ວກ.ອອນໄລ - ໂດຍຕອບສະໜອງຕາມຄຳເຊີນຂອງນາຍົກລັດຖະມົນຕີຮົງກາລີ ວິກໂຕຣ໌ ໂອຣ໌ບານ, ເລຂາທິການໃຫຍ່ພັກກອມມູນິດຫວຽດນາມ ຫງວຽນຝູຈ້ອງ ໄດ້ດຳເນີນການຢ້ຽມຢາມປະເທດຮົງກາລີ ຢ່າງເປັນທາງການ ໃນລະຫວ່າງວັນທີ 8-11 ກັນຍາ 2018.
ໃນເວລາຢ້ຽມຢາມປະເທດຮົງກາລີ, ເລຂາທິການໃຫຍ່ ຫງວຽນຝູຈ້ອງ ໄດ້ພົບປະເຈລະຈາກັບນາຍົກລັດຖະມົນຕີຮົງການລີ ວິກໂຕຣ໌ ໂອຣ໌ບານ; ພົບປະຫາລືກັບປະທານາທິບໍດີ ຢານົສ ອາແດ; ຮອງປະທານສະພາແຫ່ງຊາດ ແຮນດີ ກະຊາບາ; ເຂົ້າຮ່ວມກອງປະຊຸມຜູ້ອຳນວຍການ ບັນດາມະຫາວິທະຍາໄລ ຮົງກາລີ-ຫວຽດນາມ ແລະຢ້ຽມຢາມນະຄອນ ສະແຢນແຕນດຣີ.
ຜ່ານການພົບປະເຈລະຈາຫາລື, ສອງຝ່າຍຕັດສິນໃຈຊຸກຍູ້ການຮ່ວມມືຢ່າງມີປະສິດທິຜົນ ໃນຂົງເຂດຕ່າງໆ, ພິເສດແມ່ນຮ່ວມມືດ້ານເສດຖະກິດ ການຄ້າ ການລົງທຶງ ການປ້ອງກັນປະເທດ ການສຶກສາ-ຝຶກອົບຮົມ ວິທະຍາສາດເຕັກໂນໂລຊີ ສິ່ງແວດລ້ອມ ສາທາລະນະສຸກ ວັດທະນະທຳ ການກິລາ ການທ່ອງທ່ຽວ…, ແບ່ງປັນບົດຮຽນກ່ຽວກັບການຮັກສາ ແລະເສີມຂະຫຍາຍສີສັນວັດທະນະທຳ ມູນເຊື້ອຂອງຊາດໃນຂະບວນວິວັດການພັດທະນາ.
ຜູ້ນຳທັງສອງໄດ້ເປັນເອກະສັນກັນໃຫ້ທັດສະນະວ່າ ຜ່ານເວລາເກືອ 70 ປີ, ການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືໃນຫຼາຍດ້ານລະຫວ່າງຫວຽດນາມແລະຮົງກາລິ ໄດ້ມີການຂະຫຍາຍຕົວຢ່າງແຂງແຮງ, ພິເສດແມ່ນໃນຊຸມປີທີ່ຜ່ານມາມໍ່ນີ້.
ເລຂາທິການໃຫຍ່ ຫງວຽນຝູຈ້ອງ ແລະ ນາຍົກລັດຖະມົນຕີ ວິກໂຕຣ໌ ໂອຣ໌ບານ ເຫັນດີເປັນເອກະພາບຈະຍົກຂອບການຮ່ວມມືລະຫວ່າງສອງປະເທດຂຶ້ນເປັນ "ຄູ່ຮ່ວມມືຮອບດ້ານ", ຕາມນັ້ນ ສອງຝ່າຍເປັນເອກະພາບຈະດຳເນີນການພົບປະ ແລກປ່ຽນຢ່າງເປັນປະຈຳ ລະຫວ່າງຜູ້ນຳຂັ້ນສູງຂອງສອງປະເທດ; ເພີ່ມທະວີການສົນທະນາການເມືອງ, ການແລກປ່ຽນຄວາມເຫັນຍຸດທະສາດ ໃນທຸກຊ່ອງສານ ພັກ, ລັດຖະບານ, ສະພາແຫ່ງຊາດ, ບັນດາກະຊວງ ຂະແໜງການ ແລະທ້ອງຖິ່ນ.
ສອງຝ່າຍເຫັນດີເປັນເອກະສັນຈະເພີ່ມທະວີການແລກປ່ຽນຄວາມເຫັນກ່ຽວກັບບັນດາບັນຫາພາກພື້ນ ແລະສາກົນທີ່ມີຄວາມສົນໃຈຮ່ວມກັນ; ຮ່ວມມືຢ່າງມີປະສິດທິຜົນຢູ່ໃນບັນດາອົງການຈັດຕັ້ງ ແລະເວທີປາໄສພະຫຸພາຄີ, ເປັນຕົ້ນແມ່ນສະຫະປະຊາຊາດ, ເວທີປາໄສການຮ່ວມມືອາຊີ-ເອີຣົບ (ASEM) ແລະການຮ່ວມມືລະຫວ່າງແມ່ນ້ຳຂອງ-ແມ່ນ້ຳດານູບ.
