ທ່ານນາຍົກລັດຖະມົນຕີ ຫງວຽນຊວັນຝຸກ ເຂົ້າຮ່ວມກອງປະຊຸມສຸດຍອດ ຄະນະກຳມາທິການແມ່ນ້ຳຂອງສາກົນ ຄັ້ງທີ 3
ວກ.ອອນໄລ - ໃນວັນທີ 4 ແລະ 5 ເມສາ 2018, ທ່ານນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນຂັ້ນສູງຂອງລັດຖະບານຫວຽດນາມ ໄດ້ເຂົ້າຮ່ວມກອງປະຊຸມສຸດຍອດ ຄະນະກຳມາທິການແມ່ນ້ຳຂອງສາກົນ (MRC) ຄັ້ງທີສາມ ພາຍໃຕ້ຫົວຂໍ້ “ເພີ່ມທະວີຄວາມມານະພະຍາຍາມລວມ ແລະ ເປີດກວ້າງ ການພົວພັນຄູ່ຮ່ວມມື ເພື່ອແນໃສ່ບັນລຸໄດ້ບັນດາເປົ້າໝາຍພັດທະນາແບບຍືນຍົງຢູ່ລົ່ງແມ່ນ້ຳຂອງ” ຢູ່ທີ່ຊຽມຣຽບ, ກຳປູເຈຍ, ຕາມຄຳເຊີນຂອງທ່ານນາຍົກລັດຖະມົນຕີກຳປູເຈຍ ສົມເດັດ ເຕໂຈ ຮຸນແຊນ.
ກອງປະຊຸມສຸດຍອດຄັ້ງນີ້ໄດ້ປຶກສາສົນທະນາ, ວາງບັນດາທິດທາງໃຫຍ່, ບັນດາຂົງເຂດບຸລິມະສິດ, ເປີດກວ້າງການຮ່ວມມືຢູ່ໃນ ແລະນອກຄະນະກຳມາທິການແມ່ນ້ຳຂອງສາກົນ ແນໃສ່ນຳໃຊ້ຊັບພະຍາກອນນ້ຳ ແລະບັນດາຊັບພະຍາກອນທີ່ກ່ຽວຂ້ອງຢູ່ລົ່ງແມ່ນ້ຳຂອງຢ່າງສະເໝີພາບ, ສົມເຫດສົມຜົນ ແລະຍືນຍົງ, ປະກອບສ່ວນປະຕິບັດບັນດາເປົ້າໝາຍພັດທະນາແບບຍືນຍົງ 2030 ຂອງສະຫະປະຊາຊາດ ຢ່າງສຳເລັດຜົນ ຢູ່ແຕ່ລະປະເທດ ແລະໃນທົ່ວພາກພື້ນ.
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ຍົກໃຫ້ເຫັນຜົນສຳເລັດໃຫຍ່ບາງຢ່າງທີ່ບັນລຸໄດ້ໃນເວລາທີ່ຜ່ານມາ ນັບແຕ່ກອງປະຊຸມສຸດຍອດຄັ້ງທີ 2 ຂອງຄະນະກຳມາທິການ ປີ 2014 ຢູ່ນະຄອນ ໂຮ່ຈີມິນ, ຜ່ານນັ້ນ, ໄດ້ສະແດງໃຫ້ເຫັນແຈ້ງເຖິງປະສິດທິຜົນຕົວຈິງຂອງສັນຍາແມ່ນ້ຳຂອງ 1995, ຊຸກຍູ້ການເຊື່ອມຕໍ່, ການປະສານງານໃນພາກພື້ນ ແລະ ຍູ້ແຮງການພົວພັນກັບບັນດາຄູ່ຮ່ວມມື, ບັນດາກົນໄກຮ່ວມມືທີ່ກ່ຽວຂ້ອງໃນພາກພື້ນ. ທ່ານນາຍົກລັດຖະມົນຕີໃຫ້ທັດສະນະວ່າ, ປະຈຸບັນ, ລົ່ງແມ່ນ້ຳຂອງຕ້ອງປະເຊີນໜ້າກັບສິ່ງທ້າທາຍໃຫຍ່ຫຼາຍຢ່າງ: ແຫຼ່ງຊັບພະຍາກອນນ້ຳໃນແມ່ນ້ຳຂອງພວມຫຼຸດລົງທາງກ້ານປະລິມານແລະຄຸນນະພາບ, ປະລິມານດິນຄູນແລະທາດຫຼໍ່ລ້ຽງຖືກເສື່ອມເສຍ; ລະບົບນິເວດແລະສິ່ງແວດລ້ອມເສື່ອມໂຊມຢ່າງໜັກ. ສະພາບດັ່ງກ່າວສະແດງອອກຢ່າງຈະແຈ້ງແລະໜັກໜ່ວງໃນບັນດາປະເທດຢູ່ເຂດປາຍນ້ຳແມ່ນ້ຳຂອງ, ໂດຍສະເພາະແມ່ນເຂດທົ່ງພຽງແມ່ນ້ຳຂອງຫວຽດນາມ, ເຊິ່ງເປັນບ່ອນທີ່ຕ້ອງປະເຊີນໜ້າຢ່າງເປັນປະຈຳກັບໄພແຫ້ງແລ້ງ, ໄພນ້ຳເຄັມຊຶມເຂົ້າດິນນາ, ຝັ່ງແມ່ນ້ຳ ຝັ່ງທະເລຖືກເຊາະເຈື່ອນ…ເປັນໄພຄຸກຄາມຕໍ່ວິຖີຊີວິດຂອງປະຊາຊົນກວ່າ 20 ລ້ານຄົນ.
