ຫວຽດນາມໃຫ້ຄຳໝັ້ນສັນຍາ ຈະເປັນສະມາຊິກທີ່ຕັ້ງໜ້າ ມີຄວາມຮັບຜິດຊອບຂອງປະຊາຄົມສາກົນ ຢູ່ສະເໝີ
ວກ.ອອນໄລ - ໃນການເດີນທາງທຸລະກິດໜຶ່ງວັນ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ປະຕິບັດ 15 ກິດຈະການທີ່ສຳຄັນ, ໃນນັ້ນມີບົດປາໄສທີ່ການປະຊຸມສົນທະນາລະດັບສູງ ສະມັດຊາໃຫຍ່ສະຫະປະຊາຊາດຄັ້ງທີ 73 ແລະ ການພົບປະສອງຝ່າຍກັບປະມຸກແຫ່ງລັດແລະຜູ້ນຳຂອງ 5 ປະເທດ. ໂຄງການເຮັດວຽກຂອງທ່ານນາຍົກລັດຖະມົນຕີນັ້ນ ມີຄວາມຮີບດ່ວນ ມີປະສິດທິຜົນທີ່ສຸດ ແລະ ສະແດງໃຫ້ເຫັນເຖິງຄຳໝັ້ນສັນຍາຂອງຫວຽດນາມ ຈະເປັນສະມາຊິກທີ່ຕັ້ງໜ້າ ມີຄວາມຮັບຜິດຊອບຂອງປະຊາຄົມສາກົນຢູ່ສະເໝີ.
ນາຍົກລັດຖະມົນຕີ ຫງວຽນຊວັນຝຸກ ກ່າວປາໄສທີ່ການປະຊຸມສົນທະນາລະດັບສູງ ຂອງສະມັດຊາໃຫຍ່ສະຫະປະຊາຊາດ ຄັ້ງທີ 73. (ພາບ: TTXVN)
ໃນບົດປາໄສຕໍ່ໜ້າຜູ້ນຳຂອງ 193 ປະເທດທີ່ເຂົ້າຮ່ວມການປະຊຸມສົນທະນາລະດັບສູງ ພາຍໃຕ້ຫົວຂໍ້: “ເພື່ອໃຫ້ສະຫະປະຊາຊາດໃກ້ຊິດຕິດກັບປະຊາຊົນທຸກຄົນ: ການນຳພາທົ່ວໂລກແລະຄວາມຮັບຜິດຊອບຮ່ວມກັນ ເພື່ອໃຫ້ບັນດາສັງຄົມມີສັນຕິພາບ ສະເໝີພາບ ແລະຍືນຍົງ”, ທ່ານນາຍົກລັດຖະມົນຕີ ຫງວຽຊວັນຝຸກ ໃຫ້ທັດສະນະວ່າ, ສະຫະປະຊາຊາດໄດ້ເສີມຂະຫຍາຍບົດບາດທີ່ໃຫຍ່ຫຼວງຂອງຕົນ, ໄດ້ມີຄວາມພະຍາຍາມທີ່ບໍ່ຢຸດຢັ້ງ ເພື່ອຮັກສາສັນຕິພາບ, ປ້ອງກັນກີດກັ້ນການຂັດແຍ່ງ ສົງຄາມ; ປະຕິບັດບັນດາບັນທັດຖານຫຼັກຂອງຄວາມສຳພັນລະຫວ່າງປະເທດໃນກົດບັດສະຫະປະຊາຊາດ.