ເລຂາທິການໃຫຍ່ ຫງວຽນຝູຈ້ອງ ຢືນຢັນຫວຽດນາມສະໜັບສະໜູນຮົງກາລີໃນການເປີດກວ້າງການພົວພັນກັບບັນດາປະເທດອາຊຽນ, ກຽມຄວາມພ້ອມທີ່ຈະເປັນຂົວຕໍ່ ໃຫ້ຮົງກາລີເປີດກວ້າງການພົວພັນເສດຖະກິດ ກັບບັນດາປະເທດອາຊຽນ. ນາຍົກລັດຖະມົນຕີຮົງກາລິໃຫ້ຄຳໝັ້ນສັນຍາ ຈະສະໜັບສະໜູນແລະຊຸກຍູ້ ການພົວພັນຮອບດ້ານລະຫວ່າງ ຫວຽດນາມແລະສະຫະພັນເອຣົບ, ຢືນຢັນຈະຊຸກຍູ້ການລົງນາມ, ໃຫ້ສັດຕະຍາບັນ ສັນຍາການຄ້າເສດລີ ຫວຽດນາມ-ອີຢູ ໂດຍໄວ ແລະປະຕິບັດສັນຍາຢ່າງຄົບຖ້ວນ, ປະກອບສ່ວນເພີ່ມທະວີການເຊື່ອມຕໍ່ຕະຫຼາດອີຢຸ, ໃນນັ້ນມີຮົງກາລີ, ກັບຫວຽດນາມແລະອາຊຽນ.
ກ່ຽວກັບການຮ່ວມມືດ້ານເສດຖະກິດ-ການຄ້າແລະການລົງທຶນ, ຜູ້ນຳທັງສອງພ້ອມກັບໃຫ້ທັດສະນະວ່າ ການຮ່ວມມືໃນຂົງເຂດນີ້ໄດ້ມີການພັດທະນາຢ່າງໄວວາ, ແຕ່ຍັງບໍ່ທັນສົມຄູ່ກັບຄວາມສາມາບົ່ມຂ້ອນ ແລະຄວາມປາຖະໜາຂອງສອງປະເທດ, ພວກເພິ່ນກໍ່ເນັ້ນໜັກວ່ານີ້ແມ່ນຂົງເຂດທີ່ສອງປະເທດມີພື້ນທີ່ກວ້າງຂວາງເພື່ອຮ່ວມມືນຳກັນ.
ສອງຝ່າຍເປັນເອກະສັນຈະຍູ້ແຮງການເຄື່ອນໄຫວຂອງຄະນະກຳມະການປະສົມກ່ຽວກັບການຮ່ວມມືຫວຽດນາມ-ຮົງກາລີ; ຊຸກຍູ້ມາດຕະການຕ່າງໆເພື່ອຊ່ວຍໜູນແລະສ້າງເງື່ອນໄຂອຳນວຍຄວາມສະດວກໃຫ້ວິສາຫະກິດຂອງສອງປະເທດມີໂອກາດພົບປະ ແລກປ່ຽນ ຊອກຫາໂອກາດຮ່ວມມືທຸລະກິດ, ອຳນວຍຄວາມສະດວກໃຫ້ສິນຄ້າຂອງສອງປະເທດເຂົ້າໃນຕະຫຼາດຂອງກັນແລະກັນ; ເປີດກວ້າງການຮ່ວມມືໃນບັນດາຂົງເຂດສາທາລະນະສຸກ, ຄຸ້ມຄອງແຫຼ່ງນ້ຳ, ເຕັກໂນໂລຊີຂໍ້ມູນຂ່າວສານ, ຜະລິດຕະພັນເພສັດຊະກຳ, ຄວາມປອດໄພດ້ານສະບຽງອາຫານ, ປົກປັກຮັກສາສິ່ງແວດລ້ອມ, ພະລັງງານທົດແທນ...
