົງ ແລະ ເພື່ອປະຊາຊົນ.
ເພື່ອເສີມຂະຫຍາຍການເຂົ້າຮ່ວມຢ່າງແຂງແຮງຂອງບັນດາປະເທດຄູ່ຮ່ວມມືທີ່ພັດທະນາ ແລະ ພິເສດແມ່ນຂອງພາກສ່ວນເອກະຊົນ ເຂົ້າໃນການຮ່ວມມື GMS, ໃນກອງປະຊຸມສຸດຍອດ GMS6 ຄັ້ງນີ້, ຫວຽດນາມໄດ້ນຳສະເໜີຂໍ້ລິເລີ່ມກ່ຽວກັບການຈັດຕັ້ງເວທີປາໄສສຸດຍອດການທຸລະກິດ GMS ດ້ວຍເປົ້າໝາຍ ເພີ່ມທະວີການສົນທະນາລະຫວ່າງວິສາຫະກິດແລະລັດຖະບານ, ເຊື່ອມຕໍ່ບັນດາວິສາຫະກິດໃນພາກພື້ນແລະໃນໂລກ. ຂໍ້ລິເລີ່ມນີ້ໄດ້ຮັບຄວາມເຫັນດີເຫັນພ້ອມຂອງບັນດາປະເທດສະມາຊິກ GMS, ການສະໜັບສະໜູນຂອງບັນດາຄູ່ຮ່ວມມືຄື ທະນາຄານພັດທະນາອາຊີ, ທະນາຄານໂລກ, ອາຊຽນ... ພິເສດແມ່ນການຕອບສະໜອງກວ້າງຂວາງຂອງວົງການວິສາຫະກິດ ດ້ວຍການເຂົ້າຮ່ວມຂອງນັກທຸລະກິດໃນປະເທດແລະຕ່າງປະເທດ 2.000 ກວ່າຄົນ.
ຢູ່ທີ່ກອງປະຊຸມສຸດຍອດ GMS 6, ບັນດາການນຳ GMS ໄດ້ສົນທະນາແລະເປັນເອກະສັນວາງທິດທາງການຮ່ວມມືໃຫຍ່ໃນໄລຍະປານກາງ, ເລີ່ມຕົ້ນການກໍ່ສ້າງວິໄສທັດການຮ່ວມມືໄລຍະຍາວຂອງ GMS. ກອງປະຊຸມໄດ້ຮັບຮອງເອົາເອກະສານທີ່ສຳຄັນສາມສະບັບ: ຖະແຫຼງການຮ່ວມຂອງກອງປະຊຸມ ເຊິ່ງສະແດງຄວາມມຸ່ງໝັ້ນທາງການເມືອງ, ຄວາມຕັດສິນໃຈຂອງບັນດາປະເທດ GMS ໃນການຍົກສູງບົດບາດຂອງກົນໄກຮ່ວມມື; ແຜນການດຳເນີນງານຮ່າໂນ້ຍ 2018-2022 ເຊິ່ງກຳນົດທິດທາງບັນດາຂົງເຂດຈຸດສຸມ ແລະ ມາດຕະການຮ່ວມມືໃນປີຕໍ່ໄປ ທີ່ກວມມີການເປີດກວ້າງເຄືອຂ່າຍແລວເສດຖະກິດປະຈຸບັນ ແລະຂອບການລົງທຶນໃນອະນຸພາກພື້ນ 2022 ແລະລາຍຊື່ 227 ໂຄງການທີ່ລະອຽດ ດ້ວຍຍອດມູນຄ່າປະມານ 66 ຕື້ໂດລາສະຫະລັດ.
