ປະທານສະພາດູມາແຫ່ງຊາດລັດເຊຍ ຢ້ຽມຢາມປະເທດຫວຽດນາມຢ່າງເປັນທາງການ
ວກ.ອອນໄລ - ໂດຍຕອບສະໜອງຕາມຄຳເຊີນຂອງປະທານສະພາແຫ່ງຊາດຫວຽດນາມ ຫງວຽນທິກິມເງິນ, ຄະນະຜູ້ແທນຂັ້ນສູງສະພາດູມາແຫ່ງຊາດ, ສະພາແຫ່ງຊາດແຫ່ງສະຫະພັນທະລັດລັດເຊຍ ນຳໂດຍທ່ານ ວີອາເຈສລາບ ວິກຕໍໂຣວິກ ໂວໂລດີນ, ປະທານສະພາດູມາແຫ່ງຊາດ ໄດ້ດຳເນີນການຢ້ຽມຢາມປະເທດຫວຽດນາມຢ່າງເປັນທາງການ ໃນລະຫວ່າງວັນທີ 23 – 24 ທັນວາ 2018.
ໃນຂອບເຂດການຢ້ຽມຢາມ, ປະທານສະພາດູມາແຫ່ງຊາດລັດເຊຍ ວ.ວ. ໂວໂລດີນ ໄດ້ພົບປະເຈລະຈາກັບປະທານສະພາແຫ່ງຊາດຫວຽດນາມ ຫງວຽນທິກິມເງິນ; ຢ້ຽມຄຳນັບເລຂາທິການໃຫຍ່, ປະທານປະເທດຫວຽດນາມ ຫງວຽນຝູຈ້ອງ, ນາຍົກລັດຖະມົນຕີຫວຽດນາມ ຫງວຽນຊວັນຝຸກ. ໃນການພົບປະເຈລະຈາ ຢ້ຽມຄຳນັບນັ້ນ, ສອງຝ່າຍໄດ້ເນັ້ນວ່າ ການຢ້ຽມຢາມມີຄວາມໝາຍສຳຄັນທີ່ສຸດ, ເປັນການສືບຕໍ່ການເຄື່ອນໄຫວແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດ, ແນໃສ່ເພີ່ມທະວີການຮ່ວມມືທີ່ກວ້າງຂວາງເລິກເຊິ່ງລະຫວ່າງສອງປະເທດ, ສອງສະພາແຫ່ງຊາດ, ຂີດໝາຍບາດກ້າວການພັດທະນາໃໝ່ໃນການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ສະຫະພັນທະລັດລັດເຊຍ.
ສອງຝ່າຍຕີລາຄາເປັນເອກະພາບວ່າ, ໃນເວລາທີ່ຜ່ານມາ ການພົວພັນຮ່ວມມືລະຫວ່າງສະພາແຫ່ງຊາດຂອງສອງປະເທດ ໄດ້ຮັບການປັບປຸງຢ່າງບໍ່ຢຸດຢັ້ງ, ພັດທະນາຢ່າງຈົບງາມ. ສອງຝ່າຍໄດ້ແລກປ່ຽນຄະນະຜູ້ແທນຂັ້ນຕ່າງໆຢ່າງເປັນປົກກະຕິ; ປະສານສົມທົບ, ປຶກສາຫາລື ແລະ ສະໜັບສະໜູນຊຶ່ງກັນແລະກັນຢູ່ທີ່ເວທີປາໄສລັດຖະສະພາພະຫຸພາຄີໃນພາກພື້ນແລະສາກົນ, ປະກອບສ່ວນປັບປຸງແລະພັດທະນາ ໃຫ້ການພົວພັນມິດຕະພາບທີ່ເປັນມູນເຊື້ອ, ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ສະຫະພັນທະລັດລັດເຊຍ ເລິກເຊິ່ງກວ່າອີກ.
