ທ່ານນາຍົກລັດຖະມົນຕີ ຫງວຽນຊວັນຝຸກ ຢ້ຽມຢາມແລະເຮັດວຽກຢູ່ປະເທດ ອິນໂດເນເຊຍ
ວກ.ອອນໄລ - ໃນລະຫວ່າງວັນທີ 11-12 ຕຸລາ 2018 ທ່ານນາຍົກລັດຖະມົນຕີ ຫງວຽນຊວັນຝຸກ ພ້ອມກັບຄະນະຜູ້ແທນຫວຽດນາມ ໄດ້ເຂົ້າຮ່ວມການພົບປະລະຫວ່າງບັນດາຜູ້ນຳ ອາຊຽນ ເນື່ອງໃນໂອກາດກອງປະຊຸມປະຈຳປີຂອງກອງທຶນການເງິນສາກົນ (IMF) - ທະນາຄານໂລກ (WB) ທີ່ເມືອງ ບາລີ, ປະເທດອິນໂດເນເຊຍ ແລະ ຢ້ຽມຢາມເຮັດວຽກຢູ່ອິນໂດເນເຊຍ.
ການພົບປະລະຫວ່າງບັນດາຜູ້ນຳ ອາຊຽນ ເນື່ອງໃນໂອກາດກອງປະຊຸມປະຈຳປີຂອງກອງທຶນການເງິນສາກົນ - ທະນາຄານໂລກ ພາຍໃຕ້ຫົວຂໍ້ “ປະຕິບັດເປົ້າໝາຍການພັດທະນາແບບຍືນຍົງ ແລະ ຫຼຸດຜ່ອນຊ່ອງວ່າງການພັດທະນາ ໂດຍຜ່ານບັນດາການເຄື່ອນໄຫວປະສານສົມທົບພາກພື້ນແລະທົ່ວໂລກ”, ບັນດາຜູ້ນຳອາຊຽນ ແລະ ບັນດາຜູ້ນຳໜ້າອົງການສະຫະປະຊາຊາດ, ກອງທຶນການເງິນສາກົນ, ທະນາຄານໂລກ ໄດ້ແລກປ່ຽນຄວາມຄິດ, ທິດທາງ ແລະມາດຕະການ ເພື່ອເພີ່ມທະວີການຮ່ວມມື, ປະສາສົມທົບລະຫວ່າງອາຊຽນ ແລະສະຫະປະຊາຊາດ, ກອງທຶນການເງິນສາກົນ, ທະນາຄານໂລກ ໃນການປະຕິບັດບັນດາເປົ້າໝາຍພັດທະນາແບບຍືນຍົງ, ໂດຍຜ່ານການປະຕິບັດຢ່າງມີປະສິດທິຜົນ ບັນດາໂຄງການດຳເນີນງານຮອດປີ 2030 ກ່ຽວກັບເປົ້າໝາຍການພັດທະນາແບບຍືນຍົງ ແລະ ເພີ່ມທະວີການປະຕິສຳພັນລະຫວ່າງໂຄງການນີ້ກັບວິໄສທັດປະຊາຄົມອາຊຽນ 2025.
ກ່າວປາໄສທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີໃຫ້ສະຫະປະຊາຊາດ, ກອງທຶນການເງິນສາກົນ, ທະນາຄານໂລກ ສົມທົບກັບອາຊຽນ ແລະຫວຽດນາມ ໃນການຊຸກຍູ້ຜັນຂະຫຍາຍບັນດາຜົນສຳເລັດຂອງກອງປະຊຸມ WEF ASEAN ທີ່ຫາກໍ່ໄດ້ຈັດຕັ້ງຢູ່ຫວຽດນາມ, ໂດຍສະເພາະແມ່ນກ່ຽວກັບກົນໄກສະພາບແວດລ້ອມທຸລະກິດທີ່ກົມກຽວ, ກອບການເຊື່ອມຕໍ່ບັນດາສວນກ້າແຫ່ງຊາດ ແລະ ການເຊື່ອມຕໍ່ເຄືອຂ່າຍການສຶກສາ ແລະກໍ່ສ້າງລະບົບການຮຽນຮູ້ຕະຫຼອດຊີວິດ ຢູ່ບັນດາປະເທດອາຊຽນ.
