ວກ.ອອນໄລ - ໂດຍຕອບສະໜອງຄຳເຊື້ອເຊີນຂອງພົນເອກ ຣາອູນ ກາສະໂຕຣ ຣູດ, ເລຂາທິການທີໜຶ່ງ ຄະນະບໍລິຫານງານສູນກາງ ພັກກອມມູນິດກູບາ, ປະທານສະພາແຫ່ງລັດ ແລະຄະນະລັດຖະມົນຕີແຫ່ງ ສາທາລະນະລັດກູບາ, ສະຫາຍ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ໄດ້ນຳໜ້າຄະນະຜູ້ແທນຂັ້ນສູງຂອງພັກ-ລັດຫວຽດນາມ ດຳເນີນການຢ້ຽມຢາມລັດຖະກິດທີ່ປະເທດສາທາລະນະລັດກູບາ ໃນລະຫວ່າງວັນທີ 28 - 30 ມີນາ 2018.
ສະຫາຍ ຣາອູນ ກາສະໂຕຣ ຣູດ, ເລຂາທິການທີໜຶ່ງ ຄະນະບໍລິຫານງານສູນກາງ ພັກກອມມູນິດ ກູບາ, ປະທານສະພາແຫ່ງລັດ ແລະຄະນະລັດຖະມົນຕີ ແຫ່ງ ສາທາລະນະລັດ ກູບາ ຕ້ອນຮັບສະຫາຍເລຂາທິການໃຫຍ່ ຫງວຽນຝູຈ້ອງ. (ພາບ: TTXVN)
ໃນຂອບເຂດການຢ້ຽມຢາມ, ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບສະຫາຍພົນເອກ ຣາອູນ ກາສະໂຕຣ ຣູດ, ເລຂາທິການທີໜຶ່ງ, ປະທານສະພາແຫ່ງລັດແລະຄະນະລັດຖະມົນຕີ; ພົບປະແລກປ່ຽນກັບສະຫາຍ ໂຈເຊ ຣາມົນ ມາຈາໂດ ແວນຕູຣາ ເລຂາທິການທີສອງ ຄະນະບໍລິຫານງານສູນກາງ ພັກກອມມູນິດກູບາ; ສະຫາຍ ແອສະແຕບານ ລາໂຊ ແຮກນານແດດ ກຳມະການກົມການເມືອງ, ປະທານສະພາແຫ່ງຊາດ; ສະຫາຍ ມີແກວນ ດີອາດ ກາແນນ ເບີມູແດດ ກຳມະການກົມການເມືອງ, ຮອງປະທານທີໜຶ່ງສະພາແຫ່ງລັດແລະສະພາລັດຖະມົນຕີແຫ່ງ ສາທາລະນະລັດກູບາ.
ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ວາງພວງມາລາທີ່ອະນຸສາວະລີວິລະຊົນແຫ່ງຊາດກູບາ ໂຈເຊ ມາກຕີ ແລະທີ່ ອະນຸສາວະລີ ໂຮ່ຈີມິນ; ຢ້ຽມຢາມນະຄອນ ຊານຕີອາໂກ ເດ ກູບາ; ວາງພວງມາລາໄຫວ້ອາໄລ ທີ່ສຸສານ ໂຈເຊ ມາກຕີ ແລະ ສຸສານຜູ້ບັງຄັບບັນຊາການໃຫຍ່ການປະຕິວັດກູບາ ຟີແດນ ກາສະໂຕຣ ຣູດ; ຢ້ຽມຊົມສະຖານທີ່ປະຫວັດສາດບາງແຫ່ງ ຢູ່ນະຄອນວິລະຊົນ ຊານຕີອາໂກ ເດ ກູບາ; ຢ້ຽມຢາມໂຮງຮຽນປະຖົມສຶກສາ ຫວໍທິຖັງ; ພົບປະແລະໂອ້ລົມກັບຜູ້ຕາງໜ້າຊາວໜຸ່ມຂອງສອງປະເທດ.