ໃນຂອບເຂດຂອງຕົນ, ສະພາແຫ່ງຊາດຫວຽດນາມ ກໍຄືສະພາດູມາແຫ່ງຊາດລັດເຊຍ ໄດ້ເຮັດຈົນສຸດຄວາມສາມາດຂອງຕົນ ເພື່ອປັບປຸງຄວາມພົວພັນລະຫວ່າງສອງປະເທດໃນທຸກຂົງເຂດ; ສ້າງຂອບເຂດນິຕິທຳທີ່ສະດວກດີເພື່ອຊຸກຍູ້ການພົວພັນດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວແລະການແລກປ່ຽນສັງສັນລະຫວ່າງປະຊາຊົນໃນທຸກຂັ້ນໃຫ້ຂະຫຍາຍຕົວ, ພິເສດແມ່ນຂັ້ນທ້ອງຖິ່ນ. ປະເທດລັດເຊຍພ້ອມແລ້ວທີ່ຈະສະໜອງທຶນການສຶກສາຕື່ມອີກໃຫ້ຫວຽດນາມ ເພື່ອອົບຮົມສຶກສາຄູສອນພາສາລັດເຊຍຢູ່ຂັ້ນສາມັນສຶກສາ, ນອກເໜືອຈາກຈຳນວນ 1.000 ທຶນການສຶກສາທີ່ງົບປະມານຂອງສະຫະພັນທະລັດລັດເຊຍສະໜອງໃຫ້ນັກຮຽນຫວຽດນາມ.
ທັງສອງຝ່າຍຮູ້ສຶກດີໃຈທີ່ເຫັນວ່າ, ການພົວພັນດ້ານການເມືອງລະຫວ່າງສອງປະເທດໄດ້ຮັບການປັບປຸງຢ່າງບໍ່ຢຸດຢັ້ງ ໂດຍຜ່ານການແລກປ່ຽນຄະນະຜູ້ແທນຂັ້ນຕ່າງໆຢ່າງເປັນປົກກະຕິ, ພິເສດແມ່ນຂັ້ນສູງ, ຕາມບັນດາຊ່ອງທາງພັກ, ລັດ ກໍ່ຄືລະຫວ່າງທ້ອງຖິ່ນ, ວິສາຫະກິດ ແລະອົງການຈັດຕັ້ງສັງຄົມຂອງສອງປະເທດ; ສະແດງຄວາມເຊື່ອໝັ້ນວ່າ ພ້ອມກັນກັບການຢ້ຽມຢາມສະຫະພັນທະລັດລັດເຊຍຂອງເລຂາທິການໃຫຍ່ ຫງວຽນຝູຈ້ອງ ໃນເດືອນກັນຍາ 2018, ການຢ້ຽມຢາມຫວຽດນາມຂອງນາຍົກລັດຖະມົນຕີລັດເຊຍ ເດິມີຕຣີ ແມດເວແດບ ໃນເດືອນພະຈິກ 2018 ແລະ ການຢ້ຽມຢາມຫວຽດນາມຄັ້ງນີ້ຂອງປະທານສະພາດູມາແຫ່ງຊາດລັດເຊຍ, ຈະສ້າງກຳລັງໜູນທີ່ແຂງແຮງເພື່ອຊຸກຍູ້ການຮ່ວມມືສອງຝ່າຍໃນທຸກຂົງເຂດໃຫ້ຂະຫຍາຍຕົວຍິ່ງກວ່າອີກ. ສອງຝ່າຍຕີລາຄາວ່າ, ສອງປະເທດພວມມີຄວາມຕັ້ງໜ້າໃນການຈັດຕັ້ງ ປີຫວຽດນາມຢູ່ລັດເຊຍ ແລະ ປີລັດເຊຍຢູ່ຫວຽດນາມ ໃນປີ 2019 ແລະປີ 2020 ເນື່ອງໃນໂອກາດສະເຫຼີມສະຫຼອງ 25 ປີແຫ່ງການເຊັນສົນທິສັນຍາກ່ຽວກັບບັນດາຫຼັກການພື້ນຖານຂອງການພົວພັນມິດຕະພາບຫວຽດນາມ - ສະຫະພັນທະລັດລັດເຊຍ ແລະ ສະເຫຼີມສະຫຼອງ 70 ປີແຫ່ງການສ້າງຕັ້ງການພົວພັນທາງການທູດລະຫວ່າງສອງປະເທດ.