ສິ່ງທີ່ຄວນເອົາໃຈໃສ່ແມ່ນ ກອງປະຊຸມໄດ້ເລີ່ມດຳເນີນການກໍ່ສ້າງວິໄສທັດໄລຍະຍາວພາຍຫຼັງປີ 2022. ໃນສະພາບການທີ່ບັນດາປະເທດ GMS ຫັນໄປສູ່ໂຄງການພັດທະນາແບບຍືນຍົງ 2030 ຂອງສະຫະປະຊາຊາດ, ສະພາບການສາກົນແລະໃນພາກພື້ນມີການປ່ຽນແປງຫຼາຍຢ່າງ, ການຮ່ວມມື GMS ຕ້ອງກຳນົດວິໄສທັດໄລຍະຍາວກວ່າ ເພື່ອແນໃສ່ກໍ່ສ້າງພາກພື້ນ GMS ທີ່ມີການເຊື່ອມໂຍງແລະວັດທະນາຖາວອນ. ນັ້ນກໍ່ເປັນວິໄສທັດທີ່ຮັບປະກັນການພັດທະນາແບບຍືນຍົງ, ກົມກຽວ, ສົມດຸນຢູ່ໃນພາກພື້ນ, ພ້ອມກັນນັ້ນກໍ່ຊຸກຍູ້ການພັດທະນາແບບກວມລວມ, ຮັບປະກັນໃຫ້ປະຊາຊົນທຸກຄົນໄດ້ຊົມໃຊ້ຜົນປະໂຫຍດ ທີ່ຂະບວນໂລກາພິວັດ ແລະການປະຕິວັດເຕັກໂນໂລຊີນຳມາໃຫ້.
ໃນງານຖະແຫຼງຂ່າວຜົນການປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ເນັ້ນວ່າ ໜຶ່ງໃນບັນດາເອກະສານທີ່ກອງປະຊຸມໄດ້ຮັບຮອງເອົາຄື ແຜນການດຳເນີນງານຮ່າໂນ້ຍ 2018-2022 ມີເນື້ອໃນສົ່ງເສີມການເປີດກວ້າງແລວເສດຖະກິດ. ນອກນັ້ນ, ຂອບການລົງທຶນ 2022 ກໍ່ໄດ້ຮັບຄວາມເຫັນດີເຫັນພ້ອມຂອງບັນດາປະເທດສະມາຊິກ ດ້ວຍລາຍຊື່ 220 ກວ່າໂຄງການ, ແຜນການລົງທຶນ ແລະໜູນຊ່ວຍເຕັກນິກ ທີ່ມີມູນຄ່າທັງໝົດປະມານ 66 ຕື້ໂດລາສະຫະລັດ. ວິໄສທັດການຮ່ວມມື GMS ກໍ່ເປັນເນື້ອໃນໃຫຍ່ທີ່ໄດ້ຮັຍການຮັບຮອງຜ່ານ ດ້ວຍເນື້ອໃນຮັບປະກັນການພັດທະນາແບບຍືນຍົງ, ກົມກຽວ, ສົມດຸນ, ສົ່ງເສີມ, ຮັບປະກັນໃຫ້ປະຊາຊົນທຸກຄົນໄດ້ຮັບຜົນປະໂຫຍດຈາກຂະບວນໂລກາພິວັດ ແລະການປະຕິວັດເຕັກໂນໂລຊີ.
ການຮ່ວມມືຮອບດ້ານ ກຳປູເຈຍ-ລາວ-ຫວຽດນາມ
ກອງປະຊຸມຂັ້ນສູງການຮ່ວມມືເຂດສາມຫຼ່ຽມພັດທະນາກຳປູເຈຍ-ລາວ-ຫວຽດນາມຄັ້ງທີ 10 ໄດ້ທົບທວນສະພາບການປະຕິບັດ “ແຜນແມ່ບົດກ່ຽວກັບການພັດທະນາເສດຖະກິດ-ສັງຄົມເຂດສາມຫຼ່ຽມກຳປູເຈຍ-ລາວ-ຫວຽດນາມ ໄລຍະ 2010-2020”; ປຶກສາສົນທະນາກ່ຽວກັບທິດທາງການຮ່ວມມືໃນໄລຍະຕໍ່ໄປ, ພິເສດແມ່ນການເພີ່ມທະວີການເຊື່ອມຈອດເສດຖະກິດລະຫວ່າງສາມປະເທດ. ນີ້ກໍ່ແມ່ນຄັ້ງທຳອິດທີ່ການນຳຂັ້ນສູງຂອງບັນດາອົງການຈັດຕັ້ງສາກົນຄື ທະນາຄານພັດທະນາອາຊີ, ທະນາຄານໂລກ ແລະ ອາຊຽນ ເຂົ້າຮ່ວມກອງປະຊຸມຂັ້ນສູງກຳປູເຈຍ-ລາວ-ຫວຽດນາມ.