ສະຫາຍເລຂາທິການໃຫຍ່ ຫງວຽນຝູຈ້ອງ ໄດ້ຮັບສັນນິຍະບັດປະລິນຍາເອກກິຕິມະສັກສາຂາວິທະຍາສາດການເມືອງ ຂອງມະຫາວິທະຍາໄລ ລາຮາບານາ, ເນື່ອງຈາກຂະບວນການອຸທິດຕົນເພື່ອວິທະຍາສາດ ແລະການປະກອບສ່ວນທີ່ສຳຄັນໃນການກໍ່ສ້າງສັງຄົມນິຍົມຢູ່ຫວຽດນາມ; ຄວາມເອົາໃຈໃສ່ແບ່ງປັນກັບກູບາ ກ່ຽວກັບບົດຮຽນທິດສະດີແລະພຶດຕິກຳ ແຫ່ງຮູບແບບການພັດທະນາຂອງຫວຽດນາມ.
ເພື່ອຈາລຶກຄຸນງາມຄວາມດີຂອງສະຫາຍ ຣາອູນ ກາສະໂຕຣ ຣູດ ໃນການປະກອບສ່ວນອັນລ້ຳຄ່າ ເຂົ້າໃນການປັບປຸງເພີ່ມທະວີການພົວພັນລະຫວ່າງສອງພັກ, ສອງປະເທດ ແລະໃຫ້ພາລະກິດການກໍ່ສ້າງສັງຄົມນິຍົມ, ພັກແລະລັດຫວຽດນາມໄດ້ຕົກລົງປະດັບຫຼຽນໄຊດາວຄຳໃຫ້ສະຫາຍ ເຊິ່ງແມ່ນຫຼຽນໄຊທີ່ສູງສົ່ງທີ່ສຸດຂອງປະເທດ ສສ. ຫວຽດນາມ. ຕາງໜ້າປະຊາຊົນກູບາ ສະຫາຍ ຣາອູນ ກາສະໂຕຣ ຣູດ ສະແດງຄວາມຂອບໃຈຢ່າງເລິກເຊິ່ງຕໍ່ລາງວັນອັນລ້ຳຄ່າດັ່ງກ່າວຂອງພັກ ລັດ ແລະປະຊາຊົນຫວຽດນາມ.
ບັນດາການພົບປະໄດ້ດຳເນີນໃນບັນຍາກາດມິດສະຫາຍອ້າຍນ້ອງ ແລະຄວາມໄວ້ວາງໃຈຊຶ່ງກັນແລະກັນ, ສອງຝ່າຍສະແດງຄວາມພຶງພໍໃຈກ່ຽວກັບການພົວພັນທີ່ຈົບງາມລະຫວ່າງສອງປະເທດ; ຢັ້ງຢືນຄວາມຕັດສິນໃຈນຳເອົາການພົວພັນລະຫວ່າງສອງປະເທດເຂົ້າສູ່ໄລຍະການພັດທະນາໃໝ່, ບົນພື້ນຖານຄວາມໄວ້ວາງໃຈທາງການເມືອງ, ເນັ້ນໜັກເຖິງການຍົກສູງປະສິດທິຜົນຂອງການຮ່ວມມືເສດຖະກິດ, ການຄ້າ, ການລົງທຶນ ແລະໃນບັນດາຂົງເຂດອື່ນ; ແຈ້ງໃຫ້ກັນຊາບກ່ຽວກັບສະພາບການຂອງແຕ່ລະພັກ, ແຕ່ລະປະເທດ ແລະ ແລກປ່ຽນສົນທະນາກ່ຽວກັບບັນດາບັນຫາສາກົນທີ່ມີຄວາມສົນໃຈຮ່ວມກັນ.