ສອງຝ່າຍໄດ້ແລກປ່ຽນຢ່າງກວ້າງຂວາງເລິກເຊິ່ງກ່ຽວກັບຫຼາຍເນື້ອໃນການຮ່ວມມືລະຫວ່າງສອງປະເທດ, ສອງສະພານິຕິບັນຍັດ, ໃນນັ້ນມີຂໍ້ຕົກລົງກ່ຽວກັບການສ້າງຕັ້ງຄະນະກຳມະການຮ່ວມຂອງລັດຖະສະພາ ລະຫວ່າງສະພາແຫ່ງຊາດຫວຽດນາມ ແລະ ສະພາດູມາແຫ່ງຊາດລັດເຊຍ. ສອງຝ່າຍເຫັນດີເປັນເອກະພາບວ່າ ຄະນະກຳມະການຈະຈັດຕັ້ງການປະຊຸມໝູນວຽນ, ປີ 2019 ຈະຈັດຕັ້ງການປະຊຸມຄັ້ງທຳອິດຢູ່ຫວຽດນາມ. ນີ້ແມ່ນຫຼັກໝາຍສຳຄັນໃນການພົວພັນຮ່ວມມືລະຫວ່າງສອງຝ່າຍ. ການຈັດຕັ້ງການປະຊຸມໝູນວຽນຢູ່ບັນດາທ້ອງຖິ່ນຈະປະກອບສ່ວນພັດທະນາການພົວພັນລັດຖະສະພາລະຫວ່າງສອງປະເທດ, ສ້າງກຳລັງໜູນເພື່ອເປີດກວ້າງການຮ່ວມມືລະຫວ່າງບັນດາທ້ອງຖິ່ນຂອງສອງປະເທດ.
ສອງຝ່າຍກໍ່ໄດ້ປຶກສາຫາລືຫຼາຍບັນຫາທີ່ລະອຽດເພື່ອຍົກລະດັບການພົວພັນລະຫວ່າງສອງປະເທດຂຶ້ນສູ່ລະດັບໃໝ່, ຊ່ວຍໃຫ້ສອງຝ່າຍເພີ່ມທະວີຄວາມເຂົ້າໃຈຊຶ່ງກັນແລະກັນ. ຄະນະກຳມະການຮ່ວມຂອງລັດຖະສະພາທີ່ຫາກໍ່ໄດ້ສ້າງຕັ້ງຂຶ້ນມາແມ່ນຮູບການຮ່ວມມືໃໝ່, ກວມທັງການຮ່ວມມືລະຫວ່າງບັນດາອົງການວິຊາສະເພາະຂອງສະພາແຫ່ງຊາດຂອງສອງປະເທດ ແລະ ຈະສ້າງກຳລັງໜູນຕື່ມອີກໃຫ້ການຮ່ວມມືລະຫວ່າງສອງຝ່າຍໃນຫຼາຍຂົງເຂດ, ກວມທັງການພົວພັນລັດຖະສະພາ, ການພົວພັນເສດຖະກິດ, ໃນນັ້ນມີເສດຖະກິດ ດິຈິຕອນ. ຫວຽດນາມແລະສະຫະພັນທະລັດລັດເຊຍມີການພົວພັນຄູ່ຮ່ວມມຍຸດທະສາດຮອບດ້ານ, ດັ່ງນັ້ນ ການພົວພັນລະຫວ່າງສອງສະພາແຫ່ງຊາດຂອງສອງປະເທດຕ້ອງໄດ້ຮັບການຊຸກຍູ້ສົ່ງເສີມຕື່ມອີກ, ປະກອບສ່ວນເພີ່ມທະວີຄວາມສຳພັນມິດຕະພາບ ແລະ ຄວາມເຂົ້າໃຈ, ໄວ້ວາງໃຈຊຶ່ງກັນແລະກັນ.
ເນື່ອງໃນໂອກາດນີ້, ຄະນະຜູ້ແທນຂັ້ນສູງສະພາດູມາແຫ່ງຊາດລັດເຊຍ ນຳໂດຍທ່ານ ວ.ວ.ໂວໂລດີນ, ປະທານສະພາດູມາແຫ່ງຊາດ ໄດ້ໄປວາງພວງມາລາທີ່ອະນຸສາວະລີວິລະຊົນທີ່ໄດ້ເສຍສະຫຼະເພື່ອຊາດ; ວາງພວງມາລາໄຫວ້ອາໄລທີ່ສຸສານປະທານໂຮ່ຈີມິນ; ຢ້ຽມຊົມບໍລິເວນອະນຸສອນສະຖານປະທານໂຮ່ຈີມິນທີ່ທຳນຽບປະທາປະເທດ./.
ສັງລວມໂດຍ ແທງແອງ