ນາຍົກລັດຖະມົນຕີຫວຽດນາມ ຫງວຽນຊວັນຝຸກ ສຳເລັດສິ້ນສຸດການຢ້ຽມຢາມແລະເຮັດວຽກຢູ່ເອີຣົບ ຢ່າງຈົດງາມ
ວກ.ອອນໄລ - ໃນລະຫວ່າງວັນທີ 14-21 ຕຸລາ 2018, ທ່ານນາຍົກລັດຖະມົນຕີ ຫງຽນຊວັນຝຸກ ແລະຄະນະຜູ້ແທນຫວຽດນາມ ໄດ້ດຳເນີນການຢ້ຽມຢາມແລະເຮັດວຽກທີ່ເອີຣົບ: ເຂົ້າຮ່ວມກອງປະຊຸມຂັ້ນສູງ ອາຊີ - ອີຢູ (ASEM - ອາເຊມ) ຄັ້ງທີ 12, ເຂົ້າຮ່ວມກອງປະຊຸມຂັ້ນສູງຄູ່ຮ່ວມມືເພື່ອເປົ້າໝາຍການເຕີບໂຕສີຂຽວທົ່ວໂລກ (P4G - ພີ4ຈີ), ຢ້ຽມຢາມຢ່າງເປັນທາງການທີ່ ປະເທດສາທາລະນະລັດໂອຕຣິດ, ລາຊະອານາຈັກແບນຊິກ, ລາຊະອານາຈັກດານມາກ, ຢ້ຽມຢາມແລະເຮັດວຽກທີ່ສະຫະພາບເອີຣົບ.
ການເດີນທາງໄປປະຕິບັດງານຂອງນາຍົກລັດຖະມົນຕີຫວຽດນາມ ຫງວຽນຊວັນຝຸກ ຄັ້ງນີ້ “ມີ 3 ຈຸດໝາຍປາຍທາງ, 6 ເປົ້າໝາຍ” ລວມມີວາລະການເຮັດວຽກທີ່ຕໍ່ເນື່ອງ, ການເຄື່ອນໄຫວຫຼາຍຝ່າຍ ແລະສອງຝ່າຍເປັນ 69 ຄັ້ງ, ໃນຂອບເຂດຂອງສອງກອງປະຊຸມສາກົນໃຫຍ່, ເຮັດວຽກກັບຄະນະກຳມາທິການ ເອີຣົບ ແລະຢ້ຽມຢາມ 3 ປະເທດຄູ່ຮ່ວມມືທີ່ສຳຄັນຂອງຫວຽດນາມຢູ່ເອີຣົບ.
ທີ່ກອງປະຊຸມ ອາເຊມ ຄັ້ງທີ 12 ຢູ່ປະເທດແບນຊິກ, ປະທານສະພາເອີຣົບ ໄດ້ເຊີນທ່ານນາຍົກລັດຖະມົນຕີ ຫງວຽນຊວັນຝຸກ ກ່າວນຳຫົວຂໍ້ທີ່ກອງປະຊຸມຄົບຄະນະກ່ຽວກັບ “ປັບປຸງລະບົບຫຼາຍຝ່າຍ: ຊຸກຍູ້ການພົວພັນຄູ່ຮ່ວມມື ອາເຊມ ເພື່ອຮັບມືກັບຄວາມທ້າທາຍລະດັບໂລກ”. ນາຍົກລັດຖະມົນຕີໄດ້ສົ່ງຂໍ້ສະເໜີຕ່າງໆທີ່ໄດ້ຮັບການຕີລາຄາສູງ, ຄື ອາເຊມຕ້ອງການນຳໜ້າໃນການຊຸກຍູ້ການຮ່ວມມືຫຼາຍຝ່າຍ, ນຳໜ້າໃນການຜັນຂະຫຍາຍບັນດາຄຳໝັ້ນສັນຍາກ່ຽວກັບການປ່ຽນແປງດິນຟ້າອາກາດ, ໄພທຳມະຊາດ. ທ່ານນາຍົກລັດຖະມົນຕີໄດ້ເນັ້ນໜັກວ່າ ອາເຊມຕ້ອງການແບ່ງປັນປະສົບການໃນການກະຕຸ້ນຄວາມສາມາດບົ່ມຊ້ອນທາງດ້ານການປ່ຽນແປງໃໝ່, ຫົວຄິດປະດິດສ້າງ, ຊ່ວຍເຫຼືອບັນດາກຸ່ມປະຊາຊົນທີ່ຖືກເສຍຫາຍງ່າຍໃນການເຂົ້າເຖິງເຕັກໂນໂລຊີຈິດິຕອນ, ປັບຕົວໃຫ້ສອດຄ່ອງກັບການປ່ຽນແປງ ແລະ ຍົກສູງຄວາມສາມາດຮັບມືກັບຄວາມສ່ຽງຕ່າງໆ.
