ທ່ານນາຍົກລັດຖະມົນຕີຫວຽດນາມ ຫງວຽນຊວັນຝຸກ ເຂົ້າຮ່ວມງານສະແດງສິນຄ້ານຳເຂົ້າສາກົນຂອງຈີນ ຄັ້ງທີໜຶ່ງ
ວກ.ອອນໄລ - ໃນລະຫວ່າງວັນທີ 4-5 ພະຈິກ 2018, ໂດຍຕອບສະໜອງຕາມຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດຈີນ ຫຼີ ຈິ້ນຜິງ, ທ່ານນາຍົກລັດຖະມົນຕີ ຫງວຽນຊວັນຝຸກ ແລະຄະນະຜູ້ແທນລັດຖະບານຫວຽດນາມ ໄດ້ເຂົ້າຮ່ວມງານສະແດງສິນຄ້ານຳເຂົ້າສາກົນຂອງຈີນ ຄັ້ງທີໜຶ່ງຢູ່ ຊຽງໄຮ້ (CIIE - ຊີໄອໄອອີ 2018).
ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ດຳເນີນໂຄງການເຮັດວຽກທີ່ຮີບດ່ວນ ດ້ວຍການເຄື່ອນໄຫວຕ່າງໆເຊັ່ນ ເຂົ້າຮ່ວມພິທີເປີດ ຊີໄອໄອອີ 2018 ແລະ ເວທີປາໄສເສດຖະກິດແລະການຄ້າສາກົນ ຫົງສຽວ; ຢ້ຽມຊົມຮ້ານສິນຄ້າຂອງປະເທດຕ່າງໆ ແລະຮ້ານສິນຄ້າຂອງວິສາຫະກິດຫວຽດນາມ. ທ່ານນາຍົກລັດຖະມົນຕີໄດ້ມີການພົບປະກັບ ທ່ານເລຂາທິການໃຫຍ່, ປະທານປະເທດຈີນ ຫຼີ ຈິ້ນຜິງ, ພົບປະກັບທ່ານນາຍົກເທດສະມຸນຕີ ນະຄອນຊຽງໄຮ້; ສົນທະນາ, ປຶກສາຫາລືແລະຕ້ອນຮັບຜູ້ຕາງໝ້າບໍລິສັດຊັ້ນນຳຂອງຈີນຫຼາຍທ່ານ; ເຂົ້າຮ່ວມພິທີເປີດນຳໃຊ້ສຳນັກງານສົ່ງເສີມການຄ້າຫວຽດນາມຢູ່ເມືອງ ຫາງໂຈວ,...
ກ່າວປາໄສໃນພິທີເປີດ ຊີໄອໄອອີ 2018, ທ່ານນາຍົກລັດຖະມົນຕີ ຫງວຽນຊວັນຝຸກ ຊົມເຊີຍ ຕີລາຄາສູງການຈັດຕັ້ງງານສະແດງສິນຄ້າ, ສິ່ງສະແດງໃຫ້ເຫັນເຖິງຈິນຕະນາການຮ່ວມມືພ້ອມກັນມີໄຊ, ມີຜົນປະໂຫຍດຮ່ວມກັນ, ຊຸກຍູ້ການຮ່ວມມືດ້ານເສດຖະກິດ, ການຄ້າ ແລະເພີ່ມເຕີມກຳລົງໜູນທີ່ແຂງແຮງໃຫ້ແກ່ການເຕີບໂຕຂອງພາກພື້ນແລະທົ່ວໂລກ.