ທ່ານນາຍົກລັດຖະມົນຕີສະເໜີໃຫ້ກອງທຶນການເງິນສາກົນ, ທະນາຄານໂລກ ຮ່ວມມືແລະໃຫ້ຄຳປຶກສາ ແກ່ບັນດາປະເທດອາຊຽນ ໃນການກໍ່ສ້າງກົນໄກການເຕືອນຄວາມສ່ຽງທາງເສດຖະກິດມະຫະພາກໃນພາກພື້ນ ເພື່ອຊ່ວຍຍົກສູງຄວາມສາມາດສ້າງຕົນເອງໃຫ້ເຂັ້ມແຂງ ແລະສາມາດປັບຕົວໄດ້ຂອງເສດຖະກິດອາຊຽນ, ສືບຕໍ່ສະໜັບສະໜູນ ແລະຮ່ວມມືຢ່າງແໜ້ນແຟ້ນກັບອາຊຽນ ໃນການພັດທະນາໂຄງສ້າງພື້ນຖານ, ເຕືອນໄພລ່ວງໜ້າຂອງໄພພິບັດທາງທຳມະຊາດ ແລະຮັບມືກັບການປ່ຽນແປງສະພາບອາກາດ, ຫຼຸດຜ່ອນຊ່ອງວ່າງການພັດທະນາ ເປັນຕົ້ນແມ່ນຊ່ອງວ່າງທາງດ້ານດິຈິຕອນ, ຄົ້ນຄວ້າແລະນຳໃຊ້ເຕັກໂນໂລຊີ, ປະຕິຮູບລະບຽບກົດໝາຍ ແລະການຝຶກອົບຮົມບຸກຄະລາກອນທີ່ມີຄຸນນະພາບສູງ ເພື່ອກຳໂອກາດທີ່ດີຂອງການປະຕິວັດອຸດສາຫະກຳ 4.0. ທ່ານນາຍົກລັດຖະມົນຕີ ຫງວຽນຊວັນຝຸກ ເນັ້ນວ່າ “ພວກຂ້າພະເຈົ້າເຊື່ອວ່າ, ດ້ວຍການພົວພັນຄູ່ຮ່ວມມືທົ່ວໂລກ ແລະພາກພື້ທີ່ເປີດກວ້າງ ກໍ່ຄືຄວາມຕັດສິນໃຈສູງຂອງພວກເຮົາ, ບັນດາເປົ້າໝາຍການພັດທະນາແບບຍືນຍົງ ແລະໂຄງການດຳເນີນງານ 2030 ຂອງສະຫະປະຊາຊາດ ຈະໄດ້ຮັບການປະຕິບັດຢ່າງສຳເລັດຜົນ ຢູ່ອາຊີຕາເວັນອອກສຽງໃຕ້ ແລະໃນທົ່ວໂລກ”.
ທ່ານນາຍົກລັດຖະມົນຕີ ຫງວຽນຊວັນຝຸກ ກໍ່ໄດ້ເຂົ້າຮ່ວມກອງປະຊຸມປະຈຳປີຂອງກອງທຶນການເງິນສາກົນ - ທະນາຄານໂລກ ດ້ວຍຖານະເປັນແຂກຮັບເຊີນພິເສດຂອງປະເທດເຈົ້າພາບ; ພົບປະກັບຜູ້ນຳບາງທ່ານໃນອາຊຽນ: ນາຍົກລັດຖະມົນຕີກຳປູເຈຍ, ນາຍົກລັດຖະມົນຕີມາເລເຊຍ, ປະທານາທິບໍດີຟີລິບປິນ,… ເພື່ອແລກປ່ຽນກ່ຽວກັບບັນດາມາດຕະການຊຸກຍູ້ການພົວພັນຮ່ວມມືສອງຝ່າຍ ແລະແກ້ໄຂບັນຫາລະອຽດຈຳນວນໜຶ່ງ. ໃນການພົບປະກັບຜູ້ອຳນວຍການໃຫຍ່ກອງທຶນການເງິນສາກົນ, ທ່ານນາງ ຄຣິສຕີນ ລາກາຣ໌ດ ໄດ້ປະເມີນໃນທາງບວກ ຕໍ່ບັນດານະໂຍບາຍຄຸ້ມຄອງ ຮັກສາຄວາມໝັ້ນຄົງທາງເສດຖະກິດມະຫາພາກຂອງຫວຽດນາມ ໃນສະພາບການສິ່ງແວດລ້ອມທົ່ວໂລກມີຄວາມຜັນຜວນທີ່ຄາດເດົາຍາກ. ກອງທຶການເງິນສາກົນພ້ອມແລ້ວທີ່ຈະຮ່ວມມື, ໃຫ້ຄຳປຶກສາ ກັບຫວຽດນາມໃນເວລາຕໍ່ໄປ.