ຫວຽດນາມສະແດງຄວາມຊົມເຊີຍຢ່າງສຸດໃຈ ຕໍ່ຄວາມສຳເລັດຂອງການເລືອກຕັ້ງສະພາປະຊາຊົນແຂວງ, ກຳແພງນະຄອນ ແລະ ສະພາແຫ່ງຊາດຊຸດທີ IX, ຊຶ່ງໄດ້ຈັດຕັ້ງຂຶ້ນໃນວັນທີ 11 ມີນາ 2018; ສະແດງຄວາມເຊື່ອໝັ້ນວ່າ ພາຍໃຕ້ແສງສະຫວ່າງຂອງບັນດາມະຕິກອງປະຊຸມໃຫຍ່ຄັ້ງທີ VI, VII ຂອງພັກກອມມູນິດກູບາ, ປະເທດກູບາຈະສືບຕໍ່ປະຕິບັດຢ່າງສຳເລັດຜົນ ໃນການດຳເນີນການປັບປຸງຮູບແບບເສດຖະກິດແລະສັງຄົມສັງຄົມນິຍົມ, ເປີດໄລຍະການພັດທະນາໃໝ່ໃນການກໍ່ສ້າງປະເທດໃຫ້ມີອະທິປະໄຕ, ເອກະລາດ, ສັງຄົມນິຍົມ, ປະຊາທິປະໄຕ, ຈະເລີນຮຸ່ງເຮືອງ ແລະ ຍືນຍົງ.
ຫວຽດນາມຢືນຢັນຫຼັກໝັ້ນທີ່ສະເໝີຕົ້ນສະເໝີປາຍຂອງຕົນ ໃນການສະໜັບສະໜູນພາລະກິດທີ່ສູງສົ່ງຂອງປະຊາຊົນກູບາ ແລະການຕໍ່ສູ້ທວງໃຫ້ຍຸບເລີກໃນທັນທີແລະບໍ່ມີເງື່ອນໄຂ ຄຳສັ່ງຄວ້ຳບາດທາງເສດຖະກິດ ການຄ້າ ແລະການເງິນທີ່ໄຮ້ເຫດຜົນ ຕ້ານປະເທດກູບາ. ຫວຽດນາມຢືນຢັນອີກຄັ້ງ ການສະໜັບສະໜູນຄວາມພະຍາຍາມເຮັດໃຫ້ການພົວພັນ ກູບາ-ສະຫະລັດອາເມລິກາ ເປັນປົກກະຕິ ບົນພື້ນຖານຄວາມສະເໝີພາບ, ເຄົາລົບນັບຖືອະທິປະໄຕ ເອກະລາດ ແລະ ລະບອບການເມືອງຂອງແຕ່ລະປະເທດ. ຫວຽດນາມຕີລາຄາສູງ ສັກສີແລະບົດບາດຂອງກູບາຢູ່ອາເມລິກາລາຕິນ, ກາຣີເບ ແລະໃນເວທີສາກົນ.
ກູບາສະແດງຄວາມຊົມເຊີຍພັກ ລັດ ແລະປະຊາຊົນຫວຽດນາມ ທີ່ໄດ້ບັນລຸຜົນສຳເລັດອັນໂດດເດັ່ນ, ມີຄວາມໝາຍປະຫວັດສາດ ໃນພາລະກິດການປ່ຽນແປງໃໝ່ ໂດຍພັກກອມມູນິດຫວຽດນາມເປັນຜູ້ລິເລີ່ມ ແລະນຳພາ; ຕີລາຄາສູງນະໂຍບາຍຕ່າງປະເທດເພື່ອສັນຕິພາບ, ປົກປັກຮັກສາເອກະລາດ, ອະທິປະໄຕ ແລະການເຊື່ອມໂຍງສາກົນ, ສັກສີສາກົດ ລວມທັງການປະກອບສ່ວນຂອງຫວຽດນາມເພື່ອສັນຕິພາບ, ສະຖຽນລະພາບ ການຮ່ວມມື ແລະການພັດທະນາ ຢູ່ພາກພື້ນອາຊີຕາເວັນອອກສຽງໃຕ້, ອາຊີ-ປາຊີຟິກ ແລະໃນໂລກ.
ກູບາສະໜັບສະໜູນ ແລະເຊື່ອໝັ້ນວ່າ ຫວຽດນາມຈະສືບຕໍ່ບັນລຸຜົນສຳເລັດທີ່ໃຫຍ່ຫຼວງກວ່າອີກ ໃນພາລະກິດການສ້າງສາ ແລະປົກປັກຮັກສາປະເທດຊາດສັງຄົມນິຍົມ, ປະຕິບັດຢ່າງສຳເລັດຜົນເປົ້າໝາຍ “ປະຊາຊົນຮັ່ງມີ, ປະເທດຊາດເຂັ້ມແຂງ ມີປະຊາທິປະໄຕ ຍຸຕິທຳ ສີວິໄລ”, ກໍ່ສ້າງຫວຽດນາມໃຫ້ເປັນປະເທດອຸດສາຫະກຳຕາມທິດທັນສະໄໝ, ກໍ່ສ້າງສັງຄົມນິຍົມຢູ່ຫວຽດນາມຢ່າງສຳເລັດມີໄຊ.