ທ່ານນາຍົກລັດຖະມົນຕີ ຫງວຽນຊວັນຝຸກ ເນັ້ນໜັກວ່າ, ຫວຽດນາມໃຫ້ຄວາມສຳຄັນແກ່ການພັດທະນາການພົວພັນທີ່ໝັ້ນຄົງ; ມີຄວາມປາຖະໜາຮ່ວມກັບຈີນ, ຄູ່ຮ່ວມການຄ້າໃຫຍ່ທີ່ສຸດຂອງຫວຽດນາມ, ຊຸກຍູ້ເສດຖະກິດ, ການຄ້າໃຫ້ພັດທະນາຢ່າງຍືນຍົງ, ມີຜົນປະໂຫຍດຮ່ວມກັນ. ຫວຽດນາມສະໜັບສະໜູນການເປີດເສລີທາງການຄ້າ ທີ່ມີຄວາມຍຸຕິທຳ, ໂປ່ງໃສ, ກວມລວມ ແລະອີງຕາມກົດລະບຽບຂອງອົງການການຄ້າໂລກທີ່ເປັນຮາກຖານ. ລັດຖະບານຫວຽດນາມໃຫ້ຄຳໝັ້ນສັນຍາຈະສ້າງສະພາບແວດລ້ອມແຫ່ງການທຸລະກິດທີ່ເອື້ອອຳນວຍ, ຕອບສະໜອງມາດຕະຖານຂັ້ນສຸງຂອງສາກົນ ແລະ ມາດຕະຖານຂັ້ນສູງໃນບັນດາສັນຍາການຄ້າເສລີຮຸ່ນໃໝ່ ທີ່ຫວຽດນາມເຂົ້າຮ່ວມ. ທ່ານນາຍົກລັດຖະມົນຕີຢືນຢັນ ແລະຫວັງວ່າວິສາຫະກິດຂອງຕ່າງປະເທດ, ພິເສດແມ່ນວິສາຫະກິດຂອງຈີນ ຈະມີຄວາມເຂົ້າໃຈຫຼາຍກວ່າອີກກ່ຽວກັບຜະລິດຕະພັນ, ຄວາມສາມາດພັດທະນາຂອງຫວຽດນາມ ແລະ ພ້ອມກັນຊຸກຍູ້ການຮ່ວມມືທາງດ້ານການຄ້າໃຫ້ຍືນຍົງແລະມີຜົນປະໂຫຍດຮ່ວມກັນ.
ຫຼັງຈາກພິທີເປີດ, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ຢ້ຽມຊົມບໍລິເວນວາງສະແດງສິນຄ້າຫວຽດນາມ ຊຶ່ງມີການເຂົ້າຮ່ວມຂອງ 25 ບໍລິສັດທີ່ມີກຳລັງສົ່ງອອກດີ ແລະ ເຄື່ອງໝາຍການຄ້າທີ່ມີຊື່ສຽງ, ຄຸນນະພາບ ຂອງຫວຽດນາມໃນຂົງເຂດຜະລິດຕະພັນກະສິກຳ, ອາຫານທີ່ປຸງແຕ່ງ ແລະ ບໍລິການດ້ານ ໄອທີ. ໃນຂອບເຂດງານສະແດງສິນຄ້າ, ບັນດາບໍລິສັດຂອງຫວຽດນາມໄດ້ຈັດການປະຊຸມ ພົບປະແລກປ່ຽນກັບຄູ່ຄ້າຂອງຈີນ ແລະຂອງປະເທດຕ່າງໆ ເພື່ອຊອກຫາໂອກາດການຮ່ວມມື, ລົງທຶນໃນເວລາທີ່ຈະເຖິງ.
ເນື່ອງໃນໄອກາດການເຂົ້າຮ່ວມ ຊີໄອໄອອີ 2018, ທ່ານນາຍົກລັດຖະມົນຕີ ຫງວຽນຊວັນຝຸກ ໄດ້ມີການພົບປະກັບທ່ານເລຂາທິການໃຫຍ່, ປະທາປະເທດຈີນ ສີ ຈິ້ນຜີງ.
ໃນການພົບປະ, ທ່ານນາຍົກລັດຖະມົນຕີ ຫງວຽນຊວັນຝຸກ ຢືນຢັນວ່າ ຫວຽດນາມຍາມໃດກໍ່ໃຫ້ຄວາມສຳຄັນແກ່ການພັດທະນາການພົວພັນມິຕະພາບ ໝັ້ນຄົງ ສົດໃສແລະຍືນຍົງ ກັບປະເທດຈີນ, ຖືວ່ານີ້ເປັນໜຶ່ງໃນບັນດາບຸລິມະສິດສູງສຸດໃນນະໂຍບາຍການຕ່າງປະເທດຂອງຫວຽດນາມ. ທ່ານນາຍົກລັດຖະມົນຕີ ສະເໜີໃຫ້ສອງຝ່າຍຮັກສາການຢ້ຽມຢາມແລະພົບປະຂັ້ນສູງ, ເພີ່ມທະວີຄວາມເຊື່ອຖືທາງການເມືອງ; ສະແດງຄວາມເຊື່ອໝັ້ນວ່າ ງານສະແດງສິນຄ້າ ຊີໄອໄອອີ 2018 ຈະເປີດຊ່ອງທາງການຮ່ວມມືແລະຈັດຈຳໜ່າຍໃໝ່ ທີ່ສະດວກດີ, ສຸມໃສ່ຊຸກຍູ້ການຄ້າສາຍຫຼັກ ແລະການສ້າງເຄື່ອງໝາຍການຄ້າ ເພື່ອໃຫ້ຜະລິດຕະພັນສິນຄ້າຂອງຫວຽດນາມໄດ້ຈຳໜ່າຍໃນຕະຫຼາດຂອງຈີນນັບມື້ນັບຫຼາຍ, ບໍ່ພຽງແຕ່ຢູ່ບັນດາແຂວງຊາຍແດນພາກໃຕ້ເທົ່ານັ້ນ ແຕ່ຍັງໄດ້ຈຳໜ່າຍຢູ່ບັນດາແຂວງທາງພາກຕາເວັນອອກສຽງເໜືອປະເທດຈີນອີກນຳ. ທ່ານນາຍົກລັດຖະມົນຕີກໍ່ສະເໜີໃຫ້ຈີນເປີດປະຕູ, ສ້າງເງື່ອນໄຂໃຫ້ສິນຄ້າຫວຽດນາມເຂົ້າໃນປະເທດຈີນ; ມີນະໂຍບາຍແລະມາດຕະການຕົວຈິງເພື່ອຫຼຸດຜ່ອນລະດັບຂາດດຸນການຄ້າປະຈຸບັນຂອງຫວຽດນາມ, ມຸ່ງໄປສູ່ການຄ້າສອງຝ່າຍມີການເຕີບໂຕຢ່າງຕໍ່ເນື່ອງ ຍືນຍົງ; ຊົມເຊີຍບັນດາວິສາຫະກິດເຕັກໂນໂລຊີສູງຂອງຈີນ ລົງທຶນເຂົ້າຫວຽດນາມ.
ກ່ຽວກັບບັນຫາທະເລຕາເວັນອອກ, ທ່ານນາຍົກລັດຖະມົນຕີ ຫງວຽນຊວັນຝຸກ ສະແດງຄວາມຊົມເຊີຍຜົນສຳເລັດທີ່ຕັ້ງໜ້າຂອງບັນດາກົນໄກເຈລະຈາແລະຮ່ວມມື ໃນຂົງເຂດທີ່ອ່ອນໄຫວໜ້ອຍໃນທະເລ ລະຫວ່າງສອງປະເທດ, ກໍ່ຄືຄວາມຄືບໜ້າເບື້ອງຕົ້ນໃນການເຈລະຈາກ່ຽວກັບປະມວນຂໍ້ກຳນົດການປະພຶດຢູ່ທະເລຕາເວັນອອກ (COC) ລະຫວ່າງອາຊຽນແລະຈີນທີ່ຜ່ານມາມໍ່ນີ້; ພ້ອມກັນນັ້ນກໍ່ສະເໜີໃຫ້ສອງຝ່າຍເຄົາລົບຜົນປະໂຫຍດອັນຊອບທຳຂອງກັນແລະກັນ; ປະຕິບັດຢ່າງເຂັ້ມງວດຄວາມຮັບຮູ້ຮ່ວມຂອງການນຳຂັ້ນສູງຂອງສອງປະເທດ, ຂໍ້ຕົກລົງກ່ຽວກັບຫຼັກການພື້ນຖານທີ່ຊີ້ນຳແກ້ໄຂບັນຫາໃນທະເລຫວຽດນາມ-ຈີນ; ຕັ້ງໝັ້ນແກ້ໄຂຂໍ້ພິພາດຂັດແຍ່ງດ້ວຍສັນຕະວິທີ, ສອດຄ່ອງກັບກົດໝາຍສາກົນ, ອະນຸສັນຍາສະຫະປະຊາຊາດກ່ຽວກັບກົດໝາຍທະເລປີ 1982, ຮັກສາສັນຕິພາບ, ສະຖຽນລະພາບໃນທະເລຕາເວັນອອກແລະໃນພາກພື້ນ.
ແລກປ່ຽນຄວາມເຫັນໃນການພົບປະ, ທ່ານເລຂາທິການໃຫຍ່, ປະທານປະເທດຈີນ ສີ ຈິ້ນຜິງ ເນັ້ນໃຫ້ຄວາມສຳຄັນແກ່ການພົວພັນກັບຫວຽດນາມ, ເຫັນດີເປັນເອກະສັນ ພ້ອມກັນກັບຫວຽດນາມຮັກສາການພົບປະຂັ້າສູງ, ເພີ່ທະວີຄວາມເຊື່ອຖືທາງການເມືອງ, ຊຸກຍູ້ບັນດາຂົງເຂດການຮ່ວມມືໃຫ້ເຂົ້າສູ່ເນື້ອແທ້, ພ້ອມກັນຮັກສາສັນຕິພາບ, ສະຖຽນລະພາບໃນທະເລ, ສ້າງສະພາບແວດລ້ອມທີ່ສະດວກດີໃຫ້ການພົວພັນລະຫວ່າງສອງປະເທດພັດທະນາ. ທ່ານເລຂາທິການໃຫຍ່, ປະທານປະເທດ ສີ ຈິ້ນຜິງ ຢືນຢັນ, ຈີນບໍ່ສະແຫວງຫາການສົ່ງອອກເກີນດຸນກັບຫວຽດນາມ, ຈະເພີ່ມທະວີການນຳເຂົ້າສິນຄ້າຈາກຫວຽດນາມ ເພື່ອໃຫ້ການຄ້າລະຫວ່າງສອງປະເທດພັດທະນາຕາມທິດສົມດຸນ, ຍືນຍົງ.