ເລຂາທິການໃຫຍ່ ຫງວຽນຝູຈ້ອງ ຕີລາຄາສູງຕໍ່ການທີ່ ຮົງກາລີຖືຫວຽດນາມເປັນຄູ່ຮ່ວມມືບຸລິມະສິດໃນນະໂຍບາຍຊ່ວຍເຫຼືອການພັດທະນາ (ODA) ຂອງຕົນ, ສະເໜີໃຫ້ສອງຝ່າຍສົມທົບນຳກັນຢ່າງແໜ້ນແຟ້ນ ເພື່ອເລືອກປະຕິບັດບັນດາຂົງເຂດ ໂຄງການທີ່ສອດຄ່ອງກັບຄວາມສາມາດຂອງຮົງກາລີ ແລະຄວາມຕ້ອງການຂອງຫວຽດນາມ, ປະຕິບັດແຫຼ່ງທຶນຊ່ວຍເຫຼືອການພັດທະນາຢ່າງມີປະສິດທິຜົນ. ເລຂາທິການໃຫຍ່ ຫງວຽນຝູຈ້ອງ ສະແດງຄວາມຂອບໃຈແລະຕີລາຄາສູງຕໍ່ການທີ່ລັດຖະບານຮົງກາລີໃຫ້ຄຳໝັ້ນສັນຍາຈະສືບຕໍ່ສະໜອງທຶນສຶກສາໃຫ້ນັກຮຽນຫວຽດນາມຈຳນວນ 200 ທຶນຕໍ່ປີ.
ສອງຝ່າຍຊົມເຊີຍການລົງນາມໃນເອກະສານການຮ່ວມມືຈຳນວນໜຶ່ງໃນຂົງເຂດປ້ອງກັນປະເທດ-ປ້ອງກັນຄວາມສະຫງົບ, ຍຸດຕິທຳ, ສາທາລະນະສຸກ, ການສຶກສາ-ຝຶກອົບຮົມ, ສ້າງພື້ນຖານເພື່ອເພີ່ມທະວີການຮ່ວມມືທີ່ມີເນື້ອແທ້ ມີປະສິດທິຜົນ; ສະແດງຄວາມຊົນເຊີຍຕໍ່ການທີ່ສອງຝ່າຍສົມທົບກັນຈັດຕັ້ງ “ກອງປະຊຸມຜູ້ອຳນວຍການບັນດາມະຫາວິທະຍາໄລຮົງການລີ-ຫວຽດນາມຄັ້ງທີສອງ” ຢູ່ນະຄອນຫຼວງ ບູດາເປດ.
ສອງຝ່າຍເຫັນດີເປັນເອກະສັນຈະເປີດກວ້າງການຮ່ວມມືໃນຂົງເຂດວັດທະນະທຳ ກິລາ ການທ່ອງທ່ຽວ ແນໃສ່ເພີ່ມທະວີຄວາມເຂົ້າໃຈແລະມິດຕະພາບລະຫວ່າງປະຊາຊົນສອງປະເທດ; ເຫັນດີຊຸກຍູ້ໃຫ້ບັນດາອົງການພາລະບົດບາດຂອງສອງປະເທດ ສ້າງແຜນການຈັດຕັ້ງການເຄື່ອນໄຫວສະເຫຼີມສະຫຼອງວັນສ້າງຕັ້ງການພົວພັນທາງການທູດລະຫວ່າງສອງປະເທດຄົບຮອບ 70 ປີໃນປີ 2020.
ນາຍົກລັດຖະມົນຕີຮົງກາລີ ວິກໂຕຣ໌ ໂອຣ໌ບານ ຕີລາຄາສູງບົດບາດທີ່ຕັ້ງ ແລະສ່ວນປະກອບຂອງຊຸມຊົນຊາວຫວຽດນາມຢູ່ຮົງກາລີ, ພ້ອມກັນນັ້ນກໍ່ຢືນຢັນວ່າ ລັດຖະບານຮົງກາລີຈະສືບຕໍ່ສ້າງເງື່ອນໄຂອຳນວຍຄວາມສະດວກໃຫ້ຊຸມຊົນຊາວຫວຽດນາມຢູ່ຮົງກາລີໄດ້ດຳລົງຊີວິດເປັນປົກກະຕິ, ການເຊື່ອມໂຍງທີ່ດີກັບພື້ນເມືອງ, ເສີມຂະຫຍາຍບົດບາດເປັນຂົວຕໍ່ຊ່ວຍໃຫ້ການພົວພັນລະຫວ່າງສອງປະເທດນັບມື້ນັບພັດທະນາ.
ໃນໂອກາດນີ້, ສອງຝ່າຍໄດ້ອອກຖະແຫຼງການຮ່ວມກ່ຽວກັບການສ້າງຕັ້ງການພົວພັນຄູ່ຮ່ວມມືຮອບດດ້ານຫວຽດນາມ-ຮົງກາລີ ແລະລົງນາມໃນເອກະສານການຮ່ວມມື 7 ສະບັບ, ສ້າງພື້ນຖານນິຕິກຳໃຫ້ການພົວພັນລະຫວ່າງສອງປະເທດສືບຕໍ່ພັດທະນາໃນຫຼາຍຂົງເຂດ./.
ບກ. ສັງລວມຈາກຂ່າວສານຫວຽດນາມ