ບົນພື້ນຖານຂອງຄວາມເຫັນເປັນເອກະສັນວ່າ, ໃນສະພາບການປະຈຸບັນ, ໃນເມື່ອຫວຽດນາມພວມຍູ້ແຮງການປ່ຽນແປງໃໝ່ ແລະ ກູບາພວມຕັ້ງໜ້າຜັນຂະຫຍາຍແນວທາງປັບປຸງຮູບແບບພັດທະນາເສດຖະກິດ ສັງຄົມສັງຄົມນິຍົມນັ້ນ, ສອງຝ່າຍຄວນຮັກສາການພົບປະແລກປ່ຽນຢ່າງເປັນປະຈຳໃນທຸກລະດັບ. ສອງຝ່າຍຄວນຮັກສາການແລກປ່ຽນກ່ຽວກັບທິດສະດີ-ພຶດຕິກຳ, ແບ່ງປັນບົດຮຽນກ່ຽວກັບວຽກງານນຳພາລັດ, ຄຸ້ມຄອງເສດຖະກິດ-ສັງຄົມ, ວຽກງານກໍ່ສ້າງພັກ ແລະສາຍພົວພັນລະຫວ່າງພັກ ກັບອົງການຈັດຕັ້ງຊາວໜຸ່ມ; ສືບຕໍ່ການຮ່ວມມືຢ່າງແໜ້ນແຟ້ນທາງດ້ານການປ້ອງກັນປະເທດ, ການປ້ອງກັນຄວາມສະຫງົບ ແລະ ການຕ່າງປະເທດ.
ສອງຝ່າຍເນັ້ນເຖິງຄວາມສຳຄັນຂອງບັນດາກົນໄກຮ່ວມມືສອງຝ່າຍເຊັ່ນ: ຂໍ້ຕົກລົງຄວາມຮ່ວມມືແລະການແລກປ່ຽນ ລະຫວ່າງພັກກອມມູນິດຫວຽດນາມ ແລະ ພັກກອມມູນິດກູບາ; ກອງປະຊຸມສຳມະນາທິດສະດີລະຫວ່າງສອງພັກ; ຄະນະກຳມະການລະຫວ່າງລັດຖະບານກ່ຽວກັບການຮ່ວມມືເສດຖະກິດ ວິທະຍາສາດ ແລະເຕັກນິກ; ການປຶກສາທາງການເມືອງລະຫວ່າງສອງກະຊວງຕ່າງປະເທດ; ການພົວພັນລະຫວ່າງກະຊວງປ້ອງກັນປະເທດຫວຽດນາມ ແລະ ກະຊວງບັນດາກຳລັງປະຕິວັດກູບາ; ການແລກປ່ຽນກ່ຽວກັບຮູບແບບເສດຖະກິດ-ສັງຄົມຂອງສອງປະເທດ. ສອງຝ່າຍສະແດງຄວາມຕັດສິນໃຈເພີ່ມທະວີປະສິດທິພາບ ແລະປະສິດທິຜົນຂອງກົນໄກເຫຼົ່ານີ້.
ສອງຝ່າຍເນັ້ນເຖິງຄວາມສຳຄັນຂອງການຍູ້ແຮງ ແລະ ຍົກສູງປະສິດທິຜົນການຮ່ວມມືດ້ານເສດຖະກິດຍິ່ງກວ່າອີກ, ພ້ອມນັ້ນກໍ່ຕີລາຄາສູງການສິ້ນສຸດການເຈລະຈາສັນຍາການຄ້າໃໝ່ ໃນເວລາດຳເນີນການຢ້ຽມຢາມ, ໂດຍຖືວ່າ ນີ້ເປັນພື້ນຖານເພື່ອສືບຕໍ່ເປີດກວ້າງການພົວພັນໃນຂົງເຂດເສດຖະກິດ ການຄ້າ. ກູບາສະໜັບສະໜູນການເພີ່ມທະວີການລົງທຶນຂອງຫວຽດນາມເຂົ້າປະເທດກູບາ, ຜ່ານການລົງນາມໃນໂຄງການລົງທຶນທີ່ສຳຄັນ ແລະ ຈະສືບຕໍ່ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ຈຸດປະສົງນີ້.