ໃນ 70 ກວ່າປີທີ່ຜ່ານມາ, ຫວຽດນາມໄດ້ປະກອບສ່ວນເຂົ້າໃນເປົ້າໝາຍທີ່ສູງສົ່ງຂອງສະຫະປະຊາຊາດ ແລະເປັນໜຶ່ງໃນບາງປະເທດທີ່ໄດ້ສຳເລັດກ່ອນກຳນົດເວລາ ຫຼາຍເປົ້າໝາຍສະຫັດສະວັດ 2015 (Millennium Development Goals - MDGs) ຂອງສະຫະປະຊາຊາດ, ໂດຍສະເພາະກ່ຽວກັບການລົບລ້າງຄວາມອຶດຫິວ ຫຼຸດຜ່ອນຄວາມທຸກຍາກ. ຫວຽດນາມຍາມໃດກໍ່ເຊີດຊູກົດບັດສະຫະປະຊາຊາດ, ບັນດາຫຼັກການພື້ນຖານຂອງກົດໝາຍສາກົນ ໃນການແກ້ໄຂຂໍ້ຂັດແຍ່ງລະຫວ່າງປະເທດດ້ວຍສັນຕິວິທີ, ໃນນັ້ນມີບັນຫາຢູ່ເຂດທະເລຕາເວັນອອກ. ຫວຽດນາມພວມພະຍາຍາມຍິ່ງກວ່າອີກ ເພື່ອຄວາມຍຸຕິທຳແລະການພັດທະນາແບບຍືນຍົງ; ສົ່ງເສີມຄວາມສະເໝີພາບ, ຊ່ວຍໜູນກຸ່ມຄົນທີ່ອ່ອນແອ; ປົກປັກຮັກສາສິ່ງແວດລ້ອມ; ຮັບປະກັນສິດທິຂອງປະຊາຊົນທຸກຄົນ, ພ້ອມກັນນັ້ນກໍ່ສົ່ງເສີມຈິດໃຈຂອງການປຶກສາຫາລືແລະການຮ່ວມມືໃນບັນຫາສິດທິມະນຸດ.
ພາຍຫຼັງເນັ້ນໜັກວ່າ ໂລກພວມຕ້ອງປະເຊີນໜ້າກັບສິ່ງທ້າທາຍໃໝ່ທີ່ໃຫຍ່ທີ່ສຸດ, ປະເຊີນໜ້າກັບຈິນຕະນາການແບບອຳນາດບາດໃຫຍ່ ທີ່ສົ່ງເສີມກຳລັງແຮງ, ການໃຊ້ກຳລັງອາວຸດຫຼືນາບຂູ່ຈະໃຊ້ກຳລັງອາວຸດ, ການເພີ່ມຂຶ້ນຂອງມາດຕະການດ້ານດຽວ,… ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ໃຫ້ທັດສະນະວ່າ: “ບໍ່ມີປະເທດໃດ, ເຖິງວ່າເປັນປະເທດມະຫາອຳນາດທີ່ຮັ່ງມີເຂັ້ມແຂງ, ຈະມີຄວາມສາມາດພຽງພໍເພື່ອແກ້ໄຂບັນດາສິ່ງທ້າທາຍໃຫຍ່ໃນໂລກປະຈຸບັນ, ສິ່ງດັ່ງກ່າວມັນຮຽກຮ້ອງຄວາມພະຍາຍາມ, ຄວາມຮ່ວມແຮງຮ່ວມມືຂອງທຸກປະເທດໃນໂລກນີ້”. ທ່ານນາຍົກລັດຖະມົນຕີສະເໜີບັນຫາ “ຄວາມຮັບຜິດຂອບຄູ່”, ແຕ່ລະປະເທດມີຄວາມຮັບຜິດຊອບຕື່ມອີກ ຕໍ່ກັບບັນດາບັນຫາທົ່ວໂລກ, ແຕ່ລະຄົນມີພາລະມົດບາດຂອງພົນລະເມືອງທົ່ວໂລກ. ທ່ານນາຍົກລັດຖະມົນຕີສະແດງຄວາມປາຖະໜາວ່າ, ບັນດາປະເທດມະຫາອຳນາດ, ປະເທດທີ່ຈະເລີນພັດທະນາ ຈົ່ງມີການກະທຳຕົວຈິງ, ຈົ່ງເປັນແບບຢ່າງນຳໜ້າໃນການຮັກສາສັນຕິພາບແລະການພັດທະນາ. ສະມັດຊາໃຫຍ່ສະຫະປະຊາຊາດ ຈົ່ງເປັນໃຈກາງເພື່ອໃຫ້ບັນດາປະເທດຮ່ວມມືນຳກັນ ເພື່ອສັນຕິພາບ ຄວາມຍຸຕິທຳ ແລະການພັດທະນາຢ່າງຍືນຍົງ.