ໃນການພົບປະເຈລະຈາກັບປະທານາທິບໍດີອິນໂດເນເຊຍ ໂຈໂກ ວີໂດໂດ, ສອງຝ່າຍເຫັນດີເປັນເອກະສັນຈະສ້າງໃຫ້ມີການບຸກທະລຸໃໝ່ ແລະ ພາໃຫ້ການຮ່ວມມືທາງດ້ານເສດຖະກິດກາຍເປັນເສົາຄ້ຳຕົ້ນຕໍຂອງການພົວພັນຄູ່ຮ່ວມມືຍຸດທະສາດ; ສູ້ຊົນຍົກມູນຄ່າການຄ້າສອງຝ່າຍຂຶ້ນເປັນ 10 ຕື້ໂດລາສະຫະລັດໂດຍໄວ ຕາມທິດສົມດຸນ, ອຳນວຍຄວາມສະດວກຫຼາຍກວ່າອີກ ໃຫ້ບັນດາກົນໄກສົນທະນະວິສາຫະກິດ-ວິສາຫະກິດ, ວິສາຫະກິດ-ລັດຖະບານ, ຊ່ວຍເຫຼືອວິສາຫະກິດຂະໜາດກາງແລະຂະໜາດນ້ອຍ, ແກ້ໄຂຂໍ້ຄົງຄ້າງໃຫ້ເສັດສິ້ນໂດຍໄວ.
ສອງຝ່າຍເປັນເອກະສັນຈະເພີ່ມທະວີການຮ່ວມມືໃນບັນດາຂົງເຂດທີ່ມີຄວາມສາມາດບົ່ມຊ້ອນອື່ນຄື ກະສິກຳ, ພັດທະນາແຫຼ່ງບຸກຄະລາກອນ ແລະທ່ອງທ່ຽວ, ໃນນັ້ນພິຈາລະນາຄວາມສາມາດເປີດສາຍການບິນເຊື່ອນຕໍ່ແຫຼ່ງທ່ອງທ່ຽວລະຫວ່າງສອງປະເທດ.
ສອງຝ່າຍເນັ້ນໜັກເຖິງຄວາມສຳຄັນຂອງສັນຕິພາບ, ສະຖຽນລະພາບ, ຄວາມສະຫງົບ, ຄວາມປອດໄພ ແລະເສລີພາບໃນການເດີນເຮືອ ແລະການບິນ ຢູ່ທະເລຕາເວັນອອກ; ແກ້ໄຂຂໍ້ຂັດແຍ່ງພິພາດດ້ວຍສັນຕິວິທີບົນພື້ນຖານກົດໝາຍສາກົນ, ເປັນຕົ້ນແມ່ນອະນຸສັນຍາສະຫະປະຊາຊາດກ່ຽວກັບກົດໝາຍມະເລ (UNCLOS) ປີ 1982.