ສອງຝ່າຍກໍ່ໄດ້ພິຈາລະນາຄວາມສາມາດບົ່ມຊ້ອນຂອງແຕ່ລະປະເທດ ເພື່ອເປີດກວ້າງການຮ່ວມມືໃນບັນດາຂະແໜງການ, ຂົງເຂດບຸລິມະສິດ ເຊັ່ນພະລັງງານ, ການສື່ສານໂທລະຄົມມະນາຄົມ, ການທ່ອງທ່ຽວ, ການກໍ່ສ້າງ, ບໍລິການສາທາລະນະສຸກ, ອຸດສາຫະກຳ - ກະສິກຳ ແລະອຸດສາຫະກຳອາຫານ, ເພສັດຊະກຳ, ເຕັກໂນໂລຊີຊີວະພາບ, ການຄົມມະນາຄົມຂົນສົ່ງ ແລະ ບັນດາຂົງເຂດອື່ນ.
ສອງຝ່າຍສະແດງຄວາມພຶງພໍໃຈກ່ຽວກັບຄວາມຄ້າຍຄືກັນໂດຍສົມບູນໃນຫຼັກໝັ້ນຂອງສອງປະເທດ ກ່ຽວກັບບັນຫາສາກົນຕ່າງໆ; ເນັ້ນໜັກວ່າ ຕ້ອງແກ້ໄຂຂໍ້ພິພາດລະຫວ່າງປະເທດດ້ວຍສັນຕິວິທີ, ບົນພື້ນຖານເຄົາລົບນັບຖືກົດໝາຍສາກົນ, ກົດບັດສະຫະປະຊາຊາດ, ເຄົາລົບບັນດາຫຼັກການເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ສິດຕັດສິນດ້ວຍຕົນເອງຂອງບັນດາປະຊາຊາດ, ບໍ່ແຊກແຊງເຂົ້າວຽກງານພາຍໃນ, ບໍ່ໃຊ້ກຳລັງອາວຸດຫຼືນາບຂູ່ຈະໃຊ້ກຳລັງອາວຸດ.
ສອງຝ່າຍເປັນເອກະສັນໃຫ້ທັດສະນະວ່າ, ການພົວພັນສອງຝ່າຍລະຫວ່າງຫວຽດນາມ-ກູບານັບມື້ນັບໄດ້ຮັບການເພີ່ມທະວີຢ່າງແໜ້ນແຟ້ນນັ້ນ ຈະປະກອບສ່ວນເປີດກວ້າງການຮ່ວມມືລະຫວ່າງຫວຽດນາມກັບບັນດາປະເທດໃນພາກພື້ນອາເມລິກາລາຕີນ ແລະກາຣີເບ; ລະຫວ່າງກູບາກັບບັນດາປະເທດໃນພາກພື້ນອາຊີ-ປາຊີຟິກ, ເພື່ອສັນຕິພາບ ສະຖຽນລະພາບ ການຮ່ວມມື ການພັດທະນາ ແລະ ຄວາມວັດທະນາຖາວອນ ຢູ່ສອງພາກພື້ນ ແລະໃນໂລກ. ສອງຝ່າຍຮັບຮູ້ບົດບາດຂອງບັນດາອົງການຈັດຕັ້ງພາກພື້ນ ແລະ ລະຫວ່າງພາກພື້ນເຊັ່ນ ປະຊາຄົມບັນດາລັດອາເມລິກາລາຕິນ ແລະ ກາຣີເບ (CELAC), ສະມາຄົມບັນດາປະເທດອາຊີຕາເວັນອອກສຽງໃຕ້ (ASEAN), ເວທີປາໄສການຮ່ວມມືອາຊີຕາເວັນອອກ - ອາເມລິກາລາຕິນ (FEALAC) ໃນການເພີ່ມທະວີການພົວພັນມິດຕະພາບ ແລະການຮ່ວມມື ບົນພື້ນຖານຂອງຄວາມເຄົາລົບ ແລະຢູ່ຮ່ວມກັນຢ່າງສັນຕິ, ເຄົາລົບນັບຖືກົດໝາຍສາກົນ ຕາມຈິດໃຈປະກາດຖະແຫຼງອາເມລິກາລາຕິນ ແລະກາຣີເບເປັນເຂດສັນຕິພາບ.