ໃນຍຸກແຫ່ງການປະຕິວັດອຸດສາຫະກຳຄັ້ງທີ 4, ຄວາມກ້າວໜ້າຂອງມະນຸດຊາດບໍ່ພຽງແຕ່ໄດ້ວັດແທກດ້ວຍຜົນສຳເລັດດ້ານເຕັກໂນໂລຊີ ຫາກກ່ອນອື່ນໝົດ ຕ້ອງແມ່ນສັນຕິພາບແລະຄວາມວັດທະນາຖາວອນ ແລະ ຕ້ອງຮູ້ສະສົມທ້ອນແຮ, ກຳເອົາແຕ່ລະໂອກາດທີ່ນ້ອຍນິດ ເພື່ອສັນຕິພາບ. ສຽງປາກຂອງປະເທດນ້ອຍ ຫຼືຄວາມປາຖະໜາຂອງຜູ້ອ່ອນແອ ຕ້ອງໄດ້ຮັບຄວາມເຄົາລົບ, ຮັບຟັງ, ແບ່ງປັນ. ນັ້ນແມ່ນຮາກຖານສຳລັບການພັດທະນາແບບຍືນຍົງ, ປົກຄຸມ ແລະ ບໍ່ໃຫ້ຜູ້ໃດຖືກປະໄວ້ຢູ່ຂ້າງຫຼັງ, ເປັນພື້ນຖານຂອງຄວາມໝັ້ນຄົງທາງສັງຄົມ ກໍ່ຄືຮັບປະກັນສິດທິມະນຸດ ແລະສົ່ງເສີມຄວາມຄິດສ້າງສັນຂອງແຕ່ລະຄົນ.
ທ່ານນາຍົກລັດຖະມົນຕີໃຫ້ທັດສະນະວ່າ, ສະຫະປະຊາຊາດຕ້ອງໄດ້ຮັບການປະຕິຮູບຢ່າງແຂງແຮງ, ຮອບດ້ານຕາມທິດຍົກສູງປະສິດທິຜົນ, ປະຊາທິປະໄຕ ແລະໂປ່ງໃສ ເພື່ືອປະຕິບັດເປັນຢ່າງດີ ບົດບາດທີ່ບໍ່ອາດຈະປ່ຽນແທນໄດ້ ໃນການນຳພາແກ້ໄຂສິ່ງທ້າທາຍທົ່ວໂລກ. ສະຫະປະຊາຊາດຄວນເພີ່ມທະວີການຮ່ວມມືກັບບັນດາພາກພື້ນ, ໃນນັ້ນມີການຊຸກຍູ້ກົນໄກການຮ່ວມມືຂອງກອງປະຊຸມສຸດຍອດສະຫະປະຊາຊາດ ແລະ ອາຊຽນຕາມທິດ: ເພີ່ມເນື້ອຫາຂອງສະຫະປະຊາຊາດ ຢູ່ໃນອາຊຽນ ແລະ ເຮັດໃຫ້ເນື້ອຫາຂອງອາຊຽນຢູ່ໃນສະຫະປະຊາຊາດມີຄວາມຊັດເຈນຕື່ມອີກ.
ຜ່ານບົດປາໄສ, ທ່ານນາຍົກລັດຖະມົນຕີໄດ້ນຳເອົາຂໍ້ຄວາມທີ່ເຂັ້ມແຂງມາໃນທີ່ປະຊຸມ ກ່າວຄື, ຫວຽດນາມໃຫ້ຄຳໝັ້ນສັນຍາຈະເຮັດຈົນສຸດຄວາມສາມາດຂອງຕົນ ເພື່ອປະກອບສ່ວນທີ່ມີປະສິດທິຜົນຍິ່ງກ່ວາອີກ ເຂົ້າໃນວຽກງານລວມຂອງປະຊາຄົມສາກົນ, ປະຕິບັດບັນດາເປົ້າໝາຍລວມຂອງສະຫະປະຊາຊາດ, ເພື່ອໂລກທີ່ມີສັນຕິພາບ ການຮ່ວມມື ແລະການພັດທະນາ, ເພື່ອລະບຽບການເມືອງແລະເສດຖະກິດສາກົນທີ່ຍຸຕິທຳ ປະຊາທິປະໄຕ, ອີງບົນພື້ນຖານກົໝາຍ, ສອດຄ່ອງກັບບົດບາດທີ່ຕັ້ງຂອງປະເທດ ແລະຄວາມຄອງຄອຍຂອງບັນດາປະເທດສະມາຊິກສະຫະປະຊາຊາດ.