ຢູ່ທີ່ນະຄອນຊຽງໄຮ້, ສູນພັດທະນາເສດຖະກິດທີ່ໃຫຍ່ທີ່ສຸດຂອງຈີນ, ທ່ານນາຍົກລັດຖະມົນຕີ ແລະຄະນະຜູ້ແທນຫວຽດນາມ ໄດ້ພົບປະແລກປ່ຽນໂດຍກົງກັບຜູ້ນຳຂັ້ນສູງຫຼາຍທ່ານຂອງບັນດາບໍລິສັດຂະໜາດໃຫຍ່ແລະ “ແກ່ນສານ” ຂອງເສດຖະກິດຈີນ, ແລະຊຸກຍູ້ການຮ່ວມມືໃນຂົງເຂດຜະລິດຕະພັນກະສິກຳ, ການເງີນ, ການປະກັນໄພ, ທະນາຄານ, ການກໍ່ສ້າງ, ຄົມມະນາຄົມ, ພະລັງງານ ແລະການຈັດຈຳໜ່າຍ. ທ່ານນາຍົກລັດຖະມົນຕີເນັ້ນຄວາມປະສົງຢາກໃຫ້ວິສາຫະກິດຈີນ ເພີ່ມການນຳເຂົ້າສິນຄ້າກະສິກຳແລະຜະລິດຕະພັນອາຫານທະເລທີ່ມີຄຸນນະພາບສູງຂອງຫວຽດນາມ ເຂົ້າໃນຕະຫຼາດຈີນ, ມຸ່ງໄປສູ່ຄວາມສົມດຸນທາງການຄ້າສອງຝ່າຍ ແລະ ຫວັງວ່າບັນດາວິສາຫະກິດສອງຝ່າຍຈະເຊື່ອມຕໍ່ການຮ່ວມມື ເພື່ອໃຫ້ສອງຝ່າຍມີຜົນປະໂຫຍດຮ່ວມກັນ, ພ້ອມກັນໄຊຊະນະ. ທ່ານນາຍົກລັດຖະມົນຕີມອບໃຫ້ການນຳຂອງກະຊວງ, ຂະແໜງການ ຮັບເອົາຂໍ້ສະເໜີຂອງບັນດາວິສາຫະກິດ ແລະ ເຮັດວຽກລະອຽດຕົວຈິງ, ຜັນຂະຫຍາຍຄວາມຄິດລົງທຶນ ທຸລະກິດ, ພິເສດແມ່ນໃນການຜະລິດ, ປຸງແຕ່ງຜະລິດຕະພັນກະສິກຳຄຸນນະພາບສູງ.
ການທີ່ທ່ານນາຍົກລັດຖະມົນຕີ ຫງວຽນຊວັນຝຸກ ເຂົ້າຮ່ວມ ຊີໄອໄອອີ 2018 ສະແດງໃຫ້ເຫັນເຖິງຄວາມເອົາໃຈໃສ່ເປັນສຳຄັນເຖິງການພັດທະນາການພົວພັນທີ່ໝັ້ນຄົງ, ສົດໃສ, ແລະຢາກພ້ອມກັນກັບຈີນຊຸກຍູ້ການຮ່ວມມືເສດຖະກິດ, ການຄ້າໃຫ້ພັດທະນາຢ່າງຍືນຍົງ; ສົ່ງເສີມບັນດາກະຊວງ, ຂະແໜງການແລະທ້ອງຖິ່ນ, ວິສາຫະກິດຂອງສອງປະເທດ ເພີ່ມທະວີການຮ່ວມມືດ້ວຍຈິດໃຈສອງຝ່າຍມີຜົນປະໂຫຍດຮ່ວມກັນ; ສະໜັບສະໜູນຊຶ່ງກັນແລະກັນໃນການຈັດຕັ້ງເຫດການທີ່ສຳຄັນຂອງແຕ່ລະປະເທດ./.
ໂດຍ ຫງວຽນດຶກ