ສອງຝ່າຍຢັ້ງຢືນອີກຄັ້ງລັກສະນະປະສິດທິພາບຂອງບັນດາຫຼັກການພື້ນຖານ ຂອງຂະບວນການບໍ່ເຂົ້າຮ່ວມກຸ່ມ; ເນັ້ນໜັກບັນດາເປົ້າໝາຍແລະຫຼັກການເຄື່ອນໄຫວຂອງຂະບວນການບໍ່ເຂົ້າຮ່ວມກຸ່ມ ຕ້ອງໄດ້ຮັບຄວາມເຄົາລົບຢ່າງເຖິງຖອງ; ຕີລາຄາສູງການປະກອບສ່ວນຂອງຂະບວນການໃນການປົກປັກຮັກສາບັນດາຫຼັກການຂອງກົດໝາຍສາກົນ; ໃຫ້ທັດສະນະວ່າ ຂະບວນການບໍ່ເຂົ້າຮ່ວມກຸ່ນຄວນໄດ້ຮັບການປັບປຸງຍິ່ງກວ່າອີກ ເພື່ອປະເຊີນໜ້າຢ່າງມີປະສິດທິຜົນ ກັບສິ່ງທ້າທາຍທີ່ໃຫຍ່ຫຼວງຂອງໂລກປະຈຸບັນ; ຢືນຢັນຄຳໝັ້ນສັນຍາຊຸກຍູ້ສັນຕິພາບແລະຄວາມໝັ້ນຄົງສາກົນ, ການລົດອາວຸດ, ພິເສດແມ່ນການລົດອາວຸດນິວເກຼຍ; ສະແດງຄວາມຍິນດີຕໍ່ການທີ່ຫວຽດນາມ ແລະ ກູບາ ໄດ້ລົງນາມແລະເຂົ້າຮ່ວມໃນສົນທິສັນຍາຫ້າມອາວຸດນິວເກຼຍ.
ສອງຝ່າຍເຫັນດີເປັນເອກະສັນຈະສະໜັບສະໜູນຊຶ່ງກັນແລະກັນ ຢູ່ທີ່ບັນດາອົງການຈັດຕັ້ງສາກົນ ແລະເວທີປາໄສພະຫຸພາຄີ ທີ່ສອງປະເທດເປັນສະມາຊິກ, ໂດຍສະເພາະແມ່ນຢູ່ສະຫະປະຊາຊາດ, ລວມທັງການສະໜັບສະໜູນຜູ້ສະໝັກຮັບເລືອກຕັ້ງຂອງກັນແລະກັນ, ເປັນເອກະພາບກ່ຽວກັບຫຼັກການທົ່ວໄປ ໂດຍຜ່ານການແລກປ່ຽນເປັນໄລຍະ ລະຫວ່າງລັດຖະບານຂອງສອງປະເທດ; ເປັນເອກະສັນຈະສືບຕໍ່ເພີ່ມທະວີການສົມທົບ, ຮ່ວມມື ແລະ ສະໜັບສະໜູນຊຶ່ງກັນແລະກັນ ໃນຂອບເຂດການພົບປະສາກົນຂອງບັນດາພັກກອມມູນິດແລະກຳມະກອນ, ເວທີປາໄສ ເຊົາເປົາໂລ, ກໍ່ຄືໃນທີ່ເວທີປາໄສການເມືອງ, ສັງຄົມອື່ນ./.
ໂດຍ ເຟືອງຈ່າ