ທ່ານນາຍົກລັດຖະມົນຕີຢືນຢັນວ່າ ຫວຽດນາມໃຫ້ຄວາມສຳຄັນກັບການຮ່ວມມື ອາເຊມ ຢູ່ສະເໝີ; ທ່ານສະເໜີໃຫ້ຫວຽດນາມໄດ້ຮັບການຈັດຕັ້ງ “ກອງປະຊຸມອາເຊມ ກ່ຽວກັບການຊຸກຍູ້ການພັດທະນາເສດຖະກິດ-ສັງຄົມກວມລວມຢູ່ອາຊີແລະເອີຣົບ” ແລະ “ກອງປະຊຸມສຳມະນາອາເຊມ ກ່ຽວກັບເສດຖະກິດດິຈິຕອນ ໃນສະພາບການປະຕິວັດອຸດສາຫະກຳ 4.0” ໃນປີ 2019.
ໃນການປະຊຸມວົງແຄບ ລະຫວ່າງຜູ້ນຳບັນດາປະເທດອາເຊມ ທີ່ປຶກສາຫາລືກ່ຽວກັບ “ບັນຫາສາກົນ ແລະ ພາກພື້ນ”, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ກ່າວປາໄສເນັ້ນໜັກວ່າ ສັນຕິພາບ, ການຮ່ວມມືແລະການພັດທະນາ ເປັນກະແສຫຼັກຂອງຍຸກສະໄໝ, ແຕ່ປະຊາຄົມສາກົນກຳລັງເຫັນກັບຕາ ບັນດາການຫັນປ່ຽນຢ່າງເລິກເຊິ່ງ ແລະ ສິ່ງທ້າທາຍທີ່ບໍ່ເຄີຍມີມາກ່ອນ. ນາຍົກລັດຖະມົນຕີເນັ້ນໜັກວ່າ ບັນຫາສະເພາະໜ້າແມ່ນຫຼຸດຜ່ອນອຸປະສັກທາງການຄ້າໂດຍໄວ ເພື່ອສືບຕໍ່ການຟື້ນຟູແລະຮັບປະກັນການພັດທະນາທີ່ສົດໃສຂອງເສດຖະກິດໂລກ. ຫວຽດນາມແລະບັນດາປະເທດອາຊຽນ ໄດ້ແລະພວມປະສານສົມທົບຢ່າງແໜ້ນແຟ້ນກັບປະຊາຄົມສາກົນ, ໃນນັ້ນມີບັນດາປະເທດສະມາຊິກອາເຊມ, ເພື່ອຮັກສາສັນຕິພາບ, ສະຖຽມລະພາບ, ຄວາມສະຫງົບປອດໄພ, ເສລີພາບໃນການເດີນທະເລແລະເດີນອາກາດ, ການຄ້າເສລີໂດຍບໍ່ຖືກກີດຂວາງຢູ່ທະເລຕາເວັນອອກ, ບ່ອນທີ່ມີເສັ້ນທາງທະເລສາກົນໃຫຍ່, ເຊື່ອມຕໍ່ການແລກປ່ຽນສິນຄ້າອາຊີ-ເອີຣົບ ແລະທົ່ວໂລກ.
ໃນເວລາເຄື່ອນໄຫວນອກກອງປະຊຸມ, ນາຍົກລັດຖະມົນຕີໄດ້ມີການພົບປະສອງຝ່າຍ 12 ຄັ້ງ ກັບປະມຸກແຫ່ງຊາດແລະຜູ້ນຳທີ່ເຂົ້າຮ່ວມກອງປະຊຸມ ລວມມີ ປະທານາທິບໍດີມົງໂກລີ, ນາຍົກລັດຖະມົນຕີ ຈີນ, ນອກແວ, ສະໂລເວນີ, ແອັດສະປາຍ, ໂຮນລັງ, ໂປໂລຍ, ແຟງລັງ, ສະຫະພັນລັດເຊຍ, ເກຣັກ, ອັງກິດ...ເພື່ອແລກປ່ຽນບັນດາມາດຕະການຊຸກຍູ້ການຮ່ວມມືສອງຝ່າຍ ແລະ ແກ້ໄຂບັນດາບັນຫາສະເພາະ.