ກອງປະຊຸມຂັ້ນສູງ CLV10 ຮັບຮູ້ຄວາມກ້າວໜ້າໃນການຮ່ວມມືລະຫວ່າງສາມປະເທດ ທີ່ບັນລຸໄດ້ໃນຫຼາຍຂົງເຂດ ນັບແຕ່ໂຄງສ້າງພື້ນຖານເຖິງການອຳນວຍຄວາມສະດວກທາງດ້ານການຄ້າ; ເນັ້ນໜັກເຖິງຄວາມສຳຄັນຂອງການຮ່ວມມື CLV ໃນການຮັກສາສະພາບແວດລ້ອມສັນຕິພາບ, ສະຖຽນລະພາບຢູ່ໃນພາກພື້ນ, ຊ່ວຍໜູນຂະບວນວິວັດການພັດທະນາເສດຖະກິດສັງຄົມຂອງແຕ່ລະປະເທດ, ຊ່ວຍໃຫ້ 13 ແຂວງຢູ່ເຂດຊາຍແດນມີການພັດທະນາເສດຖະກິດ ແລະ ຫຼຸດຜ່ອນຊ່ອງຫວ່າງທາງດ້ານການພັດທະນາ.
ຢູ່ທີ່ກອງປະຊຸມ, ບັນດາຜູ້ນຳໄດ້ຢືນຢັນຄວາມມຸ່ງໝັ້ນທີ່ຈະສົ່ງເສີມການຮ່ວມມືຮອບດ້ານລະຫວ່າງສາມປະເທດ, ປະກອບສ່ວນກໍ່ສ້າງບັນດາພື້ນຖານເສດຖະກິດ CLV ເຊື່ອມໂຍງ, ຍືນຍົງ, ວັດທະນາຖາວອນ ແລະ ເປັນພາກສ່ວນທີ່ບໍ່ອາດຈະຂາດໄດ້ ຂອງວິໄສທັດອາຊຽນ 2025. ກອງປະຊຸມໄດ້ປຶກສາສົນທະນາກ່ຽວກັບການເປີດກວ້າງການຮ່ວມມືເຂດສາມຫຼ່ຽມພັດທະນາ CLV ແລະເປັນເອກະສັນມອບໃຫ້ບັນດາລັດຖະມົນຕີ ແລະຜູ້ຊ່ຽວຊານຄົ້ນຄວ້າກ່ຽວກັບບັນຫານີ້. ເພື່ອເລີ່ມຕົ້ນຂະບວນວິວັດນີ້, ບັນດາຜູ້ນຳໄດ້ຮັບຮອງເອົາແຜນການກວມລວມກ່ຽວກັບການເຊື່ອມຕໍ່ເສດຖະກິດສາມປະເທດ CLV ຮອດປີ 2030. ແຜນການຮ່ວມມືກວມດ້ວຍບັນດາທິດທາງໃຫຍ່ຊຸກຍູ້ການຮ່ວມມືເຊື່ອມຕໍ່ໂຄງສ້າງພື້ນຖານ, ເຊື່ອມຕໍ່ກ່ຽວກັບຂະໜົບທຳນຽນແລະເສດຖະກິດ, ແລະການພົວພັນປະຊາຊົນ.
ການທີ່ຫວຽດນາມເປັນເຈົ້າພາບຈັດກອງປະຊຸມ GMS6 ແລະ CLV10 ສືບຕໍ່ຢືນຢັນບົດບາດຖານະນັບມື້ນັບສູງຂອງປະເທດ, ພ້ອມນັ້ນກໍ່ສະແດງເຖິງບົດບາດແລະການປະກອບສ່ວນທີ່ຕັ້ງໜ້າຂອງຫວຽດນາມຕໍ່ບັນດາກົນໄກຮ່ວມມືເຊື່ອມຕໍ່ພາກພື້ນ... /.
ໂດຍ ນດ.