ໃນໂອກາດນີ້, ທ່ານນາຍົກລັດຖະມົນຕີ ຫງວຽນຊວັນຝຸກ ແຈ້ງຂ່າວວ່າຫວຽດນາມຕົກລົງຊ່ວຍເຫຼືອອິນໂດເນເຊຍ 100.000 ໂດລາສະຫະລັດ ເພື່ອປະກອບສ່ວນຊ່ວຍເຫຼືອປະຊາຊົນອິນໂດເນເຊຍ ແກ້ໄຂຜົນກະທົບຈາກແຜ່ນດິນໄຫວ, ຄື້ນສຶນາມິ. ທ່ານນາຍົກລັດຖະມົນຕີກ່າວວ່າ “ລັດຖະບານແລະປະຊາຊົນຫວຽດນາມຈະຄຽງບ່າຄຽງໄລ່ກັບພວກເພື່ອນຢູ່ສະເໝີໃນວັນເວລາທີ່ຫຍຸ້ງຍາກນີ້”.
ໃນການຢ້ຽມຢາມ, ທ່ານນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບຜູ້ນຳວິສາຫະກິດອິນໂດເນເຊຍບາງທ່ານເຊັ່ນ ປະທານກຸ່ມບໍລິສັດ Ciputra, ປະທານກຳມະການບໍລິສັດຫຼັກຊັບ Nikko Indonesia, ປະທານຫ້ອງການອຸດສາຫະກຳ ແລະການຄ້າອິນໂດເນເຊຍ.
ກ່າວປາໄສທີ່ກອງປະຊຸມຖະແຫຼງຂ່າວຮ່ວມກັນ, ທ່ານປະທານາທິບໍດີ ໂຈໂກ ວີໂດໂດ ໄດ້ຕີລາຄາສູງຜົນຂອງການພົບປະເຈລະຈາ, ທິດທາງການຮ່ວມມືລະຫວ່າງຄູ່ຮ່ວມຍຸດທະສາດ ແລະ ສະແດງຄວາມຂອບໃຈຕໍ່ທ່ານນາຍົກລັດຖະມົນຕີ ຫງວຽນຊວັນຝຸກ ທີ່ໄດ້ເອົາໃຈໃສ່ເຖິງບັນດານັກລົງທຶນອິນໂດເນເຊຍຢູ່ຫວຽດນາມ. ທ່ານປະທານາທິບໍດີ ໂຈໂກ ວີໂດໂດ ສະແດງຄວາມຫວັງວ່າ ບັນດານັກທຸລະກິດອິນໂດເນເຊຍຈະຄົ້ນເຜີຍໂອກາດລົງທຶນທຸລະກິດຢູ່ຫວຽດນາມ.
ການຢ້ຽມຢາມແລະເຮັດວຽກຢູ່ອິນໂດເນເຊຍ ຂອງທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສືບຕໍ່ຢືນຢັນບົດບາດສະມາຊິກທີ່ຕັ້ງໜ້າ, ເປັນເຈົ້າການ ແລະມີຄວາມຮັບຜິດຊອບຂອງຫວຽດນາມຢູ່ໃນອາຊຽນ; ສະແດງໃຫ້ເຫັນເຖິງຄວາມເອົາໃຈໃສ່ຮ່ວມມືຢ່າງມີເນື້ອແທ້ຕົວຈິງຂອງຫວຽດນາມ ກັບບັນດາສະຖາບັນການເງິນພະຫຸພາຄີທີ່ໃຫຍ່ທີ່ສຸດໃນໂລກ ແລະຍົກສູງປະສິດທິຜົນການຮ່ວມມືກັບປະເທດເຈົ້າພາບອິນໂດເນເຊຍ ປະກອບສ່ວນໃນການສ້າງປະຊາຄົມອາຊຽນທີ່ເຂັ້ມແຂງແລະສ້າງສັນ, ໃຫ້ພາກພື້ນອາຊີຕາເວັນອອກສຽງໃຕ້ມີສັນຕິພາບ, ສະຖຽນລະພາບ, ສາມັກຄີ, ຈະເລີນພັດທະນາ ແລະ ການເຕີບໂຕຢ່າງຍືນຍົງ./.
ໂດຍ ຫງວຽນດຶກ