ການນຳບັນດາປະເທດໄດ້ຕີລາຄາສູງຜົນງານແຫ່ງການພັດທະນາເສດຖະກິດ-ສັງຄົມ ແລະ ຖານະຕຳແໜ່ງ, ພາລະບົດບາດທີ່ນັບມື້ນັບໄດ້ຮັບການຍົກສູງຂອງຫວຽດນາມ ໃນພາກພື້ນແລະໃນເວທີສາກົນ. ຫຼາຍປະເທດໄດ້ຢືນຢັນຄວາມສະໜັບສະໜູນ ໃຫ້ຫວຽດນາມເປັນສະມາຊິກບໍ່ຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ໄລຍະປີ 2020-2021, ໃຫ້ຄຳໝັ້ນສັນຍາຈະສືບຕໍ່ສົມທົບຢ່າງແໜ້ນແຟ້ນກັບຫວຽດນາມຢູ່ສະຫະປະຊາຊາດ ແລະອົງການຈັດຕັ້ງສາກົນ, ພາກພື້ນອື່ນ ແນໃສ່ຮັກສາສັນຕິພາບ, ຄວາມໝັ້ນຄົງ, ການຮ່ວມມື ແລະ ການພັດທະນາຢູ່ພາກພື້ນແລະໃນໂລກ, ໃນນັ້ນມີທະເລຕາເວັນອອກ. ບັນດາປະເທດສະມາຊິກອີຢູ ໄດ້ສະໜັບສະໜູນສົມທິສັນຍາວ່າດ້ວຍການຄ້າເສລີ ຫວຽດນາມ - ອີຢູ (EVFTA) ແລະໃຫ້ທັດສະນະວ່າ ຕ້ອງການລົງນາມແລະຮັບຮອງເອົາ EVFTA ໂດຍໄວ ເພື່ອແນໃສ່ປະຕິບັດຍຸດທະສາດຂອງອີຢູກ່ຽວກັບການເຊື່ອມຕໍ່ອີຢູ-ອາຊີ ໃຫ້ປະກົດເປັນຈິງ.
ໃນການເຂົ້າຮ່ວມກອງປະຊຸມ P4G ຄັ້ງທຳອິດທີ່ປະເທດດານມາກ, ໃນບົດບາດຂອງປະເທດໜຶ່ງໃນບັນດາປະເທດກໍ່ຕັ້ງເວທີປາໄສ P4G, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ສະເໜີຂໍ້ຄວາມທີ່ແຂງແຮງກ່ຽວກັບຄວາມສຳຄັນຂອງການເພີ່ມທະວີການຮ່ວມມືປະຕິບັດບັນດາເປົ້າໝາຍຄວາມເຕີບໂຕສີຂຽວທົ່ວໂລກ ເຖິງປີ 2030. ຫວຽດນາມຈະມີການປະສານສົມທົບຢ່າງແໜ້ນແຟ້ນໃນຂອບເຂດ P4G ໃນເວລາຕໍ່ໄປນີ້ເພື່ອຜັນຂະຫຍາຍຢ່າງສຳເລັດຜົນ ບັນດາຄວາມຄິດລິເລີ່ມ ກ່ຽວກັບການຊຸກຍູ້ການພັດທະນາແບບຍືນຍົງ ໂດຍຜ່ານການຜັນຂະຫຍາຍປະຕິບັດຍຸດທະສາດການເຕີບໂຕສີຂຽວຢູ່ຫວຽດນາມ ແລະ ໃນຂອບເຂດທົ່ວໂລກ. ເມື່ອສິ້ນສຸດບົດປາໄສ, ທ່ານນາຍົກລັດຖະມົນຕີໄດ້ເນັ້ນວ່າ: ຫວຽດນາມກຽມຄວາມພ້ອມຍູ້ແຮງການຮ່ວມມືເພື່ອປະຕິບັດບັນດາຄວາມຄິດລິເລີ່ມຂອງເວທີປາໄສ ກ່ຽວກັບການຊຸກຍູ້ບັນດາໂຄງການຮ່ວມມືພາກລັດ-ເອກະຊົນ ໃນການເຕີບໂຕສີຂຽວ, ພິເສດແມ່ນກ່ຽວກັບການປະຢັດພະລັງງານ ແລະ ພະລັງງານທົດແທນ, ກະສິກຳ, ຊັບພະຍາກອນແຫຼ່ງນ້ຳ, ພັດທະນາຕົວເມືອງແບບສະຫຼາດ, ເສດຖະກິດແບບໜູນວຽນ...