ທ່ານນາຍົກລັດຖະມົນຕີໄດ້ສະແດງຄວາມຂອບອົກຂອບໃຈຕໍ່ 53 ປະເທດອາຊີ-ປາຊີຟິກ ທີ່ໄດ້ເປັນເອກະສັນ ແຕ່ງຕັ້ງຫວຽດນາມເປັນຜູ້ສະມັກຮັບເລືອກຂອງກຸ່ມ ເຂົ້າເປັນສະມາຊິກບໍ່ຖາວອນຂອງຄະນະມົນຕີຄວາມໝັ້ນຄົງແຫ່ງສະຫະປະຊາຊາດສຳລັບໄລຍະ 2020-2021, ແລະສະແດງຄວາມຂອບໃຈຕໍ່ການສະໜັບສະໜູນຢ່າງກວ້າງຂວາງຂອງບັນດາປະເທດທີ່ມີຕໍ່ຫວຽດນາມ. ທ່ານນາຍົກລັດຖະມົນຕີໄດ້ສະເໜີແລະສະແດງຄວາມຫວັງວ່າ ຈະສືບຕໍ່ໄດ້ຮັບການສະໜັບສະໜູນຂອງທຸກປະເທດສະມາຊິກ. “ຫວຽດນາມໃຫ້ຄຳໝັ້ນສັນຍາຈະເປັນສະມາຊິກທີ່ຕັ້ງໜ້າ ມີຄວາມຮັບຜິດຊອບຂອງປະຊາຄົມສາກົນ ແລະສະຫະປະຊາຊາດຢູ່ສະເໝີ”.
ຢູ່ຂ້າງນອກການປະຊຸມສົນທະນາ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ພົບປະກັບທ່ານ ມາເຣຍ ເຟຣນານດາ ແອສະປີໂນຊາ ກາແຊດ, ປະທານສະມັດຊາໃຫຍ່ສະຫະປະຊາຊາດ ແລະທ່ານ ອານໂທນີໂອ ກູເຕແຣດ, ເລຂາທິການໃຫຍ່ຂອງສະຫະປະຊາຊາດ; ພົບປະກັບປະທານສະພາແຫ່ງລັດປະເທດກູບາ; ປະທານາທິບໍດີບັນດາປະເທດ ກຣົວຊີ, ຟີຈີ, ແຊງລຸຍຊີ; ນາຍົກລັດຖະມົນຕີ ບູນກາລີ,… ທ່ານນາຍົກລັດຖະມົນຕີກໍ່ໄດ້ໃຫ້ການຕ້ອນຮັບ ປະທານກອງທຶນ Harbinger ແລະອະດີດລັດຖະມົນຕີກະຊວງການເງິນສະຫະລັດອາເມລິກາ, ປະທານກອງທຶນ Warburg Pincus; ພົບປະສົນທະນາກັບຜູ້ຕາງໜ້າບໍລິສັດຂະໜາດໃຫຍ່ຈຳນວນໜຶ່ງ, ລວມທັງກຸ່ມບໍລິສັດ ຟອຣ໌ຈູນ 500 ອັນດັບໜຶ່ງ ຂອງສະຫະລັດອາເມລິກາເຊັ່ນ GE, Walmart, Amazon, HSBC, Metlife, Medtronic, Gilead Sciences…
ການທີ່ທ່ານນາຍົກລັດຖະມົນຕີ ຫງວຽນຊວັນຝຸກ ເຂົ້າຮ່ວມໃນກອງປະຊຸມສົນທະນາລະດັບສູງ ສະມັດບາໃຫຍ່ສະຫະປະຊາຊາດ ຄັ້ງທີ 73 ມີຄວາມໝາຍສຳຄັນພິເສດ, ຢືນຢັນບົດບາດແລະຄຳໝັ້ນສັນຍາຂອງຫວຽດນາມ ພ້ອມກັບບັນດາສະມາຊິກອື່ນຂອງສະຫະປະຊາຊາດ ໃນການຮ່ວມມືແກ້ໄຂບັນດາສິ່ງທ້າທາຍທົ່ວໂລກ; ເນັ້ນໜັກໃສ່ຂໍ້ຄວາມເພີ່ມທະວີຄູ່ຮ່ວມມືທົ່ວໂລກ ເພື່ອໂລກແຫ່ງສັນຕິພາບ ຄວາມຍຸຕິທຳ ແລະການພັດທະນາທີ່ຍືນຍົງສຳລັບປະຊາຊົນທຸກຄົນ./.
ໂດຍ ຫງວຽນດົງ