ທ່ານນາຍົກລັດຖະມົນຕີ ຫງວຽນຊວັນຝຸກ ເນັ້ນໜັກວ່າ: “ຕ້ອງມີການກະທຳທີ່ແທດຈິງ, ທັນການເພື່ອໃຫ້ທົ່ງພຽງແມ່ນ້ຳຂອງທີ່ເປັນອູ່ເຂົ້າ, ອູ່ປ່າຂອງພາກພື້ນໃນຫຼາຍຮ້ອຍປີທີ່ຜ່ານມານີ້ ສືບຕໍ່ພັດທະນາ ແລະເປັນແຫຼ່ງສະໜອງເຂົ້າທີ່ໃຫຍ່ທີ່ສຸດໃຫ້ແກ່ການຮັບປະກັນຄວາມໝັ້ນຄົງດ້ານສະບຽງອາຫານຂອງພາກພື້ນ”, ແລະ ສະເໜີໃຫ້ຄະນະກຳມາທິການ ຈົ່ງສຸມໃສ່ການນຳໃຊ້ຊັບພະຍາກອນນ້ຳແມ່ນ້ຳຂອງ ແລະບັນດາຊັບພະຍາກອນທີ່ກ່ຽວຂ້ອງ ຢ່າງສະເໝີພາບ, ສົມເຫດສົມຜົນ ແລະຍືນຍົງ.
ທ່ານນາຍົກລັດຖະມົນຕີ ຫງວຽນຊວັນຝຸກ ສະເໜີໃຫ້ເພີ່ມທະວີການປະຕິບັດສັນຍາແມ່ນ້ຳຂອງ 1995 ຢ່າງຄົບຖ້ວນ ມີເນື້ອແທ້ແລະມີປະສິດທິຜົນ ລວມທັງຊຸດລະບຽບຂັ້ນຕອນ, ຂໍ້ກຳນົດຂອງຄະນະກຳມາທິການແມ່ນ້ຳຂອງສາກົນ; ຍົກສູງປະສິດທິຜົນ ແລະບົດບາດຕິດຕາມກວດກາແລະປະສານງານຂອງຄະນະກຳມາທິການ ໃນການປະຕິບັດຄຳໝັ້ນສັນຍາຂອງບັນດາປະເທດສະມາຊິກ. ກໍ່ສ້າງຂອບແຜນແມ່ບົດການພັດທະນາລົ່ງແມ່ນ້ຳຂອງທີ່ກົມກຽວເໝາະສົມກັບແຜນແມ່ບົດຊັບພະຍາກອນນ້ຳຂອງບັນດາປະເທດສະມາຊິກ; ສະເໜີແນະບັນດາໂຄງການຮ່ວມກັນກ່ຽວກັບການຄຸ້ມຄອງ, ນຳໃຊ້ຊັບພະຍາກອນແຫຼ່ງນ້ຳແມ່ນ້ຳຂອງຢ່າງຍືນຍົງ. ເພີ່ມທະວີການແບ່ງປັນຂໍ້ມູນຂ່າວສານໃນລົ່ງແມ່ນ້ຳຂອງ ແລະ ແມ່ນ້ຳລ້ານຊ້າງ ລວມທັງເຄືອຂ່າຍຕິດຕາມກວດກາຊັບພະຍາກອນນ້ຳ ແລະບັນດາຊັບພະຍາກອນທີ່ກ່ຽວຂ້ອງໃນລົ່ງແມ່ນ້ຳ, ບັນດາລະບົບພະຍາກອນແລະເຕືອນໄພພິບັດທາງທຳມະຊາດ; ສ້າງພື້ນຖານຂໍ້ມູນ, ຄວາມຮູ້ທົ່ວໄປ ແລະການຄົ້ນຄວ້າຮ່ວມກັນຂອງຄະນະກຳມາທິການແມ່ນ້ຳຂອງສາກົນ.
ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີໃຫ້ເພີ່ມທະວີການເຄື່ອນໄຫວປະສານງານ, ຮ່ວມມືກັບບັນດາຄູ່ຮ່ວມສົນທະນາ, ຄູ່ຮ່ວມມືທີ່ພັດທະນາ ໃນການລະດົມແຫຼ່ງພະລັງ, ຮັບເອົາບົດຮຽນການຄຸ້ມຄອງ ແລະເຕັດໂນໂລຊີ ເຕັກນິກທັນສະໄໝ, ສົມທົບໃນຂໍ້ຄິດລິເລີ່ມອະນຸພາກພື້ນ, ແລກປ່ຽນຂໍ້ມູນຂ່າວສານ, ຮ່ວມມືແບ່ງປັນເຕັກນິກ… ແນໃສ່ຍົກສູງປະສິດທິຜົນການຮ່ວມມືທາງດ້ານການພັດທະນາແບບຍືນຍົງ ແລະປົກປັກຮັກສາສະພາບແວດລ້ອມ. ທ່ານນາຍົກລັດຖະມົນຕີກ່າວວ່າ “ຈົ່ງສາມັກຄີກັນ, ພ້ອມກັນຮ່ວມມື, ລົງມືກະທຳ ເພື່ອໃຫ້ແມ່ນ້ຳຂອງເປັນສາຍນ້ຳແຫ່ງສັນຕິພາບ, ເປັນການເຊື່ອມຕໍ່ຊີວິດທີ່ຍືນຍົງ, ຈະເລີນຮຸ່ງເຮືອງຕະຫຼອດການ ຂອງບັນດາປະເທດ, ປະຊາຊົນຢູ່ໃນພາກພື້ນ”.
ການເຂົ້າຮ່ວມຢ່າງເປັນເຈົ້າການ ແລະປະກອບສ່ວນອັນຕັ້ງໜ້າຂອງຄະນະຜູ້ແທນຫວຽດນາມໃນກອງປະຊຸມໄດ້ຮັບຄວາມຮັບຮູ້ແລະຕີລາຄາສູງຈາກບັນດາປະເທດແລະຄູ່ຮ່ວມມື. ກອງປະຊຸມໄດ້ສຳເລັດສິ້ນສຸດລົງດ້ວຍການຮັບຮອງເອົາ ຖະແຫຼງການຊຽມຣຽບ.
ຢູ່ນອກກອງປະຊຸມສຸດຍອດຄະນະກຳມາທິການແມ່ນ້ຳຂອງສາກົນຄັ້ງທີ 3, ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ໄດ້ມີການພົບປະສອງຝ່າຍກັບທ່ານນາຍົກລັດຖະມົນຕີກຳປູເຈຍ ສົມເດັດ ເຕໂຈ ຮຸນແຊນ, ທ່ານນາຍົກລັດຖະມົນຕີລາວ ທອງລຸນ ສີສຸລິດ, ແລະໄດ້ແລກປ່ຽນສັ້ນກັບທ່ານລັດຖະມົນຕີຫົວໜ້າຄະນະຜູ້ແທນຈີນ, ເຊິ່ງການພົບປະເຫຼົ່ານີ້ໄດ້ແລກປ່ຽນກ່ຽວກັບທິດທາງ, ມາດຕະການຕ່າງໆເພື່ອຊຸກຍູ້ການພົວພັນສອງຝ່າຍຍິ່ງກວ່າອີກ ກໍ່ຄືແກ້ໄຂບັນດາບັນຫາລະອຽດ.
ການເຂົ້າຮ່ວມກອງປະຊຸມສຸດຍອດຄະນະກຳມາທິການແມ່ນ້ຳຂອງສາກົນ ຄັ້ງທີ 3 ຂອງທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຢືນຢັນຄວາມເອົາໃຈໃສ່ແລະຄຳໝັ້ນສັນຍາທີ່ແຂງແຮງຂອງຫວຽດນາມສຳລັບການຮ່ວມມືໃນຂອບຄະນະກຳມາທິການບົນພື້ນຖານຈິດໃຈສັນຍາແມ່ນ້ຳຂອງ 1995, ປະກອບສ່ວນເພີ່ມທະວີບົດບາດຂອງຄະນະກຳມາທິການ ກໍ່ຄືຄວາມສາມັກຄີ ແລະ ການຮ່ວມມືລະຫວ່າງບັນດາປະເທດສະມາຊິກເພື່ອຜົນປະໂຫຍດຮ່ວມກັນ./.
ໂດຍ ຫງວຽນດຶກ