ໃນການພົບປະເຈລະຈາກັບນາຍົກລັດຖະມົນຕີ ໂອຕຣິດ, ປະເທດກຳລັງດຳລົງຕ່ຳແໜ່ງເປັນປະທານສະຫະພາບເອີຣົບ, ສອງຝ່າຍໄດ້ເຫັນດີເປັນເອກະພາບ ຈະປະສານສົມທົບແລະພະຍາຍາມເຮັດໃຫ້ ໂອຕຣິດ ກາຍເປັນໜຶ່ງໃນບັນດາຄູ່ຮ່ວມມືເສດຖະກິດນຳໜ້າເອີຣົບ ຂອງຫວຽດນາມ. ໃນປະຈຸບັນ ຫວຽດນາມເປັນຄູ່ຮ່ວມມືດ້ານການຄ້າໃຫຍ່ທີ່ສຸດຂອງໂອຕຣິດ ໃນອາຊີຕາເວັນອອກສຽງໃຕ້ ແລະ ໂອຕຣິດກໍ່ເປັນໜຶ່ງໃນ 10 ຕະຫຼາດສົ່ງອອກໃຫຍ່ທີ່ສຸດຂອງຫວຽດນາມໃນອີຢູ. ຍອດມູນຄ່າການຄ້າສອງສົ້ນປີ 2017 ບັນລຸ 4 ຕື້ໂດລາສະຫະລັດ ແລະ ກຳລັງເພີ່ມຂຶ້ນຢ່າງໄວວາ.
ໃນການພົບປະເຈລະຈາກັບນາຍົກລັດຖະມົນຕີ ແບນຊິກ, ສອງຝ່າຍໄດ້ເຫັນດີເປັນເອກະພາບ ຈະເພີ່ມທະວີການຮ່ວມມືທາງດ້ານເສດຖະກິດ, ຮັກສາບັນດາກົນໄກຮ່ວມມືຄື ຄະນະກຳມະການປະສົມຫວຽດນາມ ແບນຊິກ ກ່ຽວກັບການຮ່ວມມືເສດຖະກິດ ເພື່ອກຳນົດທິດທາງການພົວພັນດ້ານເສດຖະກິດ. ເນື່ອງໃນໂອກາດນີ້, ສອງຝ່າຍໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດໃນຂົງເຂດກະສິກຳຢ່າງເປັນທາງການ.
ໃນການພົບປະເຈລະຈາກັບນາຍົກລັດຖະມົນຕີ ດານມາກ, ສອງຝ່າຍດີໃຈຮັບຮູ້ວ່າ ນັບແຕ່ເວລາຍົກລະດັບການພົວພັນສອງຝ່າຍຂຶ້ນເປັນຄູ່ຮ່ວມມືຮອບດ້ານໃນເດືອນກັນຍາ 2013, ຍອດມູນຄ່າການຄ້າສອງສົ້ນເພີ່ມຂຶ້ນຢ່າງຕໍ່ເນື່ອງ, ບັນລຸ 664 ລ້ານໂດລາສະຫະລັດໃນປີ 2017, ຫຼາຍກວ່າທົບ 4 ເທື່ອທຽບກັບປີ 2005 ແລະ 2 ເທື່ອທຽບກັບປີ 2010. ສອງຝ່າຍໄດ້ແບ່ງປັນການປະເມີນຜົນການພົວພັນສອງຝ່າຍ ແລະ ແລກປ່ຽນກ່ຽວກັບບັນດາມາດຕະການອັນລະອຽດ ແນໃສ່ເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ-ດານມາກ ເລິກເຊິ່ງກວ່າອີກ.
ການເຮັດວຽກກັບປະທານຄະນະກຳມາທິການເອີຣົບ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ເນັ້ນໜັກວ່າ ອີຢູ ເປັນຄູ່ຮ່ວມມືການຄ້າອັບດັບທີ 3, ເປັນຜູ້ໃຫ້ການຊ່ວຍເຫຼືອຫຼ້າທຶນພັດທະນາ ODA ໃຫຍ່ທີ່ສຸດ, ເປັນຜູ້ລົງທຶນໂດຍກົງອັນດັບໜຶ່ງຂອງຫວຽດນາມ. ສອງຝ່າຍມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມືນຳກັນ, ພື້ນຖານເສດຖະກິດພັດທະນາສູງຂອງ ອີຢູ ສາມາດເພີ່ມເຕີມເປັນຢ່າງດີ ໃຫ້ເສດຖະກິດທີ່ກຳລັງພັດທະນາຢ່າງໄວວາຂອງຫວຽດນາມ. ປະທານຄະນະກຳມາທິການເອີຣົບໃຫ້ຄວາມສຳຄັນແກ່ການຮ່ວມມືຮອບດ້ານກັບຫວຽດນາມ ແລະດີໃຈແຈ້ງໃຫ້ຊາບວ່າ ໃນກອງປະຊຸມທີ່ສິ້ນສຸດລົງໃນເວລາ 12 ໂມງຂອງວັນທີ 17 ຕຸລາ 2018, ຄະນະກຳມາທິການເອີຣົບ ໄດ້ເຫັນດີເປັນເອກະພາບການຍື່ນໃຫ້ສະພາເອີຣົບຮັບຮອງເອົາການລົງນາມໃນສັນຍາການຄ້າເສລີຫວຽດນາມ-ອີຢູ (EVFTA) ຢ່າງເປັນທາງການ (ຄາດວ່າຈະເຊັນໃນທ້າຍປີ 2018) ແລະຍື່ນໃຫ້ລັດຖະສະພາເອີຣົບ ໃຫ້ສັດຕະຍະບັນ (ໃນຕົ້ນປີ 2019).
ໃນບັນດາເວທີປາໄສວິສາຫະກິດ, ການສຳມະນາຫົວຂໍ້ສະເພາະ, ການພົບປະສອງຝ່າຍ, ບັນດາການນຳແລະວິສາຫະກິດຂອງປະເທດຕ່າງໆໄດ້ສະແດງຄວາມມຸ່ງມາດປາຖະໜາວ່າ ສັນຍາການຄ້າເສລີຫວຽດນາມ - ອີຢູ (EVFTA) ຈະໄດ້ລົງນາມແລະອະນຸມັດຜ່ານໃນເວລາໄວທີ່ສຸດ; ໃຫ້ທັດສະນະວ່າ ສັນຍາການຄ້າເສລີ ຫວຽດນາມ - ອີຢູ ຈະເປີດໂອກາດໃຫຍ່ໃຫ້ແກ່ການຮ່ວມມືເສດຖະກິດ, ການຄ້າ, ການລົງທຶນລະຫວ່າງ ຫວຽດນາມ ແລະ ອີຢູ.
ການຢ້ຽມຢາມແລະເຮັດວຽກຢູ່ເອີຣົບ ຂອງນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນຂັ້ນສູງລັດຖະບານຫວຽດນາມ ໄດ້ສຳເລັດຜົນຢ່າງຈົບງາມ, ສົ່ງຂໍ້ຄວາມແລະຮູບພາບກ່ຽວກັບປະເທດຫວຽດນາມໃໝ່ ທີ່ມີຄວາມຂະຫຍັນຂັນເຄື່ອນ, ພັດທະນາເສດຖະກິດຢ່າງໄວວາ ແລະ ມີສະຖຽມລະພາບທາງດ້ານການເມືອງ-ສັງຄົມ. ການຢ້ຽມຢາມໄດ້ສ້າງຈຸດເດັ່ນທີ່ສຳຄັນ, ໂດຍສະເພາະການທີ່ຄະນະກຳມາທິການເອີຣົບໄດ້ຮັບຮອງເອົາສັນຍາການຄ້າເສລີຫວຽດນາມ - ອີຢູ (EVFTA), ສ້າງບັນຍາກາດເບີກບານມ່ວນຊື່ນແລະເຊື່ອໝັ້ນໃນຊຸມຊົນທຸລະກິດ, ສືບຕໍ່ຍົກລະດັບການພົວພັນສອງຝ່າຍກັບບັນດາຄູ່ຮ່ວມມືຢູ່ ເອີຣົບ, ເປີດກວ້າງການພົວພັນຕ່າງປະເທດຫຼາຍຝ່າຍ, ປະກອບສ່ວນອັນຕັ້ງໜ້າເຂົ້າໃນການກໍ່ສ້າງ, ກຳນົດບັນດາລະບຽບກົດໝາຍກ່ຽວກັບການຮ່ວມມືຫຼາຍຝ່າຍ, ພ້ອມທັງເຂົ້າຮ່ວມຢ່າງມີປະສິດທິຜົນ, ປະກອບສ່ວນເຂົ້າໃນການແກ້ໄຂສິ່ງທ້າທາຍລະດັບໂລກ./.
ໂດຍ ຫງວຽນດຶກ